धनगढी, वैशाख ३० । नेकपा माओवादी केन्द्रले कैलालीको धनगढीमा चुनावी प्रचारप्रसारलाई तीव्रता दिएको छ । सात नम्बर प्रदेशमा स्थानीय तहको चुनाव आउन महिना दिन बाँकी रहसँगै यहाँ चुनावको प्रचारप्रसारलाई तीव्रता दिइएको हो । धनगढी उपमहानगरपालिकाका अधिकांश वडाहरुमा केन्द्रले चुनावी सभा समेत गरेको छ । धनगढी उपमहानगरपालिकाको मेयर पदका लागि रामसमझ राना र उपमेयर पदका लागि शान्ति अधिकारीको नाम टुङ्गो लागेसंगै केन्द्रले चुनावी माहोल झनै तताएको हो । घरघरमा गएर मेयर, उपमेयरका उम्मेद्वार अहिले मतदाताहरुलाई रिझाउनमा व्यस्त छन् । अन्य दलहरुले मेयर, उपमेयर पदका लागि उम्मेदवार टुङ्गो लगाउन नसकिरहेको बेला माओवादी केन्द्रले भने तीन हप्ताअघि नै टुङ्गो लगाइसकेको छ । धनगढीका करिव प्रत्येक वडामा केन्द्रले चुनावी सभा गरि सकेको मेयर पदका उम्मेदवार रामसमझ रानाले जानकारी दिए । मतदाताहरुको घर दैलो अभियानमा निकै व्यस्त रहेको उनको भनाइ छ । झण्डै २ दशकपछि स्थानीय तहको चुनाव भइरहेकाले मतदाता पनि भोट हाल्न निकै खुसी देखिएका छन् । थारु समुदायको बढि बसोबास रहेको यहाँ आगामी स्थानीय तहको चुनावमा धनगढीको मेयरमा आफू निर्वाचित हुनेमा रानाले दाबी गरे । मतदाताले आफ्ना काम नजिकबाट नियालेकाले कामको मूल्याङ्कन गर्दै यो चुनावमा आफूलाई भारी मतले विजयी गराउनेमा उनले विश्वास व्यक्त गरे । नगरवासीको समस्या बुझेको र समाधान गर्न सक्ने क्षमता भएकाले अागामी जेष्ठ ३१ गते हुने स्थानीय चुनावमा विजयी गराउन मतदातालाई मेयर पदका उम्मेदवार रानाले आग्रह गरे । यस्तै उपमेयर पदकी उम्मेदवार शान्ती अधिकारी क्षेत्रीले पनि आफू निरन्तर नगरबासीको सुःख दुःखमा सहभागि भएकाले मतदाताले त्यसको मूल्याङ्कन गर्नेमा विश्वस्त रहेको बताइन् । महिला तथा नगरबासीका पिडा आफूले नजिकबाट बुझेकाले आगामी स्थानीय चुनावमा विजयी हुनेमा उनले दाबी गरिन् । प्रष्ट तथा कुनै लुकाइछिपाइ नराख्ने स्वभावकि अधिकारी अहिले भोट माग्न घर दैलो देखि चुनावी सभामा व्यस्त छिन् । केन्द्रको चुनावी प्रचारप्रसारको कार्यक्रम अन्तर्गत आज धनगढी उपमहानगरपालिका–६ मा चुनावी सभा भइरहेको छ । सभावमा स्थानीयको उल्लेख्य सहभागिता रहेको अखिल क्रान्तिकारीका केन्द्रिय सदस्य रमेश भट्टराइले जानकारी दिए । सभामा धनगढी नगर अध्यक्ष निर्मल शाह, मेयर पदका उम्मेदवार रामसमझ राना, उप मेयरकी उम्मेद्वार शान्ती अधिकारी क्षेत्री, भावना अखिल क्रान्तिकारीका केन्द्रिय सदस्य रमेश भट्टराइ, वडा नम्बर ६ का अध्यक्ष पदका उम्मेदवार भागिराम चौधरी, वडा नम्बर ६ कै महिला सदस्य उम्मेद्वार भावना देवि चौधरी लगायत स्थानीयको सहभागिता रहेको सदस्य भट्टराइले जानकारी दिए ।