युएई । अन्तराष्ट्रीय नेपाली कलाकार समाज, युएई (ईनास) क्षेत्रीय समिती रसअल खेमाको अध्यक्षमा नीलम पुन निर्वाचित भएका छन् ।  शुक्रबार १० तारिक सम्पन्न अधिबेशनले पुनको नेतृत्वमा २१ सदस्यीय समिती चयन गरेको छ । समितीको बरिष्ठ उपाध्यक्षमा संकल्प चन्द, प्रथम उपाध्यक्षमा प्रकाश सुबेदी र द्वितीय उपाध्यक्षमा अमर सिंह खत्री रहेका छन् । महासचीबमा सुरज खत्री, सचीबमा दिल बडुवाल, कोषाध्यक्षमा शोभा परियार र सहकोषाध्यक्षमा प्रतिक्षा शर्मा रहेका छन् ।  सदस्यहरुमा भक्त तुम्बाहाम्फे लिम्बु, प्रदीप लिम्बु, मनिष जीएम, प्रबिण गुरुंग, सुबास घिसिंग, माया नेपाली, रबिन केसी, संगिता मगर, अनिता घलान, रेशम मल्ल, रंजिता बिक, सपना राई र दिपक गिरी रहेका छन् ।  अधिबेशनले जनार्दन सुबेदी, सन्तोष अधिकारी, गणेश शाहीलाई संरक्षकमा चयन गरेको छ । त्यसैगरी सल्लाहकारमा जिएन शर्मा, दिपक बिष्ट, धन बहादुर चन्द, राजेन्द्र रोस्यारा, गुन्ज बस्नेत र ईन्द्रराज पौडेल रहेका छन् ।  एनआरएन युएईको पुर्ब महासचीब सन्तोष प्रसाईको प्रमुख आतिथ्यतामा सम्पन्न अधिवेशनमा पत्रकार महासँघ युएईका सचिब मेघराज सापकोटा, इनास महासचीब राम तामाँगको बिशेष अतिथ्यता रहेको थियो । त्यसैगरी दैलेख सेवा समाजका अध्यक्ष धन बहादुर चन्द, गणेश शाही, नेपाली जनप्रगतिशील मंच राकका अध्यक्ष दीपक बिष्ट, एनआरएन राकका अध्यक्ष जनार्दन सुबेदी, अर्घाखाँची सम्पर्क समिती राकका गुन्ज बस्नेत लगायतको उपस्थिती रहेको थियो । कार्यक्रम ईनास राकका निबर्तमान अध्यक्ष केबिन जंग शाहीको सभापतित्वमा सम्पन्न भएको थियो । 

इस्लामाबाद । अगस्त ११ देखि पाकिस्तानको सत्ताको बागडोर सम्हालिरहेका पूर्व पाकिस्तानी क्रिकेट कप्तान इमरान खानको बाटो त्यति सहज छैन। ठुलो आर्थिक संकटबाट गुज्रिरहेको देशलाई उकास्न अन्तर्राष्ट्रिय मुद्रा कोष (आइएमएफ) बाट १२ अर्ब अमेरिकी डलरको ऋण लिन खोज्ने इमरानको योजना सफल होला जस्तो देखिन्न। यस्ताे भएकाे अवस्थामा याे उनलार्इ पहिलाे गाँसमै ढुङ्गा जस्तै हुनेछ । अमेरिकाको छिर्के मिडियामा वर्तमान आर्थिक संकटबाट जुझ्न पाकिस्तानले आइएमएफसँग ऋण माग्न सक्ने समाचार आइरहेको बेला अमेरिकी विदेशमन्त्री माइक पोम्पियोले आफूहरूले आइएमएफको प्रतिक्रिया हेरिरहेको चेतावनी दिएका छन्। पोम्पियोकै शब्दमा, “हामीहरू आइएमएफले के गर्छ भन्ने राम्ररी नियालिरहेका छौं।  कोषले कुनै पनि प्रकारको गल्ती गर्नु हुन्न । ” हुन त सिएनबिसीसँगको एउटा साक्षात्कारमा पोम्पियोले आफूहरूले पाकिस्तानसँग  पारस्परिक लाभको सम्बन्ध स्थापित स्थापित गर्न इच्छुक रहेको बताएका थिए।  तर उनले अहिलेको अवस्थामा पाकिस्तानलाई डलर दिइनु तर्कसंगत नरहेको बताए। पोम्पियोका अनुसार आइएमएफको मुद्रा संचितिमा अमेरिकी डलरको भूमिका महत्वपूर्ण हुने गर्दछ।  उनका अनुसार पाकिस्तानलाई दिनु नै पर्ने भए चिनियाँ बोंड  दिइनु  पर्ने या चीनले नै उसलाई ऋण दिनसक्ने विचार व्यक्त गरेका छन्। इमरानलाई रित्तो भाँडो पाकिस्तानको डलर संचितिमा उल्लेख्य रूपमा कमी आएको छ र उसलाई तत्काल सहयोग चाहिएको छ।  उता चीनबाट उसले यसअघि नै ठुलो रकम उधारो लिइसकेको छ। पाकिस्तानको प्रमुख समाचारपत्र ‘डन’मा प्रकाशित एउटा रिपोर्ट अनुसार इमरान  नेतृत्वको ‘तहरिक – ए – इंसाफ’ पार्टीले सरकार बने लगत्तै आइएमएफसँग  सहायताको लागि सम्पर्क गर्नेछ। संकटग्रस्त अर्थतन्त्र पाकिस्तानको निर्यातमा लगातार कमी आइरहेको छ र उसको ऋण दिनानुदिन बढ्दै गइरहेको छ। फाइनान्सियल टाइम्सका अनुसार पाकिस्तानका वरिष्ठ अधिकारीहरू कोषसँग  १२ अर्ब डलरको ऋण लिन आवश्यक तयारी गरिरहेका छन्। उसो त समाचार एजेन्सी रोयटर्सले अन्तर्राष्ट्रिय मुद्रा कोषका एक जना प्रवक्तालाई उद्धृत गर्दै पाकिस्तानको तर्फबाट कोषलाई कुनै प्रकारको पनि अनुरोध आएको छैन। यस्तो अवस्थामा पाकिस्तान फेरि  एकपल्ट चीनसँग  ऋण लिन सक्छ।  चीनको महत्वाकांक्षी परियोजना ‘बेल्ट एंड रोड प्रोजेक्ट’मा सामेल भए यता उसले चीनबाट ठुलो रकम ऋण लिइसकेको छ।  अर्थशास्त्रीहरूले पाकिस्तानलाई चीनसँग लिएको ऋणसम्बन्धमा चेतावनी दिइसकेका छन्। चीनको बढ्दो ऋण अर्थशास्त्रीहरूका अनुसार यस परियोजना अन्तर्गत पाकिस्तानमा जेजति काम भइरहेको  छ त्यसमा पाकिस्तानको स्वामित्व नरहन सक्छ।  रिपोर्टहरू अनुसार पाकिस्तानलाई चीनको ऋण तिर्न गाह्रो पर्न सक्छ। डनले सोमवार प्रकाशित गररेको एउटा रिपोर्ट अनुसार चीन ‘चाइना पाकिस्तान इकनॉमिक करिडोर’मा अझ लगानी थप्न तयार रहेको छ। घट्दो विदेशी मुद्रा संचिति केही महिना यता पाकिस्तानको विदेशी मुद्रा भंडारमा ठुलो कमी आएको छ।  अन्तर्राष्ट्रिय बजारमा कच्चा तेलको मूल्यमा  लगातारको वृद्धिले पाकिस्तानले गर्ने आयात महँगो हुँदै गइरहेको  छ। स्टेट बैंक अफ पाकिस्तानले २०  जुलाइमा जारी गरेको तथ्यांक अनुसार पाकिस्तानसंग अब मात्र ९ अर्ब डलर विदेशी मुद्र मात्र बाँकी छ। यो रकम मुस्किलले २ महिनासम्म आयात गर्न मात्र पर्याप्त रहेको छ। चीनले भने पाकिस्तानलाई लगातार ऋण उपलब्ध गरिरहेको छ।  गत आर्थिक वर्षमा मात्र उसले चीनसँग ५ अर्ब डलर ऋण लिएको थियो।  गत वर्ष डलरको तुलनामा पाकिस्तानी रुपैयाँ २० प्रतिशतले अवमूल्यन भएको थियो र पश्चिमा अर्थशास्त्रीहरूका अनुसार यस वर्ष रुपैयाँ अझै १० प्रतिशत तल खस्किन सक्छ।

युएई ,साउन १५ । नेपाली दूतावास युएईले गैर कानुनी रूपमा युएईमा कार्यरत नेपालीलाई युएई सरकारले ल्याउन लागेको आममाफी प्रक्रियामा सहभागी हुन अनुरोध गरेको छ। मंगलवार एक सूचना जारी गर्दै दूतावासले बिदेशी कामदारलाई लक्षित गरि युएई सरकारले आगामी अगस्ट १ तारीखदेखि अक्टोबर ३१ तारीखसम्म लागू हुने गरि सुरु गर्न लागेको आममाफी प्रक्रियामा सहभागी भएर बैधानिक बन्न वा स्वदेश फर्किन गैर कानुनी रूपमा कार्यरत नेपाली लाई अनुरोध गरेको छ। युएई सरकारले सुरु गर्न लागेको आममाफीको नयाँ नियम ३ महिना सम्मको लागि मात्रै भएको हुदा यथासिग्र आबस्यक कागजात र दस्तुर सहित दूतावासको कार्यलयमा सम्पर्क गारी स्वदेश फर्किन आवश्यक एक तर्फी यात्रा अनुमति पत्र वा नयाँ पासपोर्ट बनाउन दूतावासले सुचना मार्फत जानकारी दिएको छ। दूतावासद्वारा जारी सूचनामा गैर कानुनी रूपमा बसोबास गरेका नेपालीले नयाँ पासपोर्ट बनाउनका लागि पुरानो राहदानीको कपी ,नेपाली नागरिकताको कपी प्रहरी रिपोर्ट (पुरानो राहदानी हराएको अवस्थामा), राहदानी बनाउनको लागि दस्तुर नियमितको लागि दिरहाम २००, हराएरर बिग्रिएर राहदानी बनाउनु परेमा ४००र नाबालको लागि दिरहाम १००, उल्लेख गरेको छ । यस्तै एकतर्फी यात्रा अनुमति पत्र (ट्राभल डकुमेन्टका) लागि, पुरानो राहदानीको कपी भए पुग्नेछ भने यस्तो डकुमेन्ट निशुल्क जारी गरिने दूतावासले जानकारी दिएको छ।

काठमाडौं, साउन १५ । नेपाली कामदारलाई अहिले मलेसिया जान रोक लगाइएको छ । यो नेपाल सरकारले रोकेको छ। वैदेशिक रोजगारीका क्रममा मलेसिया जादाँ नेपालीहरूले धेरै शुल्क तिर्नुपरेका भन्दै सरकारले अर्को व्यवस्था नभएसम्मका लागि भन्दै मलेसिया कामदार पठाउन रोक लगाएको हो । शुरुमा विरोध गरिएपनि यस विषयमा अहिले व्यापक छलफल गरिएको छ । र छलफलले नयाँ उचाइ लिएको छ । नेपालले वैदेशिक रोजगार सुझाव कार्यदल बनाएको थियो । जसले विदेशिने कामदारलाई ठगिनबाट जोगाउन र आर्थिक भारलाई ‘शून्य’ मा झार्न सरकारलाई नयाँ सुझाव दिएको छ । आइतबार श्रम, रोजगार तथा सामाजिक सुरक्षा मन्त्री गोकर्ण विष्टलाई बुझाइएको प्रतिवेदनमा कामदारलाई आर्थिक भार पनि नथोपरिने र नठगिने वातावरण तयार गर्न केही महत्त्वपूर्ण सुझाव समेटिएका बताइएको छ । यसको दबाब मलेसिया सरकारसम्म पनि पुगेको छ। नेपाली कामदार जान रोकिएसँगै त्यहाँ सुरक्षा गार्डको अभाव भइरहेको भन्ने समाचार आइरहेका छन्। जसको कारण मलेसिया सरकार पनि यो विषयलाई जतिसक्दो चाँडो टुङ्गो लगाउन चासो व्यक्त गरेको छ । साथै उसले नेपाली कामदारका समस्याका बारेमा आफू जानकार रहेको बताउँदै त्यहाँ मानव संसाधन मन्त्रीले नेपालका यसअघिको कामदार नपठाउने निर्णयमा पुनर्विचार गर्न आग्रह गरेको छ । र समस्या समाधानका लागि सरकारी तबरबाट काम गर्न सकिने बताएको छ । अब समाधान के हुन्छ त ? कसरी मिलाउन सकिएला यो विषय। दुईवटा विकल्प छन्। एउटा फ्री भिसा फ्री टिकट प्रक्रियालाई हटाएर ‘इम्प्लोयर्स पे मोडल’ को प्रयोगलार्इ प्रभावकारी गर्ने अर्को कोरियामा नेपाली कामदार पठाए जस्तै जिटुजी व्यवस्थामार्फत सरकारी तबरबाटै कामदार पठाउने। दुवैको उद्देश्य एउटै हो, नेपाली कामदारको सुरक्षा र काम अनुसारको प्रभावकारी तलब सुविधा। इम्प्लोयर्स पे मोडल किन ? अहिले कार्यान्वयनमा रहेको ‘फ्री भिसा र टिकट’ को मोडलका कारण बढिरहेको कामदार ठगिने क्रम रोक्न यो व्यवस्थामा नेपाली कामदार लैजाने मुलुकका रोजगारदाताले लाग्ने सबै खर्च आफैँले पठाउनुपर्छ । त्यसैले ‘कामदारले पैसा तिर्नु पर्दैन । बिचमा कुनै दोस्रो निकायले खेल्न र ठग्न सक्दैन। श्रीलंकामा यो मोडल सफल छ। जी टु जी भएमा के फाइदा ? कोरियामा नेपाली गएको जस्तै सरकारी तबरबाट कामदार पठाउने व्यवस्था भएकाले यो अरू व्यवस्थाभन्दा धेरै सुरक्षित छ। विदेशमा पाउने तलब र सुविधा त्यहाँको सरकारले तोकेको बमोजिम नै हुन्छ। नेपालीहरूले अहिले पाइरहेको तलब भन्दा धेरै तलब हुन सक्छ।

बेरुत, साउन १५ । इस्लामिक स्टेट्स आतङ्ककारी समूह (आइएस) ले सिरियाको दक्षिणी भागमा पर्ने स्वेदा प्रान्तमा ३६ जना महिला र बालबालिका अपहरण गरेको छ । मानव अधिकारवादी समूहले ३६ महिला तथा बालबालिका आइएसको अपहरण गरेको सोमबार जानकारी दिएको छ । केही दिनअगाडि मात्र इस्लामिक स्टेट्स समूहले आत्मघाती आक्रमण र लगातार गरेको गोलाबारीमा परी स्वेदा प्रान्तमा २५० भन्दा बढीका मृत्यु भइसकेको छ । यी आक्रमणहरूमा मारिएका व्यक्ति आधाभन्दा बढी सर्वसाधारण भएका अब्जरभेटरी प्रमुख रामी अब्देल रहमानले बताएका थिए। सरकारको बलियो प्रभाव रहेको सिरियाको दक्षिणी भागमा पर्ने स्वेदामा प्रान्तका केही दिनदेखि लगातार आत्मघाती आक्रमण, गोलाबारी र अपहरण जस्ता घटना जारी रहेको छ । सिरियामा सन् २०११ को मार्च महिनादेखि शुरु भएको रक्तपातपूर्ण गृहयुद्धबाट तीन लाख ५० हजारको मृत्यु भइसकेको छ, र तुलनात्मकरूपमा शान्त देखिएको स्वेदा प्रान्तमा पहिलोपटक भीषण आक्रमण भएको हो । सिरियाली राष्ट्रपति बसार अल असदको राजीनामाको माग गर्दै भएको जनआन्दोलन गृहयुद्धमा परिणत भएको थियो । विश्वका महाशक्ति राष्ट्र संयुक्त राज्य अमेरिका र रुस तथा युरोपेली युनियन आबद्ध मुलुकहरू र अरब मुलुकको राजनीतिक, आर्थिक, सामरिक तथा हातहतियारको प्रत्यक्ष, अप्रत्यक्ष सहयोगका कारण यहाँको गृहयुद्धबाट ठूलो मानवीय क्षति पुगेको हो । गृहयुद्धको चपेटामा परेर लाखौँको सङ्ख्यामा मानिस घाइते हुनाका साथै लाखौँ सर्वसाधारण देश बाहिर शरणार्थी बन्न बाध्य भएका छन् । रासस÷एएफपी

बाँके, साउन ८ । कामको खोजीमा दैनिक एक हजार नेपाली भारत जाने गरेका छन् । बाँकेको जमुनाहा नाकाबाट युवा मात्र होइन, महिला तथा ज्येष्ठ नागरिकसमेत भारत गइरहेका छन् । इलाका प्रहरी कार्यालय जमुनाहाका अनुसार एक हप्तायता जुम्ला, कालिकोट, सुर्खेत, दैलेख, रुकुम, जाजरकोट, रोल्पा, दाङ, प्युठानबाट कामको खोजीमा दैनिक एक हजार भारत गइरहेका छन् । इलाका प्रहरी कार्यालय जमुनाहाका प्रहरी नायब निरीक्षक अनिल शाहले कामका लागि धेरै भारत जाने गरेकाले नेपालीको रेकर्ड राख्न कठिन भएको बताए । उनले हुल बाँधेर पहाडी र हिमाली भेगका नेपाली कामको खोजीमा भारत पलायन हुने गरेको बताए । एक हुलमा कम्तीमा १५-२० जना भारत पस्ने गरेको सइ शाहले बताए । उनले भने, ‘युवाको समूह हुल बाँधेर भारत जान लागेको देख्दा मन खिन्न हुन्छ ।’ कामका लागि भारत जाने र फर्किनेलाई लक्षित गरी यातायातका साधनसमेत बढेका छन् । स्वर्गद्वारी यातायात प्रालिले यात्रुको चाप बढेपछि सवारीसाधन थपेको छ । कामको खोजीमा भारत जाने नेपालीको संख्या बढेपछि पाँचवटा ‘हायस’ थप गरेको प्रालिका अध्यक्ष दीपकराज चन्दले बताए । उनले हिमाञ्चल प्रदेशको सिमलामा स्याउ टिप्ने सिजन भएकाले कामको खोजीमा भारत जाने नेपालीको संख्या तीन गुणाले बढेको बताए । प्रालिले सञ्चालन गरेका हायसका साथै दाङबाट दुईवटा यात्रुबाहक बस र भारतको रुपडिहाबाट प्रत्येक घन्टा रोडवेज बस छुट्ने गरेको छ । कपिपय सवारीसाधन नपाएर सिमला जाँदै गरेका नेपाली फर्किने गरेको इलाका प्रहरी कार्यालय जमुनाहाका इन्चार्ज शाहले बताए । नयाँ पत्रिकामा खबर छ ।

युएई ,साउन ५। युएईमा ब्लडमनीको सजाय पाएका खैरेनी ९, चितवनका टोपबहादुर बिक नेपाल फर्किने भएका छन्। ब्लडमनी बापतको रकम १ लाख दिर्हाम्स नेपाली झन्डै ३० लाख रुपैयाँ बुझाउन नसक्दा ४ बर्ष देखि स्वदेश फर्कन नपाएका बिकलाई अदालतको फैसला अनुसारको ब्लड मनि रकम बुझाइ सम्पुर्ण कानुनी प्रक्रिया पूरा गरि नेपाल जाने बाटो खुल्ला गरिएको युएई स्थित नेपाली दूतावासले जानकारी दिएको छ। चार बर्ष अघि १४ जुन २०१४ मा काम गर्दै गर्दा क्रेन दुर्घटनामा परि दुई थाई नागरिकको ज्यान गएपछि युएईको अलऐनस्थित ‘सिभिल कोर्ट’ ले कम्पनी, क्रेन अपरेटर र हेल्पर टोपबहादुरलाई दोषी ठहर गर्दै पीडितका परिवारलाई ४ लाख दिराम ब्लडमनि दिनुपर्ने फैसला सुनाएको थियो । जसअनुसार कम्पनीका तर्फबाट २ लाख, पाकिस्तानी क्रेन अपरेटर र टोपबहादुरको भागमा एक–एक लाख दिराम परेको थियो । दुर्घटना पछी ४ महिना २० दिन जेलमा बसेका बिकलाई फैसला पछी अदालतले यात्रा प्रतिबन्ध गरि कम्पनीमा पठाए पनि उनी काम गर्ने कम्पनी बन्द भएपछी लामो समय सम्म चिनजानका साथिभाइ र केहि महिना एनआरएन युएईको संरक्षणमा बस्दै आएका थिए ।   अदालतको फैसला पछि ब्लडमनी जुटाउनका लागि युएई स्थित नेपाली दूतावासले परराष्ट्र मन्त्रालय र वैदेशिक रोजगार प्रबर्द्धन बोर्डलाई आर्थिक सहयोगका लागि पत्र लेखेको भए पनि वैदेशिक रोजगार प्रबर्द्धन बोर्डले कानुनत बिकलाई कुनै आर्थिक सहयोग गर्न नसकिने भन्दै पत्रको जबाफ पठाए पछी गैर आवासीय नेपाली संघ युएईको संयोजकत्वमा युएईमा क्रियाशील सबै संघसस्थाहरु सदस्य रहने गरि एक महिने आर्थिक सहयोग संकलन अभियान चलाइएको थियो । अभियान बाट संकलित रकम दूतावासलाई हस्तान्तरण गरेपछि दूतावासले सो रकम अदालतमा बुझाउदै कानुनी प्रक्रियामा लागेको थियो । लामो समयको कानुनी प्रक्रिया लाई पार गर्दै दूतावासले बिकको पासपोर्ट अदालत बाट निकालि उनलाइ स्वदेश फर्कन सक्ने बाटो खुल्ला गरिदिएको हो। अध्यागमनको जरिवाना मिनाहा ,यात्रा प्रतिबन्ध हट्यो यस्तै ब्लडमनिको सजाय पाएपछि भिसा सकिएर अबैधानिक बनेका बिकले युएईको अध्यागमन बिभाग लाई बुझाउनु पर्न जरिवाना बापतको रकम ७२ हजार ८ सय दिर्हाम्स दूतावासको पहलमा मिनाहा गर्न सफल भएको दूतावासका कार्यवाहक राजदूत सागर फुयालले जानकारी दिएका छन्। अदालतको प्रक्रिया पूरा गरेपनी अध्यागमनको जरिवानाका कारण केहि दिन रोकिएका बिकलाइ दूतावासको पहलमा सबै प्रक्रिया पूरा गरि उनिमाथी लागेको यात्रा प्रतिबन्ध (ब्यान्ड ) समेत हटाउन सफल भएको राजदूत फुयालको भनाइ छ। बिक अब कुनैपनी दिन स्वदेश फर्किन सक्ने छन भने, अभियान लाई सफल पार्न साथ सहयोग गर्न सबैलाई दूतावासले धन्यवाद समेत दिएको छ।

युएई ,साउन ५ ।नेपाल आदिवासी जनजाति महासंघ युएई र उक्त महासंघ अन्तरर्गतका ११ वटा जातीय संघ संस्थाहरु मिलेर संयुक्तरूपमा २४ औं विश्व आदिवासी दिवस विविध कार्यक्रम गरी मनाउने तयारी गरेको हो। महासंघका वरिष्ठ उपाध्यक्ष सुरेन्द्र थिङ तामाङले विश्व आदिवासी दिवसलाई भव्यतामा साथ मनाउन आगामी अगष्ट १० तारिखमा ”पहिचान, प्रतिनिधित्व र स्वायत्तताको लागि आदिबासी जनजातिको अडान,पहिचान सहितको संघीयताका लागि संविधान संशोधन हाम्रो साझा अभियान“ भन्ने मुल नाराको साथ युएईको दुबई स्थित कार्ल्टन होटलमा भव्य कार्यक्रमको आयोजना गरिएको आयोजकले जानकारी दिएका छन। वरिष्ठ उपाध्यक्ष तामाङले गत शुक्रबार महासंघको बैठकबाट उक्त कार्यक्रमको मुल समिति नेपाल आदिबासी जनजाति महासंघ युएई रहने गरि संस्थाका प्रतिनिधिहरुलाई कार्यविभाजन समेत गराएको बताए। जस अन्तरर्गत कार्यक्रम संयोजकको जिम्मा महासंघका बरिष्ठ उपाध्यक्ष सुरेन्द्र थिङ तामाङ, आर्थिक विभागमा कोषाध्यक्ष नर बहादुर सुनुवार, प्रचारप्रसार विभागमा महासचिव सनिल घिसिङ लगायत एघार वटैै संघसंस्थाका प्रतिनिधि रहने गरि जिम्मेवारी दिएका छन्। साथै प्रायोजक प्रमुखमा महासंघका अध्यक्ष पासाङ शेर्पा र पुर्वअध्याक्ष डिआर गुरुङ रहने भएका छन । मिडिया पार्टनरको जिम्मा भने उज्यालो नेपाललाई दिएको छ। कार्यक्रममा विभिन्न जातजातिहरुको संयुक्त झाँकी तथा भेषभुषा प्रदर्शन, आवद्ध ११ वटै संस्थाबाट जातीय पहिचान झल्किने विभिन्न प्रस्तुति दिनेछन् भने स्थानीय कलाकारहरुको समेत बिजोड प्रस्तुतिका साथै निरन्तर संस्थामा रहेर समुदायलाई महत्वपूर्ण योगदान दिएका व्यक्तिहरुलाई नागरिक अभिनन्दन सहित लाइफ टाईम अवार्ड समेत प्रदान गर्ने तयारी रहेको बताएका छन् । उक्त कार्यक्रममा विभिन्न जातीय पहिचान झल्काउने सामाग्री तथा परिकार सहितको प्रत्येक समुदायहरुको बेग्लाबेग्लै स्टल रहनेछन् । विश्व आदिवासी दिवस १९९४ बाट संयुक्त राष्ट्र संघले विश्व भरका आदिवासी जनजातीहरुको दयनीय अवस्था, राज्यबाट उपेक्षित हुनु परेको, उनीहरुको मौलिक पहिचानको संरक्षण, सम्बर्द्धन र विकास गर्ने,प्राकृतिक स्रोत साधन माथि अग्राधिकार, मौलिक हक, राज्य संचालन मा उनीहरुको पहुँच र प्रतिनिधित्व स्थापित गर्ने कार्य राज्यको जिम्मेवारी हो भन्ने स्वीकार गरेको उपलक्ष्यमा विश्वका सबै देशहरुमा आदिवासीहरुले यो दिवस मनाउन थालेको हो । प्रत्येक वर्ष अगष्ट ९ मा मान्दै आएको यो दिवस प्रवासमा भने समय अनुकुल नेपालीहरुको छुट्टिको दिन पारेर मनाउने गरेका छन् ।

काठमाडौं, साउन १ । विश्वकप फुटबलको २१औं संस्करण आइतबार साँझबाट सकिएको छ । २१औं संस्करणमा यसअघि सन् १९९८ को विश्वकप जितिसकेको फ्रान्सले पहिलो पटक फाइनल पुगेको क्रोएसियालाई ४-२ गोलअन्तरले हराउँदै उपाधी जितेको छ। अत्यन्तै रोमाञ्चक खेलअवधि जति रमाइलो र हेर्न लायक थियो, त्यति नै विश्वकप समापन समारोह पनि । समापन समारोहमा विश्वकप आयोजक राष्ट्रका राष्ट्रपति भ्लादिमिर पुटिन, फ्रान्सेली राष्ट्रपति इमानुएल म्याक्रों र क्रोएसियाली राष्ट्रपति कोलिन्दा ग्राबर कितारोभिकलगायतका अति उच्च व्यक्तित्वको सहभागिता रहेको थियो । निर्धारित समय सकिएलगत्तै जब रेफ्रीले सिठ्ठी फुके, मैदानबाहिर रहेका फ्रान्सेली फुटबलका खेलाडी, प्रशिक्षक र टिम सदस्य मैदानमा छिरेर जितको रमाइलो गर्न लागे । सबैलाई आश्चर्यचकित पार्दै पहिलो पटक विश्वकप फाइनलमा पुगेको क्रोएसियाका खेलाडी भने, कोही रुन थाले, कोही निरास भएर मैदानमै लडिरहेका थिए । फ्रान्सको सर्मथनमा रहेका दर्शकमा जति खुसीयाली थियो, क्रोएसियाको समर्थन गरिरहेका दर्शक त्यति नै निराश । पुरस्कार वितरण समारोह सुरु हुनेबित्तिकै पानी पर्न थालेको थियो । जति पुरस्कार वितरणको रौनकताले विश्वभरका दर्शकलाई तानिरहेको थियो, त्यत्ति नै, क्रोएसियाली राष्ट्रपति कोलिन्दाको प्रस्तुतिले विश्वभरका मानिसलाई नतमस्तक बनाइरहेको थियो । नागरिक दैनिकमा खबर छ ।

एजेन्सी, असार ३० । पाकिस्तानको दक्षिण-पश्चिमी प्रान्त बलुचिस्तानमा आत्मघाती बम आक्रमण हुँदा कम्तिमा १२८ जनाको ज्यान गएको छ । बलुचिस्तानको मास्तुङ्ग जिल्लामा भएको एक चुनावी र्‍यालीमा शुक्रबार आत्मघाती बम आक्रमण भएको हो । घटनामा सयौँ मानिस घाइते भएका छन् । पछिल्लो चार वर्षमा पाकिस्तानमा भएको यो सबैभन्दा ठूलो आक्रमण रहेको सरकारी अधिकारीले बताएका छन् । घटनामा ज्यान गुमाउनेमा आउँदो चुनावका लागि मास्तुङ्गबाट उठेका उम्मेदवार पनि रहेको स्थानीय प्रहरीलाई उद्धृत गर्दै बिबिसीले जनाएको छ । बिद्रोही संगठन इस्लामिक स्टेट आइएसले आक्रमणको जिम्मेवारी लिएको छ । बलुचिस्तान अवामी पार्टीका नेता नवाबजादा सिराज रईसानीको पनि घटनामा ज्यान गएको स्थानीय अधिकारीले बताएका छन् । आक्रमण क्वेटी नेहसाना राजमार्गको उक्त पूर्व तथा क्वेटाबाट झण्डै ३५ किलोमिटर पर भएको हो । विस्फोटका लागि ८ देखि १० किलो विस्फोटक पदार्थ प्रयोग भएकाले ठूलो क्षति भएको हो । सिराज रईसानी बलुचिस्तानका पूर्व मुख्यमन्त्री नवाब असलम रईसानीका भाइ हुन् र आउँदो चुनावका लागि सिराजले असलम विरुद्ध नै उम्मेवारी दिएका थिए । उनले गरेको चुनावी र्‍यालीमा आक्रमण भएको हो र धेरैको ज्यान गएको छ ।

दोहा ,असार २९।खस क्षत्री सेवा समाज कतारको आठौं स्थापना दिवस दोहा स्थित एक होट्लमा शुक्रबार सम्पन्न भएको छ । समाजको आठौं स्थापना दिवस अन्तरक्रिया तथा बिबिध सास्कृतिक कार्यक्रम सहित शालीमार दरबार रेस्टुरेन्टमा सम्पन्न भएको हो। कार्यक्रमको उद्घाटन खस क्षत्री सेवा समाजका प्रमुख संरक्षक एवं कार्यक्रमका प्रमुख अतिथि टिबि कार्की, संरक्षक हंसराज ढकाल लगाएत अतिथिले ब्यानर अनावरण, दिप प्रज्वलन तथा केक काटेर भएको थियो । कार्यक्रमको उद्घाटन गर्दै समाजका प्रमुख संरक्षक टिबि कार्कीले खस क्षत्री सेबा समाज कतार बिसुद्द सामाजिक संस्था रहेकोले कोहि समुदायको विरुद्ध नभइ नेपाली बिचको आपसी एकता लागि गठन भएको बताए । खस क्षत्री सेवा समाजको आवश्यकता अझै रहेको भन्दै खत्रीले सम्पुर्ण सामाजिक संघसंस्था बिच समन्वय गरि निरन्तर समाज सेवामा लागि रहने बताए। स्थापना दिवसका अवसरमा आयोजित अन्तरक्रिया कार्यक्रममा समाजको स्थापना उदेश्य, समाजमा क्षत्रीको भुमिका बारे समाजका प्रमुख संरक्षक टिबि कार्की,समाजको कार्ययोजना र प्रगति बारे समाजका संरक्षक हंसराज ढकाल , कतारमा नेपाली ब्याबसायिको अबसर र चुनौतीका बारे संस्थापक सल्लाहकार सागर नेपालले र खस क्षत्रीहरुको इतिहास को बारेमा समाजका सल्लाहकार निगम कार्कीले प्रशिक्षण प्रदान गरेका थिए । समाजका अध्यक्ष खगेन्द्र कार्कीको अध्यक्षता मा सम्पन्न कार्यक्रममा संस्थापक उपाध्यक्ष पुर्ण केसि, सल्लाहकार तेज कटुवाल, भोजपुर सेवा समाजका अध्यक्ष गोपाल बस्नेत, प्रबासि कटुवाल बन्दु सेवा समाजका अध्यक्ष गोपाल कटुवाल लगाएतले सुभकामना मन्तव्य राखेका थिए। सो अवसरमा समाजका सल्लाहकार संयोजक रेशम बस्नेतले कविता बाचन गरेका थिए भने समाजका कार्यसमिति सदस्य भरत केसी लगाएत दाङ देउखुरी सेबा समाजको सास्कृतिक बिभागका कलाकारहरुले विभिन्न गित, नृत्य तथा हास्य प्रसन प्रस्तुति गरेका थिए। खस क्षत्री सेवा समाजका उपाध्यक्ष बिश्व बन्दु थापाले स्वागत गरेको कार्यक्रम महासचिव रामजि खत्रीको संचालनमा सम्पन्न भएको समाजका प्रवक्ता सन्तोष क्षत्रीले बताए।

काठमाडौं, असार २९ । ब्लडमनी तिर्न नसकेर साउदी अरबको जेलमा रहेका रोल्पाका दिलबहादुर घर्तीमगरलाई मृत्यदण्डबाट बचाउन मलेसियामा एक लाख रुपैयाँ आर्थिक सहयोग प्राप्त भएको छ । रोल्पा घर भई मलेसियामा रहेका पृथ्वीप्रसाद रानामगरको पहलमा संकलित एक लाख ४५५ रुपैयाँ ‘दिलबहादुर घर्ती बचाउनको लागि ब्लडमनी संकलन अभियान–२०७५’ मूल समितिलाई हस्तान्तरण गरिएको छ । ‘दिलबहादुरको जीवन रक्षाका लागि हामीले सहयोग अभियान जारी राखेका छौँ । यसैक्रममा मलेसियाबाट थप एक लाख रकम अभियान मूल समितिलाई प्राप्त भएको छ,’ अभियान मूल समितिका संयोजक दिपेश पुनले भने, ‘म आर्थिक सहयोग गर्ने सबै सबै साथीहरुलाई समितिको तर्फबाट धन्यवाद दिन चाहन्छु ।’ मलेसियाबाट यसअघि पनि तीन लाख भन्दा बढी रकम मूल समितिलाई हस्तान्तरण गरिसकेको छ । संयोजक पुनले दिलबहादुरको जीवन रक्षाका लागि ओमनबाट हेमराज चलाउनेको पहलमा १८ हजार ४४१, कतारबाट कविराम बानियाँको पहलमा १२ हजार ७१५ रुपैया, दुबईमा रहेका कमल महरले ३१ हजार २५६, जोर्डनमा रहेका गोविन्द पुनले १५ हजार १८, साउदीमा रहेका गणेश रोका र प्रशान्त रोकाले १० हजार ९९८, दलप्रसाद विकले १६ हजार ८११ रुपैया मूल समितिमा आईपुगेको जानकारी दिए ।

युएई ।युएईमा लामो समय देखि दलालले बन्धक बनाइ राखेका दुई नेपाली महिलालाई एनआरएनए युएईले उद्दार गरी बुधबार स्वदेश फिर्ता गरेको छ। युएईको अलऐन स्थित एउटा घरमा बिगत एक बर्ष देखि बन्धक बनाइ राखेको अबस्थामा पीडित मध्ये एक महिलाले सामाजिक संजाल मार्फत आफ्नो उद्दारको लागि पहल गरिदिन अपील सहितको भिडियो हाले पछी एनआरएनए युएईले प्रहरीको सहयोगमा ठेगाना पत्ता लगाई पीडितको उद्दार गर्न सफल भएको एनआरएनए युएईका अध्यक्ष रमेश श्रेष्ठले जानकारी दिएका छन्। यसरी अलपत्र पर्नेहरुमा बर्दिया घर भएकी रेनुका र उनकी साथी भुप कुमारी रहेकी छिन भने अर्कि एक महिलालाई दलालले भगाउन सफल भएको भए पनि नेपाली दूतावास युएईले सम्पर्क गरी हाल दूतावासको सेल्टरमा राखेको दूतावासले बताएको छ। अलपत्र मध्ये रेनुका र भुप कुमारीलाई एनआरएनए युएईले आवश्यक प्रकृया पुरा गरी बुधबार हवाई टिकटको ब्यबस्था मिलाई स्वदेश फिर्ता गरेको छ भने अर्की एक महिलालाई दूतावासले केही दिनमा नेपाल फर्काउने तयारी गरेको दूतावास स्रोतले जानकारी दिएको छ। पछिल्लो समय युएईमा रहेका सँघसस्थाहरु खासगरि एनआरएनए युएईले मजदुर हितमा उल्लेखनीय काम गर्दै पीडितलाई न्याय दिलाउन महत्त्वपूर्ण भुमिका खेलेको भन्दै नेपाली दूतावास युएईका कार्यबाहक राजदूत सागर फुयाँलले सहयोगी सबैलाई धन्यवाद दिएका छन् ।

युएई, असार २७ । युएईमा आफ्नै कम्पनीको सुपरभाइजरले कुटपिट गर्दा घाइते भएकी सोलुखुम्बुकी गङ्गा बास्तोलालाई नेपाली दूतावास युएईले न्याय दिलाएको छ । गत मंग्लवार कम्पनीमा काम गर्न जादा मादक पर्दाथ सेवन गरि गएकी गङ्गालाई कम्पनीका एक भारतीयन सुपरभाइजरले गाडीमा राखी कम्पनी होस्टेल फर्काउदै गर्दाबीचच बाटोमा गाडी रोकि कुटपिट गरेको भिडियो सामाजिक संजाल फेसबुक मार्फत भाइरल बनेपछि दूतावासले घटनाबारे चासो दिएको थियो । युएईको सोनापुरस्थित एक प्रतिष्ठित कम्पनीमा क्लिनिङ काम गर्दै आएकी बास्तोलाले मादक पदार्थ सेवन गरि सामान्य भनाभन गरेकै भरमा बिच बाटोमा घाइते हुने गरि कुटपिट गर्नु नितान्त कानुन बिपरित रहेको भन्दै दूतावासले घाइतेको उपचारसहित कम्पनीसँग क्षतिपूर्ती दाबी गरेको राजदूत सागर फुयालले बताए । ‘मादक पदार्थ सेवन गरि काममा जानू झगडा गर्नु नितान्त गलत हो तर त्यसो भन्दैमा महिलामाथी हातपात गर्ने लाई हामी त्यसै माफ दिन सक्दैनौं कम्पनीले सुपरभाइजरलाई कारबाही गरेको छ बास्तोला उपचार पछी नेपाल जादैछिन,’ राजदुत फुयालको भनाइ छ। पछिल्लो समय युएईमा मादक पदार्थ सेवन गरि होहल्ला गर्ने, झैझगडा गर्ने जस्ता काममा नेपाली महिला तथा पुरुषको सङ्ख्या बढेको देख्दा दुख लागेको बताउदै स्वाभिमानी नेपालीको शिर झुकाउने काम नगर्न समेत दूतावासले अनुरोध गरेको छ ।

जापान । पृथ्वी ध्वस्त हुँदैछ भनेर हल्ला फैलाउने एक जना व्यक्तिलाई मृत्युदण्ड दिइएको छ । ब्रह्माण्ड समाप्त हुँदैछ भनी अफवाह फैलाउने र २३ वर्षअघि टोकियोको एक सब-वेमा गरिएको रसायनिक ग्यास आक्रमणको मुख्य योजनाकार सोको आसहारालाई मृत्युदण्ड दिइएको हो । आसहारासहित ७ जनालाई टोकियोको हिरासत घरमा शुक्रबार बिहान मृत्युदण्ड दिइएको हो । आसहारा ब्रह्माण्ड ध्वस्त हुँदैछ भनेर हल्ला फैलाउने अम सिनरिक्यो समूहका नेता हुन् । उनी सन् १९९५ को २० मार्चमा स्नायू प्रणालीमा असर पुर्‍याउने रसायनिक ग्यास आक्रमणको मुख्य योजनाकार हुन् । जापानको अहिलेसम्मकै हिंसात्मक मानिने उक्त आक्रमणमा १३ जनाको मृत्यु भएको थियो भने हजारौं घाइते भएका थिए । त्यसपछिका महिनाहरूमा उक्त सम्प्रदायका सदस्यहरूले विभिन्न स्थानमा हाइड्रोजन साइनाइडको प्रयोग गरी आक्रमण गर्ने प्रयास गरेका थिए । कम अपराध हुने र सामाजिक एकताको नमूना देश मानिने जापान उक्त आक्रमणपछि स्तब्ध बनेको थियो । उक्त घटनामा संलग्न भएको भन्दै दर्जनौंलाई अभियोग लगाइएको थियो । उनीहरुमध्ये मुख्य योजनाकार आसहारा सहित १३ जनालाई मृत्युदण्डको सजाय सुनाइएको हो । अझै ६ जना मृत्युदण्डको मिति कुरेर बसेका छन् । -एजेन्सी