काठमाडौं । प्रमुख प्रतिपक्षी दल माओवादी केन्द्रका सांसद अमनलाल मोदीले पुष्पकमल दाहाल प्रचण्डलाई नोवेल पुरस्कार दिनुपर्ने बताउनुभएको छ । मंगलबारको प्रतिनिधिसभामा धारणा राख्दै उहाँले व्यवस्था परिवर्तनमा लागि भएको जनयुद्धको कमाण्ड गर्नुका साथै पछि शान्तिका लागि अथक प्रयास गरेकाले नोवेल पुरस्कार दिनुपर्ने बताउनुभएको हो । ‘जनयुद्ध गरेको पार्टीको कमाण्डर प्रचण्ड जो लोकतन्त्र, नागरिकको पक्षमा समावेशीताका लागि लड्नुभयो’, उहाँले संसदमा भन्नुभयो, ‘त्यसकारण उहाँलाई जनक भनिनुपर्छ। र उहाँलाई नोवेल पुरस्कारको व्यवस्था गर्नुपर्छ।’   सत्ता समीकरण परिवर्तनपछि माओवादीप्रति आक्रामक देखिएको एमालेले जनयुद्धलाई हिंसा भन्दै आएको सन्दर्भमा उहाँले त्यस्तो बताउनुभएको हो। माओवादीले  विगतमा भएका विभिन्न आन्दोलनको कुनै न कुनै रुपमा अहम् भूमिका रहेको र त्यसलाई आफूहरूले क्रान्ति बुझ्ने गरेको बताउनुभयो ।

काठमाडौं । नेपाल प्रहरीका ५८७ प्रहरी निरीक्षक (इन्सपेक्टर) को सरुवा भएको छ।  प्रहरी प्रधान कार्यालयले यति धेरै इन्सपेक्टरहरुको सरुवा गरेको हो।  प्रहरी महानिरीक्षक वसन्तबहादुर कुँवरको निर्णयअनुसार निरीक्षकहरुको सरुवा गरिएको छ। यस्तै सोमबार नै ३ जना डीआईजीहरुको सरुवा पनि गरिएको थियो। हेर्नुहोस् सूची

काठमाडौँ। सङ्घीय संसद्अन्तर्गतको प्रतिनिधि सभा बैठक सुरु भएको छ । मङ्गलबार दिउँसो १ बजेबाट सुरु भएको बैठकमा सभामुख देवराज घिमिरेले राष्ट्रपतिको कार्यालयबाट प्राप्त विधेयक प्रमाणीकरणसम्बन्धी पत्रको ब्यहोरा पढेर सुनाउनुहुने छ । यसैगरी, सहरी विकास मन्त्रालय, श्रम, रोजगार तथा सामाजिक सुरक्षा मन्त्रालय र खानेपानी मन्त्रालय सम्बन्धी मौखिक प्रश्नहरूको सम्बन्धित मन्त्रीले उत्तर दिनुहुने कार्यसूची रहेको छ । यसैगरी, सहकारी संस्था बचत रकम दुरुपयोगसम्बन्धीमा संसदीय छानबिन विशेष समितिका सभापति सूर्यबहादुर थापा क्षेत्रीले समितिको कार्यविधि थप सम्बन्धी प्रस्ताव प्रस्तुत गर्नुहुने छ । यसैगरी, शिक्षा, स्वास्थ्य तथा सूचना प्रविधि समितिका सभापति अम्मरबहादुर थापाले राष्ट्रिय सभामा उत्पत्ति भएको ‘नेपाल विश्वविद्यालय विधेयकसम्बन्धी समितिको प्रतिवेद २०८१’ र ‘सार्वजनिक सेवा प्रशासन विधेयकसम्बन्धी समितिको प्रतिवेदन, २०८१’ पेस गर्नुहुने छ ।

काठमाडौं । नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ले ट्रेकिङ व्यवसायीहरूको छाता संगठन ट्रेकिङ एजेन्सी एसोसिएसन अफ नेपाल (टान)को नवनिर्वाचित कार्य समितिलाई बधाई दिनुएको छ ।  टानको निर्वाचनबाट कांग्रेस एमाले गठबन्धनका साझा उम्मेदवार राजेन्द्र सापकोटालाई पराजित गर्दै नेकपा माओवादी केन्द्रका सागर पाण्डे अध्यक्षमा विजयी हुनुभएको थियो ।  ‘विहानै खुशीको खबर बाड्ने अवसर मिल्यो, अध्यक्ष सागर पाण्डेलगायत टानमा निर्वाचित साथीहरूलाई हार्दिक बधाई छ’– अध्यक्ष प्रचण्डले सामाजिक सञ्जालमार्फत बधाई ज्ञापन गर्दै भन्नुभएको छ– ‘तपाईहरुको अथक मेहेनेत र जुझारु एकताले अप्राकृतिक र असंवैधानिक गठबन्धनलाई दरो जवाफ भएको छ। हार्दिक शुभकामना व्यक्त गर्दछु।’    

पोखरा । गण्डकी सरकारमा एमाले प्रवेश गरेको छ । सरकार गठनको करिब दुई महिना पुग्नै लाग्दा मन्त्रालय फुटाएर भागबण्डा मिलाएर सोमबार ४ जना मन्त्री एमालेबाट नियुक्त गरिएको हो । उहाँहरुलाई प्रदेश प्रमुख डिल्लीराज भट्टले पद तथा गोपनीयताको शपथ गराउनुभयो ।  एमालेबाट मन्त्री नियुक्त भएसँगै गण्डकीमा मन्त्रीहरुको कार्यविभाजन पनि भएको छ। कार्यविभाजन अनुसार एमालेका जिसीले कृषि, भुमि व्यवस्था तथा सहकारी मन्त्रालय, बस्यालले उद्योग तथा पर्यटन, पाठकले स्वास्थ्य र केसीले भौतिक पूर्वाधार तथा यातायात व्यवस्था मन्त्रालयको नेतृत्व गर्नुहुने भएको छ । यसअघि सरकारमै रहेका कांग्रेस सांसद डा.टकराज गुरुङ आर्थिक मामिला मन्त्रालयमा निरन्तरता पाउनुभएको छ भने विन्दुकुमार थापाले सामाजिक विकास, युवा तथा खेलकुद मन्त्रालयको जिम्मेवारी पाउनुभएको छ । मनाङबाट स्वतन्त्र निर्वाचित राजीव गुरुङ ‘दीपक मनाङे’ले वन तथा वातावरण र नेपाल समाजवादी पार्टीका फणिन्द्र देवकोटाले उर्जा, जलस्रोत तथा खानेपानी मन्त्रालयको जिम्मेवारी पाउनुभएको छ । सरकारमा एमालेलाई प्रवेश गराउन दुई मन्त्रालय फुटाएर ७ बाट बढाएर ९ मन्त्रालय गराइएको छ ।

नयाँदिल्ली । भारतको मणिपुर राज्यमा विद्रोहीहरूले ड्रोनमार्फत सुरक्षा बलहरूमाथि आक्रमण गरेका छन् । आइतबार विद्रोहीहरूले गरेको ‘आक्रमण’ मा परी दुई जनाको मृत्यु भएको छ भने १० जना घाइते भएको प्रहरीले बताएको छ । विद्रोहीहरूले ड्रोन प्रयोग गरी रकेटबाट चल्ने ग्रेनेड प्रहार गरेका थिए । मृतक मध्ये एक जना महिलाको पहिचान भएको छ ।उनी ३५ वर्षीय नगनबम सुरबाला रहेकी छिन् । घाइते हुने मध्ये दूई जना प्रहरी छन् भने एक जना टेलिभिजनका रिर्पोटर रहेका छन् ।  सन् २०२३ मा मणिपुरमा मुख्य रूपमा हिन्दू मैतेई बहुसङ्ख्यक र मुख्य रूपमा ईसाई कुकी समुदायबीच द्वन्द्व सुरु भएको थियो । उक्त धार्मिक द्वन्द्वमा कम्तीमा दुई सय जनाको मृत्यु भएको थियो ।

काठमाडौं । नेकपा(एमाले)को भातृ संगठन अखिलका अध्यक्ष समिक बडालले काठमाडौं महानगरपालिकाका प्रमुख बालेन शाहलाई गम्भिर आरोप लगाएका छन् । उनले सामाजिक सञ्जाल फेस्बुकमार्फत भारतिय खुफिया एजेन्सीसगको निर्देशन नेपाली जनताको आँखामा छारो हालेको आरोप लगाएका छन् । सरकारमा रहेर जनताको पक्षमा काम नगरेको भन्दै बेला वखतमा बालेनले एमाले अध्यक्ष समेत रहेका प्रधानमन्त्री केपी शर्मा ओलीको आलोचना गर्ने गरेका छन् । बालेनको आलोचना सहन नसकेर एमाले पंति सामाजिक सञ्जालमा बालेनविरुद्ध खनिने गरेको छ ।  यो गठबन्धन बनेदेखि नै मेयर बालेनविरुद्ध अभियान चलाउँदै आएका अध्यक्ष बडाले सामाजिक सञ्जालमा उनले लेखेका छन्- 'काठमाण्डौ महानगरको मेयर बालेनजी साङ्ग्रिला होटेल पछाडी घर भाडा लिएर दैनिक भारतिय खुफिया एजेन्सीसँगको निर्देशनमा नेपाली जनताको आखामा छारो हाल्न बन्द गर्नुस्। नेपाली जनताले तपाइको असलियत बुझ्ने दिन धेरै टाढा छैन्।'

काठमाडौं । आज नेपाली बजारमा सुनचाँदीको मूल्य घटेको छ । सोमबार सुन तोलाको ३ सयले घटेर तोलामा एक लाख ५२ हजारमा कारोबार भएको नेपाल सुनचाँदी व्यवसायी महासंघले जनाएको छ । यस अघि आइतबार सुनको मूल्य १ लाख ५२ हजार ३सयमा कारोबार भएको थियो । त्यस्तै आज चाँदीको मूल्य प्रतितोला २० रुपैयाँले घटेर १७७५ मा कारोबार भइरहेको महासंघले जनाएको छ ।

राँझा (बाँके) — पूर्वप्रधानमन्त्री एवं नेकपा (माओवादी केन्द्र)का अध्यक्ष पुष्पकमल दाहाल प्रचण्डले नेपालगन्ज एकीकृत जाँचचौकी (आइसिपी)लाई थप प्रभावकारी बनाउन आवश्यक पहल गर्ने बताउनुभएको छ । माओवादी केन्द्रको लुम्बिनी प्रदेशस्तरीय आन्तरिक प्रशिक्षणका क्रममा नेपालगञ्जमा रहनुभएका अध्यक्ष प्रचण्ड आज बिहान नेपालगञ्ज आइसिपीको स्थलगत अवलोकन गर्दै भन्नुभयो, 'गौरव गर्न लायक संरचना निर्माण भएको छ, यसलाई प्रभावकारी बनाउन हामी सबै लाग्नु पर्दछ ।' आइसिपी मुलुकका सबै नाकामा बनाउने सरकारी नीति रहेको उल्लेख गर्दै उहाँले पहिला बनेका आइसिपीले केही समस्या झेल्नुपर्ने हुनसक्ने बताउनुभयो। आफू प्रधानमन्त्री हुँदा भारत भ्रमणमा रहेका बेला भारतीय प्रधानमन्त्री नरेन्द्र मोदीसँगै नयाँ दिल्लीबाट नेपालगञ्ज आइसिपीको संयुक्त रूपमा स्वीच अन गरी भर्चुअल माध्यमबाट शुभारम्भ गरेको सम्झना गर्दै अध्यक्ष प्रचण्डले यसको प्रभावकारी सञ्चालनका लागि सदैव तत्पर रहेको उल्लेख गर्नुभयो । अवलोकनका क्रममा नेपालगञ्ज भन्सार कार्यालयका निमित्त प्रमुख भन्सार अधिकृत पूर्णप्रसाद लम्सालले नेपालगञ्ज आइसिपीका बारेमा जानकारी गराउनुभयो । आइसिपीमा भन्सार जाँचपासका लागि आवश्यक पर्ने भन्सार कार्यालय, बैंक, पशु क्वारेन्टिन, प्लान्ट क्वारेन्टिन, खाद्य प्रविधि तथा गुण नियन्त्रण कार्यालय, नेपाल प्रहरी र सशस्त्र प्रहरीको ब्यारेकलगायत कर्मचारीको आवासगृह निर्माण गरिएको छ । भारत सरकारको एक अर्ब ४७ करोड भारु लागतमा ८८ बिघा क्षेत्रफलमा नेपालगञ्ज उपमहानगरपालिका–१६ जयसपुरमा आइसिपी निर्माण भई सञ्चालनमा आएको छ । सो अवसरमा पूर्वअर्थमन्त्री एवं पार्टी उपमहासचिव वर्षमान पुनलगायत नेताहरूको सहभागिता रहेको थियो ।

घोराही । राष्ट्रिय दलित पत्रकार संघ दाङकाे अध्यक्षमा पत्रकार गिरिराज नेपाली चयन हुनु भएकाे छ । संघकाे आज घाेराहीमा सम्पन्न चाैथाे जिल्ला अधिवेशनले नेपालीकाे अध्यक्षतामा ११ सदस्यीय नयाँ कार्य समिति चयन गरेकाे छ । संघकाे बरिष्ठ उपाध्यक्ष प्रियास्मृति गजमेर, उपाध्यक्षमा अर्जुन परियार, सचिवमा देवका परियार, सह-सचिवमा चन्द्रप्रकाश नेपाली र काेषाध्यक्षमा तेजबहादुर परियार चयन गरिएकाे छ । जसकाे सदस्यहरूमा हेमराज परिवर्तन, सरिता नेपाली , सिर्जना विश्वकर्मा , अन्जना बिक र रमा नेपाली रहनु भएकाे छ । त्यस्तै अधिवेशनले संघका सस्थापक अध्यक्ष जनक नेपाली, पुर्व अध्यक्ष नवीन अभिलाषी, वसन्त परियार , जीवन नेपाली र अर्जुन परियारलाई केन्द्रीय पार्षद र हेमराज परिवर्तन, सरिता नेपाली, अरूण नेपाली, सुवास परियार, चन्द्रप्रकाश नेपाली र हिमाल बिकलाई प्रदेश पार्षदमा चयन गरेकाे छ । अधिवेशन जिल्ला अध्यक्ष वसन्त परियारकाे अध्यक्षतामा सम्पन्न भएकाे थियाे ।

काठमाडौं । मुख्यमन्त्री सुरेन्द्रराज पाण्डेले गण्डकी प्रदेश सरकार मंगलबार विस्तार गर्नहुने भएको छ। कांग्रेस र एमालेबीच मन्त्रालय भागवण्डामा सहमति भएसँगै मंगलबार मन्त्रिपरिषद् विस्तार हुने भएको हो ।  मुख्यमन्त्री सुरेन्द्रराज पाण्डेले मंगलबार मन्त्री नियुक्त गरी शपथग्रहण गराउने तयारी गरेको कांग्रेस प्रदेश सभाका सदस्य महेश भट्टराईले दिनुभयो। उहाँका अनुसार ९ मध्ये कांग्रेसले मुख्यमन्त्रीसहित पाँच र एमालेले चार मन्त्रालय पाउनेछन्।  एमालेले भौतिक, पूर्वधार तथा यातायात, कृषि पर्यटन, वन र स्वास्थ्य मन्त्रालय लिने भएको छ। कांग्रेसको भागमा परेका मन्त्रालयमा स्वतन्त्र सांसद राजीव गुरुङ र फणिन्द्र देवकोटालाई नियुक्त गर्ने तयारी भएको छ।  संकटमा साथ दिएका गुरुङ र देवकोटालाई कांग्रेस कोटामै मन्त्री नियुक्त गर्ने तयारी मुख्यमन्त्री पाण्डेले गर्नुभएको हो ।

नुवाकोट । नेकपा माओवादी केन्द्र निकट अखिल क्रान्तिकारी नुवाकोटको १७औं जिल्ला सम्मेलनबाट राजेन्द्र पनेरुको अध्यक्षतामा नयाँ कार्य समिति चयन गरिएको छ । जसको उपाध्यक्षहरुमा दिपेन्द्र थापा, सुरेन्द्र श्रेष्ठ र रामेश्वर वाग्ले, सचिव कपिल शाह, सहसचिव निराजन दाहाल र कोषाध्यक्ष रोजिना तामाङ रहनुभएको छ । कार्य समिति ३३ सदस्यीय रहेको छ ।

दाङ ।  सर्वोदय पुस्तकालय तथा वाचनालय घोराहीमा ई–लाइब्रेरी स्थापना गरिएको छ । १७ औं राष्ट्रिय पुस्तकालय दिवसको अवसरमा वरिष्ठ साहित्यकार नारायणप्रसाद शर्माले शनिबार ई–लाइव्रेरीको उद्घाटन गर्नुभएको हो । ‘दयनीय, कारुणीक र अफ्ठेरो अवस्थाबाट पुस्तकालय शुरु भएको हो’– पुस्तकालयका संस्थापकसमेत रहनुभएका प्रमुख अतिथि शर्माले भन्नुभयो– ‘आज ई–लाइबे्रेरीसम्म पुगेका छौं ।’ उहाँले सस्तो पठन सस्तो लेखन भएको भन्दै सबै सामग्री जुटाएर गहिरो अध्ययन गर्न आग्रह गर्नुभयो । पढाइ जतिसुकै भए पनि दङालीको सोच असाध्यै परम्परागत भएको उहाँको भनाइ थियो । उहाँका अनुसार चिया पसलमा उपदेश सबैले दिन्छौं । गहकिलो लेख लेख्ने विद्वान भेटिन्नन् । ‘आफूलाई पढेलेखेको भन्ने धेरै छौं, देश सबैभन्दा गरिब र भ्रष्ट छ के पढाइ हो ?’– उहाँले भन्नुभयो– ‘देशको बौद्धिकता गरिब भयो ।’ उहाँका अनुसार प्राध्यापकले लेख्दैनन् बोल्दैनन्, कहाँ लुकेको छ थाहै छैन। कार्यक्रमका विशिष्ट अतिथि पुस्तकालयका पूर्वअध्यक्ष पुरुषोत्तम खनालले नयाँ कामको शुरुवात भएको बताउनुभयो । ‘असल बन्न असल पुस्तक पढौं’– खनालले भन्नुभयो– ‘समाजलाई असल बाटोमा डो¥याउँ ।’ उहाँका अनुसार हातहातमा मोबाइल भएको अवस्थामा इ–लाइब्रेरीको महत्व अति छ । किन्न नसकेका र यहाँको बजारमा नपाइने पुस्तक अब सजिलै पढ्न सकिनेछ । ‘विसं २००९ देखि २०१४ सम्म पुस्तकालयको लहरै चलेको थियो, त्यो इतिहास खोजौं ।’ सुकुम्वासी समस्या समाधान आयोग दाङका निवर्तमान अध्यक्ष लेखराज रेग्मीले ई–लाइब्रेरीले दाङ विकटताबाट सुगमतामा प्रवेश गरेको सन्देश दिएको बताउनुभयो । सो अवसरमा बोल्ने वक्ताहरुले नयाँ पुस्तालाई सम्बोधन गर्न सफल भएको भन्दै पुस्तकालयको प्रशंसा गर्दै सर्वोदयमा गएर डाउनलोड गरेर पुस्तक लग्न सकिने बताए । थेसिस लेख्ने लगायतका अनुसन्धानका काम गर्नेका लागि सबैभन्दा बढी उपयोगी हुने वक्ताहरुको भनाइ थियो । उनीहरुका अनुसार डिजिटल पुस्तकालयमा सरकारको पनि जोड छ । थप सहयोग जुटाउन र ई–लाइब्रेरी प्रभावकारी बनाउन सजिलो छ । ‘डिजिट पुस्तकालय धेरैको माग थियो’– सर्वोदय पुस्तकालयका अध्यक्ष सुशील गौतमले भन्नुभयो– ‘विश्वभरीका अनुसन्धानसम्बन्धी सामग्री उपलब्ध गराउने योजना छ ।’ उहाँले पाठक एवं अनुसन्धानकर्मीले उपयोग गर्नुपर्ने बताउनुभयो । उहाँहरुको माग अनुसार पुस्तक वा ई पुस्तक उपलब्ध गराउन सकिने जानकारी दिनुभयो । विश्वविद्यालय, क्याम्पस, विद्यालय सबैलाई लाइबे्ररीमा जोडिन आव्हान गर्नुभयो । पुस्तकालय सञ्चालक समितिका अध्यक्ष सुशील गौतमको अध्यक्षतामा भएको कार्यक्रममा राप्ती साहित्य परिषद्का केन्द्रीय अध्यक्ष डा. टीकाराम उदासी, लेखक संघ दाङका अध्यक्ष खगराज न्यौपाने, पुस्तकालयका सल्लाहकार शम्भु गौतम, बमबहादुर डिसी, नेपाल पत्रकार महासंघका अध्यक्ष दुर्गालाल केसी, नेपाल बार एसोसिएसन जिल्ला बार इकाई दाङका नवनिर्वाचित अध्यक्ष गोमा महरा, राप्ती साहित्य परिषद्का जिल्ला अध्यक्ष यम रेग्मी, दाङ पुस्तकालय संघका अध्यक्ष वसन्त पुन, गोरक्ष पुस्तकालयका शंकर योगी, पुस्तक तथा स्टेशनरी व्यवसायी समितिका अध्यक्ष केशवराज सुवेदी, अध्ययन मञ्चका अध्यक्ष विपीन आचार्य, सर्वोदय बाल क्लवका सल्लाहकार नवीन श्रेष्ठले शुभकामना मन्तव्य व्यक्त गर्नुभएको थियो । पुस्तकालयका उपाध्यक्ष चन्द्रराज पन्तको स्वागत मन्तव्यबाट शुरु भएको कार्यक्रममा सहसचिव हरिप्रसाद पौडेलले ई–लाइब्रेरीका बारेमा जानकारी गराउनुभएको थियो भने सञ्चालन पुस्तकालयका सचिव सुशीला आचार्य वैद्यले गर्नुभएको थियो ।

काठमाडौं । देशका केही स्थानमा आइतबार भारी वर्षा भएको छ। काठमाडौं र ललितपुरका पनि कतिपय स्थानमा भारी वर्षा भएको जल तथा मौसम विज्ञान विभागले जानकारी गराएको छ। ती क्षेत्रमा थप वर्षा हुन सक्ने सम्भावना छ । नदीतटीय क्षेत्रमा सतर्कता अपनाउन विभागले सचेत गराएको छ। “भाद्र १६, दिउँसो १२ बजे । पछिल्लो तीन घण्टामा काठमाडौंको बूढानीलकण्ठ, कपन, धाप ड्याम, गोदावरी, टीकाथली आसपासको क्षेत्रमा भारी वर्षा भएको, थप वर्षा हुन सक्ने, वाग्मती, धोबीखोला, शालीनदी, विष्णुमतीलगायत अन्य खोलाको बहाव बढ्ने देखिएकाले नदीतटीय क्षेत्रमा सतर्कता अपनाऔँ,” विभागको सूचनामा उल्लेख छ ।

दाङ । पूर्वसञ्चार तथा सूचना प्रविधि मन्त्री एवं नेकपा माओवादी केन्द्रका स्थायी समिति सदस्य रेखा शर्माले पार्टी परित्याग गरी माओवादी केन्द्रमा प्रवेश गर्ने युवाहरुलाई स्वागत गर्नुभएको छ। पार्टी  प्रवेशगर्नेहरुमा घोराही ६ बाट कांग्रेसका भक्तबहादुर डाँडी, घोराही १५ का रमेश पौडेल, घोराही १५ बाट कांग्रेसका बुद्धिराम चौधरी, घोराही १५ बाट राजु चौधरी, सोही वडाका रामु चौधरी, दिनेश चौधरी, बुद्धिराम चौधरी, सीता चौधरी, सज्जन चौधरी, जिवन चौधरीलगायत रहनुभएको छ । माओवादी केन्द्रले अघि सारेको भ्रष्टाचारबिरोधी अभियान मन पराएर आफूहरु सो पार्टीमा प्रवेश गरेको नवप्रवेशीहरुले बताएका थिए ।  नवप्रवेशीहरुलाई स्वागत गर्दै नेता शर्माले नयाँ नेपाल निर्माणको अगुवा पार्टी माओवादी केन्द्रले अब सुशासन, सामाजिक न्याय र समृद्धिमार्फत जनताले चाहे जस्तो नयाँ नेपाल बनाउने बताउनुभयो । त्यसका लागि आम युवाहरुलाई पार्टीमा गोलबन्द भएर अघि बढ्न पनि उहाँले आह्वान गर्नुभयो ।