काठमाडौं । इजरायलमा हमासले गरेको आक्रमणका कारण त्यहाँबाट स्वदेश फर्कन चाहेका नेपाली विद्यार्थी बिहीबार आउने भएका छन् ।विद्यार्थी उद्धारका लागि जहाज पठाउन भएको ढिलाई बारे प्रधानमन्त्रीले सम्बन्धित निकायका पदाधिकारीलाई राखेर तत्काल सोधपुछ गरेका थिए । हिजो बसेको मन्त्रिपरिषद् बैठकको निर्णय अनुसार इजरायलमा रहेका नेपालीलाई उद्धार गर्न परराष्ट्रमन्त्री एनपी साउदसहितको टोली त्यसतर्फ प्रस्थान गरेको छ । नेपाली विद्यार्थीको उद्धारका लागि निगमको जहाज बिहीबार बिहान २:३०बजे त्यसतर्फ प्रस्थान गरेका हो । उनीहरूलाई लिएर जहाज बिहीबार राति त्रिभुवन अन्तर्राष्ट्रिय विमानस्थलमा अवतरण गर्ने तालिका रहेको छ । पहिलो चरणमा २ सय ५४ जना विद्यार्थी फर्काउन लागिएको जनाइएको छ । स्वदेश फर्किन चाहनेको सङ्ख्या धेरै भएपछि पहिलो चरणमा विद्यार्थी मात्रै फर्काइने र त्यसपछि क्रमशः श्रमिकलाई फर्काइने इरानस्थित नेपाली दूतावासले जानकारी दिएको छ ।

काठमाडौं । बझाङमा गएराति भूकम्प गएको छ । १२ बजेर २२ मिनेटमा बझाङ सदरमुकाम चैनपुरबाट ५.३ किलोमिटर टाढा भातेखोला केन्द्रबिन्दु बनाएर भूकम्प गएको हो । ५.२ म्याग्निच्युडको भूकम्प गएको राष्ट्रिय भूकम्प मापन तथा अनुसन्धान केन्द्रले जनाएको छ । असोज १६ गते बझाङ केन्द्र बनाएर ६.३ म्याग्निच्युडको भूकम्प गएको थियो । उक्त भूकम्पले घर भत्काउँदा एक महिलाको मृत्यु भएको थियो । २० जना घाइते भएका थिए । भौतिक संरचनामा क्षति पुगेको थियो ।

मोरक्को । मराकेशमा जारी विश्व बैंकको वार्षिक बैठकमा अर्थमन्त्री डा. प्रकाशशरण महत र नेपाल राष्ट्र बैंकका गभर्नर महाप्रसाद अधिकारी सहभागी भएका छन् । मराकेशमा जारी विश्व बैंकको वार्षिक बैठकको सिलिसिलामा अर्थमन्त्री डा. प्रकाशशरण महतसंग अन्तर्राष्ट्रिय वित्त निगम (आइएफसि) का क्षेत्रीय उपाध्यक्ष रिकार्डो पुलितीले भेटवार्ता गरेका छन् । उक्त बैठकमा नेपालको आर्थिक विकासका लागि निजी लगानी तथा बाह्य पुँजी परिचालन बढाउने विषयमा गहन छलफल भयो । उक्त बैठकमा निजी क्षेत्रको लगानी प्रवर्द्धनका लागि सम्भाव्य परियोजनाहरूको पाइपलाइन विकास गर्न र वित्तिय उपकरणहरू (विशेष इक्विटी एक्सपोजरमा) विविधीकरण गर्दै सार्वजनिक निजी साझेदारी मार्फत परियोजना विकास गर्न आइएफसिले प्राविधिक सहयोग गर्ने विषयमा छलफल भएको छ । अर्थमन्त्री डा. महतले नविनतम वित्तीय उपकरणहरू मार्फत नेपालले परम्परागत क्षेत्रको अलावा निजी पूँजी आकर्षित गर्न आईटी, कृषि(व्यवसाय, पर्यटन र अन्य स्टार्टअपहरू जस्ता क्षेत्रमा लगानी विविधिकरण गर्न नवीन वित्तिय उपकरणहरू परिचालन गर्नु पर्ने विषयमा जोड दिए। खासगरी विदेशी विनिमय जोखिमको कारणले आइएफसि मार्फत प्रवाह हुने कर्जाको विद्यमान लागत न्युनिकरण गर्दै निजी लगानीलाई प्रोत्साहन गर्न आएएफसिले आइडिएको सहुलियत विन्डो (निजी क्षेत्र विन्डो) लाई ब्लेन्डिङ फाइनान्सको रूपमा उपयोग गर्न साथै इक्वीटी तथा स्थानीय मुद्रामा आधारित लगानीलाई प्रभावकारी रूपमा परिचालन गर्नु पर्ने बताए बाह्य लगानी तथा पुँजी परिचालनका लागि लगानीको आकर्षक वातावरण सिर्जना गर्न नेपाल सरकारले सुरक्षित कारोबार ऐन संसदमा पेश गर्न लागेको जानकारी गराउदै कर्जा सूचना व्यवस्थापन सम्बन्धी कानून निर्माणमा आएएफसिको चासोलाई सम्बोधन गर्ने प्रतिवद्धता जनाए । साथै स्थानीय मुद्रामा आधारित बन्ड मार्फत थप पुँजी परिचालन गर्ने विषयमा समेत नेपालले गरेको पहल सम्बन्धमा जानकारी गराए। अर्थमन्त्रीले आगामी कन्ट्री पाटनरसीप फ्रेमवर्कमा नेपालको निजी लगानीका प्राथमिकता र क्षेत्रगत विविधीकरण बिषय समावेश हुने विश्वास व्यक्त गरे । आइएफसिका उपाध्यक्ष पुलितीले नेपालले लगानीको प्रबर्द्धनको वातावरण सिर्जना गर्न गरेको पहलकदमीको विषयमा सह्राना गरे । नेपाल राष्ट्र बैंकका गभर्नर महाप्रसाद अधिकारीले बैंक तथा वित्तीय क्षेत्र मार्फत बाह्य पुँजी तथा लगानी परिचालन गर्न स्पष्ट कानूनी आधार रहेको बताउदै नेपाल राष्ट्र बैंकले सो प्रक्रियामा सहजीकरण गर्ने प्रतिबद्धता जाहेर गरे । उक्त अवसरमा अर्थमन्त्री महतको आइएमएफ तथा विश्व बैंक दक्षिण पूर्व एसिया क्षेत्रका कार्यकारी निर्देशक विम्वी सायुगा र याटी कुर्नियाटीसंग द्धिपक्षीय हितका विषयमा वार्ता सम्पन्न भयो ।

काठमाडौं। स्वास्थ्य तथा जनसङ्ख्या मन्त्री मोहनबहादुर बस्नेतले चिकित्सा शिक्षा पढ्न विदेश जानु पर्ने अवस्थाको अन्त्य गर्ने बताएका छन्। कागेश्वरी मनोहरा नगरपालिकाले बुधबार आयोजना गरेको पुरस्कार वितरण तथा सम्मान कार्यक्रममा बोल्दै स्वास्थ्य मन्त्री बस्नेतले चिकित्सा शिक्षा ऐन संशोधन गरेर डाक्टर, नर्स सहित स्वास्थ्य सम्बन्धी विषय पढ्नका लागि विदेश जानु पर्ने अहिलेको बाध्यता हटाउने दाबी गरे । मन्त्री बस्नेतले भने, ‘‘वर्तमान चिकित्सा शिक्षा ऐनका केही प्रावधानले मेडिकल कलेज र नर्सिङ कलेजका कोटा घटाइयो । जसका कारण स्वदेशमै पढ्न चाहने विद्यार्थीहरूले पनि बाध्य भएर पढ्नका लागि विदेश जानु परेको छ । अब ऐन चाडै परिमार्जन गरेर स्वदेशमै पर्याप्त कोटा निर्धारण गरिने छ र नेपालमै पढ्न पाइने सुनिश्चित हुनेछ ।’’ चिकित्सा शिक्षा ऐन संशोधन गर्न प्रधानमन्त्रीदेखि मन्त्रिपरिषद् र राजनीतिक दलहरूका नेता समेत सहमत रहेको बताउँदै मन्त्री बस्नेतले एक जनाले अनसन बस्छु भनेर धम्की दिएकै भरमा लाखौँ विद्यार्थीको पढ्न पाउने अधिकार कुण्ठित गर्न नसकिने जिकिर गरे। विदेशीले समेत चिकित्सा शिक्षा पढ्न नेपाल आउन चाहिरहेको बताउनुहुँदै चिकित्सा शिक्षा ऐनका कारण अवरोध भइरहेको उनको भनाइ छ । अवरोध हटाएर नेपाललाई मेडिकल शिक्षाको हबको रूपमा विकास गर्न सकिने गरी काम भइरहेको उनले दाबी गरे । चिकित्सा शिक्षा ऐन परिमार्जन गरेर मेडिकल कलेज र नर्सिङ कलेजका सिट नबढाउने हो भने अबको पाँच वर्ष भित्रै चिकित्सक र नर्स विदेशबाट आयात गर्नु पर्ने अवस्था आउन सक्ने दाबी मन्त्री बस्नेतले गर्नुभयो । उनले भने, ‘‘अहिले नै देशलाई २९ हजार नर्सको आवश्यकता छ । पढ्नका लागि विदेश जाने र काम पनि उतै गर्न थाले पछि हामीले विदेशबाट आयात गर्नु पर्ने दिन नआउलान भन्न सकिन्छ ।’’ मन्त्री बस्नेतले आफूले स्वास्थ्य मन्त्रीको जिम्मेवारी सम्हालेपछि विपन्नका लागि हरेक अस्पतालमा १० प्रतिशत शय्या निःशुल्क गराएको केन्द्रीय अस्पतालहरूका साढे तीन हजार जनरल शय्या विपन्नका लागि निःशुल्क गराएको र अब सातवटै प्रदेश अस्पतालका शय्या पनि निःशुल्क गराउन लागेको दाबी गर्दै चार वटा प्रदेशले निःशुल्क गरिसकेको र बाँकी तीनमा पनि छिट्टै हुने जानकारी दिए। कार्यक्रममा मन्त्री बस्नेतले कागेश्वरी महोहरा नगरपालिकाका विभिन्न विद्यालयका उत्कृष्ट शिक्षक र विद्यार्थीहरूलाई सम्मान तथा पुरस्कार प्रदान गरेका थिए । कार्यक्रम कागेश्वरी महोहरा नगरपालिकाका प्रमुख उपेन्द्र कार्कीको अध्यक्षतामा भएको थियो ।

काठमाडौं । सरकारले इजरायलमा सम्पर्कविहीन भएका विपीन जोशीको खोजी कार्यमा इजरायल सरकारले प्राथमिकताका साथ गरिरहेको जानकारी गराएको छ । त्यसैगरी घटनामा मृत्यु भएका १० जना विद्यार्थीको शव नेपाल छिटो ल्याउन पहल भइरहेको परराष्ट्र मन्त्रालयले जनाएको छ । मन्त्रालयकी प्रवक्ता सेवा लम्सालले पत्रकार सम्मेलन गर्दै यस्तो जानकारी गराएकी हुन् । “अज्ञात अवस्थामा रहनुभएका विपिन जोशीको हकमा निरन्तररुपमा उच्च प्राथमिकताका साथ खोजी गर्ने काम जारी छ,” उनले भनिन्, “मृतकको शव यथाशक्य छिटो ल्याउन प्रयास भइरहेको छ ।”

काठमाडौं । नेकपा (एमाले)का अध्यक्ष केपी शर्मा ओलीलाई स्वागत गर्नका लागि एमाले नेता रघुविर महासेठले कार्यकर्ताहरूलाई जनकपुर विमानस्थलको धावनमार्गमा उतारेका छन् । आज मधेस प्रदेशको अधिवेशन उद्घाटन गर्न गएका ओलीलाई स्वागत गर्न उनले ओलीको चाकडि गर्दै कार्यकर्ताहरू धावनमार्ग नै उतारेका हुन् । सुरक्षाकर्मीले छेक्दाछेक्दै १०, १५ जना एमाले कार्यकर्ता धावनमार्गमा प्रवेश गरेको विमानस्थलका प्रमुख भीमदत्त पन्तले जानकारी दिए । सुरक्षा चुनौति दिंदै गरीएको सो किसिमको गतिविधिबारे विमानस्थलका सुरक्षागार्डलाई स्पष्टीकरण सोधिने भएको छ ।

काठमाडौं । कानून, न्याय तथा मानव अधिकार समितिले सम्पत्ति शुद्धीकरण (मनी लाउण्डरिङ्ग) निवारण तथा व्यावसायिक वातावरण प्रवर्द्धनसम्बन्धी केही ऐनलाई संशोधन गर्न बनेको विधेयक पारित गरेको छ। मंगलबार समितिलाई उपसिमितिले बुझाएको प्रतिवेदनमाथि छलफल गरी बुधबार समितिले पारित गरेको हो। उपसमितिले बुझाएको प्रतिवेदनमा उल्लेख भएको सहकारीको विषयमा विधेयकको सहकारी ऐन, २०७४ को दफा ५२ (दफा १८ को उपदफा २ झिक्ने) मा व्यक्तिगत बचतको अधिकतम सीमा २५ लाख हुनेगरी प्रस्ताव भएको विषय हटाउने गरी सहमति भएको समिति सभापति विमला सुवेदीले बताइन्। उनका अनुसार समितिले क्यासिनो सञ्चालनको सम्बन्धमा विदेशी सीमाबाट ५ किलोमिटरको सीमा बाहिर आएर सञ्चालन गर्नुपर्ने कुरा थप गरी पारित गरिएको छ। तत्कालीन प्रचलित कानूनअनुसार ३ किलोमिटरको सीमा बाहिर सञ्चालन गर्ने गरिएका क्यासिनोहरू कायम राख्ने तर तत्कालीन अवस्थामा ३ किलोमिटरको सीमाको नियमअनुसार सञ्चालन नभएकाहरूको हकमा आगामी तीन वर्ष भित्रमा ५ किलोमिटरको सीमा बाहिर आएर सञ्चालन गर्नुपर्ने प्रावधान प्रस्ताव गरिएको बताइन्। उनले भनिन्, ‘मनी लाउण्डरिङको विषयमा छलफल भयो र त्यसमा उपसमितिले हिजो नै प्रतिवेदन बुझाएको थियो। उपसमितिले बुझाएको प्रतिवेदनमा थप छलफल गर्नुपर्ने विषयहरूमा छलफल गरेका छौं। अरू विषय उपसमितिले जे बुझाएको छ, त्यो नै विषय पास गर्‍यौं र सहकारीको विषयमा विधेयकको दफा १८ को उपदफा २ झिक्ने वा सहकारी ऐन, २०७४ को दफा ५२ मा व्यक्तिगत बचतको अधिकतम सीमा २५ लाख हुनेगरी प्रस्ताव भएको विषय हटाउने।’ उनले अगाडि भनिन्, ‘क्यासिनो सञ्चालनको सम्बन्धमा विदेशी सीमाबाट ५ किलोमिटर कि ३ किलोमिटर गर्ने भन्ने विषय थियो, त्यो विषयमा तत्कालीन प्रचलित कानूनअनुसार ३ किलोमिटरको सीमा बाहिर सञ्चालन गर्ने गरिएका क्यासिनोहरूको सन्दर्भमा त्यो कायम राख्ने र तत्कालीन अवस्थामा ३ किलोमिटरको सीमाको नियमअनुसार सञ्चालन नभएकाहरूले अब तीन वर्ष भित्रमा ५ किलोमिटरको सीमा बाहिर आएर सञ्चालन गर्नुपर्ने। अब बन्ने नयाँ क्यासिनोहरूको हकमा ५ किलोमिटरको सीमा कायम गर्ने।’ समितिको बैठकमा कानून, न्याय तथा संसदीय मामिलामन्त्री धनराज गुरूङले विधेयक समितिमा अड्काएर राख्न नहुने बताए।

काठमाडौं । संयुक्त राष्ट्रसंघका महासचिव एन्टोनियो गुटेरेसको नेपाल भ्रमण स्थगित भएको छ । इजरायल र प्यालेस्टाइनी लडाकु समूह हमासबीच युद्ध चर्किएपछि गुटेरसले भ्रमण स्थगित गरेका हुन् । मध्यपूर्व र पश्चिम एसियमा बढेको तनावका कारण गुटेरेसको नेपाल भ्रमण स्थगित भएको परराष्ट्र मन्त्रालयले जानकारी दिएको छ । महासचिव गुटेरेस नेपाल हुँदै चीन जाने कार्यक्रम रहेकामा त्यो पनि हाललाई रोकिएको छ । राष्ट्रसंघका महासचिव गुटेरेसले यही असोज २६ गतेदेखि २९ गतेसम्म नेपाल भ्रमण गर्ने तय भएको थियो । गुटेरेसले असोज २७ गते संघीय संसदको संयुक्त बैठकलाई सम्बोधन गर्ने समेत तय भइसकेको थियो । केही समयमै गुटेरेसले नेपाल भ्रमण गर्ने परराष्ट्र मन्त्रालयले जनाएको छ ।

काठमाडौं । नेपाली बजारमा बुधबार सुनको मूल्य घटेको छ । नेपाल सुनचाँदी व्यवसायी महासंघका अनुसार आज सुन तोलामा १०० रुपैयाँले घटेको हो । आज छापावाल सुन तोलामा एक लाख आठ हजार ८०० रुपैयाँमा कारोबार भइरहेको छ । अघिल्लो कारोबार दिन एक लाख आठ हजार ९०० रुपैयाँमा कारोबार भएको थियो । आज छापावाल सुन तोलामा एक लाख आठ हजार ३०० रुपैयाँमा कारोबार भइरहेको छ । आज चाँदीको मूल्य भने स्थिर रहेको छ । आज चाँदी तोलामा एक हजार ३४० रुपैयाँमा कारोबार भइरहेको महासंघले जनाएको छ ।

काठमाडौं । प्रधानमन्त्री पुष्पकमल दाहाल प्रचण्ड र नेपालका लागि स्वीट्जरल्याण्डका नवनियुक्त राजदूत डेनियल मेउलीबीच शिष्टाचार भेटवार्ता भएको छ । प्रधानमन्त्री पुष्पकमल दाहाल ‘प्रचण्ड’लाई भेट्न राजदूत मेउली आज बिहान प्रधानमन्त्री निवास बालुवाटार पुगेकी थिइन् । भेटको सो अवसरमा नेपाल र स्वीट्जरल्याण्डबीचको द्विपक्षीय सहयोगका विषयमा छलफल भएको थियो ।

काठमाडौं ।आन्दोलनरत स्थानीय तहका कर्मचारीहरूलाई सरकारले वार्ता गर्ने भएको छ । संघीय मामिला तथा सामान्य प्रशासन मन्त्रालयले मंगलबार कर्मचारीका मागमा उपयुक्त निकास निकाल्न मन्त्रालय सकारात्मक रहेको भन्दै वार्ताका लागि आह्वान गरेको हो । तर आन्दोलनरत कर्मचारीले वार्ताका लागि औपचारिक रूपमा आफूलाई पत्राचार हुनुपर्ने अडान राखेका छन् । मन्त्रालयले विज्ञप्तिमार्फत वार्ताको आह्वान गरेको हो । ‘स्थानीय तहका कर्मचारीका मागका सम्बन्धमा छलफल गरी उपयुक्त निकास निकाल्न मन्त्रालय सकारात्मक छ,’ विज्ञप्तिमा भनिएको छ, ‘कतिपय नीतिगत विषयहरू सम्बोधन भइसकेको र सम्बोधन हुन नसकेका विषयमा थप छलफलबाटै समस्याको सम्बोधन गर्न सकिने भएकाले हाल भइरहेको विरोध प्रदर्शनलाई स्थगन गरी छलफल र संवादमा आउन तथा आ–आफ्नो कार्यस्थलमा फर्की आमनागरिकमा सेवा प्रवाह सुचारु गर्न मन्त्रालयसम्बद्ध सबैमा अनुरोध गर्दछ ।’ संघीय निजामती सेवा विधेयकमा समावेश प्रावधानले आफूहरूलाई असर गर्ने भन्दै संशोधनको माग राखी उनीहरू आन्दोलनमा उत्रिएका छन् । उनीहरूले एक सातादेखि माइतीघर–बानेश्वर सडकखण्डमा प्रदर्शन गर्दै आएका छन् । सोमबार संघीय मामिलामन्त्रीसँग छलफल भए पनि सकारात्मक नभएपछि उनीहरूले मंगलबार पनि आन्दोलनलाई निरन्तरता दिए । प्रमुख प्रशासकीय अधिकृत स्थानीय तहबाटै हुुनुपर्ने, अन्तर तहका कर्मचारीको सरुवामा दोहोरो सहमतिको प्रावधान हटाउनुपर्ने, वृत्ति विकास तथा सरुवाका प्रावधान हेरफेरलगायत २० बुँदे माग राखेर उनीहरू आन्दोलनमा उत्रिएका हुन् ।

काठमाडौं । काठमाडौंको नयाँ बानेश्वर नजिकै वाग्मती नदी किनारमा एक व्यक्तिको शव फेला परेको छ । बुद्धनगर बस्ने २० वर्षीय विमल महरा मृत भेटिएको प्रहरीले जनाएको छ । घटनाबारे थप अनुसन्धान भइरहेको बानेश्वर प्रहरीले जनाएको छ ।

  काठमाडाैं । बागमती प्रदेशका स्वास्थ्यमन्त्री उत्तम जोशी प्रदेशभरीका उत्कृष्ट मन्त्रीको रुपमा सम्मानित भएका छन् । प्रदेश स्वास्थ्य मन्त्रालयबाट उत्कृष्ट कार्य गरेको भन्दै मन्त्री जोशीलाई सम्मान गरिएको हो । जोशीलाई आज (मंगलबार) विश्व मानसिक स्वास्थ्य दिवस एवम् सेतो कोट दिवसको अवसरमा प्रधानमन्त्री पुष्पकमल दाहाल (प्रचण्ड) ले सम्मान गरेका हुन् । मन्त्री जोशी गत जेठ ७ गते बागमती प्रदेशको स्वास्थ्यमन्त्रीमा नियुक्त भएका थिए। मन्त्री जोशीले आफ्नो कार्यकालमा प्रादेशिक अस्पतालहरुमा विपन्नलाई निःशुल्क उपचारको निर्णय गरेका छन्। यस्तै क्यान्सर तथा हृदयघातका बिरामीहरूलाई उपचारमा छुट दिने निर्णय समेत मन्त्री जोशीले गर्नुभएको थियो । प्रदेश भित्रका सहिद परिवार, जनयुद्ध(जन आन्दोलनका घाइते, विपद्मा परेका तथा वन्यजन्तुको आक्रमणबाट घाइते भएका तथा क र ख बर्गका अपांग भएकाहरुलाई पनि निस्शुल्क उपचार सेवाको निर्णय जोशीले गरेका छन्। यस्तै उनले प्रादेशिक अस्पतालहरुलाई ६५ वर्ष माथिका तथा विपन्नलाई निस्शुल्क दन्त उपचार सेवा र प्यारालाइसिस भएकाहरुलाई प्रादेशिक आयुर्वेदिक अस्पतालमा निःशुल्क थेरापीको व्यवस्था पनि गरे। मन्त्री नियुक्त भएपछि नै जोशीले प्रदेश अन्तर्गतका १३ वटै जिल्लाका आश्रममा आश्रित, अपाङ्ग, सिमान्तकृत तथा लोपउन्मुख जातीहरुको निःशुल्क बीमा, महिला स्वास्थ्य स्वंसेविकाहरुलाई ५० प्रतिशत अग्रिम भुक्तानी गरी बीमाको व्यवस्था पनि गरेका थिए। जोशीका यिनै कार्यहरुलाई मध्यनजर गर्दै प्रधानमन्त्री प्रचण्डले सम्मानित गरेका हुन्।  

चितवन । भरतपुर महानगरपालिका वडा नम्बर २४ को नेपाली काँग्रेसको वडा कमिटी नै नेकपा माओवादी केन्द्र प्रवेश गरेको छ । वडा सभापति इन्द्र बहादुर लामाको नेतृत्वमा क्षेत्रिय प्रतिनिधि लाल बहादुर विक, जनप्रतिनिधि सुनिल अर्नेल, कार्यसमिति सचिव रामेश्वर चौधरी, क्षेत्रिय प्रतिनिधि तुल बहादुर मगर, पम बहादुर विक, श्याम बहादुर मुक्तानसहित ४७ जना माओवादी केन्द्र प्रवेश गरेका हुन् । मंगलबार भरतपुर वडा नम्बर २४ र २५ मा रहेको देविस्थान पार्कमा आयोजना गरिएको पार्टी प्रवेश कार्यक्रममा विभिन्न पाटी परित्याग गरी नेकपा माओवादी केन्द्र प्रवेश गरेका २८३ जनालाई नेकपा माओवादी केन्द्रका केन्द्रीय सदस्य तथा भरतपुर महानगरपालिका प्रमुख रेनु दाहालले स्वागत गरिन् । यस्तै नेकपा एमाले परित्याग गरी वडा सहसचिव तेजबहादुर थापा, पूर्वजनप्रतिनिधि अविर बहादुर विक, हिरामाया विक, शान्ति एकता टोलका अध्यक्ष कृष्ण विकलगायत १ सय १० जना माओवादी केन्द्र प्रवेश गरेका छन् । राप्रपाबाट ३० जना, थारु समाजबाट २५ जना, रास्वपाबाट १० जना र भूपू सैनिक संघबाट अध्यक्ष नमबहादुर गोदार र शंकरबहादुर अर्यालको नेतृत्व २० जना माओवादी केन्द्र प्रवेश गरेका हुन् । माओवादी केन्द्र प्रवेश गरेकालाई स्वागत गर्दै माओवादी केन्द्रका केन्द्रीय सदस्य दाहालले भरतपुर २४ को समस्या समधान गर्न तत्पर रहेको उल्लेख गरिन। उनले माओवादी पार्टी दुःख सुखको पार्टी भएकाले जनताको हकअधिकारी प्रत्याभूत गर्न अग्रसर रहेको बताइन् । भरतपुर २४ मा रहेका धेरै समस्याहरु समधान भईसकेकाले अब लालपुर्जा वितरणको कार्य बाँकी रहेको बताइन् । केन्द्रीय सदस्य दाहालले भरतपुर २४ मा केही दिनमै ७२ जना भूमिहिन दलित, भूमिहिन सुकुम्बासीलाई लालपुँर्जा वितरणको तयारीमा रहेको बताइन् । माओवादी पार्टीले जनयुद्धको बलमा राजनीतिक परिवर्तन गरी शान्ति प्रकृयामा आई सामाजिक र न्यायिक परिवर्तनलाई आफ्नो मुख्य मुद्धाको रुपमा अगाडि बढाउदै आएको उद्घोष समेत गरिन् । कार्यक्रममा नेकपा माओवादी केन्द्रका केन्द्रीय सदस्य श्यामकुमार श्रेष्ठ, बागमती प्रदेशका सांसद ईश्वर सापकोटा, नेकपा माओवादी केन्द्रका चितवन संयोजक रामचन्द्र अधिकारीलगायतको उपस्थिति रहेको थियो । कार्यक्रममा वाईसियल नेपालका केन्द्रीय सदस्य तथा वडा नम्बर २४ का अध्यक्ष रामु गोदारले शुभकामना मन्तव्य व्यक्त गरेका थिए ।

काठमाडौं । सरकारले इजरायलमा रहेका नेपालीको अवस्थाबारे जानकारी गराउन नियमित प्रेस ब्रिफिङ गर्ने भएको छ । हमासको आक्रमणपछि इजरायलयमा रहेका नेपालीको अवस्था, उद्धारको प्रक्रिया, शव नेपालमा ल्याउन चालिएको कदमसहितका विषयमा जानकारी गराउन परराष्ट्र मन्त्रालयले आजदेखि नियमित प्रेस ब्रिफिङ गर्न लागेको हो । प्रेस ब्रिफिङ अपराह्न साढे ४ बजे हुने मन्त्रालयले जनाएको छ । मन्त्रालयका अनुसार हालसम्म ३२४ जनाले अनलाइन रजिस्ट्रेसनमार्फत विवरण उपलब्ध गराएका छन् । उनीहरूमध्ये २८८ जनाले नेपाल फर्किन चाहेको बताएका छन् । बाँकी ३६ जनाले सुरक्षित स्थानमा स्थानान्तरण हुन चाहेका छन् । असोज २० गते हमासको आक्रमणमा परेर १० नेपाली विद्यार्थीको निधन भएको थियो । एकजना अझै सम्पर्कविहीन छन् ।