काठमाडौं ।  सङ्घीय संसद् अन्तर्गतका सचिवद्वय पदमप्रसाद पाण्डे र डा. सुरेन्द्र अर्यालले आज पद तथा गोपनीयताको शपथ लिने भएका छन् । सङ्घीय संसद् सचिवालय, सिंहदरवारमा आयोजना हुने एक समारोहका बीचमा उनीहरूले शपथ लिने भएका हुन् । शपथ समारोह बिहान १०ः १५ बजे कृषि समितिको हल, सिंहदरवारमा हुने तय भएको छ । प्रतिनिधिसभाका सचिव पाण्डे र राष्ट्रियसभाको सचिवमा डा. अर्याल गत बैशाख २१ गते नियुक्त भएका थिए । संघीय संसद् सचिवालयमा सहसचिव पदमा कार्यरत पाण्डे र अर्याललाई राष्ट्रपति रामचन्द्र पौडेलले बिहीबार सचिव पदमा नियुक्त गरेका हुन । उनीहरु दुवैजना नेपालको संविधानको धारा १०६ बमोजिम सचिव पदमा नियुक्त भएका हुन ।

काठमाडौं ।  आज आठौँ राष्ट्रिय पत्रकारिता दिवस विभिन्न कार्यक्रम गरी देशभर मनाइँदै छ । मुलुककै जेठो समाचारमूलक पत्रिका गोरखापत्रको प्रकाशन आरम्भ भएको दिन १९५८ वैशाख २४ गतेको अवसरमा हरेक वर्ष वैशाख २४ गते राष्ट्रिय पत्रकारिता दिवस मनाउने गरिएको छ । ‘पत्रकारितामा खोज र नवीनताः लोकतान्त्रिक गणतन्त्रको सफलता’ भन्ने मूल नाराका साथ पत्रकारिता दिवस मनाउन थालिएको सञ्चार तथा सूचना प्रविधि मन्त्रालयले जनाएको छ । सञ्चार तथा सूचना प्रविधि मन्त्रालयको आयोजनामा वैशाख २४ गते दिउँसो १ बजे प्रधानमन्त्री तथा मन्त्रीपरिषद्को कार्यालय सिंहदरबारमा विशेष समारोह आयोजना गरिने भएको छ । सो समारोहमा नेपालको पत्रकारिताको क्षेत्रमा विशिष्ट योगदान पु¥याउने दुई जना वरिष्ठ पत्रकारलाई सम्मान र छ जनालाई राष्ट्रिय पत्रकारिता पुरस्कार प्रदान गरिने सञ्चार तथा सूचना प्रविधिमन्त्रीका सञ्चारविज्ञ नरेन्द्र केसीले जानकारी दिए । समारोहलाई प्रधानमन्त्री पुष्पकमल दाहाल ‘प्रचण्ड’ र सञ्चार तथा सूचना प्रविधिमन्त्री रेखा शर्माले सम्बोधन गर्ने कार्यक्रम छ ।

धादिङ । नेपाली कांग्रेसका महामन्त्री गगनकुमार थापाले स्वास्थ्योपचारका नाममा राष्ट्रको ढुकुटीबाट हुने खर्च रोक्न सकेमात्रै पनि देशमा बढ्दै गएको आर्थिक मन्दी कम गर्न सकिने बताएका छन् । नेपाल वितरक सङ्घको ११ औँ वार्षिक साधारणसभालाई आज धादिङबेँसीमा सम्बोधन गर्दै महामन्त्री थापाले भने , ‘म यो वर्ष कुनै पनि ठाउँमा कसैलाई पनि स्वास्थ्योपचारका नाममा एक रुपैयाँ पनि राष्ट्रको ढुकुटीबाट खर्च गर्दिनँ भनेर सबैले व्यवहारमा लागू गर्न सक्नुपर्छ ।’ उनले देशको आर्थिक भार कम गर्न राष्ट्रपतिदेखि वडाध्यक्षसम्म सबैको तलबबाहेकका सबै सुविधा कटौती गर्नुपर्ने बताए । उनले भने, ‘सांसदले तलब पाउँछ, संसद् बैठक बसेको बेला सांसदहरूले बैठक भत्ता पाउँछ । त्यो ठूलो पैसा छैन । तर यो वर्ष अप्ठयारो परेको वर्ष भएकाले सांसदले हामी यसरी प्राप्त गरिरहेको सेवा सुविधा कटौती गर्छौँ भनेर लाग्यौँ भने बल्ल देशभित्रको आर्थिक व्यवस्थापन सहज बनाउन सहयोग पुग्नेछ’, । आर्थिक हिसाबले देश अप्ठ्यारो परेको वर्ष भएकाले राष्ट्रपतिदेखि सांसद हुँदै वडाध्यक्षसम्म सबैले अन्य सुविधा कटौती गरेर देशको अप्ठ्यारो फुकाउनेतर्फ लाग्नुपर्ने उनको भनाइ छ ।

काठमाडौं । राष्ट्रिय स्वतन्त्र पार्टीले (रास्वपा) ३६ वटा विभाग गठन गरेको छ । बसुन्धरास्थित पार्टी कार्यालयमा आज बसेको केन्द्रीय समिति बैठकले ३६ वटा विभाग गठन गर्दै प्रमुखहरू तोकेको प्रवक्ता मुकुल ढकालले जानकारी दिए । हेर्नुस नामावली कुन विभागको प्रमुख को ?

काठमाडौं । राष्ट्रिय स्वतन्त्र पार्टी संसदीय दलको नेतामा सभापति रवि लामिछाने चयन भएका छन् । पार्टीको सोमबार बसेको संसदीय दलको बैठकले उनलाई दलको नेता चयन गरेको हो । बैशाख १० मा सम्पन्न उपनिर्वाचनबाट चितवन २ मा पुन चुनाव जितेसँगै उनलाई संसदीय दलको नेता बन्ने बाटो खुलेको थियो । नागरिकताको विषयमा सर्वोच्च अदालतले उनको सांसद पद खारेज गरेपछि उनी संसदीय दलको जिम्मेवारीबाट पनि मुक्त भएका थिए । उपनिर्वाचन जितेपछि लामिछानेलाई दलको नेता बनाउन डीपी अर्यालले पद शनिबार छाडेपछि सोमबारको बैठकले लामिछानेलाई दलको नेता चयन गरेको हो ।

काठमाडौं । प्रधानमन्त्री पुष्पकमल दाहाल प्रचण्डले बहिर्गमित लडाकुहरूलाई २ लाख दिने सर्वोच्च अदालतको फैसला कार्यान्वयनमा गर्न गर्दा ‘स्याल हुइयाँ’ मच्चाउन खोजिएको बताएका छन्। अखिल नेपाल ट्रेड युनियनको महाधिवेशनलाई सम्बोधन गर्दै प्रधानमन्त्री प्रचण्डले अयोग्य अडाकुलाई २ लाख दिने निर्णय आफू प्रधानमन्त्री भएपछि नभएको पनि उनले स्पष्ट पारे। ‘हिजो अर्कै सरकारले निर्णय गरेको परिस्थिति र देशको सर्वोच्च अदालतले बहिर्गमित लडाकुलाई २ लाख दिनू भनेर गरेको फैसला कार्यान्वयन गर्दा अहिले कस्तो स्याल हुँइया मच्चाउन खोजिएको छ,’ प्रधानमन्त्री प्रचण्डले भने। साथै, उनले उक्त निर्णय अर्कै सरकारको पालामा भएको पनि बताए। ‘हामीले हिजो क्रान्तिमा लागेका सहिदहरुलाई सहिद हुनुपर्छ भन्दा प्रहार भयो। भइरहेको छ,’ प्रधानमन्त्री प्रचण्डले भने, ‘युद्धमा त्याग र बलिदान गरेका सबै योद्धालाई सम्मान गर्नुपर्छ भनेर भन्दा प्रहार भइरहेको छ। त्यो पनि मैले प्रधानमन्त्रीको रुपमा नयाँ आविस्कार गरेको निर्णय होइन।’ साथै, उनले प्रधानमन्त्री पद र जिम्मेवारीलाई आफूले ठूलो चुनौतीका रुपमा लिएको पनि बताए। ‘अहिले देशको प्रधानमन्त्री पद र जिम्मेवारीलाई निकै ठूलो चुनौतीपूर्ण अवसरको रुपमा लिएको छु। तपाईंहरुले देख्नुभएको छ, हामीले गर्न खोजेका प्रत्येक सकारात्मक डिसिजनविरुद्ध प्रहार भइरहेको छ,’ प्रधानमन्त्री प्रचण्डले भने। उनले मजदुरहरुलाई सम्बोधन गर्दै अब नजाग्ने हो भने अपमानित गरे सहिदको त्यागलाई उल्ट्याउन प्रयास भइरहेको पनि बताए। ‘हामी नजाग्ने हो भने नगर्जिने हो भने समपूर्ण महान सहिदका त्यागलाई अपमानित गरेर उल्टाउने षडयन्त्र अझ अगाडि जानसक्छ,’ प्रधानमन्त्री प्रचण्डले भने, ‘हामी नजाग्दा, हामी आन्दोलित नहुँदा स्यालहरु कराउन थालेका छन्, स्यालहरुले रजाईं गर्न थालेका छन्। त्यसलाई छुट दिन सकिँदैन।’

काठमाडौं । नेपाल प्रहरीले नेकपा एमालेका सांसद लक्ष्मी महतो कोइरी फरार रहेको सूचना संघीय संसद सचिवालयलाई पठाएको छ । प्रहरीले आज सभामुख देवराज घिमिरेलाई सम्बोधन गरेर हत्या अभियोग पुष्टि भएका कोइरी फरार रहेको पत्र पठाएको नेपाल प्रहरीका केन्द्रीय प्रवक्ता कुबेर कडायतले जानकारी दिए। पत्रमा प्रहरीले सांसद कोइरी फरार रहेकाले पक्राउका लागि सहयोग गर्न आग्रह गरिएको छ। प्रहरीले यसअघि गत पुस ७ गते पनि पत्र पठाइएको थियो। मिति २०७७/०८/१९ गते सम्मानित उच्च अदालत जनकपुरबाट भएको आदेश कार्यान्वयन गर्ने सम्बन्धमा आवश्यक सहयोग गरिने व्यवस्था हुन सादर अनुरोध गरिएको छ,’ त्यतिबेलाको पत्रमा भनिएको थियो। तर पुसको पत्रलाई लिएर कुनै पनि प्रक्रिया अगाडि बढेको थिएन । अर्कोतिर उनले प्रतिनिधि सभाका केही बैठकमा भाग लिएका थिए। पछिल्लो समय उनले आफू बिरामी रहेको भन्दै सभामुखलाई पत्र पठाएका थिए। त्यसलाई अनुमोदन गर्न खोज्दा गत शुक्रबार प्रतिनिधि सभा बैठकमा विवाद भएको थियो। २०७२ को मधेस आन्दोलनका बेलामा सशस्त्र प्रहरीका सहायक निरीक्षक थमन विकलाई उपचारका लागि अस्पताल लैजाने क्रममा एम्बुलेन्सबाट थुतेर हत्या गरिएको थियो। कोइरीमाथि विकको हत्या आरोप छ। प्रतिनिधि सभाको नियमावली अदालतको आदेश बमोजिम पुर्पक्षका लागि थुनामा बस्नुपर्नेमा त्यस्तो थुनामा नबसी फरार रहेको भएमा निजलाई सदस्यको हैसियतले कुनै कार्य गर्न वा कुनै अधिकार वा उन्मुक्ति प्राप्त हुने छैन र त्यस्तो अवधिभर निज निलम्बनमा रहने र पारिश्रमिक, सेवा र सुविधा स्थगित हुने व्यवस्था छ।

काठमाडौं । राष्ट्रिय स्वतन्त्र पार्टीको केन्द्रीय समितिको बैठक जारी छ। सरकारलाई दिएको समर्थनका विषयमा निर्णय गर्न रास्वपाको बैठक पार्टी कार्यालय बसुन्धरामा बसिरहेको हो। बैठकमा उपचुनावमा पार्टीले प्राप्त गरेको जनमत, सरकारलाई दिएको समर्थन तथा सरकारमा सहभागिता र आगामी कार्यदिशाबारे छलफल भइरहेको नेताहरुले जानकारी दिएका छन्। बैठकले पुष्पकमल दाहाल प्रचण्ड नेतृत्वको सरकारलाई दिएको समर्थन फिर्ता लिने वा कायम राख्ने अथवा सरकारमा सहभागी हुने विषयमा निर्णय गर्ने प्रवक्ता डा. मुकुल ढकालले जानकारी दिए। प्रतिनिधि सभाको निर्वाचनमा २० वटा सिट जितेको रास्वपाले वैशाख १० गते भएको उपनिर्वाचनबाट थप १ सिट जितेको छ। चितवन २ बाट रास्वपा सभापति रवि लामिछाने पुनः निर्वाचित भएका छन् भने तनहुँ १ बाट स्वर्णिम वाग्ले विजयी भएका छन्। प्रतिनिधि सभाका रास्वपाका सांसदको संख्या २१ पुगेको छ। केन्द्रीय समितिको बैठकपछि आजै दिउँसो ३ बजे रास्वपाको संसदीय दलको बैठक पनि बस्ने छ।

काठमाडौं । प्रधानमन्त्री पुष्पकमल दाहाल प्रचण्डले नवलपरासी गैंडाकोटमा मौलकालिका केबलकार उद्घाटन गरेका छन् ।

काठमाडौं । विश्व साइकल यात्री तथा सगरमाथा आरोही पुष्कर शाहले राष्ट्रिय स्वतन्त्र पार्टी कार्यालयमा साइकल निषेध गरिएको बताएका छन् । पार्टी उपाध्यक्ष तथा प्रतिनिधिसभा सदस्य डिपी अर्यालले निमन्त्रणा गरेर कार्यालय पुगेको बताएका शाहले सुरक्षा गार्डले मोटरसाइकल र गाडी छिराउन मिले पनि साइकल नमिल्ने बताएको उल्लेख गरेका छन् । उपाध्यक्ष अर्याललाई फोन गर्दा नउठेपछि आफू भिज्दै निस्केको शाहको गुनासो छ। उनले आफ्नो सामाजिक सञ्जालमा लेखेका छन् : ‘घन्टी घरको कथा ‘ माननीय डि पि अर्याल : राष्ट्रिय स्वतन्त्र पार्टीका उपाध्यक्षले चिया गफको लागि बिहान निम्ता दिनुभएको थियो ।अध्यक्ष ज्युलाई नि भेट्नु पर्‍यो भनेर पुरानो कोट भिरेर सिमसिम पानीमा भिज्दै घन्टी घर बसुन्धारा पुगेँ । पालेज्युले साइकललाई घन्टी घर भित्र प्रबेश छैन भन्नु भो । ढोका खुल्लै देखेर म साइकल लिएरै भित्र पसेँ । भित्र मोटर साइकल चै छिर्न दिइएको रैछ । मैले त्यो बारे प्रश्न गरेँ । पालेले गाडी र मोटर साइकल त पाउँछ भने । पालेज्युको आदेश मानेर म बाहिर निस्केँ । माननिय डि पि अर्याललाई फोन गरेँ : फोन उठेन । थोत्रो कोट भिजाउँदै घर फर्केँ । झ्याक्ने साइकले जिन्नगी 😢

काठमाडौं । अनुचित लेनदेन मिटरब्याजसम्बन्धी जाँचबुझ आयोगको केन्द्रीय कार्यालय स्थापना भएको छ । सरकारको निर्णयअनुसार आयोगको केन्द्रीय कार्यालय जनकपुरमा स्थापना गरिएको हो । उपप्रधानमन्त्री एवं गृहमन्त्री नारायणकाजी श्रेष्ठले आइतबार जनकपुरधाममा केन्द्रीय कार्यालय उद्घाटन गरेका हुन । कार्यालयको उद्घाटन गर्दै मन्त्री श्रेष्ठले जनयुद्ध तथा विभिन्न आन्दोलनले सामन्तीहरूको पतन भए पनि मिटरब्याजीको रूपमा सामन्ती अवशेष अझै बाँकी रहेको बताए । उनले मिटरब्याजीलाई सहयोग गर्ने कुनै पनि राजनीतिक दल वा पार्टीको नेतालाई नछाड्ने दाबी गर्दै कारबाहीको दायरामा ल्याउने चेतावनीसमेत दिए ।

काठमाडौं । विवाह गर्न नमानेको भन्दै प्रेमीको घरमा गएर प्रेमिकाले आत्महत्या गरेकी छिन्। नर्स समेत रहेकी प्रेमिका अनुमा श्रेष्ठले आत्महत्या गरेकी हुन्। प्रेमी सुजन ढकालले आफूसँग विवाह गर्न नमानको भन्दै प्रेमिका श्रेष्ठले शनिबार काठमाडौं बोहराटारस्थित सुजनको घरमा गएर आत्महत्या गरेको पाइएको प्रहरीले जनाएको छ। घटनाबारे प्रहरी वृत्त बालाजुले अनुसन्धान अघि बढाएको छ। मृतक अनुमा स्टाफ नर्स हुन् भने प्रेमी भनिएका ढकाल डाक्टर रहेका पाइएको छ। अनुमा वीर अस्पतालमा काम गर्थिन् भने सुजन कान्ति बाल अस्पतालमा कार्यरत रहेका पाइएको छ। लामो समय प्रेम सम्बन्धमा रहे पनि विवाह गर्न नमानेको भन्दै उनले आत्महत्या गरेको भन्ने खुलेको अनुसन्धानमा संलग्न प्रहरी अधिकारीले जानकारी दिएका छन्। ‘शव भेटिएपछि हामीले अनुसन्धान अघि बढाएका छौं,’ जिल्ला प्रहरी परिसर काठमाडौंका एसपी तथा प्रवक्ता सिताराम रिजालले भने। प्रहरीले सुसाइड नोट समेत फेला पारेको छ।

काठमाडौं ।संस्कृति पर्यटन तथा नागरिक उड्ययन मन्त्री माननीय सुदन किराँतीले रैथाने ज्ञान र सीपको महत्व अहिलेको समयमा झनै बढेको बताएका छन । नेपाल ललितकला प्रज्ञा प्रतिष्ठानको १४ औं प्राज्ञ सभाको शनिबार उद्घाटन गर्दै उनले मान्छेबाट मान्छेमा सर्ने उक्त ज्ञानलाई संरक्षण गर्दै प्राज्ञिक क्षेत्रमा समेत अघि बढ्ने उद्देश्य राखेर नै सरकारले रैथाने विश्वविद्यालयको अवधारणा अघि ल्याएको बताए। उनले भने, ‘समाजमा रहेको मूल्य मान्यताको संरक्षण गर्न रैथाने विश्वविद्यालयको कुरा गरेको हो ।’ उनले मोतिराम भट्ट, लक्ष्मी प्रसाद देवकोटा, नेल्सन मण्डेलाको उदाहरण दिँदै एक बारको जीवनमा सबैले सम्झिने गरी काम गनुपर्ने कुरामा जोड दिए । उनले थपे, ‘सबैले राम्रो काम गरौं । हामी अजम्बरी छैनौं । मान्छे कामले बाँच्ने हो ।’ कार्यक्रममा बोल्दै संस्कृति, पर्यटन तथा नागरिक उड्ययन राज्य मन्त्री सुशिला सिर्पालीले प्रतिष्ठानले नीति निर्माण गर्दा २२ सालको भन्दा ८० सालको कुराले निर्धारण गर्न आवश्यक भएको धारणा राखिन । उनले सबैजना नयाँ युग सुहाउँदो र संविधानले मागेको कुरासँग जोडिनुपर्ने बताइन् । राष्ट्रिय योजना आयोगका सदस्य राम कुमार फुयाँलले भाषा, साहित्य, संगीत, ललितकलाको क्षेत्रमा प्रदेशसँग जोडिएर बहुभाषिक संग्रहालय, अनुसन्धान, अभिलेख, जीवित संग्रहालयको विषयमा काम गर्न जरुरी भएको बताए । उनले यस विषयमा समाजलाई सही ढंगको सूचना सम्प्रेषण गर्न कक्षा सञ्चालन गर्न आवश्यक रहेको उनको भनाई छ । प्रतिष्ठानले ठोस रुपमा योगदान पुग्न सक्नेगरी काम गरिरहँदा अन्तबाट रकमान्तर गरेर पनि काम अघि बढाउन सकिने धारणा उनको छ ।   कार्यक्रममा स्वागत मन्तव्य राख्दै प्रतिष्ठानका उपकुलपति लालकाजी लामाले अग्रज कलाकारहरुले, बौद्धिक वर्गले, प्राज्ञ सभाले आफ्नो भूगोल, माटो सुहाउँदो आफ्नो हुटहुटी लिएर आएको बताउँदै प्राज्ञ सभा एउटा निश्कर्षमा पुग्ने धारणा राखे । समारोहमा मूर्तिकार नरेन्द्र प्रसाद भण्डारीद्वारा लिखित पुस्तक ‘समसामयिक नेपाली मूर्तिकला र मूर्तिकार’को समेत सार्वजनिक गरियो । पुस्तक सार्वजनिक भएपश्चात कार्यक्रममा बोल्दै भण्डारीले भने, ‘मेरो पुस्तकले अनुसन्धानको क्रममा धेरै मूर्तिकारहरुलाई समेटेको छ । तपाईहरुले सल्लाह, सुझाव दिनुहोला । नेपाली कलाको विकासका लागि हामीलाई जुन जिम्मेवारी दिइएको छ । त्यसमा हामीले मूलतः नीति निर्माणमा हस्ताक्षर मात्र गर्ने छैनौं । नयाँ ढंगले सहयोग पनि गर्नेछौं ।’ नेपाल संगीत तथा नाट्य प्रज्ञा प्रतिष्ठानका कुलपति निशा शर्माले तीनवटै एकेडेमी एउटै विधामा पर्ने धारणा राखिन । उनले भनिन, ‘रंग हामीलाई चाहिन्छ । हामीले पनि बुझ्नुपर्छ । डान्स, नाटकमा प्रयोग हुन्छ । सेट गर्दा मिक्स हुन्छ । लाइटलाई प्रयोग गर्दा जरुरी हुन्छ ।’ आफूलाई पनि आगामी दिनमा सल्लाह र सुझाव दिन आग्रह गर्दै उनले सबै एकेडेमी मिलेर काम गर्नुपर्ने आवश्यकता पनि औंल्याए । बाग्मती प्रदेशका सांसद सरल सहयात्रीले यस सभाले आगामी दिनको लागि महत्वपूर्ण आधारशिला खडा गरोस् भन्ने कामना गरे । उनले अब दिनमा प्रतिष्ठानले परम्परागत प्रतिष्ठान धान्ने रुपमा मात्र काम गर्ने नभइ गहिराइमा पुगेर दीर्घकालिन रुपमा प्रभाव पार्ने गरी काम गर्नुपर्ने धारणा राखे । भाषा आयोगका अध्यक्ष डा. गोपाल ठाकुरले नेपालका रैथाने र परम्परागत कला तथा ज्ञानको संरक्षणमा ध्यान दिँदै त्यसलाई सुक्ष्म र बृहत दुवै तवरले खोज, अनुसन्धानमा समेत ध्यान दिनुपर्ने धारणा राखे । प्रतिष्ठानका कुलपति नारदमणि हार्तम्छालीले ललितकलाको क्षेत्रमा अहिले चुनौतिसँगै नयाँ अवसर समेत रहेको बताए । उनले नीतिगत तथा संरचनागत तहमा प्रतिष्ठानले यस कार्यकालमा धेरै काम गर्न उद्देश्य राखेर अघि बढेको बताउँदै त्यसको नतिजा पनि केही समय पछि देखिने धारणा राखे । समारोहमा विभिन्न क्षेत्रलाई प्रतिनिधित्व गर्ने व्यक्तित्वहरुको महत्वपूर्ण सहभागिता रहेको थियो ।

काठमाडौं । राष्ट्रपति रामचन्द्र पौडेलले विश्व मजदुर दिवसले आफ्नो हक, हित, अधिकार तथा स्वतन्त्रताको रक्षार्थ विश्वभरिका सम्पूर्ण श्रमजीवीलाई एकताको सूत्रमा बाँध्न सहयोग पुग्ने विश्वास व्यक्त गरेका छन् । विश्व मजदुर दिवसको अवसरमा शुभकामना सन्देश जारी गर्दै राष्ट्रपति पौडेलले श्रम अधिकार सुनिश्चितताको कामना गर्दै सुख, शान्ति र समृद्धिको शुभकामना व्यक्त गरेका छन् । राष्ट्रपति पौडेलले जारी गरेको शुभकामना सन्देशमा भनिएको छ, श्रमिकहरूको पेसागत मर्यादा र सम्मानको प्रत्याभूति गराउन र उनीहरूको हक, अधिकार स्थापित भएको दिनको रूपमा प्रत्येक वर्ष मे १ तारिखमा यो दिवस मनाउने गरिन्छ । नेपालको संविधानले सम्पूर्ण नागरिकहरूका लागि रोजगारीको हक कायम गर्दै प्रत्येक श्रमिकका लागि उचित पारिश्रमिक, सुविधा तथा योगदानमा आधारित सामाजिक सुरक्षाको हकलाई समेत सुनिश्चित गरेको छ । मूलकमा लोकतन्त्रात्मक, समाजवाद उन्मुख अर्थतन्त्र निर्माण गर्न संवैधानिक प्रावधानले मूर्तरूप लिँदै जाने सन्दर्भमा श्रमिक वर्ग पनि लाभान्वित हुने उनको शुभकामना सन्देशमा उल्लेख छ । मुलुकको आर्थिक समृद्धिका लागि उद्यमशीलताको विकासमार्फत स्वदेशी उत्पादन वृद्धि गरी स्वावलम्बी र आत्मनिर्भर अर्थतन्त्र निर्माण गर्नु अत्यावश्यक हुन्छ । उद्यमशीलताको विकास गर्न पुँजी लगानी गर्ने उद्यमी र श्रम तथा सीप लगानी गर्ने श्रमिकहरू दुवैको योगदान उत्तिकै महत्त्वपूर्ण हुने भएकोले मर्यादित श्रमको वातावरण निर्माण गरी उत्पादन र उत्पादकत्व वृद्धि गर्नु मुख्य हुने उनको भनाई छ ।

काठमाडौं । राष्ट्रियसभाका अध्यक्ष गणेशप्रसाद तिमिल्सिना औपचारिक भ्रमणका लागि आइतबार राति कम्बोडिया प्रस्थान गरेका छन् । कम्बोडियाका प्रधानमन्त्री सम्देक टेको हुनसेनको सम्मान कार्यक्रममा भाग लिनका लागि उनी त्यसतर्फ प्रस्थान गरेका हुन् । अध्यक्ष तिमिल्सिनाले एसियन कल्चरल काउन्सिल र कम्बोडियन कमिटी अन नेशनल फेस्टिभल्स एण्ड सेरेमोनिजद्वारा आयोजित कार्यक्रममा विशिष्ट अतिथिको रुपमा सम्बोधन गर्ने कार्यक्रम छ । उक्त कार्यक्रममा कम्बोडियाका प्रधानमन्त्री हुनसेनलाई वल्ड बुद्धिष्ट फाउन्डेसनको पेट्रोन अफ द वल्र्ड बुद्धिष्ट अनोररी डक्ट्रेट इन ह्युमानिटीको मानार्थ पदावधि प्रदान गर्ने कार्यक्रम रहेको जनाइएको छ। अध्यक्ष तिमिल्सिनाको भ्रमण दलमा बागमती प्रदेशसभाका सदस्य अमन मास्के र सङ्घीय संसद् सचिवालयका उपसचिव नुमराज खनाल रहेको उनको सचिवालयले जनाएको छ ।