काठमाडौं । देशका प्रमुख प्रशासनिक केन्द्रको फोहोर नउठाउने काठमाडौं महानगरपालिकाका मेयर बालेन शाहविरुद्धको रिट कामु प्रधानन्यायाधीश हरिकृष्ण कार्कीको इजलासमा परेको छ। अधिवक्ता पदमबहादुर श्रेष्ठले प्रधानमन्त्री तथा मन्त्रिपरिषद्‌को कार्यालय सिंहदरबारलाई समेत विपक्षी बनाइ सोमबार हालेको रिटको पेशी आठौँ नम्बरमा छ। महानगरले चैत २६ गतेदेखि सिंहदरबार, प्रधानमन्त्रीको सरकारी निवास बालुवाटार र राष्ट्रपतिको कार्यालय शीतलनिवासको फोहोर उठाएको छैन। चैत २४ गते महानगरपालिकाले गौरिगाउँको सुकुम्बासी बस्ती हटाउन खोज्दा तनाव भएको थियो। बल प्रयोग गरेर बस्ती खाली गर्ने उद्देश्यले महानगरले गृह मन्त्रालयलाई अनुरोध गरे पनि गृहले बस्ती खाली गर्न सहयोग गरेको थिएन। त्यसको भोलिपल्ट मेयर बालेनले सामाजिक सञ्जालमार्फत केन्द्रले आफूहरूलाई असहयोग गरेको भन्दै सिंहदरबारको फोहोर नउठाउने घोषणा गरेका थिए। महानगरलाई केन्द्रले असहयोग गरेका १४ कारण दिँदै उनले फोहोर नउठाउने बताएका थिए।

काठमाडौं । राष्ट्रिय सभाको बैठक अनिश्चितकालका लागि स्थगित गरिएको छ । मंगलबार दिउँसो २ः३१ बजेका लागि बोलाइएको राष्ट्रिय सभाको बैठक विशेष कारण देखाएर अनिश्चितकालका लागि स्थगित गरिएको हो । मंगलबार दिउँसो बोलाइएको राष्ट्रिय सभा बैठक विशेष कारणले स्थगित गरिएको र अर्को बैठक अर्को सूचना जारी गरेर दिन र समय तोकिने संघीय संसद् सचिवालयका महासचिव डा भरतराज गौतमले जानकारी दिए । राष्ट्रियसभा नियमावली, २०७५ को नियम ६ को उपनियम ३ बमोजिम बैठकको मिति अर्को सूचनाबाट तोकिने उल्लेख छ ।

काठमाडौं । शंकास्पद रूपमा तीनतले घरको छतबाट खसेर गम्भीर घाइते भएका राष्ट्रिय स्वतन्त्र पार्टी (रास्वपा) का सभापति रवि लामिछानेका गाडी चालक दिलबहादुर थापा ‘शम्भु’को स्वास्थ्य अवस्था स्थिर रहेको अस्पतालले जानकारी दिएको छ। चालक थापा सोमबार बिहान ३ बजेर ५४ मिनेटमा भरतपुर महानगरपालिका–११ स्थित घरको छतबाट खसेर गम्भीर घाइते भएपछि उनलाई पुरानो मेडिकल कलेजमा भर्ना गरिएको छ। गम्भीर चोट लागेकाले उनको टाउकाको शल्यक्रिया हिजो नै गरिएको छ। अहिले पनि थापा भेन्टिलेटरमै रहेको उपचारमा संलग्न चिकित्सक डा.सुदीपराज केसीले जानकारी दिए। थापाले आज बिहान पिसाब फेरेपछि स्वास्थ्यमा केही सुधार आउने अपेक्षा गरिएको डा. केसीले बताए। उनी तीनतले घरको छतबाट कसरी खसे भन्ने विषयमा अनुसन्धान जारी छ। घटना अनुसन्धानका लागि रास्वपाका प्रवक्ता मुकुल ढकालका सवारी चालक कालुप्रसाद राजवंशीलाई प्रहरीले नियन्त्रणमा लिएको छ। चालक दिलबहादुर थापा ‘शम्भु’ उनीसँगै सुतेका थिए। चितवन क्षेत्र नम्बर २ का उम्मेदवारसमेत रहेका रवि चुनावी अभियानमा रहेका बेला उक्त घटना भएको हो।

काठमाडौं । नेपाली लोक गीत संगीत र दोहोरीगीत गायनमा तीन दशक लामो योगदान दिएर समग्र लोक संगीतलाई एउटा माधुर्य उचाई दिएका गायक बद्री पगेंनीलाई झलकमान लोक संगीत सम्मान बाट सम्मानित गरिने भएको छ । विन्ध्यवासिनी म्युजिक अवार्ड को १३औं सस्करण समारोहकाबीच रू. २५ हजार नगद सहित विन्ध्यवासिनी फाउन्डेसन सम्मान गर्न लागेको हो । लाईफ टाईम अचिभमेन्ट अवार्ड,संगीत साधना सम्मान,प्रेमध्वज संगीत रत्न सम्मान र कला पत्रकारीता सम्मानका अतिरिक्त यो वर्षबाट झलकमान लोक संगीत सम्मानको विद्या थप गरिएको आयोजक संस्थाले जनाएको छ । नेपाली सुगम संगीत, शास्त्रिय संगीत, पप संगीत, चलचित्र संगीत र लोक संगीतलाई एउटै संस्थाद्वारा सम्मान गर्ने परम्परा को थालनी विन्ध्यवासिनी म्युजिकले गरेको छ । श्रस्ठा र श्रृजना सम्मानमा लाखौं नगद सहित सम्मान गर्ने नेपालि म्युजिकको व्यवसायिक संस्थामा पनि विन्ध्यवासिनी अग्रणी संस्था मानिन्छ । अग्रजलाई सम्मान र अनुजलाई प्रोत्साहनको मुल नारा सहित सुरु भएको विन्ध्यवासिनी म्युजिक अवार्डको १३औ शंस्करण आगामी बैशाख २२ गते सम्पन्न हुने कुरा फाउन्डेसनले जनाएको छ ।

काठमाडौं । स्वतन्त्र ऊर्जा उत्पादकहरूको संस्था (इपान) नेपालले आज र भोलि ऊर्जा सम्मेलन आयोजना गरेको छ । ‘हरित ऊर्जाको बजार विस्तारिकरण’का लागि ऊर्जा सम्मेलन गरेको आयोजकले बताएको छ । समिटको संरक्षक ऊर्जा मन्त्रालय र सहआयोजकमा लगानी बोर्ड रहेका छन् । सम्मेलनमा ऊर्जा, जलस्रोत तथा सिंचाइ मन्त्रालयका विशिष्ट व्यक्ति र दक्षिण एसियाली नेताहरूको उपस्थिति हुनेछ । इपानले पावर समिट नेपालको ऊर्जा क्षेत्रको बजार विस्तारमा कोसेढुंगा सावित हुने अपेक्षा गरेको छ । ऊर्जा समिटमा ३० भन्दा बढी देशका ३०० अन्तर्राष्ट्रिय प्रतिनिधिसहित ऊर्जा, जलस्रोत तथा सिंचाइ मन्त्रालयका उच्च अधिकारीहरू, पावर ट्रेडिङ कम्पनीहरू, विद्युत् उत्पादकहरू, वित्तीय संस्थाहरू, प्रसारण तथा वितरण कम्पनीहरू, परामर्शदाता कम्पनीहरू लगायत अन्य ऊर्जा क्षेत्रका सरोकारवालाहरू गरी करिब ८०० जना सहभागी भएको आयोजकले जनाएको छ । सम्मेलनमा नेपाली जलविद्युत् आयोजना र भारतीय क्रेताबीच प्रत्यक्ष विद्युत् खरिद सम्झौता (पीपीए), नवीकरणीय ऊर्जा विकास र बजार विस्तारका लागि सम्झौता गरिनेछ । सम्मेलनमा नेपालको विद्युत् बजार, प्रसारण पूर्वाधार, नेपालको जलविद्युत्को माग, प्रविधि, नवप्रवर्द्धन सोलार, हाइड्रोजन, अन्तरदेशिय विद्युत् व्यापार, दिगो र जलवायु अनुकूल विकासलगायत विषय समेट्ने गरी १५ वटा सत्रहरू सञ्चालन गरिनेछ । सम्मेलनमा १५ वटा स्टल राखिनेछ । स्टलको लागि स्वदेशी कम्पनीको लागि आठ हजार विदेशी कम्पनीहरूको लागि १० हजार तोकिएको बताए ।

काठमाडौं । काठमाडौं महानगरपालिका मेयर बालेन शाहविरुद्धको रिटमा आज सुनुवाइ हुने भएको छ । मुलुकको प्रमुख प्रशासनिक केन्द्र सिंहदरवार र राष्ट्रपति कार्यालय शीतल निवासको फोहोर नउठाएको भन्दै काठमाडौं महानगरपालिकाका मेयर साहविरुद्ध सर्वोच्च अदालतमा परेको रिटमा आज सुनवाई हुन लागेको हो । अधिवक्ता पदम श्रेष्ठले काठमाडौं महानगरपालिकाले कानुनविपरीत फोहोर संकलन नगरेको उल्लेख गर्दै तत्काल फोहोर संकलन गरी ल्यान्डफिल्ड साइडमा लैजान, नियमित फोहोर संकलन र विसर्जन गर्नु पर्नेलगायतका माग गर्दै सोमवार सर्वोच्च अदालतमा रिट दायर गरेका थिए । सोही रिटमा आज सुनवाई हुन लागेको हो । फोहोरका कारण जनस्वास्थ्यमा नकारात्मक असर परेकाले महानगरले तत्काल फोहोर उठाउनुपर्ने माग गरिएको छ । निवेदनमा भनिएको छ, ‘नेपालको संविधानको धारा ३० बमोजिम प्रत्येक नागरिक स्वच्छ र स्वस्थ्य वातावरणमा बाँच्न पाउने हक हुनेछ भन्ने संविधानमा भएको मौलिक हकको उपयोगबाट वञ्चित हुने भएकाले उक्त विषय सार्वजनिक सरोकारको विषयसमेत भएको हुँदा नेपालको संविधानको धारा ३०, ४, फोहरमैला व्यवस्थापन ऐन, २०६८ को दफा ३, ४, वातावारण संरक्षण ऐन २०७६ को दफा १५ बमोजिम निवेदन माग गरेको छु।’ काठमाडौंको सिंहदरवार भित्रको क्षेत्र, राष्ट्रपतिको कार्यालय शीतल निवास, प्रधानमन्त्रीको आवास रहेको क्षेत्रभित्र फोहोर संकलन नगर्ने भन्दै शाहले अभिव्यक्ति दिएका थिए । मेयर बालेन शाहको निर्देशनपछि चैत २५ गतेदेखि सिंहदरबारको फोहोर उठ्न सकेको छैन ।

काठमाडौं । संघीय संसद् अन्तर्गतको प्रतिनिधिसभाको बैठक आज बस्दैछ । बैठक दिउँसो १ बजे बस्ने संसद् सचिवालयले जनाएको छ । बैठकमा प्रधानमन्त्री पुष्पकमल दाहाल प्रचण्डले राष्ट्रिय सूचना आयोगको वार्षिक प्रतिवेदन २०७८–७९ पेस गर्ने सम्भावित कार्यसूची रहेको संसद् सचिवालयले जनाएको छ । यसैगरी, बैठकमा प्रधानमन्त्री प्रचण्डले नै आज राष्ट्रियसभाबाट सन्देशसहित प्राप्त अख्तियार दुरुपयोग अनुसन्धान आयोग (तेस्रो संशोधन) विधेयक, २०७७ प्रस्तुत गर्ने सम्भावित कार्यसूची रहेको छ ।

काठमाडौं । सांसद माधव सापकोटा सुबोधले मनुसुनजन्य विपत्तिबाट हुने क्षति न्यूनिकरणका लागि पूर्वतयारीमा लाग्न सरकारको ध्यानाकर्षण गराएका छन् । आइतबार बसेको प्रतिनिधि सभा बैठकलाई सम्बोधन गर्दै उनले सिन्धुपाल्चोक, मनाङ लगायतका जिल्ला जोखिमयुक्त रहेको चर्चा गर्दै यसबारे समयमै निर्णय लिन आग्रह गरेका हुन् । उनले संसदमा संबोधन गर्दै भने –‘गृह मन्त्रालयको तथ्यांक अनुसार गत साल मनसुनजन्य विपदका घट्ना बाट ११९ जनाले ज्यान गुमाउनु पर्यो भने २३०३ घरपरिवार प्रत्यक्ष प्रभावित हुन पुगे । नेपालमा मनसुन जेठको अन्तिम बाट सुरू भएर भाद्रको अन्तिममा सकिन्छ । यो चार महिनाको अवधीमा करिव ४० प्रतिशत विपदका घटना घट्ने गर्छन । हामीमा विपद पश्चात राहत र उद्धारमा जानेको लर्को लाग्छ । पूर्व तयारीमा हाम्रो पर्याप्त ध्यान पुगेको छैन । तसर्थ मैले प्रतिनिधित्व गर्ने जिल्ला सिन्धुपाल्चोक जुन विपदको दृष्टिले उच्च जोखिमयुक्त जिल्लामा पर्दछ सो लगायत अन्य जोखिमयुक्त जिल्लाहरुमा विपद पूर्व तयारी, प्रतिकार्य, पुनर्निर्माण गर्न जिल्लामा श्रोत साधन सहितको विपदको यूनिट राखियोस । जोखिमयुक्त बस्तीहरुलाई अस्थाई रूपमा बर्षात अगाडी नै सुरक्षित स्थानमा स्थानान्तरण गर्न अविलम्व कार्य अगाडी बढाई सम्भावित मानविय र भौतिक क्षति न्यूनीकरण गर्न सकिन्छ । विशेष गरी विपद बाट महिला, बालबालिका, अपांगता भएका र जेष्ठ नागरिक बढी प्रभावित हुने हुदा यसको संवेदनशीलतालाई गम्भीर रूपमा लिन अनुरोध गर्दछु । वर्षात अगाडी नै उच्च जोखिमयुक्त पालिकाहरुका रणनीतिक बिन्दुहरुमा खाद्य तथा गैरखाद्य सामाग्री खरीद गरी भण्डारण गर्ने व्यवस्था मिलाउनु पर्दछ । हाल विपद पश्चात मात्र सामाग्री खरीद गरेर वितरण गर्ने गरिएको छ । राष्ट्रिय विपद् जोखिम न्यूनीकरण तथा व्यवस्थापन प्राधिकरणले निजी आवास पुनर्निर्माण तथा पुनर्स्थापना कार्यलाई गती दिन सकेको छैन । मेरो जिल्ला सिन्धुपाल्चोक लगायत अधिकांश बाढी पहीरो प्रभावितहरु २ बर्ष बितिसक्दा पनि अस्थाई टहरामा नै बसेका छन् । त्यसैले क्षती भएको १ बर्ष भित्र आवास पुनर्निर्माण तथा पुनर्स्थापना सक्ने गरी कार्य गर्न प्राधिकरणको बिशेष ध्यान आकर्षण गर्दछु ।

काठमाडौं । प्रतिनिधिसभाको बैठकमा राष्ट्रियसभाबाट प्राप्त सन्देशसहितको दुुई विधेयक टेबल भएको छ । प्रतिनिधिसभाको आइतबारको बैठकमा राष्ट्रियसभाबाट सन्देशसहित प्राप्त अख्तियार दुरुपयोग अनुसन्धान आयोग (तेस्रो संशोधन) विधेयक, २०७७ र भ्रष्टाचार निवारण (पहिलो संशोधन) विधेयक, २०७७ का सम्बन्धमा प्राप्त सन्देश सहितको विधेयक टेबुल भएको हो । संघीय संसद् सचिव गोपालनाथ योगीले उक्त विधेयक टेवल गराएका हुन् ।

काठमाडौं । नेपाल उद्योग वाणिज्य महासंघका नवनिर्वाचित पदाधिकारीहरुले आज पदबहाली गरेका छन् । गत चैत्र २८ र २९ गते काठमाडौंमा सम्पन्न अधिवेशनबाट निर्वाचित अध्यक्ष, वरिष्ठ उपध्यक्ष र उपाध्यक्ष र केन्द्रीय सदस्यहरुले आज पदवहाली गरेका हुन् । उद्योग वाणिज्य महासंघको ५७ औँ साधारण सभाको निर्वाचनले नयाँ नेतृत्व चयन गरेको हो। महासंघको विधानअनुसार वरिष्ठ उपाध्यक्ष स्वतः अध्यक्ष बन्ने प्रावधान छ। जसअनुसार वरिष्ठ उपाध्यक्ष चन्द्रप्रसाद ढकाल अध्यक्ष बनेका छन्।वरिष्ठ उपाध्यक्षलगायतको पदका लागि भने निर्वाचन भएको थियो। महासंघको वरिष्ठ उपाध्यक्षमा अञ्जन श्रेष्ठ निर्वाचित भएका छन्। ५७ औँ साधारण सभाले ६४ सदस्यीय कार्यसमिति चयन गरेको हो। जसमा दुई सदस्य निर्विरोध निर्वाचित भएका थिए। चन्द्रप्रसाद ढकालले महासंघको अध्यक्षमा पदवाही ग्रहण गर्दै ५ काम गर्ने प्रतिवद्धता जनाएका छन् । महासंघका अध्यक्ष चन्द्रप्रसाद ढकालले गरेका ५ प्रतिवद्धता १) पहिलो वर्तमान आर्थिक संकट समाधानको रणनीति तयार गर्ने । २) दोस्रो लगानीको वातावरण बनाउने । ३) तेस्रो राज्य र निजी क्षेत्रबीचको साझेदारी सुदृढ गर्ने । ४) चौथो दक्ष जनशक्ति उत्पादन र रोजगारी सृजना गर्ने । ५) पाँचौं व्यवसायीहरुको मनोबल उच्च बनाउन राज्यको मर्यादाक्रममा निजी क्षेत्रको स्थान निर्धारण गर्ने । अध्यक्ष ढकाल पहिलो पुस्ताका सफल उद्यमी एवं व्यवसायी हुन् । महासंघमा दुई कार्यकाल सदस्य रहेका ढकालले लगानी समिति, रोजगारदाता परिषद्को सभापति, एसोसिएट उपाध्यक्ष हुँदै वरिष्ठ उपाध्यक्षको जिम्मेवारी सम्हालिसकेका छन् ।

काठमाडौं । राष्ट्रिय योजना आयोगका पूर्वउपाध्यक्ष डा. विश्व पौडेलले चितवनका जनताका समस्यालाई ‘स्टन्ट’ को विषय बनाउनेलाई उपनिर्वाचनमा हराएर सबक सिकाउन आह्वान गरेका छन्। उनले राष्ट्रिय स्वतन्त्र पार्टी (रास्वपा)का सभापति रवि लामिछानेलाई इंगित गर्दै सामाजिक सञ्जाल फेसबुकमा लेख्दै उनले वैशाख १० गते हुने उपनिर्वाचनमा रविलाई हराउनुपर्ने बताएका हुन्। तर उनले नाम उल्लेख नगरी रविको नागरिकता मुद्दाको विषय उठाएका छन्। उनले रविलाई हराएर नेपाली कांग्रेसका उम्मेदवार जितनारायणलाई जिताउन अनुरोध गरेका छन्। ‘जितनारायण ‘स्टन्टबाज’ हैनन्, यी अगाडि–पछाडि क्यामेरा लगाएर ‘स्टन्ट’ गर्दैनन्, अध्यारो कुनामा साइबर सेना राखेर आक्रमण गर्दैनन्,’ पौडेलले लेखेका छन्, ‘चितवनमा यसपाली जनताको समस्यालाई ‘स्टन्ट’ को विषय बनाउनेहरूलाई हराऔँ र सबक सिकाऔँ।’ उनले कांग्रेस उम्मेदवार जितनारायण श्रेष्ठलाई साधारण मान्छेको छोरोका रूपमा चित्रण गर्दै भोलि चाहिने समयमा सजिलै उपलब्ध हुने नेता भएको उल्लेख गरेका छन्। ‘मेरा मित्र जितनारायण श्रेष्ठजी सानैदेखि चितवनमा बस्नुभयो, मर्दापर्दा सबैको साथी बन्नुभयो, स्थानीयको सुख(दुःखमा साथ दिनुभयो। सबैलाई खुशी बनाउन खोज्नुभयो,’ पौडेलले लेखेका छन्, ‘गाउँमा हुर्केको साधारण मान्छेको छोरो सानैमा कांग्रेस जस्तो पार्टीको जिल्ला सभापति बन्नुभयो। भोलि चाहिँदा उहाँँ सजिलै उपलब्ध हुनुहुन्छ, गाली खान, ताली खान सबैको लागि उहाँँ सजिलै उपलब्ध हुनुहुन्छ।’ जनमतको कदर गर्नुपर्नेमा जोड दिँदै उनले विगतको निर्वाचनमा गोजीमा नागरिकता नभएका व्यक्तिको गफमा जनता भुलेको टिप्पणीसमेत गरेका छन्। जनमतको कदर गर्नुपर्ने तर गोजीमा नागरिकता नभएको व्यक्तिको देश बनाउने गफमा जनता भुलेर गएको निर्वाचनमा चितवनमा डा. सूर्यकान्त घिमिरे, डा. भोजराज अधिकारी, डा. विश्व पौडेल (म आफैँले) हारेको उनले उल्लेख गरेका छन्। उनले भनेका छन्,‘हामीले हार्दा कस्ता ‘क्षमतावान’ ले जिते, जगजाहेर छ।’ उनले रास्वपा सभापति लामिछानेलाई सम्पर्क कार्यालयमा कर्मचारी राख्नका लागि गरेको विज्ञापनमाथि पनि प्रश्न गरेका छन्। ‘सम्झनु हुन्छ, आफ्नो जनसम्पर्क अफिसमा सीईओ राख्ने नौटंकीरु पानी ओसार्ने नौटंकीरु कोही स्थानीयले सीईओको जागिर पाए? एयरपोर्ट गएर कसैलाई ल्याइयो?,’ पौडेलले प्रश्न गरेका छन्।

काठमाडौं । नेपाल उद्योग वाणिज्य महासंघका नवनिर्वाचित पदाधिकारीहरुले आज पदबहाली गर्दैछन् । गत चैत २८ र २९ गते काठमाडौंमा सम्पन्न विशेष अधिवेशनबाट निर्वाचित पदाधिकारीहरुले पद सम्हाल्न लागेका हुन् । महासंघको अध्यक्ष चन्द्र ढकाल,वरिष्ठ उपाध्यक्ष अन्जन श्रेष्ठ,जिल्ला नगर उपाध्यक्ष सुरकृष्ण वैद्य,वस्तुगत उपाध्यक्ष हेमराज ढकाल,एसोसिएट उपाध्यक्ष ज्योत्सना श्रेष्ठलगायतले आज बिहान ११ बजे पदभार ग्रहण गर्ने कार्यक्रम छ । यसअघि वरिष्ठ उपाध्यक्ष रहेका ढकाल स्वतः अध्यक्ष बनेका हुन् भने वरिष्ठ उपाध्यक्ष श्रेष्ठ निर्वाचनबाट चुनिएका हुन् । तीन वर्षे कार्यकाल पछि श्रेष्ठ स्वतः अध्यक्ष बन्ने छन् ।

काठमाडौं । पूर्वमन्त्री दम्पतीलाई महानगर यातयातमामा भेटेपछि यात्रु दीपक पाण्डेले एउटा लामो स्टाट्स लेखेका छन् । उनले नयाँ मात्रै हुन भन्ने भाष्य स्थापित गर्न खोजेर पुराना नेताहरूको सादगीपन र परिर्वतनका लागि गरेको त्याग तपस्यालाई वेवस्ता गर्ने प्रवृति बढेको भन्दै अहिले नेपाली राजनीतिमा रत्यौली मन पार्ने प्रवृति बढेको टिप्पणी समेत गरेका छन् । यस्तो छ उनले् लेखेको स्टाटस हिजो प्रेस काउन्सिलको बैठकमा भाग लिन महालक्ष्मीस्थानबाट महानगर यातायात चढेर एअरपोर्टतर्फ जाँदै थिए । ग्वार्को पुगेपछी पन्चायतकाल देखिका चर्चित नेता लीलामणि पोख्रेल तथा पूर्वमन्त्री शशी श्रेष्ठदम्पती सोही बसमा चढनु भो । बसमा सिट थिएन, ढोकै छेउको सिटमा बसेकाले भर्याङ्मै आखा जुध्यो। एलएम दाइले पुरानै शैलीमा कता हो दीपकभाइ भन्नू भो ! मैले नमस्कार गर्दै शशी दिदीलाई सीट छोडे। म अगाडि बसेका महोदयले एलएम दाइलाई छोड्दिए। यतिबेलासम्म मैले आफ्नो यात्राबारे बृतान्त कहन भ्याइसकेको थिए। अनि सोधे– ‘कहाँ पुगेर आउनु भयो।’ शशी दिदीले पुरानै शैलीमा मुसुक्क हासेर कुनै साथीको पिताजी बितेकाले समवेदना दिन भेटेर फर्केको बताउनु भयो। त्यतिबेलासम्म मेरो दिमाखमा पन्चायतकालमै जेलनेल भोगेका र मन्त्री भैसकेका नेतादम्पतिको सार्बजनिक बसयात्राको तस्वीर घुमीरहेको थियो । महाकालीसन्धी ताका देखि जोडिएको सम्बन्धको फेरो टेको लाउदै सोधे–‘साधन छैन दिदी ?’ दाइ बोल्नु भएन, दिदीले भन्नू भो– हामी साधारण जीवन मन पराउछौं। यो दृश्यलाई क्यामेरामा कैद गर्न मन लाग्यो मलाई पनि। एउटा फोटो खिच्छु है सम्झना हुन्छ भन्दै दुई क्लिक हानीहाले। उता हाम्रो सम्बाद बसका यात्रुले अभिरुचिपुर्बक सुनिरहकै थिए। यत्तिकैमा कोटेश्वर आइपुग्यो। चियाखाने गरि आउनु है भाइ भन्दै दाइदिदी ओर्लनु भो बसबाट । यता मेरो दिमाखमा भने राजनीतिमा पुराना केही होइनन, नयाँ मात्रै हुन भन्ने भाष्य स्थापित गर्न खोजिएको रत्यौली घुमिरह्यो। यदि हिजो मैले देखेको जस्तो दृश्य चितवनतिर कुर्लिरहेको किर्ते चटके , अनि तनहुँमा घुमीरहेको विदेशी बुद्धिबिलासे झिल्केका स्यालहर्ले देखेका भा त्यसैलाई ट्रोल बनार मुलुकमा कति उधुम मच्चाउने थिए होलान ?

धनगढी । धनगढीमा कोराना संक्रमित एक महिलाको मृत्यु भएको छ । सेती प्रादेशिक अस्पतालमा उपचाररत कोरोना संक्रमित कञ्चनपुरको भीमदत्त नगरपालिकाकी ७३ वर्षीया महिलाको आज बिहान साढे ८ बजे मृत्यु भएको अस्पतालले जनाएको छ। उनी चैत २४ गते मुटुसम्बन्धी समस्या देखिएपछि अस्पताल भर्ना भएकी थिइन। २६ गते उनमा कोरोना संक्रमण पुष्टि भएको जिल्ला प्रशासन कार्यालय कैलालीका सूचना अधिकारी शिवराज जोशीले जानकारी दिए।

पोखरा । पोखराको सेती नदीको खोचमा खसेकी बालिकाको साढे दुई घण्टापछि उद्धार भएको छ ।कास्की जिल्लाको पोखरा महानगरपालिका–१५ स्थित सिताराम हाउजिङ नजिकै खेल मैदानमा भासिएको प्वालमा खसेकी बालिकालाई सशस्त्र प्रहरीले निकालेको हो। सेती खोंचमा खसेकी पोखरा–८ नागढुङ्गाकी १२ वर्षीया स्मृती पराजुलीको प्रहरीले उद्धार गरेको कास्की प्रहरी प्रमुख एसपी अजय केसीले जानकारी दिए। पोखरा ८ नागढुंगा बस्ने स्मृती सहित तीन जना साथी मिलेर सेती खोंचमा खेल्न गएका थिए । पोखरा–१५ मा रहेको हरियो खर्कको खेल मैदानमा जाँदै गर्दा सेती नदीको नजिकैको खोचमा खसेकी थिइन् । प्रहरीको टोलीले उद्धार गरेर निकालेपछि बालिकाको अहिले पश्चिमाञ्चल क्षेत्रीय अस्पतालमा उपचार भइरहेको छ ।