काठमाडौं । मधेश सरकारले एक साताभित्र प्रहरी समायोजन गरी प्रदेश सरकारलाई हस्तान्तरण गर्न प्रदेश प्रमुखमार्फत प्रधानमन्त्रीलाई ध्यानाकर्षण गराएको छ।उसले यो साताभित्र प्रहरी समायोजन नगरिए आन्दोलन गर्ने चेतावनी समेत दिएको छ । गृह तथा सञ्चारमन्त्री भरत प्रसाद साहको नेतृत्वमा मन्त्रीहरु सहितको टोलीले प्रदेश प्रमुख हरि शंकर मिश्रमार्फत प्रधानमन्त्री शेर बहादुर देउवालाई ध्यानाकर्षण पत्र बुझाएको हो। नेपालको संविधानको धारा २६८ ले प्रदेश प्रहरी संगठनको व्यवस्था गरेको तथा अनुसूची ६ को क्रम संख्या १ मा प्रहरी, शान्ति सुरक्षा सम्बन्धी अधिकार प्रदेश सरकारको क्षेत्राधिकार भित्र रहेपनि प्रहरी समायोजन नहुँदा प्रदेश सरकारले सरकारको अनुभूति गर्न नसकेको हुँदा अविलम्ब प्रहरी समायोजन गरी प्रदेश सरकारलाई हस्तान्तरण गर्न आग्रह गरिएको छ। प्रहरी हस्तान्तरणको लागि प्रधानमन्त्रीलाई यसअघि नै ज्ञापनपत्रसमेत बुझाइसकेको स्मरण गराउँदै मधेश सरकारले एक साताभित्र प्रहरी समायोजन नगरिए शान्तिपूर्ण अहिंसात्मक आन्दोलन गर्न बाध्य हुने बताएको छ । मधेश सरकारको आयोजनामा जनकपुरधाममा सम्पन्न ६ वटा प्रदेशका गृहमन्त्री स्तरीय भेलाले यथाशिघ्र समायोजन हुनुपर्ने माग सहितको घोषणा पत्र समेत जारी गरेको थियो। ध्यानाकर्षण पत्र बुझाउने टोलीमा भौतिक पूर्वाधार विकासमन्त्री राम सरोज यादव, कृषि मन्त्री विजय कुमार यादव, उद्योग, पर्यटन तथा वनमन्त्री शत्रुधन महतो, खानेपानी तथा उर्जा मन्त्री ओम प्रकाश शर्मासहित सहभागी थिए । ध्यानाकर्षण पत्र बुझदै प्रदेश प्रमुख मिश्रले आजै प्रधानमन्त्री कार्यालयमा पठाउने बताए।

जनकपुरधाम । सहकारी तथा गरिबी सम्बन्धी व्यवस्थापन सूचना प्रणाली (कोपोमिस)लाई सहकारी संस्थामा पूर्ण कार्यान्वयनमा ल्याउनका लागि नेफ्स्कूनले देशव्यापी कार्यक्रम सञ्चालन गरिरहेको छ । मधेश प्रदेशमा सञ्चालित सहकारीहरुलाई लक्षित गरी आज जनकपुरधाममा कोपोमिस तालिम प्रदान गरिएको हो । तालिममा महोत्तरी र धनुषाका ५५ ओटा बचत तथा ऋण सहकारी संस्थाबाट ६० जनाको सहभागिता रहेको थियो । नेफ्स्कून जनकपुर फिल्ड कार्यालय व्यवस्थापन उपसमितिका सदस्य सुधिर पाण्डेको अध्यक्षतामा कार्याक्रमको उद्घाटन भएको थियो । उपसमिति सदस्य पाण्डेले सहकारीका समसामयिक विषय र विद्यमान वस्तुस्थिति साथै सहकारी सुशासनमा देखिएको कमी कमजोरीका बारेमा चर्चा गर्दै सहकारी संस्था सञ्चालनमा पालना गर्नुपर्ने नीति विधि र सिद्धान्तका बारेमा जानकारी गराए। उनले जनकपुरधामलाई लक्षित गरी नेफ्स्कूनद्वारा महत्वपूर्ण तालिम तथा कार्यक्रमहरु निरन्तर भइरहेकोले यसमा सक्रिय सहभागिता भएर प्राप्त ज्ञान सीप संस्था सञ्चालनका क्रममा कार्यान्वयनमा ल्याउन समेत अनुरोध गरे । सहकारी विभागले जारी गरेको सूचना सम्पूर्ण सहकारी संघ संस्थाले पालना गनुपर्ने र सहकारी सम्बन्धी वास्तविक तथ्यांक राज्यलाई दिनुपर्ने भएकोले सबै सहकारी संस्थाले कोपोमिसमा आफ्ना सहकारीको तथ्यांक भर्न उनको अनुरोध थियो । कोपोमिस तालिमको सहजीकरण नेफ्स्कून सूचना प्रविधि अधिकृत प्रविण अधिकारीले गरेका थिए भने कार्यक्रम व्यस्थापन नेफ्स्कून फिल्ड कार्यालय जनकुपरधामले गरेको थियो ।

काठमाडौं । लोकतान्त्रिक समाजवादी पार्टीका नेताहरूले प्रधानमन्त्री शेरबहादुर देउवासँग छलफल गर्ने भएको छ। छलफल आइतबार अपरान्ह ४ बजे बालुवाटारमा हुन लागेको एक नेताले जानकारी दिए । चुनावको मिति घोषणा गर्नुअघि लोसपा सरकारमा जान तम्तयार भएको लोसपा सत्ता गठबन्धनभित्र कुरा नमिल्दा सरकारमा जान सकेको छैन। प्रधानमन्त्री देउवा लोसपालाई सरकारमा ल्याउने पक्षमा छन्। आज प्रधानमन्त्रीसँग हुने छलफल सरकारमा सहभागितासहित आफ्ना कार्यकर्तामाथि लगाइएका राजनीतिक मुद्दा फिर्ता लिने सम्बन्धमा पनि कुरा हुने लोसपा नेता शरतसिंह भण्डारीले बताए। लोसपा देउवा सरकारमा सहभागी नभए पनि विश्वासको मत दिएको थियो।

काठमाडौँ । उपराष्ट्रपति नन्दबहादुर पुनले भारतका नवनिर्वाचित उपराष्ट्रपति जगदीप धनखडलाई बधाई तथा कार्यकाल सफलताको शुभकामना दिएका छन्। उपराष्ट्रपति पुनले आज शुभकामना सन्देश पठाउँदै भारतका नवनिर्वाचित उपराष्ट्रपतिको सफल कार्यकालको कामना दिएका हुन्। उपराष्ट्रपति पुनले सो सन्देशमा भारतका नवनिर्वाचित उपराष्ट्रपतिको कार्यकालमा नेपाल र भारतबीचको बहुआयामिक सम्बन्ध अझै सुदृढ तथा विस्तार हुने विश्वास व्यक्त गर्नुभएको उहाँका प्रेस संयोजक मनोज घर्तीमगरले जानकारी दिए।

काठमाडौँ । काठमाडौँ उपत्यकामा आजदेखि नो हर्न कार्यक्रमलाई पुनः अभियानकै रुपमा अगाडि बढाइएको छ । समुदाय–प्रहरी साझेदारी कार्यक्रम अन्तरगत काठमाडौँ महानगरपालिकाका प्रमुख बालेन्द्र शाहको प्रमुख आतिथ्यमा आज एक कार्यक्रम गरी नो हर्न अभियानलाई पुनः सुरु गरिएको हो । काठमाडौँ उपत्यका ट्राफिक प्रहरी कार्यालयकी प्रमुख प्रहरी नायब महानिरीक्षक मीरा चौधरी र काठमाडौँ महानगर प्रमुख बालेन्द्र शाहले नो हर्न लेखिएको पहेँलो स्टिकर एक अर्काको सवारी साधनमा टाँसेर कार्यक्रमको समुद्घाटन गरे। नो हर्न अभियान सफल बनाउनका साथै सडक प्रयोगकर्ताहरूमा सचेतना फैलाउनका लागि आजबाट पद्मकन्या बहुमुखी क्याम्पसका एक सय जना विद्यार्थीहरू १५ दिनका लागि ट्राफिक प्रहरीसँगै सडकमा खटिएका छन् । हर्नले ध्वनि प्रदूषण मात्र नभई व्यक्तिको मानसिक स्वास्थ्यमा समेत नकारात्मक प्रभाव पार्ने भएकाले नो हर्न कार्यक्रमलाई निरन्तरता दिनका लागि यो कार्यक्रम पुनः सुरु गरिएको काठमाडौँ महानगर प्रमुख बालेन्द्र शाहले बताए । काठमाडौँ उपत्यकामा ध्वनि प्रदूषण नियन्त्रणका लागि २०७४ साल वैशाख १ गतेबाट नो हर्न लागु गरिएको थियो । जस अनुसार अत्यावश्यक पर्दा बाहेक अन्य अवस्थामा हर्न बजाउन निषेध गरिएको छ । कार्यक्रम रामशाहपथ स्थित काठमाडौँ उपत्यका ट्राफिक प्रहरी कार्यालयको प्राङ्गणबाट शुरुवात भएको थियो साथै काठमाडौँ महानगरपालिकाका मेयर बालेन्द्र शाह, काठमाडौँ उपत्यका ट्राफिक प्रहरी कार्यालयकी प्रमुख प्रहरी नायब महानिरीक्षक मीरा चौधरी तथा भोलन्टियर र पद्मकन्या क्यामप्सका प्राध्यापक र विद्यार्थीहरूले सिंहदरबार चोकमा गई सार्वजनिक तथा निजी सवारी साधनहरूमा नो हर्न लेखिएको स्टिकर टाँस्नु भएको थियो । उक्त कार्यक्रम काठमाडौँ उपत्यका ट्राफिक प्रहरी कार्यालय, बागबजार स्थित पद्मकन्या बहुमुखी क्याम्पस र धापासीस्थित कान्तिपुर डेण्टल कलेज तथा हस्पिटलले संयुक्त आयोजना गरेको हो । कार्यक्रममा करिब दुई सय जनाको सहभागिता रहेको थियो ।

काठमाडौं । देशका विभिन्न स्थानमा केही दिनयता भारी वर्षा भइरहेको छ । गएराति पनि केही स्थानमा भारी वर्षा मापन गरिएको छ । कास्कीको लामापाटन, पोखरा विमानस्थल क्षेत्रमा भारी वर्षा भएको छ । बाढी पूर्वानुमान महाशाखाका अनुसार उक्त जिल्ला भई बहने साना नदीमा आकस्मिक बहाव हुनसक्ने भएकाले तटीय क्षेत्रमा सतर्कता अपनाउनु पर्नेछ । बर्दियाको बबई नदी जलाधारको कालीमाटी, चेपाङ, र आसपासमा पनि गएराति भारी वर्षा मापन गरिएको छ । बबई चेपाङ जलमापन केन्द्रमा जलसतह दुई मिटर बढेको छ । बबईको तटीय क्षेत्र र डुवान भइरहने स्थानमा सतर्कता अपनाउन महाशाखाले आग्रह गरेको छ । म्याग्दी, बाग्लुङ, रोल्पा, रुकुम पूर्व र रुकुम पश्चिमका केही स्थानमा गएराति भारी वर्षा मापन भएको छ । थप वर्षा हुने पूर्वानुमान रहेकाले सो क्षेत्र भई वहने साना नदीहरूमा आकस्मिक बाढीको सम्भावा रहेको छ । कमजोर भिरालो जमिनमा पहिरोको जोखिम हुने भएकाले उच्च सतर्कता अपनाउन महाशाखाको आग्रह छ ।

काठमाडौं । त्रिभुवन अन्तर्राष्ट्रिय विमानस्थलबाट सन् २०२२ को ६ महिनामा ३७ लाख यात्रुले उडान भरेका छन् । यता सन् २०२१ मा आन्तरिक र अन्तर्राष्ट्रिय गरी करिब ४९ लाख यात्रुले हवाई उडान भरेका थिए । यसरी हेर्दा पछिल्लो छ महिनामा नै आन्तरिक यात्रुको संख्या बढि हो । सन् २०२२ को ६ महिना (जनावरीदेखि जुन) सम्म कुल २२ लाख ९० हजार आन्तरिक यात्रुले उडान भरेका छन् । अन्तर्राष्ट्रियमा भने १५ लाख १४ हजार यात्रुले उडान भरेका छन् । पछिल्लो समय आन्तरिक हवाई यात्रुको संख्यामा उल्लेख्य वृद्धि भएको यती एयरलाइन्सका प्रवक्ता सुदर्शन बर्तौलाले बताए । उनले भने आन्तरिक हवाई यात्रुमा हवाई यात्राको आकर्षण बढेर गएकाले पनि आन्तरिक हवाई यात्राको संख्यामा वृद्धि भएको छ । यो समाचार आजको कारोबार दैनिकमा प्रकाशित छ ।

काठमाडौं । विश्व स्वास्थ्य संगठनले विश्वव्यापी रूपमा मंकिपक्स आपत्कालीन अवस्था घोषणा गरेको छ । यो रोग विश्वमा द्रुत गतिमा फैलिएको र छिमेकी मुलुक भारतमा ९ जनामा मंकिपक्स प्रमाणित भएकोमा एक जनाको मृत्यु भइसकेको विश्व स्वास्थ्य संगठन (डब्ल्युएचओ) ले जनाएको छ । छिमेकी मुलुक भारतमा मंकिपक्सका कारण एक जनाको मृत्यु भएसँगै नेपाल उच्च जोखिममा रहेको मुलुकका रूपमा विश्व स्वास्थ्य संगठनले लिएको छ । नेपालमा मंकिपक्सकको जोखिम न्यूनीकरणका लागि आवश्यक तयारी भइरहेको विश्व स्वास्थ्य संगठनले जनाएको छ । यो समाचार आजको नेपाल समाचारपत्र दैनिकमा प्रकाशित छ ।

धनगढी । कैलालीमा प्रेम विवाह गरेको एक महिना नपुग्दै एक युवतीको मृ’त्यु भएको छ । दैलेखको गुँरास गाउँपालिका–२ बाट भागेर कैलालीको जानकी गाउँपालिका–६ जगतपुर बस्ने भरत भण्डारी (अर्जुन) सँग प्रेम विवाह गरेकी १९ वर्षीय विष्णु रावलको मृ’त्यु भएको प्रहरीले जनाएको छ । इलाका प्रहरी कार्यालय टीकापुरका प्रमुख प्रहरी नायब उपरीक्षक(डीएसपी) हेमबहादुर शाहीले बिहीबार दिउँसो मृत’कका श्रीमानले रावललाई उपचारका लागि टीकापुर अस्पताल ल्याएका र सोही क्रममा उनको मृ’त्यु भएको जानकारी दिए । डीएसपी शाहीकाअनुसार रावलले झुण्डिएर आत्मह’त्या प्रयास गरेको अवस्थामा श्रीमानले पासो काटेर अस्पतालमा पुगाएका थिए तर चिकित्सकले मृ’त घोषणा गरेका थिए । घटनाको अनुसन्धानका लागि मृत’कका श्रीमानलाई नियन्त्रणमा लिएको प्रहरीले शुक्रबार भने आफन्तको जिम्मा लगाएको छ । ‘अनुसन्धानका लागि मृत’कका श्रीमानलाई नियन्त्रणमा लिएका थियौँ तर प्रारम्भीक अनुसन्धानमा ह’त्या गरेको जस्तो नदेखिएकाले शुक्रबार आफन्तको जिम्मा लगाएका छौँ,’ डीएसपी शाहीले भने, ‘तर घटनाको अनुसन्धान भने जारी छ । ह’त्यालाई बल पुग्ने प्रमाण फेला परेमा जुनसुकै बेला पनि नियन्त्रणमा लिन सकिन्छ ।’ तर मृ’तकका माइती पक्षले भने घटना शंकास्पद भएकाले निष्पक्ष अनुसन्धानको माग गरेका छन् । मृ’तककी दिदी जमुना रावलले प्रेम विवाह गरेर आफूखुसी घरबाट कैलाली भागेर गएकी विष्णुले घटना भएको दिन समेत आमासँग कुराकानी गरेको बताउँदै त्यसको केही घण्टामा मृ’त्युको खबर आएकाले घ’टना शंकास्पद रहेको बताइन् । आफूहरुलाई बहिनीलाई भगाएर लगेको केटाले उनलाई आत्मह’त्या गर्न बाध्य पारेको वा ह’त्या गरेको हो की भन्ने आशंका लागेकाले निष्पक्ष अनुसन्धान गरेर प्रहरीले सत्यतथ्य सार्वजनिक गर्नुपर्ने माग उनको छ । उनकाअनुसार गुँरास गाउँपालिकामा घरधुरीको विवरण संकलनको काम गर्दै आएकी विष्णु गत २१ असारमा भण्डारीसँग भागेर कैलाली आएकी थिइन् । भण्डारीसँग प्रेम विवाह गरेर आएको एक महिना नबित्दै उनको मृ’त्यु भएको हो । नजिकको साथीबाट साभार

कञ्चनपुर । कञ्चनपुरको दोधारा चाँदनी नगरपालिका–८ सुन्दर नगरमा भारतीय सीमा सुरक्षा बल (एसएसबी)ले खेत जोत्नमा रोक लगाएको छ । नेपाल–भारत सीमा क्षेत्र नजिक स्थानीय इन्द्र बहादुर रोकाया मगरको नाममा रहेको सेतो पुर्जावाल जग्गा जोत्दै गर्दा भारतीय सीमा सुरक्षा बल एसएसबीले रोक लगाएको बताइएको छ । एसएसबीले खेत जोत्न नदिएर इन्द्र बहादुरले प्रशासनसँग गुहार मागेपछि नेपाल तर्फका स्थानीय नागरिकहरू र सुरक्षा अधिकारीको टोली विवाद स्थलमा पुगेको थियो । भारतीय पक्षको दादागिरी भन्दै स्थानीयहरूले विरोध जनाएका छन् । यसैबिच, उक्त विवादका विषयमा सोमबार अपराह्न दुवै देशका सुरक्षा अधिकारी सहित जनप्रतिनिधिहरूबिच स्थानीय स्तरमा बैठक बसी छलफल गरिएको कञ्चनपुर स्थित सशस्त्र प्रहरीको शैलेश्वरी गणका गणपति सशस्त्र प्रहरी उपरीक्षक अमर ऐरले जानकारी दिए। उनका अनुसार, हाललाई सीमा पिलरदेखि दुवैतर्फ दुई–दुई मिटरसम्म कुनै पनि गतिविधि नगर्ने सहमति भएको छ ।

काठमाडौं । जल तथा मौसम विज्ञान विभागले आज साँझ सम्म तटिय क्षेत्रमा उच्च सतर्कता अपनाउँन आग्रह गरेको छ । विभागले एक सुचना जारी गर्दै वर्षाका कारण काठमाडौंमा विभिन्न खोलामा जलाधार बढ्न सक्ने भन्दै खोला किनारका बस्तीमा उच्च सतर्कता अपनाउन आग्रह गरेको हो । जल तथा मौसम विज्ञान विभागले भनेको छ – पछिल्लो १ घण्टा काठमाण्डौको विष्णुमती, धोवीखोला जलाधारमा भारी बर्षा मापन भएको छ, विष्णुमती गंगबु बसपार्क बाढी मापन केन्द्रमा जलसतह करिव १.५ मिटले बढेको छ, विष्णुमती र धोवीखोलाको पानी किनारको बस्ती र सडक सम्म आउन सक्छ, आज साँझ सम्म तटिय क्षेत्रमा उच्च सतर्कता अपनाऔ । जल तथा मौसम विज्ञान विभाग

काठमाडौं । सभामुख अग्निप्रसाद सापकोटाले नागरिकतालगायतका महत्वपूर्ण विधेयक संसदमा पेश गर्ने तयारी भएको कुराकानी गरेका छन् । सोमबार सञ्चारकर्मीहरूसँग कुरा गर्दै उनले आफू महत्वपूर्ण विधेयकहरु संसदमा पेश गर्ने तयारीमा जुटेको बताएका हुन् ।   उनले मन्त्री फेरबदल लगायतका कारणले विधेयकहरु पेश गर्न ढिलाइ भइरहेको पनि बताए । ‘नागरिकता लगायत विधेयक संसदमा पेश गर्ने तयारी गरिएको छु । मन्त्री फेर बदल लगायत समस्या भएकाले ढिला भइरहेको छ’, उनले भने, ‘अरु महत्त्वपूर्ण विधेयकहरु पनि संसदमा पेश गर्ने योजनामा छु ।’

अर्घाखाँची । मकैबारीमा आएको बाँदर धपाउने क्रममा लडेर गम्भीर घाइते भएका अर्घाखाँचीका एक व्यक्तिको मृत्यु भएको छ। गत असार १९ गते मकैबारीमा आएको बाँदर धपाउन गएका छत्रदेव गाउँपालिका वडा नं. ४ का ३९ वर्षीय टंक खनाल लडेर गम्भीर घाइते भएका थिए। लडेर गम्भीर घाइते भएका खनालको आइतबार राति लुम्बिनी प्रादेशिक अस्पताल बुटवलमा उपचारको क्रममा मृत्यु भएको वडा नं. ४ का वडा अध्यक्ष भीमलाल खनालले जानकारी दिए। वडा अध्यक्ष खनालका अनुसार मकैबारीको ढिकबाट लडेर खनालको टाउकोमा गम्भीर चोट लागेको थियो।

काठमाडौं । क्याप्टेन रामेश्वर थापाको गाडीको ठक्करबाट तीन जना घाइते भएका छन् । सोमबार बिहान राजधानीको चक्रपथस्थित भाटभटेनी नजिकै थापाको प्रदेश ३–०१–०२२ च ४४३७ नम्बरको गाडीले प्रदेश ३–०२–००९ प १७८२ नम्बरको मोटरसाइकललाई ठक्कर दिँदा ३ जना घाइते भएका हुन् । मोटरसाइकलमा सवार दुई जना र अर्का एक सडकमा हिँडिरहेका एक बालक घाइते भएको प्रहरी स्रोतले जनाएको छ।   घाइते हुनेमध्ये दुई जनाको नाम खुलेको छ। मोटरसाइकलमा सवार काभ्रेका विवेक अधिकारी र ओखलढुंगाका सुदिप खतिवडा रहेका छन् । उनीहरुको धापासीस्थित ग्राण्डी अस्पतालमा उपचार भइरहेको छ । बालकको चाहिँ त्रिवि शिक्षण अस्पतालमा उपचार भइरहेको प्रहरी स्रोतको भनाइ छ । प्रहरीले ठक्कर दिने गाडीलाई नियन्त्रणमा लिएको छ ।

काठमाडौं । नेकपा एमालेको विद्यार्थी संगठन अनेरास्ववियुले त्रिभुवन विश्वविद्यालयको विभिन्न तहका प्रश्नपत्र निर्माणका क्रममा देखिएका विकृति र लापरवाही रोक्न माग गरेको छ । अध्यक्ष सुनिता बरालसहितको टोलीले सोमबार त्रिविका परीक्षा नियन्त्रक पुष्पराज जोशीलाई १० बुँदे मागपत्र बुझाउँदै परीक्षा प्रणाली सुधार गर्न माग गरेको हो । हालैमात्र त्रिविको विभिन्न तहको परीक्षामा गत वर्षकै प्रश्न दोहोरिएको, निजी कलेजको आन्तरिक परीक्षाको प्रश्नपत्र हुबहु मिलेको जस्ता समस्या देखिएका थिए । अनेरास्ववियुले अनुशासन भङ्ग गर्ने परीक्षाकेन्द्र, मिलेमतो गर्ने शिक्षक, कर्मचारीहरूको अध्ययन गरी प्रतिवेदन तयार गरी सार्वजनिक गर्न माग गरेको छ ।   त्यस्तै त्रिविले निर्धारण गरेका परीक्षा केन्द्रहरू सम्भव भएसम्म विद्यार्थीलाई पायक पर्ने र एउटै सवारी साधनको प्रयोगबाट पुग्न सकिने स्थानमा निर्धारण गर्न पनि अनेरास्ववियुले माग गरेको छ । प्रत्येक जिल्लाभित्रको परीक्षा केन्द्र सम्बन्धित जिल्लामै तोक्न, परीक्षा नियन्त्रण कार्यालयको सेवा विद्यार्थीहरूलाई सजिलो हुनेगरी विस्तृत रूपमा उल्लेख गरी एक हप्ताभित्र नागरिक बडापत्र राख्न पनि माग गरेको अनेरास्ववियुका महासचिव समिक बडालले जानकारी दिए ।   परीक्षा सञ्चालन भएको १२० दिन पूरा भइसकेका सबै तहका परीक्षाको परीक्षाफल ४५ दिन भित्रमा प्रकाशित गर्न र सबै तहका सबै परीक्षाको परीक्षाफल बढीमा तीन महिनाभित्रमा प्रकाशित गर्न पनि माग गरिएको छ । आवश्यक कागजात र प्रक्रिया पूरा गरेका विद्यार्थीको प्रमाणपत्र २४ घण्टाभित्र दिन र विविध कारणवश निर्धारित शैक्षिक वर्षभित्र तह पूरा गर्न नपाएका विद्यार्थीहरूलाई समय समयमा मौका परीक्षाको व्यवस्था गर्न पनि अनेरास्ववियुले माग गरेको छ । त्रिविको परीक्षा नियन्त्रण कार्यालयले सञ्चालन गर्दै आएको प्राइभेट परीक्षा कार्यक्रम हाल विना विकल्प बन्द गरिएको भन्दै अनेरास्ववियुले यसबाट हजारौं विद्यार्थीहरू काम गर्दै स्वअध्ययन गर्ने अधिकारबाट बञ्चित भएको बताएको छ । निश्चित आधार तयार गरी तुरुन्त खुला गर्न पनि माग गरेको छ ।