बैतडी, चैत ४ । बैतडीको पाटन विमानस्थलको कालोपत्रे कार्य यही चैतभित्र सिध्याउने भनिएको भए पनि अझै काम सुरु समेत हुनसकेको छैन । यस अघि गत असारमा सक्ने लक्ष्यसहित निर्माण कार्य शुरु गरिएको विमानस्थल कालोपत्रे गर्ने कार्य थालनी नहुँदा स्थानीय बासिन्दा निराश बनेका छन् । ग्याल्वा च्यामलिङ जगदम्बा जेभीले काम गरिरहेको विमानस्थलमा माटो काट्ने, सम्याउनेलगायतका काम सकिएको नागरिक उडड्यन प्राधिकरणका इञ्जिनीयर कविता भट्टले बताइन् । विमानस्थललाई स्तरोन्नति गर्ने कार्यअन्तर्गत अब कालोपत्रेको काम मात्रै बाँकी छ । उनले भनिन्, “विमानस्थल निर्माण शुरु भएपछि इन्धनको अभाव, बेलाबेलामा हुने बन्दा हड्ताल र निर्माण कम्पनीको पनि केही लापरवाहीका कारण समयमै सम्पन्न हुन नसकेको हो ।” विसं २०७३ को चैतमा सम्झौता भएर विमानस्थल पुनःनिर्माणको काम शुरु भएको थियो । शुरुको सम्झौताअनुसार असारमा काम सक्नुपर्ने भएपनि सम्झौता सकिएको आठ महीना हुँदा पनि विमानस्थल कालोपत्रे हुन सकेको छैन् । पाटनमा विमानस्थलमा ५९० मिटर लम्बाइ र २० मिटर चौडाइको धावनमार्ग कालोपत्रे गरिनेछ भने ७० मिटर लम्बाइ र ३० मिटर चौडाइको एप्रोन कालोपत्रे गरिनेछ । मूल्य अभिवृद्धि करबाहेक रु ११ करोड २९ लाखको लागतमा काम भइरहेको छ । पाटनमा २०३२ सालमा विमानस्थल निर्माणको काम शुरु भएर विसं २०३५ देखि हवाई सेवा शुरु भएको थियो । २०५२ सालदेखि भने विमानस्थल बन्द रहेको छ । पहाडी जिल्लामा सडक सञ्जाल पुगेको र यात्रु कम भएको भन्दै विमानस्थल बन्द गरिएको थियो । विसं २०५८ मा तत्कालीन विद्रोही माओवादीले विमानस्थलको टावरमा आगो लगाएर ध्वस्त बनाएको थियो । पाटन विमानस्थल सञ्चालन भएमा दार्चुलाको अपि हिमाल, बझाङको साइपाल हिमाल, बैतडी र डडेल्धुराका धार्मिक पर्यटकीय क्षेत्रमा पर्यटक भित्र्याउन सजिलो हुने पाटनका स्थानीय लोकेन्द्रप्रसाद पन्तले बताए । पश्चिम टुडेबाट

कैलाली, चैत ३ । जिल्लाको धनगढी स्थित निम्बस एजुकेसन एन्ड ट्रेनिङ सेन्टरले दृष्टि फाउन्डेसनलाई सहयोग गरेको छ । निम्बस एजुकेसन धनगढीका सञ्चालक हेमन्त बोहराले कार्यालयको तर्फबाट दृष्टि फाउन्डेसनलाई साढे १० हजार बराबरको अत्यावश्यक खाद्यान्न सहयोग गरेका छन् । सञ्चालक बोहराले ४ बोरा चामल, २० किलोग्राम नुन, तेल ५ लिटर, २० ओटा ब्रस, साबुन, कोल्गेट, महिला प्याड २० वटा, चाउचाउ १ कार्टुन, दाल ५ किलो, सोडा ५ किलो गरी साढे १० हजार बराबरको सामग्री फाउन्डेसन सञ्चालीका कल्पना भट्टलाई हस्तान्तरण गरे । सञ्चालनमा रहेको दृष्टि फाउन्डेसनले मानसिक सन्तुलन गुमाएका २० जना महिला, यौन हिंसामा परेका, सहाराविहीन भएका र अन्य हिंसामा परेका महिलालाई फाउन्डेसनले आश्रय दिइरहेको छ । फाउन्डेसन सञ्चालन भएदेखि मानसिक सन्तुलन गुमाएका पाँच जनालाई पुनस्र्थापना गरिएको सञ्चालिका भट्टले जानकारी दिइन् । हाल फउन्डेसनमा चन्द्रा तिरुवा र ललिता चौधरीले स्वयम् सेवकका रूपमा मानसिक सन्तुलन गुमाएका महिलालाई हेरचाह गरिरहेको सञ्चालिका भट्टले जानकारी दिइन् ।

नवरपरासी । नवलपरासीको एउटा विद्यालयमा शिक्षक एवम् पूर्वप्रधानाध्यापक खुकुरी देखाउँदै विद्यालय पुगेपछि विद्यालयमा त्रास छाएको छ । विद्यालयका प्रधानाध्यापकबाट राजिनामा दिन परेपछि आक्रोशमा आएका जितबहादुर चौधरीले बुधबार एक्कासी खुकुरी लिएर विद्यालय पुगेका थिए । पश्चिम नवलपरासीको पाल्हीनन्दन गाउँपालिका २ हरपुर माविमा पूर्वप्रधानाध्यापक समेत रहेका चौधरी विद्यालयमा श्रीमती र छोरीसहित होहल्ला गर्दै नयाँ शिक्षकमा नियुक्त भएका सेवरी हरिजनसँग विवाद गर्न पुग्दा विद्यालयका अन्य शिक्षकहरुले प्रतिवाद गर्दा उनले कक्षाकोठामै श्रीमतीसँग रहेको झोलाबाट खुकुरी झिकेका थिए । उनले लिएको खुकुरी खोस्ने क्रममा एकजना विद्यार्थीको हातमा चोट पनि लागेको स्थानीयले बताएका छन् । पूर्वप्रधानाध्यापक एवम् हालका शिक्षकसमेत रहेको चौधरीले कक्षाकोठामै खुकुरी देखाएर ताण्डव गर्न थालेपछि उनलाई नियन्त्रणमा लिन प्रहरी नै विद्यालय हाता भित्र पुग्नु परेको थियो । विद्यालय व्यवस्थापन समितिको निर्णय विरुद्ध दुई नयाँ शिक्षक नियुक्तिका विषयलाई सदर गर्न नखोजेका चौधरीले सोही विषयमा विवाद चर्कदै गएपछि उनलाई समितिले प्रधानाध्यापकबाट हटाएर करार शिक्षक दिनेश कुमार गुप्तालाई निमित्त प्रधानाध्यापकको जिम्मा दिएको थियो । यो समाचार राजधानी दैनिकले छापेको छ ।

काठमाडौं, फागुन २५ । गएको महिना अर्को घटना महाशाखामा आयो। कीर्तिपुरमा डेरा बस्ने २२ बर्से युवक पूर्वप्रेमिकाबाट पीडित थिए। एक युवतीसँग फेसबुकमै उनको चिनजान भयो। युवती राजधानीको एउटा एजुकेसन कन्सल्टेन्सीमा काम गर्थिन्। दुवै कहिले गोदावरी त कहिले थानकोट पार्क घुम्न गए। उनको डेरामा शारीरिक सम्पर्क पनि भयो। दुवैले सहमतिमै यौन क्रियाकलापका फोटो खिचेका थिए। युवकले अर्कैसँग विवाह गरे। त्यसको एक सातापछि प्रेमिकाले उनीसहित पत्नीको फेसबुकमा पहिलेका नग्न तस्बिर पठाइन्। दम्पती प्रहरीमा पुगे। प्रहरीले ती युवतीलाई पक्राउ गर्‍यो। उनको एउट मात्र गुनासो थियो। बिहेपछि पनि युवकले उनलाई बिहे गर्छु भन्दै डाँकर बारम्बार यौन सम्पर्क राखेपछि तस्बिर पठाएको बताइन्। गोपनीयताका लागि मुद्दामामिला नगर्ने बताएपछि प्रहरीले उनीहरूलाई सम्झाइबुझाइ गरेर छाड्यो। यस्तै, राजधानीको एउटा कलेजमा स्नातक तह अध्ययनरत एक युवती शुक्रबार महानगरीय प्रहरी अपराध महाशाखा टेकुमा छट्पटाउँदै थिइन्। फेसबुक म्यासेन्जरमा उनका पूर्व ब्वाइफ्रेन्डले पठाएको सन्देश ज्यादै उच्छृंखल थियो। सुरुमा दुवैबीच राजीखुसीमा शारीरिक सम्पर्क भयो। युवकको आर्थिक स्थिति बुझेपछि उनले परिवारकै सल्लाहमा अर्को युवकसँग बिहे गरिन्। बिहे भएको केही दिनमै उनका पतिको फेसबुक म्यासेन्जरमा पूर्वप्रेमीले पहिलेका शारीरिक सम्पर्कका तस्बिर पठाए। दैनिकजसो म्यासेन्जरमा उत्छृंखल फोटो आउन थालेपछि पतिसहित उनले प्रहरी गुहारे। प्रहरीले पूर्वप्रेमीलाई पक्राउ गर्‍यो। उनी प्रहरीसँग भन्दै थिए, ‘मलाई छाडेर अर्कैसँग बिहे गरेपछि रिस थाम्न नसकेर फोटो पठाएको हुँ।’ प्रहरीले ती युवकलाई विद्युतीय अपराधमा मुद्दा दर्ता गर्न परिसर पठाएको छ। सीआईबी र महाशाखामा यस वर्ष माघसम्म परेका उजुरीमध्ये फेसबुकका २५३, यूट्युबका १९, अनलाइन वेबपेजका १०, इमोका ९, इन्स्टाग्रामका १० र ट्विटरका ३ छन्। महाशाखामा परेका उजुरीमध्ये यी दुई घटना फेसबुक दुरूपयोगका प्रतिनिधि मात्र हुन्। कलेज ड्रेसमै दैनिक ७–१० युवायुवती फेसबुक दुरूपयोगका उजुरी गर्न महाशाखा पुग्छन्। महाशाखामा दर्ता भएकामध्ये अधिकांश उजुरीमा १६ देखि २५ वर्ष उमेर समूहका युवा संलग्न छन्। फेसबुक र म्यासेन्जरमार्फत नग्न र अर्धनग्न तस्बिर साटासाट गर्ने, उत्छृंखल सन्देश पठाउने घटना पछिल्ला दिन बढेका छन्। यो समाचार अन्नपूर्ण पोस्ट दैनिकबाट लिइएको हो ।

सिरहा, माघ २६ । सिरहामा एक महिलामाथि बोक्सीको आरोपमा कुटपिट गरी जिउँदै जलाउने गरिएको घटना बाहिर आएको छ । जिल्लाको नरहा गाउँपालिका–३ चन्द्र अयोध्यापुर खोरिया टोलकी ४५ वर्षीया बौवावती महतोमाथि बोक्सी आरोपमा निर्घात कुटपिट भएको रहस्य बाहिर आएको हो । छिमेकी युवकलाई बोक्सी मन्त्र र टुनामुना गरी बिरामी बनाएको भन्दै उनी कुटिएकी हुन्। घरमा गाईबस्तुलाई घाँसपानी गरिरहेका बेला बिहीबार अपराह्न हुल बाँधर आएका छिमेकीले लछारपछार गर्दै कुटपिट गरेको पीडित बौवावतीले बताइन्। कुटपिटबाट उनको शरीरका विभिन्न ठाउँमा निलडाम पर्नुका साथै चोटपटक लागेको छ। घटनाबारे जानकारी पाएर पनि इलाका प्रहरी कार्यालय मिर्चैयाले दोषीलाई पक्राउ गरेको छैन। लिखित जाहेरी नआएको कार्यालको जिकिर छ। स्थानीय अमिरी सदायका १९ वर्षीय छोरा सुजितकुमार सदायलाई भूतप्रेत लगाएको आरोप लगाउँदै सुजितकी आमा, दिदीबहिनी लगायतले लछारपछार पार्दै चौतारामा पुर्‍याई कुटपिट गरेको बौवावतीले सुनाइन्।

इलाम, माघ २६ । मञ्चमै ढलेर बेहोस भएका पाँचथरको फाल्गुनन्द गाउँपालिकाका अध्यक्ष अमरकुमार नेम्वाङको निधन भएको छ । पाँचथरको घुर्बिसेमा आयोजित एक कार्यक्रममा सहभागी भएकै अवस्थामा अचानक ढलेका नेम्वाङलाई उपचारका लागि इलाम अस्पतालतर्फ ल्याउने क्रममा निधन भएको सहयोगी मनिचन्द्र चेम्जोङले जानकारी दिए । इलाम अस्पतालका मेडिकल सुपरिटेण्डेन्ट पवनजंघ रायमाझीका अनुसार अस्पतालमा आउँदा नेम्वाङको मुटुको चाल र रक्तसञ्चार बन्द भइसकेको थियो। घुर्बिसे पञ्चमीमा आयोजित तीनदिने क्षमता विकास तालिमको समापन कार्यक्रममा सहभागी भएका उनी मन्तव्य राखेर आसनमा नपुग्दै ढलेका थिए । नेम्वाङ नेपाली कांग्रेसबाट निर्वाचित हुन्।

धनगढी, माघ ७ । कैलालीको अत्तरियामा गत शनिवार युवक हत्याको मुख्य अभियुक्तसहित चार जनालाई प्रहरीले सार्वजनिक गरेको छ । शनिवार साँझ अत्तरियामा आयोजित भैरहेको सुदूरपश्चिम प्रादेशिक महोत्सवबाट फर्किने क्रममा गोदावरी नगरपालिका १ का २० वर्षीय अरुण भट्टको धारिलो हतियार प्रहार गरी हत्या गर्ने र सघाउनेलाई सोमवार जिल्ला प्रहरी कार्यालय कैलालीमा पत्रकार सम्मेलन गरि सार्वजनिक गरिएको हो। पक्राउ पर्नेका मुख्य अभियुक्त गोदावरी नगरपालिका–२ का २१ वर्षीय विनोद ऐरले भट्टलाई धारिलो हतियार प्रहार गरी हत्या गरेको कैलालीका प्रमुख प्रहरी उपरिक्षक आभुषण तिम्सिनाले बताए। डेबिट ऐरले मुख्य अभियुक्तलाई मोटरसाइकलमा राखेर भगाएको, मन्जु चौधरी र लोकेश खत्रीले आफ्नो डेरामा लुकाएको आरोपमा पक्राउ गरिएको तिम्सिनाले जानकारी दिए। उनीहरु चारै जनालाई आइतवार राती धनगढीमा रहेको मन्जु चौधरी र लोकेश खत्रीको डेरामा लुकेर बसेको अवस्थामा पक्राउ गरिएको हो। पुरानो रिसइबीका कारण भट्टको हत्या गरिएको प्रारम्भिक अनुसन्धानबाट खुल्न आएको प्रहरीले बताएको छ । देशसंचारबाट  

काठमाडौँ, माघ ७ । प्रतिनिधिसभाको आजको बैठक भर्खरमात्र सुरु भएको छ । हेर्नुस लाइभ :

बाँके, माघ ७ । बाँकेको नेपालगंज उपमहानगरपालिका २३ भज्जुपूर्वा गाउँका बसिन्दा अहिले पनि आर्थिक अभावका कारण आर्सेनिकयुक्त पानी पिउन  बाध्य छन् । नेपाल एक्रा एजुकेशनल फाण्डेशनले भज्जुपूर्वाका स्थानीयहरु संग गरेको छलफलमा स्थानीय रियाज अन्सारीले आर्थिक अभावका कारण आरसेनिक युक्त पानी पिएर जीवन यापन गरी रहेको बताए । उनले गाँउमा विगतमा केही संस्थाहरुले धारा जडान गराए पनि पानीको गुणस्तर मापन नगरी २० फूट गहिराइमा नै ह्याण्डपम्प जडान गरेकोले उक्त पानीबाट हरेक वर्ष बालबालिकाहरु बिरामी पर्ने गरेको बताए । भज्जुपूर्वाका रहिसले स्थानीय सरकार बने पनि आफूले अनुभूति गर्न नपाएको बताए । उनले वडाबाट प्रदान गर्ने धारा समेत २० फूटमा जडान गर्ने गरिएकोले उक्त धाराको पानी समेत स्वास्थ्यका लागि हनिकारक रहेको बताए । छलफलमा सहभागि रहेका मुस्लिमहरुले आफूहरुका लागि स्वच्छ खानेपानीको व्यवस्था गरिदिन नेपाल एक्रा एजुकेशनल फाउण्डेशन संग माग गरेका थिए । एक्राले पानीको समस्याको सामना गरीरहेका व्यक्तिहरुका घरमा जडान गर्दै आएको छ । एक्राले बाँकेको जानकी गाँउपालिकामा ५१,डुडुवागाँउपालिकामा १७ घरमा धारा जडान गरेको कार्यक्रम संयोजक पवन सिहले बताए । नेपाल एक्रा एजुकेशनल फाउण्डेशनका अध्यक्ष शक्ति कुमार बंशकारले भज्जुपूर्वा मानव बिकासमा पछाडि पर्नुमा सुरक्षित पानी र सरसफाई सेवाको अभावका कारण मानिसहरुको अकालमा ज्यान जाने गरेको बताउँदै स्वच्छ पानीका लागि एक्राले पहल गर्ने बताए । उनले स्थानीय निकाय सँग समन्वय गरेर भज्जुपूर्वामा केही महिना भित्र नै धारा जडान गर्ने बताएका छन् ।

काठमाडौं, माघ ६ । राजधानी स्थित ठमेलको एक डान्सबारमा कुटपिट भएको छ । कुटपिटमा संलग्न रहेको आरोपमा प्रहरीले दुई जनालाई पक्राउसमेत गरेको छ । ललितपुर सातदोबाटो घर भएका ४३ वर्षीय दिल गुरुङ र सुनाकोठी बस्ने ३२ वर्षीय निराजन महर्जनलाई प्रहरीले पक्राउ गरेको हो । ठमेलस्थित चाहाना डान्सबारभित्र उनीहरुले तारकेश्वर नगरपालिका–६ गोलढुङ्गा बस्ने ३५ वर्षीय मोहन पुरुवाल र काठमाडौं मनमैजु बस्ने सिन्धुपाल्चोकका २८ वर्षीय रामकृष्ण भण्डारीलाई कुटपिट गरेको प्रहरी प्रधान कार्यालयले जनाएको छ ।

काठमाडौ,माघ ६।रामेछापको मन्थली १ मच्छेडाँडीमा बस दुर्घट्ना हुँदा एक जनाको मृत्यु भएको छ भने २५ जना घाईते भएका छन। ओखलढुंगाको घोराखोरीबाट काठमाडौं जाँदै गरेको अरनिको यातायात सेवा समितिको बा ४ ख ४२१० नम्बरको बस आइतबार दिउँसो पल्टिएर दुर्घटना भएको हो। ओरालोमा गुडिरहेको बस अकस्मात कच्ची सानो सडकमा चढ्ने बित्तिकै पल्टिएको थियो। चालकले ब्रेक फेल भएकाले कालोपत्रे सडकबाट उकालो सानो बाटोमा बस चढाएको अनुमान प्रहरीले गरेको छ। घाइतेहरुलाई तामाकोशी सहकारी अस्पतालमा लगिएको छ।केही गम्भिर घाइतेहरुलाई काठमाडौं पठाइएको छ। जिल्ला प्रहरी कार्यालय रामेछापका प्रहरी निरीक्षक रविभुषण यादवका अनुसार मृतकको पहिचान हुन सकेको छैन। बसका चालकलाई प्रहरीले नियन्त्रणमा लिएको छ।

धनगढी, माघ ६ । कैलालीको जानकी गाँउपालिकाका एक युवकले श्रीमतीको हत्या गरी आत्महत्या गरेका छन् । जानकी गाउँपालिका–७ का ३५ वर्षीय प्रेमलाल चौधरीले ३२ वर्षीया श्रीमती रमा चौधरीको हत्या गरी आफूले आत्महत्या गरेका हुन् । चौधरीले श्रीमतीलाई टाउकोमा बञ्चरो प्रहार गरी हत्या गरेको प्रहरीले जनाएको  छ । आइतबार बिहान साढे ६ बजेतिर श्रीमतीको हत्यापछि उनले झुण्डिएर आत्महत्या गरेका हुन् । चौधरीले ४ दिन देखि खुकुरी, बञ्चरो लिएर गाँउमा डुल्ने गरेको स्थानीयको भनाई उद्धत गर्दै प्रहरीले जनाएको छ । उनीहरुको १८ र ६ वर्षको २ छोरा रहेका छन्  । हत्याको  थप  कारण खुल्न नसकेको र घटनाको अनुसन्धान भइरहेको इलाका प्रहरी कार्यालय टीकापुरका प्रहरी नायब उपरीक्षक शिवबहादुर सिंहले बताए । दुवैको शव टीकापुर अस्पतालमा पोष्टमार्टमको लागि राखिएको छ  । नयाँपत्रिकाबाट  

बझाङ, पुष २५ । बझाङमा लागूऔषध चरेससहित एकजना पक्राउ परेका छन् । जिल्ला प्रहरी कार्यालयको सक्रियतामा २ किलो ४८० ग्राम लागूऔषध चरेससहित एकजना प्रक्राउ परेका हुन् । पक्राउ पर्नेमा कैलालीको चुरे नगरपालिका-५ घर भएका २१ वर्षीय जय बहादुर धामी रहेका प्रहरीले जनाएको छ । मंगलबार राति बझाङको बुंगल नगरपालिका-३ विरपई सेरा विजगडामा रहेको अस्थायी प्रहरी विट विजगडाबाट प्रहरी नायब निरिक्षक नैनसिंह भाटको कमाण्डमा खटिएको प्रहरी टोलिले धामीलाई चरेसहित पक्राउ गरेको हो । विट अगाडिको चेक पोष्टमा सवारी चेक जाँचगर्ने क्रममा विजगडाबाट बागथलातर्फ आउँदैगरेको रोयल ईन्फिइल्ड लेखिएको अन टेष्ट मोटसाईकलमा चरेस ल्याइरहेको अवस्थामा धामी पक्राउ परेका हुन् । मोटसाइकलमा सवार एकजना भने भाग्न सफल भएका छन् । उनको खोजी कार्य तीव्र भइरहेको प्रहरी नायब उपरिक्षक (डिएसपी) प्रविण धितालले जानकारी दिए ।

विराटनगर, पुष २४ । घाँटीमा गुट्खा अड्किएर मोरङमा एकजनाको ज्यान गएको छ । जिल्लाको सुन्दरहरैंचा नगरपालिका-३ गछियाका ३५ वर्षीय शर्मानन्द तिम्सिनाको घाँटीमा गुट्खा अड्किएर ज्यान गएको हो । गुट्खा खाने क्रममा साँझ ७ बजे घाँटीमा खड्किएर तिम्सिना घाइते भएका थिए। घाँटीमा गुट्खा अड्किएर श्वास फेर्न गाह्रो भएपछि उनलाई उपचारका लागि बीपी कोइराला स्वास्थ्य विज्ञान प्रतिष्ठान धरान लगिएको थियो । उपचारकै क्रममा तिम्सिनाको राति ८ बजे मृत्यु भएको मोरङ प्रहरीका प्रवक्ता डीएसपी घनश्याम श्रेष्ठले जानकारी दिए ।

धनगढी, पुस २४ । सुदूरपश्चिम प्रदेशको अस्थायी राजधानी धनगढीका स्थानीय कल्भर्ट निर्माणको विरोधमा उत्रिएका छन् । निर्माणाधीन छ लेनको सडकको मोहनापुलदेखि अत्तरियासम्मको खण्डमा निर्माण गर्न थालिएको कल्भर्ट पानीको निकास नै नभएको ठाउँमा हालिन थालेको भन्दै स्थानीयहरू विरोधमा उत्रिएका हुन् । स्थानीयहरूका अनुसार यसरी कल्भर्ट बनाउँदा आसपासका घरहरूमा पानि पस्ने सम्भावना रहेको छ । उनीहरूले पानीको निकास नै नभएको ठाउँमा कल्भर्ट नबनाउन माग गरिरहेका छन् । मोहनापुल देखि अत्तरियासम्म निर्माण भइरहेको ६ लेन सडकमा पानी निकासका लागि २२ वटा कल्भर्ट निर्माण गरिँदैछ तर कल्भर्टको दुवैतिर घर भएकाले पानीको निकास भने छैन । नाला नै नरहेको ठाउँमा कल्भर्ट निर्माण गर्नु उचित नभएको भन्दै स्थानीयले आवाज उठाइरहेका छन् । तर सम्बन्धित पक्षले यसप्रति कुनै वास्ता नै नगरेको स्थानियको गुनासो छ । धनगढी उपमहानगरपालिका–१३ की स्थानीयवासी लक्ष्मी भट्ट निर्माण भईरहेको कल्भर्टमा पानी निकासको ठाउँ नभएकाले वर्षायाममा घर डुब्ने चिन्ता लागेको बताउँछिन् । उता, आयोजनाले भने यसमा नापी कार्यालय नै दोषी रहेको भन्दै आफ्नो बचाउ गरेको छ । आयोजनाका सब–इञ्जिनियर भूपेन्द्र बडालले आफूहरुले पहिले कल्भर्ट रहेकै ठाउँमा बनाउन थालेको बताए । १० पटकसम्म नापी कार्यालयलाई पत्राचार गरेपनि कुनै जवाफ नआएकाले काम जारी राखेको सव–इञ्जिनीयर बडालको भनाइ छ । इमेजखबरबाट