कञ्चनपुर, भदौ २९ । कञ्चनपुर पुनर्वास नगरपालिका-५ का बेलुदेवी बिष्टका नौ महिने छोरी सरस्वतीलाई चोरीएको सात घण्टापछि प्रहरीले फेला पारेको छ ।   सोहि नगरपालिका-८ ‘क’ गाँउमा तीज मनाउन माईती आएका बेला आमासँंगै राति सुतेकी सरस्वतीलाई अज्ञात महिलाले मध्यराति १ बजेको समयमा चोरेर लगेका हुन् ।   शिशु चोरी भएको खबर पाउनासाथ स्थानीय बासिन्दाले तत्काल प्रहरीलाई खबर गरेका थिए । प्रहरी र स्थानीय बासिन्दाले खोजतलास गर्दा माईती घरभन्दा डेढ किलोमिटर टाढा धान खेतमा रुँदै गरेको अवस्थामा बालिका फेला परेको जिल्ला प्रहरी कार्यालय कञ्चनपुरका प्रहरी उपरीक्षक कुवेर कडायतले बताए ।   नगरपालिकाका नगर प्रमुख जीवन थापासहितको उपस्थितिमा शिशुलाई उनका आफन्तकोमा जिम्मा लगाइएको उनले बताए ।   शिशुको शरीरमा स-साना फोका देखा परेपछि उपचारका लागि उनलाई सेती अञ्चल अस्पतालमा पठाइएको र त्यहाँबाट शिशुलाई बाल कान्ती अस्पताल काठमाडौँमा लग्ने कुरा बुझिएको प्रहरी उपरीक्षक कडायतले बताए । शिशु चोरी गर्नेको खोजतलास जारी रहेको पनि उनले बताए । -रासस

काठमाडौं, भदौ २९ । सरकारले वाल श्रम रोक्न चलाएको सरकारी अभियान नारामा मात्र सिमित भएको छ । ८० लाख बालबालिकामध्ये सरकारी तथ्याङक अनुसार १६ लाख बालबालीकाहरु जोखिमयुक्त प्रकृतिको काम गर्न बाध्य छन् ।   वाल अधिकारसम्बन्धी महासन्धि, सन् १९८९ ले १८ वर्ष उमेर सम्मको व्यक्तिलाई बालबालिका भनेर परिभाषित गरेको छ भने बालबालिका सम्बन्धी ऐन, २०४८ ले १६ बर्ष सम्मको व्यक्तिलाई वालवालिका मानेको छ ।   महिला बालबालीका तथा जेष्ठ नागरीक मन्त्रालयले बालबालीका शिर्षकमा यस आर्थिक वर्षमा मात्रै ३ करोड ४३ लाख रुपैंया बजेट बिनीयोजन गरेको छ । यस्तै केन्द्रिय बाल कल्याण समितीसंग वालवालिकाकै लागि खर्च गर्न भनेर छुट्याइएको ९ करोड रुपैंया बजेट छ ।   मन्त्रालयको वालवालीका हेर्ने शाखा अधिकृत इन्दीरा आचार्यका अनुसार बिनीयोजीत बजेट सडक बालबालीका व्यवस्थापन, ऐन नियम तर्जुमा, बाल सुधार लगायत शिर्षकमा खर्च हुने गरेको छ । बजेट पर्याप्त भए पनि बालबालीकाको क्षेत्रमा समुचित प्रयोग भएको देखिएको छैन । नेपाल समाचारपत्रमा खबर छ ।

काठमाडौं, भदौ २९ । सुत्केरी महिलाले अब एक बर्षसम्म बेतलबी बिदा पाउने भएका छन् ।   संसदको स्वास्थ्य शिक्षा समितिले सुरक्षित मातृत्व तथा प्रजनन स्वास्थ्यको अधिकार सम्बन्धमा व्यवस्था गर्न बनेको विधेयकको दफावार छलफलपछि प्रसूति बिदा अपूग भए चिकित्सकको सिफारिसमा बढीमा एक बर्षसम्म बेतलबी बिदा पाउने व्यवस्था गरेको हो । कान्तिपुरमा खबर छ ।

पर्वत । शहर बजार जताततै तीजको रौनकले छपक्कै छोपेको छ । दैनिकजसो दर खुवाउने, खाने, मेला महोत्सव गर्ने, शुभकामना आदानप्रदान गर्ने लगायत कार्यक्रमले भ्यार्इनभ्याइ छ । कुश्मा नगरपालिका–१ पाङको माझी बस्तीका चन्द्रकुमारी माझीलाई भने तीजको कुनै वास्ता छैन । उहाँ लगायत माझी बस्तीका महिला तथा पुरुष कालीगण्डकी किनारमा बालुवा छान्नमै व्यस्त छन् । “दिनभर बालुवा नछाने भोकै बस्नु पर्छ,” चन्द्रकुमारीले भने, “हाम्रा लागि वर्षभरिका सबै दिन उस्तै हुन् । फुर्सद र धन भए पो चाडपर्व ।” पोखरा–बागलुङ राजमार्गअन्तर्गतको कालीगण्डकी किनारमा करीब १५० माझी परिवारको बसोबास छ । पोखरा–बागलुङ सडक निर्माणका क्रममा २०४८ सालमा धादिङ, गोरखा र तनहुँलगायतबाट आएका उनीहरु यही छाप्रो बनाएर बसेका हुन् । उनीहरूसँग न त लालपूर्जा छ न गाँसको नै ठेगान । राजमार्गको काम सकिएपछि माझी बेरोजगार बनेका हुन् । “उर्लेको कालीगण्डकीमा जोखिम मोलेरै बालुवा निकाल्नु पर्ने बाध्यता छ,” स्थानीयवासी कला माझीले भने । नियमित आम्दानीको स्रोत नभएपछि बालुवा निकाल्ने र गिट्टी कुट्नु बाहेक अन्य विकल्प नभएको उहाँको भनाइ छ । वर्षाका बेला कालीगण्डकीको भेलले बगाउने बालुवा किनारमा थुपारेर हिउँदभर बेच्ने उनहरुको मुख्य पेशा हो । “बर्खामा बाढी आउँदा बालुवा निकाल्नै सकिन्न,” कलाले भने, “बालुवा नछाने भोकभोकै बस्नु पर्छ ।” महिला बिहानैदेखि बालुवा निकालेर नदी किनारमा थुपार्छन् । केहीले बङ्गुर र कुखुरा पालेका छन् । कुश्मा, बागलुङ र बेनीका निर्माण व्यवसायीले माझीबाट प्रतिट्याक्टर रु तीन हजारदेखि रु पाँच हजारमा बालुवा खरदि गर्छन् । व्यवसायीले सो बालुवा बजारमा रु १० हजारसम्ममा बिक्री गर्छन् । बालुवा बिक्रीमा व्यवसायीले लगाएको एकाधिकारकै कारण श्रमिकले सिधै बिक्री गर्न पाउँदैनन् । यहाँका बालबालिकाले पढ्न पाएका छ्रैनन् । विसं २०६३ मा स्थापना गरिएको विद्यालयमा ३ कक्षासम्म मात्र पठनपाठन हुन्छ । उपल्लो कक्षा पढ्न बागलुङ सदरमुकाम पुग्नु पर्छ । त्यहाँसम्म दैनिक आउजाउ गर्दा रु २० बस भाडा तिनुपर्छ । भाडा तिर्न नसक्दा कतिपयले छोराछोरीलाई विद्यालय पठाउने गरेका छैनन् । रासस

कैलाली, भदौ २६ । जिल्लाको जानकी गाउँपालिका-४ मुनुवास्थित एक सहकारीले उत्पादन गरेको बीउ मुलुकका विभिन्न जिल्लामा बिक्री वितरण हुन थालेको छ । बीज वृद्धि कृषक सहकारी संस्था मुनुवाले गत आवमा झण्डै दुई हजार क्विन्टल धानको बीउ मुलुकका अन्य जिल्लामा बिक्रीका लागि पठाएको हो ।   सहकारीले सो परिमाणको बीउ बिक्री गर्न कञ्चनपुर, बर्दिया, बाँके, चितवन, बुटवल, दाङ, सुर्खेत, दैलेख, डोटी र डोल्पा पठाउँदै आएको छ । सो सहकारीले गहुँ, मसुरो, तोरी र केराउको बीउसमेत उत्पादन गर्दै आएको छ ।   सहकारीका अध्यक्ष रामफल बडायकका अनुसार ८० हेक्टर जमीनमा धान, ९० हेक्टरमा गहुँ, चार हेक्टरमा मसुरो, १० बिघामा तोरीको बीउ तथा एक हजार ८०० क्विन्टल गहुँकको बीउ उत्पादन गरेको छ । गहुँको बीउ अन्य जिल्लामा बिक्री गरिँदै आएको छ । ‘हाम्रो बीउले किसानको विश्वास जितेको छ,’ अध्यक्ष बडायकले भने । चार वर्षअघिसम्म ४०० क्विन्टल बीउ उत्पादन हुने गरेको थियो । अहिले गहुँ र धान पाँच हजार क्विन्टलसम्म उत्पादन हुन्छ ।   सहकारीसँग दुई ग्रेडिङ मेशिन, एक हजार आठ क्विन्टल क्षमताको एउटा तथा पाँच÷पाँच सय क्विन्टल क्षमताका दुई गोदाम रहेको छ । कृषि व्यापार आयोजना प्याक्ट र कृषि विकास कार्यालयले एउटा÷एउटा तथा अर्को गोदाम रानी जमरा कुलरिया सिँचाइ आयोजना कृषितर्फको सहयोगमा निर्माण गरिएको हो ।   हाल सो सहकारीमा ५४ कृषक आबद्ध छन् । कृषकले एक बिघादेखि पाँच बिघासम्ममा खेती गर्दै आएका छन् । विसं २०५७ मा ५४ कृषकको समूहले बीउ उत्पादन थालेको हो । विसं २०६२ सालमा दर्ता भएको उक्त सहकारीले बीउ उत्पादनसँगै कृषकलाई व्यावसायिकसमेत बनाएको छ । रासस

बैतडी, भदौ २६ । बस दुर्घटनामा परी सोमबार १९ जना घाइते भएका छन् । महेन्द्रनगरबाट दार्चुलातर्फ जाँदै गरेको ना६ख ७४२० नं को बस तथा बैतडीको गन्नाबाट महेन्द्रनगर जाँदै गरेको ना ५ ख ७५४७ नं को बस महाकाली राजमार्गअन्तर्गत सतबाँझ-गोकुलेश्वर सडकखण्डको बांगाबगरमा ठोक्किँदा दुर्घटना भएको हो ।   दुर्घटनामा गम्भीर घाइते दार्चुलाको मार्मा गाउँपालिका-३ का २७ वर्षीया मनिषा विष्ट, उनका श्रीमान ३३ वर्षीय पदम विष्ट, ३० वर्षीय सुरेन्द्र विष्ट, मार्मा-६ का २४ वर्षीय धनबहादुर नाथ र डडेल्धुरा अमरगढी नगरपालिका-६ का ४० वर्षीय रामबहादुर खड्कालाई उपचारका लागि धनगढी लगिएको जिल्ला प्रहरी कार्यालयका प्रहरी निरीक्षक कान्तिराज जोशीले जानकारी दिए । अन्य घाइतेको दार्चुलाको गोकुलेश्वर प्राथमिक स्वास्थ्य केन्द्रमा उपचार भइरहेको छ । -रासस

बर्दिवास, भदौ २६ । चोरी डकैतीमा संलग्न तीन जनालाई प्रहरीले सोमबार पक्राउ गरेको छ । पक्राउ पर्नेमा बर्दिवास नगरपालिका-१३ का अजमल अली शेष, इसुन घिसिङ र रमेश लामा रहेको प्रहरी नायब उपरीक्षक खगेन्द्रबहादुर खड्काले जानकारी दिए ।   उनीहरुले गत शनिबार भङ्गाहा नगरपालिका-६ जमुनियाँका अर्जुन भुजेलको घरबाट १० लाख रुपैयाँ बराबरको धनमाल लुटपाट गरेका थिए । बन्दुक, खुँडा, खुकुरी, भाला र विष्फोटक पदार्थसहित पुगेका तीनै जनाले खुकुरी तथा गोली प्रहार गरी भुजेलसहित पाँच जनालाई घाइते बनाएका थिए ।   घाइतेको काठमाडौँमा उपचार भइरहेको जिल्ला प्रहरी कार्यालयले जनाएको छ । पक्राउ गरिएकाहरुको बयानका आधारमा अन्यको खोजी भइरहेको जिल्ला प्रहरी कार्यालयले जनाएको छ । -रासस

राजविराज, भदौ २५ । गजेन्द्रनारायण सिंह औद्योगिक क्षेत्रमा २० वर्षदेखि स्थान ओगटेर बन्द अवस्थामा रहेका दुई उद्योगको सम्झौता खारेज गरिएको छ । सप्तरीको रुपनी गाउँपालिका–५ बसबिटीस्थित औद्योगिक क्षेत्रमा एस एण्ड को इलेक्ट्रोड्स प्रालि र महालक्ष्मी खाद्य उद्योगको सम्झौता खारेज गरिएको कार्यालयका प्रमुख दिपक आचार्यले बताए । एस एण्ड को प्रालिको रु करीब ११ लाख २२ हजार २९२ र महालक्ष्मी खाद्य उद्योगको रु करीब नौ लाख ४३ हजार ४१५ बाँकी बक्यौतासमेत रहेकाले सम्झौता खारेज गरिएको प्रमख आचार्यले जानकारी दिए । यी दुईवटा उद्योग लामो समयदेखि बन्द अवस्थामा रहेको र सम्झौता, नवीकरणसमेत समाप्त भइसकेको कारण बाध्य भएर बन्द गर्नुपरेको प्रमुख आचार्यको भनाइ छ । उनले अब ती दुई स्थानमा नयाँ उद्योगका लागि सूचना प्रकाशन गरी राष्ट्रको सेवा गर्ने उद्देश्यले रोजगारमूलक उद्योग स्थापना गर्नेलाई पहिलो प्राथमिकता दिइने बताए । औद्योगिक क्षेत्र व्यवस्थापन कार्यालयको नेतृत्वमा रुपनी गाउँपालिकाका अध्यक्ष हरेराम यादव, सप्तरी उद्योग वाणिज्य सङ्घका अध्यक्ष अरुण प्रधान, जिल्ला प्रहरी कार्यालयका प्रतिनिधि, जिल्ला प्रशासन कार्यालयका प्रतिनिधि, राजविराज नगरपालिकाका अधिकृत प्रफुल्ल श्रेष्ठलगायत, स्थानीयवासीको रोहबरमा निजी ताला फुटाई सरकारी ताला लगाइएको हो । विसं २०४४ मा भारत सरकारको सहयोगमा साढे २२ विगाहा जग्गामा निर्माण गरिएको उक्त औद्योगिक क्षेत्रलाई २०५२ सालमा नेपाल सरकारलाई हस्तान्तरण गरिएको थियो । सो औद्योगिक क्षेत्रभित्र १० वटा उद्योग सञ्चालन गर्न सकिने सेड९टहरा० निर्माण गरिएको छ । तर, औद्योगिक क्षेत्रमा आवश्यक सेवा सुविधा नहुँदासमेत हाल कोशी पोलिमर्श इण्डष्ट्रिज, मिलन डेरी उद्योग, महालक्ष्मी पेट इण्डष्ट्रिज र पदम ज्योति प्लाष्टिक उद्योग गरी चार उद्योग मात्र सञ्चालनमा छन् । जसमध्ये कोशी पोलिमर्श इण्डष्ट्रिजले भवन नपाउँदासमेत आफ्नै लगानीमा टहरा निर्माण गरी उद्योग सञ्चालन गर्दै आएका छन् । यस्तै अल नेप्लिज टी एण्ड कफी सेन्टर प्रालि, कृष्णा खाद्य उद्योग र माग भगवती कृषि टमाटो फुड्स इण्डष्ट्रिज बन्द अवस्थामा रहेका छन् भने कान्तिपुर प्लाष्टिक उद्योग र उषा जल उद्योग निर्माणाधीन अवस्थामा रहेको कार्यालय प्रमुख आचार्यले जानकारी दिए । रुपनी गाउँपालिकाका अध्यक्ष हरेराम यादवले उद्योग स्थापनाका लागि वातावरण निर्माण भइसकेको बताउदै औद्योगिक क्षेत्रलाई पूर्णरुपले सञ्चालनमा ल्याउन सक्दो प्रयास गर्ने बताए । रासस

काठमाडां, भदौ २५ । कञ्चनपुरको भीमदत्त नगरपालिकामा बालिका निर्मला पन्तको बलात्कारपछि हत्या भएको घटनामाथि अनुसन्धान गर्न गठन गरिएको उच्च स्तरीय छानबिन समितिका एक सदस्यले राजीनामा दिएका छन् । प्रदेश ७ का आन्तरिक मामिला तथा कानुन मन्त्रालयका उपसचिव विरेन्द्र केसीले सोमबार पत्रकार सम्मेलन गरी राजीनामा दिएको घोषणा गरेका हुन् । उनले समितिको म्याद थप गरिएकोमा असन्तुष्टि जनाएका छन् ।

लहान, भदौ १७ । एघारौँ पुस्तकालय दिवसका अवसरमा सिरहाको धनगढीमाई नगरपालिकाले विद्युतीय पुस्तकालय स्थापना गरेको छ । कम्युनिस्ट आन्दोलनका मूर्धन्य व्यक्तित्व जयगोविन्द साहको स्मृतिमा ‘जयगोविन्द साह स्मृति पुस्तकालय’नाम राखिएको सो पुस्तकालय सिरहा जिल्लाकै पहिलो विद्युतीय पुस्तकालय भएको बताइएको छ । धनगढीमाई नगरपालिका–९ मा स्थापना गरिएको पुस्तकालय नगर प्रमुख हरिनारायण चौधरीले शनिवार उद्घाटन गरे । पुस्तकालयले पठनीय संस्कृतिको विकास गर्नुका साथै पुस्तक अध्ययनबाट प्राप्त ज्ञान समाज रुपान्तरणमा सहयोग मिल्ने उनले बताए । पुस्तकालयमा दर्शन, साहित्य, विज्ञान, कला लगायतका विभिन्न विषयका १३२ पुस्तकसहित तीन थान कम्प्युटर राखिएको छ । अनलाइन मार्फत ती कम्प्युटरबाटै विभिन्न पुस्तक हेर्न सकिने र पाठकको मागअनुसार आगामी दिन क्रमशः अन्य पुस्तक र कम्प्युटर थप्दै जाने नगरपालिकाले जनाएको छ । पुस्तकालयले आगामी दिनमा शिक्षा, राजनीतिक, संस्कृतिलगायत विविध विषयमा नियमित रुपमा छलफल कार्यक्रम गर्ने जनाएको छ ।

कञ्चनपुर, भदौ १७ । पूर्व-पश्चिम राजमार्गअन्तर्गत पर्ने कञ्चनपुरको शुक्लाफाँटा नगरपालिका-११ कलुवापुरमा मोटरसाइकल दुर्घटनामा सशस्त्र प्रहरीका सहायक हवल्दारको मृत्यु भएको छ । भीमदत्तनगरपालिका-१८ खैरभट्टी घर भएका ३२ वर्षीय सहायक हवल्दारहरिश भट्टको गयराती भएको दुर्घटनामा मृत्यु भएको हो।   कैलालीको टिकापुरबाट से२प ९६६९ नं को मोटरसाइकलमा आउँदै गरेका भट्ट चढेको मोटरसाइकल र भीमदत्तनगरबाट धनगढीतर्फ जाँदै गरेको से१ज ८६२ नं को भ्यान आपसमा ठोक्किँदा उनको मृत्यु भएको इलाका प्रहरी कार्यालय झलारीका प्रहरी निरीक्षक रमेशदत्त अवस्थीले जानकारी दिए ।   दुर्घटनामा भएको जानकारी पाउने बित्तिकै पुगेको प्रहरीको टोलीले गम्भीर घाइते अवस्थामा भेटिएका भट्टलाई तत्कालै उपचारका लागि अस्पतालमा भर्ना गरे पनि उपचार हुन नसकेपछि थप उपचारका लागि भारतको हलद्धानीतर्फ लग्दै गर्दा बाटोमै मृत्यु भएको हो ।   ठक्कर दिने भ्यान र चालक इप्रका झलारीको नियन्त्रणमा रहेका छन् । भट्ट उग्रतारा सशस्त्र प्रहरी गण टिकापुरमा सहायक हवल्दार पदमा कार्यरत रहेको बुझिएको छ । -रासस

बाँके, भदौ १७ । एक साताभित्रै प्रदेश ५ मा आधा दर्जन बलात्कारका घटना सार्वजनिक भएका छन् । तीमध्ये तीन जना बालिका छन् । मंगलबार बाँकेको कोहलपुरमा पाँच वर्षीया बालिकामाथि काकाले बलात्कार गरेको मुद्दा प्रहरीकहाँ पुगेको खबर नसेलाउँदै शुक्रबार १३ वर्षीया बालिका आफ्नै हजुरबुवाबाट बलात्कृत भएकी छन् ।   कोहलपुर नगरपालिका-३ निवासी ७० बर्से वृद्धले नातिनीलाई तीन वर्षदेखि यौन शोषण गर्दै आइरहेको रहस्य खुलेको छ । इलाका प्रहरी कार्यालय कोहलपुरका सूचना अधिकारी मानबहादुर बिसीका अनुसार पीडित बालिकाले शुक्रबार प्रहरीमा हजुरबुवाविरुद्व उजुरी दिएकी छन् ।   आरोपी वृद्धलाई शुक्रबारै पक्राउ गरी प्रहरीले आवश्यक कानुनी प्रक्रिया अघि बढाएको छ । शुक्रबारै पीडित बालिकाको स्वास्थ्य परीक्षण गराइएको प्रहरीले जनाएको छ । आरोपीलाई पक्राउ गरिए पनि शनिबार बिदा भएकाले आइतबार मात्रै जाहेरी दर्ता गरिने कोहलपुर प्रहरीले जनाएको छ । अन्नपूर्ण पोष्टमा खबर छ ।   त्यस्तै मंगलबार कोहलपुर नगरपालिका-३ मैटहवामा पाँच वर्षीया बालिका बलात्कृत भएकी थिइन् । नाताले काका पर्ने भारत उत्तरप्रदेश डिन्नी रहेली घर भई कोहलपुर-४ बस्ने १५ बर्से किशोर हरूण खाँले घर पु¥याइदिने भन्दै आफ्नो कोठामा लगेर जबर्जस्ती करणी गरेको आरोपमा उनलाई प्रहरीले पक्राउ गरेको छ ।   बुधबार पनि रूपन्देहीमा ६ वर्षीया बालिका बलात्कारको सिकार भइन् । कञ्चन गाउँपालिकाकी उनलाई २० बर्से विकल भन्ने खेमबहादुर पुनले बलात्कार गरेका थिए । मावली घर आएकी उनलाई राति चकलेट दिन्छु भन्दै उनले बलात्कार गरेका हुन् ।

काठमाडौं, भदौ १७ । पर्याप्त बेड नहुँदा पनि कोइराला स्वास्थ्य विज्ञान पतिष्ठानमा प्रसुतीका बिरामीको बिजोग भएको छ । दैनिक चाप थेग्न नसक्दा एकै बेडमा ३ जनासम्म बिरामी राख्नुपर्ने र कतिपयलाई भुइँमै उपचार गराउनुपर्ने बाध्यता छ ।   प्रतिष्ठानमा मातृशिशु स्याहार केन्द्र थप्न २ बर्षअघि भवन निर्माण सुरु भए पनि बीचमै रोकिँदा बिरामी मारमा परेका हुन् । प्रतिष्ठानको प्रसुती बिभागमा दैनिक क्षमता ३० जनाको मात्र छ । तर चौबीस घण्टामा ६० देखि ८० जना प्रसुतीका लागि आउने गरेका विभागका प्रमुख डा।मोहनचन्द्र रेग्मीले जानकारी दिए । कान्तिपुरमा खबर छ ।

दमौली । नेपाली काङ्ग्रेसका वरिष्ठ नेता रामचन्द्र पौडेलले जनतालाई विकासको प्रत्याभूति दिन सक्नुपर्ने बताएका छन् । आदिकवि भानुभक्त क्याम्पसको ३२औं वार्षिकोत्सवका अवसरमा शनिबार आयोजित बृहत् सामुदायिक स्वास्थ्य शिविरको केशवटारमा उद्घाटन गर्दै वरिष्ठ नेता पौडेलले यस्तो बताएका हुन् ।   वर्तमान सरकारले विकासभन्दा पनि हल्लामात्र बढी गरेको धारणा राख्दै नेता पौडेलले काङ्ग्रेसले प्रतिपक्षमा रहेर सरकारको गलत क्रियाकलापको खबरदारी गर्दै आएको दाबी गरे ।आदिकवि भानुभक्त क्याम्पस प्राध्यापक सङ्घ क्याम्पस इकाइ, व्यास नपा वडा नं १४ र केशवटार माविको संयुक्त आयोजना र तथा नेपाल स्वास्थ्यकर्मी सङ्घ गण्डकी प्रदेश र कास्की सेवा हस्पिटल प्रालिको प्राविधिक सहयोगमा सो बृहत् स्वास्थ्य शिविर सञ्चालन गरिएको हो ।   शिविरमा ७०० जना बिरामीको स्वास्थ्य परीक्षण गरिएको थियो । शिविरमा वालरोग, दन्तरोग, महिला तथा प्रसूतिसम्बन्धी रोग, हाडजोर्नी तथा नशा रोग, नाक, कान घाँटी, पेट र छाती मुटुसम्बन्धी रोगको परीक्षण गरिएको थियो । -रासस

बागलुङ, भदो १६ । यस वर्षको सृजनशिल पत्रकारिता पुरस्कार बागलुङमा रहेर सक्रिय पत्रकारिता गर्दे आएका संगम घर्ती मगरलाई प्रदान गरिएको छ । पत्रकारद्धय सन्तोष क्षत्री र सिर्जना पन्तले आफ्नो विवाहमा हुने खर्च कटाएर आदर्श सञ्चार सहकारी संस्था बागलुङमा स्थापना गरेको सो कोषबाट नागरिककर्मी घर्तीलाई पुरस्कृत गरिएको हो । आदर्श सञ्चार सहकारीको १२ औ स्थापना दिवसको अवसरमा भुमि व्यवस्था, सहकारी तथा गरिवी निवारण मन्त्री पद्यमा अर्यालले पत्रकार घर्तीलाई नगद पाच हजार सहित दोसल्ला ओढाएर सम्मान प्रदान गरेकी थिइन् । क्रियाशिलता, सिर्जनशिलता तथा निरन्तरता लगाएका आधारमा पुरस्कार छनोट समितिले यस बर्षको लागि करिब एक दशक देखि पत्रकारितामा सक्रिय घर्तिलाई प्रदान गर्ने निर्णय गरेको संस्थापक एवं नेपाल पत्रकार महासंघ बागलुङ शाखा कार्यसमिति सदस्य सिर्जना पन्तले बताइन । पुरस्कार ग्रहणपछि घर्तिले कुनै पनि पुरस्कारको अपेक्षाले आफू पत्रकारतिामा नलागेको भएपनि यसले थप उत्साह र जिम्मेबारीबोध भएको बताए । पत्रकार क्षत्री र पन्तले बिहेमा भोजभतेर नगरी आदर्श सञ्चार सहकारीको संयोजन औपचारिक कार्यक्रमका बिच २०७१ साल बैशाख १९ गते प्रगतिशिल विवाह गरेका थिए । कोषबाट प्रत्यक बर्ष धौलागिरि अञ्चलमा कार्यरत एक पत्रकारलाई नगद सहित सम्मान गरिन्छ । नागरिक राष्ट्रिय दैनिमा बागलुङबाट रिपोटिङ गर्दे आएका घर्ती बिएफबिएस रेडियोमा पनि आवद्ध रहेका छन् ।