काठमाडौं । रुसका चर्चित खोज पत्रकार अर्काडी बबचेन्कोको हत्या भएको खबर झुठ साबित भएको छ । पछिल्लो जानकारी अनुसार युक्रेनले एक योजना अन्तर्गत मंगलबार पत्रकार अर्काडी बबचेन्को हत्या भएको सम्बन्धी झुठो खबर फैलाएको थियो । मंगलबार अबेर ४१ वर्षका पत्रकार अर्काडी बबचेन्को युक्रेनको राजधानी किएभमा गोली हानी हत्या भएको खबर आएको थियो । त्यसमा भनिएको थियो कि उनी श्रीमतीले गोलीको आवाज सुनेर जब आफ्नो फ्ल्याटबाट बाहिर आइन् अर्काडी बबचेन्को रक्तामे अवस्था थिए । र एम्बुलेन्समा अस्पताल लैजाँदै गर्दा उनको मृत्यु भयो । युक्रेनले रुसले उनको हत्या गरेको आरोप लगाएको थियो । तर हत्या भएको २४ घण्टापछि पत्रकार अर्काडी बबचेन्को एक पत्रकार सम्मेलन मार्फत सार्वजनिक भए, त्यसपछि हत्या भएको खबर झुठो रहेको खुल्यो । रुसी एजेन्टहरुको भण्डाफोर गर्नका लागि अर्काडी बबचेन्को हत्या भएको झुठो खबर फैलाएको युक्रेनले दाबी गरेको छ । अर्काडी बबचेन्कोे हत्याका लागि तैनाथ रहेका आक्रमणकारीलाई पक्राउ गर्नका लागि आफूहरुले चलाएको यो ठूलो स्टिंग अपरेशन रहेको युक्रेनको सुरक्षा सेवाका प्रमुख वसिल ह्ट्सेकले बताएका छन् । रुसी सुरक्षाबलले अर्काडी बबचेन्कोे हत्याका लागि युक्रेनका एक व्यक्तिलाई तयारी अवस्थामा राखेको उनको भनाई छ । सन् २०१६ मा दुर्घटनाग्रस्त रुसी विमानको बारेमा लेखेपछि आफूले ज्यान मार्ने धम्की पाएको र त्यसपछि रुस छोडेको अर्काडी बबचेन्को बताएका थिए । उनी पहिले चेक गणतन्त्रको प्राग गएका थिए, त्यसपछि मात्रै किएभ आएका हुन् । उनले रुस सरकारको आलोचना गर्दै आएका छन् । पूर्व युद्ध रिपोर्टर बबचेन्कोले किएभमा युक्रेनको टेलिभिजन च्यानल एटिआर टिभीमा प्रस्तोताको रुपमा काम गर्दै आएका छन् । एजेन्सीको सहयोगमा

धनगढी, जेठ १७ । कैलालीको धनगढी उप–महानगरपालिकाले कुरुप नै हुने गरी राखिएका ठेलाछाप्रा र होर्डिङ बोर्ड हटाउने अभियान शुरु गरेको छ । उपमहानगरपालिका मेयर, वडा अध्यक्षलगायतका जनप्रतिनिधिको सहभागितामा आजदेखि अभियान शुरु गरिएको हो । बजार क्षेत्रमा अव्यवस्थित तरिकाले राखिएका ठेलाछाप्रा र होर्डिङ बोर्ड आज उपमहानगरपालिकाले डोजर लगाएर हटाउन शुरु गरेको छ । तत्कालका लागि धनगढी चौराहादेखि क्याम्सप चौकसम्ममा राखिएका होडिङ वोर्ड तथा खोकाछाप्रा हटाईने अभियानका सयोजक तथा वडा नम्बर ३ का अध्यक्ष वल बहादुर ऐरले बताए । जथाभावी रुपमा होर्डिङ बोर्ड र ठेलाछाप्रा राख्दा धनगढी बजारको सौन्दर्यतामा नै ह्रास आएको छ ।

काठमाडौं, जेठ १७ । सुर्तीजन्य पदार्थको सेवन र हृदयरोगको सम्भावना भन्ने नाराका साथ आज विश्व धूमपान तथा सुर्ती रहित दिवस मनाइँदैछ । धूमपानका कारण हुने क्षति न्यूनिकरण र सुर्तीजन्य पदार्थको नियन्त्रण गर्ने उद्धेश्यले विश्व स्वास्थ्य संगठनको आह्वानमा मे ३१ तारिखमा यो दिवस मनाउने गरिन्छ । सुर्तीजन्य पदार्थको प्रयोग घटाउन सके ११ प्रतिशत मृत्यु घटाउन सकिने स्वास्थ्य मन्त्रालयले जनाएको छ । नेपालमा सुर्तीजन्य पदार्थकै कारण बर्सेनि २५ हजारभन्दा बढी मानिसको ज्यान जाने गरेको सरकारी तथ्याङ्क छ । चुरोट सुर्तीले खानेलाई मात्र नभएर यसको आसपासमा बस्नेलाई पनि असर गर्छ । धूमपान गर्ने धेरैजसोलाई फोक्सो र मुखको क्यान्सर हुने गरेको छ भने पछिल्लो तथ्याङले कलेजोमा पनि असर पर्ने देखाएको छ । गर्भवती भएका बेला सूर्ती तथा चुरोट खाँदा पेटमा भएको बच्चाको कलेजो बिगार्ने अनुसन्धानकर्ताले बताएका छन् । सुर्तीजन्य पदार्थको प्रयोगले बर्सेनि हजारौँ मानिसले क्यान्सर, मुटु, हृदयाघात, स्ट्रोकजस्ता समस्याबाट ज्यान गुमाउने पनि सरकारले जनाएको छ ।

काठमाडौं, जेठ १७ । सरकारले मंगलबार सार्वजनिक गरेको आर्थिक वर्ष ०७५–७६ को बजेटबारे छलफल गर्न व्यवस्थापिका संसदको बैठक आज बस्दैछ । बैठक अहिले ११ बजे बस्न लागेको हो । सरकारले ल्याएको बजेटबारे संसदमा छलफल गरेर पारित गर्ने संवैधानिक प्रचलन छ । यही परम्परा अनुसार आजबाट संसद बैठक शुरु हुने र यो क्रम केही दिन चल्ने संसद् सचिवालयले जनाएको छ ।

लहान, जेठ १७ । विषालु सर्पको टोकाइबाट सिरहाको कल्याणपुर नगरपालिका–६, भोक्राहामा एक किशोरीको मृत्यु भएको छ । कमला नदीको बगरमा तारबुजा टिप्न गएको बेला विषालु सर्पले टोक्दा स्थानीय ततरा मियाँकी १६ वर्षीया छोरी अमिदा खातुनको मृत्यु भएको कल्याणपुर नगरपालिका–६ का वडाध्यक्ष मोतिबुल राइले जानकारी दिनुभयो । विषालु सर्पको टोकाइबाट सिकिस्त भएकी अमिदालाई उपचारका लागि अस्पताल लैजान खोजिए पनि तत्कालै एम्बुलेन्सको व्यवस्था नहुँदा उपचारको अभावमा मृत्यु भएको वडाध्यक्ष राइनले बताउनुभयो । रासस

दाङ, जेठ १७ । गढवा गाउँपालिका ८ का वडाध्यक्ष सद्धाम सिद्दीकी खानेपानीका लागि दैनिक साँझ बिहान भारतीय भूमिमा पुग्छन् । उनीमात्र होइन, यस क्षेत्रका सबै स्थानीय खानेपानीका लागि भारतीय भूमिमा पुग्नुपर्छ । खानेपानीको समस्या छ त्यसैले म आफैं भारत गएर पानी ल्याउने गरेको छु वडाध्यक्ष सिद्दीकीले भने भारतमा गएर पानी ल्याउनुपर्दा अप्ठ्यारो लाग्ने गरेको छ । कोइलावासका स्थानीयलाई खानेपानीका लागि हिउँदको समयमा भारतको भर पर्नुपर्ने बाध्यता छ । अहिले कोइलावासमा रहेका कुवा तथा खोलासमेत सुकेको कोइलावास भन्सारका प्रमुख ओमप्रकाश केसीले बताए । खबर आजको कारोबार दैनिकमा छ ।

रुकुम, जेठ १७ । मुसिकोट शहीद मैदानमा मंगलबार बिहान फेला परेको एक महिलाको शवको परीक्षण गर्दा शारीरिक सम्पर्क गर्ने क्रममा ज्यान गएको प्रहरीले जनाएको छ । रुकुम पूर्वको सिस्ने गाउँपालिका वडा नम्बर–६, घर भएकी ३८ वर्षीया एक महिलाको यौन सम्पर्क गर्ने क्रममा ज्यान गएको जिल्ला प्रहरी कार्यालय रुकुम पश्चिमले बताएको हो । प्रहरीले हत्याको अभियोगमा मुसिकोट नगरपालिका–१, निवासी १९ वर्षीय अमरबहादुर बादीलाई पक्राउ गरेको छ । जिल्ला प्रहरी कार्यालयका प्रमुख प्रहरी नायब उपरीक्षक सुमित खड्काका अनुसार पक्राउ परेका बादीले राति आफ्नै डेरामा ल्याई शारीरिक सम्पर्क गर्ने क्रममा महिलाको ज्यान गएको र मृत्यु पश्चात शव बोकेर नजिकैको नालामा फालेको स्वीकार गरेका छन् । जिल्ला प्रहरी कार्यालयका प्रहरी निरीक्षक ऋषिकुमार ढुँगानाको नेतृत्वमा गएको प्रहरी टोलीले अनुसन्धानपछि अमरबहादुर बादीलाई पक्राउ गरेको थियो । उनलार्ई कर्तव्य ज्यान अन्तर्गत मुद्धा चलाइएको प्रहरीले जनाएको छ । नेपाल समाचारपत्रमा खबर छ ।

काठमाडौं, जेठ १६ । राष्ट्रपति विद्यादेवी भण्डारीसँग दक्षिण एशिया तथा दक्षिण पूर्वी एशियाका सात सदस्य राष्ट्रको संगठन ९बिम्स्टेक० का महासचिव सहिदुल इस्लामले आज शिष्टाचार भेट गर्नुभयो । राष्ट्रपति भवन शीतल निवासमा भएको उक्त भेटवार्तामा बिम्स्टेक प्रक्रियालाई प्रभावकारी बनाई सदस्य राष्ट्रबीच क्षेत्रीय सहयोग अभिवृद्धि गर्ने विषयमा कुराकानी भएको राष्ट्रपति कार्यालयका प्रवक्ता छविन्द्र पराजुलीले जानकारी दिनुभयो । उक्त भेटमा नेपाल सरकारका उच्चपदस्थ अधिकारीको उपस्थिति रहेको थियो ।

गुल्मी, जेठ १६ । कतिपयले महिला अधिकारको दुरुपयोग गर्दै आफैले आफूलाई विचलित पार्दै गएका छन् । गुल्मीकी एक महिलाले अघिल्लो महिना आफू श्रीमानको ज्यादती सहन नसकेको भन्दै जिल्ला अदालत गुल्मीबाट सम्वन्ध विच्छेद गरेकी थिइन । फेरि अहिले एक महिना नपुग्दै उनै महिलाले श्रीमान संग पुनः नाता कायम गरी पाउँ भनि फिराद जाहेरी दिएको जिल्ला अदालतका श्रेस्तेदार दुर्गाप्रसाद वस्यालले जानकाकारी दिए । ‘उनका वालवालिकामा नकरात्मक असर नपरोस भनि उनिहरु श्रीमान श्रीमतिको नाम गोप्य राखिएको छ,– श्रेस्तेदार बस्यालले भने–‘ प्रवेशिका परिक्षा दिएका एक छोरा सहित उनि दुई सन्तानकी आमा हुन ।’ हामीले र उनका श्रीमानसहितका परिवारले सम्वन्ध विच्देद नगर भनेर निकै सम्झाईयो तर पनि उनले उति वेला मानिन , अहिले एक महिना नपुग्दै पुनः उसै श्रीमान संग नाता कायम गरी पाउँ भनि फिराद दिएकी छन्’– बस्यालले भने । बैशाख ७ गते उनिहरु विच मेलमिलापमा सम्वन्ध विच्छेद भएको थियो भने जेठ ११ गतेका दिन फेरि उनै महिलाले नाता कायम गरी पाउँ भनि फिराद दिएको त्यस अदालत प्रशासन तथा रजिष्टेशन शाखा प्रमुख ना।सु। सिता घिमिरेले जानकारी दिईन । घर परिवारको सहमति विना केहि वर्ष देखि अर्को जिल्लामा वसेर एक व्यापार–व्यवसाय समूहमा वसेको बताउँने उनले त्यहाँबाट फर्केपछि आफू श्रीमानसंग सम्वन्ध विच्छेद गरी स्वतन्त्र रुपमा उक्त ब्यवसाय चलाउने भन्दै एक पैसा नलिई सम्वन्ध विच्छेद गर्छु भनेर मुद्धा दायर गरेकी थिईन । उनी ३५ वर्षीया शिक्षित महिला हुन । श्रेस्तेदार बस्याल भन्छन् अंश नलिई सम्वन्ध विच्छेद गरिदैन भनेर हामीले अर्को मुद्धा लेख्न लगायौं, उनका श्रीमानले सम्वन्ध विच्छेद नगर , हिड घर जाउँ भनेर धेरै पटक कर गरे । छोराहरु रोएर आमा त्यसो नगर्नुस भनेर हात जोडे । फोनमा हामीले उनकी आमालाई समेत सम्झाउन लगाऔं । तर कसैको केहि सिप लागेन अन्ततः विना पैसा सम्वन्ध विच्छेद गरेकी हुन् । सम्वन्ध विच्छेद नगर्न सम्झाउनेहरु मध्येकी एक अधिकारकर्मीले भनिन्–‘ महिलालाई अधिकार अलि बढि नै भएको हो कि भन्ने महशुस पनि गरेका छौं । आफू खुशी अन्यत्रै गएर आत्मानिर्भर पनि हुन पाउनु पर्छ भन्ने र फेरि उता तालमेल निमिलेपछि उहि श्रीमानसंग नाता कायम गरी पाउँ भन्नु महिलालाई प्राप्त अधिकार आफु खुशी प्रयोग गर्न खोज्नु हो ।’ सम्वन्ध विच्छेद गरेको केहि दिनपछि वकिल र अदालतले आफुलाई झुक्काएर सम्वन्ध विच्छेद गराएको आरोप लगाउँदै आफु विक्षिप्त भएर न्याय खोज्न आएको अधिकारकर्मी ती महिलाहरुले भनेकी थिईन । अधिकारकर्मीहरुले सञ्चारकर्मीहरुलाई समेत बेलाएर उनिसंग साक्षत्कार गराएका थिए । उक्त समयमा महिलाले रुदै गलाअवरुद्ध पारेकी थिईन । श्रीमानले आफुसंग पशुतुल्य यौनहिंसा गर्ने गरेकोले आफु विक्षिप्त भएको समेत बताएकी थिईन । पछि अधिकारकर्मीसहित अदालतमा बुझ्न जाँदा अदालतले उनका लागि निकै प्रयास गर्दा पनि उनले बरु आफु जोगी भएर हिड्छु , एक पैसा नलिई सम्वन्ध विच्छेद गर्छु भनेर ढिपी नछाडेको पाईयो । ती महिला बढि महत्वकांक्षी बनेर कसैको लहडमा लागेर आवेशमा आई सम्वन्ध विच्छेद गरेको तर जव सम्वन्ध विच्छेद भयो तव उनि न यता नउताको अवस्थामा पुगेपछि फिराद दायर गरेकी जानकारहरु बताउँछन् । साझा सबालबाट

वाशिङ्गटन, ‘शराब, शबाब और कबाब’ को मस्तीलाई हिन्दी सिनेमाहरुले निकै उच्चारण गरेझै यी १८ वर्षीय मोडेलका जीन्दगीमा पनि निर्क दुखद घटना भएको छ । सानै उमेरमा प्रसिद्धी कमाएकी फ्लोरिडा निवासी अमेरिकी १८ वर्षीय मोडेल ओल्या लन्जिलको लास प्रहरीले एक जना इण्डो अमेरिकन डाक्टरको अपार्टमेन्टमा फेला पारेपछि यो समाचार विश्वभरि फैलिएको हो । डाक्टर स्वयम्ले युवतीको मृत्युका खबर प्रहरीलाईगरेका थिए । रिपोर्टका अनुसार नबल पारिख नाम गरेका ती डाक्टरले प्रहरीलाई बताए अनुसार, ढिला राती एउटा स्पोर्टस बारमा ओल्यासँग भेटघाट भएको थियो । उनीहरुले लामो समयसँग कुराकानी गर्दै रक्सी पिएका थिए । त्यसपछि दुबै डाक्टरको अपार्टमेन्टमा गएको बताइन्छ । नबलका अनुसार दुबैले लत लागेका कारण केही लागु औषधीको सेवन गरेर सुतेका थिए । बिहानपख ब्यूँझिदा भने ओल्या नाम गरेकी ती मोडेल मृत अवस्थामा देखेपछि डाक्टरले फोन गरेर प्रहरीलाई खबर गरेको बताएका छन् । प्रहरीले अपार्टमेन्टबाट कोकिनको झोला समेत बरामद गरेको छ । मोडेलको शरीर भने नग्न अवस्थामा रहेको थियो । अत्यधिक नशाका कारण मृत्यु भएको अनुमान गरिएपनि ओल्याका साथी परिवारले भने डाक्टरले जबर्जस्ती गरेको आरोप लगाएका छन् ।

बर्दिवास । मुलुकमा ११औँ गणतन्त्र दिवस उत्सव मनाइरहँदा महोत्तरी जिल्लाका उखु किसान भने आफ्नो उत्पादनको मूल्य माग्दै चिनी उद्योगको ढोकामा अझै धर्ना जारी राख्न बाध्य छन् । जिल्लाको गौशाला नगरपालिकाको रामनगरस्थित एभरेष्ट सुगर ऐण्ड केमिकल इन्डिष्ट्रिज (एभरेष्ट चिनी उद्योग) ले उखुको भुक्तानी नदिएपछि किसान आफ्नो उत्पादनको मूल्य माग गर्दै धर्नामा बस्न बाध्य भएका हुन् । उद्योगमा गत मंसिरमा उखु क्रसिङ सञ्चालन भएपछि अहिलेसम्म उखुको मूल्य नपाएकाले जेठ ६ गतेदेखि धर्ना शुरु गरेका हुन् । उत्पादनको माग्दै धर्नामा बस्नु परे पनि स्थानीय प्रशासनले कुनै वास्ता नगरेको सम्बद्ध किसानको गुनासो छ । ‘देशभरि नै आज गणतन्त्र दिवसको उत्सव मनाइँदै छ रे’ उखुको मूल्य देउ भन्दै उद्योगको ढोकमा धर्ना बसेका उखु उत्पादक कृषक संघका अध्यक्ष नरेशसिंह कुशवाहाले भन्नुभयो, “हामी किसानले भने यो राष्ट्रिय पर्वका दिन उखुको मूल्य देऊ भन्दै धर्नामा बस्नु परिरहेछ ।” उद्योगले सधैँजसो कहिले मूल्यमा र कहिले भुक्तानीमा बखेडा गर्दै आएको किसान बताउँछन् । “उखु तयार भइसकेको हुन्छ, उद्योगले कहिल्यै ठीक समयमा मूल्य निर्धारण गरिदिँदैन, मूल्य निर्धारणका लागि पनि वर्षेनी झमेला हुँदै आएको छ”, संघका सचिव जयराम भारतीले भन्नुभयो, “उखु उद्योगलाई दियो, भुक्तानीमा उही बखेडा छ, उत्पादनको मूल्य समयमा नपाए हामीले कसरी घरपरिवार धान्ने ?” मूल्य निर्धारणदेखि भुक्तानीसम्म निकै भुक्तमान खेप्नु परेको सम्बद्ध किसानले बताए । “हाम्रो उत्पादन (उखु) जति गुलियो छ, पीडा चाहिँ ठीक उल्टो त्यति नै तितो छ” भारतीले लामो श्वास लिँदै भन्नुभयो, “खेती गर्ने बेलादेखि उखु खरिद केन्द्र र उद्योगको ढोकासम्म उखु आपूर्तिका लागि पूर्जी लिनसमेत आन्दोलन नगरी सुनुवाइ गरिँदैन ।” आफ्नो उत्पादनको सुपथ मूल्य नपाउँदा पारिवारिक आवश्यकता पूरा गर्न आपूmहरु ऋणमा डुबेको किसानहरू बताउँछन् । “हामीले आफ्नो उत्पादनको सुपथ मूल्य माग्दै आन्दोलन गर्नु पर्ने ?” उखु किसान रामपरी देवीले स्थानीय प्रशासन र उद्योग प्रशासनको हेलचेक्रयार्इंप्रति जङ्गिँदै भन्नुभयो, “अब त मूल्य पाउन पनि वार्ता चाहियो रे !” पछिल्लो पटक किसानको धर्ना आन्दोलन १० दिन पुगेपछि उद्योगका वाणिज्य प्रबन्धक रामचरण कापरले वार्तामा आउन भन्दै पत्र दिएको बारे रामपरी देवीले भन्नुभयो, “हामीले दिएको उखुको पैसा मागेको त हो नि ! थपक्क पैसा दिनु क्या, अब केको वार्ताको नाटक नि !” उद्योगका वाणिज्य प्रबन्धकले वार्ताको पत्र दिएको संघका अध्यक्ष कुशवाहाले पनि पुष्टि गर्नुभयो तर किसानको भुक्तानीका लागि अब वार्ताको जरुरी नभएकाले आपूmहरु धर्ना नछाड्ने कुशवाहाको भनाइ थियो । स्थानीय प्रशासनदेखि प्रदेश सरकारसम्मलाई भुक्तानी दिलाउन पहल गरिदिन पटक पटक आग्रह गर्दासमेत कहीँ कतैबाट वास्ता नपाइएको आम उखु किसानले गुनासो गरेका थिए । प्रमुख जिल्ला अधिकारी बाबुराम श्रेष्ठले भने किसानले पहिलेदेखि नै आपूmले भुक्तानीका लागि उद्योग प्रशासन र किसानबीच निरन्तर समन्वय गरिरहेको बताउनुभयो । “मैले उद्योग प्रशासन र किसान प्रतिनिधिबीच भुक्तानी प्रक्रिया सहज बनाउन प्रत्यक्ष पहल गर्दै आएको छु, दुवै पक्षसँग ताजा सम्पर्कमा छु” प्रजिअ श्रेष्ठले भन्नुभयो, “खासगरी उद्योग प्रशासनलाई तत्काल किसानको माग सम्बोधन गर्न अहिले भर्खरै पनि भनेको छु ।” यसैगरी आफ्नो उत्पादन बजार गएर भुक्तानी पाउन थालेपछि किसानको भुक्तानीसँगसँगै दिइँदै आइएको उद्योग प्रशासनले जनाएको छ । यसपालि पनि किसानको भुक्तानीका लागि तालिका नै बनाएर किस्तामा भुक्तानी गरिँदै आइएको वाणिज्य प्रबन्धक कापरले बताउनुभयो । “किसानले आफ्ना समस्या बताउनुभएको छ” कापरले भन्नुभयो, “उद्योग किसानका मागप्रति गम्भीर छ, हामी बसेर कुराकानी गरौँ भनेर प्रस्ताव गरेका छौँ, तत्काल समस्या सल्टाउँछौँ ।” महोत्तरी, धनुषा, सर्लाही र रौतहटका गरी २५ हजारभन्दा बढी उखु किसानले दिएका उखुको रु एक अर्ब ७८ करोड ९९ लाख ७२ हजार ६५७ भुक्तानी दिन बाँकी छ । यसपालिको जम्मा रु दुई अर्ब २२ करोड भुक्तानी पाउनु पर्नेमा रु ४४ करोडमात्रै भुक्तानी पाइएको अध्यक्ष कुशवाहाले बताउनुभयो । समयमा मूल्य नतोकिनु, भुक्तानीमा हैरानी हुन थालेपछि यस क्षेत्रमा प्रमुख बालीका रुपमा रहेको उखुखेती विगतको वर्षभन्दा झण्डै ५० प्रतिशतले घटेको अध्ययनले देखाएको छ । रासस

रुपन्देही । गणतन्त्र दिवसका अवसरमा आज जिल्लामा पाँच कैदीको कैद मिनाहा भएको छ । उनीहरुले पाँच महिना सात दिनदेखि छ वर्ष नौ महिना एक दिनसम्म कारागारमा कैद भोगेको जिल्ला कारागार कार्यालयले जनाएको छ । कैद मिनाहा भएकामा कर्तव्य ज्यान मुद्दाका बुटवल उपमहानगरपालिका–१३ का रामु राना (छ वर्ष नौ महिना एक दिन), कर्तव्य ज्यान मुद्दाका रुपन्देही, मैनहियाका गोविन्दप्रसाद उपाध्याय (एकवर्ष दुई महिना २५ दिन), मायादेवी गाउँपालिका–७ का खुन तथा डाँका मुद्दाका सन्तकुमार यादव (पाँच महिना सात दिन), सैनामैना नगरपालिका १० का सवारी ज्यान मुद्दाका मनोज कुँवर (एक वर्ष दुई महिना १३ दिन) र कपिलवस्तुको डाँका मुद्दाका लक्ष्मण यादव भनिने लक्ष्मिन अहिर (तीन वर्ष सात महिना १४ दिन) छन् । कैदमा बस्दा उनीहरुको चालचलन र व्यवहारको मूल्याङ्कन गरेर कारागार प्रशासनको सिफारिसका आधारमा कैदीको कैद मिनाहा भएको जिल्ला कारागार रुपन्देहीका जेलर प्रेमबहादुर रोकाले भन्नुभयो । उहाँले भ्रष्टाचार, जबर्जस्ती करणी र मानव बेचबिखन मुद्दाका बारेमा त्यस्तो सिफारिस नहुने बताउनुभयो । रासस

बिर्तामोड । झापाको बिर्तामोडस्थित वीरता जेसीजले ११औं गणतन्त्र दिवसको अवसर पारी आज मंगलबार आर्थिक अभाव झेलिरहेका फोक्सो रोग, मृगौला रोग र दुर्घटनाबाट घाइते तीन बिरामीलाई आर्थिक सहयोग प्रदान गरेको छ । वीरता जेसीजको सचिवालयमा आयोजित समारोहकाबीच अध्यक्ष एकराज गिरी, कार्यक्रम संयोजक वीरता जेसीजका सदस्य एजाज अहमद अन्सारीले तीन जना विरामीलाई आर्थिक सहयोग प्रदान गरेका हुन् । वीरता जेसीजको तर्फबाट बाह्रदशी गाउँपालिका–२ का ६१ वर्षीय फोक्सो रोगबाट पीडित महम्मद हाकिम मियालाई २० हजार रुपैयाँ उपचार खर्च सहयोग प्रदान गरिएको हो । आर्थिक अवस्था अत्यन्त न्यून भएका उनी तत्कालीन राजगढ गाविसका निर्वाचित जनप्रतिनिधि समेत हुन् । उनी ०४५ सालमा जनप्रतिनिधि थिए । त्यस्तै दुबै मृगौला खरब भई हाल कोसी अञ्चल अस्पतालमा उपचाररत् बिर्तामोड–३ का २३ वर्षीय कमल भट्टराईलाई पाँच हजार रुपैयाँ सहयोग प्रदान गरिएको छ । द्वन्द्वकालमा बुबा बेपत्ता भएका भट्टराईको मृगौला प्रत्यारोपणका लागि समिति नै गठन गरी आर्थिक संकलन भइरहेको छ । भट्टराईको उपचारका लागि गठित समितिको सदस्यमा वीरता जेसीज समेत रहेको छ । भट्टराईकी माता कमला भट्टराईलाई उक्त रकम हस्तान्तरण गरिएको थियो । त्यस्तै दुर्घटनबाट घाइते बिर्तामोड–१ निवासी ३२ वर्षीय जफिर आलमलाई पाँच हजार रुपैयाँ सहयोग प्रदान गरिएको छ । गत माघ ४ गते दुर्घटनामा घाइते उनको उपचारमा नौ लाख बढी खर्च भइसकेको छ । कवाडीका सामान संकलन गर्ने मजदुरीबाट परिवारको गुजारा चलाउँदै आएका उनको उपचार बीएण्डसी हस्पिटल बिर्तामोड भइरहेको छ । कार्यक्रम संयोजक एजाज अहमद अन्सारीको अगुवाईमा रकम जुटाएर तीन जना विरामीलाई वीरता जेसीजको तर्फबाट आर्थिक सहयोग प्रदान गरिएको हो । कार्यक्रममा बोल्दै वीरता लेडी जेसीजकी पूर्व अध्यक्ष तथा वीरता जेसीज सन् २०१८ कि अध्यक्ष सल्लाहकार राधा सुब्बाले जेसीजले मानवताको सेवामा अनुकरणीय काम गरेको भन्दै अरु संस्था र दाताले पनि जेसीजले जस्तै उपचारका लागि आर्थिक अभाव भोगिरहेका विरामीलाई सहयोग गर्नुपर्ने बताइन् । अध्यक्ष गिरीको अध्यक्षतामा भएको सहयोग हस्तान्तरण कार्यक्रममा कार्यक्रम संयोजक अन्सारीले गणतन्त्र दिवस र रमदानको अवसर पारी पवित्र कर्म स्वरुप कार्यक्रम गरिएको बताए । ‘मानवताको सेवा नै जीवनको सर्वोत्तम कार्य हो’ भन्ने जेसीज आस्थालाई आत्मसाथ गरी वीरता जेसीजले आयोजना गरेको उक्त कार्यक्रमको सञ्चालन महासचिव कमलप्रसाद पाण्डे विनोदले गरेका थिए ।

कञ्चनपुर, जेठ १५ । भारतको पिलिभित जिल्ला बजार घाटमा एक नेपाली युवतीको चट्याङ लागेर मृत्यु भएको छ । आज बिहान भारतको बजारघाटमा तरकारी बेचेर घर फर्कने क्रममा चट्याङ लागेर बेलौरी नगरपालिका ७ पौलाहाकी ४० वर्षिया सुकुनी चौधरीको मृत्यु भएको घटना स्थल पुगेका नेपाली कांग्रेशका नेता हरेन्द्र सिंह बिष्टले बताए । मृतकको शव पोष्टमार्टम पिलिभितकै एक अस्पतालमा गरिने भएको छ । त्यसका लागि भारतीय प्रहरीसँगसमेत समन्वय गरिएको इलाका प्रहरी कार्यालय बेलौरीका प्रहरी निरीक्षक कृष्णानन्द भट्टले बताए । घरमै उत्पादन गरेको विषादी रहित तरकारीको राम्रो मूल्य पाउने गरेकोले तरकारी बेच्न यसक्षेत्रका थुप्रै कृषकहरु सीमावर्ती भारतीय बजारमा जाने गरेका छन् ।

काठमाडौं, जेठ १४ । सर्च इञ्जिन गुगलले नेपालको गणतन्त्र दिवस र सगरमाथा दिवस (एभरेष्ट डे) को अवसरमा विशेष डुडल सार्वजनिक गरेको छ । गुगलले बनाएको डुडलमा हिमालको चित्रलाई बीचमा राखेर ध्वजापतका फहराइएको छ । गुगलले विशेष दिन र अवसरहरुमा यस्ता डुडल सार्वजनिक गरेर ती दिनलाई महत्व दिने गरेको छ । मे २९ तारिखमा तेन्जिङ नार्गे शेर्पा र एडमन्ड हिलारीले सगरमाथामा पहिलो पटक पाइला राखेका थिए ।