कैलाली । कैलालीमा सहकारीहरुलाई स्थानीय तह, प्रदेश तथा संघलाई हस्तान्तरण गर्ने कार्य अन्तिम चरणमा पुगेको छ । जिल्लामा रहेका ५ सय ५२ सहकारीहरुलाई स्थानीय तह, प्रदेश तथा संघमा हस्तान्तरण गर्ने कार्य अन्तिम चरणमा पुगेको हो । मुलुक संघीय संरचनामा गएसंगै सहकारी पनि प्रदेश र स्थानीय तहमा सामायोजन हुन लागेका छन् । बढी क्षेत्रमा कारोबार गर्ने सहकारी प्रदेश र सीमित ठाउ“मा कारोबार गर्ने सहकारी स्थानीय तहमा हस्तान्तरण हुन लागेका हुन् । जिल्लामा स्थानीय तह तथा प्रदेशलाई एक हप्ता भित्र सहकारी हस्तान्तरण गर्ने तयारी गरिएको छ । कार्य क्षेत्र अनुसार कैलालीमा पनि प्रदेश र स्थानीय तहमा सहकारीहरु हस्तान्तरणको पक्रिया सुरु भएको हो । सहकारी हस्तान्तरणको काम पूरा भएपछि स्थानीय तह, प्रदेश र संघले आ–आफ्नै ढंगले दर्ता, अनुगमन र नियमनको काम गर्नेछन् । कैलालीमा रहेका ४ सय ५६ सहकारी स्थानीय तह र ९६ वटा सहकारी प्रदेशमा समायोजन गर्ने तयारी भइरहेको छ । सहकारी हस्तान्तरण गर्ने कार्य एक हप्ताभित्र सुरु हुने सहकारी पशिक्षण तथा डिभिजन कार्यालय धनगढी सहकारी प्रशिक्षक सुरेशप्रसाद जैशीले बताए । विधानअनुसार सहकारीको क्षेत्राधिकार तीनवटै तहका लागि तोकिएको छ । मुलुकभर काम गर्ने सहकारीहरू र सहकारीसंग सम्बन्धित बृहत् नीति नियमको अधिकार संघलाई छ । दुई वा दुईभन्दा बढी स्थानीय तहलाई कार्यक्षेत्र बनाएका सहकारीहरूको क्षेत्राधिकार प्रदेशभित्र पर्छन् भने एक स्थानीय तहलाई मात्रै कार्यक्षेत्र बनाएका सहकारीहरू स्थानीय तहभित्र पर्छन् । हाल कुन कुन सहकारी कुन तहमा पर्ने भन्ने विषयमा अभिलेख गर्ने काम भइरहेको सहकारी डिभिजनले जनाएको छ । सहकारी स्थानीय तह, प्रदेश र संघलाई हस्तान्तरण गर्ने भनिएपछि चालू आर्थिक वर्षमा कैलालीमा नया“ सहकारी दर्ता काम भएको छैन । स्थानीय तह, प्रदेश तथा संघले सहकारी दर्ता गर्ने भने पनि अहिलेसम्म त्यो पक्रिया अगाडी नबढ्दा उपभोक्ताले भने समस्या खेप्नुपरेको सहकारी प्रशिक्षक जैशीको भनाई छ । सहकारी हस्तान्तरण गर्नु पूर्व स्थानीय सहकारीबारे आधारभूत जानकारी दिन सम्बन्धित स्थानीय तहको प्रमुख र उपप्रमुखलाई अनुशिक्षणसमेत दिने सकारी डिभिजनले जनाएको छ । कैलालीमा अहिलेसम्म ४० सहकारी खारेज भएका छन् भने ४० सहकारी निष्क्रीय छन् ।

चितवन । बाघ, एशियाली गैँडा र हात्तीको चिकित्सा विज्ञानसम्बन्धी क्षेत्रीय कार्यशाला गोष्ठी नौबुँदे सौराहा घोषणापत्र जारी गर्दै सकिएको छ । कृषि तथा वन विज्ञान विश्वविद्यालय, राष्ट्रिय निकुञ्ज तथा वन्यजन्तु संरक्षण विभाग, राष्ट्रिय प्रकृति संरक्षण कोष तथा कृषि विश्वविद्यालयको पशु विज्ञान, पशु चिकित्सा र मत्स्य विज्ञान संकायको संयुक्त आयोजनामा यही माघ २२ गतेदेखि अन्तर्राष्ट्रिय विज्ञको सहभागितामा कार्यशाला शुरु भएको थियो । विभिन्न १३ देशका विज्ञ सहभागी कार्यशालाले वन्यजन्तुको स्वास्थ्य व्यवस्थापन रणनीति र त्यसको कार्यान्वयनका लागि संयन्त्र तयार पार्न सम्बन्धित निकायमा पहल गर्ने निष्कर्षसहित नौबुँदे सौराहा घोषणापत्र जारी गरेको छ । कार्यशालाले वन्यजन्तुको स्वास्थ्य व्यवस्थापनसम्बन्धी विषयलाई विश्वविद्यालयको पाठ्यक्रममा समावेश गरी जनशक्ति तयार पार्न पहल गर्ने, बिरामी वन्यजन्तुको हेरचाह, रोगको पहिचान र निदानका लागि चितवन निकुञ्जमा सुविधायुक्त वन्यजन्तु अस्पताल बनाउने, युवापुस्तालाई वन्यजन्तुको संरक्षण र स्वास्थ्यको व्यवस्थापनमा आकर्षित गराउन पहल गर्ने निष्कर्ष निकालेको छ । यस्तै अन्तर्राष्ट्रिय क्षेत्रसँगको समन्वय र साझेदारीमा वन्यजन्तुको विषयमा सञ्जाल निर्माण गरी काम गर्ने, कृषि तथा वन विज्ञान विश्वविद्यालय, पशु विज्ञान, पशु चिकित्सा र मत्स्य विज्ञान संकायअन्तर्गत छुट्टै वन्यजन्तु स्वास्थ्य व्यवस्थापन विभाग गठन गरी रोग निदान संरचना खडा गर्ने, देश विदेशमा वन्यजन्तुको क्षेत्रमा काम गर्ने अधिकारीलाई अध्ययन भ्रमण तथा तालीमको अवसर दिलाउने कार्यशालाको निष्कर्ष छ । वन्यजन्तुको क्षेत्रमा कार्य गर्ने निकायबीच र राष्ट्रिय प्रयोगशालाबीचमा समन्वय स्थापना गर्ने, राष्ट्रिय निकुञ्ज र वन्यजन्तु संरक्षण विभागअन्तर्गत विभिन्न क्षेत्रमा पशु चिकित्सक र पाराभेटेरिनरीयनको दरबन्दी सिर्जना गर्ने तथा अध्ययन अनुसन्धानका लागि वन्यजन्तुको कुनै पनि भौतिक नमूना संकलन र संरक्षण गर्ने पनि कार्यशालाको निष्कर्ष रहेको राष्ट्रिय प्रकृति संरक्षण कोष सौराहाका अनुसन्धान अधिकृत बाबुराम लामिछानेले जानकारी दिनुभयो । उहाँले कार्यशालामा हात्तीसम्बन्धी कार्यपत्र प्रस्तुत गर्नुभएको थियो । सो कर्याशालामा १३ देशका ८७ जना विज्ञको सहभागिता थियो । उक्त गोष्ठीमा नेपालसहित पाकिस्तान, भारत, इण्डोनेशिया, चीन, अष्टे«लिया, म्यानमार, अमेरिका, मंगोलिया, रसिया, थाइल्याण्ड, बेलायत, भियतनामका विज्ञको सहभागिता रहेको थियो । माघ २२ र २३ गते कार्यशाला गोष्ठी सम्पन्न भएको र आज भने चितवनमा विज्ञको ल्याब तथा वन्यजन्तुको विषयमा अध्ययन भ्रमणको कार्यक्रम रहेको छ । मुख्यगरी कार्यशालामा १३ देशमा वन्यजन्तुको स्वास्थ्य तथा व्यवस्थापनको क्षेत्रमा भए गरेका कार्यप्रगति, नयाँ रोग, प्रविधिका बारेमा समिति भएको र अनुभव आदानप्रदान भएको चितवन निकुञ्जका वरिष्ठ पशु चिकित्सक डा कमल गैरेले जानकारी दिनुभयो । उहाँले गैँडा स्थानान्तरणका विषयमा कार्यपत्र प्रस्तुत गर्नुभएको थियो । कार्यशालामा प्रस्तुत भएको ३३ वटा कार्यपत्रमाथि यहाँ छलफल भएको थियो । उहाँका अनुसार नेपालमा अन्य देशको भन्दा संरक्षणको पाटो प्रभावकारी रहेको र साधन स्रोत तथा प्रविधिको अभाव रहेको पाइएको छ । वन्यजन्तुको क्षेत्रमा सरकारले औषधि, जनशक्ति, रोगको पहिचानका लागि अस्पताल र अनुसन्धानको क्षेत्रमा ध्यन दिनुपर्ने देखिएको चितवनका सिनियर भेटेनरी अधिकृत दयाराम चापागाईले बताउनुभयो ।

काठमाडौं । राष्ट्रियसभा सदस्य निर्वाचनको मतपरिणाम आज सार्वजनिक गर्ने तयारी गरेको निर्वाचन आयोगले जनाएको छ । आयुक्त इश्वरीप्रसाद पौडेलले राष्ट्रिय सभा निर्वाचन सकिएलगत्तै आजै मतगणना प्रारम्भ गरी भोलिसम्ममा सबै परिणाम घोषणा गरिसकिने बताएका छन् । प्रदेश नम्बर तीनको मतदान स्थलमा पुग्नुभएका आयुक्त पौडेलले इमेज समाचारसँग कुरा गर्दै केही प्रदेशको आजै साँझ र बाँकीको भोलिसम्ममा परिणाम आउने बताए । राष्ट्रियसभाको परिणाम आउने वित्तिकै प्रतिनिधिसभामा समानुपातिकतर्फको नामहरु तीन दिनभित्र आयोगमा पठाउन भोलि नै पत्राचार गरिने उनले बताए । उनले आयोगले ढिलोमा फागुन ५ गतेभित्र अन्तिम निर्वाचन परिणाम राष्ट्रपतिलाई बुझाउने तयारी भइरहेको जानकारी पनि दिए । आयोगले अन्तिम मतपरिणामको प्रतिवेदन बुझाएलगत्तै नयाँ सरकार गठनको प्रक्रिया सुरु हुनेछ ।

विराटनगर । उदयपुर जिल्लाका दुई स्थानमा आगलागी हुँदा रु १५ लाखभन्दा बढीको क्षति भएको छ । प्रदेश नं १ प्रहरी कार्यालय विराटनगरका अनुसार त्रियुगा नगरपालिका–११ पुरानो सब्जी बजारस्थित भक्तबहादुर दनुवारको घरमा मंगलबार राति ८ बजे अचानक विद्युत् चुहावट भई भएको आगलागीमा ढुङ्गामाटोले बनेको दुईतले घर पूर्णरुपमा जलेको छ । आगो प्रहरी र स्थानीय जनताको सहयोगमा नियन्त्रणमा लिइएको तथा क्षतिको विवरण संकलन हुन बाँकी रहेको जिल्ला प्रहरी कार्यालय उदयपुरले जनाएको छ । यसैगरी, चौदण्डिगडी नगरपालिका–४, बसाहास्थित चन्द्रकला राईको घरमा मंगलबार राति १० बजे टुकी बत्तीबाट अचानक आगलागी हुँदा काठले बनेको घर, फर्निचर, लत्ताकपडा र भाँडावर्तन जलेका नष्ट भएको छ । आगलागीबाट राईको करिब रु १५ लाखभन्दा बढीको धनमाल क्षति भएको बताइएको छ । उक्त आगो स्थानीय जनता, प्रहरी र बारुणयन्त्रको सहयोगमा नियन्त्रण लिइएको प्रहरीले जनाएको छ ।

कपिलवस्तु । सीमा नाका कृष्णनगरबाट यहाँ एक चेलीको उद्धार गरिएको छ । मानव बेचबिखनविरुद्ध क्रियाशील संस्था केआई नेपालले सीमा निगरानी गर्ने क्रममा मंगलबार पुनः कपिलवस्तुकी एक किशोरीको उद्धार गरेको हो । यहाँको बुद्धभूमि नगरपालिका बस्ने १९ वर्षीया एक किशोरी भारतको बलरामपुर जाँदैगर्दा सीमा नाका कृष्णनगरबाट उद्धार गरिएको जिल्ला संयोजक केशर विश्वकर्माले जानकारी दिनुभयो । विश्वकर्माका अनुसार निज चेली घरमा कुनै जानकारी नदिई भारतको बलरामपुर जाँदैगर्दा सीमाबाट उद्धार गरिएको हो । उद्धारपश्चात् आवश्यक सोधपुछ गर्दा बाबाले सधैँ मदिरा सेवन गरेर कुटपिट गर्ने र घरमा आर्थिक अवस्थासमेत कमजोर रहेका कारण भारततिर जान लागेको निज चेलीले बताएको विश्वकर्माले बताउनुभयो । भारत जाँदा आउन सक्ने जोखिमलाई हेरी निजका अभिभावक बोलाई आवश्यक प्रक्रिया पु¥याई निज चेलीलाई आत्मनिर्भर बनाउने उद्देश्यले केआई नेपालको सुरक्षित आवासगृह चितवनमा विभिन्न सीप सिकाउनका लागि रिफर गरिएको विश्वकर्माले जानकारी दिनुभयो । विश्वकर्माका अनुसार जोखिममा रहेका चेलीलाई सीप उपलब्ध गराई व्यवसायमा समेत सहयोग गर्ने हुँदा धेरै चेलीको जीवनमा सकारात्मक परिवर्तन आएको देख्दा गर्व महसुश हुने बताउनुभयो । करिब एक महिनाको अवधिमा चारजना चेलीको विभिन्न जोखिमबाट उद्धार गरी केआई नेपालको सुरक्षित आवासगृहमा पठाइएको संयोजक विश्वकर्माले जानकारी दिनुभयो ।

रोल्पा । जिल्ला ट्राफिक कार्यालय रोल्पाका अनुसार पछिल्ला दिनमा रोल्पामा सडक दुर्घटना न्यूनीकरण हुँदै गएको छ । गतका वर्षमा भन्दा हाल जिल्लामा धेरै सवारी साधन सञ्चालनमा रहे पनि सडक दुर्घटनामा भने कमी आएको जिल्ला ट्राफिक कार्यालय रोल्पाका निमित्त प्रमुख प्रहरी हवल्दार शेरबहादुर थापाले जानकारी दिनुभयो । उहाँका अनुसार कार्यालयले समय समयमा जिल्लाका विभिन्न स्थानमा सचेतनामूलक कार्यक्रम सञ्चालन गर्दै आएपछि दुर्घटना न्यूनीकरण हुन थालेको हो । सडक दुर्घटना न्यूनीकरणका लागि जिल्ला ट्राफिक कार्यालयले यातायात व्यवसायी, बजार व्यवस्थापन समिति, जिल्लाका विभिन्न विद्यालय तथा अन्य सरोकारवाला निकायबीच छलफल तथा अन्तरक्रिया कार्यक्रम सञ्चालन गर्दै आएको छ । बजार क्षेत्रभित्र जथाभावी अव्यवस्थित रुपमा पार्किङमा राखिएका सवारी साधन व्यवस्थित रुपमा पार्किङ गर्नका लागि निर्देशन दिँदै आएको पनि थापाले जानकारी दिनुभयो । तर अव्यवस्थित पार्किङ भने पूर्ण रुपमा व्यवस्थित हुन नसकेको उहाँको गुनासो छ । यसरी सडक बाटोमै सवारी साधन पार्किङ गर्दा सडक दुर्घटना हुनसक्ने भएको हुँदा यसतर्फ सबैको ध्यानाकर्षण हुनुपर्नेमा उहाँको जोड छ । यस्तै, सवारी दुर्घटना न्यूनीकरण गर्ने उद्देश्यले रोल्पाको माडिचौरदेखि ल्वामपूजासम्म यसै वर्ष मात्र २३ वटा सचेतनामूलक होडिङ बोर्ड राखिएको छ । ट्राफिक नियमका बारेमा नजानेका तर साक्षर व्यक्तिलाई होडिङ बोर्डले केही सचेत बनाउने पैदल यात्रु प्रकाश मगरले बताउनुभयो । यसका साथै जिल्लाका विभिन्न विद्यालयमा ट्राफिक कार्यालयले विभिन्न सचेतनामूलक कार्यक्रम सञ्चालन गर्नाका साथै ट्राफिक नियमसम्बन्धी विभिन्न किसिमका पर्चा–पम्प्लेटहरु वितरण गर्दै आएको छ । विद्यालयमा सञ्चालन भएका यस किसिमका कार्यक्रमले विद्यार्थीलाई सडक बाटोमा कसरी हिँड्ने, गाडी चलिरहेका बेला कसरी बाटो काट्ने तथा बाटोमा हिँड्दा सडकको कुन दिशाबाट हिँड्ने भन्ने बारेमा जानकारी भएको होलिभिजन आवासीय माध्यमिक विद्यालय लिबाङ रोल्पामा अध्ययनरत छात्र अर्चितबाबु मर्सिफुलले बताउनुभयो । यसैगरी गतः वर्षदेखि जिल्लामा सञ्चालनमा आएका अटो व्यवसायी तथा यातायात प्रतिनिधिका बीच सवारी साधन तीव्रगतिमा नचलाउन, सिटको क्षमताभन्दा बढी यात्रु नबोक्न, तथा तोकिएको निश्चित रुटभन्दा बाहिर अटो रिक्सा सञ्चालन नगर्नका लागि जानकारी दिने उद्देश्यले ट्राफिक कार्यालयले अन्तरक्रिया कार्यक्रम सम्पन्न गरेको अटो व्यवसायीले बताएका छन् । यस्तै, ट्र्याक्टरको पछाडि ट्रलीमा ब्रेक लाइट नहुने हुँदा दुर्घटना हुन सक्ने भन्दै जिल्लाका करिब ४७ वटा ट्र्याक्टरमा स्टिकर टाँसिएको छ । यसरी ट्र्याक्टरमा पछाडि स्टिकर टाँसिएमा अन्य सवारी चालकलाई यात्राका क्रममा सहज हुने ट्र्याक्टर व्यवसायीले बताए । सवारी दुर्घटनाका लागि जिल्ला ट्राफिक कार्यालय रोल्पाले सार्वजनिक भाडाका सवारी साधनमा ‘एक मिनेट कार्यक्रम’ सञ्चालन गरी सवारी चालक, परिचालक तथा यात्रुका बीचमा दुर्घटना न्यूनीकरणका लागि सचेतनामूलक छलफल कार्यक्रम सञ्चालन गर्दै आएको छ भने दिनहँु सवारी चालकले मापसे गरे÷नगरेको चेकजाँचसमेत गर्दै आएको छ । यसरी दिनहँुजसो चेकजाँच तथा ट्राफिक नियमका बारेमा जानकारी गराइरहँदा चालक तथा सहचालकलाई मात्र नभई यात्रुलाई पनि विभिन्न कुरामा जानकारी हुने यात्रु नर्मदा गौतमले बताउनुभयो । जिल्ला ट्राफिक कार्यालय रोल्पाका प्रहरी जवान दिवाकर वलीका अनुसार आर्थिक वर्ष २०७१÷७२ मा जिल्लामा सञ्चालनमा रहेका बस, जिप, ट्रक, कार, भ्यान, मोटरसाइकल र ट्र्याक्टर गरी १९ वटा सवारी साधन दुर्घटनाग्रस्त हुँदा ६ जनाको मृत्यु, १६ जना घाइते भएका थिए भने २५ जना सामान्य घाइते भएका थिए । यस्तै २०७२÷७३ को तथ्यांकअनुसार २० वटा सवारी साधन दुर्घटनामा परी सातको मृत्यु, १२ जना घाइते भए भने २२ जना सामान्य घाइते भएका थिए । यसैगरी, २०७३÷७४ मा ३६ वटा सवारी साधन दुर्घटना ग्रस्त भएकामा पाँचको मृत्यु, २७ जना घाइते भए भने २७ जना सामान्य घाइते भएका थिए । यसरी आव २०७४÷७५ मा आइपुग्दा सातवटा सवारी साधन दुर्घटना भएकामा हालसम्म एकजनाको मात्र मृत्यु र दुईजना घाइते भए भने अन्य १० जना भने सामान्य घाइते मात्र भएका थिए ।

इलाम, माघ २४ । हिउँद लागेसँगै खोलामा पानी घट्न थालेपछि इलाम जिल्लामा रहेका विद्युत केन्द्रहरुको उत्पादन घट्न थालेको छ । वर्षायाममा २२ मेगावाट उत्पादन गर्ने सानिमा माई हाइड्रोपावर आयोजनाले १० मेगावाट मात्र उत्पादन दिन सकेको छ । १८ मेगावाट क्षमताको अपरमाई हाइड्रोपावरका दुबै विद्युत गृहबाट ६ मेगावाट विद्युत उत्पादन भइरहेको छ । पाँच मेगावाट क्षमताको जोगमाई हाईड्रोले दुई हजार ५ सय किलोवाट विद्युत उत्पादन गरिरहेको छ । इलाम पुवाखोला आयोजनाबाट तीन दशमलव ५ मेगावाट तथा ४ मेगावाटको हिमाल दोलखाले ११ सय किलोवाट मात्र उत्पादन गर्न सकेको ती आयोजनाहरुले जानकारी दिएका छन् । सुख्खायामको शुरुसँगै खेतबारीमा सिँचाइका लागि किसानले पानी लैजान तथा पानी बहाव ने पनि कम हुने भएकाले उत्पादन घटेको आयोजना सञ्चालकहरू बताउँछन् । झण्डै पाँच महिनादेखि पानी नपर्दा खोलामा पानीको सतह पनि घट्न थालेको हिमाल दोलखा हाईड्रोपावरका आकाश चौधरीले जानकारी दिए ।

युएई, माघ २४ । दुबै मृगौलाले काम गर्न छोडेपछि उपचार अभावमा मृत्युसँग लडिरहेका काभ्रेका दुई मृगौला पीडितलाई जन प्रगतिशील मञ्च युएईले आर्थिक सहयोग गरेको छ । काभ्रे तिमाल गाउँपालिका -१ सिम भञ्ज्याङ् निवासी हिमाल तामाङ र सोही गाउँपालिका वडा न -९ चोपटारका भोज कुमार तामाङलाई मञ्च युएईले सहयोग रकम हस्तान्तरण गरेको हो । नेकपा माओवादी केन्द्रका काभ्रे जिल्ला इन्चार्ज लालध्वज तामाङ, अर्का नेता छिन्ताङ तामाङ,सांसद रत्न ढकाल तथा युवा नेता मिलन लामालगायतको उपस्थितिमा जिल्ला पार्टी कार्यालय बनेपाबाट पीडित हिमाल सिङ तामाङ लाई ४० हजार रुपैया तथा जन प्रगतिशील मञ्च युएईका प्रवक्ता अनिस तामाङ र माओवादी केन्द्रका नेता मिलन लामाको उपस्थितिमा अर्का पीडित भोज कुमार तामाङलाई काठमाडौस्थित उनकै डेरामा पुगि ४० हजार रुपैयाँ सहयोग हस्तान्तरण गरिएको मञ्च युएईले जानकारी दिएकाे छ। लामो समयदेखि मजदुर हक हितका लागि लड्दै आएको मञ्चले स्वदेश तथा विदेशमा अलपत्र परेका नेपालीहरुको उद्दारसँगै गम्भीर प्रकृतिका रोग लागि उपचार अभावमा जीवन बिताउदै आएकाहरुको लागि आर्थिक सहयोग समेत गर्दै आएको छ ।

झापा, माघ २४ । झापाको बिर्तामोड क्षेत्रमा चोरी बढ्न थालेपछि सिसी क्यामराबाट निगरानी गर्न थालिएको छ । चारपाने चोकबाट क्यामरा राख्न सुरु गरिएको हो । बिर्तामोड २ मा मात्र १५ वटा क्यामरा राखिने इलाका प्रहरी कार्यालय बिर्तामोडका डिएसपी कृष्णप्रसाद कोइरालाले जानकारी दिए । पहिलो चरणमा बिर्तामोड १ देखि ५ नम्बर वडाका सडकमा सिसी क्यामरा जडान गरिने कोइरालाले जानकारी दिए । केहि महिना अघि बिर्तामोडमा भएको आन्दोलनका क्रममा मुक्ति चोकमा राखिएका सिसी क्यामरा आन्दोलनकारीले फुटाएका थिए । बिर्तामोडमा अहिले चार वटा मात्र क्यामेरा रहेको ६० वटा पुर्याइने कोइरालाले जानकारी दिए ।

काठमाडौं, माघ २४ । गृह मन्त्रालयले नक्कली राहदानीमा युरोप छिर्न खोज्ने दुई बंगलादेशी मोहम्मद रहमान र एमडी मारुफ हुसेनलाई नेपाल प्रवेशमा प्रतिबन्ध लगाएको छ । अध्यागमन विभागको सिफारिसमा गृह मन्त्रालयले नक्कली राहदानीमा नेपाललाई ट्रान्जिट बनाई युरोप छिर्न खोज्ने उनीहरूलाई ५ वर्ष नेपाल आउन नपाउने गरी निष्काशन गरेको हो । समाचारमा लेखिएको छ, उनीहरू पुस २३ मा त्रिभुवन अन्तर्राष्ट्रिय विमानस्थलस्थित अध्यागमन कार्यालयमा पक्राउ परेका थिए । पोर्चुगलको जाली राहदानीमा चीनको कुनमिङ हुँदै युरोप जाने क्रममा उनीहरू विमानस्थल अध्यागमनमा पुस १८ गते पक्राउ परेका थिए । विभागले उनीहरूलाई गत शुक्रबार बंगलादेश फिर्ता पठाएको छ। अध्यागमन विभागका निर्देशक राजुप्रसाद पौडेलले जाली राहदानीमा आएका दुई बंगलादेशीलाई निष्काशन गरिएको बताए।

ललितपुर, माघ २४ । ललितपुरको सातदोबाटोमा गएराति सवारी साधनको ठक्करबाट एकजनाको मृत्यु भएको छ । राति ११ बजे नम्बर नखुलेको सवारी साधनको ठक्करबाट पैदलयात्री सप्तरी फत्तेपुर घर भई हाल सातदोबाटो बस्दै आएका ३५ बर्षीय सन्तोष चौधरीको मृत्यु भएको प्रहरीले जनाएको छ । गम्भिर घाइते भएका चौधरीलाई उपचारका लागि पाटन अस्पताल ल्याउदै गर्दा बाटैमा मृत्यु भएको महानगरीय प्रहरी वृत्त सातदोबाटोले जनाएको छ । दुर्घटनामा संलग्न रहि हाल फरार सवारी साधनसहित चालकको खोजी भइरहेको प्रहरीले जनाएको छ ।

काठमाडौं, माघ २४ । नेपाल कम्युनिष्ट पार्टीले भ्रष्ट र दलालहरुका विरुद्ध राष्ट्रिय सङ्घर्षको घोषणा गरेको छ । भ्रष्ट, दलाल, घुसखोर तथा कमिसनखोरहरुले देशलाई कमजोर पारेको भन्दै त्यस्ता तत्वहरुलाई अब लखेट्ने नेकपाको उद्घोष छ । गत माघ १५ गतेबाट सुरु भएको तीन महिने ‘जनजागरण तथा भण्डाफोर’ अभियानलाई नेकपाले तिब्र रुपमा अगाडि बढाईरहेको छ । जसअन्तर्गत अर्बाै रकम भ्रष्टाचार गरेकाे अाराेप लागेका चुडामणी शर्मा पहिलो टार्गेटमा परेका छन् । ‘भ्रष्टाचारी चुडामणी शर्मलाई कारवाही गर, सम्पति राष्ट्रियकरण गर’ भन्दै नेपाल कम्युनिस्ट पार्टीको अगुवाईमा चुडामणी शर्माको घरमा कालोझण्डा गाडिएको छ । आन्तरिक राजस्व विभागका निलम्बित महानिर्देशक शर्माको बुढानिलकण्ठस्थित घरमा नेकपाका कार्यकर्ता तथा स्थानीयले ताेडफाेड र ढुङ्गामुडा गरेका छन् । मंगलबार दिउसाे सयाै कार्यकर्ता र जनतासहित चुडामणीकाे घरमा पुगेका नेकपाकाे टाेलीले शर्माकाे अाक्रमण गरेपछि वरपर रहेका स्थानीयवासी पनि जम्मा भएका थिए । अाक्रमणाबाट शर्माकाे घरका सीसा, झ्याल, ढोकामा ठूलाे क्षति पुगेकाे छ । बुढानिलकण्ठ नगरपालिका वडा नम्बर २२ महादेव खोला टोलमा शर्माकाे घर रहेकाे छ । शर्मालार्इ अख्तियार दुरुपयोग अनुसान्धन अायोगले खोजिरहेकाे छ । यसअघि पनि गत असोज महिनामा उनको घरको गेटमा आगलागी गरिएको थियो । उनीहरुले घरको गेटमा शर्माको सम्पत्ति राष्ट्रियकरण गर्न माग गर्दै ब्यानरसमेत झुण्डाएका छन् । शर्मापछि को-को छन् नेकपाको टार्गेटमा ? शर्मापछि नेपाल आयल निगमका बर्खास्त कार्यकारी निर्देशक गोपाल खड्काको नाम पनि नेकपाको टार्गेटमा छ । -सूचनाकेन्द्रबाट

सल्यान, माघ २४ । छत्रेश्वरी गाउपालिकाका प्रमुख सन्तोष केसीले आगामी एक बर्षमा जनतामा लाग्ने करलाई घटाउने बताएका छन । व्यवसायिक क्षेत्रबाट राजनीतिमा समाहित हुँदै गाउँपालिकाको नेतृत्वमा पुगेका केसीले आफुले गाउपालिकाको आयस्रोत आउनेगरि उदाहरणिय काम गरेर देखाउने बताएका हुन । जिल्लाका अन्य ठाउमा यो भन्दा पहिला हुने उपभोक्ता समिति मार्फत काम भैरहेको भन्दै उनले राजनीतिक मिलेमतोमा हुने समितिहरुले विकासका नाममा रकमको दुरुपयोग गरेको बताए । यसलाई नजिकबाट हेरेका उनले फरक तरिकाले योजना बनाएको बताएका हुन् । जहाँका उपभोक्ता हुन उनिहरुलाई सहभागि बनाई विकास निर्माणका काम गराउनुपर्नेमा किन यस्तो गरेको त भनेर सोध्दा त्यसले समाजका गरिव तथा बोल्न नसक्नेहरुलाई असर पारिरहेको बताएका हुन । उनि स्पष्ट पार्दै भन्छन –“विभिन्न राजनीतिक दलका केहि टाठाबाठाहरुले मात्रै बाडेर जति बजेट हो त्यो सबै सिध्याउने तर काम भने नगर्ने भएकाले त्यस्ता ठग उपभोक्ता समितिको काम नै छैन । म अर्को सालदेखि कम बजेटमा जसले निर्माण गर्ने जिम्मा लिन्छ त्यस्तालाई नै जिम्मा दिएर धेरैभन्दा धेरै काम गराउने छु । त्यसले गाउपालिकालाई पनि फाइदा पुग्नेछ भने काम पनि राम्रो हुनेछ । त्यसबाटै गाउपालिकाको आन्तरिक आयश्रोत बढ्नेछ अनी बढिमा आधा कर कम लिन सकिन्छ ।” निर्माण व्यवसायीसंग मिलेर तपाइले यस्तो गर्न लागेको त हैन भन्ने हाम्रो प्रश्नमा उनि भन्छन, साँच्ची भन्नुहुन्छ भने अन्य स्थानिय तहमा जस्तै उपभोक्ता समितिलाई दिएर जति रकम हो त्यतिमा मैले काम गर्न दिएको भए विभिन्न राजनीतिक आवरणमा भएका उपभोक्ता समितिले करोडको योजनाबाट मलाइ मात्रै १० लाख आउने गरि योजना बनाउँथे । उनले गाउपालिकाभित्र सबैभन्दा कममा निर्माण गर्ने व्यवसायीलाई काम दिने भन्दै गाउपालिका भित्र बाटोघाटो मर्मत तथा निर्माण गर्दा कार्यालयकै डोजर तथा स्काभेटर प्रयोग गरेर गर्नुपर्ने पनि नियम बनाएको बताएका छन । उनले भने एक करोडको काम कसैले ७० हजारमा गरे उता ३० हजार पनि बच्ने अनी गाउँपालिकाको सामाग्री प्रयोग भएमा त्यसबाट पनि रकम आउने भएकाले गाउपालिका समृद्ध बन्ने उदाहरण पेश गरे । यसैबाट भएको कमाई गाउपालिकाको आयश्रोत भएपछि किन जनतामा लाने कर स्वत घट्छ । अहिले छत्रेश्वरीका विभिन्न वडामा गाउँपालिकाको स्काभेटरबाट सडक निर्माणको काम भैरहेको छ । शुक्रबार मात्रै अध्यक्ष केसीले ७ नं वडाको बाटो उद्घाटन गरेका छन ।

काठमाडौँ, माघ २४ । प्रहरी मुख्यालयले जिल्ला प्रहरी कार्यालय सुनसरीका एसपी विद्यानन्दर माझी र इलाका प्रहरी कार्यालय धरानका इन्सपेक्टर चिरञ्जीवी दाहाललाई निलम्बनको लागि गृहमन्त्रालयमा पत्र पठाएको छ। पुस १६ गतेको बलात्कार घटनाका पीडकलाई मिलापत्र गराएर छाडेको भन्दै छानबिनका लागि एसपी माझी र इन्सपेक्टर दाहाललाई निलम्बनको माग गर्दै प्रहरी मुख्यालयले मंगलबार गृहमन्त्रालयमा पत्र पठाएको हो । घटना छानबिनका लागि संघीय प्रहरी ईकाई प्रहरी कार्यालय कोशीका प्रमुख प्रहरी वरिष्ठ उपरीक्षक (एसएसपी) हरिबहादुर पालको संयोजकत्वमा छानबिन समिति गठन भएको छ। समितिले अनुसन्धानका क्रममा एसपी माझी, इन्सपेक्टर दाहाललाई सोधपुछ गर्नुपर्नै र वयान लिनुपर्ने भएपछि उनीहरुलाई लिनम्बन गर्न प्रहरी मुख्यालयले गृह मन्त्रालयमा पत्र पठाएको हो। प्रहरी मुख्यालयका प्रवक्ता डीआईजी मनोज न्यौपानेले छानबिनमा रहेका उनीहरुलाई आवश्यक सोधपुछ र वयान लिनुपर्ने भएपछि निलम्बनको लागि सिफारिस गरिएको जानकारी दिए । १४ वर्षिया बालिका बलात्कारको घटनामा मुद्दा दर्ता नगरी आर्थिक लेनदेनमा मिलापत्र गराएको घटना सार्वजनिक भएपछि एसएसपी पालको नेतृत्वमा छानविन समिति बनेको थियो । समितिले शुक्रबार आफ्नो प्रतिवेदन बुझाउनेछ । प्रदेश १ का प्रहरी प्रमुख एआईजी पशुपति उपाध्यायले पालको नेतृत्वमा छानविन समिति बनाएका थिए । ती बालिकालाई इटहरीको रिसोर्टमा लगेर बलात्कार गरेको भन्दै पीडितका परिवारले मुद्धा दर्ता गर्न खोजेका थिए । तर मुद्धा दर्ता नभइ मिलापत्र गर्न दबाब दिइएको थियो । इटहरी –२० का वडाध्यक्षसमेतको रोहबरमा मिलापत्र भएको बताइएको छ । यता वडाध्यक्ष मणिराम श्रेष्ठले भने आफूलाई उक्त घटना बलात्कारको भएको भन्ने थाहा नभएको बताएका छन् । -अन्नपूर्णमा खबर छ ।

काठमाडौं । विवाहकाे वहान बनाएर पाँच रात संगै सुतेका प्रेमी एकाएक गायभ भएपछि सुन्धारामा हंगामा मच्चियाे । रौतहटको विश्रामपुरका अशोक गुप्ता र विराटनगरकी शैली एउटै कम्पनीमा काम गर्थें । काम गर्दा गर्दै उनीहरूकाे सम्बन्ध निकट हुँदै गयाे । नजिक हुदै जाँदा उनीहरु एकअर्कालाई प्रेम गर्न थाले । सम्बन्ध यति नजिकियाे कि उनीहरु एकअर्कालाई छोड्न नसक्ने अवस्थाका भए । अन्तरजातीय सम्बन्धलाइ लिएर प्रेम निकै झाँगियाे । उनीहरूकाे सम्बन्धलाई परिवारले नमान्ने डर दुवैलाई थियो । कारण थियाे अन्तरजातीय । वाइफ्राण्ड अशाेकले याेजना बनाए । साताअघि ती प्रेममा धपक्क बलेकी युवतीलाई विवाह गर्ने बहाना बनाए र विवाह भन्दै अशोकले सुन्धाराको होटल एसियनमा बोलाए । युवतीले पनि घर परिवारलार्इ पछि बताउने साेचेर हताराेमा विहे गर्न काठमाडाै हानिइन । सुन्धाराकाे हाेटल एसियनमा छुटै अानन्द अायाे उनलार्इ । त्यहाँ ५ दिनसम्म उनीहरु सँगै बसे । वैशले मातिएकी युवतीकाे हुनुपर्ने सवै भयाे । ५ दिनपछि अशोकले जाल बुने । त्याे जाल थियाे त्यहाँबाट भाग्ने । उनले युवतीबाट चाहेकाे कुरा सवै पुरा भएपछि एकाएक सम्पर्क बिहीन भए । हाेटलबाट फराहर भएका ती वाइफ्राण्ड लामाे समय वित्याे फर्केनन् । विहेकाे तयारी गर्न गए हाेलान भन्ने साेचिन तर अाएनन् । वाइफ्राण्ड नअाएपछि ती युवती छाँगाबाट खसेझैं भइन् । धपक्क बलेकी युवतीकाे एकाएक अनुहारमा कालाे धव्वा अायाे । लगत्तै, उनी महानगरीय प्रहरी वृत, जनसेवामा पुगेर उजुरी दिइन् । प्रहरी सामु सवै नालीवेली विस्तार गरिन । प्रहरीले अनुसन्धान थाल्याे र शनिबार प्रेमी भनिएका अशोकलाई प्रहरीले नियन्त्रणमा लियो । प्रहरीका अनुसार उनले बयानका क्रममा अन्तरजातीय सम्बन्ध भएका कारण आफूले विवाह गर्न नसक्ने भएकाले भागेकाे बताए । अन्तरजातीय सम्वन्धका कारण विहे नगरी स्वार्थ लिने ति युवा अहिले मजासंग प्रहरी खाेरमा हावा लिइरहेका छन् ।