हेटौंडा,फागुन २२ । फागुन २२ । प्रदेश ३ का आर्थिक मामिला तथा योजना मन्त्री कैलाश ढुंगेलले मुख्यमन्त्री तथा मन्त्रीपरिषद कार्यलयले उपलब्ध गराएको बा.२.झ २१४० नम्बरको टाटा जिपको साटो भाडामा लिइएको बा १८ च नम्बरको हुन्डाईको क्रेटा एसएक्स गाडी प्रयोग गरिरहेका छन् । महिला तथा बालबालिका कार्यलय सिन्धुलीबाट मगाएर उपलव्ध गराएको गाडी ‘पुरानो’ भन्दै मन्त्रीले चढ्न नमानेपछि भाडामा लिइएको हो। ‘उकालोमा तान्दै नतानेपछि अर्को गाडी भाडामा लिएर व्यवस्था गरेका छौं,’ मन्त्रालयका सचिव बसन्त अधिकारीले भने, ‘हप्ता/१० दिनको लागि हो, अर्को व्यवस्था भएपछि भाडाको गाडी फिर्ता गर्छौं। ’ नीजि सवारी साधन भाडामा लिएपनि दैनिक कति शुल्क तिर्ने भन्ने अझै सम्झौता भएको छैन। ‘उपलव्ध भएमध्येको राम्रो गाडी’ मन्त्रीले चढ्न नमानेपछि मन्त्रालयलाई थप ब्ययभार परेको हो। आन्तरिक मामिला तथा कानुनमन्त्री शालिकराम जमकट्टेलले पनि बा २ झ १६०३ नम्बरको बोलेरो जिप नचढी धादिङको बेनिघाट गाउँपालिकाको बा २ झ ३३८० नम्बरको स्कारपियो चढै आएका छन्। भौतिक पुर्वाधार विकास मन्त्री केशव स्थापितले सरकारले उपलब्ध गराएको सुमो छोडेर क्षेत्रीय शिक्षा निर्देशनालयको टाटा सफारी चढ्छन्। सामाजिक विकास मन्त्री युवराज दुलालले राष्ट्रिय मकैवाली अनुसन्धान कार्यक्रमको स्करपियो जिप र भुमि व्यवस्था, कृषि तथा सहकारी मन्त्री दावा दोर्जे लामा महिला तथा बालबालिका कार्यालय हेटौंडाको गाडी चढिरहेका छन्।,यो खबर आजको कान्तिपुर दैनिकमा छ ।

रसुवा, फागुन २२ । चीनसँगको अन्तर्राष्ट्रिय व्यापारिक नाका रसुवागढी हुँदै नेपाल भित्रने चिनियाँ तथा विदेशी पर्यटकको संख्यामा वृद्धि भएको छ । चीनको केरुङबाट रसुवागढी नाका हुँदै एक वर्षमा करिब १८ हजार पर्यटक नेपाल भित्रिएका छन् । सन् २०१७ मा १७ हजार ६२० चिनियाँ र ८२ जना अरु देशका नागरिक नेपाल भित्रिएको अध्यागमन कार्यालय टिमुरेले जनाएको छ । सो नाकाबाट सबैभन्दा धेरै चिनियाँ पयटक भित्रने गरेका छन् भने दोस्रोमा स्वीडेन, तेस्रोमा अमेरिकाका नागरिक भित्रिएका छन् । चीन सरकारले केही महिनाअघि अन्तर्राष्ट्रिय नाका घोषणा गरेपछि तेस्रो मुलुकका नागरिक पनि यो नाका हुँदै नेपाल आउनेक्रम बढेको छ । रसुवागढी नाका हुँदै तेस्रो मुलुकबाट आउने पर्यटकमा स्वीडेनका २३, अमेरिकाका १८, डेनमार्कका १७, अष्ट्रेलियाका ८, स्वीट्जरल्यान्डका ६, जर्मनीका ५ र अरु मुलुकका ६ जना नागरिक रहेको तथ्यांक छ । चिनियाँ पर्यटकले ग्रेटिस (शुल्क नलाग्ने) भिसा पाउँदै आएका छन् । रसुवागढीस्थित अध्यागमन कार्यालयले चिनियाँ पर्यटकलाई सुरुमा एक महिनाको आगमन भिसा दिँदै आएको रसुवागढी अध्यागमन कार्यालय प्रमुख मनोजकुमार पोखरेलले बताए । नेपाल आउने चिनियाँ पर्यटक काठमाडौं, पोखरा तथा लुम्बिनी जाने गरेका छन् । रसुवागढी नाका हुँदै दैनिक २० देखि १०० जनासम्म चिनियाँ पर्यटक नेपाल भित्रने गरेको कार्यालयको तथ्यांक छ ।

म्याग्दी, फागुुन २१ । म्याग्दीको बेनी नगरपालिका ९ गलेश्वरमा ट्रयाक्टर दुर्घटनामा दुई जनाको मृत्यु भएको छ। सोमबार अपरान्ह भएको दुर्घटनामा चालक रघुगंगा गाउँपालिका ३ का राम विश्वकर्मा र ट्रयाक्टरमा सवार बेनी नगरपालिका ९ गलेश्वरका गणेश कार्कीको मृत्यु भएको हो। दुवै जनाको उपचारको क्रममा जिल्ला अस्पताल बेनीमा मृत्यु भएको प्रहरीले जनाएको छ। गलेश्वरदेखि बेनीतर्फ आउँदै गरेको ग१त २५५८ नम्बरको ट्रयाक्टर गलेश्वरमा निर्माणधीन बसपार्क नजिकैबाट कालिगण्डकी नदीमा खसेको जिल्ला प्रहरी कार्यालय म्याग्दीकी प्रमुख प्रहरी नायव उपरीक्षक बसुन्धारा खड्काले जानकारी दिइन्।

ललितपुर, फागुन २१ । साझा यातायातले आफ्ना यात्रुका लागि टिकट अनिवार्य लिनुपर्ने नियम बनाउने भएको छ। टिकट नलिने यात्रु र नदिने कर्मचारीलाई कारवाही गर्ने तयारी गरिएको कामु प्रमुख कार्यकारी अधिकृत महेन्द्रराज पाण्डेयले बताए। साझा यातायातमा चढ्दा कतिपय यात्रुले टिकट बेवास्ता गरेकाले टिकट नलिनेरनदिनेलाई कारवाहीको व्यवस्था गर्न लागिएको हो। “यात्रुले टिकट लिन गाह्रो मान्ने गरेका छन्”, उनी भन्छन्, “यात्रुमा टिकट लिएर मात्र यात्रा गर्नुपर्छ भन्ने धारणा भइसकेको छैन।” यात्रुले टिकट नलिँदा चुहावटको सम्भावना रहने पाण्डेय बताउँछन्। “टिकट नलिँदा र नदिँदा यात्रुले भाडा नै तिरेरनतिरेको थाहा हुँदैन। टिकट नलिएको भाडा कार्यालयसम्म नआउन सक्छ”, उनी भन्छन्, “भाडा तिरेपछि टिकट लिनु यात्रु र साझा यातायात दुवैका लागि राम्रो हो। पैसा तिरेपछि रसिद माग्नु यात्रुको अधिकार हो।” काठमाडौँ महानगरपालिकाले पाँच करोड रुपैयाँ र ललितपुर महानगरपालिकाले एक करोड रुपैयाँको साझा यातायातको शेयर किनेका छन्। यी दुवै महानगरपालिकासँग मिलेर नीति निर्माण हुने पाण्डेय बताउँछन्। दुई महानगरपालिकासहित अरु सरकारी निकाय गरेर ९७ प्रतिशत सरकारी लगानीमा साझा यातायात सञ्चालनमा छ। साझा यातायातले नेपाल बैंक लिमिटेड र नेपाल टेलिकमसँगको सहकार्यमा विद्युतिय टिकट प्रणाली (इटिकेटिङ) समेत शुरु गर्ने तयारी गरेको छ।

बुटवल, फागुन २१ । प्रदेश नं ५ को सरकारले पूर्णता पाउन अझै केही समय लाग्ने भएको छ । मन्त्रिपरिषद् विस्तारपछि कार्यालय तथा निजी आवास व्यवस्थापनको काम पर्ने भएकाले मन्त्रिपरिषद् विस्तारमा ढिलाइ भएको सरकारका प्रवक्ता वैजनाथ थारुले आजको मन्त्रिपरिषद्को बैठकपछि जानकारी दिनुभयो । भौतिक योजना तथा निर्माणमन्त्री थारुले मन्त्रालय र निजी निवासको व्यवस्थापन भइरहेकाले अझै १० दिन समय लाग्न सक्ने बताउनुभयो । उहाँका अनुसार प्रदेश सरकारले यही फागुन २७ गते प्रदेशसभा बैठकमा विश्वासको मत लिइने छ । नेपालको संविधान धारा १६८९४० मा प्रदेश सरकार गठन भएको ३० दिनभित्र प्रदेशसभासँग मुख्यमन्त्रीले विश्वासको मत प्राप्त गर्नुपर्ने व्यवस्था छ । बैठकले प्रदेशमा स्थानीय तहका पदाधिकारी तथा सदस्यले पाउने सेवासुविधाका सम्बन्धमा व्यवस्था गर्न बनेको विधेयकलाई स्वीकृत गरेको छ । बैठकले प्रदेश नं ५ को आर्थिक कार्यविधि नियमित तथा व्यवस्थित गर्न बनेको विधेयक र प्रदेश आर्थिक कार्यविधि ऐन २०७४ समेत स्वीकृत गरेको छ । यस्तै प्रदेशअन्तर्गतका मुख्य नाकामा ५ नं प्रदेशका मुख्य पहिचान झल्कने महत्वपूर्ण क्षेत्रका विज्ञापनपाटी राख्न मन्त्रिपरिषद् सचिवालयलाई निर्देशन दिइएको छ । यस्तै प्रदेशको मुख्य न्यायाधिवक्ताको शपथको ढाँचासमेत मन्त्रिपरिषद्को बैठकले स्वीकृत गरेको छ । यसअघि मुख्यमन्त्री शंकर पोखरेलले सरकारको कानूनी सल्लाहकारमा दाङका ठाकुरप्रसाद डिसीलाई नियुक्तिका लागि सिफारिस गर्नुभएको जनाइएको छ ।

काठमाडौं, फागुन २१ । नेपाली कांग्रेस संसदीय दलको उपनेतामा विजयकुमार गच्छदारलाई चयन गरिएको छ । पार्टी सभापति एवं संसदीय दलका नेता शेरबहादुर देउवाले गच्छदारलाई उपनेता चयन गरेका हुन् । दलको नेतामानिर्वाचित भए लगतै देउवाले आफ्ना प्रस्तावक गच्छदारलाई संसदीय दलको उपनेतामा मनोनय गरेका हुन । पौडेल समूहलाई बेवास्ता गर्दै देउवाले गच्छदारलाई उपनेता बनाए । संसदीय दलको नेतामा सभापति देउवासँग पौडेल समुहबाट पूर्वमहामन्त्री प्रकाशमान सिंंहले प्रतिस्पर्धा गरेका थिए । प्रदेश र प्रतिनिधि सभाको निर्वाचनको केही समय अघि मात्रै गच्छदारले फोरम लोकतान्त्रिकलाई कांग्रेसमा विलय गराएका थिए ।

काठमाडौं, फागुन २१ । ‘प्रतिनिधिसभाको अन्तरिम कार्यविधि, २०७४’ पारित गर्दै प्रतिनिधिसभाको पहिलो बैठक सोमबार सकिएको छ । प्रतिनिधिसभाका जेष्ठ सदस्य महन्थ ठाकुरको अध्यक्षतामा बसेको बैठकले संसद सञ्चालनका लागि तयार पारिएको अन्तरिम कार्यविधि सर्वसम्मतिले पारित गरेको हो । बैठकको शुरुमा जेष्ठ सदस्य ठाकुरले अधिवेशन आह्वानसम्बन्धी राष्ट्रपति विद्यादेवी भण्डारीको पत्र पढेर सुनाएका थिए । अर्को बैठक मंगलबार (भोलि) बिहान ११ बजे बस्नेछ ।

काठमाडौं, फागुन २१ । मानवअधिकार अन्तराष्ट्रिय चलचित्र महोत्सवको छैठौं संस्करण यहि फागुन २३ गतेदेखि २६ गतेसम्म नेपाल पर्यटन बोर्ड भृकुटी मण्डप काठमाडौंमा हुने भएको हो। सामाजिक न्याय र मानवअधिकारलाई थप मजबुत बनाउने उद्देश्यले आयोजना गर्न लागिएको भनिएको महोत्सवको उद्घाटन २३ गते सांगीतिक कार्यक्रमको आयोजना गरी शुरु हुन छ । महोत्सवको राष्ट्रिय मानव अधिकार आयोगका अध्यक्ष अनुपराज शर्माले उद्घाटन गर्नै छन् । महोत्सवको सुरुवातमा फिल्म ‘जब म खस्छु’ प्रदर्शनबाट हुने छ । जुन फिल्मलाई बेलायती फिल्मकर्मी स्काई नेयलले निर्देशन गरेका हुन्। फिल्मले महिला अधिकारको वकालत गर्छ। विश्वभरिबाट खुला आवेदनबाट संकलन गरिएकामध्ये ७० भन्दा बढी वृत्तचित्र, छोटा चलचित्र, एनिमेटेड फिल्म लागयत प्रदर्शन हुने छन्। नेपालबाट २० वटा फिल्म महोत्सवमा समावेश भएका छन् । चलचित्र महोत्सवमा राष्ट्रिय मानव अधिकार आयोग, चलचित्र बिकास बोर्ड, नेपाल पर्यटन बोर्ड तथा संयुक्त राष्ट्र संघ, गुड गर्भनेन्स, जर्मनी दूतावाससँग सहकार्यको रहेको छ । महोत्सवमा फिल्म प्रदर्शनसँगै विविध विषयमाथि अन्तक्रिया समेत हुने आयोजक पाण्डव खत्रीले बताए।

नयाँ दिल्ली । बलिउड अभिनेत्री सन्नी लियोनी जुम्ल्याहा बच्चाको आमा बनेकी छिन् ।सन्नीका पति डेनियलले जुम्ल्याहा बच्चा सहित परिवारको तस्विर ट्विटर मार्फत सार्वजनिक गरेपछि सोको खुलासा भएको हो । जुम्ल्याहा बच्चाको नाम अशर सिंह र नोहा सिंह वेबर रहेको छ । अघिल्लो वर्ष सन्नी र उनका पतिले निशा कौरलाई आफ्नो धर्मसन्तानको रुपमा राखेका थिए । जुम्ल्याहा बच्चा सन्नी आफैले जन्माएकी हुन् भन्ने विषयमा मिडियाले प्रश्न गरेको केही समयपछि सन्नीले बच्चा आफ्नै सन्तान रहेको बताएकी छिन् । उनले जुम्ल्याहा बच्चाबारे कोही भ्रममा नपर्न आग्रह गर्दै पुरा परिवार निर्माणका लागि केही वर्षअघिबाटै सरोगेसीको विकल्प लिएको बताइन् ।

खोटाङ । दिक्तेल रुपाकोट मझुवागढी नगरपालिका–११ खार्मी र वडा नं १० पाथेकाका स्थानीय समुदायले स्थानीय खोलामा पाइने माछा मार्न रोक लगाएका छन् । पछिल्लो समय स्थानीय खोलामा करेन्ट तथा विष लगाएर माछा मार्नेक्रम बढेसँगै संसारकै दुर्लभ मानिने असला माछा लोप हुने अवस्थामा पुगेपछि समुदायले यस्तो कदम चालेको हो । रुपाकोट शिर भएर बग्ने देखुमखोला, कालुपातेखोला, आइतबारेखोला र बगरेभञ्ज्याङ शिर भएर बग्ने भुत्याखोलामा माछा मार्न रोक लगाइएको स्थानीय सर्वधन राईले जानकारी दिनुभयो । “लोप हुन लागेको असला माछा संरक्षणका लागि समितिसमेत बनाएका छौँ,” उहाँले भन्नुभयो – “संरक्षण समितिले पहिलो पटक माछा मारेको भेटे रु पाँचदेखि १० हजार, दोस्रो पटक रु १० देखि २० हजार र तेस्रो पटक रु २० देखि तीस हजार नगद जरिवानासहित कानूनी कारबाही गर्ने निर्णय गरेको छ ।” संरक्षण समितिमा आबद्ध स्थानीयवासीले माछा पाइने खोलाहरुको नियमित अनुगमन गर्नसमेत शुरु गरेका छन् । माछा संरक्षणका लागि खार्मी र पाथेका प्रवेश गर्ने मुख्यद्वारहरुमा असला माछासहितको होर्डिङबोर्ड राखिएको समितिले जनाएको छ। माछा संरक्षण समितिलाई वडाको तर्फबाट समेत आवश्यक सहयोग हुने वडाध्यक्ष रामचन्द्र राईले बताउनुभयो । स्थानीय लक्षिणाप्रसाद राईको संयोजकत्वमा ११ सदस्यीय संरक्षण समिति गठन गरिएको छ । यसअघि, ती खोलाहरुमा पाइने असला माछा स्थानीयवासीले मारेर दिक्तेल र बाक्सिलाबजारमा बिक्री गर्ने गरेका थिए । सानो खोलामा पनि प्रशस्त पाइने असला माछा प्रतिकेजी रु ७०० मा बिक्री हुने गरेको छ । रासस

नगरकोट । वरिष्ठ पत्रकारहरुले पहिचान र अस्तित्वसहितको समावेशीता हुनुपर्नेमा जोड दिएका छन् । पत्रकारिता क्षेत्रले पनि यसैलाई आत्मसात् गरेर समाचार उत्पादन, प्रशोधन तथा प्रसारण र प्रकाशनमा ल्याउनुपर्ने उनीहरुको सुझाव छ । नेवाः पत्रकार राष्ट्रिय दबू र नेपाल आदिवासी जनजाति पत्रकार महासंघ भक्तपुरको संयुक्त संयोजनमा भएको तीनदिने तालीमका सहभागीले नेपाली पत्रकारितामा समावेशी विषयको एक अन्तक्र्रियामा समाचार उत्पादनमा समावेशी भए पनि प्रशोधन गर्ने डेस्कमा समावेशी नहुँदा प्रसारण तथा प्रकाशनमा समावेशीताले ठाउँ नपाएको औँल्याए । कार्यक्रमका सहभागीलाई आइतबार प्रमाणपत्र वितरण गर्दै सूचना विभागका महानिर्देशक वीरबहादुर राईले नेपाली सञ्चार क्षेत्रलाई समावेशी बनाउन विभागले पहल गर्ने बताउनुभयो । तालीमका प्रमुख सहजकर्ता डा सुरेश आचार्यले समावेशीता एउटा आन्दोलन भएर आएकाले त्यसलाई सम्बोधन गर्न सबै पक्ष तयार हुनुपर्ने बताउनुभयो । कार्यक्रममा सञ्चार विज्ञहरु डा विजय मिश्र, डा राजेश अहिराज, खिम घले र मीरा राजभण्डारीले नेपाली पत्रकारितालाई समावेशी बनाउन देखिएका समस्या र त्यसको निराकरणका उपायसँगै समावेशी पत्रकारिता के र कसरी गर्ने भन्नेबारे सहजीकरण गर्नुभएको थियो । स्थानीय संयोजनकर्ता नेवाः पत्रकार राष्ट्रिय दबू भक्तपुरका अध्यक्ष ईश्वरकाजी खाइजूले समावेशीताका विषयमा धेरै चर्चा भए पनि सञ्चार क्षेत्रमा यसले प्रवेश नपाएको सन्दर्भमा भक्तपुरमा उक्त कार्यक्रम आयोजना गरिएको जानकारी दिनुभयो । तीन दिनसम्म चलेको तालीममा भक्तपुरका ४० जना क्रियाशील पत्रकारको सहभागिता थियो । रासस

चितवन । अतिसंकटापन्न अवस्थामा पुगेको घडियाल गोहीको अवस्था पत्ता लगाउन चितवनको देवघाट र लोथर क्षेत्रमा समेत गोही गणना गरिएको छ । करिब एक दशकपछि सो क्षेत्रमा गोहीको गणना भएको चितवन राष्ट्रिय निकुञ्जका सहायक संरक्षण अधिकृत एवं सूचना अधिकारी नुरेन्द्र अर्यालले जानकारी दिनुभयो । उहाँका अनुसार २०५५÷५६ सालतिर सो क्षेत्रबाट पनि गोहीको अण्डा संकलन हुन्थ्यो । त्यसपछि विस्तारै गोही हराउँदै गयो । अहिलेको अवस्था पत्ता लगाउन स्थान थप गरेर यस पटक गोहीको गणना गरिएको अर्याल बताउनुहुन्छ । विगतमा चितवन राष्ट्रिय निकुञ्ज र मध्यवर्ती आसपासको क्षेत्रमा गोही गणना गर्ने गरिए पनि यसपालि भने क्षेत्र विस्तार गरेर देवघाट र लोथरमा समेत गणना गरिएको हो । यसअघि फागुन ११, १२ र १३ गते राप्ती र नारायणी नदीको विभिन्न ११ वटा ब्लकमा गोहीको गणना गरिएको थियो । तर अन्य सम्भावित क्षेत्रमा गोहीको अवस्था के छ भनेर पत्ता लगाउन क्षेत्र थप गरी देवघाट र पूर्वी चितवनको लोथरमा यही फागुन १८, १९ र २० गते गोही गणना गरिएको हो । गणनाका लागि नारायणी नदीमा देवघाटदेखि मझुवा सामुदायिक वनको सिख्रौलीघाट र पूर्व राप्ती नदीमा लोथरदेखि जिन्दगानी घाटसम्मको क्षेत्र थपिएको हो । देवघाट र नारायणगढ क्षेत्र गोहीका लागि राम्रो वासस्थान भए पनि मानवीय चापले गोही बस्न सक्ने अवस्था नदेखिएको अनुगमनमा सहभागी राष्ट्रिय प्रकृति संरक्षण कोषका संरक्षण अधिकृत सन्तोष भट्टराईले बताउनुभयो । नारायणगढबाट केही किलोमिटर तल शिवघाटमा भने एउटा गोही भेटिएको उहाँको भनाइ छ । यता पूर्वी राप्ती नदी क्षेत्रमा भने चार–पाँच वटा गोही फेला परेको जनाइएको छ । राष्ट्रिय निकुञ्ज तथा वन्यजन्तु संरक्षण विभागको नेतृत्वमा राष्ट्रिय प्रकृति संरक्षण कोषले जुअलोजिकल सोसाइटी अफ लण्डन तथा हिमालयन नेचरसँग मिलेर गोही गणना गरेको हो । आइतबारसम्म गणनाको फिल्डको काम भएकाले आजदेखि डाटा संकलन र व्यवस्थापनको काम शुरु भएको छ । गोही छुट्न सक्ने भएकाले हरेक ब्लकमा तीन दिनसम्म दोहो¥याएर गणकहरु नदीमा खटिएका थिए । चितवनको राप्ती र नारायणी नदीमा कूल १६६ वटा गोही छन् । सन् २०१६ को गणनाअनुसार बर्दियाको बबई नदीमा ३१ र कर्णालीमा एक गरी नेपालमा कूल १९८ गोही छन् । प्राकृतिक वासस्थानमा घडियाल गोही लोप हुँदै गएको छ । रासस

दाङ । गाडीको ठक्करबाट आज यहाँ एकजनाको मृत्यु भएको छ । मृत्यु हुनेमा तनहुँको रिसिङ गाउँपालिका– ६ का ६१ वर्षीय यामबहादुर थापा रहेको वडा प्रहरी कार्यालय लमहीका प्रहरी निरीक्षक सुरज खड्काले जानकारी दिनुभयो । पोखराबाट तुलसीपुरतर्फ आउँदै गरको ना५ख ३१०१ नंको बसले थापालाई ठक्कर दिएको हो । पूर्व–पश्चिम राजमार्गअन्तर्गत लमही नगरपालिका– १ सुनडबरीमा थापालाई उक्त बसले ठक्कर दिँदा उहाँको मृत्यु भएको हो । थापा तुलसीपुरमा रहेका छोरालाई भेट्न दाङ आउँदै गर्दा दुर्घटनामा परेका थिए । गम्भीर घाइते थापालाई लमही अस्पताल पु¥याएपछि उनलाई चिकित्सकले मृत घोषणा गरेको थियो । बसका चालकलाई प्रहरीले नियन्त्रणमा लिएको छ । रासस

भीमदत्तनगर । कञ्चनपुरको भीमदत्तनगरस्थित महाकाली अञ्चल अस्पतालका सबै सेवा आइतबारदेखि सञ्चालन भएका छन् । शनिबार अस्पतालमा उपचाररत भीमदत्तदनगरपालिका–११ भुजेलाका ४६ वर्षीया कलावती सार्कीको मृत्यु भएको विषयलाई लिएर मृतकका आफन्तले अञ्चल अस्पतालमा चिकित्सक र स्वास्थ्यकर्मीमाथि नै दुव्र्यवहार गरेपछि अस्पतालका सबै सेवा ठप्प गरिएको थियो । आइतबार जिल्ला प्रशासन कार्यालयमा मृतकका आफन्त र अस्पताल प्रशासनबीच भएको सहमतिपछि अस्पताल सञ्चालन भएको हो । मृतकको शवपरीक्षणका लागि धनगढीबाट चिकित्सक बोलाउने र घटनाको छानबिनका लागि विज्ञ टोली गठन गरी छानबिन गरिदिन प्रदेश नं ७ को सामाजिक विकास मन्त्रालयलाई अनुरोध गर्ने सहमति भएको जिल्ला प्रहरी कार्यालय कञ्चनपुरका प्रहरी नायब उपरीक्षक ज्ञानबहादुर सेटीले जानकारी दिनुभयो । एक साताअघि महाकाली अञ्चल अस्पतालमै पाठेघरको शल्यक्रिया गरेकी सार्कीलाई स्वास्थ्यमा समस्या भएपछि शुक्रबार राति अस्पताल ल्याइएको थियो । अस्पतालमा उपचारमा रहेकी सार्कीको शनिबार बिहान मृत्यु भएपछि मतृकका आफन्त आक्रोशित बनेका थिए । रासस

म्याग्दी । म्याग्दीको परोपकारी क्षेत्रमा क्रियाशील ओमकुमारी शान्ति कोषलाई जापानमा रहेका म्याग्देलीले रु १२ लाख सहयोग जुटाएका छन् । विपन्न परिवारका बिरामी व्यक्तिको उपचारमा सहयोग गर्ने उद्देश्यले कोषले स्थापना गर्न लागेको रु एक करोड ५० लाख रकमको अक्षयकोषका लागि म्याग्दी प्रवासी नेपाली संघ (मोना) जापानको पहलमा सो रकम संकलन भएको हो । मोना जापानको आयोजनामा टोकियोमा आइतबार आयोजित भेटघाट तथा अन्तरक्रिया कार्यक्रममा अन्नपूर्ण गाउँपालिका–६ घार घर भई हाल जापानमा व्यवसाय गर्दै आउनुभएका ददीलाल खड्काले व्यक्तिगत रुपमा रु दुई लाख १० हजार सहयोग गर्ने घोषणा गर्नुभएको छ । जापानमा सफल व्यवसायीका रुपमा चिनिँदै आउनुभएका समाजसेवी खड्काले ओमकुमारी शान्ति कोषले जिल्लामा रहेका आर्थिक विपन्नतामा परेका व्यक्तिको उपचारमा सहयोग पु¥याउन स्थापना गर्न लागेको अक्षयकोषमा सहयोग पुगोस् भन्ने उद्देश्यले सहयोग गरेको बताउनुभयो । सो क्रममा मोना जापानका वरिष्ठ उपाध्यक्ष दीपक केसीले समेत अक्षयकोष स्थापनार्थ रु एक लाख ११ हजार सहयोग गर्ने घोषणा गर्नुभएको थियो भने यसअघि मोना जापानका सल्लाहकार गणेश श्रेष्ठले रु ५२ हजार सहयोग प्रदान गरिसक्नुभएको छ । अक्षयकोष निर्माणका लागि प्रवासमा रहेका म्याग्देलीमार्फत सहयोग जुटाउने अभियान लिएर जापानमा पुग्नुभएका ओमकुमारी शान्ति कोषका अध्यक्ष राजेश शाक्यले जापानमा रहेका म्याग्देलीको साझा संस्था मोना जापानको पहलमा टोकियो र नागोयामा आयोजित कार्यक्रममा प्राप्त सहयोगले उत्साहित बनाएको बताउँदै सहयोगदातालाई आधारसहित धन्यवाद ज्ञापन गर्नुभएको छ । ओमकुमारी शान्ति कोषको अक्षयकोषमा अहिलेसम्म रु ९० लाख बोलिएको रकममध्ये ५२ लाख नगद संकलन भइसकेको कोषले जनाएको छ । रासस