नुवाकोट, माघ २३ । यहाँका तीन ठाउँमा निर्माण गर्न लागिएको एकीकृत बस्तीका लागि प्रारम्भिक चरणमा दश स्थान छनोटमा परेका छन् । एकीकृत बस्ती निर्माणका लागि सम्भावित बस्तीको छनोट गर्न चयन भएको परामर्शदाता कम्पनीले तयार गरेको प्रतिवेदनको आधारमा जिल्लाका सरोकारवाला सम्मिलित सोमबारको बैठकको सुझावको आधारमा छनोट भएका दश स्थानको विस्तृत स्थलगत अध्ययन शुरु गर्न लागिएको हो । विकासका पर्याप्त पूर्वाधार निर्माण गर्न सकिने, ठूलो समूहमा बस्ती बसाल्न सकिने स्थान भएको, आसपास बस्तीलाई समेत पायक पर्ने सम्भावित दश स्थान छनोटमा परेकाले तीनको स्थलगत अध्ययनको आधारमा तीन बस्ती छनोट गर्न लागिएको जिल्ला आयोजना कार्यान्वयन एकाइका आयोजना प्रमुख विदुर खड्काले जानकारी दिए । विज्ञ तथा परामर्शदाता कम्पनीका अनुसार नेपाल सरकारमार्फत निर्माण गर्न लागिएको एकीकृत बस्तीको लागि जिल्लाको चौघडाको गड्खार, दुईपिपलको कोल्पुटार, रातमाटेको चन्द्रेटारस्थित खाल्टे, शिवपुरीको डुम्रे, कविलासको अप्राहस्थित सहरेटार, ककनीको रातमाटेटार, बुधसिंहको थली, शिखरबेँसीको डिही, मेघाङको देउराली बजार र नर्जामण्डपको बाहुनबेँसी छनोटमा परेका छन् । एकीकृत बस्ती निर्माणका लागि छनोटमा परेका सम्भावित स्थानको डिपीआरका लागि शहरी विकास मन्त्रालयमार्फत परामर्शदाता संस्था गिडा नेपाल र ग्रिड श्रेष्ठको संयुक्त लगानीले जिम्मेवारी पाएको छ ।

काठमाडौं, माघ २३ । नेपालमा सवारी दुर्घटनाबाट वार्षिक दुई हजारले ज्यान गुमाउने गरेका छन् । नेपाल प्रहरीले दिएको तथ्यांकअनुसार पाँच वर्षमा सवारी दुर्घटनाबाट आठ हजार ९८२ जनाको ज्यान गएको छ । आर्थिक वर्ष २०७०/७१ मा एक हजार ७८७ जनाको सवारी दुर्घटनामा मृत्यु भएको छ । त्यस्तै ०७१/७२ मा दुई हजार चारजनाको, ०७२/७३ मा दुई हजार ६ जनाको, ०७३/७४ मा दुई हजार ३८४ जनाको र ०७४/७५ को कात्तिक मसान्तसम्म अर्थात चार महिनामा ८०१ जनाको ज्यान गएको छ । प्रहरी प्रधान कार्यालयका प्रवक्ता एवं प्रहरी नायब महानिरीक्षक मनोज नेउपाने साँघुरो बाटो र कमजोर पूर्वाधार हुँदा वर्षेनि हजारौँ मानिसले ज्यान गुमाउने गरेको बताउँछन् । ‘दुर्घटना हुनेमध्ये सबैभन्दा धेरै मोटरसाइकल रहेका छन्,’ उनी भन्छन् । आव ०७०/७१ मा आठ हजार ४०६, ०७१/७२ नौ हजार १४५, ०७२/७३ मा १० हजार १३, ०७३/७४ मा १० हजार १७८ र र ०७४/७५ को कात्तिक मसान्तअर्थात चार महिनामा तीन हजार २९ दुर्घटना भएका छन् । सवारीसाधन बढेसँगै दुर्घटना समेत बढ्दै गएको तथ्यांकले देखाउँछ । दुर्घटनामध्ये अधिकांश चालकको लापर्बाहीले हुने गरेको छ । त्यसपछि क्रमशः तीव्र गति, ओभरटेक, यात्रुको गल्ती, यान्त्रिक गडबडी, मादकपदार्थ सेवन र ओभरलोडबाट दुर्घटना भएको तथ्यांकमा उल्लेख छ ।

काठमाडौं, माघ २३ । लहानदेखि १८ किमि दक्षिणतर्फ व्यापारिक नाका ठाडीसँग जोडिएको दशगजाभित्रै भारतीय पक्षले नियमविपरीत वर्षौंदेखि भन्सार कार्यालय सञ्चालन गर्दै आएको छ । यहाँ दशगजाभित्रै बस्ती बसाइएको छ । अन्तर्राष्ट्रिय कानुनअनुसार दशगजास्थित सीमाक्षेत्रमा दुवै देशले कुनै पनि भौतिक पूर्वाधार निर्माण, खेतीपाती तथा अन्य संरचना बनाउन पाइँदैन । दशगजालगत्तै भारतको सिमाना सुरु भएको स्थानमा भारतीय पक्षले प्रवेशद्वार बनाएको छ । प्रवेशद्वार उत्तरतर्फ दशगजाको जग्गा खाली हुनुपर्नेमा त्यहीँ भन्सार कार्यालय र दुई दर्जन बस्ती छन् । जग्गा खाली रहेकाले घर बनाएर बसेको भारत, लौकाहाका सन्तोष साहले बताए । ‘बिहान–बेलुका मजदुरी गरी गुजारा चलाउँछौं,’ उनले भने, ‘दशगजामै कस्टम कार्यालय भएकाले हामीले पनि घर बनाएर बसेका हौं ।’ आफूहरू वर्षाैदेखि त्यहीँ बसिरहेको जनाउँदै उनले सबै गरी १२ वटाजति घर बनेको जानकारी दिए । यहाँ अधिकांश सुकुम्बासीकोबसोबास छ ।, कान्तिपुर दैनिकमा खबर छ ।

बर्दिबास, माघ २३ । महोत्तरी जिल्लाको बर्दिबास नगरपालिकाको बजार क्षेत्रमा कुकुरको टोकाइबाट १३ जना घाइते भएका छन् । बर्दिबास–१ को चोकबजार क्षेत्र र बर्दिबास–१४ को हटिया क्षेत्रमा सोमबार एकैदिन कुकुरको टोकाइबाट १३ जना घाइते भएका हुन् । बाटो हिँडिरहेका १३ जनालाई एउटै कुकुरले टोकेको हो । बाटो हिँडिरहेका बेला कुकुरले एक्कासि झम्टेर घाँटीभन्दा माथि टोकेर घाइते बनाएको इलाका प्रहरी कार्यालय बर्दिबासले जनाएको छ । कुकुरले टोकेकामध्ये बढीजसो बालबालिका छन् । घाइतेको बर्दिबास अस्पताल, शुभस्वस्तिक अस्पताल र जनसेवा अस्पतालमा उपचार भइरहेको छ । घाइतेमध्ये आठजनाको घाँटीमा निकै चोट देखिएपछि प्रारम्भिक उपचारपछि थप उपचारका लागि काठमाडौं पठाइएको इलाका प्रहरी कार्यालय, बर्दिबासका प्रहरी नायब उपरीक्षक प्रवीण पोखरेलले जानकारी दिए । कुकुरले धमाधम एकपछि अर्कोलाई टोक्दै गएपछि बर्दिबास बजार क्षेत्रमा त्रास फैलिएको थियो । टोक्ने कुकुरलाई स्थानीयले घेरा हालेर सोमबारै मारेको प्रहरीले जनाएको छ ।

काठमाडौं, माघ २३ । इन्टरनेटमा अत्यधिक पहुँच बढेसँगै सहरी क्षेत्रका बालबालिका अनलाइन यौन दुव्र्यवहारको उच्च जोखिममा परिरहेका छन् । बालबालिकाले अनलाइनमार्फत अपरिचित व्यक्तिबाट अश्लील फोटोरभिडियो आउने, नग्न तस्बिर माग्ने, अनावश्यक भेट्न बोलाउने, धम्की दिनेजस्ता दुव्र्यवहार खेप्ने गरेका छन् । कामकाजी अभिभावकले बच्चालाई समय दिन नसक्दा मोबाइल, ट्याब र ल्यापटपजस्ता सामग्री किनिदिने गरेका छन् । तिनमा बालबालिकाहरूले गेम खेल्न, च्याट गर्न, गीत सुन्न स्कुलको गृहकार्य गर्न इन्टरनेट चलाउने गरेका छन् । तर ती सामग्रीको सदुपयोग वा दुरुपयोग गरेकोबारे अभिभावकले चासो नदिँदा उनीहरू अनलाइन यौनहिंसाको सिकार बनिरहेको केन्द्रीय बालकल्याण समितिका कार्यकारी निर्देशक तारक धितालको भनाइ छ । बालकल्याण समितिको बाल हेल्पलाइनमार्फत यस आर्थिक वर्षमा मात्रै १७ वटा अनलाइन बाल यौन दुव्र्यवहारका घटना दर्ता भएका छन् । सबै घटनामा बालिका मात्रै पीडित भएको हेल्पलाइन कार्यक्रम अधिकृत सागर भण्डारीले बताए ।, यो खबर आजको कान्तिपुर दैनिकमा छ ।

काठमाडौं, माघ २३ । भारतीय शासित क्षेत्र कश्मिरस्थित लाइन अफ कन्‍ट्रोल (एलओसी) मा तना बढ्दै गएको छ । पाकिस्तान सेनाले राजौरीमा आइतवार राति गरेको गोलाबारीमा चारजना भारतीय सेना मारिएका छन् । यो भिडन्तपछि यस जिल्लाका ४८ स्कुललाई तीन दिनका लागि बन्द गरिएको छ। पाकिस्तानबाट हानिएको एन्टी ट्यांक मिसाइल विस्फोटमा परेर २३ वर्षीय क्याप्टेन कपिल कुन्डुसहित चारजना भारतीइ सेना मारिएका हुन् । यो भिडन्तपछि सोमवार एहतियातन श्रीनगर-मुजफ्फराबाद (पीओके) बस सेवा पनि बन्द गरिएको छ । पाकिस्‍तानी सेनाले आइतवार राजौरीको भिम्बर गली क्षेत्रमा आक्रमण गरेको हो । यो हमलामा हरियाणाको गुडगाउँस्थित रनसिका गाउँका क्याप्टेन कपिल कुन्डु (२३), ग्वालियरका राइफलम्यान राम अवतार (२७), जम्मु-कश्मिरको साम्बाका हवलदार रोशन लाल (४२) र जम्मु-कश्मिरको कठुवा जिल्लाका राइफलम्यान शुभम सिंह (२३) मारिएका हुन् । यो घटनामा अन्य दुई भारतीय सेना पनि घाइते भएका छन् । भारतीय सेनाले पनि पाकिस्तानी सेनाको जवाफ दिइरहेको दाबी गरेको छ ।

काठमाडौं, माघ २३ । नेपाल टेलिकमले मध्यपहाडी लोकमार्गमा अप्टिकल फाइबर र डाटा सेवा विस्तार एवं सातै प्रदेशमा जीएसएम सेवातर्फ फोरजी एलटिइ कार्य अघि बढाएको छ । टेलिकमको १४औं वार्षिकोत्सवको अवसरमा सोमबार राजधानीमा आयोजित कार्यक्रममा प्रबन्ध निर्देशक कामिनी राजभण्डारीले सेवा विस्तारबारे जानकारी गराएकी हुन् । सातै प्रदेशमा फोरजी एलटिइ सेवा आफ्नै आर्थिक स्रोत परिचालन गर्नेगरी अन्तर्राष्ट्रिय बोलपत्र आह्वान गरी कार्य अघि बढाइसकेको टेलिकमले जनाएको छ । ग्रामीण दूरसञ्चार विकास कोषको लगानी रहनेगरी नियामक निकाय नेपाल दूरसञ्चार प्राधिकरणसँग भएको सम्झौताअनुसार मध्यपहाडी लोकमार्गको प्रदेश नम्बर–१, २ र ३ खन्डमा अप्टिकल फाइबर र डाटा सेवा विस्तारको कार्य अघि बढाइरहेको प्रबन्ध निर्देशक राजभण्डारीले बताइन् । दुर्गम क्षेत्रमा सेवा विस्तार गर्ने नेपाल सरकारको नीतिअनुसार डोल्पा, मुगु, बाजुरा, दोलखा, बाग्लुङ, धादिङ र सिन्धुपाल्चोकमा पनि मोबाइल सेवा सन्चालनमा आएको कम्पनीले जनाएको छ । वार्षिकोत्सवमा प्रिपेड सेवाग्राहीका लागि नमस्ते क्रेडिट सेवाको ‘सफ्ट लन्च’ पनि गरिएको छ । यो सेवाबाट सेवाग्राहीले कुरा गर्दागर्दै व्यालेन्स सकिएपनि बिनाब्याज निरन्तर कल गर्नसकिने सुविधा रहेको जनाइएको छ । यो सेवा भने अगामी महिना देखि लागू हुने जनाइएको छ ।

काठमाडौं-  देशका प्रमुख तीन विद्यार्थी संगठनहरूले छाउपडी प्रथा विरुद्ध दवाबमूलक अभियान संचालन गर्ने भएका छन् । नेकपा एमाले निकट अनेरास्ववियु, नेपाली कांग्रेसको निकट नेपाल विद्यार्थी संघ र माओवादी केन्द्रको निकट अनेरास्ववियु (क्रान्तिकारी) यस मुद्दामा एक मत भएका छन् । सोमवार काठमाडौँमा एक अन्तरक्रियात्मक कार्यक्रम आयोजना गरेर अनेरास्ववियुका अध्यक्ष नविना लामा, नेपाल विद्यार्थी संघका अध्यक्ष नैनसिंह महर र अनेरास्ववियु (क्रान्तिकारी) का अध्यक्ष रन्जित तामाङले यो प्रथा उन्मूलनका लागि सरकारलाई निरन्तर दवाब दिइरहने  बताएका छन्। अनेरास्ववियुकी अध्यक्ष नविना लामाले कतिपय अवस्थामा मान्छेको ज्यानै जाने घट्ना समेत घटिसकेकोमा छाउपडी जस्ता प्रथाको अन्त्य गर्न सामूहिक रूपमा सरकारलाई दवाब  दिनुपर्नेमा बताइन् । त्यस्तै, नेपाल विद्यार्थी संघका अध्यक्ष नैनसिंह महरले सामाजिक विकृतिको रूपमा रहेको छाउपडी प्रथा अन्त्य गर्नका लागि सबैले मिलेर दवाब अभियान संचालन गर्नुपर्ने बताए। उनले मुलुक नयाँ युगमा प्रवेश गरिरहँदा समेत विकृति र विसंगति  कायमै रहनु आपत्तिजनक भएको पनि बताए। यसै सन्दर्भमा कुरा गर्दै अनेरास्ववियु (क्रान्तिकारी)का अध्यक्ष रन्जित तामाङले सामाजिक रुपान्तरण विद्यार्थीको पनि जिम्मेवारी भएकाले छाउपडी प्रथा अन्त्यका लागि तीनवटै विद्यार्थी संगठन एक ठाउँमा आएर दवाब अभियान सुरु गरेको बताए। यो प्रथा विशेष गरी प्रदेश नम्बर ६ र ७ का पहाडी समुदायमा मा विद्यमान रहेको छ ।

काठमाडौं, शिक्षक सेवा आयोगले माध्यमिक तहको अस्थायी अध्ययन अनुमतिपत्रका लागि आवेदन माग गरेको छ । । शिक्षक सेवा आयोगले प्रकाशन गरेको सूचना अनुसार, लाइसेन्स लिन इच्छुक शिक्षकहरुले फागुन २० सम्म आवेदन दिन सक्नेछन् । दोब्बर दस्तूरका लागि ७ दिनको म्याद समेत थप गरिएको छ । लाइसेन्सको परीक्षा आगामी चैत २४ गते हुने छ । अध्यापन अनुमतिपत्रको परीक्षामा सहभागी हुन स्नातकोत्तर उतिर्ण हुनुपर्ने र सेवा सुरु गरेको २ वर्षभित्र १० महिने तालिम वा बिएड गरेको हुनुपर्ने शर्त समेत सूचनामा उल्लेख छ । तर पहिले नै तालिम वा वि एड गरेकाले भने प्रक्रिया अनुसार स्थायी लाईसेन्स नै पाउने भएका छन् ।  आयोगले दरखास्त दिन ५ वटा कार्यालयहरु तोकेको छ । जसमा जिल्ला शिक्षा कार्यालय झापा, जिल्ला शिक्षा कार्यालय काठमाण्डौ, जिल्ला शिक्षा कार्यालय कास्की, जिल्ला शिक्षा कार्यालय बाँके, जिल्ला शिक्षा कार्यालय कञ्चनपुर रहेका छन् । परीक्षा संचालन हुने स्थान दरखास्त संकलन केन्द्र रहेको जिल्लामै रहने भएपनि केन्द्र भने पछि तोकिने आयोगले जानएको छ । लिखित परीक्षाको पूर्णाङ्क एक सय र उत्तीर्णाङ्क पचास राखिएको छ । परिक्षमका लागि माध्यमिक तहको स्थायी अध्यापन अनुमति पत्रकै पाठ्यक्रम लागू हुने आयोगले जनाएको छ । आयोगवाट स्वीकृत अध्यापन अनुमति पत्रको दरखास्त फारामको नमूना र पाठ्यक्रम आयोगको वेबसाइटबाट प्राप्त गर्न सकिने आगोगले जानकारी दिएको छ ।

अछाम । मेल्लेख गाउँपालिका–१ रिसिदह बस्ने ४० वर्षीय मनसिंह धामी र सोही ठाउँ बस्ने ४० वर्षीय हरिदेव धामीको पहिरोमा परेर मृत्यु भएको छ । सोही ठाउँ बस्ने नन्द विष्टको घर छाउने ढुंगा निकाल्ने क्रममा आइतबार माथिबाट पहिरो आई पुरिँदा उनीहरुको घटनास्थलमै मृत्यु भएको थियो । पहिरोमा परेर नन्द विष्टसमेत घाइते भएकाले उपचारका लागि स्थानीय बयलपाटा अस्पतालमा पठाइएको छ। सो घटनाका सम्बन्धमा प्रहरीले अनुसन्धान गरिरहेको जनाएको छ ।

काठमाडौँ । इम्बोस्ड नम्बर प्लेट राखेर चलेका सवारी साधनदेखि ट्राफिक प्रहरी झुक्किने गरेका छन् । इम्बोस्ड नम्बरप्लेट जडान शुरु भएको नम्बर अंग्रेजीमा लेखिँदा र उक्त नम्बर प्लेटमा ट्राफिक व्यवस्थापन गर्न बानी नपर्दा झुक्किने गरेका हुन् । मन्त्रिपरिषद्को निर्णयअनुसार प्रदेशमा आधारित इम्बोस्ड नम्बर प्लेट राख्नुपर्ने व्यवस्था गरेको हो । दरबारमार्ग ट्राफिक कार्यालयमा कार्यरत एक प्रहरी जवान इम्बोस्ड नम्बर प्लेटका सवारीसाधनबाट आफू झुक्किने गरेको बताउनुहुन्छ । “नेपाली नम्बर प्लेटका सवारीसाधनको व्यवस्थापन गर्दै आएकामा इम्बोस्ड नम्बरप्लेटका सवारीसाधन आउँदा शुरुशुरुमा कुन सवारीसाधन होला भनेर अन्योल हुँदो रहेछ,”– उहाँ भन्नुहुन्छ । उपत्यकामा इम्बोस्ड नम्बरप्लेटका सवारीसाधन गुड्न थालेपछि सर्वसाधारण मात्र नभई अधिकांश ट्राफिक प्रहरी नै झुक्किने गरेका छन् । इम्बोस्ड नम्बरप्लेटको ज्ञान नहुनु र जडान कार्य शुरु भएकाले अधिकांश ट्राफिक प्रहरी झुक्किने गरेका हुन् । महानगरीय ट्राफिक प्रहरी महाशाखाका प्रमुख सर्वेन्द्र खनाल इम्बोस्ड नम्बरको सवारीसाधनलाई व्यवस्थापन गर्नका लागि यातायात कार्यालयसँग समन्वयन गरेर ट्राफिक प्रहरीलाई तालीमको व्यवस्था गर्न लागिएको बताउनुहुन्छ । “नेपालमा इम्बोस्ड नम्बरप्लेटको थालनी भर्खरै भएकाले शुरुमा झुक्किनु स्वभाविक हो, हामी सबै ट्राफिक प्रहरीलाई इम्बोस्ड नम्बरप्लेटबारे चाँडै नै तालीम दिन्छौँ,”– उहाँ भन्नुहुन्छ । सरकारले वाग्मती अञ्चलमा दर्ता भएका चारपांग्रे्रे सवारीसाधनमा अनिवार्यरुपमा इम्बोस्ड नम्बरप्लेट जडान गर्नुपर्ने व्यवस्था गरेपछि अहिले धमाधम इम्बोड नम्बरप्लेट राख्ने काम भइरहेको छ । यातायात व्यवस्था विभागले वाग्मती अञ्चलमा दर्ता भएका सरकारी र संस्थानका सवारीका लागि आगामी चैत मसान्तभित्र र अरु सवारीसाधनलाई २०७५ असार मसान्तसम्म अनिवार्यरुपमा इम्बोस्ड नम्बरप्लेट जडान गर्नुपर्ने व्यवस्था गरेको छ । त्यसपछि क्रमशः अरु सवारीसाधनमा इम्बोस्डप्लेट जडान कार्य गरिनेछ । सरकारले अहिले पाँच प्रकारको इम्बोड नम्बरप्लेटको व्यवस्था गरेको छ । जसमध्ये राष्ट्रपतिको सवारीसाधनलाई निशान छापसहितको नम्बर, सरकारी र संस्थानलाई सेतो प्लेटमा रातो नम्बर, कूटनीतिक सेतो प्लेटमा निलो नम्बर, निजी सेतो प्लेटमा कालो नम्बर र भाडाका सवारीसाधनलाई पहेँलो प्लेटमा कालो नम्बर राख्ने व्यवस्था गरेको छ । यसैगरी इम्बोस्ड नम्बरको शुरुको अक्षर क्रमशः मोटरसाइकलको ‘ए’, कार, जिप डेलीभरी भ्यानको ‘वी’, टेम्पो र अटोरिक्साको ‘सी’, पावर टिलरको ‘डि’, ट्र्याक्टरको ‘इ’ मिनिवसको ‘एफ’, ट्रक बस ‘जी’ गरी राखिएको छ । इम्बोस्ड नम्बर लिनुभन्दा अगाडि यातायात कार्यालयमा अहिलेसम्म बाँकी रहेको सवारी कर बुझाएर मात्र आवेदन दिनुपर्ने हुन्छ । पहिलो चरणमा चारपाँग्रे साना तथा ठूला सवारी धनीले मात्रै इम्बोस्डप्लेटका लागि आवेदन दिन सक्नेछन् । यातायात व्यवस्था विभागका महानिर्देशक रुपनारायण भट्टराई हालसम्म एक हजार २०० सवारीसाधनमा इम्बोस्ड नम्बरप्लेट जडान गरिसकिएको बताउनुहुन्छ । “दैनिक १०० देखि १५० सवारीसाधनमा इम्बोस्ड नम्बरप्लेट जडान भइरहेको छ,”– उहाँ भन्नुहुन्छ । कार्यालयमा हालसम्म इम्बोस्ड नम्बरप्लेट राख्नका लागि करिब चार हजार आवेदन परिसकेको महानिर्देशक भट्टराई बताउनुहुन्छ ।

अछाम । पूर्व पश्चिम जोड्ने पुष्पलाल (मध्य पहाडी) लोकमार्ग अन्तर्गत अछाम र दैलेखको सीमा कर्णाली नदीमा पक्की पुल बनेसँगै यात्रा गर्न सहज हुने भएको छ । मध्य पहाडी लोकमार्गमा निर्माण हुने ८० पक्की पुलमध्ये अछाम र दैलेखको सीमा कर्णाली नदीको बेलखेतमा निर्माण भएको पुल सबैभन्दा लामो दुई सय मिटरको छ । लोकमार्गका ४८ पक्की पुल निर्माण भइसकेका र ३२ पुल निमार्णाधीन अवस्थामा रहेको आयोजना प्रमुख सुरेन्द्र थारले जानकारी दिनुभयो । ०६६ सालबाट निर्माण कार्य थालिएको उक्त पुल रु साढे २२ करोडको लागतमा निर्माण सम्पन्न भएको थारले जानकारी दिनुभयो । पक्की पुल बनेसँगै स्थानीयवासी निकै खुशी भएका छन् । नदी वारपार गर्न ‘फेरी’को साहारा लिएर जोखिमपूर्ण यात्रा गर्नुपथ्र्यो पक्की पुलले गाडी मोटरलाई मात्र हैन हामीलाई पनि आवत जावतमा सजिलो भएको छ स्थानीयवासी मीना नेपालीले खुशी व्यक्त गर्नुभयो । अछामको बयाला गाविस घर भएकी मीनाले नेपालगन्ज, काठमाडाँै जाने क्रममा कयौँ पटक डुंगाको कठिन यात्रा गरेको सुनाउनुभयो । अब जोखिमको यात्रा गर्नु पर्दैन खुशी हँुदै उहाँले भन्नुभयो । डुंगाको जोखिमपूर्ण यात्रामा नदी तर्ने क्रममा डुंगा पल्टिएर कयाँै मानिसले ज्यान गुमाउनु परेको थियो भने कयौँ आफन्तका खुशी खोसेको थियो कर्णालीले । स्थानीयवासी धनबहादुर बोहरा भने पक्की पुल बनेसँगै अब मालसामान आपूर्ति गर्न मात्र हैन स्थानीयवासीले उत्पादन गरेको तरकारीले पनि बजार पाउनेमा ढुक्क हुनुहुन्छ । संघसंस्थाले तरकारी र फलफूल खेती गर्न सिकायो तालीम लियौँ तर बजार नहुँदा स्थानीयवासीले आफूलाई खान पुग्ने गरी मात्र उत्पादन गर्ने गरेको उहाँले सुनाउनुभयो । ०६४ सालबाट निर्माण कार्य थालिएको लोकमार्गले पूर्वी नेपालको नुवाकोटदेखि पश्चिम नेपालको बैतडीलाई जोड्नेछ । कूल एक हजार ७८६ किलोमिटर लम्बाइ रहेको पुष्पलाल (मध्य पहाडी) लोकमार्गले मध्य नेपालका २५ जिल्लाका २१५ बस्तीलाई जोडेको छ । यो आयोजना निर्माणपछि एक करोड जनसङ्ख्या प्रत्यक्ष लाभान्वित हुने अपेक्षा राखिएको छ ।

पर्वत । आफ्नै प्रेमिकालाई हत्या गरी कालीगण्डकी नदीमा फाल्ने एक युवक प्रहरीद्वारा पक्राउ परेका छन् । पर्वत जिल्लाको बिहादी गाउँपालिका–२ बर्राचौरका २३ वर्षीय विक्रम भन्ने प्रदीप पराजुली पक्राउ परेका हुन् । पराजुलीले यही माघ ५ गते बाग्लुङको जैमुनी नगरपालिका–८ बस्ने २२ वर्षीया कमला शर्मालाई हत्या गरी पर्वतको विहादी गाउँपालिका–२ बउरस्थित बाँझो खेतबाट कालीगण्डकीमा फालेका थिए । तर मृतकको शव भने गुल्मीको कालीगण्डकी गाउँपालिका–४ घुमाउनेस्थित कालीगण्डकीको किनारमा फेला परेको थियो । माघ ५ गतेदेखि हराइरहेकी कमला माघ १७ गते मृतावस्थामा फेला परेकी थिइन् । पराजुलीले कमला शर्मालाई कर्तव्य गरी मारी कालीगण्डकी नदीमा फालेको भन्ने साबिती बयान दिएका थिए । उनले कमलासँग आफूले शारीरिक सम्बन्ध राखेको र गर्भ रहेको थाहा पाएपछि हत्या गरेको बताए । अभियुक्त पराजुलीलाई जिल्ला प्रहरी कार्यालय गुल्मीमा अनुसन्धानका लागि पठाइएकामा प्रारम्भिक अनुसन्धानपश्चात् उक्त घटना पर्वतको साबिक बर्राचौर गाविस–२ हाल विहादी गाउँपालिका–२ बगरस्थित बाँझो खेतमा घटेको पुष्टि भएपछि उक्त मुद्दा दर्ता गर्ने र अनुसन्धान गर्ने क्षेत्राधिकार जिल्ला प्रहरी कार्यालय पर्वतको पर्ने भएको पर्वत प्रहरीमा पठाइएको हो । पराजुलीलाई पर्वत प्रहरीको हिरासतमा राखी बयान तथा अन्य थप अनुसन्धानको म्याद थप गरिएको छ । प्रहरी हिरासतमा राख्नका लागि शनिबारदेखि लागू हुने गरी दोस्रो पटक १० दिनको को म्याद थप गरी अनुसन्धान भइरहेको जिल्ला प्रहरी कार्यालय पर्वतका प्रमुख दिलीप घिमिरेले जानकारी दिनुभयो ।

झापा, माघ २२ । झापाको बिर्तामोड नगरपालिकास्थित अदुवा खोलामाथि निर्माणाधीन पक्की पुलको काम रोकिएको छ । पुल निर्माण शुरु भएको एक महिना नबित्दै काम रोकिएको हो । पूर्व–पश्चिम राजमार्गलाई छ लेनको बनाउने क्रममा राजमार्गको बीचमा पर्ने यो पुललाई फराकिलो बनाउने उद्देश्यले काम शुरु गरिएको थियो । तर, पुल निर्माणका लागी जमिन खन्न आवश्यक उपकरण नहुँदा निर्माण कार्य रोकिएको सडक डिभिजन कार्यालय दमकले जनाएको छ । पुल निर्माणको ठेक्का लिएको काष्ठमण्डप सफल राजेश जेभीले सुरुमा मेसिन विना कामदार मात्र लगाएको र खन्दै जाँदा ग्राभेल भेटिएकाले काम रोकिएको सडक डिभिजन कार्यालय दमकका इन्जिनियर माधव पौडेलले जानकारी दिए । कम्पनीले मेसिन ल्याएर काम गर्ने जनाएकाले केही ढिला भएको उनले बताए । ७ करोड १५ लाख ९४ हजार रुपैयाँको लागतमा यो पुल निर्माणको ठेक्का भएको छ । ११ मिटर चौडाई र ३६ मिटर लम्बाईको यो पुल दुई वर्षभित्रै सम्पन्न गर्ने लक्ष्य लिइएको सडक डिभिजन कार्यालय दमकले जनाइएको छ । तर उपकरणको अभावमा काम रोकिएपछि लक्ष्य प्रभावित हुनसक्ने बताइएको छ ।

मुस्ताङ, माघ २२ । अत्याधिक चिसो मौसममा पनि मुस्ताङका मजदुर गिटी कुटेरै जिविकोपार्जन गर्न बाध्य भएका छन् । हिउँदका तीन महिना मुस्ताङका अधिकांश गतिविधि ठप्प हुँदा अरु काम नपाइने भएपछि जिविकोपार्जनका लागि गिटी खोज्न बाध्य हुनुपरेको मजदुरहरु बताउँछन् । वर्षायामको समयमा खेती–किसानी लगायत बिकास तथा पूर्वाधार निर्माणका प्रशस्तै काम पाईने भए पनि हिउँदमा केही काम नपाउने गरेकाले आफूहरु गिटी कुट्न बाध्य भएको उनीहरु बताउँछन् । जोमसोम बजारदेखि नजिकैको ठूलो पहाडको खोंचमा उनीहरु दैनिक गिटी कुटिरहेका भेटिन्छन् । चिसोका कारण विद्यालय बन्द हुँदा बालबालिकासमेत यही काममा सक्रिय हुने गरेका छन् ।