काठमाडौं, पुस ३ । उपराष्ट्रपति नन्द बहादुर पुनका छोरा दिपेश पुन एक साता लामो उपचारपछि अस्पत्तालबाट डिस्चार्ज भएका छन् । मंसिर २४ गते रोल्पाबाट विजय जुलुस सकेर काठमाडौं फर्किने क्रममा रोल्पाको सातदोबाटोमा दुर्घटना हुँदा टाँउकोमा चोट लागि घाइेत भएका पुनको राजधानीको ग्राण्डि अस्पतालमा उपचार भइरहेको थियो । तीन दिन आइसियुमा राखेर उपचार गरे पश्चात उनलाई मंसिर २७ गते अस्पतालको आइसियुबाट बाहिर वार्डमा सारिएको थियो । उपचार सकिएपछि आइतबार उनलाई डिस्चार्ज गरिएको हो ।

काठमाडौं, पुस ३ । अख्तियार दुरुपयोग अनुसन्धान आयोगले भ्रष्टाचारका मुद्दा दायर गर्ने क्रममा हालसम्मकै बढी बिगो मागदाबी गरेको छ । दुई दिनअघि राष्ट्रपतिलाई बुझाइएको वार्षिक प्रतिवेदनमा आर्थिक वर्ष २०७३/७४ मा अख्तियारले हालसम्मकै बढी मागदाबी लिएको उल्लेख छ । विशेष अदालतमा दायर यी मुद्दामध्ये अधिकांशको फैसला आउन बाँकी छ । गत आर्थिक वर्षमा विशेष अदालतमा मुद्दा दायर गर्ने क्रममा ११ अर्ब ५२ करोड ११ लाख रुपैयाँ बिगो मागदाबी गरेको प्रतिवेदनमा उल्लेख छ । कर फस्र्योट आयोगका अध्यक्ष लुम्बध्वज महत, सदस्य उमेश ढकाल र सदस्यसचिव चूडामणि शर्माविरुद्ध राजस्व छलीको आरोपमा दायर भ्रष्टाचार मुद्दाका कारण वार्षिक बिगोको आकार झन्डै सात गुणाले बढेको हो । आर्थिक वर्ष २०७२/७३ मा कुल बिगो मागदाबी एक अर्ब ३३ करोड र २०७१/७२ मा एक अर्ब ३९ करोड रुपैयाँ थियो । गत वर्ष कर फस्र्याेट आयोगका पदाधिकारीविरुद्ध मात्रै १० अर्ब २ करोड रुपैयाँका दरले बिगो मागदाबी गरिएको थियो । -कान्तिपुरबाट

काठमाडौं, पुस ३ । नेपाल आयल निगमले सर्वसाधारणका लागि ६ अर्ब रुपैयाँ बराबरको सेयर जारी गर्ने भएको छ । चुक्ता पूँजी बृद्धिको क्रममा रहेको निगमले सर्वसाधारणबाट उक्त रकम जुटाउन लागेको हो । हाल निगमको चुक्ता पूँजी २९ करोड रुपैयाँ छ । चुक्ता पूँजी वृद्धि गरेर २० अर्ब रुपैयाँ पुर्‍याइने निगमले जनाएको छ । निगमका अनुसार पूँजी वृद्धिका लागि सेयर जारी गर्ने सम्बन्धमा अर्थ मन्त्रालयमा छलफल भइसकेको छ । -कान्तिपुर दैनिकबाट

कपिलवस्तु, पुस २ । ट्र्याक्टर पल्टिँदा आइतबार एक युवकको मृत्यु भएको छ । जिल्लाको बाणगंगा नगरपालिका–६ झरनी भगलापुरमा लु ३ त ५२१५ नंको ट्र्याक्टर अनियन्त्रित भई पल्तिदा २४ वर्षीय सुरेश थारूको घटनास्थलमै मृत्यु भएको हो । ट्र्याक्टर दुर्घटना हुँदा एकजना गम्भीर घाइते भएको र अन्य पाँच जना भने हाम्फालेर बाँच्न सफल भएको इलाका प्रहरी कार्यालय पिपराका प्रहरी निरीक्षक राजु कार्कीले जानकारी दिए । दुर्घटनामा गम्भीर घाईते भएका अशोक खत्रीलाई थप उपचारका लागि बुटबल पठाइएको प्रहरीले जनाएको छ ।

काठमाडौं, पुस २ । निर्वाचन आयोगले प्रतिनिधिसभा तथा प्रदेशसभा सदस्य निर्वाचनका लागि भदौ १४ गतेदेखि लागू गरेको निर्वाचन आचारसंहिता मंसिर २७ गतेदेखि नै हटाएको जानकारी गराएको छ । आयोगको मंसिर २६ गतेको बैठकले निर्वाचन आचारसंहिता लागू नरहने निर्णय गरेको आयोगका प्रवक्ता नवराज ढकालले जानकारी दिए । निर्वाचन आचारसंहिताअनुसार आयोगले तोकेका निकायका लागि तोकिएको अवधिभर संहिता लागू हुनेछ । नेपाल सरकार र नेपाल सरकारका मन्त्री, स्थानीय तह, स्थानीय तहका कर्मचारी, सार्वजनिक संस्थाका कार्यालय तथा कर्मचारी, सरकारी तथा अर्धसरकारी संस्थाको कार्यालय तथा कर्मचारी, नेपाली सेना, नेपाल प्रहरी, सशस्त्र प्रहरी बल, राष्ट्रिय अनुसन्धान विभाग तथा तत्तत् निकायमा कार्यरत सुरक्षाकर्मी, निर्वाचनको काममा संलग्न कर्मचारी र सार्वजनिक पद धारण गरेका व्यक्तिका लागि आयोगले मंसिर १० र २१ गते हुने निर्वाचनका लागि भदौ १४ गतेदेखि निर्वाचन आचारसंहिता लागू गरेको थियो । उम्मेदवारको हकमा भने मनोनयन दर्ता गराएको मितिदेखि निर्वाचन आचारसंहिता लागू भएको थियो ।

बैतडी, पुस २ (रासस) । जिल्लाका स्थानीय तहमा शिक्षाका कर्मचारी नहुँदा शिक्षा कार्यक्रम प्रभावित भएको छ । जिल्लाका पाँचवटा स्थानीय तहमा शिक्षाका कर्मचारी खटाइए पनि ती ठाउँमा अझै कर्मचारी गएका छैनन् । जिल्लाका दशरथचन्द नगरपालिका, पाटन नगरपालिका, दोगडाकेदार गाउँपालिका, डिलाशैनी गाउँपालिका र मेलौली नगरपालिकामा शिक्षाका कर्मचारी खटाइए पनि कर्मचारीको पदीय मार्यादाक्रम नमिल्दा उनीहरू नगएका हुन् । स्थानीय तहमा नासु तहकालाई कार्यकारी जिम्मा दिइँदा शिक्षाका अधिकृतस्तरका कर्मचारी उनीहरुको मातहतमा बस्नुपर्ने भएकाले उनीहरू जान नमानेको जिल्ला शिक्षा कार्यालयका विद्यालय निरीक्षक शंकरदत्त भट्टले जानकारी दिनुभयो । उहाँले भन्नुभयो, “स्थानीय तहमा शिक्षाका कर्मचारी नजाँदा शिक्षाका कार्यक्रम सञ्चालनमा समस्या भएको छ ।” दलित छात्रवृत्ति, अपांग छात्रवृत्ति र भौतिक निर्माणका कामबाहेक सबै स्थानीय तहले गर्ने र त्यसमा शिक्षाका कर्मचारीको प्रतिनिधित्व हुनु आबश्यक थियो तर स्थानीय तहमा शिक्षाका कर्मचारी खटाउने विषयमा केन्द्रमै सहमति हुन बाँकीे छ । बैतडीमा चार नगरपालिका र छ गाउँपालिका गरी १० स्थानीय तह छन् ।

धनगढी, पुस २ (रासस) । टीकापुरबाट धनगढी आउँदै गरेको कर्णाली रिभर यातायातको से१ख ११९२ नंको यात्रुवाहक बस आज पूर्वपश्चिम राजमार्ग अन्तर्गत पर्ने कैलालीको राजीपुर सडकखण्डमा दुर्घटना हुँदा एक जनाको मृत्यु भएको छ । विपरीत दिशाबाट आइरहेको अर्को बसलाई बाटो दिने क्रममा अनियन्त्रित भई सडकमै पल्टिँदा ठेगाना खुल्न नसकेका सोही बसका सहचालक १८ वर्षीय अर्जुन नेपालीको घटनास्थलमै मृत्यु भएको जिल्ला प्रहरी कार्यालय कैलालीले जनाएको छ । दुर्घटनामा बसमा सवार छ जना घाइते भएकामा स्थानीय पद्मा अस्पतालमा उपचार भइरहेको छ । यस्तै कैलालीको घोडाघोडी नगरपालिका–९को फाराम गाउँको एक कच्ची घरमा गए राति आगलागी हुँदा जलेर ७५ वर्षीया मन्धरा धामीको मृत्यु भएको छ । आगलागी हुँदा घरमा उहाँबाहेक अन्य कोही थिएनन् ।

काठमाडौं, पुस २ । सीजी इलेक्ट्रोनिक्सले ‘Enjoy and Have a Great Trip To Egypt 2017’ भन्ने आवाजका साथ आफ्ना ८५ वटा डिलरहरुलाई इजीवाईपीटी भ्रमण गर्न लगेको कुरा कम्पनीले जनाएको छ । प्रत्येक वर्ष नेपालभरिका सीजी इलेक्ट्रोनिक्सका डिलरहरुलाई मनोरञ्जन प्रदान गर्नका लागि साथसाथै ब्राण्डको प्रबद्र्धनको लागि प्रोत्साहन गर्नको लागि विदेश भ्रमणको अवसर प्रदान गर्दै आएको छ । यस परम्परालाई निरन्तरता दिने उद्देश्यका साथ सीजी इलेक्ट्रोनिक्सल हरेक वर्षझैं यसपालि पनि आफ्ना डिलरहरुलाई ईजीवाईपीटी भ्रमण लगिएको कुरा जनाएको छ ।  

काठमाडौं, पुस २ । शुक्रबार सिंहदरबारभित्र पार्किङ्ग गरी राखिएको गाडीको पाङ्ग्रा शनिबार चाेरी भएको छ । उक्त गाडीको टायर त्यहीको कर्मचारीले नै चोरी गरेको खुलासा भएको छ। चोरी भएका टायर बरामद गरी चोरीमा संलग्न सरकारी चालकमाथि प्रहरी अनुसन्धान अघि बढाइएको छ। चोरी भएका चारैवटा टायर प्रहरीले शंखमूलस्थित बाराही टायर सेन्टरबाट बरामद गरेको छ। सिसिटिभीको आधारमा अनुसन्धान गरी चोरी घटना पत्ता लागेको हो। ‘चोरी भएका चारै वटा टायर ग्यारेजमा भेटिसकेका छौं’, सिंहदरबारस्थित सुरक्षा गणका डिएसपी प्रेम जोशीले भने, ‘चोरी गर्ने व्यक्ति पनि पत्ता लागिसकेको छ, पक्राउ गर्ने क्रममा छौं।’ चोरी गर्ने व्यक्ति सिंहदरबारभित्रै काम गर्ने चालक भएको अनुसन्धानमा खुलेको छ। स्थानीय विकास मन्त्रालयको परिसरमा रहेको टोयोटा हाइलक्स गाडीको चार वटै टायर चोरी भएका हुन्। डिएसपी जोशीका अनुसार, शनिबार साँझ टायर चोरी गरेको र आइतबार बिहान लगेर ग्यारेजमा बिक्री गरेको खुलेको छ। ग्यारेजका सञ्चालकलाई समेत प्रहरीले अनुसन्धानका लागि पक्राउ गरेको छ। सिंहदरबारमा विगतमा पनि पटक(पटक चोरी हुँदै आएको छ। पाँच वर्षअघि एक उपसचिव नै सिंहदरबारभित्र चोरीको आरोपमा कारबाहीमा परेका थिए।

म्याग्दी, पुस २ (रासस) । म्याग्दीको अन्नपूर्ण गाउँपालिका– ६ घारका बासिन्दाले स्वास्थ्य चौकीलाई रु १० लाखभन्दा बढी मूल्य पर्ने जग्गा उपलब्ध गराएका छन्। साँघुरो कोठाबाट सेवा प्रवाह गर्दै आएको स्वास्थ्य चौकीको नयाँ सुविधा सम्पन्न भवन निर्माणका लागि स्थानीयवासीले दान र आर्थिक सहयोग जुटाएर जग्गाको व्यवस्था गरेका हुन् । स्वास्थ्य चौकी व्यवस्थापन समितिका अध्यक्ष ठगराज बरुवालले बुबा अमरबहादुरको नाममा एक रोपनी र स्थानीय गोविन्द खड्काले आठ आना जग्गा निःशुल्क उपलब्ध गराउनुभएको छ । यसैगरी स्थानीयस्तरमा रु आठ लाख जुटाएर दुई रोपनी नौ आना जग्गा खरिद गरी स्वास्थ्य चौकीलाई उपलब्ध गराइएको अध्यक्ष बरुवालले बताउनुभयो । घारको निमरुख भन्ने ठाउँमा स्थानीयले उपलब्ध गराएको चार रोपनी एक आना क्षेत्रफल जग्गामा नयाँ भवन निर्माणको काम शुरु भएको छ । सो जग्गाको मूल्य स्थानीय बजारभाउअनुसार रु १० लाखभन्दा बढी पर्ने जनाइएको छ । सहरी आवास तथा भवन निर्माण डिभिजन कार्यालय बागलुङले ठेक्कामार्फत स्वास्थ्य चौकीको भवन निर्माण शुरु गरेको छ । निर्माण कम्पनीले कार्यक्षेत्रमा प्रारम्भिक चरणको काम शुरु गरेको छ । पन्ध्र श्यया क्षमता बराबरको दुईतले भवन निर्माणका लागि रु एक करोड ५६ लाखको इस्टिमेट गरिएको छ । विसं २०७५ जेठ महिनाभित्र भवन निर्माण सम्पन्न गर्ने लक्ष्य छ । हाल घारस्थित गाउँ संरक्षण व्यवस्थापन समितिले उपलब्ध गराएको एउटा कोठाबाट स्वास्थ्य चौकी सञ्चालन हुँदै आएको छ । बिरामीको स्वास्थ्य परीक्षण गर्ने, औषधि भण्डारण गर्नेदेखि प्रशासनिक काम एउटै कोठाबाट गर्नुपर्दा समस्या भएको छ । आवश्यक पूर्वाधारको अभावमा सेवा प्रवाहमा कठिनाइ भएको छ । यसैबीच घार स्वास्थ्य चौकीमा टेलिमेडिसिन सेवा सञ्चालनको तयारी भएको छ । काठमाडौं मोडल अस्पतालसँग सहकार्य गरेर टेलिमेडिसिन सेवा सञ्चालनका लागि पूर्वाधार जुटाउन पहल थालिएको व्यवस्थापन समितिका अध्यक्ष बरुवालले बताउनुभयो ।

लहान,  पुस १ । विगत केही दिनयता बढेको शीतलहर र चिसोका कारण यहाँका अस्पतालमा बिरामीको चाप बढेको छ । मंसिरको अन्तिम साताबाट शुरु भएको चिसो क्रमशः बढ्दैै जाँदा जिल्लाको जनजीवनसमेत प्रभावित भएका छन् । बाक्लो हुस्सु र चिसो हावाका कारण बस्तीमा रुघाखोकी, ज्वरो, श्वासप्रश्वास र हाडजोर्नीका बिरामी निकै बढेका छन् । सिरहा सदरमुकामस्थित जिल्ला अस्पताल, लहान अस्पताल तथा ग्रामीण भेगका सरकारी स्वास्थ्य संस्थामा अहिले बिरामीको चाप निक्कै बढेको जिल्ला जनस्वास्थ्य कार्यालय सिरहाले जनाएको छ । दुधे बालकदेखि ६० वर्षसम्मका वृद्धवृद्धा रुघाखोकी, ज्वरो, श्वासप्रश्वास, निमोनिया लगायतका प्रकोपबाट पीडित भएका छन् । पछिल्लो एक सातायता चिसो झनै बढेपछि सदरमुकाम र जिल्लाका अन्य बजार क्षेत्रमा चहलपहल र आवागमन निक्कै पातलिएको छ भने सरकारी कार्यालयमा सेवाग्राहीको संख्या ह्वातै घटेको छ । उपचारका लागि अहिले दैनिक करिब २० देखि २५ जना अस्पतालमा आउने गरेको सिरहा जिल्ला अस्पालका मेसु डा चुमनलाल दासले जानकारी दिनुभयो ।

पाल्पा, पुस १ । पाल्पा पूर्वखोला गाउँपालिका–२ जल्पाको मैदान नजिकै शनिबार ट्र्याक्टर दुर्घटना हुँदा एक जनाको मृत्यु भएको छ । मृत्यु हुनेमा पूर्वखोला गाउँपालिका मैदानका मनबहादुर बाह्रघरे रहेका छन् । तारे गहिराबाट बालुवा लिएर मैदानतर्फ आउँदै गरेको लु१त ८३७७ नं ट्र्याक्टर दुर्घटनामा परी अन्य चार जना घाइते भएका छन् । घाइतेको अहिले तानसेनस्थित मिसन अस्पतालमा उपचार भइरहेको पूर्वखोला गाउँपालिका–२ का वडाध्यक्ष नीरबहादुर सारुले बताउनुभयो । दुर्घटनापछि ट्र्याक्टर ५० मिटर तल अम्रिसाको झाडीमा खस्न पुगेको हो । घाइते जल्पा मैदानका गाडी मालिक कर्णबहादुर कुवँर, रेवन्त हिस्की, तिलबहादुर गाहा र सुशान्त सारु रहेको वडाध्यक्ष सारुले जानकारी दिनुभयो ।

कैलाली, पुस १ । बहिरा तथा फरक क्षमता भएका प्रदेश नं.७, का विद्यार्थी गुणस्तरिय शिक्षाबाट बञ्चित भएका छन् । सांकेतिक भाषामा बढाइ हुने विद्यालय तथा शिक्षकको अभावमा उनीहरु गुणस्तरिय शिक्षाबाट बञ्चित भएका हुन् । बहिरा विद्यार्थीको संख्या बढ्दै गए पनि आफू अनुकूल पढाई हुने विद्यालय भने नरहेको उनीहरुको गुनासो छ । दक्ष सांकेतिक भाषाका शिक्षक नहुँदा बिचमै बढाई छोड्ने बहिरा विद्यार्थीको दर पनि बढ्दै गएको छ । बहिरा विद्यार्थीका यस्ता थुप्रै समस्या भए पनि समाधानका लागि भने राज्य उदाशिन बनेको उनीहरुको क्षेत्रमा क्रियाशिल व्यक्तिहरुको गुनासो छ । प्रदेश नं.७ मा मात्रै तिन सय हाराहारी बहिरा विद्यार्थी छन् । तर, शिक्षक भने औंलामा गन्न सकिने मात्रै रहेका छन् । सरकारी दरबन्दी रहेका जम्मा सात जना शिक्षक छन् । दिनहुँ ‘बहिरा विद्यार्थीको संख्या बढ्दै गए पनि उनीहरुको समस्या समाधान गर्न राज्य उदाशिन छ । यो प्रदेशमा बहिराका लागि उच्च शिक्षा हासिल गर्न एउटा पनि स्कुल छैन । जसले गर्दा उनीहरुले उच्च शिक्षा हासिल गर्न बाग्लुङ, पोखरा, बैरहवा, काठमाडौं लगायत ठाउ“ जानु पर्ने बाध्यता रहेको बहिरा संघ कैलालीका कार्यक्रम संयोजक रमेश भट्टराइले बताए । मुलुक संघिय संरचनामा गइ सकेकाले बहिरा विद्यार्थीले पनि सुविधा पाउनेमा झीनो आश भने राखेका छन् । स्थानीय सरकार बनि सकेकाले लामो समय देखि भोग्दै आएका समस्या अब हल हुने उनीहरुले आशा राखेका हुन् । स्थानीय तहका जनप्रतिनिधिले पनि बहिरा विद्यार्थीले बर्षौं देखि भोग्दै आएका समस्या अन्त्य हुने बताएका छन् । आफ्नो कार्यकालमा बहिरा विद्यार्थीको समस्या समाधान गर्न हर सम्भव प्रयास गर्ने धनगढी उप–महानगरपालिका नगर प्रमुख नृपबहादुर वडले आश्वासन दिए । विभिन्न अभाव तथा समस्याकाविच प्रदेश नं.७ का बहिरा विद्यार्थी अध्ययन गरि रहेका छन् । न पढ्नलाई व्यवस्थित विद्यालय रहेका छन्, न त दक्ष शिक्षक । यस्ता समस्याले गर्दा बहिरा विद्यार्थी निकै दिक्क छन् । बहिरामैत्रि विद्यालय नहुँदा त झनै समस्या छ । बहिरा विद्यार्थीका यस्ता थुप्रै समस्या रहेकाले समाधानका लागि केन्द्रमा पहल भइरहेको राष्ट्रिय बहिरा महासंघ नेपालका केन्द्रीय अध्यक्ष केपी अधिकारीले बताए । प्रवेशीका परिक्षासम्म पनि बहिराका लागि पढाइ हुने विद्यालय नहु“दा सुदूरपश्चिमका अधिकांश विद्यार्थीले बिचमै पढाइ छोड्ने गरेका छन् । पर्याप्त सांकेतिक भाषाका शिक्षक नहुँदा पनि बहिरा विद्यार्थीलाई समस्या छ । बहिरा विद्यार्थीले यस्ता थुप्रै समस्या भोगी रहेका राज्यले थाह पाए पनि समाधानका लागि कमै अग्रसरता देखाएको पाइन्छ । त्यस कारण अब बहिरा विद्यार्थीका यस्ता समस्याको छिटो समाधान गर्न राज्यले ध्यान दिन जरुरी छ रहेको बहिरा विद्यार्थीले बताएका छन् । यस्तै, कैलालीको धनगढी उपमहानगरपालिका–११, बेलामा रहेको श्री दक्षिणकाली प्रा.वी. बहिरा श्रोत कक्षाको दुइ कोठे भवनको उद्घाटन गरिएको छ । शुक्रबार एक कार्यक्रमका बिच धनगढी उपमहानगरपालिकाका प्रमुख नृपबहादुर वडले भवनको उद्घाटन गरेका हुन् । भवनको उद्घाटन गर्दै उनले आफ्नो पाँच वर्षिय कार्यकालमा अहिले तिन कक्षासम्म पढाइ हुँदै आएको विद्यालयलाई १२ सम्म बढाइ हुने बनाउने प्रतिवद्धता जनाए । बहिरा विद्यार्थीले उच्च शिक्षा हासिल गर्न जिल्ला बाहिर जानुपर्ने बाध्यता आफ्नो कार्यकालमा अन्त्य गर्ने मेयर वडले दाबी गरे । कार्यक्रमका प्रमुख अतिथि समेत रहेका मेयर वडले विद्यालयमा सांकेतिक शिक्षक अभाव भएको गुनासो आएकाले उक्त समस्या शिघ्र समाधान गर्ने आश्वासन दिए । कार्यक्रममा बोल्ने धेरैले बहिरा विद्यार्थीले थुप्रै समस्या खेपी रहेको गुनासो गरेका थिए । समस्या समाधान गर्न कसैले पनि खासै ध्यान दिन नसकेको उनीहरुको भनाई थियो । कार्यक्रममा बहिरा महासंघ नेपालका केन्द्रीय अध्यक्ष केपी अधिकारी, बहिरा महांसघका जिल्ला अध्यक्ष दिनेश पनेरु, अभिभावक लगायतले बोलेका थिए ।    

जाजरकोट, पुस १ । निर्माणाधीन घर भत्किँदा कुशे गाउँपालिका–६ छहरागाउँमा एक महिलाको ज्यान गएको छ । घर भत्किँदा शुक्रबार साँझ कुशे गाउँपालिका ३ कि ४८ बर्षिय दुर्गा बुढाको ज्यान गएको हो । निर्माणाधीन घर भत्किदा मृतक बुढा पुर्णरुपमा पुरिएको उनका श्रीमान दधिमल बुढाले बताए । त्यस्तै दुर्गाकी नातिनी ६ वर्षीया कल्पना बुढा सामान्य घाइते भएकी छिन् । नातिनी कल्पनालाई तत्काल भत्केको घरबाट निकालेकाले बचाउन सकेको दुर्गाका श्रीमान् दधिमलले बताए । श्रीमतीलाई भने बचाउन नसकेको उनले बताए । कुशे गाउँपालिका–३ का उनीहरू वडा नम्बर ६ छहरगाउँमा घर बनाउँदै थिए ।

नुवाकोट, पुस १ । गल्छी–त्रिशूली–मैलुङ सडक योजनाको कामलाई तीव्रता दिनका लागि आजदेखि गल्छी–त्रिशूली सडकखण्डको गल्छीदेखि पीपलटारसम्मको खण्डमा दैनिक आठ घण्टा सडक बन्द हुने भएको छ । गल्छी–त्रिशूली–मैलुङ–स्याफ्रुबेँसी–रसुवागढी सडक योजनाले सडक स्तरोन्नतिको कामलाई तीव्रता दिँदैछ । प्रअिजको अध्यक्षतामा आज बसेको सरोकार भएकाहरुको बैठकले उक्त सडक तीन महिनाका लागि आंशिक बन्द गरी निर्माण अघि बढाउने निर्णय गरेको हो । योजनाको निर्माण अपेक्षित रुपमा अघि बढ्न नसकेको र अहिले अप्ठ्यारा भीर काट्ने कामको शुरुआत हुन लागेकाले सडक बन्द गरिएको योजना प्रमुख देवकोटाले बताउनुभयो । धादिङको गल्छीदेखि रसुवाको स्याफ्रुबेँसीसम्म ८२ किमी सडकमध्ये ४६ किमी क्षेत्रमा स्तरोन्नतिको काम भइरहेको छ । रु नौ अर्ब लगानी रहेको योजनाअन्तर्गत सडकको दायाँबायाँ पर्खाल लगाउने र सडक विस्तारको काम भइरहेको छ । उत्तर–दक्षिण(चीन र भारत) जोड्ने छोटो नाकाका रुपमा रहेको यो सडक विस्तारलाई अझै प्रभावकारी रुपमा अघि बढाउन पुस १ गतेदेखि फागुन मसान्तसम्म बिहान ६ देखि ९ बजेसम्म र बिहान ११ देखि अपराह्न ४ बजेसम्म पीपलटारदेखि गल्छीसम्म बाटो पूर्णरुपमा बन्द हुने जनाइएको छ । यो योजना विसं २०७३ वैशाख २५ मा २७ महिनाभित्र काम सम्पन्न गर्ने गरी काम शुरु भए पनि जग्गा अधिग्रहण, बिजुलीका खम्बा र वन क्षेत्रका कारण निर्माणमा ढिलाइ भइरहेको छ ।