पोखरा, मंसिर १० । पोखरा अन्तर्राष्ट्रिय विमानस्थलको जग्गा सम्याउने काम तीव्र गतिमा अघि बढेको छ । निर्माणको जिम्मा लिएको चिनियाँ ठेकेदार कम्पनी चाइना सिएएमसी इञ्जिनियरिङ कम्पनीले विमानस्थलको जग्गा सम्याउने काम गरिरहेको छ । जग्गा सम्याउन डोजर, एक्साभेटर, लोडर र टिपरको प्रयोग भइरहेको आयोजनाका प्रशासकीय अधिकृत प्रमोदकुमार यादवले जानकारी दिनुभयो । कम्पनीका प्रमुख जेरी याङका अनुसार यस वर्षको हिउँदसम्ममा विमानस्थलको जग्गा सम्याउने काम सम्पन्न गरिने छ । जग्गा सम्याएपछि टर्मिनल भवन र धावनमार्ग निर्माणको काम अघि बढाइने छ । अहिले १०० जनाभन्दा बढी चिनियाँ प्राविधिक र नेपाली कामदार विमानस्थलको काममा खटिएका छन् । कम्पनीले कार्यालय भवन, प्राविधिक तथा मजदुर बस्ने अस्थायी भवनको निर्माण सकेको छ । चिनियाँ एक्जिम बैंकको करिब रु २२ अर्बको ऋण सहयोगमा निर्माण शुरु गरिएको पोखरा अन्तर्राष्ट्रिय विमानस्थलको निर्माण सन् २०२० जुलाईसम्ममा सक्ने लक्ष्य राखिएको छ । विसं २०३२ मा पोखरा–लेखनाथ महानगरपालिका–१४ छिनेडाँडामा अन्तर्राष्ट्रिय विमानस्थल निर्माण गर्न तीन हजार १०६ रोपनी जमिन अधिग्रहण गरिएको थियो । नपुग भएपछि ६२९ रोपनी जमिन थप अधिग्रहण गरिएको हो ।

सोलुखुम्बु, पुस १० । सोलुखुम्बुको विकट क्षेत्र मानिने कोसीपारिदेखि राजधानी सिधा यातायात सञ्चालन भएपछि स्थानीय हर्षित भएका छन् । दूधकोशीका गाउँपालिका र सोताङ गाउँपालिकाको बीचमा पर्ने दूधकोशी खोलामा ह्युमपाइप राखेर सवारी आवतजावत गर्नसक्ने भएपछि कोशीपारिबाट राजधानीसँग सिधा यातायात सेवा सञ्चालनमा आएको हो । सोताङ गाउँपालिकाको रु पाँच लाख, स्थानीय प्रकाश कार्कीको करिब रु सात लाख र अन्य स्थानीयको आर्थिक सहयोग र पहलमा दूधकोशीमा ह्युमपाइप राखी सडक यातायात सुचारु गरिएको सोताङ गाउँपालिका–५ का अध्यक्ष विष्णु थापाले जानकारी दिनुभयो । जिल्लाको विकट क्षेत्र सोताङ गाउँपालिकाको शिवटार बजारदेखि सदरमुकाम सल्लेरी, राजधानी काठमाडाँैलगायतको क्षेत्रमा सिधा जिप सेवा सञ्चालन हँुदा त्यस भेगका नागरिकले विकासको अनुभूति गरेका छन् । खच्चड र भारियामार्फत दैनिक उपभोग्य वस्तुको ढुवानी गर्ने व्यापारीले समेत ट्र्याक्टरमार्फत सामान ढुवानी गर्दा व्यवसाय सञ्चालनमा सहज भएको बताउँछन् । कोशीपारिको मुख्य बजार शिवटारका व्यापारी दीपक खड्काले भन्नुभयो, “सामान ढुवानी गर्नको लागि दूधकोशी खोला वारी र पारी दुई ठाउँ स्टोर थियो तर अहिले शिवटार बजारमै छ ।” सिधा ट्र्याक्टरमार्फत सामान ढुवानी गर्दा केजीमा रु २० देखि रु १०० सम्म कम मूल्यमा दिन सकिएको छ, खड्काले भन्नुभयो । भौगोलिक हिसाबले सदरमुकामदेखि निक्कै टाढा र विकट मानिने कोशीपारिका नागरिक केही वर्ष अगाडिसम्म सदरमुकाम आउँदा सातुसमाल नै बोकेर आउने गरेको अनुभव सुनाउँछन् । सामान्य कार्यालयको काम गर्न जानकै लागि बाटैमा एक रात बास बस्नुपर्ने उनीहको बाध्यता थियो । सोताङ गाउँपालिका–५ का चन्द्रबहादुर राई भन्नुहुन्छ, “सडक यातायात सञ्चालन नहुँदा बुढाबुढीलाई त दुई रात नै बास बस्नुपथ्र्यो, बाटोमा बास बस्न र खानाको समेत समस्या हुनेहुँदा सातुसामल बोकेर जान्थ्याँै, तर अहिले त्यो समस्याबाट मुक्त भएका छौँ ।” सदरमुकामदेखि पूर्वक्षेत्रमा पर्ने सोताङसम्म करिब ६५ किलोमिटर सडकको ट्रयाक खोलिएको छ । त्योभन्दा अझ पूर्वतर्फ त्यसको दोब्बर यात्रापछि पुग्नसकिने महाकुलुङको बस्ती पनि छ । दुई वर्ष अगाडिसम्म सदरमुकामदेखि करिब २३ किलोमिटरको दूरीसम्म जिप सेवा सञ्चालन थियो तर यो यस वर्षको पुस पहिलो हप्तादेखि ६५ किलोमिटरसम्मै सिधा सेवा सञ्चालन भइरहेको छ । केही दिन अगाडिसम्म एक दिनको पूरै पैदलयात्रा पछि जिपमार्फत दुई दिनमा सदरमुकाम सल्लेरी पुग्नुपर्ने कोशीपारिका आम नागरिकको बाध्यतासमेत अहिले हटेको छ । महाकुलुङ गाउँपालिका–४ की स्थानीय शिक्षिका तारा कुलुङले भन्नुभयो, “अब त केही घण्टाको पैदलयात्रा पछि जिप सेवामार्फत एकै दिनमा सदरमुकामसहित राजधानी पुगिन्छ, हामी यसैमा गौरव छौँ ।” कोशीपारिका नागरिकहरु अहिले बिहान गएर बेलुका घरमै आइपुग्ने गरेको सोताङकै मोतीराम बस्नेतको भनाइ छ । दूधकोशी खोलामा ह्युमपाइप राखेर सिधा यातायात सञ्चालन गरेपछि केही दिनयता सोताङको शिवटार बजारसम्म सिधा जिप सञ्चालन हुँदा सडक कहिले आउँछ र गाडीमार्फत यात्रा गर्ने भन्ने कोशीपारिका नागरिकको सपना पूरा भएको स्थानीय धनमाया कटुवालले बताउनुभयो । सल्लेरीको जोरबौद्धदेखि करिब ६५ किलोटिरको दूरीमा सोताङ शिवटार बजार पर्छ । गाडीमा यात्रा गर्ने त्यस भेगका नागकिरको सपना पूरा भए पनि भर्खरै ट्रयाक खोलिएकाले सडकको गे्रड नमिल्नु, दूधकोशीमा पुल नहुँदा जोखिम पूर्ण ढंगले खोला तर्नुलगायतले जिप भाडा भने महँगो तिर्नुपर्ने त्यस भेगका नागरिकको बाध्यता छ । स्थानीय धनकुमार विश्वकर्माले सडकको स्तरोन्नति र बेली बिज्रको लागि सम्बन्धित निकायले ध्यान दिनुपर्ने बताउनुभयो । अहिले त्यस भेगका नागरिकले सोताङ शिवटारदेखि सल्लेरीसम्म एक हजार १०० र राजधानी काठमाडाँैसम्मका लागि रु दुई हजार २०० जिप भाडा तिर्दै आएका छन् । दूरीको हिसाबले यो भाडा बढी भए पनि सडकको अवस्था हेर्दा सामान्य रहेको यातायात व्यवसायी बताउँछन् । जिप चालक चरित्र तामाङले भन्नुभयो, “विकट क्षेत्रका नागरिकलाई सेवा दिन पाउँदा खुशी लागेको छ, तर हाम्रो बाध्यता उहाँबाट बढी भाडा लिनैपर्छ, भर्खर ट्रायक खोलिएको छ, दूधकोशी खोलामा पूरै ह्युम पाइप छैन, आधामात्र छ खोला पार गर्दा जोखिम पनि छ ।” सल्लेरीदेखि दूधकोशी खोला ४५ किलोमिटर र दूधकोशीदेखि शिवटार बजार २० किलोमिटर दूरी छ । दूरी कम भए पनि गाडीमा मर्मतको बिल बढी आउने हुँदा सेवा मात्र दिन सकिएको तर व्यवसायमा कुनै नाफा नहुने सोलुखुम्बु यातायता व्यवसायी संघका सदस्य तथा जिप व्यवसायी डिकबहादुर कटुवालको भनाइ छ । सडकको स्तरोन्नतिमा गुणस्तरीयता आउने हो भने जिप भाडा तत्काल समायोजन गर्न सकिने कटुवालको भनाइ छ । मोतिधन कन्ट्रक्सनले सोताङ गाउँपालिकाको दिप्लीघाटदेखि शाद्धीसम्म सडक स्तरोउन्नतिसँगै ट्रयाक खोल्ने जिम्मेवारी पाएको छ । कुल रु दुई करोड २० लाख मा करिब २० किलोमिटर सडकको स्तरोन्नति र बाँकी ट्रायक खोल्ने जिम्मा उक्त कम्पनीले पाएको सडक डिभिजन हर्कपुर ओखलढुंगाले जनाएको छ । सडक डिभिजनका इञ्जिनियर सुशील घिमिरेका अनुसार बे्रकर बिग्रिएर स्तरोन्नतिको काम हुन नसके पनि केही दिनपछि काम शुरु हुनेछ । इञ्जिनियर घिमिरेका अनुसार रोक्तिदेखि दिप्लीघाटसम्मकै सडकको तत्काल स्तरोउन्नति गर्न आवश्यक छ । दूधकोशीका गाउँपालिका–७ रोक्तिदेखि सोही गाउँपालिका–८ सम्म करिब २२ किलोमिटर दूरी रहेको उक्त सडकको तत्कालीन जिल्ला विकास समितिले ट्रयाक खोलेको थियो । इञ्जिनियर घिमिरेले भन्नुभयो, “त्यस क्षेत्रमा हाम्रो कुनै योजना पनि छैन, तर त्यहीबीचको स्तरोन्नतिमा ध्यान दिन आवश्यक छ ।” दिप्लीघाटदेखि सोताङको तत्काल स्तरोउन्नति हुन्छ, सहज सेवा सञ्चालनमा कुनै कमी हुने छैन, इञ्जिनियर घिमिरेले भन्नुभयो । दूधकोशीका गाउँपालिका–७ र ८ मा पर्ने रोक्ति दिप्लीघाट सडकको तत्काल स्तरोन्नति गर्ने गाउँपालिका अध्यक्ष असिम राईले बताउनुभयो । अध्यक्ष राईले भन्नुभयो, “हामीसँग प्राविधिक नभएको कारण विकास निर्माणको काम हुनसकेको थिएन तर हामीले करारमा नियुक्त गरेका छाँै, गाउँपालिकाको पहिलो प्राथमिकता सडक हो, बजटे पनि विनियोजन भइसकेको छ, काम चाँडै हुन्छ ।” दूधकोशीका गाउँपालिकाले सडकको ट्रायक खोल्ने र स्तरोन्नतिको लागि मात्र रु १७ करोड बढी रकम विनियोजन गरेको गाउँपालिकाले जनाएको छ । सडकको पटकपटक स्तरोन्नति भए पनि आँखामा छारो हाल्ने मात्र काम हुने गरेको उपभोक्ताको आरोप छ । पटकपटक स्तरोन्नति गर्ने तर गुणस्तर कम हुँदा आम नागरिकले सास्ती खेप्नुपर्ने हुन्छ त्यसैले गणस्तरमा ध्यान दिनुपर्छ, सोताङका शिक्षक झमकबाबु बस्नेतले सुझाव दिनुभयोे । विभिन्न विकास निर्माणलाई हेर्दा उपभोक्त समिति, ठेकदारले गुणस्तरभन्दा परिमाण बढाउने हुँदा समस्या आउने गरेको जालिम बिहानी समाज देउसाका अध्यक्ष चूडामणि केसीले बताउभुयो । नागरिकले हरेक विकासपछि केही राहत महशुस गर्छन् जुन सहजतालाई व्यवस्थित बनाउँदै दीर्घकालीन बनाउन जोड दिनुपर्ने आम नागरिकको सुझाव छ ।

बनेपा, पुस १० । काभ्रेपलाञ्चोकको विभिन्न ठाउँमा रहेका ग्यास उद्योग जोखिम अवस्थामा रहेको पाइएको छ । प्रमुख जिल्ला अधिकारी शिव सिङ्खडासहितको टोलीले ग्यास उद्योगको अनुगमन गरेपछि सुरक्षाको हिसाबले अधिंकाश ग्यास उद्योगले सुरक्षा शर्त पालना नगरेको पाइएको छ । “ग्यास उद्योग स्थापनामा सुरक्षाका हिसाबले लापरबाही जस्तो देखिएको छ त्यसैले उद्योग सञ्चालकलाई बोलाएर छलफल गर्छौं,” प्रजिअ सिङ्खडाले भन्नुभयो । उहाँले ‘अटोमेटिक फायर फाइरिङ सिस्टम’ नभएको, पानी पनि कम भएकाले सुरक्षाको दृष्टिकोणले जोखिम रहेको आँैल्याउँदै अव्यवस्थितरुपमा ग्यास उद्योग सञ्चालन भएको बताउनुभयो । “कामदार पनि उद्योगमा बस्दैनन्, केही भइहाल्यो भने कहाँ खोज्न जाने,” उहाँले भन्नुभयो । सगरमाथा ग्यास उद्योगका सावर मल्ल अग्रवालले उद्योग मापदण्डअनुसार नै भएको दाबी गर्दै भन्नुभयो, “हामीले उद्योग सञ्चालनमा ल्याउँदा यहाँ कोही थिएन, अन्य उद्योग पछि थपिएका हुन् ।” विसं २०५३ मा स्थापना भएको सो उद्योगले दुई हजार ५०० देखि तीन हजारसम्म ग्यास सिलिण्डर उत्पादन गर्दै आएको छ । सो ग्यास उद्योग नजिकै सूर्य ग्यास उद्योग र चण्डेश्वरी ग्यास उद्योग सञ्चालनमा छन् । बनेपाका व्यवसायी सुधीर पलाञ्चोके, विष्णुहरि कक्षपतिलगायतले सञ्चालन गरेको सूर्य ग्यास उद्योग र पलाञ्चोकेलगायत अरुले साझेदारीमा सञ्चालनमा ल्याएको चण्डेश्वरी ग्यास उद्योगमा आपत्कालीन समय र आगलागी नियन्त्रणका लागि आवश्यक पर्ने पानी ट्याङ्की र उपकरण ‘अटोमेटिक फायर फायरिङ सिस्टम’ समेत नभएको उद्योगमा कार्यरत कर्मचारीले बताए । विसं २०५८ मा उद्योग विभागमा दर्ता भएको सूर्य ग्यास उद्योगले २०६५ असारदेखि सूर्य ब्राण्डको ग्यास वितरण गर्दै आएको छ भने २०६५ सालमा उद्योग विभागमा दर्ता भएको चण्डेश्वरी ग्यास उद्योगले २०६८ सालदेखि चण्डी ब्राण्डको ग्यास वितरण गर्दै आएको छ । सूर्य ग्यास उद्योगले दैनिक एक हजारदेखि एक हजार २०० सिलिण्डर र चण्डी ग्यासले ८०० देखि एक हजार सिलिण्डर बजारमा बिक्री वितरण गर्दै आएको छ । यी तीनवटा उद्योग बनेपा नगरपालिका–१० थापा गाउँमा रहेका छन् । त्यस्तै, बनेपा नगरपालिका–१ नालामा उग्रचण्डी ग्यास उद्योग स्थापना भएको छ । सो उद्योग सञ्चालनमा आएपछि विवाद हुँदै आए पनि उद्योगले ग्यास बिक्री वितरण गर्दै आएको छ । उक्त उद्योग बस्ती नजिकै भएको भन्दै स्थानीयवासीले हटाउनका लागि संघर्ष समिति नै गठन गरेर सर्वोच्च अदालतलाई नै गुहारेका थिए । अहिले सो ग्यास उद्योगसम्बन्धी मुद्दा विचाराधीन अवस्थामा रहेको संघर्ष समितिका अध्यक्ष विश्वराम श्रेष्ठ बताउनुहुन्छ । नेपाल आयल निगमको एलपी ग्यास विनियमावली, २०६५ (संशोधनसहित) मा गाउँ बस्तीभन्दा पाँच किमी र अरु उद्योग रहेको स्थानबाट पाँच किमी हुनुपर्ने उल्लेख छ । तर काभ्रेपलाञ्चोकको बनेपामा स्थापना भएका तीनवटा ग्यास उद्योग केही मिटरको वरिपरि नै सञ्चालन भइरहेका छन् । पछि थप भएको ग्यास उद्योग पनि करिब एक किमीको आसपासमा रहेको छ । “बस्ती नजिकै छ भनेर विरोध गरेका हौँ, तर पछिल्लो समय कसैले पनि यो विषयमा बोलेका छैनन्,” बनेपा–१ का मुक्ति लामिछाने भन्नुभयो । बनेपामा रहेको अर्को हिमाल ग्यास उद्योगसहित पाँच उद्योग छन् । वीरगञ्जस्थित सुपर ग्यास उद्योगमा दुईजनाको ज्यान जाने गरी भएको आगलागी भएपछि स्थानीयवासी त्रसित छन् ।

रोल्पा, पुस १० ।  गाउँपालिकाको नाम र केन्द्र परिवर्तन गर्ने निर्णयसँगै रोल्पाका तीन स्थानीय तहमा विवाद चर्किएको छ । रोल्पाको सुवर्णावती र सुकिदह गाउँपालिकाको नाम परिवर्तन तथा त्रिवेणी गाउँपालिकाको केन्द्र परिवर्तन गर्ने विषयसँगै विरोध चर्किएको हो । सुवर्णावती गाउँपालिकाको नाम परिवर्तन गरी शहीद सुनिल स्मृति गाउँपालिका नामाकरण गर्ने भन्दै गाउँपालिका अध्यक्ष गुणेन्द्र घर्तीले प्रस्ताव पेश गरेपछि सोही गाउँपालिकाका विभिन्न चारवटा वडाका वडाध्यक्षले निर्णय पुस्तिकामै असहमतिको बुँदा लेखेपछि विवाद चुलिएको हो । गाउँ कार्यपालिकाको बैठकमा गाउँपालिकाका अध्यक्ष गुणेन्द्र घर्तीले साविक नाम परिवर्तन गर्दै नयाँ नाम राख्ने प्रस्ताव गरेपछि सुवर्णवती गाउँपालिका–४ का वडाध्यक्ष गञ्जबहादुर क्षेत्री, वडा नं ३ का वडाध्यक्ष जेदबहादुर विष्ट, वडा नं २ का वडाध्यक्ष नेत्रबहादुर गिरी र वडा नं १ का वडाध्यक्ष केशवलाल कुँवरले निर्णय पुस्तिकामा असहमति लेख्दै विज्ञप्तिसमेत प्रकाशित गरेका छन् । ऐतिहासिक र पौराणिक नाम रहेको सुवर्णाती परिवर्तन गरी व्यक्ति विशेषको नाममा सिंगो गाउँपालिकाको नाम राख्ने प्रयास भएको विज्ञप्तिमा उल्लेख गरिएको छ । यता गाउँपालिका अध्यक्ष गुणेन्द्र घर्तीमगरले भने सुवर्णावती गाउँपालिका पौराणिक, साहित्यिक नाम भएकाले जनताले उच्चारण गर्न गाह्रो मान्नुको साथै नामाकरणसमेत अर्थपूर्ण नरहेकाले नाम परिर्वतन गर्नुपरेको बताउनुभयो । गाउँपालिकाभित्रका चर्चित नेता सुनिलको नाम निकै चर्चित रहेकाले जनताले सहजै उच्चारण गर्न सक्ने र परिवर्तनमा समेत महत्वपूर्ण भूमिका खेलेका शहीदको नाममा गाउँपालिकाको नाम परिर्वतन गर्ने प्रस्ताव आएको बताउनुभयो । अहिले प्रस्तावका रुपमा मात्रै आएको छ पुस १२ गते बृहत् छलफल गरी टुंगो लाग्छ घर्तीले भन्नुभयो । अध्यक्ष घर्तीले गाउँपालिकाको पहिलो सभामा नाम परिवर्तन गर्ने विषयमा सहमति भइसकेको दाबीसमेत गर्नुभयो । ऐतिहासिक तथा पौराणिक नाम परिवर्तन गर्दै गाउँपालिकाका उपाध्यक्ष वागमती थापाको मृतक श्रीमान् किमबहादुर थापा सुनिलको नामबाट गाउँपालिकाको नाम राखेको भन्दै विपक्षीले विरोध गरेको बताइएको छ । उता करिब एक साताअघि पश्चिम रोल्पाको सुकिदह गाउँपालिकाले समेत नाम र केन्द्र परिवर्तनको निर्णय गरेपछि विवाद सिर्जना भएको थियो । मंसिर २९ गते बसेको गाउँपालिका बैठकले माओवादी जनयुद्धमा मारिएका गंगा वली र देवराज वलीको नामबाट ‘गंगादेव’ गाउँपालिका राख्ने गरी निर्णय भएको बताइएको छ । गाउँपालिकाको नाम परिवर्तनप्रति नेपाली काँग्रेस, नेकपा (एमाले)लगायतका दलले असहमति जनाउँदै आएका छन् । एमालेका स्थानीय नेता रोशनकुमार वलीको संयोजकत्वमा संघर्ष समिति समेत तयार गरी दबाबमूलक कामको थालनी गरिएको स्थानीयले जानकारी दिए । गाउँपालिका अध्यक्ष वीरबहादुर खत्रीले आफ्नो मृतक श्रीमती गंगा वलीको नामबाट गाउँपालिकाको नाम परिवर्तन गर्नुका साथै आफ्नो घरपायक पर्ने गरी केन्द्रसमेत परिवर्तन गरेको स्थानीयले आरोप लगाएका छन् । सो गाउँपालिकामा देखिएको विवाद अहिलेसम्म मिल्न सकेको छैन । यसैगरी रोल्पाको त्रिवेणी गाउँपालिकामा समेत केन्द्र परिवर्तनको विषयमा विवाद देखिएको छ । स्थानीय तहको पुनःसंरचना सिफारिश गर्न गठित जिल्ला प्राविधिक समितिले समेत केन्द्रका बारे सर्वसम्मत निर्णय गर्न नसक्दा विवाद कायमै रहे पनि जुगार सिफारिस गरेको थियो । लामो समयसम्म विवाद रहेको सो स्थानमा पुनः विवाद चुलिएको छ । गाउँपालिकाको केन्द्र त्रिवेणी की जुगार भन्ने विषयलाई निकास दिन सर्वसम्मत निर्णयको प्रयासमा लागेका छाँै गाउँपालिकाका अध्यक्ष शान्तकुमार ओलीले भन्नुभयो । सर्वसम्मत निर्णय हुन नसके अल्पमत र बहुमतबाट भए पनि टुंगो लाग्छ ओलीले भन्नुभयो । स्थानीय तह निर्वाचन सम्पन्न भएको छ महिनाभित्र केन्द्र र नाम परिवर्तन गर्न सकिने कानूनी व्यवस्थाअनुसार तोकिएको समय आउन थोरै समय रहँदा जिल्लामा नाम र केन्द्र परिवर्तनको विषय उठेको बताइन्छ । हाल जिल्लाका दुई वटा स्थानीय तहको नाम परिवर्तन गरी सशस्त्र युद्धमा मारिएका नेता कार्यकर्ताको नाममा गाउँपालिकाको नामाकरण गर्ने तयारी गरेको माओवादी केन्द्रले आफ्नो पार्टीले जितेको सबै स्थानीय तहको नाम परिवर्तन गर्ने रणनीतिमा लागेको काँग्रेस, एमालेले आरोप लगाएका छन् । जिल्लामा थवाङ, दुइखोली, माडी, सुकिदह, सुवर्णाती, सुनछहरी गाउँपालिका र रोल्पा नगरपालिका गरी सातवटा स्थानीय तह नेकपा माओवादी केन्द्रले जितेको थियो । यसैगरी एमालेले त्रिवेणी र रुन्टी गढी गाउँपालिका गरी दुई स्थानीय तह र काँग्रेसले लुंग्री गाउँपालिकामा मात्र विजयी हासिल गरेको थियो ।

कपिलवस्तु, पुस १० । कपिलवस्तुको भारतीय सीमावर्ती कृष्णनगर बजारको कृष्णनगर अस्पताल उद्घाटन भएको ४७ वर्ष बितिसक्दा पनि अझै सञ्चालनमा आउन सकेको छैन । पश्चिम नेपालको बेलहिया सुनौली नाकापछि दोस्रो भन्सार नाकाका रूपमा परिचित यो नाकाबाट राज्यले वार्षिक अर्बौं रुपैयाँ राजश्व संकलन गर्दै आए पनि नजिकै रहेको अस्पताल भने आर्थिक अभावका कारण निर्माण थालेको पाँच दशक बित्दा पनि पूर्णता पाउन सकेको छैन । झण्डै ३३ कट्ठा क्षेत्रफलमा अवस्थित सो अस्पताल २०२७ सालमा तत्कालीन प्रधानमन्त्री सूर्यबहादुर थापाले उद्घाटन गर्नुभएको थियो । पञ्चायतको समयमा अस्पताल उद्घाटन भए पनि अहिले गणतन्त्र आइपुग्दासमेत अस्पताल पूर्णरुपमा निर्माण भई सञ्चालनमा आउन नसकेको हो । अस्पताल सञ्चालनमा आउनुको सट्टा हाल त्यहाँको भवनमा नगरपालिका र प्रहरी कार्यालय बसेका छन् । अस्पताल कहिले सञ्चालनमा आउला र स्वास्थ्योपचार पाइएला भन्ने आशा राखेका सर्वसाधारण अस्पतालभित्र नगरपालिका र प्रहरी कार्यालय बसेको देख्दा निराश छन् । स्थानीय विजय गुप्ताले ब्यङ्ग्य गर्दै भन्नुभयो, “अस्पतालमा नगरपालिका र प्रहरी कार्यालय त बिरामी भएर आएका हुन्, हामी त सामान्य मानिसले त अन्तै उपचार गराउन पर्ला ।” सरकारी स्वामित्वमा रहेको यो अस्पतालको संरक्षकमा प्रमुख जिल्ला अधिकारी, स्थानीय विकास अधिकारी र प्रहरी उपरीक्षक रहनुभएको छ । निर्माणाधीन अस्पतालको काम पूरा गर्न अहिलेसम्म दुई समिति बनिसकेका छन् । अस्पताल निर्माणमा अहिलेसम्म करिब रु एक करोडभन्दा बढी खर्च भइसकेको र अझै ठूलो रकम आवश्यक पर्ने भएकाले अस्पताल सञ्चालनमा ल्याउन नसकिएको अध्यक्ष विजय कनोडियाले जानकारी दिनुभयो । बिगतमा अस्पताल सञ्चालन गर्न सरकारलाई पटक पटक आग्रह गर्दा पनि नसुनेका कारण अहिले चुप लागेर बस्न बाध्य भएको उहाँले बताउनुभयो । करोडौँ रुपैयाँ बराबरको सम्पत्ति रहेको अस्पतालको संरक्षण गर्ने दायित्व सरकारको रहेको उहाँको भनाइ छ ।

काठमाडौँ, पुस १० । फुटवेयर म्यानुफ्याक्चरर्स एसोसिएसन नेपालले पुस १३ देखि जुत्ता चप्पल तथा छाला जन्य वस्तुको प्रदर्शनी तथा बिक्री गर्ने भएको छ । सो बारेमा जानकारी गराउन आइतबार आयोजित पत्रकार सम्मेलनमा एसोसिएसनका अध्यक्ष रवीनकुमार श्रेष्ठले नेपालमा जुत्ता चप्पलको खपत निक्कै बढेको बताउँदै विदेशी जुत्ता चप्पलको निर्वाध प्रवेशले नेपाली जुत्ता उद्योगमा प्रभाव परेको उल्लेख गर्नुभयो । प्रदर्शनी व्यवस्थापन मूल समितिका संयोजक नानिराज घिमिरेले कम्पनी रजिस्ट्रारको कार्यालयमा दर्ता भएका २२९, घरेलु तथा साना उद्योग विभाग र समितिअन्तर्गत दर्ता भएका ९३२ तथा अन्य साना उद्योग गरी कूल १५०१ जुत्ता उद्योग नेपालमा सञ्चालित भएको बताउनुभयो । उहाँले यी उद्योगमा ५० हजारको हाराहारीमा प्रत्यक्ष रोजगारी सिर्जना भएको, जसमा १६ हजार महिला संलग्न भएको बताउनुभयो । घिमिरेले नेपाली जुत्ता उद्योगको क्षमता ११ करोड १९ लाख ७१ हजार जोर जुत्ता उत्पादन गर्ने भए पनि हाल वार्षिक चार करोड ३९ लाख ५८ हजार जोर जुत्ता उत्पादन हुने गरिएको जानकारी दिनुभयो । आव ०७२÷२०७३ मा नेपाली बजारमा सात करोड ६२ लाख ४४ हजार जोर जुत्ता खपत भएको तथा नेपालमै उत्पादित जुत्ता चप्पल भने तीन करोड ६२ लाख जोर खपत भएको तथ्यांक प्रस्तुत गरियो । पुस १८ गतेसम्म सञ्चालन हुने मेलामा नेपालमा उत्पादित जुत्ता चप्पलको १३५ वटा कक्ष राखिने बताइएको छ ।

मोरङ, पुस १० । मोरङको धनपालथान गाउँपालिकाका बाढीले घर बगाएका ५१ परिवारलाई लुथरन कल्याण समाजले घर बनाइदिएको छ । अरु बाढीपीडित र बिपन्नलाई आयआर्जन तालीम तथा काम गरेर आयआर्जन गर्ने उपकरण प्रदान गरेको छ । धनपाल–६ स्थित बालुवाबाडी, दादर टोल, खयर टोलका घरबारविहीन भएका ५१ परिवारलाई समाजले घर बनाइदिएको सो संस्थाका कार्यक्रम संयोजक जोयल सोरेनले बताउनुभयो । सोरेनले भन्नुभयो, “रु ३० हजारको लगानीमा घरका १२ वटा पिलर र टिन लगाइएको हो बाँकी घेराबार घरधनीले नै गर्नुहुने छ । ५१ वटा घर निर्माण गर्न रु एक करोड ७० लाख खर्च भएको सोरेनको भनाइ छ । लत्ताकपडा, खाद्यान्न बगाएपछि वीरक्तिएका बाढीपीडित सामान्य अवस्थाको घर संस्थाले बनाइदिएकामा खुशी छन् । धनपाल– ६ स्थित बालुवाबारी की ५० वर्षीया मल्हो मरण्डीले भन्नुभयो, “घर पाएकाले खुसी छु । उहाँमात्र होइन उहाँकै छिमेकी मौला हस्दा पनि मख्ख हुनुहुन्छ”– उहाँले भन्नुभयो, “केही थिएन घर बनाइदिए उनीहरुलाई त भगवान् नै मान्नुपर्छ ।” उक्त संस्थाले बाढीपीडित किसानलाई तालीम दिएर तरकारी खेती गर्न सहयोगसमेत गरेका छन् । धनपाल गाउँपालिकाकै फूलमती देवी मण्डललगायतका किसानलाई तरकारीखेती गर्ने तालीम दिएपछि उनीहरुले राम्रो तरकारी खेती गरेर आयआर्जन गरिरहेका छन् । विपन्न समुदायका युवतीलाई ब्युटीपार्लर तालीमसमेत दिएको ब्युटीपार्लर सेन्टर खोलेकी सोना हस्दाको भनाइ छ । त्यस्तै धानपाल– ३ माया गञ्जका वसन्त ऋषिदेवलाई किराना पसल गर्न रु १५ हजार लगानीसमेत गरिदिएको छ । कर्सीया बजारमा मोटरसाइकल मर्मत सेन्टर खोल्नुभएका महेश ऋषिदेवलाई रु ४० हजारको सवारीसाधनमा हावा भर्ने उपकरण प्रदान गरेको छ । महेशले भन्नुभयो, “मेसिनले हावा भर्न थालेपछि बल प्रयोग गर्ने पम्पका लागि कस्ट गर्नु परेको छैन ।” समाजले धनपालथानको दानवती आधारभूत विद्यालयमा र मदरसा नुरानी आधारभूत विद्यालयको दुईकोठे चर्पी निर्माणका लागि आर्थिक सहयोग गरेको छ ।

तेह्रथुम, पुस १० । केन्द्रीय प्रसारण लाइनको विद्युत् जडानमा ढिलाइ हुँदा तेह्रथुम र संखुवासभाको सीमावर्ती पर्यटकीय गुफाबजार अन्धकारमै रहेको छ । पर्यटकीय क्षेत्र तीनजुरे मिल्के जलजले क्षेत्रको गुफाबजार, सुकेबजार र जोरपोखरी बजार क्षेत्र विद्युत् नहुँदा अन्धकार बनेको हो । चैनपुर नगरपालिका–१ नूनढाकीस्थित यी बजार नजिकैसम्म केन्द्रीय प्रसारण लाइनको विद्युत् पुगेको छ । तर यी बजारमा विद्युत् विस्तारका लागि बजेट अभाव हुँदा ढिलाइ भइरहेको छ । विद्युत् नहुँदा गुफा, सुके र जोरपोखरी बजारका बासिन्दा अन्धकारमा बस्न बाध्य भएका छन् । यहाँका बासिन्दाले १७ वर्षयता प्रयोग गर्दै आएको सिमखर्क जलविद्युत् आयोजना जीर्ण बनेपछि पाँच वर्षयता सास्ती व्यहोर्दै आएका छन् । दशवर्षे ग्यारेण्टी दिएको आयोजनाबाट धेरै लाभ लिए पनि केन्द्रीय प्रसारण लाइनको विद्युतीकरणमा ढिलाइ हुँदा दुःख व्यहोर्नु परिरहेको गुफाबजारको मकालु होटलका सञ्चालक हरिप्रसाद खनालले बताउनुभयो । उहाँका अनुसार १५ दिनयता जलविद्युत् आयोजनाको मेसिन बिग्रिएर विद्युत् अवरुद्ध छ । विद्युत् नहुँदा गुफाबजार पुगेका पर्यटकसमेत प्रभावित हुने गरेका छन् । विद्युत् नभएपछि मोबाइल चार्ज, क्यामेरा चार्ज, खाना पकाउन, पानी तताउन तथा रातमा बत्ती बाल्न समस्या भएको स्थानीयवासी बताउँछन् । बजारमा विद्युत् विस्तारका लागि दुई वर्षअगावै विद्युत् विस्तार समिति बनिसकेको छ । विद्युतीकरणका लागि स्थानीयवासीले समेत आवश्यक रकम जम्मा गर्न प्रतिघरधुरी रु १५ हजारसम्म जम्मा गरिसकेका छन् । तर तत्कालै विद्युत् विस्तार नभएको गुनासो उनीहरुको छ । विद्युतीकरणका लागि केही पोल र तारको अभाव हुँदा विद्युतीकरण गर्न ढिलाइ भएको विद्युत् विस्तार समितिका सचिव केदारनाथ लिम्बूले बताउनुभयो । अहिले केन्द्रीय प्रसारण लाइनको पोल र तार सुकेबजार नजिककै गुफापोखरी आधारभुत विद्यालयसम्म पुगेको छ । पटकपटकको पहलपछि बल्ल आएको लाइन पनि विस्तार गर्न ढिलाइ भएको विद्यालयकी प्रधानाध्यापक हिमा खनाल बताउनुहुन्छ । चालु आर्थिक वर्षमा विद्युत् विस्तारका लागि नगरपालिका र वडा कार्यालयसँग पहल भइरहेको स्थानीयले बताएका छन् । सन् २००० तिरै पर्यटकीय बजारमा विद्युतीकरणका लागि गोरखा वेल्फेयर सर्भिसले होली काँदुरीमार्फत जलविद्युत् आयोजना र खानेपानी आयोजना बनाएको थियो । तर मुहान नै सुक्दै जान थालेपछि अहिले यो मुहानको खानेपानीले बजारवासीलाई पुग्दैन । विद्युत्का लागिसमेत पाँच वर्षयता हिउँदमा निकै समस्या आइरहेको छ । बजारवासीले केन्द्रीय प्रसारण लाइनको विद्युत् यथाशीघ्र जडान गरिदिन माग गरेका छन् ।

भोजपुर, पुस ५ । सेफ्टी ट्यांकीसहितको शौचालय निर्माण नगर्ने भोजपुरवासीलाई सरकारी सेवा सुविधा नदिने निर्णय भएको छ । भोजपुर जिल्लालाई खुल्ला दिसामुक्त घोषणा गर्नका लागि पटकपटक निर्णय गरी मिति तोक्दा पनि स्थानीयले बेवास्ता गरी शौचालय निर्माण नगरेको भन्दै स्थानीय सरकारले यस्तो निर्णय गरेको हो । जिल्लाका सबै गाउँपालिका यसअघि नै खुल्ला दिसामुक्त घोषणा गरिएको भए पनि भोजपुर नगरपालिकाको ७ र ९ नं वडाको केही स्थानीयले जग्गाको समस्या देखाउँदै सेफ्टी ट्यांकीसहितको शौचालय निर्माण नगर्दा जिल्ला खुल्ला दिसामुक्त हुनबाट रोकिएको छ । मंगलबार बसेको सर्वदलीय सर्वपक्षीय भेलाले आगामी माघ १५ गतेसम्ममा सबैलाई शौचालय निर्माण गर्न अनुरोध गर्ने र त्यो समयमा पनि शौचालय निर्माण नगर्नेको राज्यबाट पाउने सेवा सुविधा नै कटौती गर्ने भोजपुर नगरपालिकाका प्रमुख कैलासकुमार आलेले बताए । यसका लागि घरघरमा पत्राचार गर्ने, स्थानीय सञ्चार माध्यमबाट सूचना सम्प्रेषण गर्ने बताइएको छ ।

वीरगञ्ज, पुस ५ । वीरगञ्ज महानगरपालिका– २२ स्थित पटेलनगरमा रहेको सुपर ग्यास उद्योगमा भीषण आगलागी भएको छ । उद्योगमा बिहान सवा ६ बजेतिर आगलागी भएको हो । आगलागीमा परी २ जनाको मृत्यु भएको प्रहरीले जनाएको छ । उद्योगभित्र कति मानिस थिए भन्ने अहिलेसम्म खुल्न सकेकाे छैन । आगो नियन्त्रणका लागि गएको वीरगञ्ज महानगरपालिकाको एउटा दमकलसमेत जलेको छ । दमकल जल्दा यसका फायर म्यान सविन नेपाल घाइते भएका छन् । उनकाे गण्डक अस्पतालमा उपचारका लागि लगिएकाे छ । दमकलमा रहेका हवलदार मधुसुदन मिश्र र फायरम्यान यादवप्रसाद अधिकारी सम्पर्कविहीन छन् । आगलागी फैलँदै गएपछि नियन्त्रण बाहिर छ । ग्यास सिलिण्डर पड्किरहेकाले अग्नी नियन्त्रणहरुसमेत नजिक जान सकेका छैनन् । उनीहरू अागाे लागेकाे स्थानभन्दा २-३ सय मिटर परै छन् । ग्यास सिलिण्डर पड्किँदा २ वटा शव उछिट्टिएर बाहिर अाएकाे प्रत्यक्षदर्शीले बताएका छन् । घटनास्थलमा नेपाली सेना, नेपाल प्रहरीको टोली पुगे पनि अागाे नियन्त्रणमा लिन सकिएकाे छैन । आगलागीको कारण खुलेको छैन । सारिँदै बस्तीका बासिन्दा आगालागी फैलने जोखिम बढेपछि ग्यास उद्योगनजिक रहेको इटिहाई बस्ती खाली गराइँदै छ । यो बस्ती आगलागी भएको उद्योगभन्दा करिब ५ सय मिटरको दूरीमा छ । उनीहरुलाई सुरक्षित स्थानमा सार्ने काम भइरहेको प्रहरीले जनाएको छ । उद्योगनजिक अन्य उद्योगहरु पनि छन् । ती उद्योगहरुमा पनि आगलागी फैलने खतरा बढेपछि सतर्कता अपनाइएको छ ।

काठमाडौं, पुस ५ । काठमाडौं जिल्लाबाट निर्वाचित जनप्रतिनिधिहरुलाई बधाई दिन राष्ट्रिय सभागृहमा अायाेजित कार्यक्रममा अध्यक्ष प्रचण्डले संवाेधन गर्दैछन् । बधार्इ कार्यक्रम अाज दिउँसाे २ बजे राखिएकाे छ । मुख्य तीन दल कांग्रेस, एमाले र माओवादीबीचको संवादहीनताका कारण राजनीतिक सहमति जटिल बनिरहेका बेला एमालेनिकट बुद्धिजीवी परिषदले काठमाडौं जिल्लाबाट निर्वाचित जनप्रतिनिधिहरुलाई बधाई दिन कार्यक्रम राखेकाे हाे । राष्ट्रपति कार्यालयमा अड्किएको राष्ट्रियसभा गठनसम्बन्धी अध्यादेश र नयाँ सरकार गठनका विषयमा निर्वाचनबाट ठूलो दल बनेर आएको एमाले र खुम्चिएको कांग्रेसबीच मत बाझिएपछि सहमति टाढिएको हो । कांग्रेस सत्ता हस्तान्तरण अघि राष्ट्रपतिकहाँ पठाएको राष्ट्रियसभा निर्वाचन अध्यादेश राष्ट्रपतिले जारी गरी सभा गठनको बाटो खोल्नुपर्ने अडानमा छ । कांग्रेसले सत्ता लम्ब्याउन आफू अनुकुल कानुन बनाउन खोचे थापेको आरोप एमालेले लगाएपछि सत्ता हस्तान्तरण प्रक्रिया जटिल बनेको हो । कांग्रेस–एमालेबीच यही आरोप–प्रत्यारोपका कारण प्रतिनिधि तथा प्रदेशसभा प्रत्यक्ष र समानुपातिकतर्फको मतगणना सकिएको अवस्थामा पनि नयाँ सरकार गठनको बाटो खुलेको छैन । सहमतिको खोजीमा लाग्न माओवादी अध्यक्ष पुष्पकमल दाहाल तत्पर देखिए पनि एमाले अध्यक्ष केपी ओली र प्रधानमन्त्री शेरबहादुर देउवाबीच भने महिना दिनयता संवादसमेत भएको छैन । दाहाल भने ओली–देउवा दुवैसँग छलफलमा छन् । वाम गठबन्धनका कारण पनि ओलीसँग उनको हिमचिम बढी नै छ । प्रधानमन्त्री देउवासँगको भेटघाटलाई पनि उनले निरन्तरता दिइरहेका छन् । सरकारले एकल संक्रमणीय प्रणालीका आधारमा राष्ट्रियसभा सदस्य चुनिने गरी दुई महिनाअघि राष्ट्रपतिकहाँ अध्यादेश पठाएको थियो । राष्ट्रपतिले विधेयक स्वीकृत नगर्नुमा एमालेको उक्साहट दोषी रहेको आरोप कांग्रेसको छ । उता, एमालेले राष्ट्रपतिलाई प्रधानमन्त्रीको कुर्सीबाट असंवैधानिक काम गर्न उक्साउने काम कांग्रेसले गर्न खोजेको आरोप लगाइरहेको छ ।

काठमाडौं, पुस ५ । सर्वोच्च अदालतले कैलाली क्षेत्र नम्बर, १ बाट प्रतिनिधिसभामा निर्वाचित रेशम चौधरीविरुद्ध कैलाली जिल्ला अदालतमा चलेका मुद्दाको सबै फेहरिस्त झिकाएको छ। प्रधानन्यायाधीश गोपाल पराजुलीको एकल इजलासले चौधरीविरुद्ध दायर भएको मुद्दाको मिसिलसहितका सबै विवरण पेस गर्न मंगलबार आदेश दिएको हो। फरार रहेकै बेला प्रतिनिधिसभा सदस्यमा निर्वाचित चौधरीलाई वारेसमार्फत प्रमाणपत्र दिनुपर्ने मागसहित पेस भएको रिटलाई सर्वोच्च अदालतले दर्ता गर्न अस्वीकार गर्दै फिर्ता पठाएपछि दिएको अर्को निवेदनमा यस्तो आदेश भएको हो। सर्वोच्चले चौधरीमार्फत नै अदालतमा चलेका मुद्दाको मिसिल संलग्न सबै कागजात पेस गर्न भनेको छ। दुई वर्षे बालक र प्रहरीका एसएसपी लक्ष्मण न्यौपानेसहित आठ जना सुरक्षाकर्मीको ज्यान जाने गरी भएको टीकापुर घटनामा चौधरी मुख्य अभियुक्त रहेको दाबीसहित धनगढी जिल्ला अदालतमा दायर अभियोगपत्र मुल्तवीमा छ। ०७२ साल भदौ ७ गते उक्त घटना भएको थियो। उनीविरुद्ध कर्तव्य ज्यानसहित तीनवटा मुद्दा अदालतमा छन्। त्यतिबेला सुरक्षा निकायको छानबिनले समेत दंगा भड्काएर टीकापुर नरसंहार भएको निष्कर्ष निकालेको थियो। चौधरीलाई अदालत र प्रहरीबाट पक्राउ ‘वारेन्ट’ जारी भएको छ। प्रधानन्यायाधीश पराजुलीको एकल इजलासले आदेशमा भनेको छ, ‘यसमा यी निवेदकउपर चलेको ज्यान तथा लुटपाटसमेतको मुद्दाको अभियोगपत्रसमेतका कागजातहरूको प्रमाणित प्रतिलिपि निवेदकबाट पेस गर्न लगाई नियमानुसार पेस गर्नू।’ अदालत र प्रहरीबाट पक्राउ ‘वारेन्ट’ जारी भएकै अवस्थामा चौधरीले निर्वाचनमा उठेर जितेका थिए। प्रतिनिधिसभा सदस्यमा विजयी भएपछि उनले वारेसमार्फत प्रतिनिधिसभा सदस्यको प्रमाणपत्र माग गरे पनि निर्वाचन अधिकृतले दिन अस्वीकार गरेपछि आफ्ना वारेस प्रतिनिधिमार्फत शुक्रबार सर्वोच्चमा रिट पेस गरेका थिए। सर्वोच्चका मुख्य रजिस्ट्रार नहकुल सुवेदीले यस्तो निवेदनमा वारेस नलाग्ने भएकाले दर्ता गर्न कानुनी व्यवस्थाको अभाव रहेको भन्दै फिर्ता गर्न आदेश दिएका थिए। मुख्य रजिस्ट्रारले रिट फिर्ता गरेपछि त्यसविरुद्ध चौधरीले पुनः अर्को निवेदन दिएका हुन्। उम्मेदवारी दर्ता गर्न दिने तर विजयी भएको प्रमाणपत्र नदिने निर्वाचन अधिकृतको निर्णयले आफूमाथि अन्याय र विभेद भएको दाबी चौधरीको छ। टीकापुर घटनाको विषयमा अभियोग स्वीकार गर्दै वारेसमार्फत रिट दिएको अवस्थामा मुलुकी ऐन, अदालती बन्दोबस्तको ६५ (१) नं. बमोजिम वारेससमेत नलाग्ने निर्णय सर्वोच्च प्रशासनले दिएको थियो। अदालती बन्दोबस्तको ९४ नम्बरमा पनि अभियुक्तलाई ‘वारेन्ट’ जारी भएका मुद्दामा वारेसको सुविधा नपाउने व्यवस्था छ। प्रहरी प्रतिवेदनअनुरूप जिल्ला सरकारी वकिल कार्यालय कैलालीले चौधरीविरुद्ध सर्वस्वसहित जन्मकैदको माग गर्दै जिल्ला अदालतमा मुद्दा दायर गरेको छ। यता, टीकापुर घटनाका घाइतेका तर्फबाट चौधरीलगायत व्यक्तिविरुद्ध दिएको किटानी जाहेरीका आधारमा ज्यान मार्ने उद्योगअन्तर्गत भिन्नै मुद्दा चलाइएको छ। त्यस्तै, मारिएका प्रहरीको एसएलआर तथा पेस्तोल कब्जामा लिएको भन्दै ‘डाँका चोरी’ मुद्दासमेत दर्ता भएको छ। सर्वोच्चले चौधरीलाई सभासद्को प्रमाणपत्र दिन मिल्ने वा नमिल्ने विषयमा निक्र्योलमा पुग्न अध्ययनका लागि तीनवटै मुद्दाको फेहरिस्त झिकाएको हो।

काठमाडौं, पुस ५ । प्रतिनिधिसभा र प्रदेश सभा निर्वाचनमा पार्टीले व्यहोर्नुपरेको पराजय र पार्टीको भावी नीति तथा कार्यक्रम बनाउन राष्ट्रिय प्रजातन्त्र पार्टी (प्रजातान्त्रिक)ले नौ सदस्यीय समिति बनाएको छ । मंगलबार बसेको कार्यसम्पादन समिति बैठकले पार्टी अध्यक्ष पशुपतिशमशेर राणाको संयोजकत्वमा नौ सदस्यीय समिति बनाएको प्रवक्ता राजेन्द्र गुरुङले जानकारी दिए । समितिको सदस्यमा वरिष्ठ उपाध्यक्षद्वय दीपक बोहोरा र केशरबहादुर विष्ट, उपाध्यक्ष विक्रम पाण्डे, महामन्त्रीद्वय सुनील थापा र ध्रुवबहादुर प्रधान छन् । त्यस्तै, पार्टीको उच्चस्तरीय कार्यसम्पादन समितिका सदस्य नवराज सुवेदी, हरिबहादुर बस्नेत र ठाकुर शर्मालाई पनि सदस्य बनाइएको छ । बैठकले समितिलाई निर्वाचनमा पराजयको कारण र पार्टीको आगामी नीति तथा कार्यक्रमका विषयमा पुस मसान्तसम्म प्रतिवेदन पेस गर्ने म्यान्डेट दिएको छ । समितिले प्रतिवेदन बुझाएपछि केन्द्रीय समितिमा छलफल गर्दै पारित गरेर कार्यान्वयनको चरणमा लैजाने तयारी राप्रपा (प्रजातान्त्रिक)को छ । बैठकमा महामन्त्री ध्रुवबहादुर प्रधानले निर्वाचनसम्बन्धी राजनीतिक प्रतिवेदन र कोषाध्यक्ष नीलकण्ठ काफ्लेले निर्वाचनमा भएको खर्च र आयसम्बन्धी प्रतिवेदन पेस गरेका थिए । दुवै प्रतिवेदनमा आगामी बैठकमा मात्रै छलफल हुनेछ । त्यस्तै, बैठकले स्वच्छ र निष्पक्ष रूपमा प्रतिनिधिसभा र प्रदेश सभा निर्वाचन सम्पन्न गरेकोमा सरकारलाई धन्यवादसमेत दिएको छ । प्रतिनिधिसभा तथा प्रदेशसभा निर्वाचनमा प्रत्यक्षतर्फ कुनै पनि सिट जित्न नसकेको राप्रपा प्रजातान्त्रिक समानुपातिकतर्फ तीन प्रतिशतको थ्रेसहोल्ड कटाउन नसकेपछि राष्ट्रिय दल बन्नबाट वञ्चित भएको छ ।

काठमाडौं, पुस ५ । राजधानीको शान्तिनगर गेटमा बुधबार बिहानै माइक्रोबसको ठक्करबाट पैदलयात्री घाइते भएका छन् । घाइतेको अवस्था गम्भीर रहेको प्रहरीले जनाएको छ । उपत्यका ट्राफिक प्रहरी महाशाखाका अनुसार बा२ख १३२३ नम्बरको माइक्रोबसले पैदलयात्रीलाई ठक्कर दिएको हो । घाइतेलाई उपचारका लागि तत्काल सिभिल अस्पताल लगिएकोमा सो अस्पतालबाट ट्रमा सेन्टरमा रिफर गरिएको प्रहरीले जनाएको छ । घाइते पैदलयात्रीको पहिचान खुल्न नसकेको प्रहरीले जनाएको छ । योसँगै विगत २४ घण्टामा उपत्यकामा २३ सवारी दुर्घटना भएको महाशाखाले जनाएको छ । ती दुर्घटनामा मानवीय क्षति भने नभएको जनाइएको छ । मंगलबार राजधानीका विभिन्न स्थानमा सवारी नियम उल्लंघन गर्ने एक हजार पाँचसय ८४ सवारी चालक कारवाहीमा परेका छन् ।

काठमाडौं, पुस ५ । संघीय समाजवादी फोरम नेपालका अध्यक्ष उपेन्द्र यादवले राजपा नेपालका अध्यक्ष महन्थ ठाकुरसँग पार्टी एकताको लागि प्रस्ताव गरेका छन् । उनले ठाकुरसँग अब दुई पार्टी मिलेर जानुको विकल्प नभएको भन्दै यस्तो प्रस्ताव गरेका हुन् । अध्यक्ष यादवले पार्टी एकताको लागि आफू पूर्ण तयारी अवस्थामा रहेको भन्दै यस्तो खुलासा गरेका छन् । २ नम्बर प्रदेशमा आफूहरुलाई जनताले अध्यधिक विश्वास गरेकोले यहाँको समृद्धिको लागि अब आफूहरुले काम गर्ने उनको भनाई थियो । त्यस्तै उनले राजपा नेपालसँग पार्टी एकता हुन नसके एमालेसँग एकतामा जाने समेत खुलासा गरेका छन् । उनले थपे,‘हाम्रो हर कोशिस भनेको नै राजपा नेपालसँग एकता गर्ने नै हो, मधेशी जनताले दुई पार्टीलाई मिल्नको लागि जनादेश दिएका छन्, यदि भएन भने हामी एमालेसँग सहकार्य गरेर जान्छौं।’ उनले थपे,‘मधेशको अधिकारको लागि यहाँका जनताले हामीलाई जिताएका हन् । प्रदेशमा हाम्रो सरकार बन्छ, अब विकास हामी गर्छौ, मधेशमा विकासको लहर आउँछ।’ उनले मधेशमा आफ्नो पार्टीको नेता मुख्यमन्त्री बन्ने पनि जिकिर गरे । उनले थपे,‘२ नम्ब प्रदेशमा सबैभन्दा ठूलो दल हामी हौं, त्यसैले सरकार हामी बनाउँछौं।’ त्यस्तै उनले आफूहरुको कारण कांग्रेसले मधेशमा धेरै ठाउँमा चुनाव जितेको पनि दाबी गरे । उनले थपे,‘मैले ज्ञानेन्द्र बहादुर कार्कीलाई जिताएको हुँ, सुनसरीमा हाम्रो प्रभावको कारणले उहाँले चुनाव जित्नु भयो, तर कांग्रेसले तालमेल गर्न चाहेको थिएन ।’ अध्यक्ष यादवले एमाले–माओवादी केन्द्रको वाम गठबन्धनले प्रस्ताव गरे अब बन्ने सरकारमा समेत सहभागी हुने जनाए । उनले थपे,‘उहाँहरुले प्रस्ताव गर्नुभएको छैन, यदि गर्नुभयो भने हामी यसबारेमा सकारात्मक छौं, सरकारमा जान्छौं।’