काठमाडौं, भदौ २७ । आज मंगलबारदेखि दशैंका लागि लामो दूरीमा घर जाने यात्रुहरुका लागि टिकट बुकिङ्ग खुला गरिएको छ । बुकिङ खुला गरिएको पहिलो दिन राजधानीको नयाँ बसपार्क तथा पुरानो बसपार्कमा सर्वसाधरणको भीड लागेको छ । अघिल्ला वर्षहरुमा भन्दा एक साता ढिला गरी बुकिङ खुला भएको हो । सरकार र यातायात व्यवसायीबीचको विवादका कारण बुकिङमा ढिलाई भएको थियो। गत शुक्रबार यातायात व्यवसायीसँग भएको समझदारीपछि आजदेखि बुकिङ खुला भएको हो। बुकिङको पहिलो दिन यात्रुहरुको लाइन लागेको छ। टिकटका लागि सर्वसाधरणले कष्ट व्यहोर्नु परेको बताएका छन् । यातायात व्यवसायीहरुले दशैंको मौका पारेर यात्रुहरुबाट मनपरी भाडा असुल्ने प्रवृत्तिको नियन्त्रणका लागि यातायात व्यवस्था विभागले अनुगमन टोली नै खटाएको जनाएको छ । सवारीसाधनले विभिन्न बहाना बनाई यात्रुबाट लिने तोकिएभन्दा बढी भाडादरको निगरानीका लागि विभागले यस्तो संयन्त्र तयार गरेको हो । “दशैंको मौका पारेर मनपरी भाडा लिने सवारीसाधनको निगरानीका लागि हामीले अनुगमन टोली गठन गरी फिल्डमा पठाइसकेका छौं,” यातायात व्यवस्था विभागका महानिर्देशक रुपनारायण भट्टराईले बाह्रखरीसँग भने, “सरकारले तोकेभन्दा बढी भाडा असुल्ने सवारीसाधनलाई रु। ५ हजारसम्म जरिवाना गर्नेछौं ।” यता ट्राफिक प्रहरी महाशाखाले यात्रुबाट तोकिएभन्दा बढी भाडा असुल्ने, यात्रुसँग दलाली गर्ने सवारीसाधन तथा टिकट काउण्टरको निगरानी अगाडि बढाएको छ । “विगत दुईदिन यता हामीले तोकिएभन्दा बढी भाडा लिने १६ सवारीसाधनलाई नियन्त्रणमा लिएका छौं,” महानगरीय ट्राफिक प्रहरी महाशाखा प्रमुख सर्वेन्द्र खनालले भने, “हामीले यस्तो मनपरीतन्त्र नियन्त्रणका लागि सादापोशाकमा समेत कर्मचारी खटाएका छौं ।” यस्ता छन् बस भाडाका मूल्यसूचीहरु-

धादिङ, भदौ २७ ।  पत्रकारलाई धम्की  नेपाल प्रहरीले ग्र्याभिटी क्वाइनले ठगी गरिरहेको विषयमा अनुसन्धान सुरु गरेको छ । ‘ग्र्याभिटी क्वाइनमार्फत सर्वसाधारण ठगिइरहेको बारेमा नयाँ पत्रिकामा समाचार प्रकाशित भएपछि हामीले सोमबारबाटै अनुसन्धान सुरु गरेका छौँ,’ नेपाल प्रहरीको केन्द्रीय अनुसन्धान ब्युरोका निर्देशक प्रहरी नायब महानिरीक्षक पुष्कर कार्कीले बताए । क्रिप्टोकरेन्सी नेपालमा प्रतिबन्धित नेपाल राष्ट्र बैंकले नेपालमा बिटक्वाइनलगायतका क्रिप्टोकरेन्सीहरू गैरकानुनी रहेको जनाएको छ । हालसम्म नेपालमा बिटक्वाइनलाई मुद्राका रूपमा कानुनी मान्यता प्राप्त नभएको अवस्थामा यदाकदा केही व्यक्तिले इन्टरनेटको माध्यमबाट बिटक्वाइनको कारोबार गरिरहेको भन्ने बुझिन आएको नेपाल राष्ट्र बैंकले जनाएको छ । बिटक्वाइनको कारोबार पूर्ण रूपमा गैरकानुनी रहेकाले कसैले पनि सोसम्बन्धी कारोबार नगर्न–नगराउन राष्ट्र बैंकले २९ साउनमा निर्देशन जारी गरेको छ । तर, मुलुकमा ग्र्याभिटी क्वाइनलगायतको कारोबारमार्फत ठगी भइरहेको सन्दर्भमा नयाँ पत्रिकाले जिज्ञासा राख्दा त्यो पूर्णतः गैरकानुनी भएको राष्ट्र बैंकका प्रवक्ता नारायणप्रसाद पौडेलले बताए । ‘यस विषयमा प्रहरी र स्थानीय प्रशासनले कारबाही गर्नुपर्छ । हामीसँग भएको तथ्यांक प्रहरीलाई उपलब्ध गराउँछौँ,’ उनले भने । यस विषयमा प्रहरी र राष्ट्र बैंकको नियमित संवाद भइरहेको पनि उनले जानकारी दिए । समाचार प्रकाशित भएपछि वेबसाइट बन्द सोमबार नयाँ पत्रिकामा समाचार प्रकाशित भएपछि इप्लानेटडटकमडटएवाई वेबसाइट बन्द भएको छ । मलेसियामा दर्ता कम्पनीको नेपाल र भारतमा शाखा रहेका छन् । इप्लानेटमा आबद्ध सफ्टवेयर इन्जिनियर कृष्ण झाले ग्र्याभिटी क्वाइन विकास गरेको स्रोतको भनाइ छ । त्यस्तै, इप्लानेटले बनाएको साइट पनि बन्द भएको छ । यो साइट जिपी पौडेलले आफ्नो लगइन साइट भएको बताएका थिए। नयाँ पत्रिकाकर्मीलाई ज्यान मार्ने धम्की ‘मैले ७५ जिल्लाका एसपी र डिएसपी चिनेको छु, तपाईंले आफ्नो काम गर्नुभो, अब म मेरो शक्ति देखाउँछु’ भन्दै धम्की दिएका थिए । नयाँ पत्रिका दैनिकमा सोमबार प्रकाशित समाचारलाई लिएर नयाँ पत्रिकाका पत्रकार जनार्दन बराल र उमेश पौडेलमाथि ज्यान मार्ने धम्की आएको छ । सोमबार प्रकाशित ‘ग्र्याभिटी करेन्सीका नाममा नेटवर्किङ बिजनेसबाट नयाँ ठगी’ शीर्षकको समाचारको विषयलाई लिएर ज्ञानप्रसाद (जिपी) पौडेलले मोबाइल नं. ९८५१०२०५८१ बाट र जितेन्द्र नाम र विप्लव माओवादीको कार्यकर्ता बताउने अर्का एक अपरिचित व्यक्तिले ९८००५८१४१३ नम्बरबाट धम्की दिएका हुन् । जिपी पौडेलले सोमबार बिहानै उमेश पौडेललाई फोन गरी ‘मैले ७५ जिल्लाका एसपी र डिएसपी चिनेको छु, तपाईंले आफ्नो काम गर्नुभो, अब म मेरो शक्ति देखाउँछु’ भन्दै धम्की दिएका थिए । त्यस्तै, जिपी पौडेलले पत्रकारलाई ठीक पार्नुपर्यो भनी उजुरी गरेको भन्दै विप्लव माओवादीका कार्यकर्ता बताउने व्यक्तिले ९८००५८१४१३ बाट बराललाई फोन गरी धम्की दिएका थिए । पत्रकारलाई दिएको धम्कीप्रति नेपाल पत्रकार महासंघले विज्ञप्ति गरी निन्दा गरेको छ । महासंघले समाचारको विषयमा चित्त नबुझे कानुनी बाटो हुँदाहुँदै पत्रकारलाई धम्की दिइनु खेदजनक रहेको बताएको छ । धम्की दिनेविरुद्ध कानुनबमोजिम कारबाही गर्न र पत्रकार सुरक्षाको ग्यारेन्टी गर्न स्थानीय प्रशासनसँग मागसमेत गरेको छ । नेपाल पत्रकार महासंघ नयाँ पत्रिका प्रतिष्ठान शाखा र ललितपुर शाखाले पनि पत्रकारलाई दिइएको धम्कीप्रति गम्भीर ध्यानाकर्षण भएको जनाएका छन् । ग्र्याभिटी क्वाइन बेच्न अवैध नेटवर्किङ यसरी सञ्चालन हुन्छ नक्कली ग्र्याभिटी क्वाइन बिक्री गरी ठगी गर्नेहरूले हर्बो र युनिटीजस्तै नेटवर्क मार्केटिङका माध्यमबाट ठगी गरिरहेका छन् । ग्र्याभिटी क्वाइन बिक्री गर्दा विभिन्न प्याकेज र तह सिर्जना गरी उनीहरूले अवैध नेटवर्किङ व्यवसाय सञ्चालन गरिरहेका हुन् । यसअघि हर्बो इन्टरनेसनलमा काम गरेका जिपी पौडेल, माधव खनाल, मुस्कान नेपालीसहितको टोलीले देश तथा विदेशमा रहेका नेपालीलाई नेटवर्क शैलीमा नक्कली क्रिप्टोकरेन्सी ग्र्याभिटी क्वाइन बिक्री गरिरहेका छन् । ग्राभिटी क्वाइनले १००, २००, ५००, २५०० र १५ हजार डलरको प्याकेज बिक्री गर्ने गरेको छ । प्याकेजअनुसार यिनीहरूले पैसा र बोनस क्वाइनको बाँडफाँड गर्ने गरेका छन् । हर्बो र युनिटीमा कुनै सदस्यअन्तर्गत अन्तिमसम्मै बनेका अन्य सदस्यबाट लिडरलाई बोनस आउँथ्यो । तर, ग्र्यााभिटी क्वाइनमा आफूमुनिका सात लेयरबाट मात्रै बोनस पाइने व्यवस्था छ । ग्र्याभिटी क्वाइन लगानीकर्तालाई विभिन्न ‘स्टार’मा वर्गीकृत गरिएको छ । ठगहरूले १ सय डलर लगानी गर्नेलाई सेमी स्टार भन्ने गरेका छन् । त्यसपछि क्रमशः स्टार, थ्री स्टार, फाइभ स्टार, सेभन स्टार, मेगा स्टार र गिगा स्टारमा लगानीकर्तालाई विभाजन गरेका छन् । ग्र्याभिटी क्वाइनमा जति धेरै रकम तिरेर सदस्य बन्यो पछि पाउने बोनसको दर पनि त्यति नै धेरै हुन्छ । उनीहरूले सामान्यतया सबैभन्दा कम २ सय डलरको प्याकेज बेच्छन्, त्यसमा सामान्यबाहेक बोनस पाइन्न । तर, सदस्य थप्दै जाँदा स्टार र बोनस थपिँदै जान्छ । २५ सय र १५ हजार डलरको नेटवर्क प्याकेज किन्दा भने आकर्षक बोनसको व्यवस्था छ । ग्राहकले २०० डलरको प्याकेजमा लगानी गरे ५ प्रतिशत बोनस रकम वा क्वाइन दिने गर्छन् । त्यस्तै, ५०० डलरको प्याकेजमा लगानी गर्दा १५ प्रतिशत बोनस र २५ सयको ग्राहक बन्यो भने ४० प्रतिशत रकम फिर्ता वा सो मूल्यबराबरको क्वाइन पाउँछन् भने १५ हजार डलरको ग्राहक बन्यो भने ६० प्रतिशत बोनस दिने बताउँछन् । यसरी ठूलो रकम लगानी गर्दा पहिलो तहमा ६० प्रतिशत बोनस पाउनेले त्यसपछिको सात तहसम्म बोनस पाउँछन्, तर तह घट्दै जाँदा दर पनि घट्ने गर्छ । सुरुवातमा लगानी गरेको व्यक्तिले लगानी गरेको रकमअनुसार पाँचदेखि १० जनालाई सिफारिस गर्यो भने उसको लगानी उठ्ने जिपी पौडेलले दाबी गरे । यसअघि हर्बो र युनिटीले पनि यसै किसिमको पिरामिड शैलीमा नेटवर्क सञ्चालन गरेका थिए । -नयाँ पत्रिकाबाट

धादिङ, भदौ २७ । पृथ्वी राजमार्ग अन्तर्गत धादिङको बेनिघाट रोराङ गाउँपालिका वडा नं ५ विशालटारस्थित घोप्टेभिरमा यात्रुबाहक बस दुर्घटना हुदाँ ३१ जना घाईते भएका छन् । घाईते मध्ये ४ जनाको अवस्था गम्भीर रहेको प्रहरीले जानकारी दिएको छ । घाईतेलाई उपचारका लागि काठमाडौं ल्याइएको छ । काठमाडौंबाट नवलपरासीको त्रिवेणी जाँदै गरेको लु १ ख ६६२३ नम्बरको बस सोमबार राती २ बजे तीब्र गतिका कारण आफैँ अनियन्त्रित भई दुर्घटना भएको हो । बसमा ४४ यात्रु सवार थिए ।

सोलुखुम्बु, भदौ २७ । विभिन्न प्रतिवेदनहरुले सोलुखुम्बुको लुक्लास्थित तेञ्जिङ हिलारी विमानस्थललाई विश्वकै खतरनाक विमानस्थलको सूचीमा राखेका छन् । विमानस्थलको छोटो रनवे, अवतरण गर्ने बेलाको भौगोलिक विकटता, केही समयमै परिवर्तन हुने मौसम आदिलाई उल्लेख गर्दै प्रतिवेदनहरुमा यो विमानस्थललाई खतरनाक विमानस्थलको सूचीमा राखिएको छ । तर यही खतरनाक विमानस्थलमा सुरक्षाका लागि आवश्यक पूर्वाधार तयार गरिएको छैन । छिनछिनमै मौसम बदली भइरहने लुक्ला विमानस्थलमा मौसमको अवस्था थाहा पाउने यन्त्र नै छैन । यस्ता यन्त्र विभिन्न रुटमा पनि राख्ने गरिन्छ तथापि लुक्लाको रुटमा कहीँ पनि यस्तो व्यवस्था छैन । यस्तै, लुक्ला विमानस्थलमा लाइट सिस्टम पनि छैन । मौसम खराब भई दृष्टि क्षमता कम भएको बेला विमानलाई अवतरण गराउनका लागि लाइट सिस्टम आवश्यक हुन्छ । लुक्ला क्षेत्रमा हवाईजहाज प्रवेश गरिसकेपछि मौसम खराब भएमा फर्कन सक्ने भौगोलिक अवस्था नभएकाले केही विकल्प नरहने विमान चालकहरु बताउँछन् । सगरमाथा क्षेत्रमा पर्यटक घुम्न आउने मौसममा दैनिक सयको हाराहारीमा विमान अवतरण हुने लुक्ला विमानस्थलमा मौसम खराबीका कारण समस्या दोहोरिरहने गरेको छ । वर्षेनीजस्तो विमान दुर्घटना भइरहने यो विमानस्थलमा प्रविधिको प्रयोग गरिएमा जोखिम घट्ने भएपनि त्यस्तो भएको छैन । नागरिक उड्डयन प्राधिकरण, लुक्लाले समस्या रहेको र त्यस्ता यन्त्र राख्न बारम्बार प्राधिकरणलाई अनुरोध गर्ने गरेको भएपनि पूरा नभएको बताएको छ । देशका अन्य जोखिमपूर्ण विभिन्न विमानस्थलमा पनि यस्तो समस्या रहेको बताइएको छ ।

काठमाडौं, भदौ २७ । मानव तस्करले युरोप र अमेसरकामात्र होइन, अफ्रिकामा समेत नेपाली लैजाने गरेको पाइएको छ । दक्षिण अफ्रिकामा मानव तस्करी गरेको अभियोगमा महानगरीय अपराध महाशाखाको टोलीले बाग्लुङका सागर श्रीसलाई पक्राउ गरेको छ । दक्षिण अफ्रिकामा अलपत्र परेका नेपाली युवा त्यहाँस्थित दूतावास र अपराध महाशाखाको वैदेशिक रोजगार ठगी शाखाको पहलमा स्वदेश फर्किएपछि श्रीस समातिएका हुन् । प्रहरीका अनुसार तस्करीमा संलग्न नेपालीले भारत, दक्षिण अफ्रिकामा बसेका काम गर्ने गरेका छन् । इथियोपिया, मोजाम्बिक, स्वाजिल्याण्ड हुँदै दक्षिण अफ्रिका सीमामा पुगेका तीन जना नेपालीलाई दक्षिण अफ्रिकाको सुरक्षा निकायले नियन्त्रणमा लिएर १६ दिन हिरासतमा राखेको थियो । पीडितको बयानका आधारमा दक्षिण अफ्रिकामा अझै धेरै नेपाली अलपत्र रहेको प्रहरीले जनाएको छ । –अन्नपूर्ण पोस्ट दैनिकबाट

काठमाडौं, भदौ २६ । निर्वाचन आयोगले आगामी मंसिर १० र २१ गते हुने प्रदेशसभा र प्रतिनिधिसभा निर्वाचनको निर्वाचन कार्यक्रम सार्वजनिक गरेको छ । निर्वाचन आयोगको सोमबार बसेको बैठकले निर्वाचन कार्यक्रम तालिका तय गरेको हो । आयोगले आगामी मंसिरमा हुने प्रतिनिधिसभा सदस्य र प्रदेशसभा सदस्य निर्वाचनको लागि निर्वाचन कार्यक्रम तह गरेको हो । जस अनुसार मंसिर १० गते चुनाव हुने क्षेत्रका लागि कात्तिक ५ गते उम्मेदवारी दर्ता गर्नु पर्नेछ । त्यस्तै २१ गते हुने दोस्रो चरणको चुनावका लागि उम्मेदवारी दर्ता कात्तिक १६ लाई तोकिएको छ । निर्वाचनको लागि पहिलो चरणका लागि २०७४ मंसिर १० गते आइतबार र दोस्रो चरणका लागि २०७४ मंसिर २१ गते बिहीबारको दिन बिहान ७ बजे देखि ५ बजेसम्म मतदानको समय निर्धारण गर्ने निर्णयसमेत गरेको छ ।

काठमाडौं, भदौ २६ । २ नम्बर प्रदेशमा असोज २ गते हुने स्थानीय चुनावको दिन सरकारले सार्वजनिक विदा दिने निर्णय गरेको छ । सोमबार बसेको मन्त्रिपरिषद बैठकले २ नम्बर प्रदेशमा चुनाबको दिन ( असोज २ गते) एक दिन सार्वजनिक विदा दिने निणर्य गरेको हो । शिक्षण संस्थामा पाँच दिनसम्म विदा हुने छ । विद्यालयहरुमा भदौ ३० गतेदेखि असोज ३ गतेसम्म पाँच दिन विदा दिने निर्णय सरकारले गरेको छ । अधिकांश मतदान केन्द्र विद्यालयहरुमा राखिएकाले ति विद्यालयहरुमा सार्वजनिक विदा दिन यसअघि निर्वाचन आयोगले सरकारलाई आग्रह गरेको थियो ।

धनगढी, भदौ २६ । कैलालीमा मलखादको बिक्री वितरणमा प्रभावकारी अनुगमन हुननसक्दा सरकारले उपलब्ध गराउँदै आएको अनुदानको मल चर्को मूल्यमा खरिद गर्नुपरेको गुनासो कृषकले गरेका छन् । अनुदानको मल सरकारले तोकेको मूल्यभन्दा झण्डै दोब्बर बढी मूल्यमा खरिद गर्नुपरेको किसानले बताएका छन् । “सरकारले किसानलाई अनुदानमा रासायनिक मलखादको व्यवस्था गरेकोछ,” कृषक वीरे चौधरीले भने– “बिक्रेताले चर्को मूल्यमा बिक्री गरिरहेका छन् ।” अनुदानको मल बिक्री वितरणको जिम्मा पाएको कृषि सामग्री कम्पनी लिमिटेड र साल्टट्रेडिङ कर्पोरेशनले जिल्लाका सहकारी संस्थामार्फत मलको बिक्री वितरण गर्दैआएको छ । आधिकारिक बिक्रेताबाट मात्र बिक्री गर्नुपर्ने सो मल कैलालीका एग्रोभेटलगायतका व्यापारिक पसलबाट तोकेभन्दा बढी मूल्यमा बिक्री भइरहेको छ । मलको बिक्री वितरणमा अपनाइएको प्रणाली नै गलत रहेकोले रासायनिक मलमा राज्यले दिएको अनुदान कृषक समक्ष पुग्न नसकिरहेको साल्टटे«डिङ कर्पोरेशन धनगढीका सहायक महाप्रबन्धक केशवप्रसाद पाण्डे बताए । कृषि सामग्री संस्थान र साल्टट्रेडिङले आ–आफ्ना अधिकृत बिक्रेतामार्फत मल बिक्रीको व्यवस्था गर्न सके कृषकले सुलभ मूल्यमा सहज ढंगले मल पाउने पाण्डेको भनाइ छ । मल बिक्री वितरणको जिम्मा पाएको यी दुई संस्थाले ५० किलो बोराको अनुदानको युरिया मल रु ८२६, डिएपी रु दुई हजार २७६ तथा पोटास रु एक हजार ६७६ बिक्री मूल्य तोकेकामा बजारमा उक्त मल युरिया प्रतिकिलो रु ३०, डिएपी रु ६० र पोटास रु ६० मा बिक्री भइरहेको छ । दुवै संस्थाले आफ्ना अधिकृत बिक्रेता (सहकारी संस्था)लाई मल बिक्री गर्दा प्रति बोरामा रु १२ देखि र ५० सम्म छुट दिने गरेको छ । सो मल बिक्री गर्दै आएका कतिपय सहकारी संस्थाले आफूखुशी मूल्य तोकेर बिक्री गर्ने गरेका किसानले बताएका छन् । कृषि सामग्री कम्पनी धनगढीका प्रमुख दुर्गाप्रसाद पाण्डे अनुदानको मलको बिक्री वितरण व्यवस्थापनबारे अनुगमन निरीक्षण गरिँदै आएको बताउछन । मल बिक्री गरी मनग्य आम्दानी गर्न पाइने भएपछि कैलालीमा मल बिक्री गर्नेतर्फ केन्द्रित भई धमाधम सहकारी संस्था स्थापना हुने क्रम बढेको छ ।

काठमाडौं, भदौ २६ । गृह राज्यमन्त्री श्यामकुमार श्रेष्ठले विपद जोखिम तथा न्यूनिकरण ऐन भाद्र २५ गते संसद सचिवालयमा दर्ता भईसकेको बताउनु भएको छ । सोमबार संसदको महिला, बालबालिका, जेष्ठ नागरिक र समाज कल्याण समितिले “विपदका समयमा प्रभावित असक्त महिला, बालबालिका, अपाङ्ग भएका ब्यक्तीहरुको अवस्था बारे” छलफलका लागि बसेको बैठकमा उक्त कुरा बताएका हुन । बिपद व्यवस्था ऐन प्रधानमन्त्रीको अध्यक्षतामा गठन हुनेछ भने यसको नेतृत्व नेपाल सरकारका बिशिष्ट श्रेणीका कर्मचारीले गर्नेछन । समिति केन्द्र, प्रदेश, जिल्ला र स्थानीय तहसम्म विस्तार हुने छ । जिल्लामा प्रमुख जिल्ला अधिकारी र स्थानीय तहमा गाउँ नगरपालिकाका मेयर वा अध्यक्षले समितिको नेतृत्व गर्र्नेछन । यसै वर्ष आएको बाढीले तराईका धेरै जिल्ला प्रभावित भएका छन । जसमा करीब १७ लाख मानिसहरु प्रभावित भएका छन् । ति मध्ये ८ लाख मानिसहरु महिलाहरु, ७ लाख बालबालिकाहरु, १७ हजार अपाङ्ग नागरिकहरु र २९ हजार गर्भवती महिलाहरु रहेका छन । करीब एक लाख दुई हजार मानिसहरु बिस्थापित बनेका छन्। बिपद अन्तर्गत पर्ने प्राकृतिक प्रकोप होस वा कृतिम प्रकोप सबैलाई उचित सम्बोधन गर्ने गरी सबै पीडितलाई समयमा राहत तथा उद्दारको उचित ब्यवस्थापन गर्नको निम्ति यो ऐनको जरुरी रहेको र चाडो भन्दा चाडो यो बिषयमा छलफल गरी सबैले सहयोग गरी सो ऐन पास गर्नु पर्ने गृह राज्यमन्त्रीले बताएका छन । बैठकमा उपस्थित संसदहरुले विपद ब्यवस्थापन बिधेयक संसदमा पेश भएकोमा आभार ब्यक्त गदै विपद ब्यवस्थापन ऐन सम्बन्धि छुट्टै मन्त्रालयको आवश्यता भएको र बिपद ब्यवस्थापनका निम्ति दीर्घकालिन र अल्पकालिन नीति आवश्यक रहेको बताएका थिए ।

भीमदत्तनगर, भदौ २६ । दशैँका लागि भारतबाट मजदुरी गरेर घर फर्किंदै गरेका सल्यान मर्मा–५ का तीनजना आज बिहान कञ्चनपुरको ब्रह्मदेव बजारमा लुटिएका छन् । भारतको उत्तराखण्डस्थित पौडी गड्वालबाट मजदुर गरेर घर फर्किंदै गरेका सल्यान मर्माका देवबहादुर राना, दलवीर राना र नन्दराम राना भीमदत्तनगरपालिका–९ मा रहेको ब्रह्मदेव बजारमा नेपालीबाटै लुटिएका हुन् । जिल्ला प्रहरी कार्यालय कञ्चनपुरका अनुसार मादक पदार्थमा बेहोस हुने औषधि मिसाएर उनीहरुलाई लुटपाट गरिएको हो । उनीहरुको साथबाट रु ८५ हजारभन्दा बढी रकमसमेत लुटिएको प्रहरीले जनाएको छ । प्रहरीले लुटपाटमा संलग्न केही व्यक्तिलाई नियन्त्रणमा लिएर थप अनुसन्धान गरिरहेको जनाएको छ । “हामी राति भारतको टनकपुर बजार पुगेर त्यही बास बस्यौँ ।” लुटिएकाहरुसँगै भारतबाट फर्किंदै गरेका सल्यानकै गंगाराम रानाले भन्नुभयो, “नौजनाको समूह बनाएर फर्किंदै गर्दा बाटोमा साथीहरुलाई रक्सी खुवाएर लुटियो ।” नेपाल–भारत सिमानानजिकै रहेको ब्रह्मदेव बजार हुँदै भीमदत्तनगरतर्फ आइरहेका बेला आफूहरु लुटिएको उहाँले बताउनुभयो । औषधिबाट बेहोस रहेका तीनैजनाको महाकाली अञ्चल अस्पतालमा उपचार भइरहेको जिप्रका कञ्चनपुरका प्रहरी नायब उपरीक्षक ज्ञानबहादुर सेटीले जानकारी दिनुभयो ।

काठमाडौं, भदौ २६ । सरकारको मन्त्रीपरिषद विस्तार गर्ने निार्णयप्रति निर्वाचन आयोगले असन्तुष्टि जनाएको छ । नजिकिँदो २ नम्वर प्रदेशको स्थानीय तहको निर्वाचनका बेला सरकारले भने मन्त्रिपरिषद्को विस्तार गर्नु निर्वाचन आचारसंहिताको ठाडो उल्लंघन भएको प्रमुख निर्वाचन आयुक्त अयोधी प्रसाद यादवको आरोप छ । निर्वाचन शान्तिपुर्ण रुपमा गराउने र आचारसंहिता कार्यन्वयन गर्नुपर्ने महत्वपुर्ण सरकारी निकायबाट नै विधी र प्रक्रीयाको उल्लंघन भएको यादवको भनाई छ । यादवले भने, ‘निर्वाचनको मुखमा मन्त्रीपरिषद विस्तार गरेर सरकारले आचारसंहिता विपरितको काम गरेको छ । यो विधी र प्रक्रीयाको ठाडो उल्लंघन हो ।’ निर्वाचन आयुक्त इश्वरी पौडेलले आचारसंहितमा मन्त्रीपरिषद विस्तार गर्न नपाईने विषय उल्लेख नभएको बताए ।

कपिलवस्तु, भदौ २६ । कपिलवस्तुमा घाँस काट्न गएका दुई महिलाको ज्यान गएको छ । यशोधरा गाउँपालिका–२ भडेहरका १२ वर्षीया रिमा कोहार र ३५ वर्षीय इन्द्रावती यादव घाँस काट्न गएको बेला खाल्डोमा खसेर ज्यान गएको प्रहरीले जनाएको छ । घाँस काट्ने क्रममा खाल्डोमा खसेकी रिमालाई बचाउन गएकी इन्द्रावती पनि सोही खाल्डोमा फसेकी हुन् । उनीहरु दुवैको उद्धार गरी जिल्ला अस्पताल तौलिहवा ल्याउँदै गर्दा बाटोमै मृत्यु भएको प्रहरीले जानकारी दिएको छ ।

काठमाडौं, भदौ २६ । प्रधानमन्त्री शेरबहादुर देउवा मन्त्रिमण्डल इतिहासकै ठूलो हुने भएको छ । प्रधानमन्त्रीमा निर्वाचित भएको तीन वितिसक्दा पनि प्रधानमन्त्री देवाले मन्त्री मण्डल विस्तार गर्ने क्रम जारी छ । आज पनि चार सदस्य थप गर्दै देउवाले पाँचौँ पटक मन्त्रिपरिषद् विस्तार गर्दैछन् । आज शपथ लिनेमन्त्रीहरु एक राज्यमन्त्रीसहित चार मन्त्रीहरु राप्रपा प्रजातान्त्रिकका तर्फबाट हुन् । अब मन्त्रिपरिषद्मा ५४ मन्त्री हुनेछन् जुन इतिहासमै सबैभन्दा ठूलो मन्त्रिपरिषद हो । राप्रपा प्रजातान्त्रिकका तर्फबाट संसदीय दलका नेता दीपक बोहोरा, दलका उपनेता बिक्रम पाण्डे र सुनील बहादुर थापाले मन्त्रीको शपथ लिँदैछन् भने रेशम लामाले राज्यमन्त्रीको शपथग्रहण लिँदैछन् । यसअघि २०५२ सालमा देउवा प्रधानमन्त्री हुँदा उनले ५२ सदस्यीय मन्त्रिपरिषद् गठन गरेर रेकर्ड बनाएका थिए । २२ वर्षपछि सर्वाधिक ठूलो मन्त्रिपरिषदको रेकर्ड देउवा आफैले तोड्न लागेका हुन् । यसभन्दा अघिल्लो माओवादी केन्द्रका अध्यक्ष पुष्पकमल दाहाल प्रचण्ड नेतृत्वको सरकारका पालामा ५० सदस्यीय मन्त्रिपरिषद् गठन भएको थियो । ०६८ मा डा. बावुराम भट्टराईले ४९ सदस्यीय मन्त्रिपरिषद् बनाएका थिए।

काठमाडौँ, भदौ २६ । हिजो आइतबार इन्द्रजात्राको अन्तिम दिन काठमाडौँ महानगरपालिकाका उपमेयर हरिप्रभा खड्गीसहित महिलाहरुले जीवित देवी कुमारीको रथ तानेका छन् । नानिचा याः भनिने रथ तान्ने प्रचलन राणाकालमा सुरु भएको हो । तर केही वर्ष अघिदेखि यो दिन महिलाले रथ तान्ने नयाँ चलन सुरु भएको हो। इन्द्रजात्राको अन्तिम दिन हिजो आइतबार रथ वसन्तपुरबाट तानेर विभिन्न ठाउँको परिक्रमापछि पुनः वसन्तपुरमै पुर्‍याइएपछि राष्ट्रप्रमुखका रुपमा राष्ट्रपतिले कुमारीको दर्शन गर्ने गर्छन् । यसै दिनदेखि जीवित देवी कुमारीको दर्शन गरी टीका लगाउन सर्वसाधारणलाई दशैँसम्म कुमारी घरमा व्यवस्था गरिन्छ।

काठमाडौं, भदौ २५ ।  व्यवस्थापिका–संसद्को विकास समितिले स्थानीय तहमा संघ गठन नगर्ने भनी टुङ्गो लगाएको छ । समितिको आइतबारको बैठकमा ‘स्थानीय तहको शासन सञ्चालनका सम्बन्धमा व्यवस्था गर्न बनेको विधेयक, २०७३’ माथिको उपसमितिले तयार पारेको प्रतिवेदनका सम्बन्धमा भएको छलफलपछि मतदान हुँदा बहुमत संघको आवश्यकता नपर्नेमा गएको छ । प्रतिवेदनमाथिको छलफलमा अधिकांश विवादित विषय सहमतिका आधारमा टुंगो लागेको थियो भने संघ राख्ने कि नराख्ने भन्ने विषयमा मतदान भएको थियो । उक्त मतदानमा १७ सांसदले संघको आवश्यकता नभएको भनी आफ्नो मत जाहेर गरेका थिए भने नौ सांसदले संघको आवश्यकता भएको भन्ने विकल्पमा मत हालेका समितिले जनाएको छ । जम्मा २८ जना सदस्य रहेको समितिमा २६ सांसदले मतदान गरेका थिए । मतदानपछि समिति सभापति रवीन्द्र अधिकारीले सांसदलाई मतदानको विषयलाई विजय पराजयका रुपमा नलिन आग्रह गरे । उनले विधेयक शीघ्र पारित गर्नुपर्ने भएकाले ‘स्थानीय तहको शासन सञ्चालनका सम्बन्धमा व्यवस्था गर्न बनेको विधेयक, २०७३’ माथिको उपसमितिले तयार पारेको प्रतिवेदन समितिको प्रतिवेदन बनाएर संसद्को आगामी बैठकमा पेस गरिने बताए । संसद्‌मा दर्ता भएको विधेयकको दफा ९२ मा भएको ‘संघ गठन गर्न’ सक्ने प्रावधानलाई उपसमितिले स्थानीय शासनलाई सुदृढ गर्न, संघ, प्रदेश तथा स्थानीय तहसँग संवाद, समन्वय एवं सहकार्यको प्रक्रियामा सहजीकरण गर्न र सघाउ पुर्‍याउनका लागि स्थानीय तहले छुट्टाछुट्टै संघ गठन गर्न सकिनेछ भनी प्रतिवेदन तयार गरेको थियो । सांसद रामचन्द्र पोखरेलको संयोजकत्वको उपसमितिमा गणेश पहाडी, डा शिवजी यादव, कल्पना चौधरी र तुलसा राना सदस्य थिए । समितिले आइतबार नै वडाध्यक्षको अनुपस्थितिमा वडाध्यक्षले चाहेको सदस्यलाई कावा दिन सक्ने, वडाध्यक्षको मृत्यु भएको वा राजीनामा दिएको अवस्थामा वडा सदस्यबाट निर्वाचन गरी कावा तोक्ने र वडाध्यक्षको निर्वाचन हुन बाँकी रहेका अवस्थामा कार्यपालिकाले तोकेको कर्मचारीले वडाध्यक्षको काम गर्ने प्रावधान पारित गरेको छ । त्यस्तै विधेयकमा भएको हिमाली जिल्लाको सूचीमा धादिङ, रामेछाप, गोरखा र पूर्वी रुकुमलाई पनि वर्गीकरण गरी राख्ने सहमति भएको छ । स्थानीय तहमा कार्यरत कर्मचारीको व्यवस्थापनका सम्बन्धमा समितिले ऐन प्रारम्भ हुँदाका बखतसम्म अविछिन्न कार्यरत सबै कर्मचारीलाई लोकसेवा आयोगको पहिलो विज्ञापनमा एक पटकका लागि सहभागी हुन मौका दिने र उमेरको हद लाग्ने व्यवस्था गरेको छ । उक्त परीक्षामा सहभागी नहुने र अनुत्तीर्ण कर्मचारीले स्वतः अवकाश पाउने व्यवस्था गरिएको छ । बैठकले जिल्ला समन्वय समितिमा प्रदेशको कानुन नबनेसम्म कोषको व्यवस्था राख्ने सहमति गरेको छ । त्यस्तै कुनै जिससमा आवश्यकताभन्दा बढी कार्यरत कर्मचारी भए पर्याप्त कर्मचारी नभएमा सम्बन्धित तहमा खटाउने व्यवस्थासमेत समितिले पारित गरेको समितिले सभापति अधिकारीले जानकारी गराए । बैठकमा संघीय मामिला तथा स्थानीय विकास राज्यमन्त्री जनकराज चौधरीले स्थानीय शासन सञ्चालनका तत्काल पारित गर्नुपर्ने विधेयकका विषयलाई टुंग्याई सहमतिमा अघि बढाएकामा समितिको प्रशंसा गरे । त्यस्तै स्थानीय सचिव दिनेशकुमार थपलिया, कानून न्याय तथा ससंदीय मामिला सचिव कमलशाली घिमिरेले विधेयकमा सरकारका धारणा बारेमा रुपष्ट पारे । बैठकमा सांसद चीनकाजी श्रेष्ठ, टोपबहादुर रायमाझी, भरत खड्का, राजेन्द्रप्रसाद पाण्डे, हितराज पाण्डे, गुरुप्रसाद बुर्लाकोटी, शिवशंकर चौधरी, जीवनबहादुर शाहीलगायतले विधेयकका व्यवस्थाका बारेमा आआफ्ना धारणा राखेका थिए । रासस