काठमाडौं, असार २९ । गृहमन्त्री जर्नादन शर्माले प्रजातन्त्र र कानुनी शानको मुख्य बाधक भ्रष्टाचार भएको बताएका छन् । सार्क गृहमन्त्रीस्तरीय बैठकलाई बिहीबार श्रीलंकाको राजधानी कोलम्बोमा सम्बोधन गर्दै गृहमन्त्री शर्मा भ्रष्टाचारले राजनीति, त्यससँग सम्बन्धित संस्थाहरु र राजनीतिक नेतृत्वमाथी समेत जनताको विश्वास गुम्ने अवस्था आएको बताए । अहिलेको आतंकवाद र आपराधिक क्रियाकलाप विरुद्ध उच्चतम प्रयास चाले पनि समस्या समाधानमा कठिनाइको भएको पनि उनले बताए । मन्त्री शर्माले भर्खरै नेपालमा सम्पन्न भएको स्थानीय तहको निर्वाचनबाट देशमा राजनीतिक स्थायित्व, आर्थिक समृद्धि र सामाजिक रुपान्तरण हुने दावी गरे । भव्य स्वागत सत्कारकालागि श्रीलंकाली सरकारलाईधन्यवाद दिँदै गृहमन्त्री शर्माले सार्कको महासचिव अहमद हुसेन बी सीयललाई बधाई दिएका थिए । मन्त्री शर्माको टोली शुक्रबार दिउँसो स्वदेश फर्किने कार्यक्रम छ ।

रुकुम, असार २९ । वर्षौंदेखि खोलाको पानी खान बाध्य आठबिसकोट नगरपालिका–३ स्यालाखदीका ‍साविकको स्यालाखदी गाविस ३, ४ र ५० बासिन्दा गाउँमा खानेपानी आयोजना निर्माण भएपछि खुशी भएका छन् । खानेपानी आयोजनाको निर्माण थालिएको पाँच वर्षपछि गाउँका सबै भागमा नियमित पानी आउन थालेपछि अहिले स्थानीयवासी खुशी भएका छन् । एक वर्षसम्म गाउँमा एउटा पनि खानेपानीको धारा नहुँदा यहाँका बासिन्दा गाग्री डोकामा बोकेर गाउँभन्दा एकघण्टा दूरीको खोलाको पानी ल्याएर गुजारा चलाउने गरेकामा खानेपानी तथा सरसफाइ डिभिजन कार्यालयले आव २०६८र६९ देखि स्यालाखदी पाटागाउँ खानेपानी तथा सरसफाइ आयोजनामार्फत खानेपानी ल्याउने काम प्रारम्भ भएको थियो । गाउँ नजिकै मुहान नभएपछि खानेपानीका लागि गाउँभन्दा करिब नौ किमी टाढाको गाउँबाट खानेपानी ल्याइएको थियो । सो आयोजनाका लागि एक करोड १६ लाख ४७ हजार रुपैयाँ खर्च भएको कार्यालय प्रमुख विकेश बधानथाचेले जानकारी दिए। चौबीस किमी पाइपलाइन विस्तार गरिएको खानेपानी आयोजनाबाट गाउँका २०० भन्दा बढी घरधुरीलाई खानेपानीको सुविधा भएको उपभोक्ता समितिका अध्यक्ष कर्णनाथ योगीले जानकारी दिए। चट्टानमात्र भएकाले अधिकांश ठाउँमा फलामको जिआई पाइपको प्रयोग गरिएको छ । धेरै वर्षदेखि गाउँमा पानी ल्याइदिनका लागि विभिन्न निकायमा हारगुहार गर्दा पनि भिरालो र निकै अप्ठेरो जमिन भएका कारण निर्माण कार्यमा कसैले पनि चासो नदिएको उनको भनाइ छ । यसअघि सो आयोजनामा तत्कालीन जिल्ला विकास समितिलगायत अन्य निकायले काम शुरु गरेर र छोडिदिएको अध्यक्ष योगीले बताए ।

विराटनगर, असार २९ । विराटनगरमा उपचारका लागि आएकी एक महिलामाथि गोलीप्रहार भएको छ । मुनाल पथमा आज बिहान अज्ञात व्यक्तिले उदयपुर बेलटार घर भएकी ४७ वर्षीया टिनादेवी विष्टमाथि गोली चलाएको हो । अज्ञात समूहको गोली प्रहारबाट ती महिला घाइते भएकी छिन् । मोटरसाइकलमा आएका दुई व्यक्तिले गोली प्रहार गरेको र उनको साथवाट नगद ११ हजार समेत लुटेर लगेको घाइते विष्टले बताइन् । घाइते विष्टको विराटनगरस्थित विराटन नर्सिङ होममा उपचार भई रहेको छ । विष्टको घुडामुनि समान्य चोट देखिएको छ । घटनाको बारेमा थप अनुसन्धान भई रहेको र अपराधीहरुको खोजी कार्य भई रहेको प्रहरीले जनाएको छ ।

कपिलबस्तु, असार २९ । कपिलबस्तुको सदरमुकाम तौलिहवास्थित एचडी मेमोरियाल विद्यालयमा आगलागी भएको छ । विहान विद्यालयमा परिक्षा संचालन भइरहेको अवस्थामा एक्कासी आगलागी भएको हो । आगलागी भएको समाचार पाएलगत्तै दुईवटा दमकलहरु घटनास्थलमा पुगेको भएपनि एउटामा पानी नभएकोले पुनः पानी लिन फर्कियो भने अर्काेलाई चलाउनका लागि दक्ष प्राविधिक नभएपछि हाल स्थानीयको पहलमा आगो नियन्त्रणमा ल्याउने कार्य भइरहेको छ । कपिलबस्तु नगरपालिकामा भएका दुईवटै दमकल वेकामका भएका छन् । विद्यालय भवनसँगै जोडिएको विजुलीको पोलभएका कारण विद्युत सर्ट भएर आगलागी भएको अनुमान लगाइएको छ । घटनामा अहिलेसम्म मानवीय क्षति भने भएको छैन ।

म्याग्दी, असार २९ । म्याग्दीको रघुगङ्गा गाउँपालिका–३ पिप्लेको बगैँचादेखि वडा नम्बर २ भगवतीको रिसीनचौतारी हुँदै बेगखोला जोड्ने सडकखण्डअन्तर्गत बनाखीको भिरमा ट्र्याक निर्माण भएको छ । विगत छ वर्षदेखि सडक निर्माण सुरु गरिएको सो सडकअन्तर्गत कडा चट्टानको कारण निर्माण कार्य रोकिरहेको बनाखी भिरमा यो वर्ष डोजर लगाएर ट्र्याक निर्माण गरिएको हो । गलेश्वरदेखि बेगखोलासम्मको सडकको वैकल्पिक मार्गका रुपमा निर्माण गर्न लागिएको पिप्ले बगैँचा–रानीपौवा–रिसीनचौतारी– माछखर्क–बेगखोला सडकअन्तर्गत यो वर्ष रु १० लाख बजेटबाट सो ट्र्याक निर्माण गरिएको हो । जिल्ला समन्वय समितिमार्फत रु नौ लाख १० हजार र स्थानीयको रु एक लाख एक हजार ६९६ बराबरको श्रमदानबाट रानीपौवा र रिसीनचौतारीको बीचमा पर्ने सो भिरमा ट्र्याक निर्माण गरिएको सडक निर्माण उपभोक्ता समितिका अध्यक्ष जगत शाहीले बताउनुभयो । विगत छ वर्षदेखि निरन्तर प्रयास गर्दासमेत उल्लेख्यरुपमा बजेट विनियोजन नभएको र विनियोजन भएको बजेटले समेत सो भिरमा ट्र्याक खन्न सकिएको थिएन । बेनी–जोमसोम सडकखण्डअन्तर्गत गलेश्वरदेखि बेगसम्मको खण्डको वैकल्पिक मार्गका रुपमा निर्माण गर्न लागिएको सो सडकखण्डमा खहरेखोलादेखि माछखर्कको बीचमा रहेको करिब ३०० मिटर भिरमा ट्र्याक निर्माण गर्न बाँकी छ । बगैँचादेखि रिसीनचौतारी हुँदै खहरेखोलासम्म र बेगखोलादेखि माछखर्कसम्म ट्र्याक निर्माण कार्य सम्पन्न भएकाले आगामी वर्षमा सजिलैसँग ट्र्याक निर्माणले पूर्णता पाउने स्थानीयवासीको भनाई छ । यस वर्ष नै यो खण्डको ट्र्याक निर्माण सम्पन्न गर्ने लक्ष्य लिए पनि बजेट अभावले सम्भव नभएको हो । पिप्लेको बगैँचादेखि रानीपौवा हुँदै भगवतीको रिसीनचौतारी माछखर्क हुँदै बेगखोला जोडिने यो सडकले स्थानीय दुई हजार ५०० घरधुरी लाभान्वित हुने छन् भने गलेश्वरदेखि बेगखोला खण्डको वैकल्पिक मार्गका रुपमा समेत प्रयोगमा ल्याउन सकिनेछ ।

बैतडी, असार २९ । लगातारको वर्षासँगै आएको हावाहुरीले बैतडीका विभिन्न स्थानमा लगाएको मकैबालीमा क्षति पुर्याएको छ । केही दिनयता देखि परिरहेको अविरल वर्षासँगै आएको हावाहुरीले जिल्लाका सुर्नया गाउँपालिका, पाटन नगरपालिका र पुरचौडी नगरपालिकाका विभिन्न स्थानमा मकैबालीमा क्षति पु¥याएको स्थानीय बासिन्दाले बताएका छन् । हावाहुरीले घोगा लाग्न लागेको मकैबाली भाँचेको किसानले बताएका छन् । सुर्नया गाउँपालिका–७ पत्थरकोट, वडा नं ६ धुलिधार लगायतका क्षेत्रमा मकैमा बढी क्षति पुगेको किसानले बताएका छन् । पत्थरकोटमा करिब ३० परिवारको मकैबाली नष्ट गरेको स्थानीय अमर कुँवरले जानकारी दिनुभयो । यस्तै, सुर्नया गाउँपालिका–८ मा हावाहुरीले मकैबालीमा क्षति पु¥याएको स्थानीय महेश साउदले जानकारी दिनुभयो । वर्षासँगै आएको हावाहुरीले मकैबालीमा क्षति पु¥याएपछि किसान भोकमरी हुने भन्दै चिन्तित बनेका छन् ।

भक्तपुर, असार २९ । मध्यपुर थिमि–१ लोहकिल्थली मनहरा पुलसँगै रहेको सिद्धार्थ पेट्रोल पम्पमा गत असार १३ गते आगलागी हुँदा दुईजना घाइते भए । ट्याङ्करबाट पेट्रोल खन्याउने क्रममा ट्याङ्करको नोजल र ट्याङ्कीको पाइपको बीचको जोर्नीबाट अचानक आगोको झिल्को निस्केपछि पम्पमा आगलागी भएको थियो । आगलागीबाट सोही पम्पमा कार्यरत रामबहादुर तामाङको दाहिने कुहिना र दाहिने खुट्टा जलेको थियो भने सोही स्थानमा खुद्रा पसल गरी बस्ने प्रतिमा तामाङको अनुहार, ढाड, घाँटी पछाडिको भाग र दुवै खुट्टा जलेर घाइते भएकी थिइन् । ८ महिनाको गर्भवतीसमेत रहेकी तामाङको ग्लोबल अस्पतालमा उपचार भइरहेको छ । त्यसैगरी, मध्यपुर थिमि–३ चारदोबाटोस्थित साझा पेट्रोल पम्पको दुईतल्ले पक्की घरको भूमिगत कोठामा २०७२ माघ ५ गते आगलागी हुँदा सँगै रहेको गौरीशंकर ट्रेडर्स हार्डवेयरको करिब रु १० लाख बराबरको धनमाल जलेर क्षति भएको थियो । सो भवनमा रहेको टायर रिसोलिङ पसलको हावा भर्ने पाइप फुटेर अचानक आगलागी हुँदा तीनजना घाइते भएका थिए । भारतले लगाएको अघोषित नाकाबन्दीको समयमा भएको सो आगलागीका बेला साझामा पेट्रोल वितरण भइरहेको थियो । पम्प परिसरमा रहेको पसलमा आगलागी भएपनि समयमा नियन्त्रण भएकाले ठूलो क्षति हुनबाट जोगिएको थियो । भक्तपुरमा रहेका पेट्रोल पम्पहरुमा पटकपटक आगलागीका घटना हुँदा पनि पेट्रोल पम्पलाई व्यवस्थित गर्न सम्बन्धित निकायको ध्यान जान सकेको छैन । पम्पको अति संवेदनशील क्षेत्रमा सुरक्षाको कुनै घेराबन्दी नहुनु, जोसुकै व्यक्ति सलाई, लाइटरजस्ता आगजनीजन्य वस्तु लिएर र धुमपान गरेर संवेदनशील क्षेत्रमा जानसक्ने वातावरण हुनुले भक्तपुरका पेट्रोल पम्पहरु जोखिमपूर्ण अवस्थामा सञ्चालन भइरहेका छन् । पेट्रोलजस्तो अति प्रज्वलनशील पदार्थको कारोबार स्थल असुरक्षित र मापदण्ड विपरीत सञ्चालन भइरहँदा पनि त्यसलाई व्यवस्थित गर्नेतर्फ कसैको ध्यान गएको देखिँदैन । भक्तपुरमा सञ्चालित अधिकांश पेट्रोल पम्प मानव बस्तीको बीचमा रहेका छन् । थिमिको जगुलु पम्प चाणक्य कलेज र विद्यालयसँग जोडिएको छ । पम्पमा हुने सानो दुर्घटनाले पनि मानवीयलगायत ठूलो क्षति हुनसक्ने खतरा रहेको छ । भक्तपुरमा सञ्चालित १८ वटा पेट्रोल पम्पमध्ये अधिकांश पेट्रोल पम्पमा सुरक्षाको बन्दोबस्त छैन । सशस्त्र प्रहरी बलले सञ्चालन गरेको गुह्येश्वरी फ्यूल स्टेसन, भक्तपुर फ्युल सेन्टर, न्यू महेश्वरी फ्युल स्टेसनलगायत केही पम्पमा मात्र सुरक्षाका लागि पर्खाल र गेटको व्यवस्था गरेको छ । थिमिको साझाले २०७२ साल माघको आगलागीपछि पम्प क्षेत्रभित्र जो कोही जान नसक्ने गरी बार लगाएको छ भने लोकन्थलीस्थित सिद्धार्थमा हाल बार लगाउने कार्य भइरहेको छ । पेट्रोल पम्प सञ्चालनसम्बन्धी पुरानो मापदण्ड र निर्देशिकामा एक पम्पदेखि अर्को पम्पको दूरी न्यूनतम ५०० मिटर हुनुपर्ने उल्लेख छ । तर भक्तपुरमा कतिपय पम्पको दुरी २०० मिटरको हाराहारीमा रहेका छन् । लोकन्थलीदेखि साँगा चोकसम्मको करिब १० किलोमिटर बाटोमा मात्र १५ वटा पम्प सञ्चालनमा छन् । निर्देशिकामा १० किलोका तीनवटा अग्नि नियन्त्रक ग्यास सिलिण्डर, न्यूनतम एक हजार लिटर पानी, बालुवा, साबेल, पिग, बाल्टिन लगायतका सामग्री हरदम तयारी अवस्थामा राख्नुपर्ने उल्लेख गरिएको छ । तर भक्तपुरका अधिकांश पम्पले त्यस्ता सामानको व्यवस्था गरेको पाइँदैन । बाग्मती अञ्चल पेट्रोलियम डिलर एसोसिएसनका अध्यक्ष अच्युतबहादुर खड्काले पेट्रोल पम्प व्यवस्थित नभएको स्वीकार गर्दै नयाँ मापदण्डअनुसार पम्प सञ्चालन गर्न नसकिने बताए । नयाँ मापदण्डअनुसार पेट्रोल पम्प सञ्चालन गर्न पाँच रोपनी जग्गा, पानी ट्याङ्की, दुई शौचालय, एकवटा हात धुने बेसिन, २० देखि २२ फिटको जस्ताको छत बनाउनुपर्ने व्यवस्था गरेको जानकारी दिँदै खड्काले भक्तपुरमा सो सम्भव नभएको बताए । उनले नयाँ खोल्ने पम्पलाई भने नयाँ मापदण्डअनुसार मात्र खोल्न दिने तयारी भइरहेको बताए  । पम्प सञ्चालनमा लापरबाही गरेकै कारण सङ्घले नै हाल दुईवटा पम्प सञ्चालनमा रोक लगाएको पनि उनले जानकारी दिए  । वाणिज्य विभाग, नापतौल विभाग र आयल निगमले बेला बेलामा पम्पको अनुगमन गरे पनि नापतौल पुगे-नपुगेको र पेट्रोलियम पदार्थको गुणस्तरका बारेमा मात्र अनुगमन गर्ने गरेकाले पनि पम्प सञ्चालनमा सुरक्षाको बारेमा सञ्चालकहरुकै चासो कम भएको एक पम्प सञ्चालक नाम नबताउने सर्तमा बताए । उनले सम्बन्धित निकायले बेला बेलामा पम्पको सुरक्षा व्यवस्थाका बारेमा पनि अनुगमन गर्नुपर्ने बताए । यसैबीच, जिल्ला प्रशासन कार्यालय भक्तपुरले गत असार १४ गते आयल निगमलाई एक पत्र पठाई मध्यपुर थिमि–१, लोकन्थलीस्थित सिद्धार्थ पेट्रोल पम्पमा प्राविधिक निरीक्षण गर्न अनुरोध गरेको छ । गत असार १३ गते सो पम्पमा आगलागी भएर केही व्यक्तिसमेत घाइते भएपछि तत्काल पम्प सञ्चालनमा रोक लगाई निगमको प्राविधिक निरीक्षणको प्रतिवेदन आइसकेपछि मात्र सञ्चालन गर्न दिने सो पत्रमा उल्लेख गरिएको छ ।

काठमाडौं, असार २९ । पछिल्लो दुई महिनामा उच्च तहका सरकारी कर्मचारी सहभागी भएका विदेशका कार्यक्रममा राज्यको धेरै रकम खर्च भए पनि उपलब्धि भने ज्यादै न्यून रहेको पाइएको छ । अध्ययन भ्रमण, अवलोकन भ्रमण, अनुभव आदानप्रदान जस्ता विषयमा राज्य ढुकुटीबाट मोटो रकम खर्च गरेर सरकारका सचिवहरु संसारका िवभिन्न देशमा पुग्ने गरेका छन् । तर, उनीहरुको भ्रमण उपलब्धिमूलक हुन सकेको छैन । प्रधानमन्त्री तथा मन्त्रिपरिषद् कार्यालयबाट स्वीकृत यसतो भ्रमण अझै केही साता हुनेछ । सरकारका एक सचिव मैत्रीपूर्ण भलिबल प्रतियोगितामा सहभागी हुन अमेरिका पुगेका छन् । युवा तथा खेलकुद मन्त्रालयका सचिव महेशप्रसाद दाहाल डेनमार्क र अमेरिका पुगेको, नागरिक दैनिकमा खबर छ । पछिल्लो दुई महिनामा एक हजार चार सय ४२ कर्मचारी करोडौं रुपैयाँ खर्चेर विदेश भ्रमणमा गएका छन् । मुलुक स्थानीय तहको चुनावमा होमिएको र आर्थिक वर्ष सकिनै लागेका बेला निजामति कर्मचारीको ठूलो समूह विदेश भ्रमणमा गएको हो ।

कञ्चनपुर, असार २९ ।  जिल्लाको सबैजसो नवनिर्वाचित जनप्रतिनिधिले शपथसंगै पदभार ग्रहण गरिसकेका छन् ।  स्थानीय तहमा लामो समयपछि चुनिएका नेताले गर्ने हरे निर्णय चासोको विषय बन्दै छ । कञ्चनपुरको शुक्लाफाँटा नगरपालिकाका प्रमुख दिलबहादुर ऐर भने कुर्सीका कारण चर्चामा छन् । उनी नगरपालिकाले किनेको आरामदायी कुर्सीमा बस्दैनन् । बरु घरबाटै सामान्य काठे कुर्सी ल्याएर आफ्नो कार्यकक्षमा राखेका छन् । ‘१० बर्षदेखि यही कुर्सीमा बसेर जनताको सेवा गरे, ५ बर्षे कार्याकाल पनि यसैमा विताउँछु’, उनले सञ्चारकर्मीमाझ भने, – ‘म सामान्य जनताको छोरो उनीहरु सरह नै बस्न चाहान्छु ।’ आफुलाई कुर्सी मोह भन्दा जनताको सेवा गर्ने चाहना रहेको उनले बताए, कान्तिपुरमा खबर  छ ।

काठमाडौं असार २९ ।  मुख्य सचिव सोमलाल सुवेदी निवृत्तिभरण (पेन्सन) बढाउनका लागि राजीनामै नदिईकन एसियाली विकास बैंक (एडीबी)को वैकल्पिक कार्यकारी निर्देशक पदमा जागिर खान लागेका छन् । प्रधानमन्त्री तथा मन्त्रिपरिषद् कार्यालयका एक अधिकारीका अनुसार निजामती प्रशासनकै नेतृत्व गरिरहेका सुवेदीले थप ३ वर्ष सेवा गरेबराबरको पेन्सन बढाउने लोभमा आफ्नो पद अतिरिक्त समूहमा राखी एडीबीको ३ वर्षे जागिरमा जान लागेका हुन् । उनी साउन १ गतेदेखि पद सम्हाल्न एडीबीको मुख्यालय फिलिपिन्सको मनिला जाँदै छन्,  कान्तिपुरमा खबर छ । सुवेदीको पेन्सन बढाउन प्रधानमन्त्री शेरबहादुर देउवा र मन्त्रिपरिषदसमेत सहयोगी बनिदिएको स्रोतले जनायो । देउवा र मन्त्रिपरिषद्ले एडीबीमा जागिर खान जान लागेका सुवेदीको राजीनामा माग्नुको सट्टा उनको पद सामान्य प्रशासन मन्त्रालयको अतिरिक्त समूहमा राखिदिएको छ ।

जुम्ला, असार २९ ।  कर्णाली विकासका लागि निर्माण भएको कर्णाली विकासको १० बर्षे रणनीतिक योनजाको मस्यौदा चार महिनादेखि प्रधानमन्त्री कार्यालयमा थन्किएको छ । दुई बर्ष लगाएर कर्णालाीलाई विकासको मुल प्रवाह ल्याउने महत्वकांक्षी योजना समेटिएको मस्यौदा विकास योजनाको बैठकबाट पारित हुनका लागि चार महिनादेखि प्रधानमन्त्री कार्यालयमै थन्किएको छ, अन्नपुर्ण पोष्टमा खबर छ ।

काठमाडौं, असार २८ । पाँचसय र एक हजारका करिब पचास लाख अबैध भारतीय नोटसहित राजधानीबाट दुईजना पक्राउ परेका छन् । पक्राउ पर्नेमा रामेछापको खाँडादेवी गाउँपालिका–८ का मानहादुर लामा र काठमाडौंको स्वयम्भूका अमित डंगोल छन् । उनीहरुले केही समय पहिल्यैदेखि भारतबाट पुराना पाँचसय र हजारका नोट नेपाल ल्याएर ठग्ने गरेको पाइएपछि पक्राउ गरिएको नेपाल प्रहरीको केन्द्रीय अनुसन्धान व्यूरो सिआइबीले जनाएको छ । उनीहरुलाई मंगलबार सिआइबीले काठमाडौंको खुशिबुबाट ४९ लाख ५० हजार भारतीय रुपैयाँसहित पक्राउ गरेको हो । पक्राउ परेका दुबैजनालाई कारबाहीका लागि राजश्व अनुस्न्धान विभाग पुल्चोक पठाइएको छ ।

चितवन, असार २८ । नारायणगढ–मुग्लिन सडकखण्डको चार किलो भन्ने स्थानमा ठूलो पहिरो खसेपछि राजमार्ग अवरुद्ध भएको छ । दिउँसो साढे ३ बजेदेखि पहिरो खसेको नारायणगढ–मुग्लिन सडकखण्डका इन्जिनियर शिव खनालले जानकारी दिएका छन् । पहिरो खस्ने क्रम जारी नै रहेकोले पहिरो खस्न रोकिएपछि मात्रै पन्छाउने काम सुरु हुने उनलेजानकारी दिएका छन् । खनालका अनुसार पहिरो पन्छाउनका लागि २ वटा डोजर तयारी अवस्थामा राखिएको छ । पहिरो झर्ने क्रम रोकिएपछि मात्रै पन्छाउने काम सुरु हुन्छ, उनले भने । पहिरो झरेर बाटो अवरुद्ध भएसँगै सयौं गाडी राजमार्गमा अलपत्र परेका छन् । असार २५ गते देखि सो खण्डमा राति गाडी चलाउन पनि निषेध गरिएको छ ।

काठमाडौं, असार २८ । सर्वोच्च अदालतले आन्तरिक राजस्व विभागका निलम्बित महानिर्देशक चुडामणि शर्मालाई थुनामुक्त गर्न परेको रिटमाथि कारण देखाउ आदेश जारि गरेको छ । न्यायाधीश पुरुषोत्तम भण्डारीको एकल इजलासले शर्मालाई थुनामा राख्नुको कारण आगामी शुक्रबार पेश गर्न विपक्षीका नाममा कारण देखाउ आदेश जारी गरेको हो । सर्वोच्चले शर्मालाई समेत अदालतमा उपस्थित गराउन आदेश दिएको छ । गैरकानुनी रुपमा थुनामा राखेको भन्दै शर्माकी श्रीमती कल्पना उप्रेतीले थुनामुक्त गर्न माग गर्दै मंगलबार सर्वोच्चमा रिट दायर गरेकी थिइन ।

पाल्पा, असार २८ । पाल्पाको तिनाउ खोलामा सनाखत हुन नसकेको एक महिलाको शव भेटिएको छ । तिनाउ गाउँपालिका– ५ जोरधाराको नयाँ बजारस्थित खोलामा शव भेटिएको प्रहरीले जनाएको छ । तिनाउ खोलाले आइतबार जिपसहित चार यात्रुलाई खोलाले बगाएको थियो । प्रहरीका अनुसार जोरधारमा भेटिएको शव बेपतामध्येकै एक हुनुपर्ने अनुमान गरिएको छ । दुई महिला र दुई पुरुष तिनाउ खोलाको अम्लिहानमा बेपता भएका थिए । मङ्गलबार बिहान जिप भेटिए पनि अझै चारजना यात्रु मङ्गलबार साँझसम्म भेटिएका छैनन् । जोरधारको खोलामा भेटिएको शवको सनाखत हुनसकेको छैन । खोलामा भेटिएको शव ढुङ्गाको क्यापमा रहेकाले निकाल्न समस्या भएको प्रहरीले जानएको छ । प्रहरीले सोमबारदेखि नै तीन टोली चरचरे, झुम्सा र अमलेन क्षेत्रमा खोजीकार्य गरिरहेकोे जिल्ला प्रहरी कार्यालयका प्रहरी नायव उपरीक्षक रमेश पण्डितले जानकारी गराउनुभयो । पाल्पा जिल्लाको माथागढी गाउँपालिका– ३ र तानसेन नगरपालिका– ९ स्थित अमलेनमा पुलबाट लु १ ज १७१२ नम्बरको जिप बाढीले बगाएको थियो । बेपता हुनेमा तानसेन नगरपालिका भुसलडाँडा बस्ने– २६ वर्षीय उषा श्रेष्ठ, माथागढी गाउँपालिका– १ का २३ वर्षीय तिलवीर गाहा, सोही स्थानका ४३ वर्षीय माया गाहा, बगनासकाली गाउँपालिकाका ४० वर्षीय पदमबहादुर कुँवरमगरलाई गतआइतबार तिनाउ खोलाले बगाएको थियो ।