लुम्बिनी, वैशाख १४ । सिमेन्ट उत्पादनका लागि आवश्यक किलिङ्कर तथा अन्य कच्चा पदार्थको अभावका कारण रुपन्देहीमा सञ्चालित विभिन्न सिमेन्ट उद्योग समस्यामा परेका छन् । भैरहवा लुम्बिनी करिडोरमा सञ्चालित सिमेन्ट उद्योगले पर्याप्त मात्रामा कच्चा पदार्थ नपाउँदा करिब ६० प्रतिशत उत्पादन घटाउनु परेको छ । मुलुकमा राष्ट्रिय गौरवका आयोजनासँगै पुनःनिर्माणले गति लिइरहेका बेला उद्योगमा देखिएको समस्याका कारण आयोजनाको निर्माण कार्य प्रभावित भएको छ । भारतरबाट आयात गरिने किलिङ्कर तथा अन्य कच्चा पदार्थमा कडाइ गरिएपछि नेपाली सिमेन्ट उद्योग सङ्कटमा परेका हुन् । किलिङ्कर, फलाइएस, जिपसनलगायत कच्चा पदार्थका लागि यहाँका अधिकांश उद्योग भारतमाथी निर्भर बन्नु परेको छ । भारतको मात्रै भर परेका कारण नेपाली सिमेन्ट उद्योगले बेलाबेलामा विभिन्न सङ्कट बेहोर्ने गरेका छन् । अन्डर लोडिङका कारण भारतबाट विगतको तुलनामा झन्डै ६० प्रतिशत कम कच्चा पदार्थ आयात हुने गरेका कारण यहाँका उद्योगी मारमा परेका सिद्धार्थ सिमेन्ट उद्योगका सञ्चालक रोहित अग्रवाल बताउनुहुन्छ । कच्चा पदार्थको अभाव, ढुवानीको समस्या तथा ढुवानी दर बढेको भन्दै उद्योगले पहिलाको तुलनामा आठदेखि १० प्रतिशतसम्म सिमेन्टको मूल्यमा वृद्धि गरेका छन् । “भारतमा अन्डर लोडिङको समस्याका कारण नेपाली उद्योग बन्द हुने अवस्थामा पुगेका छन्,” अग्रवालले भन्नुभयो । भारतको सरदारनगरबाट चार हजार टन कच्चा पदार्थ नेपाल ल्याउनका लागि ८०-९० वटा ट्रक भए पुग्नेमा अहिले झन्डै १५० देखि २५० वटा ट्रक आवश्यक पर्ने भएको छ । “अन्डर लोडिङसँगै ट्रकको अभाव देखिएको छ,” उहाँले भन्नुभयो– “यस्तो अवस्थामा कसरी उद्योग चलाउन सकिन्छ ।” कच्चा पदार्थको अभावका कारण रुपन्देहीका केही उद्योगले उत्पादन बन्द गरेका छन् । नेपालमा थर्मलप्लान्ट उद्योग नभएका कारण फ्लाइएसका लागि भारतसँग निर्भर रहनुपरेको छ । सरदारनगरमा मात्रै रहेको र्याक प्वाइन्टलाई सरकारको पहलबाट भारतका अन्य स्थानमा पनि सार्नुपर्ने उद्योगीको माग छ । कच्चा पदार्थको अभावमा सिमेन्ट उद्योगका गोदाम खाली भएका छन् । पश्चिमाञ्चल सिमेन्ट उत्पादक सङ्घका महासचिव तथा जगदम्बा सिमेन्ट उद्योगका महाप्रबन्धक विदुर ढुङ्गाना ट्रकको अभावसँगै ढुवानी लागत समेत बढेको बताउनुहुन्छ । यस्तै भारतले बिएस थ्रीका गाडीको नयाँ दर्तामा बन्देज लगाएपछि ट्रकको अभाव भएको बृज सिमेन्ट उद्योगका महाप्रबन्धक रविरञ्जन कुमारले बताउनुभयो । उहाँले बजारमा बिएस फोरका गाडी आइनसकेका र बिएस थ्रिका गाडी दर्तामा रोक लगाएपछि गाडीको अभाव देखिएको बताउनुभयो । बजारमा सिमेन्ट अभाव हुँदा सर्वसाधारणले निर्माण गर्दै गरेका घर बीचमै रोक्नुपर्ने अवस्था आएको छ ।

बैतडी, वैशाख १४ । बैतडी जिल्लाको पुर्चौडी नगरपालिका–५ कुवाकोटको सुनजुनीमा सुरक्षित प्रसूति सेवा केन्द्रमा वर्षासँगै चलेको हावाहुरीले क्षति पुर्याउँदा प्रसूति सेवा बन्द हुन पुगेको छ । आइतबार बेलुका वर्षासँगै चलेको हावाहुरीले तीनकोठे भवनको छानो उडाएपछि सुरक्षित प्रसूति सेवा केन्द्रभित्र राखिएका औषधि, सुत्केरी समान, सुत्केरी गराउने श्ययामा क्षति पुगेको कुवाकोट स्वास्थ्यचौकीका इन्चार्ज लोकेश जोशीले जानकारी दिए । “हावाहुरीले छानो उडाएपछि भित्र रहेका सबै सामान भिजेर नष्ट भएका छन्”, उनले भने, “सुरक्षित प्रसूति सेवा केन्द्रमा क्षति पुगेकाले तत्कालका लागि सुरक्षित प्रसूति सेवा दिन सकिँदैन ।” सुरक्षित प्रसूति सेवाका लागि तत्काललाई त्यस क्षेत्रका गर्भवती महिलाले कुवाकोट स्वास्थ्यचौकीमा आउनुपर्ने समेत उनले बताए। साथै, सुनजुनीमा रहेको सुरक्षित प्रसूति सेवा केन्द्रको भवन पुनर्निर्माण नहुँदासम्म सो ठाउँबाट सेवा प्रवाह गर्न नसकिने बताइएको छ ।

पाँचथर, वैशाख १४ । पाँचथर जिल्लाको याङबरक गाउँपालिका–१ स्थित च्याङथापु बजारमा गएराति भएको मोटरसाइकल दुर्घटनामा परी एकजनाको मृत्यु भएको छ भने अर्का एकजना घाइते भएका छन्। मृत्यु हुनेमा याङबरक गाउँपालिका–२ बस्ने मचिन्द्र बेघाका छोरा सन्तोष बेघा रहेका छन् । यस्तै, सोही ठाउँ बस्ने मिलन चुहान घाइते भएका छन् । घाइतेको स्थानीय स्वास्थ्य चौकी च्याङथापुमा उपचार भइरहेको स्थानीयवासी मङ्गल बेघाले जानकारी दिए। फलैँचाबाट च्याङथापु आउने क्रममा मे ८ प ९२३६ नंको मोटरसाइकल अनियन्त्रित भई दुर्घटनामा परेको जिल्ला प्रहरी कार्यालय पाँचथरका प्रहरी नायब उपरीक्षक नकुल पोखरेलले जानकारी दिए ।

गोरखा,वैशाख १४ । मोहन वैद्य ‘किरण’ नेतृत्वको नेकपा माओवादी क्रान्तिकारीले यही वैशाख ३१ गते हुने स्थानीय तहको निर्वाचनका लागि गोरखामा उम्मेदवार सिफारिस गरेको छ । देशभक्त जनगणतान्त्रिक मोर्चा नेपालमार्फत गोरखा नगरपालिकाको प्रमुखमा अमृत राना, पालुङटार नपाको प्रमुखमा भूमिनारायण मल्ल, अजिरकोट गाउँपालिकाको प्रमुखमा तेजबहादुर गुरुङ, सिरानचोक गाउँपालिका प्रमुखमा छविलाल घले, गण्डकी गाउँपालिका प्रमुखमा राम नेपाली, पालुङटार नपा–६ वडा प्रमुखमा रमेश क्षेत्री, सिरानचोक गाउँपालिका–७ श्रीनाथकोट वडा प्रमुखमा हरिबहादुर गुरुङलाई उम्मेदवार बनाउने गरी केन्द्रमा सिफारिस गरेकाे छ  । पार्टीका नेता नारायण अधिकारीले दुई नगरपालिका, नौ गाउँपालिका र ९४ वडा रहेको गोरखामा  अन्यत्र भने उम्मेदवार चयन गर्न बाँकी रहेको  जानकारी दिए ।

काठमाडौ,बैशाख १४ । राजश्व छलीबारे ब्यवस्थापिका संसद सार्वजनिक लेखा समितिले चासो देखाएको छ । संसद सचिवालय सिंहदरवारमा समितिको बैठक सुरु भएको छ । बैठकले भारत लगायतका मुलुकबाट निर्यात भैरहेका बस्तुमा ब्यापक राजश्व छली भैरहेकोमा सरकार र संवन्धित निकायको ध्यानाकर्षण गर्नेछ ।

इलाम,  वैशाख १४। चालु आर्थिक वर्षको चैत मसान्तभित्रमा ६२ हजार पर्यटक जिल्ला भित्रिएका छन् । इलामको कोल्बुङस्थित पर्यटन सूचना केन्द्र जोरकलशका अनुसार २०७३÷७४ मा गत आवको भन्दा चार गुणा बढी पर्यटक भित्रिएका हुन् । सूचना केन्द्रका गगन घिमिरेका अनुसार गत आवमा देशमा भूकम्प, मधेस आन्दोलनजस्ता ठूला सङ्कट परेकाले जिल्लामा कम मात्र पर्यटक भित्रिएका थिए । जिल्ला भित्रिनेमध्ये ९० प्रतिशत आन्तरिक पर्यटक रहेको र बाँकी १० प्रतिशत मात्र बाह्य पर्यटक रहेको तथ्याङ्क रहेको छ । जिल्ला भित्रिएका मध्ये पनि ४० प्रतिशत पर्यटक इलामका श्रीअन्तु, कन्याम मात्र घुमेर जाने गरेको घिमिरेले जानकारी दिए। इलाम आउनेमध्ये ४० प्रतिशत पर्यटक भ्रमणका लागि र विभिन्न विषयवस्तु अवलोकन गर्न आउने गरेका छन् ।

इटहरी, वैशाख १४ । सुनसरीको बराह नगरपालिका–१ निवासी पूर्ण तामाङकी ९ वर्षीया छोरी प्रकृति तामाङ बुधबार दिउँसो २ः३० बजेतिर सप्तकोसी नदीमा नुहाउने क्रममा बगेर बेपत्ता भएपछि खोजतलास गर्ने क्रममा ४ः१५ बजे बगेको स्थानदेखि दुईसय मिटर दक्षिणमा मृत फेला परेको जिल्ला प्रहरी कार्यालय सुनसरीले जानकारी दिएको छ । नदीमा साथीहरुसँगै नुहाउने क्रममा बगेकी बालिकाको लासलाई इलाका प्रहरी कार्यालय महेन्द्रनगरको प्रहरी टोलीले मृत अवस्थामा फेला पारेर उनको लासलाई शवपरीक्षणका लागि बिपी कोइराला स्वास्थ्य विज्ञान प्रतिष्ठान पठाइएको पनि जिल्ला प्रहरी कार्यालयले जानकारी दिएको छ । घटनाका विषयमा प्रहरीले स्थानीयवासीसँग सोधखोज एवम् अनुसन्धान जारी राखेको पनि कार्यालयले जनाएको छ ।

काठमाडौं, वैशाख १३ । मधेसवादी ६ दलको एकतापछि बनेको राष्ट्रिय जनता पार्टीले एकसाता नबित्दै पार्टीको नाम फेरेको छ । वैशाख ७ गते मधेसवादी ६ दलबीच एकता भई उक्त नाम राखिएकोमा निर्वाचन आयोगमा ‘राष्ट्रिय जनता पार्टी’ यसअघि नै दर्ता भइसकेको पाइएपछि पार्टीको नाम फेर्नुपरेको हो । अब उक्त पार्टीको नाम ‘राष्ट्रिय जनता पार्टी नेपाल हुने भएको छ । संसदमा रहेका छ दलबीच एकीकरण गरी राष्ट्रिय जनता पार्टी, नेपाल बनाएको र त्यसको चुनाव चिन्ह छाता रहेको आयोगलाई जानकारी दिँदै उनीहरुले त्यसको अधिकारिकता माग गरेका छन् । राजपा नेपालका नेता रामनरेश यादवले पार्टी तथा चुनावको आधिकारिकता दिनका लागि आयोगलाई पत्र बुझाएको बताए । सविधान संशोधनपछि चुनावमा भाग लिने र त्यसका लागि पार्टी र चुनाव चाहिने भएकाले सो को माग गर्दै आयोगलाई पत्र बुझाएको उनले बताए । यद्यपी वैशाख ११ गते प्रधानमन्त्री प्रचण्डको उपस्थितिमा आयोग र राजपाबीच भएको छलफलमा आयोगले अब नयाँ दल तथा नयाँ चुनाव चिन्ह दिन नसकिने स्पष्ट पारेका थिए । एकीकृत भएका छ दलमध्येबाट नै कुनै चुनाव चिन्ह प्रयोग गर्न पनि आयोगले सुझाव दिएको थियो । निर्वाचन आयोगले संसदमा रहेका दल भन्दा बाहिरको चिन्ह दिनै नमिल्ने स्पष्ट गरेको छ ।

लोकेश धामी कैलाली, बैशाख १३ । प्रमुख प्रतिपक्षी दल नेकपा एमालेका उपाध्यक्ष भीम रावलले नेपालको संविधानलाई असफल बनाउने षड्यन्त्रमा भारत लागिपरेको आरोप लगाएका छन् । भारतीय स्वार्थ पूर्तिमा नेपाली काँग्रेस, माओवादी र मधेसवादी दलहरुले साथ दिइरहेका उनको आरोप छ । धनगढीमा आज आयोजित पत्रकार सम्मेलनमा पूर्वउपप्रधानमन्त्रीसमेत रहेका रावलले संविधान असफल बनाएर नेपाललाई गन्जागोलको अवस्थामा पु¥याउने र देश टुक्र्याउने षड्यन्त्र भारतले रचेको आरोप लगाए । नेपालको संविधान जारी हुनेवित्तिकै नाकाबन्दी लगाएर असफल बनाउने षड्यन्त्रमा लागेको भारतले नेपालमा जहिले पनि राजनीतिक स्थिरता हुन नदिएको उनको आरोप छ । त्यस्तै अहिले भारतको इशारामा नै चुनाव विथोल्ने योजना भइरहेको उनले बताए । माघ ७ गतेभित्र तीन वटै तहको चुनाव गराउनुपर्ने संवैधानिक बाध्यता भएको उल्लेख गर्दै रावलले उक्त मिति भित्र चुनाव हुन नदिएर संविधानलाई ध्वस्त गर्ने रणनीति भारतको रहेको बताए । भारतको इशारामा ल्याइएको संविधान संशोधनको प्रस्ताव राष्ट्र हित विपरित रहेको बताए । उपाध्यक्ष रावलले संविधानमा भएका जनताका अधिकार कटौती गर्ने, जनसंख्याको आधारमा स्थानीय तहको संख्या अवैज्ञानिक, अराजनैतिक र अनैतिक रुपमा थप्ने, नेपालीलाई अल्पमतमा पारी विदेशी हावी हुने गरी नागरिकता दिनेजस्ता गम्भीर राष्ट्र विरोधी संशोधनमा राखिएका प्रावधानलाई कुनै हालतमा स्वीकार गर्न नसकिने बताए । सबै भन्दा बढी जनसंख्या भएको प्रदेशमा जनसंख्याको आधारमा स्थानीय तह निर्धारण नगर्ने तर कम जनसंख्या भएको प्रदेशमा नयाँ मापदण्ड कायम गरि जनसंख्याका आधारमा स्थानीय तह निर्धारण गर्न खोजिनु गम्भीर शंका उब्जाएको बताए । जनसंख्याको आधारमा २ र ५ नम्बर प्रदेशका तराईका ११ जिल्लामा मात्र स्थानीय तह हेरफेर गर्न खोज्नु संवैधानिक, राजनीतिक र राष्ट्र हित विपरित कार्य भएको उनले बताए । संविधान संशोधनका नाममा तराई र पहाडलाई अहिले छुट्याउने र पछि तराईलाई नेपालबाट टुक्र्याउने षड्यन्त्र भईरहेको उनको आरोप छ । संविधान संशोधनका नाममा निर्वाचन हुन नदिएर माघ ७ गतेपछि देशमा शून्यताको अवस्था सिर्जना गरेर बाह्य हस्तक्षेप निम्त्याउन खोजिएको भन्दै उनले सत्तारुढ दलको कार्यशैलीप्रति आपत्ति जनाए । हार्ने डरले काँग्रेस, माओवादी चुनाव हुन नदिने पक्षमा रहेका उनको भनाई थियो । निर्वाचनको सबै तयारी पुरा भईसकेको अवस्थामा सहमतिका नाममा निर्वाचन सारेर निर्वाचन हुन नदिने खाजिएको भन्दै उहाँले बजेट घोषणापछि चुनाव हुन नसक्ने उपाध्यक्ष रावलले धारणा राखे । अर्को प्रसंगमा रावलले प्रदेश नम्बर सातका अधिकांश तहमा एमालेले उम्मेदवारको टुंगो लगाईसकेको बताए ।

काठमाडौँ, वैशाख १३। नेपाल संघीय समाजवादी पार्टीले साना दलहरुलाई चुनाव चिन्ह नदिई स्थानिय तहको निर्वाचन घोषणा गरेको भन्दै आपत्ति जनाएको छ । पार्टीले आज एक विज्ञप्ति जारी गरी नेपाल सरकारले संविधानप्रति सबै वर्ग तह, जात जाती र समुदायहरुको अधिकारलाई समाबेश गरी जनताको अपनत्व बढाई निर्वाचनको घोषणा क्रमश संघ प्रदेश र स्थानिय तहको गर्नु पर्नेमा बहुदलिय प्रतिस्पर्धाको मर्म र आफैले जारी गरेको वर्तमान संविधानको भावना विपरित राजनितिक दलहरुलाई चुनाव चिन्ह नदिई ३ दलिय सिन्डीकेटले घोषणा गरेको स्थानिय तहको निर्वाचन भन्दै आपत्ति जनाएको हो । विज्ञप्तीमा भनिएको छ ‘जेष्ठ ३१ गते घोषणा गरिएको दोस्रो चरणको निर्वाचन मुस्लिम समुदायको पवित्र व्रत्र रमजानको १ महिने उपवासलाई अपेक्षा गर्दै जवरजस्ती मुस्लिम दाजुभाई दिदि वहिनीहरुको भावनामा चोट पु¥याएको भन्दै पार्टीको गम्भिर ध्यानआकर्षण भएको जनाएको छ ।’ राज्यले सबै धर्म र संस्कृतिको सम्मान गर्नुपर्नेमा त्यसको समेत खिल्ली उडाएको भन्दै असन्तुष्ट पक्षको माग सम्बोधन गरी अव्यवहारिक अवैज्ञानिक निर्वाचन मिति रद्द गरी नयाँ निर्वाचन मिति घोषणा गर्न माग गरेको छ ।  

खोटाङ, वैशाख १३ । स्थानीय तहको निर्वाचनमा उम्मेदवार बन्न जिल्लाका एक दर्जन शिक्षकले राजीनामा दिएका छन् । आसन्न स्थानीय तहको निर्वाचनमा गाउँ प्रमुख र वडा प्रमुखका लागि उम्मेदवार बन्न १२ जना शिक्षकले राजीनामा दिएका हुन् । कतिपय शिक्षकले उम्मेदवार पाउने निश्चित भएपछि राजीनामा दिएका छन् भने कतिपयले पदबाट राजीनामा दिएर टिकटका लागि कसरत गरिरहेका छन् । जिल्ला शिक्षा कार्यालयका अनुसार सिम्पानी क्याम्पसका प्रमुख राजनप्रसाद ढकाल, माक्पा माविका शिक्षक विश्वनाथ निरौला, सरस्वती मावि डाँडाखर्क छितापोखरीका शिक्षक केशवराज कार्की, जनता मावि बतासेका शिक्षक वसन्त राई, पञ्चकन्या आधारभूत विद्यालय डाँडागाउँका शिक्षक विमल खड्का, सरस्वती प्रावि पौवासेराका शिक्षक हरिकुमार राई, हीरा प्रावि महेश्वरीका शिक्षक राजेशकुमार राजभण्डारी, राष्ट्रिय मावि बास्पानीका शिक्षक खगेन्द्रबहादुर गुरुङ, प्रतिभा प्रावि मात्तिमका शिक्षक रोहित राई, शारदा मावि हौंचुरका शिक्षक यज्ञनारायण श्रेष्ठ, चन्द्र प्रावि सिमखर्क सुङ्देलका शिक्षक कालिकाप्रसाद रिजाल र डाँडाखर्क प्रावि बराहपोखरीका ढकबहादुर कार्कीले राजीनामा दिएका छन् । अस्थायी शिक्षकका रुपमा कार्यरत केशवराज कार्की, रोहित राई र यज्ञनारायण श्रेष्ठको भने विद्यालय व्यवस्थापन समितिले राजीनामा स्वीकृत गरेर जिल्ला शिक्षा कार्यालयमा जानकारी पठाएको जिल्ला शिक्षा अधिकारी ज्ञानमणि नेपालले जानकारी दिए । अन्य स्थायी शिक्षकको भने राजीनामा स्वीकृतिका लागि शिक्षामा फायल आएको नेपालको भनाइ छ । उम्मेदवारका इच्छुक कतिपय शिक्षकले वैशाख ३ गतेअघि पनि राजीनामा दिइसकेको शिक्षा कार्यालयले जनाएको छ । पारिवारिक, घरायसी र व्यक्तिगत कारण देखाउँदै शिक्षकको राजीनामा आएको भएपनि अधिकांशले गाउँपालिका र वडा प्रमुखमा उठ्नका लागि राजीनामा दिएका स्रोतको दाबी छ । सरस्वती मावि डाँडाखर्क छितापोखरीको प्रधानाध्यापकबाट राजीनामा दिनुभएका कार्र्की र जनता मावि बतासेको जागीर छाड्नुभएका राई दिप्रुङ गाउँपालिकाको प्रमुखको टिकट हात पार्ने दौडधुपमा रहेका छन् । पञ्चकन्या आधारभूत विद्यालय डाँडागाउँका प्रअबाट राजीनामा दिनुभएका खड्का एमालेका तर्फबाट दिप्रुङ गाउँपालिका–५ छितापोखरीबाट वडा प्रमुखमा उठ्ने तयारीमा रहनुभको स्रोतले जनाएको छ । स्रोत व्यक्तिको पद छाडेर ऐंसेलुखर्क गाउँपालिका प्रमुखमा उठ्ने तयारी गर्नुभएका निरौला नेपाली काँग्रेसका पूर्वमहाधिवेशन प्रतिनिधि समेत हुन् । दिप्रुङ गाउँपालिकाको प्रमुखको दौडमा लाग्नुभएका कार्की हाल काँग्रेसका महासमिति सदस्यको भूमिकामा छन् ।

धनगढी, १३ वैशाख । नेपाली काँग्रेस कैलालीले आसन्न स्थानीय तहको निर्वाचनमा पार्टीका तर्फबाट उठाइने उम्मेदवारको छनोट प्रक्रिया केही दिनका लागि स्थागित गरेको छ । काँग्रेसका जिल्ला उपसभापति प्रकाश बमले वैशाख ३१ गतेका लागि तोकिएको निर्वाचनको मिति सरेर जेठ ३१ गते तोकिएपछि केही दिनका लागि उम्मेदवार छनोट प्रक्रिया स्थगित गरिएको बताउनुभयो । “केही दिन छनोट प्रक्रिया स्थगित गरेर वैशाख महिनाभित्रमा उम्मेदवारको टुङ्गो लगाइसक्छौँ,” उहाँले भन्नुभयो । काँग्रेसको तर्फबाट प्रमुख पदका लागि धनगढी उपमहानगरपालिकामा कृष्णबहादुर महरा र नृप ओड, टीकापुर नगरपालिकामा जङ्गबहादुर साउद र केशरी विष्ट, गोदावरी नगरपालिलकामा हेमप्रकाश उप्रेती, वीरेन्द्र भट्ट र खडक बडैला, गौरीगङ्गा नगरपालिकामा दिनेश जोशी, शेरबहादुर देउवा र भोजबहादुर बम, लम्कीचुहा नगरपालिकामा देवानन्द जैशी र भक्तबहादुर थापा तथा घोडाघोडी नगरपालिकामा लक्ष्मीराज जैशी र रीता चौधरीलगायतका आकाङ्क्षी रहेको जिल्ला उपसभापति बमले बताउनुभयो । नेकपा एमालेले भने जिल्लाका १३ स्थानीय तहमध्ये १० वटा स्थानीय तहमा पार्टीबाट उठाइने प्रमुख, उपप्रमुखलगायत पदका उम्मेदवारको टुङगो लगाइसकेको छ । एमालेको– ७ नं प्रदेश सङ्गठन समितिको कार्यालयका सचिव दिनेशचन्द्र सुवेदीले धनगढी उपमहानगरपालिका, लम्की चुहा र गोदावरी नगरपालिकामा उम्मेदवारको टुङ्गो लगाउन बाँकी रहेको जानकारी दिनुभयो । सो पार्टीले टिकापुर नगरपालिकामा तपेन्द्र रावल, भजनी नगरपालिकामा प्रदीप मल्ल, घोडाघोडी नगरपालिकामा अमर साउद, गौरीगङ्गा नगरपालिकामा भीम देउवालाई प्रमुखको उम्मेदवार बनाउने टुङ्गो लगाएको छ । नेकपा (माओवादी केन्द्र)ले अधिकांश तहमा पार्टीका तर्फबाट उठाइने उम्मेदवारको टुङ्गो लगाइसकेको छ । सो पार्टीले धनगढी उपमहानगरमा रामसमझ राना, गोदावरी नगरापलिकामा गोकर्ण भट्ट, भजनी नगरमा शेरबहादुर थारुलाई प्रमुख पदमा उठाउने निर्णय गरिसकेको छ । राप्रपा, नेकपा माले, राष्ट्रिय जनमोर्चा लगायतका दललेले उम्मेदवारको टुङ्गो अहिलेसम्म लगाउनसकेका छैनन् । चुनावी सरगर्मी बढ्दै जाँदा प्रायः सबै दलहरुले आ–आफ्नो प्रचारप्रसार अभियान गरिरहेका छन् । उद्योगी एवम् व्यापारी गोपाल हमाल धनगढी उपमहानगरपालिकाको प्रमुखमा स्वतन्त्र उम्मेदवारी घोषणा गर्दै चुनावी अभियानमा लाग्नुभएको छ । रासस

तेह्रथुम, वैशाख १३ । बुधबार बिहानैदेखि पूर्वका विभिन्न जिल्लामा नेपाल टेलिकमको सेवा अवरुद्ध भएको छ । नेपाल टेलिकमको ल्यान्डलाइन, प्रिपेड तथा पोस्टपेड र सिडिएमएका साथै एडिएसएल सेवा अवरुद्ध हुँदा लाखौँं सेवाग्राही मर्कामा परेका हुन् । पूर्वका तेह्रथुम, धनकुटा, सङ्खुवासभा, ताप्लेजुङ, पाँचथर, भोजपुरलगायतका जिल्लामा नेपाल टेलिकमको सो सेवा अवरुद्ध छ । यी जिल्लामा पछिल्लो केही महिनायता निरन्तर सेवा अवरुद्ध हुने गरेपनि सम्बन्धित निकायले बेवास्ता गरेको सेवाग्राहीको गुनासो छ । टेलिकमको सेवा भरपर्दो नभएपछि प्रयोगकर्तालाई निजी कम्पनीका सेवा लिनुपर्ने बाध्यता छ । टेलिकम बाहेकका मोबाइल नेटवर्क तथा इन्टरनेट भने चलिरहेका छन् । पटक-पटक नेपाल टेलिकमको सेवा अवरुद्ध हुँदासमेत दिगो व्यवस्थापनको बाटो नरोेजिएको म्याङलुङका रोशन श्रेष्ठले बताउनुभयो । नेपाल टेलिकमको इन्टरनेट, फोन र जिएसएम मोबाइल सेवा अधिक समय अबरुद्ध हुने गरेको उहाँको गुनासो छ ।

रत्ननगर (चितवन), १३ वैशाख । चितवनको राप्ती नदीमा पौडी खेल्ने क्रममा गोहीले चपाएर पनि बाँच्न सफल १२ वर्षीय बालक अर्जुन हरिजनको उपचारका लागि थप रु एक लाख ३४ हजार सहयोग प्राप्त भएको छ । आजसम्ममा कुल रु तीन लाख ५० हजारभन्दा बढी रकम सङ्कलन भइसकेको छ । ‘गोहीले चपाएर पनि बाँचे अर्जुन’ शीर्षकमा समाचार बाहिर आएपछि उनको उपचारका लागि देश र विदेशमा बस्ने नेपालीबाट यसरी सहयोग प्राप्त भएको हो । उनको सहयोग अभियानका अभियन्ता विकास पाठकका अनुसार पछिल्लो पटक चितवन समाज इजरायलबाट रु ५१ हजार तथा चितवन समाज युएईबाट रु ३३ हजार पाँचसय रकम प्राप्त भएको छ । चितवन युवा समूह अन्तर्राष्ट्रिय समन्वय समितिको पहलमा उक्त रकम परिवारलाई हस्तान्तरण गरिएको समितिका अध्यक्ष मुक्तिप्रसाद अधिकारीले आज जानकारी दिनुभयो । यस्तै, ब्रदर्स नेपाल र हाम्रो जगतपुरको पहलमा सोही अभियानमा लागेका स्थानीयवासी कृष्ण शर्मामार्फत आज रु ५० हजार आर्थिक सङ्कलन भएको छ । यसअघि उनको उपचारका लागि करिब रु दुई लाख ३० हजारभन्दा बढी सङ्कलन गरिसकिएको छ । आजसम्म उनको उपचारका लागि साढे तीन लाखभन्दा बढी आर्थिक सहयोग सङ्कलन भइसकेको अभियन्ता विकास पाठकले जानकारी दिनुभयो । सङ्कलित रकममध्ये रु ४९ हजार अस्पतालमा बुझाएको र रु एक लाख २९ हजार परिवारको नाममा खोलिएको बैंक खातामा राखिएको छ । जम्मा भएको बाँकी रकम पनि आजै बैंकमा राखिने पाठकले बताउनुभयो । अझै अस्पतालमा तिर्न बाँकी रहेको ऋण खोजेर ल्याएको रकम फिर्ता गरेपछि रकम बाँकी रहेमा उनको शिक्षामा खर्च गरिने पाठकले बताउनुभयो । हालका लागि भने आर्थिक सङ्कलन अभियान स्थगित गरिएको छ । यसअघि उनको उपचारका लागि अमेरिकामा बस्दै आएका तनहुँ निवासी ध्रुवराज गिरीले रु ५१ हजार, चितवन सेवा समाज बहराइनबाट रु ३५ हजार ५००, दुबईमा रहनुभएका दिलीप विश्वकर्माको अगुवाइमा रु ५१ हजार तथा विभिन्न सङ्घसंस्था र व्यक्तिले सहयोग गरेका थिए । फेसबुक अभियान ‘हाम्रो जगतपुर’ र ‘हाम्रो पटिहानी, राम्रो पटिहानी’ले समेत सहयोग जुटाइरहेको छ । गत चैत २५ गते भरतपुर महानगरपालिका २३ जगतपुर घैलाघारीका बालक अर्जुनलाई साथीसँग पौडी खेल्ने क्रममा राप्ती नदीमा गोहीले आक्रमण गरी गम्भीर घाइते बनाएको थियो । उनको अहिले चितवन मेडिकल कलेजमा उपचार भइरहेको छ ।

काठमाडौं, बैसाख १३  ।  नेकपा माओवादी केन्द्रले स्थानीय निकायको निर्वाचनमा प्रदेश नम्बर ७ मा कांग्रेसस‌ंग ‍चुनावी एकताको कुरा हल्ला मात्र भएको बताएको छ । केन्द्रले कुनै चुनावी तालमेल नभएको स्पष्टिकरण दिएको छ । स्थानीय निकायको चुनावमा  प्रदेश नम्बर ७ मा काँग्रेस–माओवादी चुनावी तालमेल भएको भन्दै सञ्चारमाध्यममा समाचार प्रकाशन प्रसारण भएको थियो । माओवादी प्रदेश नम्बर ७ को सचिवालयले सञ्चारमाध्यमले भने जस्तो एकता नभएको स्पस्ट पारेको हो ।  सुदुरपश्चिम (प्रदेश नम्बर ७ ) मा चुनावी तालमेलका विषयमा काँग्रेस र एमालेका नेताहरुसंग छलफल भएको तर कुनै सहमति नभएको सचिवालयले जनाएको छ । माओवादी केन्द्र सचिवालयले जनाएअनुसार माअोवादी एक्लै चुनावी मैदानमा उत्रिने तयारीमा छ ।