पोखरा, वैशाख ९ । नेकपा एमाले पोखरा–लेखनाथ महानगर सङ्गठन कमिटीले महानगरको प्रमुख र उप–प्रमुख पदका लागि मतदान प्रकृयाबाट तीन-तीन जनाको नाम सिफारिस गरेको छ । गएराति १ बजेतिर सकिएको सो मतगणनापछि महानगरको प्रमुख पदमा पार्टीका वैकल्पिक पोलिटब्यूरो सदस्य एवम् पूर्व जिल्ला कमिटीका अध्यक्ष मानबहादुर जिसी, पोखरा उपमहानगरपालिकाका पूर्वप्रमुख तथा जिल्ला कमिटिका अध्यक्ष कृष्ण थापा र एमालेकी महिला नेतृ मित्रकुमारी गुरुङ सुवेदीलाई प्राप्त मतका आधारमा सिफारिस गरिएको हो । त्यस्तै नगर उपप्रमुख पदमा पार्टीका उप–सचिव प्रभा कोइराला, जिल्ला सदस्य मञ्जु गुरुङ, पूर्व जिल्ला उपसचिव देवका पहारीलाई पनि मतदान प्रक्रियाबाट सिफारिस गरिएको हो । सो मतदान प्रक्रियामा पार्टीका महानगर सङ्गठन कमिटीका ३९९ सदस्यले मतदान गर्नुभएको थियो । यसअघि महानगरको प्रमुखमा १० र उपप्रमुखमा आठ जनाले दाबी गरेका थिए । सिफारिसमा परेका दाबेदारलाई जिल्लाले प्रदेशमा र प्रदेशको सिफारिसमा स्थायी कमिटीले उम्मेदवार तोक्ने जिल्ला कमिटीका कार्यालय सचिव बैनबहादुर क्षेत्रीले जानकारी दिनुभयो ।

पोखरा, वैशाख ९ । कागवेनीमा बस दुर्घटना हुँदा पाँच जनाको ज्यान गएको छ । प्रसिद्ध तीर्थस्थल मुक्तिनाथबाट मुस्ताङको सदरमुकाम जोमसोम आउँदै गरेको ना ५ ख ६०६७ नम्बरको बस कागवेनीको उकालोमा पल्टिँदा पाँच जनाको घटनास्थलमै ज्यान गएको प्रहरीले जनायो । ज्यान गुमाउनेको सनाखत हुन सकेको छैन । म्याग्दी बस सञ्चालक समितिद्वारा सञ्चालित बसमा ३५ जना यात्रु रहेका र अघिकांश यात्रु घाइते भएको बताइएको छ । घाइतेहरुको उपचारको लागि मुस्ताङ्ग जिल्ला अस्पताल जोमसोम ल्याइएको छ । नेपाली सेना, नेपाल प्रहरी र स्थानीय बासिन्दाहरु अहिले घटनास्थलमा पुगी उद्धारको काममा खटिएका छन् ।

नेपालगन्ज, वैशाख ९ । स्थानीय निकाय निर्वाचनलाई दृष्टिगत गरी जिल्ला प्रशासन कार्यालयले निश्चित समय अवधिका लागि नागरिकसँग भएको हतियार बुझाउन गरेको आग्रहलाई यथोचित पालना गरिएको छैन । स्थानीय प्रशासन कार्यालयले गत चैत ९ गते सूचना जारी गरी चैत २४ गतेसम्म हतियार बुझाउन आग्रह गरेकोमा त्यसको बेवास्ता भएपछि पुनः वैशाख ५ गतेसम्म बुझाउनका लागि म्याद दिइएको थियो । यहाँका नागरिकसँग भएको अनुमति प्राप्त हतियार बन्दुक, पेस्तोल र सटगन बुझाउन गरेको आग्रहलाई अहिलेसम्म ५० जनाले मात्र पालना गरेका छन् । प्रमुख जिल्ला अधिकारी रविलाल पन्थकाअनुसार, हतियार खरिदका लागि बाँके जिल्लाबाट अनुमति लिएका र अन्य जिल्लामा खरिद गरी यहाँ नवीकरण गरेकाको सङ्ख्या जिल्लामा ८०० रहेको छ । गृह मन्त्रालयले हिजो हतियार बुझाउनका लागि जारी गरिएको सूचनामा वैशाख १५ गतेसम्मको अवधि दिएकोमा यस जिल्लामा पनि सोही अवधि लागू हुने प्रजिअ पन्थले बताउनुभयो । ‘मन्त्रालयको सूचनालाई बेवास्ता गरी तोकिएको अवधिमा हतियार नबुझाउनेलाई कानुन अनुसार कारबाहीको दायरामा ल्याइने छ’—प्रजिअ पन्थले भन्नुभयो । यसैबीच, स्थानिय निकाय निर्वाचनको सुरक्षा व्यवस्थालाई चुस्त,दुरुस्त बनाउन अपनाउनुपर्ने रणनीतिका सम्बन्धमा प्रजिअ पन्थको नेतृत्वमा जिल्लाका प्रहरी प्रमुख, सशस्त्र प्रहरी, नेपाली सेनाका पदाधिकारी, मुख्य निर्वाचन अधिकृत र निर्वाचन अधिकारीको टोली आज जिल्लाको राप्तीपारी क्षेत्रको अनुगमनमा गएको छ ।

काठमाडौँ, वैशाख ९ । नेपाल पत्रकार महासङ्घ काठमाडौँको नयाँ नेतृत्वका लागि आइतबार निर्वाचन हुने भएको छ । शुक्रबार शाखाको १० अौँ अधिवेशनको उद्घाटन भएपछि नयाँ नेतृत्वका लागि निर्वाचन आइतबार बिहान १० देखि अपराह्न ४ बजेसम्म हुने मुख्य निर्वाचन अधिकृत गोविन्द पोखरेलले जानकारी गराउनुभयो । निर्वाचन सम्पन्न भएको एक घन्टापछि मतगणना गरिने छ । आइतबार निर्वाचनका लागि आज उम्मेदवारले मनोनयनपत्र दर्ता गराउने छन् । आज उम्मेदवारको अन्तिम नामावली प्रकाशन गरिने छ । शाखा कार्यालय भृकुटीमण्डपमा कार्यसमितिका लागि बिहान ११ देखि १ बजेसम्म र केन्द्रीय पार्षद् तथा प्रदेश पार्षद्का लागि बिहान २ देखि बेलुका ५ बजेसम्म उम्मेदवारी मनोनयन गराउने समय तोकिएको पोखरेलले जानकारी गराउनुभयो । नयाँ नेतृत्वका लागि शन्तराम बिंडारी र रामकृष्ण अधिकारीले उम्मेदवारी घोषणा गर्नुभएको छ । चैतमा हुनुपर्ने अधिवेशन सदस्य विवादका कारण रोकिएको थियो । शाखामा करिब एक हजार तीन सय ५० मतदाता छन् ।

काठमाडौँ, वैशाख ९ । डिल्लीबजार पिपलबोटका बासिन्दालाई घन्टौँ पानीको लाइन बसेर पानी भर्नुपर्ने समस्या भोग्न बाध्य छ । खानेपानीको समस्याका कारणले पानी किनेर पिउने, खाना पकाउने, लुगा धुने र अन्य काम गर्नुपर्ने बाध्यता छ । पानीको अभावका कारण सुन्दरीजल, चुच्चेपाटीमा रहेको पानीको टंयाकबाट सात आठ दिनमा एक पटकमात्र पानी दिने गरिएको छ । त्यो पनि बढीमा दुई घन्टामात्र आउने हुनाले यहाँका बासिन्दा मर्काका परेका हुन् । दैनिक जीवन धान्नका लागि पानीकै कारण समस्या भएको स्थानीयवासी वृद्धा परानमाया शाहीले दुःखेसो गर्नुभयो । आठ दिनमा एक पटक पानी आउँदा पनि डेरामा बस्नेलाई घरबेटीले पानी नदिने हुनाले बहालमा बस्नेको समस्या अझै दुःखदायी छ । पिपलबोटनेर डेरा गरी बस्ने कमला राई भन्नुहुन्छ, “पानीको समस्याले गर्दा पढ्न लेख्न पनि समस्या भएको छ । पढ्ने समयमा पानीको लाइन बस्न जानुपर्छ ।” घरबेटी अन्जना शाहीले आफूहरुलाई पनि पानी नपुगेकाले बहालमा बस्नेका लागि दिन नसकिएको बताउनुभयो । उहाँले भन्नुभयो, “पानी सात आठ दिनको एक पटक मात्र आउँछ, हामीलाई नै पुग्दैन, थोरै समय आउँछ, त्यसैले गर्दा हामीले डेरामा बस्नेलाई सात आठ दिन पुग्ने पानी दिन नसकेका छैनौँ ।” ज्ञानेश्वरदेखि पिपलको बोटसम्मका मानिसले पानी भर्ने हुँदा त्यहाँ धेरै भिड भएको र लाइन बस्नुपरेको शाहीले बताउनुभयो । पानीको लाइन बसेर भर्दा झगडा हुनेजस्ता समस्या पनि देखापर्ने गर्छ । पानी खोल्ने र बन्द गर्ने समयअवधि सीमित नहुनाले कति बेला पानी आउँछ भन्ने थाहा नभएको र पानी बगेर खेर गइसकेपछि मात्र थाहा हुँदा एकै पटक पानी भर्न आउनेको भिड हुन्छ । पिपलबोटदेखि ज्ञानेश्वरसम्म १५–२० घरधुरी छन् । उक्त ठाउँमा प्रतिघर कम्तीमा पनि तीनदेखि चार परिवार डेरामा बसोबास गर्दै आएका छन् । जनसङ्ख्याको अत्याधिक चापका कारणले पनि पानीको समस्या आएको युवक राईले बताउनुभयो । स्थानीयवासीको भनाइअनुसार हप्ताको कम्तीमा दुई पटक भए पनि पानी आएमा समस्या कम हुन्छ । काठमाडौँमा ट्यांकर तथा जारको पानी ल्याउन यातायात तथा भण्डारणको समस्या छ । टोलका भाडामा बस्नेले मिलेर ल्याउन चाहे पनि धारामा आउने पानीको तुलनामा महँगो हुने गरेकाले सर्वसाधारणलाई झनै समस्याले पिरोल्छ ।

सन्धिखर्क, वैशाख ९ । धार्मिकस्थल सुपा देउरालीमा आउने धार्मिक पर्यटकको सङ्ख्यामा वृद्धि भएको छ । एक वर्ष पहिलाको तुलनामा आजभोलि आउने दर्शनार्थीको सङ्ख्यामा दोब्बरभन्दा बढीले वृद्धि भएको छ । विगतका वर्षमा दैनिक दुई सयदेखि एक हजार जनाले दर्शन तथा पूजाआजा गर्ने गरेकामा अहिले एक हजारदेखि दुई हजारसम्मले दर्शन गर्ने गरेको मन्दिर संरक्षण समितिका अध्यक्ष पृतम थापाले बताउनुभयो । वैशाख १ गते नयाँ वर्षको दिन १२ हजारभन्दा बढीले दर्शन गरेको र उक्त दिन मन्दिरमा रु एक लाख नौ हजार आठ सय भेटी चढेको उहाँको भनाइ छ । सन्धिखर्क नगरपालिका–७ खाँचीकोटमा रहेको धार्मिक तथा ऐतिहासिक महत्व बोकेको सुपा देउराली मन्दिर धेरै भेटी सङ्कलन हुने मन्दिरमध्येको एक हो । यहाँ उठेको भेटीबाट विकास निर्माणका काम भइरहेका छन् । मन्दिरमा चढाइएको भेटीबाट आदर्श मावि खाँचीकोटमा छ र शान्ति निमावि सीतापुरमा चार शिक्षक राखिएको छ । भेटीबाट सङ्कलित रकममध्ये मासिक रुपमा आदर्श मावि र शान्ति निमाविलाई रु एक लाख २० हजार उपलब्ध गराइएको मन्दिर व्यवस्थापन समितिका सचिव यादव घिमिरेले बताउनुभयो । यस्तै सन्धिखर्कमा रहेको पाणिनि वेदविद्या आश्रमका लागि वार्षिक रु एक लाख २० हजार उपलब्ध गराइने उहाँको भनाइ छ । “विद्यालयसँगै अन्य विकासनिर्माणका काममा पनि सहयोग पु¥याउने गरेका छौँ”, उहाँले भन्नुभयो, “खानेपानी प्लटिङ, मोटरबाटो निर्माणजस्ता विकास निर्माणका काम भएका छन् । विभिन्न खाले जटिल खालका बिरामीको उपचार खर्चमा समेत सहयोग पु¥याउँदै आएका छौँ ।” मन्दिरमा गत वर्ष रु ६० लाख आम्दानी भएको थियो । यस वर्ष बढेर रु ८० लाख पुग्ने मन्दिर सचिव यादवले बताउनुभयो । मन्दिरको दर्शन गर्न अर्घाखाँची, कपिलवस्तु, दाङ, प्युठान, गुल्मी र रुपन्देहीबाट बढी मात्रामा पर्यटक आउने गर्छन् । भारतको उत्तर प्रदेश, विहारबाट समेत यहाँ दर्शन गर्न आउने गरेका छन् । विद्यालय चलाउन कठिन भएका समयमा मन्दिरको भेटीबाट प्राप्त रकमले शिक्षक राखेर विद्यालय सञ्चालन गर्दा धेरै सहज भएको आदर्श मावि खाँचीकोटका प्रअ डिल्लीराज थापाले बताउनुभयो । “मन्दिरबाट सहयोग नमिलको भए यो विद्यालय प्रावि नै रहने थियो” उहाँले भन्नुभयो, विद्यालयलाई यो अवस्थासम्म ल्याउन पाउँदा हामी निकै खुसी छौँ ।” मन्दिर व्यवस्थापन समितिले यहाँ उठेको रकमबाट मन्दिर र विद्यालय सञ्चालन, विकासनिर्माण र बिरामीको उपचारमा सहयोग गर्दै आएको बताएको छ । सुपा देउराली मन्दिर वरिपरिको वातावरणलाई व्यवस्थित गरी यसको प्रचारप्रसारमा ध्यान दिनुपर्ने संरक्षण समितिका उपाध्यक्ष गोबर्धन थापाले बताउनुभयो । “मन्दिरको भेटी विद्यालय जस्तो सामाजिक संस्थालाई दिनु राम्रो कार्य हो”, उहाँले भन्नुभयो । सुपा मन्दिरको शिरमा जान सकिने केबुलकार र साहसिक पदमार्ग बनाउन सके यहाँ पर्यटन व्यवसायबाट राम्रो आम्दानी लिन सकिने सहायक प्रजिअ नारायण खत्रीले बताउनुभयो । सुपाको पूर्वमा रहेको भैँसी मेलामा मन्दिर बनाएर केबुलकार बनाउने, पश्चिमको सिद्ध मन्दिरमा पुल बनाउने तथा साहसिक पदमार्गको निर्माण गर्न सके नेपालकै प्रसिद्ध धार्मिक तथा पर्यटकीयस्थल बनाउन सकिने उहाँले बताउनुभयो ।। सन्धिखर्क गोरुसिङ्गे सडकखण्डसँगै जोडिएकाले पनि यसको महत्व बढ्दो छ । सुपा देउरालीको दर्शन गरेपछि मनले चिताएको पुग्ने धार्मिक विश्वास छ । कडा चट्टानका बीच निर्माण भएको सडक र त्यही सडकको छेउमा मन्दिर छ । यहाँ राष्ट्रिय, अन्तर्राष्ट्रिय क्षेत्रमा ठूलो ओहदामा पुगेका व्यक्तिसमेतले दर्शन गर्छन् । कुनै अप्ठ्यारो समस्या आएको बेलामा सुपा देउरालीलाई भाकल गरे समस्या टर्ने विश्वास छ । सुपा देउराली नजिकै मनोरम दृश्यले भरिपूर्ण नरपानीको डाँडाले पनि यस क्षेत्रमा पर्यटन विकासले फड्को मार्नेमा विश्वास लिइएको छ । नरपानी डाँडा चिसो हावा र पानीले प्रसिद्ध छ । यहाँबाट धेरै हिमाल देख्न पाइन्छ । मनमोहक दृश्य देख्न पाइने हुँदा गर्मीयाममा तराईबाट गर्मी छल्न यहाँ धेरै पर्यटक आउने गर्छन् । यहाँ भारतबाट आउने पर्यटकको सङ्ख्यामा पनि वृद्धि भएको छ ।

काठमाडौै‌ं, बैसाख ९ । चुनाव चिह्नको माग गर्दै आन्दोलनरत नयाँ शक्ति नेपालसहितका ६८ दलले सातदिने अनशन अन्त्य गरेका छन् । रत्नपार्कको शान्तिबाटिकामा अनशनको समापन गर्दै उनीहरूले आफूहरूको एकसूत्रीय माग सम्बोधन नभए आगामी सोमबारबाट नेपाल बन्दसहितको कार्यक्रम सार्वजनिक गर्ने बताएका छन् । स्थानीय तह निर्वाचन ऐनमा संसद्बाहिर रहेका दलहरूलाई चुनाव चिह्न नदिने व्यवस्था गरिएकोप्रति आपत्ति जनाउँदै उनीहरूले २ वैशाखदेखि अनशन सुरु गरेका थिए । अनशन अन्त्य गर्ने कार्यक्रममा ६८ दलका अध्यक्ष एवं प्रतिनिधिले चुनाव चिह्न नपाए ३१ वैशाखमा स्थानीय तहको निर्वाचन बिथोल्ने चेतावनी दिएका छन् । नयाँ शक्ति नेपालका नेता पर्शुराम तामाङले आफूहरूको माग आइतबारसम्म पूरा नभए नेपाल बन्द र आमरण अनशनसहितको आन्दोलनका कार्यक्रम घोषणा गर्ने बताए । ‘सरकार, संसद् र निर्वाचन आयोगले आफूहरूको माग बेवास्ता गरेकाले अब व्यवस्थापिका संसद् र प्रधानमन्त्री निवास बालुवाटार घेराउसहितको सशक्त आन्दोलन घोषणा गर्छौं,’ उनले भने । नेकपा क्रान्तिकारी माओवादीका नेता सिपी गजुरेलले बहुदलीय व्यवस्थालाई लत्याउँदै सरकारले तानाशाही चरित्र देखाएको आरोप लगाए । ‘४० वर्ष सँगै परिवर्तनमा साथी बनेका प्रचण्ड तानाशाही बन्न खोजेका छन्, नक्कली लोकतन्त्रविरुद्धको लडाइँलाई अझ सशक्त बनाउन जरुरी छ,’ उनले भने । यसअघि उनीहरूले चुनाव चिह्नको माग गर्दै देशभरका निर्वाचन कार्यालय घेराउ गरेका थिए । यो खबर आजको नयाँ पत्रिकामा  छ ।

नेपालगन्ज,  वैशाख ९ । बाँके जिल्लाका राजनीतिक दलहरुले स्थानीय निकाय निर्वाचनमा बालबालिकाको प्रयोग नगर्ने लिखित प्रतिबद्धता व्यक्त गरेका छन् । जिल्ला बालकल्याण समितिद्वारा शुक्रबार  आयोजित ‘स्थानीय निकाय निर्वाचन र बालअधिकार संरक्षण तथा प्रवद्र्धन’ विषयमा राजनीतिक दलका पदाधिकारी, प्रतिनिधिसँग गरिएको छलफलपछि दलहरुले सो प्रतिबद्धता जनाएका हुन् । बाँके युनेस्को क्लब, सेभ द चिल्ड्रेन, युनिसेफको सहयोगमा आयोजित कार्यक्रममा वीरेन्द्र थापाले बालबालिकासम्बन्धी कानुन, ऐन, उनीहरुको प्रयोगको प्रावधान, निर्वाचन आचारसंहितालगायत बाल अधिकारसम्बन्धी अन्य व्यवस्थाबारेको प्रस्तुतिमा सहभागीबीच छलफल समेत गराइएको थियो । त्यस अवसरमा प्रजिअ रविलाल पन्थले निर्वाचन र राजनीतिक दलका अन्य कुनै पनि क्रियाकलापमा बालबालिकाको प्रयोगमा रोक लगाइएको बताउँदै यसमा जिल्ला बालकल्याण समितिले अनुगमन गर्ने व्यवस्था समेत मिलाइएको जानकारी गराउनुभयो । स्थानीय निकाय निर्वाचनमा बा“के जिल्लामा दुई लाख ४६ हजार ७८ मतदाता छन् । जिल्लाका एक उपमहानगरपालिका, एक नगरपालिका र छ गाउँपालिकामा एक लाख २५ हजार नौ सय ३९ पुरुष, एक लाख २० हजार एक सय ४१ ज् महिला र एक तेस्रो लिङ्गीले मतदान गर्न पाउने छन् । दोस्रो संविधानसभा सदस्य निर्वाचनभन्दा ४४ हजार मतदाता आगामी निर्वाचनमा बढी छन् । “दोस्रो संविधानसभा सदस्य निर्वाचनमा दुई लाख नौ हजार १६७ जना मतदाता थिए”, निर्वाचन अधिकारी वसन्तराज अधिकारीको भनाइ छ । रासस

चितवन, वैशाख ९। जिल्ला प्रशासन कार्यालयले मालपोत कार्यालय भरतपुरका दुई कर्मचारी र एक लेखापढी व्यवसायीलाई सेवाग्राहीसँग घुस लिएको आरोपमा शुक्रबार पक्राउ गरेको छ । पक्राउ पर्नेमा मालपोत कार्यालयका नासु, मनोज निरौला, कम्युटर अपरेटर प्रदीप पौडेल र लेखापढी व्यवसायी फडीन्द्रराज तिवारी छन् । उनीहरुमध्ये निरौलाले चण्डीभन्ज्याङका बिर्खलाल गुरुङको हजुरबुबाका नामको जग्गा हजुरआमाका नाममा नामसारी गर्न नाममा मणि र मनि नमिलेको भन्दै रु छ हजार मागेको गुरुङले आरोप लगाउनुभयो । त्यस्तै कम्युटर अपरेटर तिवारीले रु ५०० लिएको अभियोग लगाइएको छ । । लेखापढी व्यवसायीले बिचौयियाको काम गरेको आरोप छ । जिल्ला प्रशासन कार्यालयका बजार संरक्षण अधिकृत ओमनारायण शर्माको नेतृत्वमा उपभोक्ता अधिकार संरक्षण मञ्च र जिल्ला प्रहरीसहितको टोलीले उनीहरुलाई नियन्त्रणमा लिएको हो । अभियुक्तलाई जिल्ला प्रहरी कार्यालयको हिरासतमा राखिएको छ । जिल्ला प्रहरी कार्यालयका प्रमुख प्रहरी उपरीक्षक दीपक थापाले उनीहरुलाई कारबाहीका लागि आइतबार जिल्ला प्रशासन कार्यालय पठाइने बताउनुभयो । यसैबीच भरतपुरको चौबिसकोठीमा ट्राफिक जनचेतनाका लागि निर्माण गरिएको डिजिटल सूचना पाटी तोडफोड गरेको अभियोगमा नेपाल कम्युनिस्ट पार्टी निकटअखिल (क्रान्तिकारी) सप्तगण्डकी क्याम्पस एकाइका अध्यक्ष सुरेन्द्र पौडेललाई प्रहरीले पक्राउ गरेको छ । प्रहरी उपरीक्षक थापाका अनुसार पौडेलसहित तीन जनाले गए राति १२ बजे र १९ मिनेट जाँदा टेलिभिजनसहितको सूचना पाटी तोडफोड गरेका हुन् । फरार अन्य दुईको खोजी भइरहेको बताइएको छ । रासस

काठमाडौं, वैशाख  ९ ।  नेपालको मुख्य दाता विश्व बैंकले उच्च आर्थिक वृद्धि हासिल गरेको भन्दै प्रशंसा गरेको छ । अमेरिकाको वासिङटन डिसीमा भएको बैठकमा बैंक अधिकारीले नेपालको प्रशंसा गरेका हुन् । चालू आर्थिक वर्षमा नेपालको आर्थिक वृद्धिदर ६ दशमलव ५ प्रतिशत हुने प्रक्षेपण विश्व बैंक र अन्तर्राष्ट्रिय मुद्रा कोष (आइएमएफ)ले गरेका छन् । केही महिनाअघि साढे ५ प्रतिशतको आर्थिक वृद्धि प्रक्षेपण गरेको आइएमएफले हालै मात्र आफ्नो प्रक्षेपण बढाएर साढे ६ प्रतिशतको आर्थिक वृद्धि हुने अनुमान गरेको थियो । विश्व बैंक समूहमध्येका एक कार्यकारी निर्देशक एन्डिन ह्यादियान्तोले नेपालले आर्थिक वृद्धिदर उच्च बनाएको भन्दै नेपाली टोलीलाई बधाई दिएका थिए । उनले विश्व बैंक समूहमा नेपालसहित ब्रुनाई, फिजी, इन्डोनेसिया, लाओस, मलेसिया, म्यानमार, सिंगापुर, थाइल्यान्ड, टोंगा र भियतनामका लागि प्रतिनिधित्व गर्छन् । नेपालको आर्थिक विकासलाई अझ तीव्र पार्न विश्व बैंकको सहयोग जारी रहने उनले बताए । विश्व बैंकले अन्तर्राष्ट्रिय विकास संस्था (आइडिए) कार्यक्रमअन्तर्गत विकासोन्मुख मुलुकलाई सहयोग गर्दै आएको छ । ‘आइडिए १८’ मा विश्व बैंक सहायता निकायअन्तर्गतको सहयोग दोब्बर गरिने उनले जानकारी दिए । सन् २०१८ मा आइडिएले प्रवाह गर्ने सहायतालाई ‘आइडिए १८’ भनिएको हो । यसले सन् २०१८ मा नेपालकोे आर्थिक वृद्धिदर उच्च पार्न सहयोग पुग्ने अर्थ मन्त्रालयको अन्तर्राष्ट्रिय आर्थिक सहायता समन्वय महाशाखाका प्रमुख वैकुण्ठ अर्यालले बताए । बैठकमा मलेसियाका अर्थमन्त्री जोहरी अब्दुल घारी र इन्डोनेसियाका अर्थमन्त्री मुल्यानी इन्द्रावतीले नेपाल राष्ट्र बैंकका गभर्नर चिरञ्जीवी नेपालमार्फत नेपाल सरकारलाई अनौपचारिक बधाई सन्देश दिएको अर्थ मन्त्रालयले बताएको छ । यो खबर अाजको नयाँ पत्रिकामा छ ।

पुष्पा महरा काठमाडौँ, वैशाख ८ । नेपाल पत्रकार महासङ्घ, काठमाडौँले नेपाली पत्रकारिता क्षेत्रमा योगदान पु¥याउने पत्रकारहरुलाई नगदसहित पत्रकारिता पुरस्कार प्रदान गरेको छ । काठमाडौँ शाखाको १० औँ अधिवेशनको उद्घाटन गर्दै आज मन्त्रिपरिषद्का पूर्वअध्यक्ष खिलराज रेग्मीले पत्रकारिताका विभिन्न विधामा योगदान पु¥याउने पत्रकारहरुलाई पुरस्कार प्रदान गरिएको हो । महासंघले ‘अग्नितारा पत्रकारिता पुरस्कार’बाट पत्रकार गगन विष्टलाई सम्मान गरेको छ भने ‘स्व डम्बर गिरी पत्रकारिता पुरस्कार’ बाट पत्रकार तेजेन्द्रकुमार प्रसार्इंलाई, ‘स्व अशोक श्रेष्ठ पत्रकारिता पुरस्कार’ पत्रकार करूण अर्याल, ‘शक्ति लम्साल स्मृति पत्रकारिता पुरस्कार’ धनबहादुर मगर, ‘वासुदेव दाहाल स्मृति पत्रकारिता पुरस्कार’ प्रह्लाद रिजाललाई प्रदान गरेको छ । त्यस्तै ‘स्व यशोधा स्मृति पत्रकारिता पुरस्कार’ पवन थापा, ‘शोभा शाह स्मृति पत्रकारिता पुरस्कार’ पत्रकार उषा लोहनी र ‘विशाल खत्री स्मृति पत्रकारिता पुरस्कार’ विष्णु प्रसाईंलाई प्रदान गरिएको छ । यी पुरस्कारको राशि जनही रु १५ हजार रहेको छ । शाखाले लामो समयदेखि बिरामी परेका पत्रकार मुरारी गौतम, विके पाल्पाली, रामचन्द्र हुमागार्इं, विजय विस्पोट, गोविन्दसिंह थापा र चक्रपाणि नेपाललाई पनि जनही रु सात–सात हजार आर्थिक सहयोग प्रदान गरेको छ । सो अवसरमा मन्त्रिपरिषद्का पूर्वअध्यक्ष रेग्मीले सञ्चारमाध्यम मुलुक परिवर्तनको संवाहक भएकाले यसको पेशागत संरक्षण गर्नु सरकारको दायित्व रहेको बताए । त्यस्तै सभामा उपस्थित वक्ताहरुले साना मिडियाहरुलाई वचाइराख्नुपर्नेमा जोड दिएका छन् । भोलिसम्म चल्ने अधिवेशनबाट नयाँ कार्यसमिति निर्वाचित गर्नेछ ।

चितवन, वैशाख ८ । कृषि तथा वन विज्ञान विश्वविद्यालय रामपुरमा दुई विद्यार्थी सङ्गठनबीच झडप भएको छ । नयाँ विद्यार्थीले कलेज प्रवेश गर्दा लगाउने टिसर्टको डिजाइनका विषयमा विवाद हुँदा शुक्रवार दुई संगठनबीच भएको झडपमा आधा दर्जन घाइते भएका छन् । नेकपा माओवादी केन्द्र निकट अखिल (क्रान्तिकारी) र एमाले निकट अनेरास्ववियुबीच झडप हुँदा दुवै पक्षका तीन÷तीन जनागरी छ जना घाइते भएको प्रहरीले जनाएको छ । घाइते हुनेमा अनेरास्ववियुका पोषण साह, रोहित ढकाल सुदीप भुजेल रहेका छन् भने क्रान्तिकारीका निरज सिंह, सुवज अधिकारी र नोवेल आचार्य रहेका छन् । घाइतेहरूको चितवन मेडिकल कलेजमा उपचार भइरहेको बताइएकाे छ ।

काठमाडौं, वैशाख ८ । नेकपा (एमाले) का संसदीय दलका उपनेता सुवास नेम्बाङले स्थानीय तहको निर्वाचन हुँदैन कि भनेर कोही पनि अन्योलमा नरहन आग्रह गरे । एमाले ताप्लेजुङ काठमाडौं सम्पर्क मञ्चले नयाँ वर्ष २०७४ सालको अवसरमा आयोजित शुभकामना आदानप्रदान तथा स्थानीय तहको निर्वाचनको सन्दर्भमा आयोजित कार्यक्रममा उनले तोकिएको समयमा नै निर्वाचन हुने भन्दै निर्वाचन हुदैन कि भनेर भ्रममा नपर्न आग्रह गरे । उनले मुलुकभर निर्वाचनको वातावरण बनिसकेको बताउँदै निर्वाचन नभए जनताले नै सरकारको प्रतिकार गर्ने धारणा राखे । पूर्व सभामुखसमेत रहेका नेता नेम्बाङले मधेसी मोर्चा निर्वाचनका सन्दर्भमा गरेको आन्दोलनको तुक नभएको भन्दै त्यसले निर्वाचनमा कुनै असर नपर्ने बताए । उनले निर्वाचनमा पार्टी एक ढिक्का लागेर लाग्ने भन्दै पार्टीले गुटउपगुटलाई नहेरी सक्षम र योग्यलाई उम्मेदवार बनाउने जानकारी गराए । कार्यक्रममा सचिव योगेश भट्टराईले निर्वाचन अब कसैले पनि चाहेर रोक्न नसक्ने दाबी गरे। ‘देश चुनावमय भइसकेको छ । जनता मतदान गर्न आतुर छन्’ उनले भने– ‘अब कसैले पनि नजिक आएको निर्वाचन रोक्न सक्दैन ।’

धनगढी, वैशाख ८ । सात नं प्रदेशको एकमात्र उपमहानगर धनगढीमा उपमहानगरपालिकाको प्रमुखमा यहाँको उद्योगी एवम् व्यापारी गोपाल हमालले आफ्नो स्वतन्त्र उम्मेदावरी घोषणा गरेका छन् । कैलाली उद्योग वाणिज्य सङ्घ पूर्व अध्यक्षसमेत रहेका हमालले आज आयोजित सभामा धनगढीबाट विकास र समृद्धिको अभियान सुरु गर्न आफूले सो उपमहानगरको प्रमुखमा उम्मेदवारी घोषणा गरेको बताए । धनगढी उपमहानगरको प्रमुखमा औपचारिक रुपमा आफ्नो उम्मेदवारी घोषणा गर्ने हमाल पहिलो व्यक्ति हुन् । उपमहानगरको प्रमुख र उप प्रमुखमा नेकपा माओवादी केन्द्रले पार्टीका तर्फबाट उठाउने उम्मेदावारको टुङ्गो लगाइसकेको छ । सो पार्टीले प्रमुखमा रामसमझ राना र उप प्रमुखमा शान्ति अधिकारी क्षेत्रीलाई उठाउने तय गरिसकेको छ । नेपाली काँग्रेस, नेकपा एमाले राप्रपा नेकपा माले लगायतका दलले उपमहानगरको प्रमुख उप प्रमुखमा कसलाई उठाउने भन्ने टुङ्गो अझै लगाउन सकेका छैनन् । साविक सुदूरपश्चिमको मुख्य व्यापारिक केन्द्र रहेको र गएको संविधान सभाको निर्वाचनमा नेपाली काँग्रेसका सभापति शेरबहादुर देउवाको विजयी क्षेत्र भएकोले पनि यो उपमहानगरको निर्वाचनलाई दलहरुले आ–आफ्नो प्रतिष्ठाको विषय बनाउने अनुमान सबैको छ ।

धनगढी, वैशाख ८ । निर्वाचनको सरगर्मी बढ्दै जाँदा धनगढी उपमहानगरपालिकाको प्रमुखमा यस क्षेत्रका उद्योगी एवम् व्यापारी गोपाल हमालले बिहीबार आफ्नो स्वतन्त्र उम्मेदवारी घोषणा गर्नुभएको छ । कैलाली उद्योग वाणिज्य सङ्घ पूर्व अध्यक्ष समेत रहनुभएका हमालले आज यहाँ आयोजित सभामा धनगढीबाट विकास र समृद्धिको अभियान सुरु गर्न आफूले सो उपमहानगरको प्रमुखमा उम्मेदवारी घोषणा गरेको बताउनुभयो । धनगढी उपमहानगरको प्रमुखमा औपचारिक रुपमा आफ्नो उम्मेदवारी घोषणा गर्ने हमाल पहिलो व्यक्ति हुनुहुन्छ । उपमहानगरको प्रमुख र उप प्रमुखमा नेकपा माओवादी केन्द्रले पार्टीका तर्फबाट उठाउने उम्मेदावारको टुङ्गो लगाइसकेको छ । सो पार्टीले प्रमुखमा रामसमझ राना र उप प्रमुखमा शान्ति अधिकारी क्षेत्रीलाई उठाउने तय गरिसकेको छ । नेपाली काँग्रेस, नेकपा एमाले राप्रपा नेकपा माले लगायतका दलले उपमहानगरको प्रमुख उप प्रमुखमा कसलाई उठाउने भन्ने टुङ्गो अझै लगाउन सकेका छैनन् । सात नं प्रदेशको एकमात्र उपमहानगर धनगढी भएकाले महानगरको प्रमुख तथा उप प्रमुखको पदको टिकट हत्याउन विभिन्न दलमा आन्तरिक प्रतिस्पर्धा निकै बढेको छ । साविक सुदूरपश्चिमको मुख्य व्यापारिक केन्द्र रहेको र गएको संविधान सभाको निर्वाचनमा नेपाली काँग्रेसका सभापति शेरबहादुर देउवाको विजयी क्षेत्र भएकोले पनि यो उपमहानगरको निर्वाचनलाई दलहरुले आ–आफ्नो प्रतिष्ठाको विषय बनाउने अनुमान सबैको छ ।