बाजुरा, चैत ४ । उत्तरी भेगको सिहमाली गाउँपालिका साबिकको रुगिन–४ बोर्तामा बिहीबार करिब ८ बजे राति चन्दन कार्कीको घरमा चट्याङ लागेर एक बालकको मृत्यु भएको छ भने दुई बालक घाइते भएको जिल्ला प्रहरी कार्यालय बाजुराले जनाएको छ । मृत्यु हुनेमा चन्दन कार्कीका १४ वर्षीय छोरा शेरबहादुर कार्की रहेका छन् । कार्कीकै १७ वर्षीया छोरी झुमकला कार्की र १० वर्षीया जुनु कार्की चट्याङ लागेर घाइते भएको जिल्ला प्रहरी कार्यालय बाजुराका निमित्त प्रहरी नायब उपरीक्षक सुदाम रावलले बताउनुभयो । घाइते भएका दुई दिदीभाइको चट्याङका झिल्का लागेर हातखुट्टा जलेको प्रहरीले जनाएको छ । चट्याङ लागेर दुई गोरु र एक बाख्रा मरेको पनि बताइएको छ । घाइते भएका दुवै दिदीभाइलाई उपचारका लागि कोल्टी प्राथमिक स्वास्थ्य केन्द्रमा प्रहरी र स्थानीयवासीको सक्रियतामा ल्याइएको निमित्त प्रहरी नायब उपरीक्षक रावलले जानकारी दिनुभएको छ । घरको पूर्व भित्तामा चट्याङ परेर घटना भएको बताइएको छ । रासस

इनरुवा, चैत ४ । सुनसरी जिल्ला हरिपुर गाविस–३ की सङ्गीतादेवी ठाकुरलाई पहिले मैनबत्ती बनाउन आउँदैनथ्यो । विद्युत्भार कटौती भएको बेला पसलबाट रु पाँचदेखि १० मा मैनबत्ती किनेर ल्याई बाल्नुहुन्थ्यो । तर अहिले उहाँ आफै‌ मैनबत्ती बनाउनुहुन्छ । सङ्गीतादेवी मात्र नभई हरिपुर–३ की सुलेखादेवी झाको पनि कुरा उही हो । उहाँलाई पनि मैनबत्ती कसरी बनाइन्छ भन्ने ज्ञान थिएन । तर हरिपुर गाविसमै रहेको सामुदायिक कोसीपीडित संस्थाबाट मैनबत्ती बनाउने सीप सिक्नुभयो । उहाँ अहिले तालिम लिएर मैनबत्ती बनाउन थालेपछि अब मोम, मैनबत्ती बनाउने फर्मा लगायतका सबै सामग्री भयो भने आफैँले मैनबत्ती बनाएर आयआर्जन गर्न सक्ने बताउनुहुन्छ । महिला घरमा बसेर चुल्होचौको सम्हाल्नेबाहेक गरिखाने खास सीप नभएको बेला कोसीपीडित संस्थाले दिएको एकहप्ते मैनबत्ती बनाउने तालिमले सुलेखा, सङ्गिता लगायतका यहाँका महिलालाई निक्कै सहयोगी बनेको छ । उक्त संस्थाले दुई समूहमा करिब ८० जना स्थानीय महिलालाई मैनबत्ती बनाउने तालिम दिएको थियो । हरिपुर–३ की ऋचा पाठकले पनि यही संस्थाबाट मैनबत्ती बनाउने तालिम लिनुभएको हो । घरमा फुर्सदिलो र बेरोजगारीको जीवन बिताइरहेका बेला पाएको मैनबत्ती बनाउने तालिमले उहाँलाई निक्कै राहत दिएको छ । बेरोजगार बसेका महिला तालिमपछि मैनबत्ती बनाउन सिपालु भई उनीहरुमा उद्यमशीलता बढेको देख्दा प्रशिक्षक लक्ष्मण मेहतालाई पनि खुसी लागेको छ । गरिखान सीप नै चाहिन्छ । कोसीको बाढीले बिजोग बनाएका परिवारका महिलालाई गरिखान सघाउ पुग्नेगरी मैनबत्ती बनाउने तालिम दिनसकेकामा आयोजक सामुदायिक कोसीपीडित संस्थाका अध्यक्ष धिरेन्द्र पाठक खुसी हुनुहुन्छ । विभिन्न सरकारी तथा गैरसरकारी सङ्घसंस्थाले दिएका धेरैजसो तालिमबाट समुदाय लाभान्वित भएको कमै सुनिन्छ । तर कोसीपीडित महिलाले पाएको मैनबत्ती बनाउने तालिमले उनीहरुको जीवनमा थोरै भए पनि उज्यालो दिएको छ । रासस

काठमाडौँ, चैत ४। रुसी महासङ्घका लागि नेपाली राजदूत ऋषिराम घिमिरेले मोस्कोस्थित ग्राण्ड क्रेमलिन दरबारमा बिहिबार आयोजित एक समारोहबीच त्यहाँका राष्ट्रपति भ्लादिमिर भ्लादिमिरोभिच पुटिन समक्ष आफ्नो ओहदाको प्रमाणपत्र पेस गर्नुभयो । समारोहमा राजदूत घिमिरेले नेपालको तर्फबाट राष्ट्रपति विद्यादेवी भण्डारी र प्रधानमन्त्री पुष्पकमल दाहाल ‘प्रचण्ड’ले रुसी महासङ्घको निरन्तर प्रगति र समृद्धिको कामना गर्नुभएको सन्देश प्रदान गर्नुभएको थियो । राष्ट्रपति पुटिनले घिमिरेको स्वागत गर्दै उहाँको कार्यकालमा दुई देशबीचको सम्बन्ध थप मजबुद बनाउन सहयोग पुग्ने विश्वास व्यक्त गर्नुभएको नेपाली राजदूतावास मस्कोद्वारा आज जारी विज्ञप्ति उल्लेख छ । रासस

हेटौँडा, चैत ३ । मकवानपुरको मनहरिबाट अवैध रुपमा भारत लान लागिएको तीन सय सात केजी गाँजा प्रहरीले बरामद गरेको छ । गाँजासहित भारतको रक्सौलतर्फ जाँदै गरेको एक भारतीय ट्रक र त्यसका चालकलाई प्रहरीले आज बिहान नियन्त्रणमा लिएको हो । नियन्त्रणमा लिइएकामा भारत मोतीहारीका अशोककुमार दुबे र डब्ल्यु बी११–८५२४ नंको ट्रक रहेको जिल्ला प्रहरी कार्यालय मकवानपुरले जनाएको छ । चालक दुबेले ट्रकको भित्रपट्टि फल्स बटम बनाई १६ वटा बोरामा लुकाएर ल्याएको अवस्थामा गाँजा बरामद गरिएको प्रहरी उपरीक्षक वसन्त लामाले जानकारी दिए ।

दुबई १६ मार्च । वैदेशिक रोजगारीको शिलसिलामा युएईमा रहेका काभ्रेलीहरुको साझा समाजिक संस्था काभ्रे सेवा समाज युएईले नयाँ वर्ष २०७४ को विशेष अवसर पारेर आगामी अप्रिल १४ मा अपाङ्ग तथा अनाथ बाल-बालिहरुको सहयोगार्थ ‘सांस्कृतिक साँझ २०७४’ को आयोजना गर्ने भएको छ । विशुद्व सामाजिक सेवा गर्ने उदेश्यले ८ अगस्ट २०१४ मा स्थापित (काभ्रे सम्पर्क समिति) हाल परिमार्जित पछि काभ्रे सेवा समाज युएईले विभिन्न क्षेत्रहरुमा सामाजिक सेवाहरु प्रदान गर्दै आउने क्रम सँगै यहि आउदो नेपाली नयाँ वर्ष २०७४ को पावन अवसरमा अपाङ्ग तथा अनाथ बालबालिकाहरुको सहयोगार्थ संस्कृतिक साँझ २०७४ कार्यक्रम अन्तिम तयारीमा रहेको समाजका संरक्षक दामोदर दाहालले जानकारी दिएका छन् । यहि आउदो नया बर्ष २०७४ बैशाख १ गते (१४ अप्रिल २०१७) शुक्रबारको दिन हुन गइरहेको संस्कृतिक कार्यक्रममा नेपालबाट संगीतकार तथा चर्चित गायक विश्व दोङ, पछिल्लो चरण व्यस्त गायिका भनेर चिनिने लोक तथा आधुनिक गायिका रिता केसी, चर्चित नायिका तथा आईटम डान्सर रिया श्रेष्ठ लगायतका कलाकारहरु युएई आउने भएका छन् । नेपालबाट आउने कलाकारहरुको साथमा युएईमा रहेका नेपाली कलाकारहरु गोपीकृष्ण पंगेनी, निश्चल श्री, सन्ध्या सुस्केरा, अन्जुली लोप्चन, ईन्द्र सिन्चुरी, रोसनी शुब्ब, सोनी राना मगर, प्रवेग दोङ, डिभि समर्पण लगायतका दर्जनौं कलाकारहरुको बिजोड प्रस्तुति रहने समाजका महासचिब उत्तम बिकले जानकारी दिएका छन् । दुबईको देरा स्थित कर्लटन टावर होटलको हलमा दिनको २ बजे बाट शुरु हुने कार्यक्रमको लागि युएईबासि सम्पूर्णलाई उपस्थित भई कार्यक्रम सफल परिदिन काभ्रे सेवा समाज युईका अध्यक्ष दिल लामाले युएईबासि नेपालीहरुलाई आग्रह गरेका छन् । उक्त कार्यक्रमको लागि TRUST GENIC कम्पनी, मारहाबा ट्राभल्स, अन्नपूर्ण सुनचादी पसल, बिजेता ग्रुप कम्पनी, फिस्टल ट्रभल्स, नेपालीको सगरमाथा रेष्टुरेन्ट, भावर्ची रेष्टुरेन्ट, फलाफिल्गी रेष्टुरेन्ट, नेपाली रेष्टुरेन्ट , काठमाडौं रेष्टुरेन्ट, ग्रिन्ड डान्सबार, नमस्ते रेष्टुरेन्ट, भान्छाघर रेस्टुरेन्ट, इभरेष्ट एच.आर कन्सलटेन्सी, नमस्ते ट्राभल्स, जि.के.एस. टायर लगायत ईसपोन्सर रहेको आयोजकले जानकारी दिइएको छ ।

भक्तपुर, चैत ३ ।  सूर्योदय सेवा समाजको आयोजनामा जिल्ला समन्वय समिति भक्तपुरमा सल्लाहकार समितिको बैठक सम्पन्न भएको छ । २०७३ साल चैत्र २ गते भक्तपुरको जिल्ला समन्वय समितिको सभाहलमा उक्त बैठक सम्पन्न भएको हो । बैठकमा जिल्ला समन्वय समितिका प्रमुख स्थानीय विकास अधिकारी (तत्कालिन जिल्ला विकास समिति, हाल जिल्ला समन्वय समिति) धु्रवप्रसाद कोइराला, सहायक प्रमुख जिल्ला अधिकारी लक्ष्मी खतिवडा, नेपाल पत्रकार महासंघ भक्तपुरका पूर्व सभापति विकल श्रेष्ठ, जिल्ला शिक्षा कार्यालय भक्तपुरका प्रतिनिधि विमल निरौला, महिला विकास कार्यालय, जिल्ला घरेलु कार्यालय, जिल्ला बाल कल्याण समिति भक्तपुरका प्रतिनिधि र सुर्योदय समाज सेवाका कार्यकारी निर्देशक तारा बहादुर ग्यापक, ग्लोवल फेयरनेश इनिसियेटिभका क्षेत्रीय कार्यक्रम अधिकृत चिरञ्जीवी न्यौपाने, नेपाल पत्रकार महासंघ भक्तपुरका सचिव, विभिन्न सञ्चार माध्यमका प्रतिनिधिहरुको सहभागितामा बेटर ब्रिक नेपाल परियोजनाको जिल्ला परियोजना सल्लाहकार समितिको बैठक बसेको हो । बैठकमा सहायक प्रमुख जिल्ला अधिकारी लक्ष्मी खतिवडाले बालश्रम अन्त्यबारे सरोकारवाला पक्षसँग जिल्ला प्रशासन कार्यालयको अगुवाईमा निरन्तर छलफल जारी रहेको र बालश्रम न्युनीकरण हुँदै गएको बताइन । उनले आगामी पाँच वर्ष भित्रमा भक्तपुर जिल्लामा बालश्रम पूरै अन्त्य गर्ने लक्ष्य लिइएको समेत सहभागीहरुलाई बताइन । त्यसैगरी बैठकका स्थानीय विकास अधिकारी ध्रुवप्रसाद कोइरालाले भक्तपुर जिल्लामा अझै पनि बालश्रमको ठूलो समस्या रहेको बताउँदै यसको अन्त्यको लागि सामूहिक प्रयत्न गर्नुपर्ने बताए । उनले भने बालश्रम हटाउन सरकार, गैरसरकारी संस्थाका साथै सञ्चार जगतको समेत महत्वपूर्ण भूमिका रहने भन्दै सबै पक्षको समन्वयबाट बाल श्रम अन्य गर्न सकिने बताए । सो अवसरमा कोइरालाले भने बाल श्रम अन्त्य गर्न कसले के काम गरिरहेको छ, त्यसबारे एक अर्कालाई जानकारी हुनुपर्ने भन्दै यसो भयो भने अनुगमनमा समेत सहज हुने बताए । गैर सरकारी संस्थाले गर्ने काममा पारदर्शिता हुनुपर्ने र दाताबाट प्राप्त हुने सहयोग इमान्दारपूर्वक लक्षित वर्गमा पु¥याउन आवश्यक रहेको कोइरालाले बताए । बैठकमा परियोजनाको गतिविधि तथा आगामी दिनमा हुने कार्यक्रमको बारेमा बेटर ब्रिक नेपाल परियोजनाका फिल्ड संयोजक मनिषा मोक्तनले प्रस्तुतीकरण गरेकी थिइन । सो अवसरमा मोक्तानले भक्तपुर जिल्लामा रहेको इट्टा उद्योगको अवस्था, बाल श्रमिकको अवस्थाबारे बेटर ब्रिक नेपालले गरेको गतिविधिबारे प्रष्ट पारेकी थिइन् । कार्यक्रममा सञ्चारकर्मी तथा सहभागीहरुले राखेको जिज्ञासाको जवाफ सूर्योदय समाज सेवाका कार्यकारी निर्देशक ताराबहादुर ग्यापकले दिएका थिए ।

महेन्द्रनगर, चैत ३ । भारतीय सीा सुरक्षा बल( एसएसबी)ले हत्या गरेका गोविन्द गौतमको परिवारलाई नेकपा एमालेले ५ लाख सहयोग दिने भएको छ । एमालेको मेची-महाकाली अभियान अन्तर्गत कञ्चनपुरको महेन्द्रनगरमा आयोजित अन्तिम सभालाई सम्बोधन गर्दै एमाले अध्यक्ष केपी शर्मा ओलीले शहीद गोविन्द गौतमको परिवारलाई ५ लाख राहत रकम एमालेका तर्फबाट उपलब्ध गराउने घोषणा गरे । घोषणा लगत्तै एमाले अध्यक्ष केपी ओलीले पाँच लाखको चेक एमाले कञ्चनपुरका अध्यक्ष तारा लामालाई प्रदान गरेका छन् । सरकारले शहीद गौतमका छोराछोरीलाई उच्चशिक्षासम्म निःशुल्क अध्ययनको व्यवस्था गर्ने प्रतिबद्धता व्यक्त गरेकोबारे ओलीले शहीदका छोराछोरीलाई कसैले नहेरे एमालेले हेर्ने दावी गरे । कञ्चनपुर पुनर्वास नगरपालिका आनन्दबजारका गौतम परिवालाई फागुन २६ गते एसएसबीले गोली हानेका थिए । उनले एसएसबीको यस हर्कतप्रति निन्दा गर्दै यस घटनाबारे भारतले नेपाल र नेपाली जनतासमक्ष माफी माग्नुपर्ने माग गरे । यसबारे आफूले प्रधानमन्त्री प्रचण्डसँग पनि कुरा गरिसकेको एमाले अध्यक्ष ओलीले बताए । सीमा विवाद उत्कर्षमा पुग्दा गत बिहीबार भएको झडपमा भारतीय एसएसबीले गोली प्रहार गर्दा गोविन्द गौतमको मृत्यु भएको थियो । उनलाई सरकारले शहीद घोषणा गर्दै राष्ट्रिय सम्मानका साथ अन्त्येष्टि गरेको थियो ।

काठमाडौँ, चैत ३ । वन विभागले वनमा हुने डढेलो नियन्त्रणका लागि चुरे क्षेत्रसँग जोडिएका ३६ जिल्लामा करिब २०० पोखरी निर्माण गरेको छ । बर्सेनि लाग्ने डढेलोका कारण पशुपक्षी र जनधनको क्षति भएकाले त्यसको रोकथाम गर्न पोखरी निर्माण गरेको विभागका उपसचिव मोहनराज काफ्लेले जानकारी दिनुभयो । अत्याधिक आगलागी हुने डडेलधुरा, कैलाली, कञ्चनपुर, सुर्खेत, दाङ, बारा, पर्सा, रौतहट, झापालगायत चुरेसँग जोडिएका जिल्लाका वनमा पोखरी निर्माण गरिएको छ । यस्तै आगालागी नियन्त्रणका लागि स्वयम्सेवक, सुरक्षा निकाय र सुराकी परिचालन गरिएको छ । आगो नियन्त्रण कार्यमा प्रभावकारी भूमिका खेल्ने संस्थालाई पुरस्कार समेत प्रदान गरिने काफ्लेले बताए । वनमा डढेलो नियन्त्रण गर्न सकियोस भन्ने उद्देश्यले यही चैत १ गतेदेखि ७ गतेसम्म ‘वन डढेलो व्यवस्थापन जनचेतना सप्ताह’ सञ्चालन गरिएको छ । वनमा आगो लगाउनेलाई विगोसहित रु १० हजार जरिवना वा एक वर्ष कैद वा दुबै सजाय हुने कानुनी प्रावधान रहेको छ ।

बुटवल, चैत ३ । नेकपा (एमाले) का उपमहासचिव विष्णुप्रसाद पौडेलले शिक्षा, स्वास्थ्य र पूर्वाधारका क्षेत्रमा जनता अधिकार सम्पन्न नभए सङ्घीयता टिकाउ नहुने बताएका छ न्। शिक्षाका लागि राष्ट्रिय अभियान नेपालले आज यहाँ आयोजना गरेको प्रदेश नं–५ स्तरीय सङ्घीयता र शिक्षासम्बन्धी अन्तर्क्रिया कार्यक्रममा उनले नेपालको विशिष्टतामा आधारित सङ्घीयता लागू गरिएकाले यसलाई कार्यान्वयनका लागि शिक्षा, स्वास्थ्य र पूर्वाधारका क्षेत्रमा लगानी बढाइ स्थानीय तहलाई अधिकार दिनुपर्ने बताए । नेता पौडेलले संविधानमा सिमाना हेरफेर सम्बन्धी प्रस्ताव कुनै हालतमा पारित नहुने विचार व्यक्त गरे । सांसद आदित्यनारायण कसोधनले समावेशी र समृद्ध मुलुकका लागि सङ्घीयता अनुकूल शिक्षानीति हुनुपर्ने बताए । जिल्ला शिक्षा अधिकारी टेकबहादुर थापाले शिक्षाका निकायलाई सङ्घीयता अनुकूल बनाउन आवश्यक पहल भइरहेको र शिक्षाको मौलिक हक कार्यान्वयनका लागि सरकार प्रतिवद्ध रहने जनाए । प्रदेश– ५ का ११ जिल्लाका नागरिक समाजका प्रतिनिधि र शिक्षा सरोकारवालाको सहभागिता रहेको कार्यक्रममा सार्वजनिक शिक्षा सुदृढीकरणका लागि स्थानीय स्रोत जुटाइ बढाउनुपर्ने र स्थानीय तहलाई सवल बनाउनुपर्नेमा जोड दिए । कार्यक्रममा स्थानीय पाठ्यक्रम, पर्यटन, बौद्धदर्शन, जीवनोपयोगी र सीपमूलक शिक्षाको नीतिका लागि राज्यले ध्यान दिनुपर्नेसहित १७ बुँदे रुपन्देही घोषणापत्र जारी गरिएको छ ।

काठमाडौँ, चैत ३ । सर्वोच्च अदालतले नेपाल प्रहरीका महानिरीक्षकको नियुक्ति सम्बन्धमा परेको मुद्दामा आज अन्तिम चरणको सुनुवाइ हुने भने पनि पुनः यही चैत ६ गतेका लागि सुनुवाइ सारेको छ । न्यायाधीश ईश्वरप्रसाद खतिवडा र तेजबहादुर केसीको संयुक्त इजलासले विषय बस्तुको गाम्भीर्यताका कारण पूर्ण इजलासमा ६ गते पुनः सुनुवाइ हुने आदेश दिएको सर्वोच्च अदालतका प्रवक्ता महेन्द्र उपाध्यायले जानकारी दिनुभयो । नेपाल प्रहरीका महानिरीक्षक पदमा जयबहादुर चन्दलाई बढुवा गर्ने मन्त्रिपरिषद्को निर्णय कार्यान्वयन नगराउन यसअघि सर्वोच्चले अल्पकालीन अन्तरिम आदेश दिएको थियो ।

काठमाडौँ, चैत ३ । वैदेशिक रोजगारीबाट प्राप्त हुने विप्रेषणलाई उत्पादनमूलक क्षेत्रमा जोड्न सकेमात्रै त्यसले देश विकासमा सहयोग पुग्ने सरोकारवालाले बताएका छन् । सेन्टर फर माइक्रोफाइनान्स (सिएमएफ)कोआयोजनामा राजधानीमा जारी राष्ट्रिय लघुवित्त सम्मेलनको ‘आप्रवास: उत्पादन र विप्रेषणको उपयोग’ विषयक छलफलमा कार्यपत्र प्रस्तोता र टिप्पणीकर्ताले विपे्रषणको सही ठाउँमा प्रयोगका लागि वित्तीय साक्षरता अभियान सञ्चालन गर्नुपर्नेमा जोड दिए । वैदेशिक रोजगारीबाट प्राप्त भएको विप्रेषणसँगै समाजमा भित्रिएका विकृतिको समेत ख्याल गर्नुपर्ने उनीहरुको भनाइ छ । विपे्रषणमा आधारित अर्थतन्त्र दिगो हुन नसक्ने भएकाले स्वदेशमै रोजगारीका अवसर सिर्जना गर्नुपर्नेमा सहभागिले जोड दिए । नेपाल राष्ट्र बैंकका निर्देशक डा गुणाखर भट्टले ‘आप्रवास: उत्पादन र विप्रेषणको उपयोग’ विषयक कार्यपत्र प्रस्तुत गर्दै गत आवमा नेपालमा रु ६ खर्ब ६५ अर्ब बराबरको विपे्रषण भित्रिएको र सो मुलुकको कूल गार्हस्थ्य उत्पादनमा २९ दशमलव ६ प्रतिशत हुनआउने बताउनुभयो । विप्रेषणबाट आउने रकममध्ये ७० प्रतिशत रकम उपभोगमा खर्च हुने गरेको तथ्याङ्क प्रस्तुत गर्दै उहाँले त्यसलाई उत्पादनमूलक क्षेत्रमा लगानी गर्ने नीति आवश्यक रहेको बताउनुभयो । मुलुकको अर्थतन्त्रको आधारमा नेपाल बढी विपे्रषण भित्रिने मुलकमा विश्वकै तेस्रो स्थानमा रहेको तथा रकमको आधारमा विश्वको २९औंँ नम्बरमा रहेको भट्टले बताउनुभयो । फिलिपिन्सका माइक्रोफाइनान्स परामर्शदाता कोन्नी जि हिनाले ‘सन्तुलित अर्थतन्त्र, सामाजिक, आर्थिक मूल्य र विप्रेषण’ विषयक कार्यपत्र प्रस्तुत गर्दै नेपालजस्ता मुलुकले विप्रषणको समुचित प्रयोगका लागि आर्थिक साक्षरता बढाउनुपर्ने सझुाव दिनुभयो । कार्यक्रममा वैदेशिक रोजगार विज्ञ डा गणेश गुरुङले नेपाल जस्तो गरिब मुलुकमा विप्रेषणबाट आउने रकम आधारभूत उपभोगमा खर्च हुनु स्वभाविक भएको बताउनुभयो । नेपाल महिला सामुदायिक सेवा केन्द्रका अध्यक्ष विमला योगी, छिमेक लघुवित्त विकास बैंकका शोभा जोशी, महिला उद्यमी सहकारी संस्थाका अध्यक्ष शान्ति गुरुङलगायतले सरकारले वैदेशिक रोजगारीको विकल्पमा स्वदशमै रोजगारीको वातावरण बनाउनुपर्नेमा जोड दिनुभयो ।

काठमाडौं, चैत ३ । कांग्रेसका नेता एवं पूर्वकृषि सहायकमन्त्री रामहरि ढुंगेलको बिहिबार विहान काठमाडौं डिल्लीबजारस्थित डेरामा निधन भएको छ । उनको निधन हृदयघातबाट भएको हुन सक्ने अनुमान गरिएको छ । बेडमा सुतेकै अवस्थामा उनलाई मृत अवस्थामा भेटिएको हो । २०५६ सालमा रामेछापेको क्षेत्र नम्बर दुईबाट सांसदमा निर्वाचित ढुंगेल केही महिना कृषि सहायकमन्त्री समेत बनेका थिए । अविवाहित ढुंगेल एक्लै बस्दै आएका थिए । राति केहि असजिलो भएपछि ढुंगेल हिमाल अस्पताल पुगेका थिए । अस्पतालले ग्यास्टिकको समस्या भन्दै सामान्य औषधि दिएर फर्काएपछि उनी कोठामा पुगेर सुतेका थिए । कांग्रेस नेता अर्जुन केसीका अनुसार बिहान मात्र उनको मृत्युबारे थाहा भएको हो । अहिले ढुंगेलको शव पोस्टमार्टम गर्ने तयारी भइरहेको जनाइएको छ । पञ्चायत व्यवस्थाविरुद्ध कांग्रेसले चलाएको आन्दोलनदेखि ढुंगेल राजनीतिमा सक्रिय थिए । विद्यार्थी संघदेखि कांग्रेसका विभिन्न तहमा बसेर उनले राजनीति गरे । अनेकौं पटक जेलजीवन भोगेका ढुंगेल कृष्णप्रसाद भट्टराईसँग बढी प्रभावित थिए । पकरवास गाविसका जन्मेका ढुंगेल राजनीतिमा कुनै न कुनै कोणबाट सक्रिय थिए । नेपाली कांग्रेस रामेछापको सदस्य, सचिव, सभापति हुँदै उनी चार दशकभन्दा बढी विभिन्न पदमा क्रियाशील थिए ।

प्रेम रौले बाजुरा,चैत ३ । बाजुराको साबिकको बाँधु, रुविन र बिच्छ्या गाविस मिलाएर हिमाली गाउँपालिका बनाउन स्थानीय सहमति गरिएको थियो । गाउँपालिका बनाउने सहमतिसँगै गाउँमै गएर प्राविधिक समितिले केन्द्रको टुङ्गो लगाएको थियो । साबिक तीन गाविसबीचको स्थान भट्टेचौर केन्द्र बनाउने सहमतिसहित आयोगमा नामसहित प्रस्ताव गरियो । तर आयोगको सिफारिसअनुसार राजपत्रमा प्रस्ताव गरिएको स्थानमा नपरेको भन्दै स्थानीयबासीले विरोध जनाएका छन् । राज्यको पुरानो संरचना नै भएको स्थानमा केन्द्र बनाउनुपर्ने दाबीसहित बाँधु गाविस कार्यालय रहेको स्थानमा केन्द्र राख्न भनिएको छ । सरकारको निर्णयले बिच्छ्या र रुगिनका जनताका लागि विकेन्द्रीकरणले न्याय नभई अन्याय थपिएको स्थानीयको भनाई छ । बिच्छ्याबाट बाँधु पुग्न एकदेखि दुई दिनसम्म लाग्छ । भौगोलिक सीमा र अवस्थालाई ख्यालै नगरिएको बिच्छ्यावासीको आक्रोश छ । गाउँमा सेवा दिने भनेर सङ्घीय संरचना निर्माण गरियो । हाम्रा लागि न्याय होइन अन्याय भयो, बिच्छ्याका धर्मलाल सुनारले बताउनुभयो । जिल्लामा नौवटा स्थानीय तह निर्माण भएका छन् । तीमध्ये पाँचवटा स्थानीय तहका केन्द्र प्रस्ताव गरिएअनुसार छैनन्् जसले स्थानीयबीच गाउँमै आपसी विवाद बढेको छ । सर्वपक्षीय सहमतिमा एक निर्णय गरेर पठाइयो, माथिबाट अर्कै निर्णय भएर आयो, जनतालाई झगडाउने काम भयो, साविक दहकोट गाविसका देवबहादुर रोकायाले बताउनुभयो । साबिक दहकोट, मानाकोट र बडिमालिका नगरपालिका–१ मिलाएर बनाइएको गौमुल गाउँपालिकाको केन्द्र पनि मानाकोट राख्न भनिएको छ । घटमुनाको प्रस्ताव गरिएको थियो, माथिबाट अलग निर्णय आएपछि कुन स्थानमा कार्यालय राख्ने अन्यौल भएको रोकायाले बताउनुभयो । ब्रह्मतोला, बाह्विस र कुल्देवमाडौँ गाविसको केन्द्र फालासैन प्रस्ताव गरिएकामा टाँटे सारेदेउ भएर आएपछि विवाद उत्पन्न भएको छ । एक पक्षले सरकारले पठाएको परिपत्रअनुसार नै कार्यालय हुनुपर्ने भन्दै कार्यालय स्थापना गरिसकेका छन् भने अन्य स्थानीय आन्दोलित बनेका छन् । बाह्रविस र ब्रह्मतोलाका स्थानीयवासीले कुल्देवमाडौँको पुरानै गाविस भवनमा कार्यालय आफूहरुका लागि अस्वीकार्य भएको दाबी गरेका छन् । मङ्गलबार निमित्त कार्यकारी अधिकृत लिएर केही व्यक्तिले सारेदेउमा कार्यालय स्थापना गरिसकेका छन् । फालासैनमै केन्द्र राखिनुपर्ने माग गर्ने पक्ष भने कार्यालयमा तालाबन्दी गर्ने र कामकाज सञ्चालन हुन नदिने चेतावनीसहित आन्दोलित बनेको छ । सर्वपक्षीय सहमतिअनुसार नै काम हुनुपर्ने मागसहित आन्दोलन सुरु गरेको डम्मर थापाले बताउनुभयो । त्यस्तै, जगन्नाथ र गोत्री गाविस मिलेर बनेको पाण्डव गुफा गाउँपालिकाको केन्द्र जुड्डी प्रस्ताव गरिएपनि जगन्नाथ गाविस कार्यालय केन्द्र तोकिएर आएको छ । हाल जगन्नाथमै कार्यालय स्थापना भएको छ, बहुमतले निर्णय गरेर पछि जुड्डीमै सार्ने तयारी भएको बताइएको छ । वाई, जुकोट र साप्पाटाको केन्द्र सुइजिउला प्रस्ताव गरिएको वाई भएर आएको छ जहाँ पुग्न साप्पाटाबाट एक दिनको पैदल दूरी पर्छ । स्थानीयवासीले सरकारले गाउँ तथा नगरपालिकाको केन्द्र तोक्ने विषयमा जनभावनालाई समेट्न नसकेकोप्रति स्थानीयवासीले विरोध जनाएका छन् । जिल्लाबाट प्रस्तावित निर्णयको बेवास्ता गर्दै पुरानै इलाका र गाविस कार्यालयलाई केन्द्र तोकिएको प्रति स्थानीयवासीले विरोध जनाएका हुन् । राज्यले गर्ने निर्णय जनताको भावना सम्बोधन हुने गरी गर्नुपर्नेमा प्रस्तावित निर्णयलाई समेत उल्टाएर पठाएको स्थानीयवासीको आरोप छ । सर्वपक्षीय सहमतिबाट जिल्लास्तरबाट गरिएको प्रस्तावलाई बेवास्ता गर्दै मनोमानीरुपमा जनभावना विपरीत भौगोलिक दूरीको आङ्कलन नगरी केन्द्र तोकेर पठाएको प्रति स्थानीयवासीले निर्णय सच्याउन मागसहित जिल्ला समन्वय समितिलाई ज्ञापनपत्रसमेत बुझाएका छन् । राजपत्रमा नै उल्लेख भइसकेकाले त्यो निर्णय सच्याउन समस्या हुने जिल्ला समन्वय समितिले प्रतिक्रिया दिने गरेको छ । सरकारले गरेको निर्णयमा समन्वय समितिले बोल्न नमिल्ने समन्वय समिति बाजुराका सूचना अधिकारी प्रेमबहादुर सिंहले बताउनुभयो । केन्द्रका विषयमा बढेको विवाद थपिँदै गएको छ । दलका नेताहरुले समेत जिल्ला समन्वय समितिका कर्मचारीलाई आफू अनुकूल गर्न दबाब दिने गरेको एक स्रोतको दाबी छ ।

काठमाडौं, चैत ३ । राष्ट्रिय कर्मचारी महासंघ नेपालले मुख्य सचिव सोमलाल सुवेदीलाई निलम्बन गर्न प्रधानमन्त्री प्रचण्डसँग माग गरेको छ । नेपाल कम्युनिस्ट पार्टी निकट कर्मचारी संगठनले बुधबार प्रधानमन्त्रीलाई ध्यानाकर्षणपत्र बुझाउँदै सो माग गरेको हो । केही दिनपहिले मन्त्रिपरिषद् बैठकले सुवेदीलाई एसियाली विकास बैंकको वैकल्पिक कार्यकारी निर्देशकको रुपमा पठाउने निर्णय गरेपछि कर्मचारी वृत्तबाटै चर्को विरोध सुरु भएको छ । मुख्यसचिव सुवेदी एडीबीमा जागिर खान जाने कुराले सिंगो कर्मचारीको अपमान भएको भन्दै महासंघले तत्काल निलम्बन गर्न ध्यानाकर्षणमार्फत माग गरेको हो । निगम पुँजीवादको प्रतिनिधित्व गर्ने संस्थमा जागिर खान जाने सुवेदीलाई राष्ट्रियता र सार्वभौमिकताको माया र रक्षाभाव नहुने भन्दै पलायनवादीको संज्ञा दिइएको छ । ‘राष्ट्रसेवक कर्मचारीलाई डीभी, पीआर तथा विदेशी स्थायी अनुमति पत्रलाई बन्देज गर्ने तर बहालवाला मुख्य सचिव आफैं पलायन हुने कार्यले निजामती प्रशासनको धज्जी उडाइएको छ’ महासंघका अध्यक्ष गोपालसिंह धामी र महासचिव अमर सिंह ओलीद्वारा हस्ताक्षरित ध्यानाकर्षण पत्रमा उल्लेख छ । महासंघले एडीबीमा सुवेदीले खाने जागिर सहसचिव स्तरको भएकोले सोही स्तरका कर्मचारीहरुबीच खुला प्रतिस्पर्धाबाट पठाउन माग गर्दै त्यसनिम्ति आवश्यक कानून बनाउन समेत प्रधानमन्त्रीसँग माग गरेको छ । संवेदनशिलता र गोपनियताको हिसाबले सुवेदीले एडीबीमा जागिर खाँदा राष्ट्रियता र सार्वभौमिकतामाथि घात हुने महासंघका अध्यक्ष धामीले अनलाइन डबलीसँग बताए । ‘नेपाल सरकारको सचिव तथा मुख्य सचिवबाट सेवा निवृत्त भएपश्चात ५ वर्षसम्म संवैधानिक, कुननीतिक तथा सरकारी बाहेक अन्यत्र नियुक्तिको लागि बन्देज गर्न निजामती ऐनमा अविलम्ब संशोधन गर्न माग गर्दछौं’ ध्याकर्षणपत्रमा भनिएको छ ।

काठमाडौं, चैत ३ । निर्वाचन आयोगले निर्वाचन आचारसंहिता अनुकूलको आचरणमा रहन सम्बद्ध सबैमा पुनः अनुरोध गरेको छ । आयोगले विहीबार एक विज्ञप्ति जारी गरी आगामी वैशाख ३१ गते हुने स्थानीय तह निर्वाचनका लागि निर्वाचन आयोगले जारी गरेको १९ बुँदे निर्देशन, सुरक्षासम्बन्धी चार बुँदे निर्देशन, निर्वाचन आचारसंहिता २०७२ तथा स्थानीय तह निर्वाचन आचारसंहिता–२०७३ गत फागुन १८ गतेदेखि लागू भएको स्मरण गराउँदै सम्बद्ध सबैमा तिनको पालन गर्न आग्रह गरेको छ । साथै आयोगले निर्वाचन आचारसंहिताको पूर्ण पालना गर्ने गराउन नेपाल सरकारका मन्त्रालय, निकाय, राजनीतिक दल एवम् सङ्घ संस्थालाई गम्भीर हुन अनुरोध गरेको हो । निर्वाचन स्वच्छ, स्वतन्त्र र भयरहित वातावरणमा सञ्चालन गर्नु अपरिहार्य भएकाले निर्वाचन आचारसंहिता पालनालाई सम्बद्ध सबैले गम्भीरतापूर्वक लिनुपर्नेमा जोड दिँदै आयोगले आचारसंहिता उल्लङ्घन भएको पाइएमा प्रचलित कानुनबमोजिम कारबाही हुने चेतावनी पनि दिएको छ ।