गौशाला, फागुन २ । महोत्तरी जिल्लाको औरही गाविसमा साहुको ऋण नतिर्ने एक महिलालाई महोत्तरी जिल्ला अदालतले जेल चलान गरेको छ । जेल चलान हुनेमा औरही गाविस–७ बस्ने अमृतिदेवी यादव रहेको जिल्ला प्रहरी कार्यालय महोत्तरीका प्रहरी नायब उपरीक्षक शालिग्राम शर्माले बताएको छ । औरही–९ बस्ने साहु रामदिनेश सिंहसित लिएको कर्जा चुकाउन नसक्दा महिला यादवमाथि साहु सिंहले महोत्तरी जिल्ला अदालतमा मुद्दा दिएकामा अदालतले उनलाई २०६९ असार २८ गतेका दिन १० महिना कैद तोकिएको थियो । तर महिला यादव सोही बेलादेखि फरार रहँदै आएकी थिइन् । यसैबीच प्रहरीले उनलाई शनिबार उनको घरैबाट पक्राउ गरी आइतबार महोत्तरी जिल्ला अदालतमा उपस्थित गराएकामा अदालतले उनलाई कैद भुक्तानका लागि जिल्ला कारागार कार्यालय जलेश्वरमा पठाउने आदेश दिएको प्रहरीले जनाएको छ ।

कञ्चनपुर, फागुन २ । भारतमा हुन गइरहेको राज्यसभाको चुनावलाई लक्षित गरी कञ्चनपुरसँग जोडिएका सीमा नाका तीनदिनसम्मका लागि बन्द गरिएका छन् । भारतको उत्तराखण्ड र उत्तरप्रदेशमा फेबु्रअरी १५ तारिख (फागुन ४ गते) राज्यसभाको चुनावका लागि पश्चिमी सीमा नाका गड्डाचौकी र ब्रह्मदेव आइतबार साँझदेखि बन्द गरिएका छन् । दोधारा चाँदनी र बेलौरी सीमा नाका आज साँझदेखि बन्द हुने छन् । यसैगरी, बेलडाँडी र त्रिभुवन बस्ती भारतसँग जोडिएका सीमा नाका मङ्गलबार साँझदेखि बन्द हुने छन् । फागुन ४ गते साँझ ५ बजेसम्मका लागि भारतसँग जोडिएका सीमा नाका बन्द गरिएको जिल्ला प्रहरी कार्यालय, कञ्चनपुरका प्रहरी नायब उपरीक्षक नैनसिंह कार्कीले बताए । चुनावमा अवाञ्छित क्रियाकलाप नहोस् भनेर भारत सरकारको आग्रहमा सिमाना बन्द गरिएको बताइएको छ । सीमा नाका क्षेत्रमा भारतीय सुरक्षाकर्मीले चेकजाँचमा कडाइ गर्नुका साथै गस्तीको कार्यलाई समेत तीव्र बनाएका छन् ।

काठमाडौँ, फागुन २ । आज विश्व रेडियो दिवस नेपालमा पनि विभिन्न कार्यक्रम गरी मनाईंदैछ । यसवर्ष छठौ विश्व रेडियो दिवसको नारा ‘तपाई नै रेडियो’ भन्ने तय गरिएको छ । संयुक्त राष्ट्रसंघको आहृवानमा सन् २०१२ बाट विश्व रेडियो दिवस मनाउन सुरु गरिएको हो । दिवसको अवसरमा सामुदायिक रेडियो प्रसारक संघ (अकोराव) को आयोजनामा काठमाडौंमा नेपालका सामुदायिक रेडियोहरुको राष्ट्रिय सम्मेलन सुरु भएको छ। बानेश्वरको अल्फाबिटामा जारी कार्यक्रम प्रधानमन्त्री पुष्पकमल दाहाल ‘प्रचण्ड’ले उद्घाटन गरेका छन् । स्पेनको प्रस्तावमा युनेस्कोको ३६ औं सम्मेलनले सन् २०११ नोभेम्बर ३ तारिखमा हरेक वर्षको फेब्रुअरी १३ तारिखलाई रेडियो दिवसका रुपमा मनाउने घोषणा गरेको थियो । सामुदायिक रेडियो प्रशारक संघ (अकोराब) नेपालको अगुवाई मा नपालका रेडियोहरुले आज विश्व रेडियो दिवस मनाइरहेका छन् । अकोराबले मनाइरहेको विशेष कार्यक्रममा प्रधानन्त्री प्रचण्डले सम्वोधन गर्दैछन् । भरखरै कार्यक्रम उद्घाटन गरेका प्रधानमन्त्रीले केहीबेरमा सम्बोधन गर्दैछन । विश्वमा व्यवसायिक रेडियो प्रसारण सुरु भएको ९८ वर्ष पुगे पनि नेपालमा भने ६६ वर्ष भएको छ। बिक्रम सम्बत २००३ सालमा काठमाडौंमा रेडियोको प्रशारण सुरु भएपनि औपचारिक रूपमा २००७ साल मंसिर २८ गतेदेखि प्रजातन्त्र रेडियोका नाममा नेपालमा पहिलो रेडियो सञ्चालन सुरु भएको थियो। २०५२ सालदेखि एफएम प्रसारण सुरु भएको हो। अहिले झण्डै ६ सय वटा रेडियो एफएमले अनुमति लिएका र ५ सय वटा प्रसारणमा रहेका नेपाल प्रेस काउन्सिलले जनाएको छ। व्यवसायिक रेडियोको संस्था ब्रोडकास्टिङ एसोसियसन अफ नेपाल (बान)ले चितवनमा विशेष कार्यक्रम गर्दैछ। अहिले देशका सबै जिल्लामा एफएम रेडियो स्थापना भएका छन् । नेपालको सन्दर्भमा सरकारी रेडियो, सामुदायिक रेडियो र निजी क्षेत्रका रेडियोहरूले रेडियो प्रविधिका माध्यमबाट नेपाली जनताको सूचनाको हकको प्रवाहका लागि सरकारको मुख्य साझेदारको रूपमा भूमिका निर्वाह गर्दै आएको । सूचनामा नागरिकको पहुँच बढाउनाको अलावा लोकतन्त्र, मानवअधिकार, विधिको शासन र शान्तिपूर्ण सामाजिक रूपान्तरणका लागि अहम भूमिका खेलेका छन् ।

मुगु, २ फागुन । सरकारले कर्णालीवासीलाई जन्म र मृत्युमा २० किलो चामल दिने गरेको निर्णय आइतबारबाट कार्यान्वयनमा ल्याउन सुरु गरेको छ । गत भदौ २३ गते कर्णाली क्षेत्रमा जन्म हँुदा र मृत्यु संस्कारमा सरकारले स्थानीयवासीलाई २० किलो चामल अनुदानमा दिने घोषणा गरेको थियो । सरकारले घोषणा गरेको पाँच महिनापछि मुगुलगायत कर्णालीका अन्य पाँच जिल्लामा चामल दिने प्रक्रिया सुरु भएको हो । प्रधानमन्त्री पुष्पकमल दाहालले संसद्मा कर्णालीवासीलाई जन्म र मृत्यु संस्कारमा चामल अनुदानमा दिने घोषणा गर्दा सामाजिक सञ्जाल र कर्णाली क्षेत्रका राजनीतिज्ञ, विज्ञ, तथा नागरिकले अनुदाने चलनले कणालीवासीलाई परनिर्भर नबनाउने बरु कर्णालीवासी झन गरिब हुने भन्दै दिने भए दीर्घकालीन विकास देउ, शिक्षा, रोजगारीमा अवसर देउ भनी चर्को विरोध गरेका थिए । विरोधका बीच सरकारले संसद्बाट कर्णाली क्षेत्रमा जन्म र मृत्यु संस्कारमा निःशुल्क चामल र ढुवानी खर्च दिनेसम्बन्धी निर्देशिका पारित गरेको थियो । सरकारले २० किलो चामल र ढुवानी खर्च वितरणका लागि सरकार मातहतको नेपाल खाद्य संस्थानलाई जिम्मा दिएको छ । कर्णालीमा रहेका संस्थानका पाँच वटै शाखा कार्यालयले आइतबार पाँच वटै जिल्लामा प्रमुख जिल्ला अधिकारीको संयोजकत्वमा रहेको जिल्ला खाद्य व्यवस्थापन समितिको बैठक बसी २० किलो चामल र ढुवानी खर्च दिने सरकारको निर्णय कार्यान्वयन गर्न निर्णय गरेका छन् । प्रमुख जिल्ला अधिकारी एवम् जिल्ला खाद्य व्यवस्थापन समिति मुगुका संयोजक केशवराज शर्माका अनुसार जिल्ला प्रशासन कार्यालयमा बसेको समितिको बैठकले जन्म र मृत्यु भएको गाविसको प्रमाणित कागजात ल्याएमा संस्थानमा आउने कर्णालीवासीलाई आइतबारबाट चामल दिने र चामल लिन शाखा तथा डिपो कार्यालय रहेका गाविसभन्दा बाहिरका स्थानीय आएमा प्रतिदिन रु ५०० का दरले ढुवानी खर्च दिने र यो बढीमा दुई दिनसम्मको मात्र दुवानी खर्च दिने निर्णय भएको बताउनुभयो । मुगु मात्र नभएर यो प्रक्रिया कर्णालीका पाँच जिल्ला जुम्ला, हुम्ला, मुगु, डोल्पा र कालीकोटमा समेत समितिले निर्णय गरेर संस्थानलाई निर्देशन समेत दिएको पनि प्रजिअ शर्माले बताउनुभयो । सरकारले गत पुस १ गतेबाट चामल र ढुवानी दिन निर्देशन दिएको भए पनि कर्णालीमा अख्तियारी ढिला आउँदा समय लागेको मुगु खाद्य संस्थानका शाखा प्रमुख गङ्गाराम साहले बताउनुभयो । रासस File photo

काठमाडौं – मुलुकको एकमात्र अन्तराष्ट्रिय विमानस्थलमा तस्करीका लागि चेकजाँच नै नहुने छुट्टै बाटो रहेको एक अध्ययनले फेला पारेको खबर आजको कारोबारमा छ । विमानस्थलबाट बारम्बार अवैध सुन लगायतका प्रतिवन्धित बस्तुहरु सजिलै भित्रिने गरेपछि भएको अध्ययनबाट यही बाटो प्रयोग हुने गरेको खुलासा भएको हो । गत महिाना ३३ केजी अवैध सुन विमानस्थलबाटै बाहिरिएपछि सरकारकै एक निकायले गरेको अध्ययनले यस्तो तथ्य फेला पारेको हो । अनुगमनको क्रममा यात्रुहरुको आवागमन हुने ठाउँबाटै वैकल्पिक बाटो भेटिएपछि निगरानी बढाईएको छ ।

युएई, १ फाल्गुन । मध्यपुर्वको विकसित शहर युएईको दुबईमा तामाङ समाज युएईको आयोजनामा “भाषा, लिपि, मौलिक संस्कृति तामाङको पहिचान, संसार भरिका सबै तामाङले ल्होछार मनाउन यो हाम्रो अभियान” भन्ने मुल नाराको साथ ल्होछार पर्व सम्पन्न भएको छ । २८५३ औं झ्या (चरा वर्ष) शुभारम्भको शुभ अवसरमा नेपालीहरुको संस्कृतिक पर्व सोनाम ल्होछारको औपचारिक कार्यक्रमको प्रमुख अतिथिका रूपमा माननीय संसद तीर्थ लामा र महामहिम कार्यबाहक राजदुत नेत्र बहादुर टन्डन, बिशेष अतिथिमा नेपाल आदिबासी जनजाति महासंघ युएईका अध्यक्ष डिआर गुरूङ तथा नेपाली समाज युएईका अध्यक्ष सिपी सापकोटा, अतिथिहरूमा नेपाल आदिबासी जनजाति महासंघ युएईसँग आबद्ध बिभिन्न जातिय संस्थाका प्रमुखहरू लगायत युएईमा स्थापित बिभिन्न संघ-संस्थाका प्रमुखहरू, प्रायोजकहरू तथा पत्रकारहरूको उपस्थिति भएको थियो । निर्धारित समय भन्दा केही समय ढिलो सुरु भएको उक्त कार्यक्रममा बौद्ध परम्परा अनुसार लामा गुरूबाट पुजापाठ गरी सुरू गरिएको थियो । कार्यक्रममा प्रमुख अतिथिले छ्युमीमा दीप प्रज्वलन गरेका थिए । कार्यक्रमका सभापति तथा तामाङ समाज युएईका अध्यक्ष महेश मोक्तानले दुबै प्रमुख अतिथिहरूलाई तामाङ टोपी र फेङ्गा लगाई स्वागत गर्दै सोनाम ल्होछारको शुभकामना प्रदान गरेका थिए । तामाङ तथा अन्य समुदायका नेपालीहरुको बाक्लो उपस्थितिमा कलाकार जयनन्द लामा लगायतका स्थानिय कलाकारहरुको विजोड प्रस्तुति रहेको थियो। कलाकार जयनन्द लामाको मिठो हाँस्यव्यंग्य एवं तामाङ शेलो गीत उपस्थिति दर्शकहरु बिजोडले मनोरञ्जन लिइरहेका देखिन्थ्यो । जयनन्द लामाले सयौको संख्यामा उपस्थित दर्शकहरू माँझ कलकत्ते काईयो, चुई चुई चुई खाने जुत्ता, आँखाको रमझम लगायत आफ्ना आधा दर्जन चर्चित गीतहरू प्रस्तुत गर्दा गायक लामा संगै गीतहरू गाँउदै-नाच्दै दर्शकहरूले साथ दिएका थिए । कलाकार तथा सञ्चारकर्मी अन्जुली लोप्चन, तामाङ चलचित्रका नायक बिजय लामा र अन्य कलाकारहरु बिक्रम लामा, सन्दिप ग्यावक, बिमला बज्यू, सुष्मा तामाङ, निरू गोले, सोम लामा, ल्हामु शेर्पा, प्रदिप पुन मगर, रेबिका मगर, प्रख्यात मोक्तान, बिक्रम वाईबा, अन्जुली लोप्चन, सुब्बा बल तामाङ, लाक्पा योन्जनले तामाङ सेलोमा उत्कृष्ट गायन तथा नृत्य प्रस्तुतिहरू प्रस्तुत गर्दै दर्शकहरूलाई भरपुर मनोरन्जन गराएका थिए । उक्त कार्यक्रममा माननीय संसद तिर्था लामाले तामाङहरु संस्कृतिक रुपमा मात्रै नभई राजनैतीक रुपमा अगाडि आउने पर्ने बताउनु भयो । उहाँले तामाङ कबिता बाचन समेत गर्नु भएको थियो । यसै कार्यक्रमका बीच गायक चन्द्र वाईबा (प्राङबो) को गीति एल्बम “ह्याङला खाजिम” र गायिका सरस्वती लामाको गीति एल्बम “उर्बसी – २” लाई तामाङ समाज युएईका अध्यक्ष महेश मोक्तान, शेर्पा किदुङ युएईका अध्यक्ष पासाङ शेर्पा र काभ्रे सम्पर्क समिति यूएईका अध्यक्ष दिल वाईबाले सामुहिक रूपमा युएईमा बिमोचन गर्नु भएको थियो । कार्यक्रममा उत्कृष्ट भेषभुषा लगाउनेलाई सम्मान स्वरूप “मायाको चिनो” प्रदान गरिएको थियो । उत्कृष्ट भेषभुषा पुरुषमा शेर्पा किदुग युएईका अध्यक्ष पासाङ शेर्पालाई प्रदान गरिएको थियो भने महिलामा नानु गोले र अनिता लुङ्बालाई प्रदान गरियो । कार्यक्रम तामाङ समाज युएईका महासचिब सनिल घिसिङ र सचिब बसन्ति दोङले संचालन गरेका थिए ।

दाङ, फागुन १ । दाङमा कपडा राख्ने बाकसमा थुनिएर एक बालकको ज्यान गएको छ । ज्यान जानेमा पञ्चकुले गाविस–८ ढोलपुर निवासी चित्रबहादुर डाँगीका सात वर्षीय छोरा दिपेश डाँगी रहेको इलाका प्रहरी कार्यालय, खिलतपुरका प्रहरी निरीक्षक इन्द्रबहादुर साउदले जानकारी दिएका छन् । शनिबार बेलुकीदेखि हराइरहेका बालक आइतबार बाकसमा मृत अवस्थामा फेला परेका थिए । बालककी हजुरआमाले चिसो भएर सल झिक्न बाकस खोल्ने क्रममा उनी मृत अवस्थामा भेटिएका हुन् । बाकसभित्र पसेर पैसा खोज्ने क्रममा एक्कासी ढक्कन लागेर कुण्डीमा अड्किएपछि निसास्सिएर बालकको ज्यान गएको हुनसक्ने प्रहरीले आशंका गरेको छ । बालकको हातमा १० रुपैयाँ भएकाले बालक घरको एक तलामाथि बाकस राखेको ठाउँमा पैसा खोज्न गएको हुनसक्ने प्रहरीले बताएको छ । घटनाको अनुसन्धान भने भइरहेको प्रहरीले जनाएको छ ।

काठमाडौँ, १ फागुन । पूर्व राष्ट्रपति रामवरण यादवले राजनीतिक खिचातानीले प्राप्त उपलब्धीलाई दलहरुले संस्थागत गर्न नसकेको बताएका छन् । एक राष्ट्रिय मासिक पत्रिकाको विमोचन कार्यक्रममा बोल्दै पूर्वराष्ट्रपति यादवले भने, ‘देशको परिवर्तन गर्न सबै दल एक ठाउँमा उभिए पनि त्यही परिवर्तनबाट प्राप्त उपलब्धिलाई भने संस्थागत गर्न दलहरु असमर्थ रहे ।’ उनले २०१७ सालदेखि हालसम्म तीनवटा परिवर्तन सबै दल र नेपाली समुदाय एक ठाउँमा उभिएर पनि राजनीतिक खिचातानीका कारण अहिलेसम्म प्राप्त उपलब्धि संस्थागत हुन नसकेको बताएका छन् । राजनीतिक दलको सत्ता खेलमा लागेर देशमा अस्थिरता भएको उनले आरोप लगाएका छन् । उनले भने, ‘कसैले आउँदो चुनाव हेरेका छन् । भोलि कसरी शासन गर्ने भन्ने चिन्तामा दलहरु देखिन्छन्, देशको शासन प्रणालीलाई स्थिरता दिनतर्फ कुनै दलको ध्यान छैन ।’’ आफूले दुई÷चार महिना कुरेर भए पनि सबैलाई समेटेर संविधान जारी गरौँ भन्दा दलहरुले नमानेको उल्लेख गर्दै सत्ताको खेलमा लागेर त्यतिबेला संविधान जारी गरेको धारणा व्यक्त गरे । अलि बढी मधेसको समस्यामाथि छलफल गरेर संविधान २/४ महिना ढिलो जारी गरे केही हुन्न भन्दा दलहरुले सत्ताको खेलमा लागेर चाँडै जारी गरेकाले अहिले त्यसको परिणाम व्यहोर्नुपरेको उनले बताए ।

काठमाडौं, फागुन १ । संघीय समाजवादी पार्टीको वैकल्पिक केन्द्रीय सदस्य तथा संघीय प्रेस युनियनका कोषाध्यक्ष रहेका मनबहादुर पुनमगर नयाँ शक्तिमा प्रवेश गरेका छन् । पुनमगरलाई नयाँ शक्ति पार्टीका संयोजक डा. बाबुराम भट्टराईसहित नयाँ शक्तिका नेताहरु परशुराम तामाङ, खिमलाल देवकोटा, नवराज सुवेदीले पार्टी प्रवेश गराएका छन् । संघीय समाजवादी पार्टी स्थापनादेखि नै सक्रिय रुपमा कार्यरत रहेका मगरले अब पुराना राजनीतिक पार्टीहरुबाट देशको राजनीतिक परिवर्तन र आर्थिक समृद्धि संभव नहुने भन्दै नयाँ शक्तिमा प्रवेश गरेको नयाँ शकितका नेताले जानकारी दिएका छन् । । अब पुराना दलहरुबाट देशको विकास र समृद्धिको एजेण्डा अगाडि बढ्न नसक्ने ठहर गर्दै आफू नयाँ शक्तिमा समाहित भएको पुनमगरले शनिबार जारी गरेको प्रेस विज्ञप्ती उल्लेख छ । ‘नेपाली समाजको बनावट अनुसारको राजनीतिक समावेशिता र आर्थिक समृद्धिको मुख्य एजेण्डामा अबको वैकल्पिक शक्तिका रुपमा स्थापित नयाँ शक्ति पार्टी नेपालले मात्र नेतृत्व गर्न सक्छ भन्ने विश्वासका साथ आजकै मितिदेखि संघीय समाजवादी पार्टीको सदस्यता समेत नरहेनगरी नयाँ शक्ति पार्टीमा प्रवेश गरेको घोषणा गर्दछु’ उनीद्वारा हस्ताक्षरित विज्ञप्तीमा भनिएको छ ।

सिरहा, फागुन १ । सिरहाको मिर्चैयाँमा अज्ञात व्यक्तिले गोली प्रहार गर्दा एक व्यक्ति घाइते भएको छन् । घाइते हुनेमा माओवादी केन्द्र निकट भातृ संगठन वाइसीएलका सिराहा क्षेत्र नम्बर ६ का इन्चार्ज लालु खान रहेका छन् । २९ वर्षीय खानलाई गोलीको छर्रा लागेको प्रहरीले जनाएको छ । मोटरसाइकलमा आएका व्यक्तिहरुले खानमाथि गोली प्रहर गरेको जनाएको छ । मोटरसाइकलको नम्बर भने खुल्न नसकेको प्रहरीले जनाएको छ । खानको दाहिने खुट्टामा गोली लागेको इलाका प्रहरी कार्यालय मिर्चैयाका डिएसपी गजुसिद्धि बज्राचार्यले बताएका छन् । खानको मिर्चैयाको अस्पतालमा उपचार भइरहेको छ । गोली प्रहर गर्नेहरुको खोजी भइरहेको प्रहरीले जनाएको छ ।

कञ्चनपुर, फागुन १ । कञ्चनपुरका स्थानीय निकायका कर्मचारीले स्थानीय निकायको कामकाज ठप्प पारी आन्दोलनमा उत्रिएका छन् । सेवा निरन्तरताको माग गर्दै अस्थायी तथा करारमा कार्यरत कर्मचारीले अब बन्ने ऐन नियम, कार्यविधि गठन आदेशबाटै स्थायित्व र व्यवस्थापनको कुरा सम्बोधन गर्न माग गर्दै स्थानीय निकायका कामकाज ठप्प पारी कार्यालय अगाडि धर्नामा बसेका छन् । कर्मचारी कामकाज ठप्प पारी धर्नामा बसेपछि स्थानीय निकायको कामकाज ठप्प भएको छ । दीर्धकालीन रुपमा करार र अस्थायी रुपमा कार्यरत ६ हजार भन्दा बढी कर्मचारीको समायोजनको मागअघि सार्दै आन्दोलनमा उत्रिएको स्थानीय निकाय कर्मचारी सङ्घ कञ्चनपुरका अध्यक्ष प्रेम बोगटीले बताए । वर्तमान सङ्क्रमणकालीन व्यवस्थाका रुपमा स्थानीय तहमा सेवा प्रवाहका लागि सरकारले आवश्यक व्यवस्था गर्नसक्ने र यस्तो व्यवस्था गर्दा कानुन बमोजिम राष्ट्रसेवक कर्मचारी स्थानीय तथा प्रदेशिक तहमा समायोजन गर्नसक्ने व्यवस्था गरेको गाविस कर्मचारी सङ्घ कञ्चनपुरका अध्यक्ष बलराम रानाले बताउनु भयो । हातमा कालोपट्टी बाँधी, पेनडाउन, धर्ना र कामकाज ठप्प पार्ने लगायतका आन्दोलनका कार्यक्रम कर्मचारीले जारी राखेका छन् । माघ २३ गतेदेखि स्थानीय निकायका कर्मचारी आन्दोलनमा रहेका छन् । रासस

कञ्चनपुर, फागुन १ । कञ्चनपुरका स्थानीय निकायका कर्मचारीले आज स्थानीय निकायको कामकाज ठप्प पारी आन्दोलनमा उत्रिएका छन् । अस्थायी तथा करारमा कार्यरत कर्मचारीले सेवा निरन्तरताको माग अधि सार्दै अब बन्ने ऐन नियम, कार्यविधि गठन आदेशबाटै स्थायित्व र व्यवस्थापनको कुरा सम्बोधन गर्न माग गर्दै स्थानीय निकायका कामकाज ठप्प पारी कार्यालय अगाडि धर्नामा बसेका छन् । कर्मचारी कामकाज ठप्प पारी धर्नामा बसेपछि स्थानीय निकायको कामकाज ठप्प भएको छ । दीर्धकालीन रुपमा करार र अस्थायी रुपमा कार्यरत ६ हजार भन्दा बढी कर्मचारीको समायोजनको मागअघि सार्दै आन्दोलनमा उत्रिएको स्थानीय निकाय कर्मचारी सङ्घ कञ्चनपुरका अध्यक्ष प्रेम बोगटीले बताउनु भयो । वर्तमान सङ्क्रमणकालीन व्यवस्थाका रुपमा स्थानीय तहमा सेवा प्रवाहका लागि सरकारले आवश्यक व्यवस्था गर्नसक्ने र यस्तो व्यवस्था गर्दा कानुन बमोजिम राष्ट्रसेवक कर्मचारी स्थानीय तथा प्रदेशिक तहमा समायोजन गर्नसक्ने व्यवस्था गरेको गाविस कर्मचारी सङ्घ कञ्चनपुरका अध्यक्ष बलराम रानाले बताउनु भयो । हातमा कालोपट्टी बाँधी, पेनडाउन, धर्ना र कामकाज ठप्प पार्ने लगायतका आन्दोलनका कार्यक्रम कर्मचारीले जारी राखेका छन् । माघ २३ गतेदेखि स्थानीय निकायका कर्मचारी आन्दोलनमा रहेका छन् । रासस

काठमाडौं, फागुन १ । अन्ततः नेपाली कांग्रेसका सभापति शेर बहादुर देउबाको चर्को दबाबमा तेश्रो बरियाताक्रमका जयबहादुर चन्द नेपाल प्रहरीको महानिरिक्षकमा नियुक्त भएका छन् । आइतबार बिहानै ८ बजे एकल एजेण्डा राखेर डाकिएको मन्त्रीपरिषदको बैठकमा प्रधानमन्त्रीको इच्छा र अडान विपरित चन्दको पक्षमा निर्णय भयो । संसदीय व्यवस्थामा प्रधानमन्त्रीको समेत जोड बल चलेन र सत्ता गठबन्धनमा सहभागी नेपाली कांग्रेसका सभापतिको अडानले स्वीकृति पायो । नेपाल प्रहरीको प्रमुखको दौडमा अन्य तीन प्रहरी नायब महानिरीक्षकहरु नवराज सिलवाल, प्रकाश अर्याल र बम बहादुर भण्डारी पनि थिए। अहिलेको संयुक्त सरकार र चुनाव गराउनै पर्ने अवस्थालाई मध्यनजर गरेर मन्त्रिपरिषदले यो निर्णय गरेको हो । मन्त्रिपरिषदले नियुक्त गरेका चन्द चार दाबेदारहरु मध्ये वरिष्ठताका आधारमा तेश्रो स्थानमा थिए। अन्तिमसम्म प्रचण्डको अडान प्रधानमन्त्री प्रचण्डले भने सुरक्षा निकायलाई चुस्त दुरुस्त राख्न चेन अफ कमाण्ड र बरियताक्रमलाई मिच्न नहुने अडान राख्दै आएका थिए । प्रधानमन्त्रीले पहिलो वरियताक्रममा रहेका नवराज सिलवाललाई नै महानिरिक्षक बनाउनुपर्ने बताउँदै आएका थिए । नेपाली कांग्रेसका तर्फबाट गृहमन्त्री रहेका विमलेन्द निधिले समेत सिलवाललाई नै बनाउनुपर्ने अडान लिएका थिए । तर क्षेत्रीय नाता राखेर शेर बहादुर देउबाले चन्दलाई नहटाए सरकारबाटै समर्थन फिर्ता लिनेसम्मको अडान लिएपछि नियम, कानुन र वरियताको स्खलन भएको हो । अझ अचम्म त के भयो भने यो विषयमा चन्दलाई आइजीपी बनाउन यति बिहानै मन्त्रीपरिषदको आकस्मिक बैठक डाकियो । सर्वोच्च अदालतमा अधिवक्ता कपिलदेव भट्टले रिट दायर भएको कारण देउबा आत्तिएको कतिपय श्रोतले बताउँछ । प्रचण्डले भने अन्तिमसम्म वरियताक्रम नमिच्न देउबासँग छलफल गरेका थिए । तर देउबा मानेनन । “देउबालाई यो विषयले सिँगो सुरक्षाबलको मनोबलमा नै असर गर्छ । प्रहरी संरचनामा नै असर पर्छ भनेर अध्यक्षले भन्नुभयो, तर देउबा टस न मस पनि भएनन् । उनको अडान एउटै थियो– जे सुकै होस् चन्दलाई बनाउनुस्” श्रोतले भन्यो । सत्ता साझेदार प्रमुख दलका सभापतिले यसरी अडान लिएपछि प्रधानमन्त्री प्रचण्डसँग समेत कुनै उपाय बाँकी रहेन । हतारमा मन्त्रीपरिषदको बैठक बोलाइयो र निर्णय गरियो । यतिसम्म कि यो विषयमा मन्त्रीपरिषदमा यो विषयमा कुनै छलफल समेत भएन । सोझै निर्णय गरियो । बरियता मिच्ने कलामा माहिर देउबा देउबाले नेपाल प्रहरीको संरचना भत्काएको यो पहिलोपटक भने होइन । उनले यसअघि पनि आफू गृहमन्त्री भएको बेला मोतिलाल बोहरालाई बरियताक्रम मिचेर नै महानिरिक्षक बनाएका थिए । पछि यी बोहरा छानबीनमा परे । ०४८ सालमा गिरिजाप्रसाद कोइराला नेतृत्वको सरकारका गृहमन्त्री शेरबहादुर देउबाले सरकारले प्रहरी सेवा ऐन९ २०१२ माथि संशोधन गर्दै प्रहरी सेवाको अवधि ३० वर्ष वा सरकारले चाहेमा अर्को दुई वर्ष थप गर्नसक्ने प्रावधान बनायो । यही प्रावधानअनुरुप महानिरीक्षक रत्नसमशेर राणाको ३० वर्षे सेवाअवधि देखाएर उनलाई अवकाश दिइयो र मोतिलाल बोहोरालाई ०४९ सालको फागुनमा महानिरीक्षक नियुक्त गरियो । यही परम्परालाई पछि गृहमन्त्री वामदेव गौतमले पछ्याएका थिए । यसपछि ०६५ फागुनमा वरियताक्रम विपरीत रमेश चन्द ठकुरी महानिरीक्षक नियुक्त भए । यसका लागि समेत देउबाले नै मुख्य भूमिका निर्वाह गरेका थिए । चन्दमाथि पनि अख्तियारले छानबीन शुरु गर्यो र उनी भ्रष्टाचार मुद्दामा तानिए । शेरबहादुर देउबाले चन्दलाई वरियता मिचेर आइजिपी बनाउन दबाब दिएकोमा प्रहरी संगठनभित्र मात्र होइन, राष्ट्रिय राजनीतिमा पनि चर्को आलोचना भइरहेको छ । नेपाली कांग्रेसभित्र समेत देउबाको निर्णय गलत भएको भन्दै आलोचना बढेको छ ।

काठमाडौँ, १ फागुन । त्रिवि यही फागुन १४ गते हुने स्वतन्त्र विद्यार्थी युनियन (स्ववियु) निर्वाचनका लागि निर्वाचन प्रक्रिया आजदेखि सुरु हुँदैछ । निर्वाचन कार्यतालिकानुसार आजदेखि निर्वाचन प्रक्रिया सुरु भएको त्रिविका शिक्षाध्यक्ष तथा स्ववियु निर्वाचन केन्द्रीय अनुगमन तथा समन्वय समितिका संयोजक प्रा डा सुधा त्रिपाठीले जानकारी गराउनुभयो । उहाँका अनुसार निर्वाचनका लागि आज देशभरका त्रिविका आङ्गिक र सम्बन्धनप्राप्त क्याम्पसले स्ववियु निर्वाचन मतदानमा सहभागी मतदाताको नाम प्रकाशन गर्ने छन् ।

बर्दिवास, १ फागुन । महोत्तरीको बर्दिबासमा एकीकृत नमुना मुसहर बस्ती निर्माणमा जुटेको धुर्मुस–सुन्तली फाउन्डेसनलाई बस्ती निर्माणमा सहयोग पु¥याउन होटल व्यवसायी हिरा गौतमले शनिबार रु एक लाख रकम प्रदान गर्नुभएको छ । होटल व्यवसायी गौतमले इँटा टाउकामा बोकेका ‘धुर्मुस’लाई चेक हस्तान्तरण गर्दै भन्नुभयो – “म पनि यो पुण्य काममा थोरै सहभागिताले मिसिन आएको छु ।” बस्ती निर्माणका लागि अस्ट्रेलियाबाट रु ६५ लाख सहयोग प्राप्त भइसकेको छ । “सहयोगी मनहरुकै साथ र सहयोगले हामी निरन्तर राष्ट्र निर्माणको अभियानमा लागिरहेका हौँ” धुर्मुसले भन्नुभयो – “मुसहर बस्तीको निर्माण सम्पन्न गरी वैशाख १ गते वर्षौैंदेखि घरबारविहीन मुसहरलाई नयाँ घरमा प्रवेश गराउँदैछौँ ।” गत पुस २५ गते महजोडीले शिलान्यास गरेसँगै निर्माण सुरु भएको बस्तीको अहिलेसम्म ३५ प्रतिशत काम सकिएको छ । अब ६५ प्रतिशत कामका लागि आवश्यक आर्थिक भार पनि सहयोगी मनबाटै पूरा हुने कार्यस्थलमा सञ्चारकर्मीसँग कुराकानी गर्दै धुर्मुसले बताउनुभयो । रु चार करोड ७८ लाखको लागतमा ५० घर मुसहरका लागि शौचालय, खानेपानी धारा सुविधासहितको ५० घर, बालोद्यान, सामूहिक घर, मुसहरका कुलदेवता दिनभद्री मन्दिर र दुई सार्वजनिक शौचालय बन्ने काम अहिले धमाधम छ । सडक, बिजुली, खानेपानीसहितको सो निर्माणाधीन बस्ती अपाङ्गता र बालमैत्री हुने फाउन्डेसनका परियोजना प्रबन्धक अर्जुन न्यौपानेले बताउनुभयो । हालसम्म झन्डै रु दुई करोडभन्दा बढी रकम सङ्कलन भए पनि बस्ती निर्माणका लागि अझै रु दुई करोड ५० लाख रकम अपुग रहेकाले तराई मधेसका उद्योगी, व्यापारी, समाजसेवीसहितका समाजका सबै तहतप्काका सहयोगी मनसँग फाउन्डेसनले सहयोगका लागि अनुरोध गरेको छ । रासस