नेपालगन्ज, पुस २९ । बालविवाह गर्नुहुन्न भन्ने जति नै नारा लगाउँदै हिँडेपनि नेपालमा भने बालविवाह जटिल बन्दै गइरहेको छ । प्रत्येक वर्ष नेपालमा १० वर्षमुनिका सरदर एक लाख ३८ हजार बालबालिकाको विवाह हुने गरेको तथ्याङ्क सार्वजनिक गरिएको छ । राष्ट्रिय जनगणना, २०६८ अनुसार नेपालमा कुल बालविवाह सङ्ख्यामा पनि प्रतिवर्ष सरदर एक लाख १५ हजार बालिकाको विवाह हुने गरेको छ । राष्ट्रिय मानवअधिकार आयोगका क्षेत्रीय निर्देशक मुरारी खरेलका अनुसार १० देखि १४ वर्ष उमेरका ११ लाखभन्दा बढी बालिकाको प्रत्येक वर्ष विवाह हुने गरेको छ । यसैगरी, नेपालमा प्रत्येक वर्ष कुल जनसङ्ख्याको ४३ लाखभन्दा बढी १५ देखि १९ वर्षमुनिका किशोरीको विवाह हुने गरेको छ । बालविवाह नेपालको एक जटिल समस्या भएका कारणले यसको प्रभाव सबै क्षेत्रमा पर्ने हुँदा सम्बद्ध सरकारी तथा गैरसरकारी निकायले अनुगमन, जनवकालत तथा नागरिक शिक्षा र चेतनाको कार्यक्रम अभियानकै रुपमा सञ्चालन गर्नुपर्ने अधिकारकर्मीहरुको ठहर छ ।

काठमाडौं, पुस २९ । सरकारले संसदमा टेबल गराएको संविधान संशोधन प्रस्तावलाई पारित गराउन मधेसी मोर्चाले सहमति जनाएको छ । शुक्रबार प्रधानमन्त्री पुष्पकमल दाहाल‘प्रचण्ड’को आब्हानमा बालुवाटारमा बसेको मोर्चा र सरकारबीचको बैठकले संशोधन प्रस्ताव पारित गराउन मोर्चाले सहयोग गर्ने सहमति भएको प्रधानमन्त्री प्रचण्डका प्रेस सल्लाहकार गोविन्द आचार्यले जानकारी दिए । कांग्रेसका सभापति शेरबहादुर देउवा, उप–प्रधान तथा गृहमन्त्री विमलेन्द्र निधि माओवादी केन्द्रका रामबहादुर थापा, मातृका यादव सहित मधेसी मोर्चाका शीर्ष नेता महन्थ ठाकुर, उपेन्द्र यादव, राजेन्द्र महतो, हृदयश त्रिपाठी सहित बसेको बैठकले छिटो भन्दा छिटो संशोधन प्रस्ताव पारित गराएर चुनावमा जानुपर्ने सहमति भएको उनले जानकारी दिए ।

विराटनगर,  पुस २९ । नेकपा (एमाले) मोरङको आठौँ जिल्ला अधिवेशनले अध्यक्ष पदमा विनोद ढकाललाई निर्वाचित गरेको छ । गएराति सार्वजनिक गरिएकोे मत परिणामअनुसार ढकालले आफ्ना प्रतिद्वन्द्वी महेश रेग्मीलाई २०६ मतको अन्तरले पराजित गरेका हुन् । कूल ८८३ मत खसेकामा ढकालले ५४० मत प्राप्त गर्नुभएको थियो भने उहाँका प्रतिद्वन्द्वी रेग्मीले ३३४ मत प्राप्त गरेका थिए । त्यसैगरी, ढकालकै समूहबाट उपाध्यक्ष पदमा रामलाल साह ४६९, सचिवमा ऋषिकेश पोखरेल ५०४ र उपसचिवमा धना तामाङ ४५६ मत प्राप्त गरी विजयी भएका छन् । रासस

काँकडभिट्टा (झापा), पुस २९ । भद्रपुर–५ स्थित बसपार्क छेउमा सञ्चालित मेची कपास उद्योगमा आज आगलागी हुँदा रु १५ लाख बढीको क्षति भएको छ । रामचन्द्र सहनीले सञ्चालन गर्दै आइरहेको उद्योगमा यन्त्रबाट विद्युत् चुहावट भई आगलागी भएको प्रहरीले जनाएको छ । आगलागीबाट रु पाँच लाख मूल्य पर्ने यन्त्र, कपास, जुट, जस्तालगायत सामग्री नष्ट भएको भद्रपुर वडा प्रहरी कार्यालयका प्रहरी निरीक्षक कुलप्रसाद चौधरीले जानकारी दिए । भद्रपुर नगरपालिकाको वारुणयन्त्र, प्रहरी र स्थानीयवासीको सहयोगमा आगो नियन्त्रणमा लिइएको थियो । रासस

काठमाडौँ, पुस २९ । सूचना तथा सञ्चारमन्त्री सुरेन्द्रकुमार कार्कीले दक्षिण एसियाली प्रेस काउन्सिल गठन गर्न नेपाल सरकारको सहयोग रहने बताएका छन् । नेपालसहित भारत, बङ्गलादेश र साइप्रसका प्रेस काउन्सिलका प्रतिनिधिसँगको आज भएको सामूहिक भेटमा सञ्चारमन्त्री कार्कीले दक्षिण एसियाको सञ्चारको समस्या एउटै रहेकाले काउन्सिल स्थापना गरे त्यसले सहजता ल्याउने विश्वास व्यक्त गरे । भेटमा प्रेस काउन्सिल नेपालका अध्यक्ष बोर्णबहादुर कार्की, नेपाल पत्रकार महासङ्घका प्रतिनिधि, साइप्रस प्रेस काउन्सिलका प्रतिनिधि अलि हान्स्री, भारतीय प्रेस काउन्सिलका अध्यक्ष जस्टिस चन्द्रमौलीकुमार प्रसाद, बङ्गलादेश प्रेस काउन्सिलका अध्यक्ष जस्टिस ममताज उद्दिन अहमेद लगायत सहभागी थिए । प्रतिनिधिमण्डलले प्रेस स्वतन्त्रताप्रति नेपालले खेलेको भूमिका सराहनीय भएको जनाएको थियो । रासस

काठमाडौँ ,पुस २९। वन तथा भूसंरक्षण मन्त्रालयले भूकम्पपीडितलाई सहज रुपमा काठ दाउरा उपलब्ध गराउन मातहतका सम्बन्धित निकायलाई निर्देशन दिएको छ । वनमन्त्री शङ्कर भण्डारीले भूकम्पपीडितलाई सहज रुपमा काठ दाउरा उपलब्ध गराउन गठित कार्यदलको प्रतिवेदन आज पारित गरी सो निर्देशन दिएका हुन्। मन्त्रालयले मुलुकभित्रको काठ प्रवद्र्धनका लागि ‘विदेशी काठ आयात हुने मापदण्ड, २०७३’ समेत पारित गरेको छ । त्यस्तै वन अनुसन्धान रणनीति, २०७३ स्वीकृत गरिएको मन्त्रालयले जनाएको छ । मन्त्रालयले वैकल्पिक ऊर्जा प्रवद्र्धन केन्द्र र वन विभागबीच वैकल्पिक ऊर्जाको प्रवद्र्धन र वन तथा वातावरणको व्यवस्थापनमा समन्वय तथा साझेदारी गर्न वन विभागलाई सहमति प्रदान गरेको छ । रासस

रसुवा, पुस २९ । नेपाली काँग्रेसका वरिष्ठ नेता रामचन्द्र पौडेलले ७० वर्षसम्मको सङ्घर्ष टुङ्गिसकेकाले अब राष्ट्रिय स्थिरता दिन सबै एकजुट भई संविधान कार्यान्वयनमा लाग्नुपर्ने बताएका छन् । तेस्रो रसुवा महोत्सवको  बिहिबार बोगटीटारमा उद्घाटन गर्दै उनले यो राजनीतिक स्थिरता आउने वर्ष भएकाले आगामी साल माघसम्ममा निर्वाचन गर्नुपर्ने बताए । उनले जिल्लाका हरेक गाउँटोलमा कालोपत्रे सडक पुर्याउनुपर्ने, जलविद्युत् उत्पादकहरुले आफ्नो कामका सबै विवरण जनतासमक्ष प्रस्तुत गरी जनअनुमोदन गराउनुपर्ने, पासाङल्हामु राजमार्गअन्तर्गत बेत्रावती–धुन्चे–स्याफ्रुबेँसी सडकखण्डको मापदण्ड अझ फराकिलो बनाउनुपर्ने सुझाव दिए । लहरेपौवा महिला सञ्जालद्वारा सञ्चालित सो महोत्सव आगामी माघ ९ गतेसम्म सञ्चालन हुने आयोजक समितिले जनाएको छ । उक्त सञ्जालका अध्यक्ष एवम् महोत्सव आयोजक मुल समारोह समितिका संयोजक सरिता लम्सालको सभापतित्वमा भएको कार्यक्रम सफल पार्न रसुवाबाट प्रतिनिधित्व गर्ने सांसद जनार्दन ढकालले रु दुई लाख दिने घोषणासमेत गरे । सो अवसरमा काँग्रेस रसुवाका सभापति पेम्बाछिरिङ तामाङ, युवा नेता उपेन्द्र लम्साल, बालचन्द्र पौडेल, पूर्वसभासद् एवम् नयाँ शक्ति पार्टी रसुवाका संयोजक प्रेम तामाङ, नेकपा (एमाले)का अशोककुमार घिमिरे, नेकपा (माओवादी केन्द्र) रसुवाका अध्यक्ष इन्द्रप्रसाद गोतामेसहितले समुन्नत रसुवा निर्माणमा एक जुट भई अघि बढ्ने प्रतिबद्धता व्यक्त गरे। ‘रसुवा महोत्सवको आधारः कृषि तथा पर्यटनको सुधार’भन्ने नारामा भएको सो महोत्सवले स्थानीय कला–संस्कृति संरक्षण, जैविक कृषि उपजको उत्पादन, धार्मिक–ऐतिहासिक– पुरातत्विक सम्पदाको संरक्षण तथा पर्यटन प्रवद्र्धनमा टेवा पुर्याउने अपेक्षा गरिएको रसुवा नागरिक समाजका अध्यक्ष बाबुलाल तामाङले बताए । रासस

काठमाडौं, पुस २८ । मधेसी मोर्चाका नेता अनिल झाले चुनावमा जाने कुरामा मोर्चाले विरोध नगर्ने स्पष्ट पारेका छन् । बिहीबार रिपोर्टर्स क्लब नेपालमा भएको साक्षात्कारमा बोल्दै उनले मोर्चा चुनावको विरोधी नभएको स्पष्ट पारे । उनले भने– ‘हामी चुनावको विरोधी होईनौं, संशोधन विधेयक सदनमा टेबुल भएको छ, चुनाव चाहानेले त्यसलाई पारित गराउनुपर्छ ।’ झाले निर्वाचनको प्रक्रियामा आफूहरुले विरोध नगर्ने बताए । ‘चुनावको नोमिनेशनको नाम बाहिर आउँदासम्म पनि संशोधन विद्येयक पारित भएन भनेमात्रै हामी विरोध गर्दौं, होईन भने हामी विरोध गर्दैनौं,’ उनले भने । अध्यक्ष झाले देशलाई लामो समयसम्म बन्धक बनाउन नहुँने बताउँदै मोर्चाले समस्याको निकास दिलाउने कुरामा विश्वास दिलाए ।

काठमाडौं, पुस, २८ । प्रधानमन्त्री पुष्पकमल दाहाल ‘प्रचण्ड’ले प्रेस लोकतन्त्र र सुशासनको आधारस्तम्भ भएको बताएका छन्। बिहीबार बिहान भारत, बंगलादेश र साइप्रसका प्रेस काउन्सिलका प्रतिनिधिहरुसँगको सामूहिक भेटमा प्रधानमन्त्रीले नेपालमा शान्ति प्रक्रियाको निष्कर्षमा पुग्नुमा प्रेसको भूमिका रहेको बताए । प्रधानमन्त्रीले भने– ‘नेपाल राजनीतिक संक्रमणको अन्त्यतिर आएको छ । नेपालको शान्ति प्रक्रिया र संविधान निर्माणमा प्रेस जगतको निकै ठूलो भूमिका छ । प्रेसको सकारात्मक भूमिका नभएको भए मौलिक ढंगबाट शान्ति र संविधानको प्रक्रिया सफलतामा टुङ्गाउन सम्भव पनि थिएन । हामीले नयाँ संविधान निर्माण गरेका छौं, संविधानले पूर्ण प्रेस स्वतन्त्रताको व्यवस्था गरेको छ । प्रेस नै लोकतन्त्र र सुशासनको आधारस्तम्भ हो भन्नेमा सरकार स्पष्ट छ ।’ २१ औं शताब्दी सूचना र प्रविधिको युग भएको प्रधानमन्त्रीले बताए । ‘२१ औं शताब्दी सूचना र प्रविधिको युग हो । सूचना र प्रविधिको विकासले विश्व जगतमै महत्वपूर्ण परिवर्तन ल्याएको छ, सामाजि जागरण ल्याएको छ । यसलाई विश्वस्तर र दक्षिण एसियामा संगठित गरेर अगाडि बढ्ने तपाईहरुको प्रयास प्रशंसनीय छ । नेपाल सरकार त्यसका लागि हातेमालो गर्न तयार छ,’ उनले भने । भेटमा प्रेस काउन्सिल नेपालका अध्यक्ष बोर्ण बहादुर कार्की, नेपाल पत्रकार महासंघका प्रतिनिधिहरु साइप्रस प्रेस काउन्सिलका प्रतिनिधि अलि हान्श्री, भारतीय प्रेस काउन्सिलका अध्यक्ष जस्टिस् चन्द्रमौली कुमार प्रसाद, बंगलादेश प्रेस काउन्सिलका अध्यक्ष जस्टिस् ममताज् उद्दिन अहमेद लगायतको प्रतिनिधि मण्डलले प्रेस स्वतन्त्रताप्रति नेपालले देखाएको लचकताको प्रशंसा गरेका थिए ।

काठमाडौँ, पुस २८ । उपत्यकाको उत्तर पूर्वी भेगमा रहेको पर्यटकीय स्थल तारेभिरलाई देश–विदेशमा चिनाउने उद्देश्यले तेस्रो तारेभिर महोत्सव माघ १ गतेदेखि सुरु गरिने भएको छ । तोरेभिरमा ‘चट्टानी बगैँचा’ (रक गार्डेन) निर्माण गर्ने र घरवास (होम स्टे) को व्यवस्था गरी यस क्षेत्रको पर्यटन प्रवद्र्धन गर्ने योजनासहित माघ १ गते महोत्सव गरिन लागिएको हो । वि.सं २०७१ माघ १ गते पहिलो पटक महोत्सवको आयोजना गरिएको थियो । योजनाअनुसार तारेभिरमा पर्यटन प्रवद्र्धनको गृहकार्य भइरहेका बेला २०७२ वैशाख १२ गतेको भूकम्पले यहाँका २६० घर पूर्ण क्षति भएकाले घरवास (होम स्टे) बनाउन नसकिएको महोत्सव आयोजक समितिका संयोजक लक्ष्मण गोले तामाङले बताए । दुई हजार मिटर उचाइमा रहेको तारेभिरबाट उपत्यकाका सबै भागको अवलोकन गर्न सकिन्छ । उत्तरतर्फ हिमालको मनमोहक दृश्यले पर्यटकलाई आकर्षण गर्छ । शिवपुरी नागार्जुन राष्ट्रिय निकुञ्जसँग जोडिएको यो तामाङ बस्तीमा पूर्वाधारसहित ‘चट्टानी बगैँचा’ (रक गार्डेन) को निर्माण गर्न सके आकर्षक पर्यटकीय गन्तव्य बन्न सक्ने सम्भावना देखिएको गोकर्णेश्वर नगरपालिका राजनीतिक संयन्त्रका सदस्य श्रीकृष्ण ज्योतिले बताएको छ । साविक बालुवा गाविसको ३ र ४ नं वडामा पर्ने यो पर्यटकीय स्थल हाल गोकर्णेश्वर नगरपालिकाको ७ नं वडामा पर्छ । सिंहदरबारबाट करिब २५ किमीको दूरीमा पर्ने तारेभिरमा पर्यटकलाई आकर्षण गर्ने भौतिक संरचना बन्न सके यहाँको जीवनस्तर सुध्रने स्थानीयवासीको भनाइ छ ।

काठमाडौँ, पुस २८ । नेपाल सरकारले अफगानिस्तानको विभिन्न भागमा गत मङ्गलबार भएको बर्बर र अमानवीय बम आक्रमणको घटना र गत आइतबार पूर्वी जेरुसलममा भएको सवारी आक्रमणको घटनाप्रति गहिरो दुःख व्यक्त गरेको छ । परराष्ट्र मन्त्रालयले आज विज्ञप्ति जारी गर्दै अफगानिस्तानको विभिन्न भागमा भएको बम आक्रमणमा परी संयुक्त अरब इटिरेट्स(युयई)का अधिकारीहरु र अन्य र्निदोष नागरिकको मृत्यु भई ठूलो क्षति पुगेकामा दुःख व्यक्त गरेको छ । नेपाल सरकारले यस दुःखद घडीमा अफगानी सरकार र त्यहाँका जनतालाई तथा बम बिस्फोटमा परी मृत्यु भएका युयइका नागरिकका आफन्तप्रति समवेदना प्रकट गरेको छ । यसैगरी गत आइतबार पूर्वी जेरुसलममा भएको सवारी आक्रमणमा परी चार इजरायली नागरिकको मृत्यु भएको तथा अन्य नागरिक घाइते भएको घटनामा नेपाल सरकारले दुःख व्यक्त गरेको छ । जुनसुकै प्रकारको आतङ्कवादलाई दण्डित र अन्त्य गरिनुपर्ने नेपाल सरकारको मान्यता रहेको विज्ञप्तिमा उल्लेख छ । नेपाल सरकारले इजरायली सरकार र घटनामा मृत्यु भएका परिवारप्रति पनि गहिरो समवेदना र सहानुभूति प्रकट गरेको छ । रासस

धनुषा,  पुस २८ । भौतिक पूर्वाधार तथा यातायातमन्त्री रमेश लेखकले व्यवस्थापिका–संसद्बाट संविधान संशोधन प्रस्ताव पारित गरी स्थानीय तहको निर्वाचन गर्न आवश्यक रहेको बताएका छन् । जनकपुर–यदूकाहा सडकखण्डको आज यहाँ शिलान्यास गर्दै उनले निर्वाचनका लागि संविधान संशोधन जरुरी रहेको स्पष्ट पारे । एकीकृत भावनाले मात्रै देशको विकास हुनसक्ने उल्लेख गर्दै उनले विविधतायुक्त नेपाली समाजलाई एकअर्कासँग जोड्नका लागि संविधान संशोधन आवश्यक रहेको उल्लेख गरे । रासस

मोरङ, पुस २७ । मोरङका पाँचवटा खोलामा पक्की पुल निर्माण सम्पन्न भएका छन् । जिविस मोरङले विराटनगरको सिंघिया, रङ्गेलीको घाँगी, राजघाटको कट्नुु र टङ्किसिनवारीको खदरा खोलामा पुुल निर्माण गरेको छ । जम्मा रु.नौ करोडभन्दा बढीको लागतमा ती सबै पुुल निर्माण सम्पन्न गरेको जिविसका इन्जिनियर घनश्याम दाहालले जानकारी दिए । दुुईदेखि तीन वर्षभित्रमा ती सबै पुल निर्माण सम्पन्न गरिएको दाहालको भनाइ छ । यसैगरी, जिविसले साना–ठूला गरी ३० वटा पुुल निर्माण गरिरहेकोमा त्यसमध्ये पाँचवटा पुुलको निर्माण कार्य भर्खरै सम्पन्न भएको र बाँकी पुुलको निर्माण कार्य अन्तिम चरणमा पुुगेको इन्जिनियर दाहालले बताए । एक वर्षभित्र सबै पुुलको निर्माण कार्य सम्पन्न हुुने जिविसले जनाएको छ ।

सिन्धुली, पुस २७ । सिन्धुलीमा सिसी क्यामेराको सहायताले भारतको विहारदेखि आएर डकैती गरी फरार रहेका डाँका पक्राउ परेका छन्। डाँकाको समूहले गत पुस २२ गते कमलामाई नगरपालिका–६ एक नम्बर बजारमा रहेको सिकन्दर शाहको शाह आयरनको पसलको सटर फुटाएर डकैती गरेका छन् । प्रहरीले घटनामा संलग्न तथा मुख्य योजनाकार सर्लाहीको त्रिभुवननगर–७ शेखटोला बस्ने ५२ वर्षीय सरिफुल रहमान भन्ने शेख मोहम्मद सलिफलाई पक्राउ गरेको जिल्ला प्रहरी कार्यालय सिन्धुलीका प्रहरी नायब उपरीक्षक सुभाषचन्द्र बोहोराले जानकारी दिए । शेखलाई काठमाडौँबाट मंगलबार पक्राउ गरी थप अनुसन्धानका लागि जिल्ला प्रहरी कार्यालय सिन्धुलीमा ल्याएको छ । यस्तै, सो डकैती गर्ने घटनामा संलग्न भारतको विहार राज्य वैरगनिया पञ्चायत बस्ने ४० वर्षीय उजिर अन्सारी, ३५ वर्षीय रामनाथ शाहा, भारतकै सुनौल बस्ने ३८ वर्षीय शेख सकिल, भारतको समस्तीपुर बस्ने ४० वर्षीय मोहम्मद दुलार, सीतामढी बस्ने ३५ वर्षीय मोहमद एलिहास र भारतको विहार राज्य वैरगनिया पञ्चायत बस्ने ३६ वर्षीय पुष सिंहको खोजी जारी रहेको बोहोराले जानकारी दिए । सिन्धुलीमा उनीहरु पहिलोपटक डकैती गर्न आएको र सिसी क्यामेराको सहायताले उनीहरुलाई प्रहरीले पक्राउ गर्न सफल भएको प्रहरीको दाबी रहेको छ । सिन्धुलीमा डकैती गर्न सरिफुल रहमान भन्ने शेख मोहम्मद सलिफ पुस २० गते सिन्धुली आएको र शेखले सिन्धुलीका बजारका पसलको निगरानीसँगै बढी कारोबार हुने पसल, सहजता हेर्दै पसलको छनौट गरेको प्रहरीको अनुसन्धानबाट खुलेको छ । यस्तै, डकैती गर्न शेखलाई रामनाथ शाहाले पनि सघाएका थिए। गत पुस २१ गते सिन्धुली आएका शेखले पुस २२ गते सिन्धुलीको स्टलबजारमा रहेको डाँफे होटल सातजनाका लागि बुक गरेको र शेखले खबर गरेपछि विहारबाट विआरओ ४४३१ नम्बरको टाटासुमोमा उनीहरु सिन्धुली आएका थिए । होटल सञ्चालकलाई टाढा जानुपर्ने भएकाले भोलि बिहान चाँडै निक्लने भन्ने जानकारी गराई बिहान ३ बजे होटलबाट डाँकाको समूह निक्लिएको थियो । होटलबाट निक्लिएका डाँकाले ९ मिनेटको समयमा शाह आयरनको सटर फोरी डकैती गरी फरार भएका थिए । सिसी क्यामेराले कैद गरेको दृश्यअनुसार सिन्धुलीको २ नं बजार हुँदै उनीहरु ट्राफिक पोस्ट हुँदै सिन्धुलीमाढीबाट बाहिरिएका थिए । डकैती गर्न सफल डाँका सर्लाहीको त्रिभुवननगरमा पुगेपछि भागबन्डा गर्ने क्रममा विवाद भएको र छोरालाई विदेश पठाउने क्रममा शेख काठमाडौं गएकाले विशेष सूचनाका आधारमा शेखलाई प्रहरीले काठमाडौंबाट पक्राउ गरेको छ । शेख सिन्धुली आउँदा सेतो लामो दारी पालेको र डकैती गरिसकेपछि दारी छोटो बनाई कलर गरेको अवस्थामा पक्राउ गरिएको प्रहरी नायब उपरीक्षक बोहोराले बर्ताए । प्रहरीलाई नै चिन्न अप्ठेरो पर्ने गरी कलर गरेका शेखलाई पक्राउ गरिएपछि अरू फरार रहेकाको पनि खोजी भइरहेको उनले जानकारी दिएको छ । डाँका समूहले भारतको विहारदेखि आएर शाह आयरनको सटर फोरी नगद र समान डकैती गरी लगेका थिए । सिन्धुलीबजार क्षेत्रमा भर्खरै जडान गरिएको सिसी क्यामेराले प्रहरीको अनुसन्धानको कार्यलाई निकै सहज र लक्ष्यनजिक बनाइदिएको छ । सिन्धुलीमा भारतदेखि आएर डाँकाले डकैती गरेको यो पहिलो घटना हो । रासस

पोखरा, पुस २७ । कास्कीको सैमराङ गाविस–८ र ९ को बीचमा पर्ने भगवती वरालडाँडामा माघ १ र २ गते माघे संक्रान्ति मेला सुरु हुने भएको छ । ‘वरालडाँडा जाऔँ, भगवती माईको दर्शन गरौँ’ भन्ने मूल नाराका साथ वरालडाँडा तमु समाजको आयोजनामा हुन लागेको सो मेलामा गाविस स्तरीय पुरुष भलिबल प्रतियोगिता, दोहोरी लोकगीत प्रतियोगिता, विविध सांस्कृतिक कार्यक्रम र छेलो हान्ने प्रतियोगिता गरिने समाजका अध्यक्ष चीनबहादुर गुरुङले जानकारी दिए । भलिबल प्रतियोगितामा प्रथम हुने टोलीले रु.२५ हजार र द्वितीय हुने टोलीले रु १५ हजार पुरस्कार पाउने बताइएको छ ।