चैत ६ । उत्तर कोरियाले नयाँ तथा बिस्तारित क्षमताको रकेट इन्जिनको परीक्षण गरेको छ । उत्तर कोरियाली सेनाले उच्च क्षमता तथा प्रदर्शन भएको रकेट इन्जिन परीक्षण गरेको उत्तर कोरियाको सरकारी समाचार संस्थाले जनाएको छ । यो परीक्षणले उत्तर कोरियाको रकेट क्षमता नयाँ स्तरमा पुगेको नेता किम जोङ्ग उनले घोषणा गरेकाे समाचार संस्था केसिएनएले जनाएको छ । नयाँ सकेटले विश्व स्तरको स्याटेलाइट प्रक्षपणका लागि उत्तर कोरियालाई सहयोग गर्ने नेता किमको भनाई छ । अमेरिकी विदेश मन्त्री रेक्स टिल्लर्सनले चीनको भ्रमण गरे लगतै उत्तर कोरियाले रकेट परीक्षण गरेको हो । चीन पुग्नुअघि दक्षिण कोरियामा रहनु भएका टिल्लर्सनले शुक्रबार उत्तर कोरियाले दक्षिण कोरिया र अमेरिकाका सैनिकलाई चुनौती दिएमा त्यसको प्रतिबाद गर्ने बताएका थिए । उत्तर कोरियाले पछिल्लो समय लगातार आणविक परीक्षण तथा मिसाइल प्रक्षपण गर्दै आएको छ ।

चैत ५ । भारतको आगरास्थित मुगलकालिन स्मारक ‘ताजमहल’ आतंकवादका कारण खतरामा परेको भन्दै सुरक्षा बढाइएको छ । हालै केही संचारमाध्यमले अन्तर्राष्ट्रिय आतंकवादी संगठन इस्लामिक स्टेट (आइएस) ले ताजमहलमा आक्रमण गर्ने योजना बनाएको समाचार प्रकाशमा ल्याएका थिए । भारतीय सुरक्षा स्रोतका अनुसार इन्टरनेटमा एउटा लिंक व्यापक शेयर भइरहेको थियो जसमा आइएसले ताजमहलमा हमलाको योजना बनाएको उल्लेख थियो । सुरक्षा निकायले उक्त समाचारको सत्यता बारेमा अनुसन्धान सुरु गरेको र ताजमहल आसपास सुरक्षा कडा तुल्याइएको जनाएको छ । उल्लेखनीय छ, एउटा वेबसाइटमा प्रकाशित ग्राफिक्समा ताजमहल नजिकै उभिएको सशस्त्र लडाकुलाई देखाइएको थियो । आइएसको समर्थन गर्दै आएको एक मिडिया ग्रुपले ताजमहललाई आइएसको सम्भावित हमलाको निशानाका रुपमा देखाइएको बताइन्छ । केही दिनअघि भारतको उत्तर प्रदेशमा सुरक्षाकर्मीले गरेको कारवाहीमा आइएससँग आवद्ध संदिग्ध मारिएको घटनाले पनि भारतमा आइएसको गतिविधि विस्तार हुँदै गएको अनुमान गर्न सकिन्छ । सो कारवाहीमा भारतीय सुरक्षाकर्मीले ६ संदिग्धलाई नियन्त्रणमा समेत लिएका छन् । एजेन्सी

वासिङटन, चैत ५ । ह्वाइटहाउसले बेलायती गुप्तचर निकायले अमेरिकी राष्ट्रपति निर्वाचनका समयमा डोनाल्ड ट्रम्पमाथि जासुसी गरेको आरोप लगाएकोमा माफी मागेको छ । निर्वाचनको समयमा बेलायती गुप्तचर निकायलाई ओबामालाई सघाउन ट्रम्पको पनि रेकर्ड गरेको आरोप लागेको थियो । अमेरिकी टेलिभिजन च्यानल फक्स न्यूजले आफ्नो रिपोर्टमा ह्वाइट हाउसका प्रेस सचिव स्पाइसरले बेलायती गुप्तचर निकायमाथि लगाएको आरोप प्रशारण गरेको थियो । ह्वाइटहाउसका अधिकारीले स्पाइसरको उक्त अभिव्यक्ति व्यक्तिगत भएको स्पष्ट पारेका छन् । यो खबर आजको कान्तिपुरमा छ ।

चैत ४ । यमनमा आप्रबासीहरु चढेको पानीजहाजमा अज्ञात समूहले हेलिकोप्टरबाट गोली हानी ३१ जनाको हत्या गरेको छ । यमनबाट सुडानतर्फ जाँदै गरेको सो पानीजहाजमा अधिकांश सोमालियाका आप्रबासीहरु रहेको जनाइएको छ । यमनको बाब अल मानदेब क्षेत्रमा पुगेको पानीजहाजमा हेलिकोप्टरबाट गोली प्रहार भएको थियो । घटनाको जिम्मेवारी अझैसम्म कसैले लिएको छैन ।

चैत ३ । अमेरिकाका पूर्वराष्ट्रपति बाराक ओबामा एक महिनाका लागि बुधबार फ्रान्स पुगेको स्थानीय टेलिभिजनहरुले जनाएका छन् । स्थानीय तहीती नुइ टेलिभिजन च्यानलका अनुसार उनले फ्रान्सको पोलिनेसियामा रहेको आरामदायक रिसोर्टमा समय बिताउने तयारी गरेका छन् । उनी आफ्नो परिवारबिना नै पर्यटकिय टापु तहीतीमा उत्रिएका थिए । ओबामा वातावरणमैत्री ब्राण्डो रिसोर्टमा बसेका छन् । सो रिसोर्टको प्रति रातको शुल्क १२ हजार ३ सय युरो रहेको छ । यस यात्राका क्रममा ओबामाले कुनै राजनीतिक भेटघाट नगर्ने बताएका छन् । उनले किन यस्तो एक महिने योजना बनाए भन्ने अझै स्पष्ट हुनसकेको छैन । साथै उनको परिवारका सदस्यहरु पछि उनीसँगै आउने छन् की छैनन् भन्ने पनि यकिन हुन सकेको छैन् । फ्रान्सको पोलिनेसिया दक्षिणी प्रशान्त महासागरमा पर्ने १ सय भन्दा बढी टापु भएको क्षेत्र हो । जहाँ सन् १९९० को दशकमा फ्रान्सले आणविक परिक्षण गरेको थियो ।  

न्होम पेन, चैत ३ । कम्बोडियाका उपप्रधानमन्त्री सोक एनको ६६ बर्षको उमेरमा बुधबार निधन भएको छ । संसदका सदस्य, उपप्रधानमन्त्री सममेच भिवोल पान्हा सोक एनको सन् २०१७ को मार्च १५ का दिन १८.३२ बजे वेईजिङ अस्पतालमा ६६ बर्षको उमेरमा निधन भएको छ,” सरकारद्वारा जारी शोक वक्तव्यमा लेखिएको छ । सोक कम्बोडियोको अत्यन्त चर्चित राजनीतिक नेता हुनुहुन्थ्यो । अहिलेको सत्तारुढ दल पिपुल्स पार्टीमा उहाँ केन्द्रीय कार्यसमिति सदस्य हुनुहुन्थ्यो । सन् १९९८ देखि उहाँ कम्बोडियोको मन्त्री हुनु भएको थियो भने सन् २००४ मा पदोन्नति भई उहाँ उपप्रधानमन्त्री बन्नु भएको थियो । रासस

इजरायल, चैत २ । इजरायलको तेल अभिभको दक्षिण होलोनस्थित अस्पतालकी एक नर्सलाई जिउँदै जलाएर हत्या गरिएको छ । ५६ वर्षे तोवा करारो नाम गरेकी नर्सको हत्या गर्ने त्यही अस्पतालका बिरामी रहेको बताइएको छ । ७० वर्षीय ती बिरामीले नर्सको शरीरमा ज्वलनशील पदार्थ फ्याकेर आगो लगाएका थिए । त्यसअघि ती दुईबीच विवाद भएको बताइएको छ । घटनापछि कार चढेर भागेका हत्यारालाई प्रहरीले गिरफ्तार गरेको छ । घटनाको विरोधमा इजरायली स्वास्थ्यकर्मीले बुधबारबाट दुई दिने हड्ताल गर्ने जनाएका छन् ।

वासिंटन, चैत २ । अमेरिकी राष्ट्रपति डोनाल्ड ट्रम्पले बुझाएको कर सम्बन्धी विवरण सार्वजनिक भएको छ । विवरण चुहाएको भन्दै राष्ट्रपति कार्यालय ह्वाइट हाउस भने रुष्ट बनेको छ । कर सम्बन्धी विवरण प्रकाशित गर्नु गैर कानुनी भएको भन्दै ह्वाइट हाउसले आलोचना गरेको छ । अमेरिकी टेलिभिजन नेटवर्क एमएसएनबीसीले ट्रम्पले सन् २००५ मा बुझाएको कर सम्बन्धी विवरण सार्वजनिक गरेको हो । राष्ट्रपति ट्रम्पले सन् २००५ मा १५ करोड डलर आम्दानी गरेकोमा तीन करोड ८० लाख डलरमात्रै कर बुझाएको खुलेको छ । कर विवरण सार्वजनिक गर्न दबाब पर्दै आए पनि राष्ट्रपति ट्रम्पले विवरण सार्वजनिक गरेका थिएनन् । तर एमएसएनबीसीले ट्रम्पले सन् २००५ मा बुझाएको करको विवरण सार्वजनिक गरेको हो । दुई पेज लामो कर सम्बन्धी विवरण प्रकाशित गरे पनि यो पूर्ण भने नभएको बताइएको छ । राष्ट्रपति कार्यालयले घटनाको विरोध गर्दै सार्वजनिक भएकोभन्दा अरु शीर्षकमा पनि कर बुझाएको दाबी गरेको छ ।

लखनउ, चैत २ । भारतको उत्तर प्रदेशस्थित इलाहावादमा भारतीय वायुसेनाको एक हेलिकोप्टर दुर्घटना भएको छ । बुधबार भएको दुर्घटनामा हेलिकोप्टरका पाइलट भने सुरक्षित रहेको जनाइएको छ । अवतरणको क्रममा रहेको हेलिकोप्टर दुर्घटना भएको हो । दुर्घटनाको कारणका बारे खुलाइएको छैन । उक्त हेलिकोप्टर नियमित ट्रेनिङका क्रममा उडान भरिरहेको अवस्थामा दुर्घटना भएको भारतीय संचारमाध्यमले जनाएका छन् । केही अघि राजस्थानको बाडमेरमा पनि भारतीय वायुसेनाको लडाकु विमान दुर्घटना भएको थियो । त्यस्तै उत्तराखण्डको चमोलीमा भारतीय वायुसेनाकै एक हेलिकोप्टर दुर्घटना भएको थियो । वायुसेनाको हेलिकोप्टर तथा विमान लगातारजसो दुर्घटना हुन थालेपछि भारतीय रक्षा अधिकारीहरुका लागि चिन्ताको विषय बढेको विज्ञहरुको भनाइ छ ।

नयाँदिल्ली, चैत २ । प्रति आतंकवाद सम्बन्धी तेस्रो अन्तर्राष्ट्रिय सम्मेलनमा भाग लिन नयाँ दिल्ली आएका उपप्रधान तथा गृहमन्त्री विमलेन्द्र निधि र भारतका पूर्वप्रधानमन्त्री मनमोहन सिंहबीच बुधबार बिहान भेटबार्ता भएको छ । सिंहको निवासमा भएको भेटमा पूर्ब प्रधानमन्त्री सिंहले दुई देशीचको सम्बन्ध, नेपालको शान्ति प्रकृया र विकासका बारेमा कुराकानी भएको थियो । भेटमा गृहमन्त्री निधिले नेपालको पछिल्लो राजनीतिक अवस्थाबारे जानकारी गराएको थियो । त्यस अवसरमा पूर्वप्रधानमन्त्री सिंहले राजनीतिक स्थिरतापछि विकास निर्माणको कामले गति लिने उल्लेख गर्दै एउटा असल छिमेकीका नाताले भारत सधैं नेपालमा राजनीतिक स्थिरता भएको हेर्न चाहेको बताएको थियो । उहाँले दुई देशबीचको पुरानो सम्बन्धलाई उच्च प्राथमिकतामा राख्दै भोलिका दिनमा सम्बन्धलाई अझ प्रगाढ बनाउनुपर्ने बताए । भेटमा उपप्रधानमन्त्री निधिका साथ भारतका लागि नेपाली राजदूत दीपकुमार उपाध्याय पनि सहभागी रहेका छन् । आजै गृहमन्त्री निधिले भारतीय कम्यूनिष्ट पार्टीका नेता डीपी त्रिपाठीसंग पनि भेटघाट गरेको छ । भेटमा दुई देशबीचको सम्बन्ध र नेपालको पछिल्लो राजनीतिक घटनाक्रमबारे छलफल भएको थियो । लामो सयमदेखि अस्वस्थ रहनुभ एक निधिले त्रिपाठीको स्वास्थ्य लाभको कामना गर्नु भएको थियो ।

काठमाडौं, फागुन ३० । इथियोपियाको राजधानी अदिस अबाबा नजिकै फोहोरको थुप्रोमा पहिरो जाँदा कम्तिमा ४८ जनाको मृत्यु भएको छ । सरकारले फोहोर फाल्ने ठाउँको रुपमा छुट्याएको अर्थात् ल्याण्डफिल्ड साइटमा सो पहिरो जाँदा उनीहरुको ज्यान गएको बिबिसीले जनाएको छ । पहिरो गएका बेला त्यहाँ एक सय ५० जनाभन्दा बढी मानिस रहेकाले मृतकको संख्या अझै बढ्न सक्ने अनुमान गरिएको छ । त्यहाँ ५० वर्षदेखि फोहोर थुपारिँदै आएको थियो । फोहोरको पहाडमा पहिरो जाँदा त्यहाँ अस्थायी घर बनाएर बसेका मजदुरहरु हराइरहेका हुन् । ज्यान गुमाउनेमा धेरै बालबालिका रहेको सरकारी अधिकारीलाई उद्धृत गर्दै समाचार संस्था एपीले जनाएको छ । पहिलो गएको ल्याण्डफिल्ड साइट नजिकै सरकारले फोहोरबाट उर्जा निकाल्ने केन्द्र बनाइरहेको छ ।

लागोस (नाइजेरिया), फागुन ३०। नाइजेरियाली सरकारी सुरक्षाकर्मीले मुलुकको उत्तरपूर्वी राज्य ब्रोनोमा नाइजेरियाली बोको हराम समूहद्वारा बन्धक बनाइ राखेका २११ जनालाई उद्धार गरेको सैनिक अधिकारीले आइतबार बताएका छन् । ‘अपरेसन लाफिमा डोल’ नाम दिइएको ‘२२ ब्रिगेड ग्यारिसन’द्वारा किङ्गाल मुर्रे र माजा गाउँमा सञ्चालित सुरक्षा कारबाहीपछि बोकोहराम समूहद्वारा विभिन्न समयमा बन्धक बनाएका उनीहरुलाई उद्धार गर्न सेना सफल भएको सेनाका प्रवक्ता सनी उस्मानद्वारा जारी सिन्ह्वालाई प्राप्त विज्ञप्तिमा जनाइएको छ । नाइजेरियामा सन् २००९ देखि बोकोहरामद्वारा सुरु गरेको द्वन्द्वमा परी कम्तिमा २० हजार नाइजेरियालीको मृत्यु भएको छ भने २३ लाख नाइजेरियाली आन्तरिक तथा बाह्य रुपमा विस्थापित बनेका छन् । नाइजेरियाली विद्रोही समूहको सुरक्षित आश्रयस्थल साम्बिसा जङ्गललाई सन् २०१६ को डिसेम्बरमा सेनाद्वारा चलाएको सुरक्षा कारबाहीमा नियन्त्रणमा लिन सफल भएपछि बोको हराम विरुद्धको कारबाहीले एकपछि अर्को गर्दै उल्लेख्य सफलता पाएको छ । पछिल्लो समय नाइजेरियाली सरकारी सुरक्षाफौजले नाइजर र चाड क्षेत्रको वन क्षेत्रमा आफ्नो कारबाहीलाई केन्द्रित गर्दै हवाई तथा स्थल कारबाहीमार्फत बोकोहराम समूहविरुद्ध कारबाही अघि बढाएको छ । रासस

इराक, फागनु २९ । इराकको मोसुल सहरस्थित एक कारागार नजिक ५ सय भन्दा बढी शव गाडिएको सामुहिक चिहान फेला परेको छ । बिबिसीका अनुसार, ईस्लामिक अतिवादी समुह आइएसले सर्वसाधारणको सामूहिक हत्या गरि गाडेको सेनाले जनाएको छ । ६ सय भन्दा बढी शिया मुसलमान बन्दीको हत्या गरिएको शिया समर्थित समुहले दावी गरेको छन् । सन् २०१४ मा कारागार नियन्त्रणमा लिएको आईएसबाट सरकारी सेनाले गत साता पुन नियन्त्रण कायम गरेको थियो । सन् २०१४ मा भएको भनिएको सो घटनाको अनुसन्धान भैरहेको बीबीसीले जनाएको छ । शिया, सुन्नि र ईसाई धर्मावलम्वीलाई छुट्टाएर विभिन्न स्थानमा लगिएको घटनामा बाँचेकाहरुले बयान दिएको अन्तर्राष्ट्रिय सञ्चारमाध्यमले जनाएका छन् । मोशुलमा पुनस् नियन्त्रण कायम गर्ने अभियानका क्रममा कारागार पनि नियन्त्रणमा लिइएको हो ।

फागुन २८ । विश्वले सन् १९४५ यता कै सबैभन्दा ठूलो मानवीय संकट सामना गरिरहेको तथ्य सार्वजनिक भएको छ । संयुक्त राष्ट्र संघका मानवीय सहायता प्रमुख स्टेफेन ओब्रिनले मानवीय संकटको भयावह विनाश रोक्न अपील गरेका छन् । उनले राष्ट्रसंघको सुरक्षा परिषद्मा यमन, सोमालिया, दक्षिण सुडान र नाइजेरियाका दुई करोडभन्दा बढी मानिस अकाल र भोकमरीको मारमा परेको जानकारी दिए । यो विपत्तिबाट पार पाउन आगामी जुलाईसम्म ४४ करोड डलर आवश्यक पर्ने उनको भनाइ छ । युनिसेफले खाद्य संकटकै कारण यस वर्ष १२ लाख बालबालिकाको मृत्यु हने चेतावनी दिइसकेको छ । केही समयअघि सोमालियामा भोकमरीको घोषणा गरिएको थियो । छ वर्षअघि मात्र त्यहाँ भोकमरीका कारण करिब २ लाख ६० हजार मानिसको मृत्यु भएको थियो । लामो समयदेखिको युद्धका कारण मध्यपूर्व र अफ्रिकाका विभिन्न मुलुकले चरम खाद्य संकट व्यहोरिरहेका छन् ।

काठमाडौं – नेपालमा बढ्दै गएको द्वन्द्वका कारण नेपाल भ्रमण गर्न चाहने चिनीया नागरिकलाई सतर्कता अपनाउन चीन सरकारले आग्रह गरेको खबर आजको नेपाल समाचारपत्रमा छ । नेपाल स्थित चिनीया दूतावासले जारी गरेको बक्तव्यमा नेपालको दक्षिणी क्षेत्रमा द्वन्द्व र हिंसाका घटना दिन प्रतिदिन बढ्दै गएकाले सो क्षेत्रको भ्रमण नगर्न र जानै परेपनि सतर्कता अपनाउन आग्रह गरेको छ । चिनीया विदेश मन्त्रालयले नेपाल भारत सीमा क्षेत्रमा केही दिनदेखि तनाव बढ्दै गएकाले त्यस क्षेत्रमा भ्रमण गर्नुपरे उच्च सुरक्षा सतर्कता अपनाउन समेत आग्रह गरेको छ ।