काठमाडौ, चैत २ । लामो समयको परीक्षणपछि साझा यातायात आफ्नो बसमा ‘स्मार्ट ट्राभल कार्ड’ व्यवस्था गरेको छ । लगनखेलबाट नयाँ बसपार्क जाने १० बसबाट उक्त ‘स्मार्ट ट्राभल कार्ड’को प्रयोग सुरु गरेको हो । बसको ढोकामा स्मार्ट कार्डबाट भुक्तानी लिने मेसिन जडान गरिएको र अब यात्रुहरुसँग उक्त मेसिनले नै भाडा उठाउने साझा यातायातका निमित्त प्रमुख कार्यकारी अधिकृत महेन्द्रराज पाण्डेयले जानकारी दिएका छन् । बसका ढोकामा स्मार्ट कार्डको डिभाइस राखिएको र अब सो रुटमा नियमित यात्रा गर्ने सर्वसधारणले पनि स्मार्टकार्ड किन्न पाउने छन् । सर्वसाधारणका लागि अब स्मार्ट कार्डबाटै भाडा तिर्न सक्ने पाण्डेयले बताए । सुरुवातमा एउटा रुटबाट सुरु गरिएपनि विस्तारै सबै रुटमा चल्ने बसमा यो सेवा सुरुवात गरिने उनले बताए । बस चढ्दा यो कार्ड पछिल्लो ढोकामा जोडिएको डिभाइसमा देखाउनुपर्नेछ भने ओर्लिँदा पनि यसलाई देखाउनुपर्नेछ । यसले आफैं यात्रा गरेको दूरीअनुसार भाडा काट्नेछ । यदि झर्दा कार्ड डिभाइसमा नदेखाए स्वतः २५ रूपैयाँ काटिनेछ ।

काठमाडौँ, चैत २। प्रधानमन्त्री पुष्पकमल दाहाल ‘प्रचण्ड’ले नेपालको शान्तिप्रक्रियामा सहयोग गरेकोमा स्विट्जरल्यान्ड सरकारलाई धन्यवाद दिनुभएको छ । नेपालका लागि स्विट्जरल्यान्डका राजदूत योर्ग ज्योभानी फ्रिडेनसँग आज सिंहदरबारमा भएको शिष्टाचार भेटमा उहाँले नेपालको राजनीतिक रुपान्तरणमा स्विट्जरल्यान्ड सरकारले गरेको सहयोगप्रति खुसी व्यक्त गर्नुभयोे । प्रधानमन्त्री प्रचण्डले स्थानीय तह कार्यान्वयन सुरु भइसकेकाले अब तोकिएकै समयमा स्थानीय निर्वाचन गर्ने गरी सरकार लागिरहेको बताउनुभएको प्रधानमन्त्रीको सचिवालयले जनाएको छ । उहाँले मधेस केन्द्रित दलसँग निरन्तर छलफल भइरहेकाले राजनीतिक अस्थिरता चाँडै अन्त्य हुने विश्वास व्यक्त गर्नुभयो । सो अवसरमा नेपालका लागि स्विट्जरल्यान्डका राजदूत फ्रिडेनले नेपालमा राजनीतिक स्थिरता तथा स्थानीय र प्रदेश तहको निर्वाचनको विषयमा चाँसो राख्नुभयो । उहाँले नेपाल सरकारले विभिन्न समयमा स्विट्जरल्यान्डसँग गरेको सहयोग र समन्वयका लागि पनि खुसी व्यक्त गर्नुभयो । रासस

काठमाडौं, चैत्र २ । मधेसी मोर्चाभित्र स्पष्ट विभाजन देखिएको छ । यसअघि स्थानीय निर्वाचनको बिरोधमा नयाँ शक्तिसँग संयुक्त विज्ञप्ती जारी गरेको संघीय समाजवादी फोरमले सरकारलाई दिएको समर्थन फिर्ता लिएपछि मोर्चाभित्र फूट देखिएको हो । मोर्चाका अन्य घटकले भने समर्थन फिर्ताबारे कुनै औपचारिक निर्णय गरेका छैनन् । संघीय समाजवादी फोरम र नयाँ शक्ति नेपाललाई भारतीय जासुसी संस्था र ले सरकार ढाल्न प्रयोग गरेको खुलासासहितका समाचार यसअघि प्रकाशित भएका थिए । मोर्चाले यसअघि सात दिने अल्टिमेटम दिएको थियो । मंगलबार भने फोरमले सरकारलाई समर्थन नदिने तर समर्थन फिर्ताको पत्र पनि नपठाउने जनाएको थियो । मोर्चाका अन्य घटकसँग असहमति राख्दै फोरमले भने सरकारबाट समर्थन फिर्ता लिएको पत्र सभामुख ओनसरी घर्ती मगरलाई बुझाएको छ । फोरम संसदीय दलका नेता अशोक राइले हस्ताक्षर गरेको पत्र दलका प्रमुख सचेतक शिवजी यादवले बुधबार सभामुखलाई बुझाएका हुन । १५ जना सांसद रहेको संघीय समाजवादी फोरमले संविधान संशोधन नगरी चुनाव गर्न नहुने अडान राखेको छ । अन्य मोर्चा घटकले भने सीमांकनलाई थाती राखेर संविधान संशोधन प्रक्रिया अघि बढाउने प्रधानमन्त्री प्रचण्डको प्रस्ताव सकारात्मक रहेको बताएका थिए । मोर्चाले यी विषयमा थप छलफल गरी औपचारिक निर्णय गर्न आज बैठक डाकेको छ ।

काठमाडौं, चैत्र २ । ज्यो.दीपक सुवेदीले संविधान कार्यान्वयन नहुने बताएका छन् । बेलाबेलामा विभिन्न राष्ट्रियस्तरका भविष्यवाणी गरेर चर्चामा आउने उनले नयाँ वर्ष २०७४ को पूर्वसन्ध्यामा फेरि अर्को भविष्यवाणी गरी आम सर्वसाधारणको ध्यानाकर्षण गरेका छन् । नयाँ वर्ष २०७४ को सन्दर्भमा उनले नेशनल भिजन मिडिया ग्रुपको प्रस्तुति साझा भिजन तथा इण्डिजिनियस टिभीको लागि दिएको अन्तर्वार्तामा सो कुरा व्यक्त गरेका छन् । अन्तर्वार्तामा बडो गम्भिरताका साथमा देशको बारेमा उनले अझै केही कठिनाई आइपर्न सक्ने कुराको संकेत गरेका छन् । नेपालको नयाँ संविधान निकै नराम्रो समयमा घोषणा भएको हुनाले सो संविधान कार्यान्वयन हुन नसक्ने कुरा बताएका छन् र सो संविधानलाई आधार मानेर गरिने कार्यहरू प्रभावित हुने उनको भनाई छ । स्थानीय निकायको निर्वाचन, राज्य पुनःसंरचना आदिको प्रकृया चलिरहेको यस अवस्थामा उनको भविष्यवाणीले मान्छेहरुको ध्यान खिच्नु स्वभाविक पनि हो । अन्तर्वातामा स्थानीय निर्वाचनलगायत भविष्यको बारेमा सोधिएको प्रश्नको उत्तरमा उनले घुमाउरो पाराल निर्वाचन गर्न अथवा संविधानको कार्यान्वयन हुन असम्भव हुने ठोकुवा गरेका छन् । राजसंस्था पुनः फर्कने भन्ने हल्लाको बारेमा सोधिएको प्रश्नको उत्तरमा समेत उनको तर्क स्वभाविक जस्तो रहेको छ । संविधानको ग्रह राम्रो छैन, भइसकेका कामहरू उल्टिन सक्ने देखिन्छ भने त्यस्तै अन्य जटिलताहरू पनि आइपर्नसक्ने छ । तसर्थ हामी नेपाली संयमित र धैर्य रहनुपर्छ । पशुपतिनाथले विगतमा जस्तै शेभलेण्डिङ्ग गराउन प्रार्थना गरौं । सबैले आआफ्नो धर्मको, कर्तव्यको पालना गर्नुपर्छ । सकारात्मक भावनाले रहनुपर्छ उनको भनाई छ । सुवेदीको धेरै भविष्यवाणीहरू पुग्ने गरेका छन् । उनले प्राय यस्ता भविष्यवाणीहरू सञ्चारमाध्यमबाटै गर्दै आएका छन् । २०७३ को पहिलो दिन सगरमाथा टेलिभिजनको अन्तर्वार्तामा प्रचण्डलाई पार्टीको नाम एकिकृत नेकपा माओवादी नफापेको सुवेदीले बताएका थिए । लगत्तै एक महिना पछि प्रचण्डले पार्टीको नाम फेरे र लगत्तै उनी प्रधानमन्त्री पनि भए । २०६२÷६३ को आन्दोलन पछि भएको शान्तिसम्झौता नै गलत समयमा भएको उनको भनाई छ । त्यही कारणले पहिलो संविधानसभाले संविधान नदिई अवसान हुनपरेको सुवेदी बताउँछन् । ज्यो. सुवेदीले राजा वीरेन्द्रको मृत्युको बारेमा दिव्यज्ञान पत्रिकामा २०५८ सालको वार्षिक भविष्यफल लेख्नेक्रममा लेखेका थिए । त्यो समयमा राजाको मृत्युको कुरा गर्नु ठूलो जोखिमको कुरा हुन्थ्यो । ज्यो. सुवेदीले सानै उमेरमा गरेको त्यो भविष्यवाणी मिलेपछि राम्रो प्रख्याति पनि कमाएका हुन् । त्यसो त संविधान घोषणा भएपछि पनि उनले गरेका भविष्यवाणीहरू सञ्चार क्षेत्रलाई उपलब्ध गराउने गरेका छन् । यहाँले ज्यो. दीपक सुवेदीको अन्तर्वार्ताको भिडियो जस्ताको तस्तै हेर्न सक्नु हुनेछ । युट्युब लिंक छ –

ललितपुर, २ चैत्र । त्रिभुवन विश्वविद्यालयमा हालै भएको स्ववियु निर्वाचनको परिणामले माओवादी आन्दोलनलाई नयाँ उचाईमा पुर्याएको माओवादी केन्द्र निकट अखिल क्रान्तिकारीका नेताहरुले बताएका छन् । आज लुभुस्थित कान्तिपुर इन्टरनेसनल कलेजमा आयोजित स्वागत कार्यक्रममा वोल्दै अखिल क्रान्तिकारीका केन्द्रीय उपाध्यक्ष सुरेन्द्र बस्नेतले भने– ‘यसपटकको स्ववियु निर्वाचनले माओवादी पुनर्जागरणको नयाँ अध्यायको थालनी गरेको छ।’   कार्यक्रममा अखिल क्रान्तिकारीका सचिव एवं ३ नं.प्रदेशका संयोजक विजय गौतमले क्रान्तिकारी विद्यार्थी आन्दोलन नयाँ र उज्यालो नेपालको अभियन्ता भएको चर्चा गरे । बस्नेतले देशका हजारौं विद्यार्थीवाट छानिएका अब्वल विद्यार्थी पढ्ने इन्जिनियरिङ अध्ययन संस्थानको केन्द्रीय क्याम्पस पुल्चोक, थापाथली, सानोठिमी लगायतका प्रमुख क्याम्पसमा जित्न सफल भएको चर्चा गर्दै क्रान्तिकारीको जीत माउ पार्टीका लागि प्रेरणादायी रहेको दावी गरे। कार्यक्रममा अखिल क्रान्तिकारीका सचिव एवं ३ नं.प्रदेशका संयोजक विजय गौतमले क्रान्तिकारी विद्यार्थी आन्दोलन नयाँ र उज्यालो नेपालको अभियन्ता भएको चर्चा गरे । त्यस्तै पुवाञ्चल विश्वविद्यालयका संयोजक गोपाल कार्कीले समग्र पुर्वाञ्चल विश्वविद्यालयमा अखिल क्रान्तिकारी पहिलो संगठन रहेको दावी गरे। सोही कार्यक्रमबाट आगामी कार्याकालका लागि सजु शिवाकोटीको नेतृत्वमा ४५ सदस्यीय नयाँ इकाई समिति निर्वाचित भएको कलेज इन्चार्ज उज्वल अधिकारीले बताए ।

काठमाडौं, चैत्र २ । प्रधानमन्त्री पुष्पकमल दाहाल ‘प्रचण्ड’ ले सीमांकन बाहेकका संविधान संशोधन गरी चुनावमा जान संयुक्त लोकतान्त्रिक मधेसी मोर्चालाई आग्रह गरेको छ । बुधबार बिहान मोर्चा र प्रधानमन्त्रीबीच भएको बैठकमा प्रधानमन्त्रीले सीमांकनबाहेकका बुँदा पारित गर्ने र त्यसलाई मानेर निर्वाचनमा जान मोर्चालाई आग्रह गरेका हुन् । बैठकपछि तराई मधेस लोकतान्त्रिक पार्टीका अध्यक्ष महन्थ ठाकुरले सीमांकनबाहेकका विषयमा संशोधन गर्ने भन्दै प्रधानमन्त्रीले निर्वाचनमा सहभागी हुन मार्चालाई आग्रह गरेको जानकारी दिए । उनले मोर्चाको तर्फबाट बैठक बसेर मात्रै औपचारिक जवाफ दिने प्रधानमन्त्री दाहाल बताएका थिए । सरकारले आगामी वैशाख ३१ गतेका लागि स्थानीय तहको निर्वाचन घोषणा गरिसकेको छ । प्रधानमन्त्री दाहालले मोर्चाका नेताहरुलाई सरकारलाई दिएको समर्थन फिर्ता नलिनसमेत आग्रह गरेका थिए । सरकारलाई दिएको समर्थन फिर्ता गर्ने–नगर्ने, आगामी आन्दोलनका कार्यक्रम कसरी अगाडि बढाउने र प्रधानमन्त्री दाहालसँग आज बिहान शीर्षनेताहरुले गरेको छलफलका विषयमा मोर्चाको बैठक बस्दैछ । मोर्चाको बैठक अहिले १ बजेका लागि तमलोपाको कार्यालय बिजुलीबजारमा बोलाइएको छ । सप्तरीमा एमालेको मेची महाकाली अभियानमा अवरोध पुर्‍याउन खोज्ने मोर्चा कार्यकर्ता र प्रहरीबीच झडप हुँदा ५ जना प्रदर्शनकारीको ज्यान गएको थियो । सरकारले दमनकारी नीति लिएको र आफ्ना माग पूरा नगरेको भन्दै सरकारलाई दिएको समर्थन फिर्ता लिने मोर्चाको सात दिनको अल्टिमेटम थियो । संविधान संशोधन प्रस्ताव पारित लगायतका आफ्ना माग पूरा नभए समर्थन फिर्ता लिने बताउँदै मोर्चा दिएको अल्टिमेटम मंगलबार सकिएको छ ।

काठमाडौं, चैत २ । स्थानीय तह कार्यान्वयनमा आएसँगै सर्वसाधारणमा उत्साह छ । तह कार्यान्वयनसँगै स्थानीय तहको निर्वाचन तोकिएको मितिमै हुनेमा आशावादी देखिए । जिल्ला समन्वय समितिले २ नगर र १० गाउँपालिकाका लागि सोमबार कार्यकारी अधिकृत नियुक्ति गरेसँगै मंगलबारदेखि सबै कार्यालय सञ्चालनमा आएका छन् । सबै गाउँ र नगरपालिकाको बोर्ड फेरिएको छ । सबै नगर र गाउँपालिकामा कर्मचारी पुगेका छन् । ‘आज कार्यालय उद्घाटन गरियो,’ सबैभन्दा दुर्गम मानिएको कालीगण्डकी गाउँपालिका प्रमुख शिवहरि मरासिनीले भने, ‘अब कार्यालयको थप व्यवस्थापनका काम क्रमशः गर्छौं ।’ भुर्तुङ, खड्गकोट, फोक्सिङ, पूर्तिघाट, जयखानी, अर्बेनी र हर्मिचौरका सर्वसाधारणले सेवा लिने गाउँपालिकाको केन्द्र रहने पूर्तिघाट पूर्वाधारमा भने कमजोर छ । २ नगर र १० गाउँपालिकामध्ये मुसिकोट नगरपालिका सबैभन्दा ठूलो बनेको छ । ९ वडा रहेको मुसिकोटमा ३२ हजार ८ सय २ जनसंख्या छ । त्यस्तै रेसुंगा नगरपालिकाको वार्ड नं.१३ सबै भन्दा कम ९ सय १६ जनाको वडा बनेको छ । रेसुङगाकै वडा नं.५ मा पनि १ हजार ६ सय ६० मात्र जनसंख्या छ । जिल्लामा केन्द्र माग गर्दै झन्डै एक साता आन्दोलन गरेका तुराङ, आँपचौर र रूपाकोटका सर्वसाधारणलाई आयोगले तुराङ र रूपाकोटलाई चन्द्रकोट गाउँपालिका र आँपचौरलाई मुसिकोट नगरपालिकामा गाभेको छ । भौगोलिक बनावट मिलेको भए पनि पूर्वाधार र विकासमा अगाडि रहेको तुराङको मजुवामा केन्द्र हुनुपर्ने स्थानीयको माग थियो । जिल्ला समन्वय समिति प्रमुख तथा स्थानीय विकास अधिकारी कल्पना श्रेष्ठले जिल्लाका सबै नगर र गाउँपालिकामा मंगलबारदेखि नै कार्यालय स्थापना भइसकेको बताइन् ।

काठमाडौँ, चैत २ । मुलुकमा चर्को रुपमा रहेको विद्युत्भार कटौतीलाई अन्त्य गरेर २४ सै घन्टा विद्युत् उपलब्ध गराउन नेतृत्वदायी भूमिका खेलेको भन्दै नेपाल औषधिगत बिक्री प्रबन्धक सङ्गठनले ऊर्जामन्त्री जनार्दन शर्मालाई सम्मान गरेको छ । ऊर्जा मन्त्रालयमा मंगलबार आयोजित एक कार्यक्रममा उहाँलाई आगामी दिनमासमेत देश र जनतालाई केन्द्रबिन्दुमा राखेर काम गर्न र मुलुकको ऊर्जा क्षेत्रमा विशेष योगदान दिन आग्रह गर्दै तामपत्रबाट सम्मान गरेको हो । सङ्गठनका काठमाडौँ अध्यक्ष दीपेन्द्र लम्सालले मुलुकमा केही पनि हुँदैन भन्ने चरम निराशाका बीच गरे केही त हुँदोरहेछ भन्ने सन्देश दिन सफल भएको र त्यसले समाजमा सकारात्मक प्रभाव पारेकाले सङ्गठनले ऊर्जा मन्त्रीलाई सम्मान गरेको बताउनुभयो । सो अवसरमा ऊर्जामन्त्री शर्माले विद्युत्भार कटौतीको विषय सामान्य विषय भएको बताउँदै इमान्दार प्रयास गर्ने हो भने मुलुकलाई केही दिन सकिन्छ र केही हुन्छ भन्ने सन्देश त्यसले दिएको छ भन्नुभयो । जलविद्युत् क्षेत्रको विकासका लागि सबैको सार्थक र सकारात्मक प्रयासको जरुरी छ, उहाँले भन्नुभयो – “सरकार केही ठूला र मझौला आयोजना अगाडि बढाउने गृहकार्यमा जुटेको र त्यसको सकारात्मक परिणाम केही दिनभित्रै देखिने छ ।” मन्त्री शर्माले मुलुक र जनताको साथ र सहयोग पाएको खण्डमा केही वर्षभित्रै विद्युत् उत्पादनमा चामत्कारिक परिवर्तन ल्याउने विश्वास व्यक्त गर्नुभयो । यस्तै सङ्गठनले आजै नेपाल विद्युत् प्राधिकरणका प्रबन्ध निर्देशक कुलमान घिसिङलाई पनि सम्मान गरेको छ । विद्युत्भार कटौती कम गर्न उल्लेख्य योगदान र सार्थक पहल गरेको भन्दै उहाँलाई प्राधिकरणकै कार्यकक्षमा सम्मान गरिएको सङ्गठनले जनाएको छ । रासस

काठमाडौं, फागुन ३० । प्रधानमन्त्री पुष्पकमल दाहाल ‘प्रचण्ड’ आगामी चैत १० गते चीन भ्रमणका लागि जाने भएका छन् । भ्रमणका क्रममा चीनका राष्ट्रपति सी जिनपिङसँग भेट गरी नेपालको रेलमार्ग तथा पारवहनलगायतका महत्वपूर्ण विषयमा सम्झौता हुने बताइएको छ । त्यस्तै भ्रमणकै क्रममा देशको दीर्घकालिन हितका लागि पनि कुरा हुने बताइएको छ । नेपालस्थित चिनियाँ दूताबासले प्रधानमन्त्री प्रचण्डलाई भेटेर चीन भ्रमणको मिति टुगो लगाएको हाे । भ्रमणको मिति मार्च २३ र २४ का लागि तय भएको परराष्ट्र मन्त्रालयले जनाएको छ । प्रचण्ड दोस्रोपटक प्रधानमन्त्री बनेपछि उनको यो पहिलो चीन भ्रमण हो ।

काठमाडौ, फागुन ३० । प्रधानमन्त्री पुष्पकमल दाहाल ‘प्रचण्ड’ले प्रत्यक्ष निर्वाचित कार्यकारी राष्ट्रपतिको मुद्धा अगाडि बढाउने बताएका छन् । आज प्रधानमन्त्री निवास बालुवाटारमा नयाँ शक्ति पार्टीको ज्ञापनपत्र बुझ्दै प्रधानमन्त्री प्रचण्डले विगत लामो समयदेखि आफूले प्रत्यक्ष निर्वाचित कार्यकारी राष्ट्रपति र पूर्ण समावेशिताको पक्षमा अडान राख्दै आएपनि संविधानसभामा दुई तिहाई पुग्न नसकेका कारण फरक मत दर्ज गरेर यसलाई जनताका बीचमा राखेको प्रष्ट पार्दै आगामी दिनमा पनि यो मुद्धालाई अगाडि बढाउने बताएका छन् । प्रधानमन्त्रीले प्रत्यक्ष निर्वाचित कार्यकारी राष्ट्रपतिका पक्षमा रहेका सबैलाई सहकार्य गरेर अघि बढ्न आग्रह गर्दै आगामी निर्वाचनमा यो मुद्धालाई जनताबीच लानुपर्ने कुरामा जोड दिए । प्रधानमन्त्रीले अहिले सरकार मधेश, आदिवासी जनजाति, थारु लगायतका मुद्धा सम्बोधन हुने गरी संबिधान संशोधन गरेर चुनाव सम्पन्न गराउन लागिपरेको बताउँदै सबैलाई चुनावमा सहभागी हुन आग्रह गरेका छन् । नयाँ शक्ति पार्टीका संयोजक एवम् पूर्वप्रधानमन्त्री डा बाबुराम भट्टराईको नेतृत्वमा गएको प्रतिनिधिमण्डलले प्रत्यक्ष निर्वाचित कार्यकारी प्रमुखको व्यवस्था गर्नुपर्ने, समानुपातिक तथा समावेशी आधारमा निर्वाचन गर्नुपर्नेलगायत विषयमा माग नेपालको १० लाख जनताको हस्ताक्षरसहितको उक्त ज्ञापनपत्र बुझाएको थियो ।

काठमाडौँ, फागुन ३० । उपप्रधान एवम् सङ्घीय मामिला तथा स्थानीय विकासमन्त्री कमल थापाले कुनै हालतमा स्थानीय तहको निर्वाचन हुने बताएका छन् । रिपोर्टर्स क्लब नेपालले आज यहाँ आयोजना गरेको साक्षात्कारमा निर्वाचनको काम युद्धस्तरमा भइरहेको बताउँदै निर्वाचन हुने–नहुने भन्नेबारे शङ्का उपशङ्का नगर्न आग्रह गरे । उनले भने– “सरकार निर्वाचनका लागि जुटिरहेको छ निर्वाचन निश्चित रुपमा हुन्छ, सबै दलका नेता तथा कार्यकर्ताहरु निर्वाचनका लागि जुट्नुहोस् ।” उनले निर्धारित समयमा स्थानीय तहको निर्वाचन गर्नका लागि आफू सरकारमा सहभागी भएको बताउँदै सरकारले संसदमा ल्याएको संविधान संशोधन विधेयकलाई यथास्थितिमा सहयोग नगर्ने स्पष्ट पारे । उपप्रधानमन्त्री थापाले संविधान जारी भएपछि पहिलोपटक २० वर्षपछि स्थानीय तहको निर्वाचन हुन लागेको भन्दै यो निर्वाचनमा कुनै पनि दल वञ्चित हुन नहुने बताए । उनले भने– “मधेस केन्द्रित आन्दोलनरत दलहरुलाई पनि निर्वाचनमा सहभागी गराउने वातावरण बनाउनुपर्छ ।” राप्रपाका अध्यक्षसमेत रहनुभएका थापाले लामो समयदेखि काम गरेको राप्रपालाई छाड्नु डा प्रकाशचन्द्र लोहनीको कदम आत्मघाती भएको बताए । उनले भने– “पार्टीभित्र चित्त नबुझेका कुरा छलफल गरेर अगाडि जान सकिन्थ्यो तर पार्टी छोड्नु राम्रो काम होइन ।” डा.लोहनीले पार्टी छाड्दैमा राप्रपालाई कुनै फरक नपर्ने उनको भनाइ छ । निर्वाचनको वातावरण बनाउने जिम्मा राजनीतिक दलको होः डा यादव प्रमुख निर्वाचन आयुक्त डा.अयोधिप्रसाद यादवले निर्वाचनको वातावरण बनाउने जिम्मा राजनीतिक दलको रहेको बताएको छ । आज यहाँ आयोजना गरेको साक्षात्कारमा राजनीतिक सहमतिमा निर्वाचनको वातावरण बनाउने जिम्मा दलको रहेको बताएको हो । निर्वाचनको वातावरण बने तोकिएकै मितिमा निर्वाचन हुने बताउँदै डा यादवले भने, “तोकिएकै मितिमा स्थानीय तहको निर्वाचनका लागि चाहिने सबै ऐन कानुन आयोगलाई प्राप्त भएकाले आयोगले तीव्र गतिमा काम गरिरहेको छ ।” उनले भने, “मतदाता नामावलीलाई अन्तिम चरण पुगेको छ, मतदाता केन्द्र कति ठाउँमा राख्ने, कुन जिल्लामा कति दल छन् त्यो आधारमा मतपत्र छाप्ने काम, कर्मचारी व्यवस्थापनको काम अगाडि बढाएका छौँ ।” प्रमुख आयुक्त डा यादवले स्थानीय तहको कर्मचारी व्यवस्थापनका लागि मुख्यसचिव, सामान्य प्रशासन मन्त्रालयका सचिव, सङ्घीय मामिला तथा स्थानीय विकास मन्त्रालयका सचिवलाई बोलाएर चैत पहिलो हप्तासम्म कर्मचारी खटाउन निर्देशन दिइसकेको जानकारी दिए । उनले निर्वाचनको सुनिश्चितताका लागि राजनीतिक दलभित्र सहमतिको खाँचो रहेको बताउँदै निर्वाचनमा सबै दलको प्रतिनिधित्व होस् भन्ने आयोगले चाहेको बताए । दुई दशकपछि स्थानीय तहको निर्वाचन हुन लागेकाले यसलाई सबैले उत्सवका रुपमा लिनुपर्ने यादवको भनाइ थियो । उनले स्थानीय तहको निर्वाचनमा एक करोड ४० लाखभन्दा बढी मतदाता रहेको उल्लेख गरे ।

काठमाडौं, फागुन ३० । आइसीसी विश्व क्रिकेट लीग च्याम्पियनशीप अन्तर्गत केन्यासँग भइरहेको खेलमा नेपालका बलर मेहबुब आलमले उत्कृष्ट बलिङ गरेका छन् । त्रिवि क्रिकेट मैदान किर्तीपुरमा टस जितेर बलिङ रोजेको नेपालका लागि मेहबुबले ७ ओभर बलिङ गरेर केन्याको दुई विकेट लिएका छन् । उनले पाँच ओभरमा कुनै पनि रन दिएनन् । जम्मा सात ओभरमा उनले जम्मा ११ रन मात्रै दिए । उनको उत्कृष्ट बलिङ मद्यतले केन्या १५ ओभरमा ४० रन बनाएर खेलिरहेको छ ।

इनरुवा, फागुन ३० । सुनसरीमा एक वर्ष अगाडि भारतको सीमा सुरक्षा बल (एसएसबी) को गोली लागी घाइते भएका सुनसरीका चार युवाले अझैसम्म पनि क्षतिपूर्ति पाउन नसकेको गुनासो गरेका छन् । गत वर्षको भारतको अघोषित नाकाबन्दीको समयमा तस्करलाई लखेट्दै आउने क्रममा नेपाली भूमिमा हरिपुर गाविस–९ का चार युवालाई एसएसबीले गोली हानेर घाइते बनाएको थियो । घटनाको वर्ष बित्दा समेत क्षतिपूर्ति र उपचार खर्च पाउन नसकेको गुनासो पीडितले गरेका हुन् । एसएसबीको गोली लागी घाइते भएका हरिपुर गाविस–९ का अशोक यादव, नरेश यादव, मनोज यादव र सरोज यादवलगायतकाले आफ्नो उपचारको खर्च रकम र क्षतिपूर्ति पाउन नसकेको गुनासो गरेका हुन् । गोली लागि घाइते भएका अशोकको त्यसबेला उपचारका लागि रु तीन लाख ६५ हजार, सरोजको रु दुई लाख ५० हजार, नरेशको रु दुई लाख र मनोजको रु ५० हजार खर्च भएको उनीहरुले बताएका छन् । उता सुनसरी क्षेत्रको नेपाल भारत सीमामा भारतीय सीमा सुरक्षा बल एसएसबीले कडाइ गरेको छ । सुनसरीको भाण्टाबारीबाहेकका नाकामा नेपालीलाई भारत प्रवेशमा रोक लगाएको छ । कञ्चनपुरको पुनर्वास नगरपालिकामा नेपाली युवक गोविन्द गौतमको हत्याको सर्वत्र विरोध हुन थालेपछि एसएसबी सुनसरीबाट नेपालीलाई भारत प्रवेशमा रोक लगाएको हो । एसएसबीले ‘माथिको आदेश’ भन्दै दशगजा क्षेत्रमा नेपालीलाई भारत प्रवेशमा रोकेको हो । (रासस)

फलेवास (पर्वत),  फागुन ३०। बाजा गाजा र भोज भतेरसहित तामझामका साथ विवाह गर्न लागेका एक जोडी विवाह मण्डपबाटै पक्राउ परेका छन् उत्तरी पर्वतको माझफाँट गाविस–६ पाखाथरका बेहुला डिलबहादुर परियार र विवाहका लागि सिङ्गारिएकी बेहुलीलाई प्रहरीले पक्राउ गरेको हो । आइतबार इष्टमित्र र आफन्तजनको साथमा माझफाँट–६ स्थित बेहुलाको घरमा नै विवाह गर्ने तयारीसहित मण्डपमा बेहुला बेहुली बसिरहेका बेला डिलबहादुरकी जेठी पत्नी कुमारी परियारले जिल्ला प्रहरी कार्यालय पर्वतमा बहुविवाहको जाहेरी दिएपछि प्रहरीले उनीहरुलाई पक्राउ गरेको हो । विवाह सम्पन्न नहुँदै चौकीबाट पुगेको प्रहरी टोलीले दुलाहा दुलहीसहित केही इष्टमित्रलाई नियन्त्रणमा लिई जिल्ला प्रहरी कार्यालय पर्वतमा ल्याएको थियो । कुमारीले आफू हुँदाहुँदै श्रीमान्ले दोस्रो विवाह गर्न लागेको भन्दै रोक्न प्रहरीमा जाहेरी दिनुभएको थियो । सोही आधारमा प्रहरीले नियन्त्रणमा लिई दुवै पक्षका आफन्तसहित छलफल गराउँदा डिलबहादुर परियारले आफू वैदेशिक रोजगारीको सिलसिलामा मलेसिया रहँदा श्रीमतीले अन्य व्यक्तिसँग अनैतिक सम्बन्ध गाँसेर हिँडेको र आफूले कमाएको पैसासमेत रित्ताएको आरोप लगाएका छन् । डिलबहादुरले श्रीमती कुमारीलाई छिमेकी व्यक्तिसँग दोस्रो विवाह गरेर गएको आरोप समेत लगाएका छन् । यता जेठी श्रीमती कुमारीले भने आफू श्रीमान्को अनुमति बिना कुनै पनि ठाउँमा नगएको र कसैसँग पनि अनैतिक सम्बन्ध नभएको दाबी गरेकी छिन् । डिलबहादुरले आफू विदेशमा रहँदा घरमा वृद्ध आमालाई छाडेर गएको र श्रीमतीले औषधि उपचारमा ख्याल नगरिदिँदा आमाको ज्यान गएको भन्दै कुनै हालतमा कुमारीलाई नस्वीकार्ने बताएका छन् । जिल्ला प्रहरी कार्यालय पर्वतका प्रहरी निरीक्षक लिलाराज न्यौपानेले दुवै पक्षको रोहबरमा छलफल जारी रहेको जानकारी दिनुभएको छ । रासस

कञ्चनपुर,  फागुन २९। भारतीय सीमा सुरक्षा बल (एसएसबी)को गोली लागी निधन भएका कञ्चनपुर पुनर्वास नगरपालिका–८ का गोविन्द गौतमको राष्ट्रिय सम्मानका साथ आज अन्त्येष्टि गरिएको छ । कञ्चनपुरको दोदा नदी किनारमा गौतमको पार्थीव शरीरमा उहाँका ७२ वर्र्षीय पिता खेमलाल गौतमले दागबत्ती दिनुभयो । गौतमको अन्त्येष्टि कार्यक्रममा कैलाली र कञ्चनपुरका हजारौँ नागरिकले स्वतःस्फूर्त सहभागिता जनाएका थिए । यसअघि धनगढीस्थित सेती अञ्चल अस्पतालबाट उनको शवयात्रा निकालिएको थियो । सरकारले सहिद घोषणा गरिसकेको गौतमको सम्मानमा नेपाल प्रहरीले ११ तोपको सलामी दिएको थियो । उहाँको शवयात्रा धनगढी, डोकेबजार, चौराहा, त्रिनगर भन्सार हुँदै दोदा लगिएको थियो । उहाँको शव गृहनगर पुनर्वासमा श्रद्धाञ्जलिका लागि केहिबेर राखिने भनिएपनि समयअभावका कारण सिधै दोदा नदी किनार लगिएको थियो । नेपाल–भारत सीमाभन्दा निकै वर आनन्दबजारमा कल्भर्ट राख्ने विषयमा सुरु भएको विवादले उग्ररुप लिँदा एसएसबीले गत बिहीबार गौतमको गोली हानी हत्या गरेका थिए । रासस(तस्बिर संलग्न छ)