काठमाडौँ, फागुन २७ । व्यवस्थापिका–संसद्को आजको बैठकमा बोल्ने अधिकांश सांसदहरुले भारतीय सीमा सुरक्षा बलले गोली हानेर नेपाली मारेको विषयमा तत्काल भारतले माफी माग्नुपर्ने बताएका छन् । सरकारको ध्यानाकर्षण गराउँदै ती सांसदहरुले सार्वभौम मुलुकको भूमिमा प्रवेश गरेर हस्तक्षेप भएकाले भारत सरकारसँग कुटनीतिक माध्यमबाट संवाद गरी समाधान खोज्न माग गरे ।बिहिबार कञ्चनपुरको पुनर्वास वार्ड नम्बर ८ आनन्द बजारमा एसएसबीले हानेको गोली लागेर नेपाली नागरिक गोविन्द गौतमको मृत्यु भएको थियो । बैठकको विशेष र शून्य समयमा बोल्दै सांसदहरुले नेपाल सरकारले भारत सरकारलाई गम्भीर गल्ती गरेकोमा क्षमा माग्ने वातावरण सिर्जना गर्न माग गरे । नेकपा (माओवादी केन्द्र) का अग्नि सापकोटाले नेपाल सानो मुलुक भए पनि यसको आफ्नै स्वाभिमान भएकाले राष्ट्रिय अस्मिताको रक्षामा सरकार पछि हट्न नहुने र भारतीय पक्षसँग स्पष्ट जवाफ माग्नुपर्ने बताए । उहाँले मृतक गौतमलाई योद्धा घोषणा गर्न पनि माग गरे । नेकपा (एमाले) का युवराज ज्ञवालीले कञ्चनपुर र सप्तरी घटनाबारे सरकारले सदनलाई सत्य तथ्य स्पष्ट पार्न ध्यानाकर्षण गराए । उनले स्थानीय तहको निर्वाचन नगराउन देशमा यस्ता घटना गराइएका त होइनन् भन्ने प्रश्न गरे । सोही पार्टीका केशवप्रसाद बडालले कञ्चनपुर घटनामा भारतीय पक्षले माफी माग्नुपर्ने बताए । राष्ट्रिय प्रजातन्त्र पार्टीका कुन्तीकुमारी शाहीले सिमानामा बस्ने नागरिक हरेक दिन भारतीय सुरक्षाकर्मीबाट प्रताडीत हुनुपरेको विषयमा सरकार मौन बसेको प्रति आपत्ति जनाइन । नेपाली काँग्रेसका तारिणीदत्त चटौत, नेपाल मजदुर किसान पार्टीका प्रेम सुवाल र अनुराधा थापामगर, मधेसी जनाधिकार फोरम (लोकतान्त्रिक) का योगेन्द्र चौधरी, राष्ट्रिय जनमोर्चाका मीना पुन, सांसद्हरु रुक्मिणी चौधरी, श्यामकुमार श्रेष्ठ, गीता राणा, तेजुलाल चौधरीलगायतले कञ्चनपुरमा भारतीय प्रहरीको दादागिरीबारेमा सरकारको ध्यानाकर्षण गराए ।

काठमाडौँ, फागुन २७ । कञ्चनपुरमा भारतीय सीमा सुरक्षा बल(एसएसबी)को गोली लागि एक नेपालीको ज्यान गएको घटनाप्रति भारतीय सरकारले दुख व्यक्त गरेको छ । शुक्रबार भारतीय प्रधानमन्त्री नरेन्द्र मोदीका तर्फबाट भारतीय राष्ट्रिय सुरक्षा सल्लाहकार अजित दोवलले प्रधानमन्त्री पुष्पकमल दाहाल ‘प्रचण्ड’लाई टेलिफोन गरी कञ्चनपुर जिल्लाको पुनर्बासमा घटेको घटनामा नेपाली युवा गोविन्द गौतमको मृत्यु भएको घटनाप्रति दुख व्यक्त गरेका छन् । सल्लाहकार दोवलले शुक्रबार दिउँसो २ बजे प्रधानमन्त्री प्रचण्डलाई टेलिफोन गरी घटनाप्रति दुख व्यक्त गर्दै शोक सन्तप्त परिवार जनताप्रति समवेदना प्रकट गरेका छन् । दोवलले कञ्चनपुर घटना दुखद भएको बताउँदै घटनाको छानविन प्रक्रिया अगाडि बढाइएको जानकारी दिएको प्रधानमन्त्रीको सचिवालयले जनाएको छ । दोवलले भारत सरकारको छानविन प्रक्रियामा कुटनीतिक सहयोग र समन्वय गर्न एवं मृतकको पोष्टमार्टम रिपोर्ट लगायतका अन्य जानकारी उपलब्ध गराउन समेत प्रधानमन्त्री प्रचण्डसँग अनुरोध गरेका छन् । टेलिफोन सम्वादका क्रममा प्रधानमन्त्री प्रचण्डले कञ्चनपुर घटना अत्यन्तै गम्भीर रहेको बताए । प्रधानमन्त्रीले दोवललाई कञ्चनपुर घटनाको गम्भीरता र संवेदनशीलताबारे जानकारी गराउँदै भारत सरकारको छानविन प्रक्रियामा नेपाल सरकारको सहयोग रहने बताए। टेलिफोनमा प्रधानमन्त्री प्रचण्डले भारत सरकारको छानविनपश्चात् दोषीमाथि ठोस कार्वाही हुने नेपालको अपेक्षा रहेको बताए ।

काठमाडौँ, २७ फागुन । व्यवस्थापिका–संसद्को आजको बैठकमा सप्तरीको घटनाको विरोध गर्दै संयुक्त लोकतान्त्रिक मधेसी मोर्चा र सङ्घीय गठबन्धनका सांसद्हरुले रोष्टम घेराउ गरेका छन् । बैठक आरम्भ हुनासाथ सभामुखसँग समय लिएर सङ्घीय समाजवादी फोरमका वरिष्ठ नेता अशोककुमार राईले फागुन २३ गते सप्तरीमा भएको झडपमा चार जनाको मृत्यु भएको र ३५ जना घाइते भएको सम्बन्धमा निन्दा गर्दै सुरक्षाकर्मीले कम्मर र टाउकोमाथि गोली प्रहार गरेर अन्तर्राष्ट्रिय मानवअधिकारको उल्लङ्घन भएकाले घटनामा संलग्नलाई कारबाही गर्न माग गर्नुभयो । सो सम्बन्धमा दोषीमाथि कारबाहीको माग गर्दै आफूहरुले घेराउ गर्ने जानकारी गराएपछि मोर्चाका सांसद्हरु रोष्टम घेर्न पुगेका थिए । मोर्चाको घेराउ र नाराबाजीबीच बैठकको शून्य समय सुरु भएको छ । नेकपा (एमाले) को मेची–महाकाली राष्ट्रिय अभियानको संयुक्त लोकतान्त्रिक मधेसी मोर्चाका कार्यकर्ताको विरोध नियन्त्रण गर्ने क्रममा प्रहरीले बल प्रयोग गरेको थियो । राईले कञ्चनपुरमा भारतीय सीमा सुरक्षा बलबाट भएको हस्तक्षेपका सम्बन्धमा स्पष्ट पार्न सरकारसँग आग्रह गर्नुभयो । रासस File Photo

काठमाडौं, फागुन २७ । गृहमन्त्री विमलेन्द्र निधिले भारतीय विदेशमन्त्री सुष्मा स्वराजलाई पुनर्वास घटनाबारे आपत्ती जनाएपछि भारतीय विदेश मन्त्रालयले यसबारेमा विज्ञप्ती जारी गरेको छ । कञ्चनपुरमा भारतीय सीमा सुरक्षा बलको गोली लागेर नेपाली नागरिकको ज्यान गएको घटनामा विज्ञप्ति जारी गर्दै विदेश मन्त्रालयले गोली लागेर नेपालीको ज्यान गएको विषयमा एसएसबीसँग सोधपुछ भइरहेको उल्लेख गरिएको छ। विज्ञप्तीमा मृतकको पोष्टमार्टम लगायतका फोरेन्सिक रिर्पोटहरु कूटनीतिक माध्यमबाट आफूलाई पनि उपलब्ध गराउन आग्रह गरेको छ। विज्ञप्तीमा लखिपुर खिरी र कन्चनपुर जिल्लाका स्थानीय अधिकारीहरु विवाद सुल्झाउन वार्तामा बसेको समेत उल्लेख छ ।

काठमाडौं, फागुन २७ । सप्तरी घटनापछि स्थगित गरेको एमालेको मेची– महाकाली राष्ट्रिय अभियान हेटौडाबाट सुरु गर्ने भएको छ । सप्तरीको मलेठमा सभाका क्रममा गत सोमवार भएको झडपमा प्रहरीको गोली लागि ४ जनाको मृत्यु भएपछि एमालेले तीन दिनका लागि अभियान स्थगित गरेको थियो । तराईका बिभिन्न २२ जिल्लाका ३५ स्थानमा सभा गर्ने बताएको एमालेले प्रदेश नम्बर दुई अन्तरगत सप्तरी बाहेकका अन्य जिल्लाको कार्यक्रम भने स्थगित गरिसकेको छ । शुक्रबार हेटौडामा दिउँसो एक बजेपछि सुरु हुने सभालाई अध्यक्ष केपी शर्मा ओली, नेता माधवकुमार नेपाल लगायतले सम्बोधन गर्ने एमालेले जानएको छ । ब्यवस्थापिका संसद बैठकमा सम्बोधन गरेर एमालेका नेताहरु हेटौडा जाने तयारीमा छन् । सप्तरी घटनाको विरोधमा संघीय मधेस गठबन्धन सहितको मधेसी मोर्चाले आजै नेपाल बन्दको कार्यक्रम राखेका छन् । बन्दकै बीच एमालेको हेटौडामा आमसभा राखिएको छ । एमालेको सभालाई ध्यानमा राखी स्थानीय प्रशासनले सुरक्षा ब्यवस्था भने कडा बनाएको छ । सप्तरी घटनाबारे जानकारी दिने उद्देश्यसहित सवै जिल्लामा गर्ने भनिएको अगुवा कार्यकर्ता भेला समेत जारी राख्ने भट्टराईले जानकारी दिए ।

जाजरकोट, फागुन २६ । ६२ यात्रु लिएर सदरमुकाम खलंगाबाट पश्चिम खारा बजार जाँदै गरेको ना ३ ख २२७९ नम्बरको बस जाजरकोटको भेरिमालिका नगरपालिका–४ बोहरागाउँ नजिक दुर्घटनामा परी मृत्यु हुनेहरुको संख्या २६ पुगेको प्रहरीले जनाएको छ । बिहिबार दिउँसो सडकबाट २ सय मिटर तल पासागाड खोलामा खसेर भएको दुर्घटनामा ३० जना गम्भीर घाइते छन् । घाइतेमध्ये २२ जनालाई उपचारका लागि नेपालगञ्ज तथा पाँच जनालाई रुकुमको चौरजहारी अस्पताल लगिएको छ । सामान्य घाइते ६ जनाको जाजरकोट अस्पतालमा उपचार भइरहेको हाम्रा सहकर्मीले जनाएका छन् । १६ जनाको जाजरकोट अस्पतालमा, एक जनाको चौरजहारी र ९ जनाको घटनास्थलमै मृत्यु भएको हो । मृतकमध्ये २३ जनाको सनाखत भएको प्रहरीले जनाएको छ । मृतक अधिकांश जाजरकोटका छन् । जाजरकोटका रामबहादुर बस्नेत, नन्दलाल जैसी, मदन पुन, सन्तोष राना, गोपाल सुनार, शर्मिला सुनार, गणेश बोहरा, नबीन चन्द, शान्ता सुनार र दिलबहादुर बुढा दशेराको दुर्घटनामा मृत्यु भएको हो । यस्तै जिते गामी, आईते गामी, मनीराम जैसी, बहादुर भनारी, दले तिरुवा, हिउँसरा गिरी, गोब्ली सुनार, नैनी दमाई, चैते खत्री, भरत विसी र हरिबहादुर शाहीको खनाखत भएको छ । दुर्घटनामा सल्यान सुइकोटका उदय बुढा र रुकुम चौरजहारी–२ का कृष्ण गिरीको पनि मृत्यु भएको छ । मृतक ३ जनाको भने खनाखत हुन सकेको छैन ।

कञ्चनपुर, फागुन २७ । कञ्चनपुरमा भारतीय सिमा सुरक्षा बल (एसएसबी)को गोली लागी एक नेपालीको मृत्यु भएको बिरोधमा कैलाली कञ्चनपुर लगायत देशभर प्रदर्शन सुरु भएको छ । भारतीय अातङ्क र हत्याको बिरोधमा  कैलालीस्थित नेपाल भारत सिमा क्षेत्र गौरीफन्टामा  माओवादि केन्द्र र नेत्रबिक्रम चन्द नेतृत्वको नेपाल क्म्युनिष्ट पार्टी र अन्य सर्वसाधारण बिरोध प्रर्दशनमा उत्रेका हुन् । करिब ५ सय को संख्यामा रहेका प्रर्दशनकारीले सिमा क्षेत्रमा रहेको भन्सार कार्यालयको ब्यारियर तोडेका छन् । भारतीय सिमा प्रवेश गर्न खोज्दा प्रर्दशनकारी र नेपाल प्रहरीबिच सामान्य झडप भएको छ । उनीहरुलाई प्रहरीले सिमा क्षेत्रमै रोकेको छ । हत्याको बिरोधमा महेन्द्रनगरमा समेत प्रर्दशन भएको छ । उनीहरुले भारतीय ज्यादतीबिरुद्ध नाराबाजी गर्दै महेन्द्रनगर, घटनास्थल पुनर्वास लगायत क्षेत्रमा प्रर्दशन जारी राखेका छन् । सीमा क्षेत्रबाट ५ सय मिटर भित्र नेपाली भुभागमा निर्माण गरिएको कल्र्भटका बिषयमा भारतीय पक्षसँग विवाद हुँदा हिजो एसएसबीले चलाएको गोली लागि स्थानीय गोबिन्द गौतमको मृत्यु भएको थियो । एसएसबीको गोलीले ज्यान गुमाएका गौतमको शवयात्रा गर्ने तयारी भएपनि सम्भावित झडपलाई ध्यानमा राखी प्रहरीले शव आफन्तलाई दिएको छैन् । स्थानीय प्रशासनले सो क्षेत्रमा सुरक्षा व्यवस्था कडा पारेको छ । सीमा क्षेत्रमा ससस्त्र र नेपाल प्रहरी परिचालन गरिएको छ भने मुख्य चोकमा संयुक्त सुरक्षा फौज परिचालन गरिएको प्रमुख जिल्ला अधिकारी मनोजप्रसाद खनालले बताए ।

चितवन,फागुन २६ । नेपाली काँग्रेसका वरिष्ठ नेता रामचन्द्र पौडेलले वैशाख ३१ गते हुने स्थानीय तहको निर्वाचन हुने वातावरण अझै तयार नभएको बताउनुभएको छ । जिल्ला विकास समिति महासङ्घ नेपालले यहाँ आयोजना गरेको वरिष्ठ समाजसेवी तथा जिविस महासङ्घ नेपालका संस्थापक अध्यक्ष कृष्णलाल सापकोटाको जीवनयात्रा पुस्तकको लोकार्पण कार्यक्रमलाई सम्बोधन गर्दै पौडेलले मधेसको समस्या समाधान नगरी निर्वाचनको वातावरण तयार नहुने बताउनुभयो । उहाँले आगामी माघसम्ममा तीनवटै तहको निर्वाचन सम्पन्न नभए संविधान खारेजी हुने बताउनुहुँदै सबै दल निर्वाचन गराउने वातावरण तयार गर्न लाग्नुपर्ने बताउनुभयो । उहाँले भन्नुभयो “तीनतहको निर्वाचन तोकिएको समयमा नभए देश सङ्कटमा फस्छ ।” समस्याको निकास निकाल्न नसके दलको योग्यतामाथि नै प्रश्न उब्जिने उहाँले बताउनुभयो । उहाँले भन्नुभयो “कतै यो पुस्ता नै राजनीतिमा असफल त हुँदैन भन्ने डर बढेको छ ।” निर्वाचनबाट मधेसी मोर्चालाई बाहिर राख्न नहुने बताउँदै उहाँले संविधान जारी गर्दा मोर्चा बाहिर भएका कारण अहिले समस्या देखिएको बताउनुभयो । हिमाल, पहाड र तराईको एकतामा नै राष्ट्रियता भएको बताउनुहुँदै वरिष्ठ नेता पौडेलले तीन ठूला राजनीतिक दल र मधेसी मोर्चाबीचमा सत्ताका लागि नभई व्यवस्थाका लागि सहमति आवश्यक रहेको बताउनुभयो । “यसले नै राष्ट्रिय एकता कायम गर्छ” पौडेलले भन्नुभयो । सप्तरी घटना दुःखद् भएको बताउँदै वरिष्ठ नेता पौडेलले घटनाले मधेसी मोर्चाको माग सम्बोधन नभएको र कुनै पनि दल कुनै पनि कार्यक्रम लिएर तराई जान नसक्ने वातावरण बन्नुले निर्वाचनलाई बाधा पुगेको बताउनुभयो । कार्यक्रममा सांसदहरु रामकृष्ण घिमिरे, शेषनाथ अधिकारी, रामचन्द्र पोखरेल, नेपाली कांग्रेस चितवनका सभापति जीतनारायण श्रेष्ठ, पुस्तकका लेखक कृष्णलाल सापकोटा लगायतले बोल्नुभएको थियो । पुस्तकमा सापकोटाको राजनीतिक, सामाजिक जीवन र आन्दोलनका बारेमा चर्चा गरिएको छ । कार्यक्रम महासंघका सभापति कृष्णप्रसाद जोशीको अध्यक्षतामा सम्पन्न भएको थियो । रासस

मनाङ, फागुन २५ । मनाङमा फागुनको अन्तिम साता सुरु भइसक्दा पनि हिमपात भइरहेको छ । नेपालकै महत्वपूर्ण पर्यटक मार्ग अन्नपूर्ण पदमार्गमा पर्ने मनाङ जिल्लामा अझै चिसो र जीवन कष्टकर बनेको छ । मनाङ जिल्लाको मनाङ गाउँ यतिखेर पूरै हिउँले सेताम्मे भएको छ । वसन्त ऋतु विस्तारै बढ्दै गइरहे पनि मङ्गलबारदेखि परेको हिउँले यहाँको जनजीवनमा असर परेको छ । हिमपातसँगै पानी पर्ने सम्भावनासमेत बढेको छ । हिमपातसँगै परेको पानीले झन् मनाङवासीका साथै अन्नपूर्ण पदमार्गमा बढी असर गरेको छ । रासस

फागुन २५, काठमाडौं । सप्तरी घटनामा परी मृत्यु हुनेका परिवारलाई दश लाख रुपैयाँ राहत दिने र सम्पूर्ण घाइतेहरुको उपचार खर्च सरकारले बेहोर्ने निर्णय गरेको छ । बुधबार साँझ प्रधानमन्त्री तथा मन्त्रीपरिषदको कार्यालय सिंहदरबारमा सम्पन्न भएको मन्त्रीपरिषदको बैठकले सो निर्णय गरेको हो । प्रधानमन्त्री पुष्पकमल दाहाल ‘प्रचण्ड’को अध्यक्षतामा बसेको बैठकले फागुन २३ गते सप्तरीमा भएको दुखद् घटनाको समीक्षा गरेको छ । घटनामा मृत्यु हुने नेपालीहरुप्रति दुख व्यक्त गर्दै मृतकहरुप्रति श्रद्धाञ्जली व्यक्त गरेको छ भने मृतकका परिवारजन र आफन्तहरुमा समवेदना प्रकट गरेको छ । बैठकले घटनामा परी घाइते हुने सम्पूर्ण नागरिकको शिघ्र स्वास्थ्य लाभको कामना पनि गरेको छ । बैठकले घटनाको सत्य तथ्य जाँचबुझ गर्न प्रधानमन्त्रीको सहमतिमा गृह मन्त्रालयले तीन सदस्यीय जाँचबुझ आयोग गठन गर्ने निर्णय गरेको छ । आयोगलाई १५ दिनभित्र प्रतिवेदन पेश गर्ने कार्यदेश दिइएको छ । बैठकले शान्तिपूर्ण रुपमा भेला हुने, राजनीतिक गतिविधि गर्ने संवैधानिक अधिकारलाई कुण्ठित नगर्न र संयमतापूर्वक राजनीतिक गतिविधि गर्न सम्पूर्ण राजनीतिक दलहरुलाई अपील गरेको संघीय मामिला तथा स्थानीय विकास मन्त्री हितराज पाण्डेले जानकारी दिए ।

काठमाडौं, फागुन २५ । सप्तरीमा भएको मधेसीमोर्चा र प्रहरीबीचको झडपमा प्रहरीको गोलीबाट हालसम्म चार जनाको ज्यान गएको घटनाले अहिले तराई तनावग्रस्त बनेको छ । घटनाको विरोधमा संयुक्त लोकतान्त्रिक मधेसी मोर्चाले दुई दिने तराई बन्दको आह्वान गरेको थियो । आज दोस्रो दिन पनि तराईका जिल्लाहरु तनावग्रस्त बनेको छ । बन्दकर्ताले बिहानैदेखि चोकचोकमा प्रदर्शन गरिरहेका छन् । बन्दका कारण जिल्लाको पूर्व–पश्चिम राजमार्ग पूर्णरुपमा ठप्प रहेको छ । बन्दका कारण तराईमा यातायात संचालनमा आउने सकेको छैन भने धेरै ठाउँहरुमा बजारसमेत बन्छ रहेको प्रहरीले जनाएको छ । बन्दकर्ताहरुले प्रमुख ठूला तीन दल विरोधी नारावाजी गर्दै तराईमा प्रदर्शन गरिरहेका छन् । कपिलबस्तुको सदरमुकाम तौलिहवामा जुलुस प्रदर्शन समेत गरेका छन् । मोर्चाको बन्दले दुवै दिन कृष्णनगर भन्सार कार्यालय र सुठौली छोटी भन्सार नाकाबाट ठप्प भएको छ । त्यस्तै मधेसी मोर्चाको बन्दका कारण पूर्वी तथा मध्य तराईको शैक्षिक संस्थान, व्यापारिक प्रतिष्ठान, उद्योग कलकारखाना बन्द रहेका छन् । त्यस्तै मधेसी मोर्चाका कार्यकर्ताले प्रमुख निर्वाचन आयुक्त डा. अयोधीप्रसाद यादवलगायत एमाले नेताहरुको घर छानीछानी तोडफोड गरेका छन् । राजविराज–९ स्थित यादवको घरमा तोडफोड गरिएको प्रहरीले जनाएको छ । त्यस्तै एमाले सांसद रञ्जुकुमारी झाको राजविराज–९ स्थित सम्पर्क कार्यालयामासमेत मोर्चाका कार्यकर्ताहरूले तोडफोड गरेका छन् । राजविराजस्थित एमाले पार्टीकार्यालयमा पनि मोर्चाका कार्यकर्ताहरुले तोडफोड गरेका छन् भने व्यानर र झण्डा जलाएका छन् । राजविराज–९ तेतरी गाछीस्थित ‘लिटिल फलावर’ सेकेन्ड्री स्कुलमा पनि तोडफोड गरिएका छन् । स्थानीय तह निर्वाचनको विरोध गर्दै मोर्चाका कार्यकर्ताले जिल्ला निर्वाचन कार्यालयमासमेत तोडफोड गरेका छन् । नेकपा एमालेका केन्द्रीय सदस्य सुमन प्याकुरेलको राजविराज–४ स्थित घरमा पनि आन्दोलकारीले ढुंगामुढा गरिएको छ । निकै आक्रमक रुपमा देखिएका मधेसीमोर्चाका कार्यकर्ताहरुले पसल बन्द गराउँदै हिड्ने क्रममा वीरगन्जको घण्टाघरमा व्यवसायीमाथि हातपात गरेका छन् । पसलहरु बन्द नगरेको भन्दै व्यवसायीमाथि हातपात गरेपछि व्यवसायीहरुले प्रतिकार गर्दा केहीबेर झडप भएको हो । एमालेकाे मेची महाकाली अभियानलाइ विथाेल्न खाेज्दा प्रहरी र माेर्चाका कार्यकतार्बीच साेमबार झडप भएकाे थियाे । झडपमा प्रहरीले गाेली चलाउँदा तीन जनाकाे साेमबार नै र एक जनाले बुधबार ज्यान गुमाएका छन् । त्यसैकाे विराेधमा तराइमा अहिले माेर्चा अाक्राेसित बनेका हुन् ।

काठमाडौ फागुन २५ । प्रहरीको गोली लागेर मृत्यु भएको आक्रोशमा संयुक्त लोकतान्त्रिक मधेसी मोर्चाका कार्यकर्ताले प्रमुख निर्वाचन आयुक्त डा. अयोधीप्रसाद यादवको घरमा तोडफोड गरेका छन् । राजविराज–९ स्थित यादवको घरमा मोर्चाका कार्यकर्ताले तोडफोड गरेको प्रहरीले जनाएको छ । कडा सुरक्षा व्यवस्था भएपनि आन्दोलनकारीले प्रमुख निर्वाचन आयुक्त यादवको घरमा ढुंगामुढा गर्दा झ्याल र ढोकाको सिसामा क्षति पुगेको छ । आन्दोलनकारीले प्रमुख निर्वाचन आयुक्त यादवविरुद्ध चर्का नाराबाजीसमेत गरेका थिए । यसैगरी, मोर्चाको कार्यकर्ताहरूले व्यवस्थापिका–संसद महिला, बालबालिका, ज्येष्ठ नागरिक तथा समाजकल्याण समितिकी सभापति रञ्जुकुमारी झाको राजविराज–९ स्थित सम्पर्क कार्यालयामासमेत तोडफोड गरेका छन् । उनी एमाले सांसद हुन् । तोडफोडबाट भाडामा रहेको उक्त कार्यालयको झ्याल–ढोकामा क्षति पुगेको प्रहरीले जनाएको छ । आन्दोलनको तेस्रो दिन अत्यन्त आक्रमकरुपमा प्रस्तुत् भएका मधेसी मोर्चाका कार्याकर्ताले एमाले सर्मथक एवं राष्ट्रिय योजना आयोगका पूर्वसदस्य कामानन्द देवद्वारा सन्चालित राजविराज–९ तेतरी गाछीस्थित ‘लिटिल फलावर’ सेकेन्ड्री स्कुलमा पनि तोडफोड गरिएका छन् । स्कुलमा रहेका कुर्सी टेबुल, झ्याल–ढोकालगायतका फर्निचर तोडफोड गरिएको बताइएको छ । त्यस्तै, राजविराज–५ स्थित नेकपा एमाले पार्टी कार्यालयमा रहेको पार्टीको झन्डा झिकेर जलाइएको छ । त्यसैगरी, स्थानीय तह निर्वाचनको विरोध गर्दै मोर्चाका कार्यकर्ताले जिल्ला निर्वाचन कार्यालयमासमेत तोडफोड गरिएको प्रहरीले जनाएको छ । तोडफोडका कारण कार्यालयको साइनबोर्ड तथा झ्याल–ढोकामा क्षति पुगेको छ । त्यस्तै, नेकपा एमालेका केन्द्रीय सदस्य सुमन प्याकुरेलको राजविराज–४ स्थित घरमा पनि आन्दोलकारीले ढुंगामुढा गरी सामान्य क्षति पुर्‍याएको प्रहरीले बताएका छन् ।

काठमाडौं, फागुन २५ । सप्तरी घटनामा मृत्यु हुनेको संख्या चार पुगेको छ । घटनामा प्रहरीको गोली लागी गम्भिर गोली लागी घाइते भएका सप्तरी मलेठ–२ का वीरेन्द्र महतोको उपचारका क्रममा आज मृत्यु भएको छ । बीपी कोइराला स्वास्थ्य विज्ञान प्रतिष्ठान धरानमा उपचार उनको मृत्यु भएको अस्पताल स्रोतले जनाएको छ । नेकपा एमालेले आयोजना गरेको मेची–महाकाली अभियान अवरोध गर्न उत्रिएका मधेसी मोर्चाका कार्यकर्ता र प्रहरीबीच भएको झडप सोमबार सन्जन मेहता, पिताम्बर मण्डल र आनन्द साहको मृत्यु भएको थियो ।

काठमाडौं, फागुन २५ । सप्तरी घटनापछि देशमा उत्पन्न राजनीतिक परिस्थितिको समीक्षालगायत समसामयिक विषयमा छलफल गर्न आज बसेको प्रमूख तीन दलको शीर्ष नेताहरुको बैठक सम्पन्न भएको छ । प्रधानमन्त्री निवास बालुवाटारमा बसेको बैठकमा प्रधानमन्त्री पुष्पकमल दाहाल प्रचण्डले सप्तरी घटनापछि मधेशी मोर्चाको आन्दोलन र ज्ञापनपत्र एवम् विकसित परिस्थितिका बारेमा जानकारी गराउँदै प्रमुख दलबीच राष्ट्रिय मुद्धामा समान धारणा बनाएर जानुपर्ने आवश्यकतामा जोड दिएका थिए । प्रधानमन्त्रीले अहिले मधेशमा आन्दोलनका कारण केही असहज अवस्था सिर्जना भएको भन्दै एमालेलाई मेची महाकाली अभियान केही दिन स्थगित गरेर राष्ट्रिय समस्या समाधानका लागि छलफलमा सहभागी हुन आग्रह गरे । बैठकमा एमालेका नेताहरुले आफ्नो पार्टीका कार्यक्रममा शान्ति सुरक्षाको सुनिश्चितता गर्न प्रधानमन्त्रीसँग आग्रह गरेका थिए । बैठकमा नेपाली कांग्रेसका सभापति शेरबहादुर देउवा, नेकपा (एमाले) का अध्यक्ष केपी शर्मा ओली, पूर्व प्रधानमन्त्री माधव नेपाल, झलनाथ खनाल, उपप्रधानमन्त्री बिमलेन्द्र निधि, पूर्व उपप्रधानमन्त्री नारायणकाजी श्रेष्ठ लगायतका शीर्ष नेताहरु सहभागी थिए ।

काठमाडौं, फागुन २५ । नेपाल मधेशी निजामती कर्मचारी मञ्चले सप्तरी घटनाको बिरोध गर्दै मधेस बन्दमा ऐक्यबद्धता जनाएको छ । सप्तरी घटनाको बिरोधमा विज्ञप्ती सार्वजनिक गर्दै मञ्चले राज्यको आतंक विरुद्घ एक शान्तिपूर्ण आन्दोलनमा जुट्न अपील गरेको छ । मञ्चका अध्यक्ष विनोदकुमार सिंहले एक विज्ञप्ति जारी गरी एमालेलाई हठ र अहंकार त्यागी जिम्मेवारीपुर्वक सम्वादमा आई संविधान संशोधनको लागी मार्ग प्रशस्त गर्न र मधेशवादी दलहरुलाई पनि सम्वादका माध्यमवाट समाधान खोज्न अनुरोध गरेका छन् । साथै सरकारलाई तत्काल सहमतिका लागी सार्थक सम्वादको वातावारण वनाउन समेत अनुरोध गरेका छन् । सरकार अत्याधिक वल प्रयोग र नृसंस दमनमा उत्रिदा अत्याधिक मानवीय क्षति हुन पुगेको निष्कर्ष निकाल्दै यस्तो नरसंहारका लागी सरकारले जिम्मेवारी लिनुपर्ने धारणा मञ्चको छ । पढ्नुस् विज्ञप्ती शान्ति सुरक्षाको कारण देखाउदै कुनै दलको भ्रामक र उत्तेजित राजनैतिक यात्रालाई सरकारी अभियानको रुपमा परिभाषित गर्न आफ्नो हक, अधिकार र पहिचानका खातिर शान्तिपुर्ण तरिकाले आन्दोलनरत रहेका मधेशी समुदायको अधिकारमुखी लोकतान्त्रिक आन्दोलनलाई सुनियोजित रुपमै दवाउन सरकारद्वारा मिति २०७३ फाल्गुन २३ गते सप्तरीमा गराईएको ७ जनाको हत्या उपर यस मञ्चको गहिरो ध्यानाकर्षण भएको छ । यस मानेमा राष्ट्रिय खोप अभियानका लागी आफ्नो कर्तव्यपालनाको शिलशिलामा मघेशी भएकै कारण सप्तरी मै कार्यरत सि।अ।हे।व। आन्नद साह लगायतको हत्या र करिब २५ जना भन्दा बढी मधेशीहरुलाई घर घरवाट समातेर गहु वारीमा घिसार्दै लगी ताकी ताकी टाउको, छाती र पेटमा सुरक्षाका ठेकेदारहरुको गोलीवाट भए गराइएको निहत्ता र सोझासाझा मधेशीहरुको पाश्विक हत्या र हत्या प्रयास मध्ययुगिन क्रुर र वर्वर भएको मञ्चको ठहर छ । मञ्च उपरोक्त योजनागत हत्या र नश्लिय चिन्तन को घोर भत्र्सना गर्दै घटनामा शहादत प्राप्त गर्ने मधेशी शहिदहरु प्रति हार्दिक श्रद्घाञ्जली सहित मृतकका परिवार प्रति समवेदना र घाइतेहरुको सिघ्र स्वास्थ्य लाभको कामनाका साथै घटनाको उच्चस्तरीय न्यायिक छानविन गरी दोषीहरु उपर कडा कारवाहीको माँग गर्दछौ । साथै मधेशी मोर्चाको आन्दोलन उपर एक्यवद्घता समेत जाहेर गर्दछौ । आदरणिय जनसमुदाय, देशभक्ति सहितको राष्ट्रिय एकताका लागी राजनैतिक सहमति, राजनैतिक विश्वास र सहकार्य मार्फत मात्र समावेशी विकास र समृद्घ नेपालको परिकल्पना गर्न सकिन्छ । आपसी असमझदारी, टकराव र विभाजनले भावनात्मक ध्रुविकरणलाई मात्र पृष्ठपोषण गर्दछ । दिगो शान्ति, एकता र समृद्घीको लागी शान्तिपुर्ण, निष्पक्ष र प्रभावकारी निर्वाचन नै एक विकल्प हो, यसलाई नकार्न सकिन्न । तर सर्व स्वीकार्य निर्वाचनको लागी वर्तमान संविधानको संसोधन एक मात्र पुर्वाधार हुन सक्ने यर्थात सवैले वुझेका नै छौ । संविधान संसोधनले मात्र देशको सार्वभौमसत्ता, राष्ट्रिय एकता र अखण्डतालाई मजवुति प्रदान गर्ने वैज्ञानिक तर्कलाई आत्मसात गरि सकेका नै छौ । तर पनि गणितिय अहन्कार र हठवादिताको उन्माद चढेको गैर मधेशवादी सरकारी दलहरुको उत्तेजक अभिव्यक्ति र व्यवहारले मधेशलाई उत्तेजित र अपमानित गरि रहेको छ । त्यही दलीय उत्तेजना, अहन्कार र सरकारी लाचारीपनको परिणाम सप्तरी घटना भएको हाम्रो ठहर हो । यस्तो वेला सरकारले शान्ति सुरक्षाको उचित वातावरण वनाउन आवश्यक थियो । तर सरकार उल्टै अत्याधिक वल प्रयोग र नृसंस दमनमा उत्रिदा अत्याधिक मानविय क्षति हुन पुगेको हो । यसतो नरसंभारको लागी सरकारले जिम्मेवारी लिनै पर्दछ । आदरणिय आन्दोलनकर्मी मधेशी जनसमुदाय, इतिहास साक्षी छ, शान्तिपुर्ण आन्दोलन सफल भएकै छ । राज्यको आतँक विरुद्घ एक ढिक्का भई शान्तिपुर्ण आन्दोलन मार्फत राज्य विरुद्घ ज्वारभाटा सिर्जना गर्दै धैर्यता र साहसका साथ अहिँसाको पथमा किमार्थ विचलित नहुन तमाम आन्दोलनरत मधेशी जनसमुदाय सँग मञ्च हार्दिक अपिल गर्दछ । अनत्यमा, एमालेलाई हठ र अहंकार त्यागी जिम्मेवारीपुर्वक सम्वादमा आई संविधान संशोधनको लागी मार्ग प्रशस्त गर्न र मधेशवादी दलहरुलाई पनि सम्वादका माध्यमवाट समाधान खोज्न अनुरोध गर्दछौ । साथै सरकारलाई तत्काल सहमतिका लागी सार्थक सम्वादको वातावारण वनाउन समेत अनुरोध गर्दछौ । जय मधेश । विनोद कुमार सिंह अध्यक्ष