काठमाडौं १० फागुन । रक्सीका कारण पारिवारिक तनाव सहेर बसेकाहरुलाई खुशीको खबर छ । सरकारले मदिरा खरिदबिक्री सम्बन्धी नयाँ नियम सार्वजनिक गरेको छ । यदि यो नियम कडाईका साथ लागु भएमा यसले नेपाली समाजमा ठूलो युगान्तकारी परिवर्तन ल्याउने देखिन्छ । सरकारले सार्वजनिक समारोह, भोज भतेरलगायत विभिन्न कार्यक्रमहरु मदिरा रहित गर्ने नीति लिएपछि यसबाट सामाजिक हिंसा, महिलामाथिको हिंसालगायतका क्ष्ँेत्रमा ठूलो प्रभाव पर्ने देखिएको हो । स्वास्थ्य मन्त्रालयले तयार गरेको राष्ट्रिय मदिरा नियमन तथा नियन्त्रण नीति, २०७३ मा सार्वजनिक समारोह, विवाह उत्सव लगायतका कार्यक्रमहरु मदिरा रहित गर्ने व्यवस्था मिलाईने उल्लेख गरिएको छ । सरकारी तथा सार्वजनिक निकायबाट आयोजना हुने कार्यक्रमहरुमा मदिराजन्य पदार्थको प्रयोग तथा वितरण गर्न पूर्ण रुपमा निषेध गर्ने नीतिमा छ । साथै कुनै पनि सार्वजनिक, पर्यटकीय, खेलकुद, मनोरञ्जनात्मक तथा धार्मिक, पुरातात्विक, ऐतिहासिक स्थलहरुमा निषेधित क्षेत्र तोकेको छ । सरकारले आवश्यक ठानेका ठाउँहरुमा मदिरा उत्पादन, बिक्री वितरण र सेवन निषेधित क्षेत्र तोक्ने व्यवस्था गरिने नीतिमा उल्लेख छ । सोमबारको मन्त्रिपरिषदबाट पारित गरिएको नौ बुँदे नीतिमा फुटकर मदिरा क्रेतालाई एक दिनमा कम्तीमा एक लिटरभन्दा बढी खरीद बिक्री गर्न नपाउने व्यवस्था उल्लेख गरिएको छ । उक्त नीतिमा २१ वर्ष उमेर नपुगेका व्यक्ति र गर्भवती महिलालाई मदिरा खरीद, बिक्री र सेवन गर्न निषेध गर्ने, त्यसको सूचना टाँस गर्ने लगायतका प्रवर्द्धनात्मक व्यवस्था मिलाइने मन्त्रालयले जनाएको छ । साथै बिहान ५ बजे देखि बेलुकी ७ बजेसम्म फुटकर मदिरा खरिद बिक्री गर्न नपाउने व्यवस्था गरिने भएको छ । थप मुख्य बुँदा तथा उपबुदाँहरु  १ नेपाल सरकार, स्थानीय निकाय र विकासका साझेदारहरुबाट हुने कार्यक्रममा मदिरा नियन्त्रणको बिषयलाई समावेश गर्न प्रोत्साहन गरिनेछ । २ मदिराको हानिकारक सेवनलाई न्यूनिकरण गर्न राष्ट्रिय मदिरा रहित दिवस मनाउने परम्पराको थालनी गरिनेछ । ३ मदिराको बोतलको कम्तीमा ७५ भागमा मदिरासेवनको कारणले भएको सिरोसिस भएको कलेजो वा मुटुरोगको चित्र र “मदिरा सेवन स्वास्थ्यका लागि हानिकारक छ” भन्नेजस्ता चेतावनीमूलक स्वास्थ्यसन्देश, मदिरा उपभोग गर्ने अन्तिम मिति र मदिराको गुणस्तर उल्लेख गर्नु पर्ने व्यवस्था गरिनेछ । ४ छापा तथा बिद्युत्तीय संचार माध्यम, इन्टरनेट, ईमेल र हार्डिङबोर्डलगायत कुनै पनि संचार माध्यम वा तरीकाबाट मदिराको उत्पादन, बिक्री वितरण र सेवन प्रबद्र्धन र बजारीकरण गर्ने सम्बन्धी सूचना वा चित्र वा सन्देश वा सामग्री वा विज्ञापन वा प्रायोजन वा समाचार प्रकाशन र प्रसारण कार्यलाई निषेध गरिनेछ । ५ चलचित्र, टेलिफिल्म, नाटक जस्ता कुनै पनि मनोरञ्जनात्मक वा समाचारमूलक वा प्रायोजनात्मक श्रब्यदृष्य कार्यक्रममा कलाकारका प्रयोग वा व्राण्ड वा लोगो वा अन्य परिचय झल्कने गरी मदिराको प्रबद्र्धन हुनेगरी अभिनय वा बिज्ञापन वा प्रचार प्रसार गर्ने कार्य निषेध गरिनेछ। ६ सार्वजानिक क्षेत्र एवं कार्यस्थल नजिक मदिरा उत्पादन र बिक्री, बितरण गर्न नपाउने व्यवस्था मिलाईनेछ । ७मदिराको उत्पादन, विक्रि, वितरण गर्न अनिवार्य लाईसेन्स लिनुपर्ने व्यवस्था मिलाईने छ । ८ सार्वजनिक, शैक्षिक, पर्यटकीय, खेलकुद, मनोरञ्जन स्थलहरु, निश्चित धार्मिक, पुरातात्विक, ऐतिहासिक स्थलहरु र नेपाल सरकारले आवश्यक ठानेका अन्य स्थानहरुलाई मदिरा उत्पादन, बिक्री वितरण र सेवन निषेधित क्षेत्र तोक्ने व्यवस्था गरिनेछ । मदिरा निषेधित क्षेत्र तोकिने टेलिभिजन तथा चलचित्रमा प्रचार प्रसार हुने कुनै पनि कार्यक्रममा व्राण्ड वा लोगो झल्किने गरी मदिराको प्रवर्द्धन, विज्ञापन तथा प्रचारप्रसार गर्ने कार्य निषेध गरिने, कुुनै पनि सार्वजनिक स्थलमा मदिरा उत्पादन र बिक्री वितरण गर्न नपाउने, मदिराको बिक्री वितरणको लागि अनिवार्य लाइसेन्स लिनुपर्ने व्यवस्था मिलाइने नीतिमा उल्लेख छ । त्यस्तै, कुनै पनि सार्वजनिक, पर्यटकीय, खेलकुद, मनोरञ्जनात्मक तथा धार्मिक, पुरातात्विक, ऐतिहासिक स्थलहरु तथा नेपाल सरकारले आवश्यक ठानेका ठाउँहरुमा मदिरा उत्पादन, बिक्री वितरण र सेवन निषेधित क्षेत्र तोक्ने व्यवस्था गरिने नीतिमा उल्लेख छ ।

काठमाडौं, फागुन १० । नेत्रबिक्रम चन्द नेतृत्वको नेकपा (माओवादी)ले स्थानीय निकायको निर्वाचन बहिस्कार गर्न सार्वजनिक आव्हान गरेको छ । सरकारले घोषणा गरेको चुनाव संसदीय व्यवस्थाकै निरन्तरता भएको निश्कर्ष सहित पार्टीले निर्वाचनको कुनै औचित्य नभएको बताएको छ । पार्टीको महाअधिवेशनमा पार्टीको नामका पछाडि माओवादी नराख्ने निर्णय गरेर चर्चामा आएको विप्लव माओवादीले आफ्नो आगामी रणनीतिक कार्यदिशा के हुने बारेमा केही सार्वजनिक गरेको छैन । तर चुनावको बिरोध गर्दै विप्लव माओवादीले “जनताको राज्यसत्ता सञ्चालनमा ध्यान केन्द्रीत गर्न आव्हान गर्दछौं” भन्ने भाषा प्रयोग गरेपछि उक्त पार्टी समानान्तर राज्यसत्ताको अभ्यासको रणनीतिमा अघि बढ्ने आँकलन गरिएको छ ।

काठमाडौँ, फागुन १० । निर्वाचन आयोगका प्रमुख प्रमुख निर्वाचन आयुक्त अयोधीप्रसाद यादवले सरकारले घोषणा गरेकै मितिमा स्थानीय तहको चुनाव गराउन आयोग तयार रहेको स्पष्ट पारेका छन् । मंगलबार रिपोर्टर्स क्लबमा आयोजित कार्यक्रममा यादवले निर्वाचनका लागि आयोगसँग पर्याप्त समय रहेको भन्दै आयोग चुनावको तयारीमा जुटिसकेको बताए । उनले आयोगले यही साताभित्र आचारसंहिता लागु गर्ने जानकारी दिए । ‘सफलताका लागि तीन घण्टा काफी हुन्छ, हामीसँग त अझै ८२ दिन बाँकी छ,’ यादवले भने। बरु निर्वाचन हुँदैन कि भन्ने आशंका नगर्न समेत आग्रह गरे। ‘मिति घोषणा भएको छ, कानुन तथा ऐन आएका छन्, त्यसैले निर्वाचन हुन्छ,’ उनले स्पष्ट पारे। सरकारले निर्वाचनका लागि आवश्यक स्रोत र साधनको कमी हुन नदिने जनाएको भन्दै प्रमुख आयुक्त यादवले निर्वाचन गराउनका लागि राजनीतिक दलहरुको पनि ठूलो भूमिका हुने बताए। उनले यही सातादेखि निर्वाचन आचारसंहिता लागु गराउनका लागि आयोग छलफलमा रहेको पनि जानकारी दिए। उनले भने, ‘आचारसंहिता लागु भएपछि सरुवा, बढुवा र नियुक्ति हुन दिँदैनौँ।’ प्रमुख आयुक्त यादवले चुनाव स्वतन्त्र र निष्पक्ष हुने विश्वास पनि व्यक्त गरे।

काठमाडौं, फागुन १० । राष्ट्रिय प्रजातन्त्र पार्टीको केन्द्रीय सदस्यका लागि निर्वाचन जारी छ । मंगलबार बिहान ८ बजेदेखि निर्वाचन सुरु भएको हो । पार्टीको विधान अनुसार १६३ सदस्यीय केन्द्रीय समितिको ६० प्रतिशत (९८ पदका) लागि हुन लागेको निर्वाचनमा ३६३ जनाले उम्मेदवारी दर्ता गराएका छन्। बाँकी ४० प्रतिशत सदस्य क्षेत्र, भूगोल, विशेषज्ञताका आधारमा पार्टी अध्यक्षले मनोनयन गर्ने व्यवस्था छ। पार्टीका नेता राजाराम श्रेष्ठका अनुसार राष्ट्रिय सभागृहमा साँझ ५ बजेसम्म मतदानको समय राखिएको छ । मतदानको प्रक्रिया सकिएलगत्तै गणना गरी परिणाम सार्वजनिक गरिने छ । विद्युतीय मतदान यन्त्रको प्रयोग गरिएकाले आज साँझसम्म नतिजा प्राप्त हुने छ । पार्टीका नवनिर्वाचित अध्यक्ष कमल थापाले पहिलो पटक मतदान गरी सो प्रक्रियाको शुभारम्भ गरेका थिए। महिलातर्फ ३३ सिट रहेका छन्, जसमा खुल्ला १६ तथा आरक्षणमा १७ सिट छन् । आरक्षणतर्फ मधेसी समुदायबाट पाँच, आदिवासी जनजाति छ, उत्पीडित दुई, मुस्लिम एक, कर्णाली र पिछडिएको क्षेत्रबाट दुई, थारु समुदायबाट एकजना निर्वाचित हुनेछन् । पुरुषतर्फ ६५ सिट कायम गरिएको छ, खुल्ला ४० तथा आरक्षणमा २५ सिट छन् । आरक्षणतर्फ मधेसी समुदायबाट सात, आदिवासी जनजाति नौ, उत्पीडित दुई, मुश्लिम दुई, कर्णाली र पिछडिएको क्षेत्रबाट दुई, थारु समुदायबाट एक, प्रवासबाट दुईजना निर्वाचित हुनेछन् । महाधिवेशन सम्पन्न भएपछि ४० प्रतिशत मनोनीत गरिने र २७ सदस्यीय पदाधिकारी चयन गरिनेछ । महाधिवेशन खर्च बढ्यो राप्रपा महाधिवेशनमा अनुमान गरिए भन्दा खर्च बढ्ने भएको छ । करिब रु एक करोड ५० लाख खर्च अनुमान गरिएको भए पनि महाधिवेशनको समय अवधि लम्बिएकाले खर्च बढ्ने नेताहरुले बताए  । पार्टीको महाधिवेशनमा देश तथा विदेशबाट सहभागी हुन आउने प्रतिनिधि, प्रर्यवेक्षकलाई खान, बस्न तथा महाधिवेशनका लागि मञ्च व्यवस्थापन, प्रचारप्रसारका लागि सो रकम खर्चका लागि छुट्याइएको थियो । पार्टीका नेता किरण गिरीका अनुसार सो रकम पार्टीका नेता तथा कार्यकर्ताबाट सङ्कलन गरिने जनाइएको छ । महाधिवेशनमा महिला, दलित र सीमान्तकृतलगायतको समावेशी प्रतिनिधित्व गराइने छ । महाधिवेशनमा हुने चुनावका लागि ६० वटा विद्युतीय मतदान यन्त्र प्रयोग गरिएको छ । मुलुकमा राजनीतिक स्थायित्व कायम गर्नका लागि संवैधानिक राजसंस्थाको पक्षमा महाधिवेशन केन्द्रित गरिएको छ ।

काठमाडौं, फागुन १० । प्रधानमन्त्री पुष्पकमल दाहाल ‘प्रचण्ड’ले मंगलबार सर्वदलीय बैठक बोलाएका छन् । सोमबार साँझ बसेको मन्त्रीपरिषद बैठकले वैशाख ३१ गते स्थानीय तहको चुनाव गर्ने घोषणा गरेपछि राजनीतिक सबै दलहरु बीचमा सहमति गराउन प्रधानमन्त्रीले सर्वदलको बैठक डाकेका हुन् । प्रधानमन्त्रीले संसदमा प्रतिनिधित्व गर्ने ३० वटै दललाई दिउँसो ३ बजेपछि संसद् भवन बानेश्वरमा बोलाउनु भएको छ, प्रधानमन्त्रीका प्रेस सल्लाहकार गाविन्द आचार्यले भने । व्यवस्थापिका संसद बानेश्वरको शंकर हलमा संसदमा प्रतिनिधित्व गर्ने सबै दलको बैठक बोलाइएको उनले बताए । छलफल संविधान संशोधन र सरकारले सोमबार घोषणा गरेको स्थानीय तहको चुनावमा केन्द्रीत हुने प्रेस सल्लाहकार आचार्यले बताए । गएको मंसिर १४ गते नै संसदमा दर्ता भएको संशोधन विधेयकमाथि कानुनमन्त्री अजयशंकर नायकले सैद्धान्तिक छलफल अघि बढाउन प्रस्ताव गर्नुहुनेछ । सोमबारको मन्त्रिपरिषद् बैठकले मधेस केन्द्रित दलले संशोधन प्रस्ताव पारित गर्न माग गर्दै आएका छन् भने प्रमुख विपक्षी एमालेले संशोधन प्रस्तावमाथि छलफल नै अघि बढाउन नहुने अडान राख्दै आएको छ । सरकारले आफ्नो माग अनुसार चुनावको मिति पनि घोषणा गरेकाले एमालेले को संसद बैठकमा लचकता अपनाउने विश्वास गरिएको छ । सत्ता साझेदार नेपाली कांग्रेस सहित विपक्षी दल एमाले, राप्रपा लगायतले चुनावको मिति घोषणा सकारात्मक भएको बताएका छन् । मधेसी मोर्चाले भने चुनावको मिति घोषणामा विमती जनाएको छ । मिति घोषणा लगत्तै बसेको मोर्चाको बैठकले संविधान संशोधन प्रक्रिया अघि नबढाई सरकारले एक्कासी चुनाव घोषणा गरेको भन्दै मंगलबारदेखि विभिन्न विरोधका कार्यक्रम सार्वजनिक गरेको छ ।

काठमाडौं, फागुन १० । आजको लागि बोलाइएको संसद बैठक स्थगित भएको छ । प्रमुख तीन दलको शीर्ष नेताहरुबीच संविधान संशोधनमा सहमति बनाउने पहल भएको कारण संसद स्थगित भएको बताइएको छ । यसअघि प्रमुख प्रतिपक्षी एमालेका सचेतकसँगको कुराकानीमा संशोधनको प्रक्रिया अघि बढाइए विरोध गर्ने बताएपछि प्रमुख तीन दलको शीर्ष नेतृत्वबीचको छलफललाई कुर्नको लागि सूचना टाँस गरेर बैठक स्थगित गरिएको हो । सरकारले सोमबार मधेसी मोर्चाको माग अनुसार पाँच नम्बर प्रदेशलाई टुक्राउने सहितको संविधान संशोधन प्रस्तावलाई आज प्रक्रियामा लैजाने निर्णय गरेको थियो । तीन दल र मोर्चासँग प्रधानमन्त्री पुष्पकमल दाहाल प्रचण्डले विशेष वार्ता गर्ने भएपछि बैठक सूचना टाँसेर स्थगित गरिएको सभामुख ओनसरी घर्तीको सचिवालयले जनाएको छ । सरकारले संसदमा पेश गरेको संशोधन प्रस्तावलाई प्रक्रियामा लैजान संसद बैठक बुधबार दिउँसो २ बजे बस्ने सभामुख घर्तीका प्रेस सल्लाहकार बासुदेव (वविन) शर्माले जानकारी दिए ।

काठमाडौं, फागुन १० । एमाले अध्यक्ष केपी शर्मा ओलीले आफ्नो पार्टीले गर्न लागेका ‘मेची–महाकाली मधेस केन्द्रित अभियान’मा कसैले भाँजो हाले प्रतिकार गर्ने चेतावनी दिएका छन् । एमालेले फागुन २१ गतेदेखि उक्त अभियान सुरु गर्दैछ । मधेस अभियानको लागि पार्टी कार्यालय बल्खुमा स्थापना गरिएको छुट्टै कार्यालयको उद्घाटन कार्यक्रममा बोल्दै अध्यक्ष ओलीले एमालेको मधेस केन्द्रित अभियान मधेसी पार्टी विरुद्ध नभएर राष्ट्रिय एकताका लागि भएको दाबी गरे । ओलीले आफ्नो पार्टीको कार्यक्रम कसैले भाड्न खोजे प्रतिकार गर्ने चेतावनी दिए । उनले भने, ‘हाम्रो पूर्व निर्धारित कार्यक्रममा कसैले भाँजो नहालौं । यदी कसैले त्यस्तो गर्छ भने एमालेले त्यसको सशक्त प्रतिकार गर्छ ।’ उनले नगरपालिका, वडा र गाविस तहका सबै कार्यकर्तालाई आ–आफ्नो क्षेत्रमा सभा जुलुस गर्न र पार्टीले निर्धारण गरेको कार्यक्रममा सहभागी हुन आव्हान गरे । ‘हाम्रो कार्यक्रम मधेसमा फैलाइएको विभिन्न प्रकारको भ्रमहरु चिर्नका लागि हो,’ उनले भने, ‘यसमा सबैको सहभागीताको अपेक्षा गर्दछौं ।’

काठमाडौं, फागुन १० । प्रधानमन्त्री पुष्पकमल दाहाल ‘प्रचण्ड’ले स्थानीय तहको निर्वाचनपछि जनताले नागरिकता, पासपोर्ट, लालपुर्जा आफ्नै आँगनमा पाउँने बताएका छन् । दिवङ्गत पत्रकारहरुको स्मृतिमा प्रेस काउन्सिलको कार्यालय परिसरमा निर्मित पत्रकार स्मृति स्तम्भको अनावरण गर्दै प्रधानमन्त्रीले  लालपुर्जा, पासपोर्ट, नागरिकता लगायतका सुविधा र अधिकार आफ्नै आँगनमा पाउँदा जनताले संघीयताको मर्म बुझ्ने बताए । प्रधानमन्त्रीले स्थानीय तहको निर्वाचनपछि जनताले आफैले आफ्नो साधन र स्रोतको परिचालन गर्ने र त्यसपछि बल्ल उनीहरुले गणतन्त्र र संघीयताको वास्तविक महत्व बुझेर त्यसको स्वामित्व लिने बताए । अहिलेको सन्दर्भमा जनताको मन छुने विषय स्थानीय निर्वाचन नै भएको बताउँदै प्रधानमन्त्रीले भने– ‘ हाम्रो संविधानले स्थानीय तहलाई व्यवस्थापिका, कार्यपालिका र न्यायपालिकाको अधिकार दिएको छ । स्थानीय तहको निर्वाचनपछि जनताले नागरिकता, पासपोर्ट, लालपुर्जा आफ्नै आँगनमा पाउँछन्, आफैले आफ्नो साधन र स्रोतको परिचालन गर्छन्, त्यसपछि बल्ल उनीहरुले गणतन्त्र र संघीयताको वास्तविक महत्व बुझ्छन् र त्यसको स्वामित्व लिन्छन् ।’ उनले स्थानीय तहको निर्वाचनपछि देशको मुहार बदलिने र  जनताको जीवन पनि बदलिने बताए । सरकारले घोषणा गरेको निर्वाचनबारे चर्चा गर्दै प्रधानमन्त्रीले भने– ‘निर्वाचन एउटा अभियान हो, आन्दोलन पनि हो । सबै राजनीतिक दल, नागरिक समाज, पत्रकार, सामाजिक संघसंस्था एकढिक्का भएर अभियानका रुपमा लागेर निर्वाचन सफल पारौं ।’ अहिलेको युग सूचना प्रविधिको युग भएकोमा जोड दिँदै प्रधानमन्त्रीले  २१ औं शताब्दीलाई सूचनाको युग, सञ्चारको युग भनेर चिनिने र  सूचना, सञ्चारको क्षेत्रमा नेपालले पनि ठूलो फड्को मारिसकेको बताए । उनले भने – ‘सञ्चारको गुणात्मक विकासका लागि सरकारले के गर्नुपर्छ, तपाईहरु सल्लाह गरेर सरकारलाई सुझाव दिनुस्, सरकार त्यसका लागि तयार छ । सञ्चार क्षेत्रमा देखिएका विकृति राज्यले होइन, तपाईहरुको आफ्नै प्रतिस्पर्धाद्वारा नियन्त्रण र मर्यादित गर्नुस् ।’ कार्यक्रममा सूचना तथा सञ्चार मन्त्री सुरेन्द्रकुमार कार्की, प्रेस काउन्सिल नेपालका अध्यक्ष बोर्णबहादुर कार्की, सञ्चारकर्मी किशोर श्रेष्ठ लगायतले सञ्चार क्षेत्रको महत्वबारे बोल्दै सञ्चार क्षेत्रको गुणात्मक विकासका लागि राज्यले खेल्नुपर्ने भूमिकाबारे चर्चा गरेका थिए ।

काठमाडौं, फागुन १० । चीनले भूकम्प प्रभावित जिल्लाको पुननिर्माणमा सहयोग गर्ने भएको छ । सोमबार राष्ट्रिय पुनर्निर्माण प्राधिकरणका प्रमुख कार्यकारी अधिकृत (सिइओ) गोविन्दराज पोखरेल र नेपालस्थित चिनियाँ राजदूत यु होङले भेट गरी आफ्नो देशले नेपालको भूकम्प पुननिर्माणमा सहयोग गर्न तयार रहेको बताएका हुन् । सिंहदरबारस्थित प्राधिकरणको कार्यालयमा भएको भेटमा राजदूतले पुनर्निमाणप्रति चासो राख्दै विद्यालय, स्वास्थ्य संस्था र ऐतिहासिक सम्पदाको पुनर्निर्माणमा थप सहयोग गर्न आफूहरु इच्छुक रहेको बताइन् । भेटमा प्राधिकरणका सिइओ पोखरेलले भूकम्पपछिको अवस्थामा चीनले गरेको सहयोगप्रति आभार व्यक्त गरे । पोखरेलले चीनसँगको सहकार्यबाट पुननिर्माणको कामलाई तीव्रता दिइने उल्लेख गरे । राजदूत होङले चिनियाँ सहयोगमा सञ्चालित परियोजनाहरुलाई दुवै मुलुकको संयुक्त पहलमा सम्पन्न गर्नुपर्नेमा जोड दिए । असल छिमेकीको नाताले नेपाललाई गर्दे आएको सहयोगलाई आफ्नो मुलुकले आगामी दिनमा पनि निरन्तरता दिने राजदूतले प्रतिवद्धता जनाए । पोखरेलले विभिन्न प्रक्रियागत र कानुनी झमेलाका कारण पुनर्निर्माणको काम अपेक्षा अनुरुप अघि बढ्न नसकेको स्वीकारे । सोमबारै सिइओ पोखरेलले फ्रान्सका राजदुत यभिस कारमोनासँग पनि भेटवार्ता गरेका छन। भेटमा राजदूत कारमोनाले शिक्षा क्षेत्रको पुनर्निर्माणमा थप सहयोग गर्न आफुहरु इच्छुक रहेको बताए।

काठमाडौं, फागुन १०। नेकपा (एमाले) ले सरकारले स्थानीय तहको निर्वाचनको मिति घोषणा गरेकामा स्वागत गरेको छ । निर्वाचनको मिति घोषणा गर्दै आएको सो प्रमुख प्रतिपक्षी दलले आगामी वैशाख ३१ मा घोषित स्थानीय तहको निर्वाचन सम्पन्न गर्न सबै तयारी गर्न र कुनै पनि बहानामा समय अल्मल्याउने काम नगर्न माग गरेको छ । मन्त्रिपरिषद्को आजको तेस्रो बैठकले मिति तय गरेको सार्वजनिक भएपछि  कुरा गर्दै एमालेका उपाध्यक्ष भीमबहादुर रावलले भन्नुभयो, “घोषित मितिमा निर्वाचन सम्पन्न हुनुपर्छ । अरु कुनै निहुँ छिकेर अल्मल्याउने कुनै पनि काम हुनु हुँदैन । स्थानीय निकाय पुनःसंरचनासम्बन्धी आयोयको प्रतिवेदन तुरुन्त अनुमोदन भई निर्वाचन आयोगलाई पठाइनुपर्छ ।” संविधान संशोधन प्रस्तावका सम्बन्धमा सोधिएको जिज्ञासामा उहाँले त्यसका अन्तरनिहित विषय राष्ट्रहितमा नभएको भन्ने पार्टीको अडान कायमै रहेको तर सरकारले छलफलको प्रक्रियामा लान खोजेको हुँदा निर्वाचनको मिति घोषणा भएको सन्दर्भमा त्यसमा छलफल गर्न आफूहरु तयार रहेको जनाउनुभयो ।

काठमाडौँ, फागुन १० । सरकारले नेपाल टेलिभिजनको महाप्रबन्धकमा वरिष्ठ पत्रकार गोविन्द रोकालाई चार वर्षका लागि नियुक्त गरेको छ । मन्त्रिपरिषद्को आज बसेको बैठकले रोकालाई नेपाल टेलिभिजनको महाप्रबन्धकमा नियुक्त गरेको सरकारका प्रवक्ता एवम् सूचना तथा सञ्चार मन्त्री राम कार्कीले जानकारी दिनुभयो । माओवादीले सञ्चालन गरेको जनयुद्धमा युद्ध पत्रकारको भूमिका निर्वाह गर्नुभएका रोका शान्ति प्रक्रिया सुरु भएपछि नेपाल एफएममा समाचार प्रमुख भएर काम गर्नुभएको थियो । विसं २०५४ सालदेखि विभिन्न सञ्चार माध्यममा सम्बाददाताको रुपमा कार्य गर्नुभएका उहाँले २०६३ सालमा रेडियो नेपालको समाचारमूलक कार्यक्रम घटना र विचारको संयोजक भएर काम गर्नुभएको थियो । नेपाल एफएममा समाचार प्रमुखको रुपमा पाँच वर्ष सेवा गर्नुभएका रोकाले मैत्री एफएममा प्रबन्ध निर्देशक भएर काम गर्नुभयो भने रेडियो रानी भेरी एफमको अध्यक्ष भई २०५७ देखि हालसम्म सेवा पु¥याउनु भएको छ । यस्तै प्रदेश एफम एम सुर्खेतको अध्यक्ष, एबिसी टेलिभिजनमा समाचार सम्पादकको रुपमा काम गर्नुभएको छ । प्रसारण पत्रकारितामा स्तातकोत्तर उत्र्तीण रोका सञ्चार क्षेत्रमा स्थापित व्यक्तित्व हुनुहुन्छ । रासस

काठमाडौँ,  फागुन १० । प्रधानमन्त्री पुष्पकमल दाहाल‘प्रचण्ड’ले स्थानीय तहको निर्वाचनको मिति घोषणालाई सरकारकोे ऐतिहासिक निर्णय भएको बताउनुभएको छ । उहाँले भन्नुभयो, “सरकारले ऐतिहासिक निर्णय गरेको छ । स्थानीय तहको निर्वाचनको मिति घोषणा गरिएको छ । एकै चरणमा मुलुकभर नै स्थानीय तहको निर्वाचन हुन्छ ।” मन्त्रिपरिषद्को बैठकपछि प्रधानमन्त्री तथा मन्त्रिपरिषद् कार्यालयमा सञ्चारकर्मीसँग कुराकानी गर्दै प्रधानमन्त्रीले भन्नुभयो, “लोकतन्त्रको रक्षाका लागि परिवर्तनका सबै एजेण्डाको रक्षा र संविधानको कार्यान्वयनका लागि निर्वाचन नै अनिवार्य विकल्प हो । सरकारले आज महत्वपूर्ण निर्णय गरेको छ ।” उहाँले तराई–मधेस, हिमाली क्षेत्रमा जनसङ्ख्याका आधारमा स्थानीय तहको सङ्ख्या बढाउने निर्णय गरेको र त्यसले सबै वर्ग तथा क्षेत्रलाई समेट्ने र निर्वाचनको मार्गप्रशस्त गर्ने बताउनुभयो । व्यवस्थापिका–संसद्मा टेबल गरिएको संविधान संशोधन प्रस्तावलाई अगाडि बढाइने प्रतिबद्धता व्यक्त गर्दै प्रधानमन्त्रीले सो प्रक्रिया सँगसँगै सङ्घीय आयोग गठन गर्ने प्रक्रिया पनि सुरु भएको उल्लेख गर्नुभयो । सबैलाई समेटेर मुलुकलाई निर्वाचनमा केन्द्रित गर्ने जानकारी दिनहुँदै प्रधानमन्त्रीले आजको दिनलाई ऐतिहासिक दिनका रुपमा चित्रण गर्नुभयो । सबै पक्षको सहमतिमा सरकारले निर्वाचन प्रक्रियालाई अगाडि बढाउँछ र मधेसी मोर्चालाई समेत सहमतिमा ल्याइने र उनीहरु पनि निर्वाचनमा केन्द्रित हुने प्रधानमन्त्रीको भनाइ थियो । प्रधानमन्त्रीले मङ्गलबार बस्ने व्यवस्थापिका–संसद्मा टेबल भएको संविधान संशोधन प्रक्रिया अगाडि बढाउने विश्वास व्यक्त गर्नुभयो । चुनाव घोषणाप्रति काँग्रेसको स्वागत नेपाली काँग्रेसका वरिष्ठ नेता रामचन्द्र पौडेलले सरकारले २०७४ वैशाख ३१ गतेका लागि तय गरेको स्थानीय तहको निर्वाचनको स्वागत गर्दै मुलुकमा निर्वाचनको आवश्यकता रहेको बताउनुभयो । उहाँले भन्नुभयो, “चुनावमा जानु आवश्यक थियो, सबै मिलेर चुनाव सम्पन्न गर्नुपर्छ ।” सरकारले निर्वाचनको मिति घोषणा गरेसँगै संयुक्त लोकतान्त्रिक मोर्चाले आन्दोलनका कार्यक्रम सार्वजनिक ग¥यो, अब मोर्चालाई कसरी मनाउनुहुन्छ रु भन्ने प्रश्नमा नेता पौडेलले मोर्चाका माग सम्बोधन गर्न आफ्नो पार्टीले प्रयास गर्ने विश्वास दिलाउनुभयो । उहाँले भन्नुभयो, “मोर्चा पनि निर्वाचनमा आउनुपर्छ । देशलाई चुनाव चाहिएको छ । उहाँहरुलाई सम्झाउने हाम्रो प्रयास रहन्छ ।” निर्वाचन मिति घोषणाप्रति एमालेको स्वागत नेकपा ९एमाले० ले सरकारले स्थानीय तहको निर्वाचनको मिति घोषणा गरेकामा स्वागत गरेको छ । निर्वाचनको मिति घोषणा गर्दै आएको सो प्रमुख प्रतिपक्षी दलले आगामी वैशाख ३१ मा घोषित स्थानीय तहको निर्वाचन सम्पन्न गर्न सबै तयारी गर्न र कुनै पनि बहानामा समय अल्मल्याउने काम नगर्न माग गरेको छ । मन्त्रिपरिषद्को आजको तेस्रो बैठकले मिति तय गरेको सार्वजनिक भएपछि रासससँग कुरा गर्दै एमालेका उपाध्यक्ष भीमबहादुर रावलले भन्नुभयो, “घोषित मितिमा निर्वाचन सम्पन्न हुनुपर्छ । अरु कुनै निहँु छिकेर अल्मल्याउने कुनै पनि काम हुनु हुँदैन । स्थानीय निकाय पुनःसंरचनासम्बन्धी आयोयको प्रतिवेदन तुरुन्त अनुमोदन भई निर्वाचन आयोगलाई पठाइनुपर्छ ।” संविधान संशोधन प्रस्तावका सम्बन्धमा सोधिएको जिज्ञासामा उहाँले त्यसका अन्तरनिहित विषय राष्ट्रहितमा नभएको भन्ने पार्टीको अडान कायमै रहेको तर सरकारले छलफलको प्रक्रियामा लान खोजेको हुँदा निर्वाचनको मिति घोषणा भएको सन्दर्भमा त्यसमा छलफल गर्न आफूहरु तयार रहेको जनाउनुभयो । राप्रपाद्वारा पनि स्वागत सरकारले निर्वाचनको मिति घोषणा गरेकामा राष्ट्रिय प्रजातन्त्र पार्टीले पनि स्वागत गरेको छ । पार्टी अध्यक्ष कमल थापाले रासससँग कुरा गर्दै सरकारले निर्वाचन गर्नु स्वागतयोग्य भन्दै निर्वाचनको वातावरण बनाउन सबै राजनीतिक दललाई आग्रह गर्नुभयो । उहाँले मधेस केन्द्रित राजनीतिक दललाई विश्वासमा लिएर निर्वाचनमा सहभागी गराउन पनि सरकारलाई आग्रह गर्नुभयो । मोर्चा निर्वाचनको विपक्षमा सरकारले स्थानीय तहको निर्वाचनको मिति घोषणा गरेसँगै संयुक्त लोकतान्त्रिक मधेसी मोर्चाले विमति जनाएको छ । बिजुलीबजारस्थित तराई–मधेस लोकतान्त्रिक पार्टीको कार्यालयमा बसेको मोर्चाको बैठकले संविधान संशोधन प्रक्रिया अघि नबढाई सरकारले एक्कासी निर्वाचन घोषणा गरेको भन्दै विभिन्न विरोधका कार्यक्रम सार्वजनिक गरेको हो । मोर्चाले एक विज्ञप्तिमार्फत मङ्गलबारदेखि चरणबद्ध विरोधका कार्यक्रम तय गरेको मोर्चाको एक घटक राष्ट्रिय मधेस समाजवादी पार्टीका महासचिव केशव झाले राससलाई जानकारी दिनुभयो । उहाँले हालकै अवस्थामा मोर्चा निर्वाचनको पक्षमा नरहेको भन्दै संशोधन प्रक्रिया अघि नबढेसम्म सङ्घर्ष जारी रहने बताउनुभयो । रासस

काठमाँड़ौ, फागुन ९ । सरकारले चुनावको घोषणा गरेपछि मधेशी मोर्चाले आन्दोलनको घोषणा गरेको छ । संबिधान संशोधन नगरी चुनावको घोषणा गर्ने निर्णय संविधान कार्यान्वयन गर्न नदिने कार्य भाएको मोर्चाको टिप्पणी छ । मधेशी मोर्चा र सरकारबीच भएको ३ बूँदे सहमती विपरीत चुनाव घोषणा गरेकोमा मोर्चाले आपत्ति जनाएको हो । एमालेले भने चुनाव घोषणाको स्वागत गरेको छ । मोर्चाले आज जारी गरेको विज्ञप्ति

काठमाडौं, फागुन ९ । सरकारले आगामी वैशाख ३१ गते स्थानीय तहको चुनाव गर्ने निर्णय गरेको छ । सिंहदरवारमा सोमबार  तेस्रो पटक साँझ डेढ घण्टा बसेको  मन्त्रिपरिषद् बैठकले स्थानीय तहको चुनाव गर्नको लागि बैशाख ३१ गतेको मिति घोषणा गरेको हो । मन्त्रीपरिषद बैठकअघि भएको छलफलमा निर्वाचन आयोगले वैशाख ३१ गते स्थानीय तहको चुनाव गर्न सरकारलाई सुझाव दिएको थियो । सरकारको सोमबार विहान बसेको मन्त्रीपरिषद बैठकले सयुक्त लोकतान्त्रिक मधेसी मोर्चाले उठाउँदै अाएको संविधान संशोधन प्रस्ताव मंगलबार संसदबाट प्रक्रियामा लैजाने  लैजाने निर्णय गरेको थियो । वैशाख ३१ गते एकै चरणमा चुनाव गर्ने गरी मिति तय गर्न सरकारलाई निर्वाचन  आयोगले सल्लाह दिएकाे थियाे । साेही अाधारमा  मन्त्रिपरिषद्को तेस्रो चरणको वैठकबाट चुनावकाे मिति घाेषणा गरीएकाे बैठकमा सहभागी एक मन्त्रीले बताए ।

काठमाडौं, फाल्गुन ९ । राष्ट्रिय प्रजातन्त्र पार्टीको अध्यक्षमा कमल थापा अत्याधिक बहुमतले विजयी भएका छन् । राप्रपाको अध्यक्षका लागि काठमाडौंको भृकुटीमण्डपमा आज भएको मतदानबाट थापाले २ हजार ८ सय ४ मत ल्याइ विजयी भएका हुन् । मतदानमा उनका प्रतिद्वन्द्वी प्रदिपविक्रम राणाले २ सय ५१ मत मात्र प्राप्त गरेका छन् । मतदानमा कुल ३१ सय ३६ मत खसेकोमा ८१ मत बदर भएको थियो । फागुन ६ गतेबाट सुरु भएको राप्रपाको एकता महाधिवेशनमा केन्द्रीय सदस्यका लागि भने मतदान भोलि विहान ७ बजेबाट सुरू हुने हुने बताइएकाे छ । ९८ केन्द्रीय सदस्यका लागि साढे ३ सय बढीको उम्मेदवारी परेको छ ।