काठमाडौं, फागुन ९ । ऊर्जामन्त्री जनार्दन शर्माले विधि र प्रक्रियाका नाममा विकास निर्माणको काममा ढिलाई गर्ने प्रवृत्तिले राष्ट्रको समृद्धि रोकिएको बताएका छन्। राजधानीमा आयोजित नेपाल पूर्वाधार सम्मेलनलाई सम्बोधन गर्दै मन्त्री शर्माले सरकारी निकायकै कार्यशैलीका कारण विकासको कामले गति लिन नसकेको बताए। ‘हुन त म मन्त्री हुँ, तर सरकारी क्षेत्रबाट भएको कमजोरी लुकाउँदिन, विधि र प्रक्रियाका नाममा विकास कार्यमा ढिलाई गर्ने प्रवृत्ति छ’ मन्त्री शर्माले भने, ‘यस्तो कार्यशैली नत्यागेसम्म देश विकासले कदापि गति लिदैन।’ आफूले ऊर्जा मन्त्रालयमा ढिला गर्ने प्रवृत्ति थोरै भए पनि सच्याएकाले जनताको पक्षमा केही काम गर्न सकिएको उल्लेख शर्माले उल्लेख गरे। ‘विधि र प्रक्रिया विकासको गतिलाई तीव्र पार्ने साधन बन्नुको सट्टा काममा ढिलाई गर्ने र अनुचित लाभ उठाउने हतियार बनेका छन् जसको कारण राष्ट्रको समृद्धि रोकिन गएको छ’, उनले भने। मन्त्री शर्माको प्रश्न थियो– ७४ किलोमिटर विद्युत प्रसारण लाईन बन्न १८ वर्ष लाग्छ, एउटा हाइड्रो पावर प्रोजेक्टको डिपिआर बन्न ७ वर्ष लाग्छ, अनि कसरी हुन्छ देशको विकास ? मन्त्री शर्माले देश विकासको पहिलो आधार विद्युतीकरण भएकोमा जोड दिँदै जलविद्युत आयोजना निर्माण ध्यान केन्द्रीत गर्न लगानीकर्ताहरुलाई आग्रह गरे । मुलुकका कतिपय विज्ञहरुलाई बिद्युत कहाँ बेच्ने भन्ने चिन्ताले सताएको कारण पनि जलविद्युत उत्पादनको कार्य सुस्ताएको उनले बताए । नेपालको विद्युत बाहिर बेच्ने नभई स्वदेशमै खपत गर्ने सोचाई बनाए मात्र देशलाई औद्योगिकरणको दिशामा अघि बढाउन सकिने मन्त्रीशर्माको भनाइ छ । औद्योगिकरण नै समृद्धिको आधार भएकोले त्यस्तो आधार तयार गर्न विद्युतीकरण आवश्यक रहेको उनले बताए ।

काठमाडौं, फागुन ९ । सरकारले मंगलबार नै संविधान संशोधन प्रस्ताव अघि बढाउने भएको छ । सोमबार सिंहदरबारमा बसेको मन्त्रीपरिषद बैठकले संसदमा दर्ता गराएको संशोधन प्रस्तावलाई प्रक्रियामा लैजाने निर्णय गरेको हो । प्रदेश नम्बर ५ को सीमांकन हेरफेरसहितको संविधान संशोधन विधेयक संसदमा दर्ता भएको छ । तर, एमालेसहितका विपक्षी दलहरुले विरोध गरेपछि प्रक्रिया अघि बढेको थिएन । आज साँझ स्थानीय तहको चुनाव घोषणा गर्ने र भोलिबाट संशोधन अघि बढाउने सरकारले निर्णय गरेको हो । संशोधन प्रक्रियालाई अब अघि बढाइने निर्णय भएको सरकार प्रवक्ता तथा सूचना तथा सञ्चार मन्त्री सुरेन्द्रकुमार कार्कीले भने । सरकारका प्रवक्ता कार्कीले मंगलबार बस्ने व्यवस्थापिका संसद बैठकमा संविधान संशोधन प्रक्रिया अगाडि बढाइने जानकारी दिए। साथै संघीय आयोगको कामलाई अघि बढाउने सरकारको निर्णय छ । यसअघि नै आयोग गठन गर्ने निर्णय भएपनि सदस्यहरु तोकिएका छैनन् ।

काठमाडौँ, फागुन ९ । सरकारले स्थानीय तहको संख्या बढाउने भएको छ । स्थानीय तह पुनसंरचना आयोगले बुझाएको ७१९ वटा तहको संख्या हुनुपर्ने प्रतिवेदन सरकारलाई बुझाएको थियो । तर, उक्त प्रतिवेशन पुर्वाग्रही भएको भन्दै नमान्ने मधेस केन्द्रीत दलले चेतावनी दिएका थिए । सोमबार विहान बसेको मन्त्रिपरिषद बैठकले स्थानीय विकासमन्त्री हितराज पाण्डे नेतृत्वको समितिले बुझाएको अध्ययन प्रतिवेदन स्वीकार गरेर तराई मधेससहित विभिन्न स्थानमा स्थानीय तहको सीमांकन हेरफेर गर्ने र संख्या बढाउने निर्णय गरेको हो । मन्त्रीपरिषद् बैठकले विज्ञहरुसँग छलफल गरेर पुनर्संरचना प्रतिवेदन टुंगाउन मन्त्री पाण्डे नेतृत्वको कार्यदललाई एक साताको समय दिने निर्णय पनि भएको छ । स्थानीय तह पुनर्संरचना आयोगको प्रतिवेदनमा असन्तुष्टी देखिएको भन्दै सरकारले तीन मन्त्रीको अध्ययन समिति बनाएको थियो । र, समितिले तराई मधेसमा संख्या बढाउनु पर्ने सुझावसहित हालै मात्र प्रधानमन्त्रीलाई प्रतिवेदन बुझाएको थियो । सरकारका प्रवक्ता एवं सञ्चारमन्त्री राम कार्कीले भने, ‘तराई मधेस लगायत विभिन्न स्थानमा सीमांकन उचित हेरफेर गर्न र संख्या अभिव्यक्त गर्न समितिले दिएको सुझावलाई सरकारले उचित र मनासिव ठानेको छ ।’

काठमाडौं,फागनु ९ । प्रधानमन्त्री पुष्पकमल दाहाल“प्रचण्ड”आइतबार सिराहा पुगेपछि त्यसले राष्ट्रिय चर्चा पायो । प्रचण्ड पुराणको उद्घाटन गर्न सिराहा पुगेको चर्चा समेत कतिपयले चलाए । सिराहा जिल्ला जातीय छूवाछूत र भेदभावले गाँजेको जिल्ला हो । खासगरी आर्थिक रुपमा परनिर्भर र भूमिहीन दलितहरु माथि पहाडी दलितको तुलनामा चर्को शोषण र यातनाका घटनाहरु दोहोरिने जिल्ला । दलित महिलाहरु माथि सामूहिक बलात्कारदेखि भूमिहीनहरुलाई उठिवास लगाउने जिल्ला । सिंगो बस्तीमा जाडोमा एउटा सिरकसमेत ओढ्न नपाउने विवश दलित समुदाय बस्ने जिल्ला । र, संयोगले प्रधानमन्त्री प्रचण्डलाई यही जिल्लाले संविधानसभाको दोश्रो निर्वाचनमा निर्वाचित समेत गरेको जिल्ला । अनिता परियार, गाउँमा यही छूवाछूतको पीडा सहेर पनि पढ्न सफल दलित महिला, उनलाई पढ्न सहयोग गर्यो एउटा अमेरिकी संस्थाले । अमेरिकी संस्थाका दयालुहरुको सहयोगमा उनले पढीन र केही कुरा थाहा पाइन । भगवान भनेको सबैको हुन्छ , दलित र गैर दलित सबैको भन्ने कुरा थाहा पाइन । मान्छे मान्छेबी उँच नीचको पर्खाल खडा गरेर एकमुट्ठी सामन्तहरुले रजाईं गरेको थाहा पाइन । उनलाई पढ्न सहयोग गर्ने अमेरिकी नागरिकको मृत्यु भएछ । अनिताले सोचिन– मलाई यति सहयोग गर्नेको ‘आत्मा’को शान्तिका लागि मन्दिरमा दियो बत्ती बाल्नु पर्यो । सिरहाको बस्तीपुरमा रहेको स्थानीय मन्दिरमा अनिताले बत्ती बाल्न खोजिन । तर भगवानको ठेक्का लिएका कथित उपल्लो जातिका मानिसहरुले अनितालाई मन्दिर प्रवेश गर्न दिएनन । अनिताले प्रतिवाद गरिन । तर उनी दलित थिइन र उनलाई बत्ती बाल्न दिइएन । यो घटना घटेको धेरै दिनभएको छैन । यस अघि पनि यस्ता घटनाहरु भइरहने अवस्था देखेर स्थानीय अगुवाहरुले धर्मको नामदिएर गरिने भेदभाव विरुद्ध धर्मकै नाम दिएर सामाजिक चेतना जगाउने अभियान अन्तर्गत महायज्ञको आयोजना गर्ने निर्णय गरे लाहानमा । महायज्ञबाट उठेको पैसा भने लाहानमा दलित छात्रावास र बृद्धाश्रमको निर्माणमा खर्च गर्ने घोषणा गरे । त्यस पछि उनीहरुले प्रधानमन्त्री प्रचण्ड समक्ष अनुरोध गरे त्यसको उद्घाटनका लागि । दलित अधिकारका लागि महायज्ञको बाटो कति ठीक या कति बेठीक भन्ने सैद्धान्तिक बहस बाँकी छ र प्रचण्डका लागि त्यो बाटो नै दलित मुक्तिको सही बाटो भने होइन । खासगरी १० वर्षे जनयुद्ध र त्यसपछि दलित अधिकारका पक्षमा माओवादीले खेलेको भूमिकाले यो पुष्टिगर्छ पनि । तर सिरहामा तत्कालका लागि त्यहाँ काज मिन्दार देखि आफूलाई जातीय सर्वोच्चताको शिखरमा राख्न चाहनेहरुका लागि स्थानीयस्तर बाट त्यही धर्मभित्रै पनि सुधार खोज्न आयोज नागरिएको महायज्ञमा सहभागी हुने उनले निर्णय गरे । यसले एका तिर दलित माथि विभेद विरुद्ध राज्यको सर्वोच्च नेतृत्वको प्रतिबद्धता झल्किन्थ्यो भने अर्कोतर्फ स्थानीय दलित समुदायमा समेत आफ्नो अधिकारका पक्षमा साहस थप्ने वातावरण निर्माण गथ्र्यो । तर यो कुरालाई कतिपय पक्षबाट बंग्याइयो । हिजो अनिता परियार या त्यहाँका मुसहर, डोम, दुसाध, चमारहरुमाथि चरम जातीय विभेद हुँदा त्यो समाचार बनेन, दलित महिलाहरु सामूहिक बलात्कार हुँदा त्यसले राष्ट्रिय चर्चा पाएन, तर राज्यको नेतृत्व गर्दै प्रधानमन्त्रीले दलितहरुको छात्रावास र बृद्धा श्रमका लागि आयोजना गरिएको एउटा कार्यक्रमको उद्घाटन गर्दा त्यसको बिरोध भयो । यो बिरोध एकातिर प्रचण्डप्रतिको पूर्वाग्रह थियो भने अर्को तर्फ यो जातीय अभिमानबाट निस्किएको मनोविज्ञान थियो । अहिले दलित आन्दोलन कमजोर भएको छ । दलित अधिकारका मुद्दाहरु संगठित ढंगले उठ्न सकेका छैनन् । राज्यको नेतृत्वमा दलितका लागि संवेदनशील दल र व्यक्तिहुँदा समेत दलित आन्दोलनले ऐतिहासिक उपलब्धिहरु हासिल गर्न सकेको छैन । त्यसैले पनि यस्ता गलत र भ्रामक चर्चाहरु चलिरहेका हुन । यसतर्फ दलित अधिकारकर्मी र समग्र दलित अधिकारको पक्षमा रहेकाहरुले बेलैमा सचेत हुनु आवश्यक छ । दलित अनलाईनबाट

काठमाडौँ, फागुन ९ । प्रधानमन्त्री पुष्पकमल दाहाल ‘प्रचण्ड’ले स्थानीय निकाय निर्वाचनको मिति आजै घोषणा गर्ने बताएका छन् । निजी तथा आवासीय विद्यालय सङ्गठन (प्याब्सन)को १३ औँ वार्षिक साधारणसभालाई आजसम्बोधन गर्दै प्रधानमन्त्रीले संविधान कार्यान्वयनलाई सुनिश्चित गर्न निर्वाचन अनिवार्य रहेको बताए । प्रधानमन्त्री प्रचण्डले ठूलो बलिदानीबाट प्राप्त उपलब्धिको रक्षार्थ संविधानलाई सफल कार्यान्वयन गर्नुपर्नेमा जोड दिँदै आगामी कात्तिकमा प्रदेश र केन्द्रको निर्वाचन गर्नका लागि सरकारले तयारी गरिरहेको जानकारी दिए । मुलुकको शिर झुक्ने गरी आफूले कुनै पनि निर्णय नगर्ने प्रतिबद्धता व्यक्त गर्दै उनले आगामी दिनमा मुलुकको समृद्धिका लागि अगाडि बढ्ने वचनबद्धता व्यक्त गरे । कार्यक्रममा नेपाली काँग्रेसका नेता चन्द्र भण्डारी र नेकपा(एमाले)का नेता गङ्गालाल तुलाधरले मुलुकमा गुणस्तरीय शिक्षा आवश्यक भएको बताए। रासस

काठमाडौं, फागुन ९  । प्रधानमन्त्री पुष्षकमल दाहाल प्रचण्डले काठमाडौं—निजगढ द्रुतमार्ग (फास्ट ट्रयाक) निर्माण कार्य सुरु हुन् बताएका छन् ।  सोमबार बिहान निजगढ द्रुतमार्ग (फास्ट ट्रयाक) सुझाव समितिले नेपाल सरकारलाई  बुझाएको प्रतिबेदन बुझ्दै प्रधानमन्त्रीले अब छिटोभन्दा छिटो फास्ट ट्रयाक निर्माणको काम सुरु हुने बताएका हुन् । प्रतिवेदन बुझ्दै प्रधानमन्त्रीले भने–‘समितिले तोकिएको अवधिभित्र तोकेको कार्यदेश अनुसार सुझाव दिएको छ, त्यसका लागि धन्यवाद । केही दिन पहिले म आफैले फास्ट ट्रयाकको स्थलगत निरीक्षण गरेको थिएँ । फास्ट ट्रयाक नेपालले बनाउन सक्छ कि सक्दैन भन्ने बहस थियो, अब त्यो कन्फ्युजन अन्त्य भएको छ । प्रतिवेदन आएको छ, अब छिटोभन्दा छिटो फास्ट ट्रयाक निर्माणको काम सुरु हुन्छ ।’ सुझाव समितिका संयोजक डा. मीनबहादुर श्रेष्ठले प्रधानमन्त्री पुष्पकमल दाहाल ‘प्रचण्ड’लाई प्रतिवेदन बुझाएका हुन् ।  गत पौष ७ गते फास्ट ट्रयाक निर्माणको सम्भाव्यता अध्ययन गरी सरकारलाई सुझाव पेश गर्न मन्त्रीपरिषदले राष्ट्रिय योजना आयोगका उपाध्यक्ष डा. मीनबहादुर श्रेष्ठको संयोजकत्वमा ७ सदस्यीय सुझाव समिति बनाएको थियो । समितिलाई पुरानै कम्पनिले बनाएको डिपीआर लिन सकिने वा नयाँ बनाउनुपर्ने, फास्ट ट्रयाकको बित्तीय व्यवस्थापन कसरी गर्ने, नेपाल आफैले बनाउन सक्ने वा नसक्ने, कुन मोडालिटीमा बनाउनेजस्ता विषयमा सरकारलाई सुझाव पेश गर्न कार्यदेश दिइएको थियो । प्रतिवेदन बुझाउँदै संयोजक डा. श्रेष्ठले सरकारले आफूहरुलाई दिएको कार्यदेशअनुसार प्रतिवेदन बुझाएको बताए। प्रतिवेदनमा समय र खर्चको बचतका लागि पुरानो कम्पनिले बनाएको डिपीआर लिनु उपर्युक्त हुने, फास्ट ट्रयाक नेपालको आफ्नै लगानीमा निर्माण गर्न सकिने, त्यसका लागि वार्षिक १० देखि २० अरब बजेटको व्यवस्था गर्न सकिने र नेपाल सरकार आफैले कार्यालय स्थापना गरेर काम सुरु गर्नु राम्रो हुने विषय समेटिएको संयोजक श्रेष्ठले जानकारी दिए।  

रत्ननगर (चितवन), फागुन ९। चितवनको कविलासस्थित सडकबाट एउटा बोलेरो जिप आज बिहान त्रिशूली नदीमा खस्दा दुईजना बेपत्ता भएको र अन्य चारजना घाइते भएको जिल्ला प्रहरी कार्यालय चितवनले जनाएको छ । दुर्घटनामा परी गोर्खा ताकु–६ बस्ने ६५ वर्षीया विष्णुमायाँ गुरुङ र उनका नाति १३ वर्षीय कविन गुरुङ बेपत्ता भएको चितवन प्रहरीले जनाएको छ । आज बिहान करिब ३ बजेको समयमा चितवनको खैरहनीबाट गोरखा जाँदै गरेको ना३ख ७५४३ नंको बोलेरो कविलास–४ स्थित सत्र किलो भन्ने स्थानबाट त्रिशूली नदीमा खस्दा सो दुर्घटना भएको हो । दुर्घटनामा परी घाइते हुनेहरुमा चितवन कालिका नगरपालिका–५ का ३३ वर्षीय शिव खड्का (चालक), गोर्खा ताकुकै ४० वर्षीय भीमबहादुर गुरुङ, सोही ठाउँका २८ वर्षीय टीका गुरुङ र अर्का ५ वर्षीय न्युटल गुरुङ घाइते भएको र अहिले उनीहरुको चितवन मेडिकल कलेजमा उपचार भइरहेको जनाइएको छ । कोठाको सामान लिएर जाँदै गरेका उनीहरु दुर्घटनामा परेका हुन् । बोलेरो पानी भित्रै रहेकाले निकाल्ने प्रयास जारी रहेको प्रहरीले जनाएको छ । रासस

काठमाडौँ, फागुन ९ । प्रधानमन्त्री पुष्पकमल दाहाल ‘प्रचण्ड’ले स्थानीय तहको निर्वाचनको मिति घोषणाका बारेमा निर्वाचन आयोगका पदाधिकारीसँग परामर्श गर्नुभएको छ । प्रधानमन्त्री निवास बालुवाटारमा आइतबार साँझ भएको परामर्शमा स्थानीय तहको निर्वाचनको मिति घोषणा, आयोगको तयारी र सरकारको तयारीका बारेमा कुराकानी भएको थियो । सो क्रममा प्रधानमन्त्रीले सरकार निर्वाचनको मिति घोषणा गर्ने अन्तिम तयारीमा रहेको जानकारी दिँदै निर्वाचन सम्पन्न गर्ने आवश्यक तयारी गर्न आयोगका पदाधिकारीलाई आग्रह गर्नुभएको थियो । निर्वाचनका लागि आवश्यक पर्ने सम्पूर्ण सहयोगका लागि सरकार गम्भीर रहेको बताउँदै प्रधानमन्त्रीले वैशाख मसान्तभित्रै निर्वाचन गर्नेगरी सम्पूर्ण तयारी गर्न आयोगका पदाधिकारीलाई आग्रह गर्नुभएको प्रधानमन्त्रीको सचिवालयले जनाएको छ । भेटमा आयोगका पदाधिकारीले आयोग सरकारले तोकेकै मितिमा निर्वाचन गराउन सक्षम रहेको जानकारी दिँदै निर्वाचनमा सम्पूर्णरुपले सहयोग गर्न प्रधानमन्त्रीको ध्यानाकर्षण गराउनुभएको थियो । प्रमुख निर्वाचन आयुक्त अयोधीप्रसाद यादवले निर्वाचनको तयारीका सम्बन्धमा आयोगले हालसम्म गरेको तयारीका बारेमा प्रधानमन्त्रीलाई जानकारी गराउनुभएको थियो । आयोगले पदाधिकारीको पूर्णता पाएपछि प्रधानमन्त्रीसँगको छलफल यो नै पहिलो हो । रासस

काठमाडौं, फाल्गुण ८ । प्रधानमन्त्री पुष्पकमल दाहाल ‘प्रचण्ड’ले आगामी वैशाख मसान्तभित्र चुनाव गरिने बताएका छन् । सरकारले स्थानीय तहको निर्वाचनको मिति घोषणाको तयारी गरिरहेको बेला आज साँझ निर्वाचन आयोगका पदाधिकारीहरुसँग परामर्श गर्दै प्रधानमन्त्री प्रचण्ड चुनावका लागि सहयाेग गर्न अाग्रह गरेका छन् । प्रधानमन्त्री निवास बालुवाटारमा निर्वाचन आयोगका प्रमूख आयुक्त र आयुक्तहरुलाई बोलाएर प्रधानमन्त्रीले निर्वाचनबारे परामर्श गरेका छन् भने सरकार निर्वाचनको मिति घोषणा गर्ने अन्तिम तयारीमा रहेको जानकारी गराउँदै निर्वाचनका लागि तयारी गर्न आयोगलाई आग्रह गरेका छन् । निर्वाचनका लागि आवश्यक पर्ने सम्पूर्ण सहयोगका लागि सरकार गम्भीर रहेको बताउँदै प्रधानमन्त्रीले बैशाख मसान्तभित्र नै निर्वाचन गर्ने गरी सम्पूर्ण तयारी गर्न आयोगका पदाधिकारीहरुलाई आग्रह गरे । भेटमा आयोगका पदाधिकारीहरुले आयोग सरकारले तोकेकै मितिमा निर्वाचन गर्न सक्षम रहेको जानकारी दिँदै निर्वाचनमा सम्पूर्ण रुपले सहयोग गर्न प्रधानमन्त्रीसँग आग्रह गरेका थिए ।

काठमाडौं, फागुन ८ । मधेसी मोर्चाको आज बसेको वैठकमा पनि आफ्नो अडानलाई छोडेन । प्रधानमन्त्री पुष्पकमाल दाहाल ‘प्रचण्ड’ले बालुवाटारमा बोलाएको बैठकमा जानु अघि के बोल्ने भन्ने तयारीका लागि आइतबार साँझ बिजुलीबजारस्थित तराई मधेस लोकतान्त्रिक पार्टीको कार्यालयमा मधेशी मोर्चाको बैठक बसेको थियो । बैठकबाट ‘पहिला संविधान संशोधन अनि मात्रै चुनावको मिति’ भन्ने अडान कायमै राखिएको छ । सरकारले सोमबार स्थानीय तहको चुनावको मिति घोषणा गर्ने तयारी गरिरहेको छ ।

काठमाडौंँ, फागुन ८ । अख्तियार दुरुपयोग अनुसन्धान आयोगले त्रिभुवन विश्वविद्यालय सेवा आयोगबाट नियन्त्रणमा लिएको २२ वटा विषयको उत्तरपूस्तिकाको अनुसन्धान सुरु भएको बताएको छ । अघिल्लो बुधबार छानविनका लागि नियन्त्रणमा लिएको त्रिवि सेवा आयोगको परीक्षाका विभिन्न सामग्रीसहित अनुसन्धान सुरु भएको बताएको हो । उजुरीलाई ध्यानमा राख्दै चाँडो भन्दा चाँडो परिणाम निकाल्न आयोगले अनुसन्धानको काम अगाडि बढाएको जनाएको छ । एभरेष्टदैनिक डटकमलाई अनियमितताको अधिक उजुरीका कारण नियन्त्रणमा लिएका सम्पूर्ण विषयहरुको छानविन सुरु भएको र त्यसले पूर्णता नपाई परिणाम बाहिर निकाल्न नमिल्ने आयोगका सहसचिव एवम् प्रवक्ता जीवराज कोइराला स्रोतले जानकारी दिएको छ । उनले भने ‘विषय अत्यन्त्यै सम्वेदनशिल भएकोले सम्पूर्ण अध्ययन पश्चातमात्रै जानकारी गराइनेछ’ । अख्तियारले ग्रामीण विकास, गणित लगायत २२ विषयको परीक्षा सामाग्री नियन्त्रणमा लिएको थियो । परीक्षा सामग्री नियन्त्रणमा लिएसँगै सम्पूर्ण शैक्षिक क्षेत्र र सरोकारवालाहरु क्रियाशिल भएका छन् । उनीहरुले निश्पक्ष छानविन र दोसीउपर कडा कारवाहीको समेत माग गरेका छन् ।

रुपन्देही, ८ फागुन । पक्राउ परेका आफ्ना कार्यकर्ताको रिहाइको माग गर्दै रुपन्देही प्रहरी कार्यालयमा ढुंगमुढा गरेका छन् । तराई विखण्डनको नारा लगाउँदै मर्चवारमा प्रदर्शन गरिरहेका सीके राउतका कार्यकर्तालाई नियन्त्रणमा लिन खोज्दा प्रहरीसँग दोहोरो झडप भएको थियो । कार्यकर्ताहरुले बडवलियामा रहेको प्रहरी चौकीमाथि ढुंगामुढा बर्साएका थिए । प्रदर्शनकारीको ढुंगा प्रहारबाट तीन प्रहरी घाइते भएका लुम्बिनी अञ्चल प्रहरी प्रमुख एसएसपी दिपक थापाले जानकारी दिएका छन् । झडपको क्रममा प्रहरीको साथमा रहेको एउटा हतियार लुटिएको उनले बताए । प्रहरीले स्थितीलाई नियन्त्रणमा लिन पाँच राउन्ड हवाई फायर र पाँच राउन्ड अश्रु ग्याँस प्रहार गरेको छ । शनिबार मर्चवार क्षेत्रको मझगावामा सिके राउत कार्यकर्ता र प्रहरीबिच झडप भएको थियो । झडपपछि केही कार्यकर्तालाई प्रहरीले नियन्त्रणमा लिएको थियो । उनीहरुको रिहाईको माग गर्दै आज पनि सीकेका कार्यकर्ताहरुले प्रहरीमाथि आक्रमण गरेका हुन् ।

पुनर्वास, फागन ८ । भारतीय सीमा सुरक्षा बलले नेपाली भूमिमा आएर काम गर्न नदिएपछि कन्चनपुर जिल्लाकाे पुनर्वासमा तनाव सिर्जना भएको छ । पुनर्वास नगरपालिकाले वडा नं. ८ आनन्दबजार नजिक नेपालको भूमिमा पर्ने खाल्डोमा ह्युमपाइप राख्न खोज्दा भारतीय सीमा सुरक्षा बलले अवरोध गरेका हुन । नेपाल र भारत सीमा क्षेत्र दशगजाभन्दा डेढसय मिटर वर रहेको उक्त खाल्डोमा नगरपालिकाले ह्यूम पाइप हालेको थाहा पाएपछि सीमा सुरक्षा बलले हस्तक्षेप गरेको नेकपा माओवादी केन्द्रका कञ्चनपुर जिल्ला इन्चार्ज बीर बहादुर थापाले बताए । “हाम्रो सीमामा आएर उनीहरुले खाल्डोमा पाइप हाल्न पाईदैन भनेका छन् ।” उनले भने, “प्रशासनलाई जानकारी गराएका छौं तर अहिले नेपालकै भूमिमा उनीहरु आएर बसेको भन्ने खबर आएको छ ।” भारतीय पक्षबाट बारम्बार सताईंदै आएका उक्त क्षेत्रका वासिन्दा भारतीय प्रहरी नै नेपाल भूमिमा आएर बसेपछि झन त्रसित भएका छन् । सीमा सुरक्षा बलले नेपाली भूमिमा डेरा जमाएपछि जिल्लास्थित राजनीतिक दलहरुले जिल्ला प्रशासन कार्यालयसँग तत्काल भारतीय पक्षसँग समन्वय गरी सीमा क्षेत्रबाट सुरक्षा बल हटाउन माग गरेका छन् । आवरण तस्वीरः यसअघि दशगजा क्षेत्रमा भारतीहरुले बनाएको बाँध

काठमाडौं, फागनु ८ । स्थानीय निकायको निर्वाचनको मिति घोषणाको पूर्वसन्ध्यामा प्रधानमन्त्रीले निर्वाचन आयोगका मुख्य पदाधिकारीलाई बालुवाटारमा छलफलका लागि बोलाएका छन् । प्रधानमन्त्री सचिवालयले दिएको जानकारी अनुसार, स्थानीय निकायको निर्वाचनको तयारीसँग जोडिएका विषयमा छलफल गर्न र चुनावको मिति घोषणाका लागि आधार तयार पार्न प्रधानमन्त्रीले बैठक बोलाएका हुन । आज साँझ ६ बजे बोलाइएको बैठकमा निर्वाचन आयोगका प्रमुख आयुक्त, अन्य आयुक्त र पदाधिकारी उपस्थिति हुने छन् । बैठकमा सत्तारुढ नेपाली कांग्रेस र माओवादी केन्द्रका शीर्ष नेताको समेत उपस्थिति हुने छ । बैठकले निर्वाचनको मिति घोषणासँगै आयोग र सरकारले गर्नुपर्ने तयारीलगायतका विषयमा बिस्तृत छलफल गर्ने र सोमबारको मन्त्रीपरिषदको बैठकबाट मिति घोषणालाई अन्तिम टुंगो लगाउने विषयमा छलफल गर्ने छ । सरकारले संविधान संशोधन प्रस्तावसँगै निर्वाचनलाई समेत सँगै लैजाने बताए अनुसार, प्रधानमन्त्री प्रचण्डले सबै पक्षसँग चुनावको वातावरण बनाउन छलफल जारी राखेका छन् ।

काठमाडौं, फागुन ८ । राप्रपाको अध्यक्ष पदका लागि प्रदिप विक्रम राणाले अध्यक्ष पदको उम्मेदवारी घोषणा गरेका छन् । राप्रपाको एकता महाधिवेशनमा आज निर्वाचन प्रक्रिया सुरु भएको छ । काठमाडौं क्षेत्र नं ७ का क्षेत्रीय अध्यक्ष राणाले आईतबार रिपोर्टर्स क्लब नेपालमा पत्रकार सम्मलेन गरेका हुन् । उनले हालका अध्यक्ष कमल थापाले पार्टीलाई मण्डलेतन्त्रले चलाउन खोजेको आरोप लगाए । राणाले भने,‘आज बिहानदेखि मैले उम्मेद्वारीको फर्म माँगे तर निरञ्जन थापाले उपलब्ध गराउनु भएन्, किन भनेर सोधेको त हाम्रो सहमति भैसकयो, तपाईले पाउनुहुन्न भनेर थर्काउन थाले, के मैले निर्वाचनमा आफ्नो अधिकार प्रयोग गर्न नपाउने हुँरु, अब म न्यायको ढोकामा जान्छु, मैले कसैको दवाब र कसैको भनसुनमा उम्मेद्वारी दिईरहेको छैन्, आफ्नो अधिकारलाई प्रयोग गर्न खोज्दैछु।’ ‘मलाई हिजोको बन्दसत्रमा बोल्ने समय दिईएन, म बोल्छु भनेर प्रतिप्रश्न गर्दा कमल थापाले यसलाई घाक्रेठ्याक लगाएर बाहिर निकाल भनेर आदेश दिनुभयो, त्यसपछि उहाँका गुण्डाहरूले मलाई लतार्दै बाहिर निकाले, के यहि हो उदारवाद ? कि ४ जना नेताको मात्र पार्टी हो राप्रपा ? यसरी आत्मसम्मान माथि आँच र चोट पुग्ने खालको आदेश दिने कमल थापाको के म गुलाम होरु यसरी मण्डले प्रवृत्तले पार्टी चल्दैन र लाखौ कार्यकर्ताको भविष्य अन्धकार बन्छ।’उनले आक्रोश पोख्दै प्रश्न गरे । आफुलाई धम्की आईरहेको भन्दै राणाले प्रहरी प्रशासनसँग आफ्नो जीवन सुरक्षा गरिदिन आग्रह गरे । भने– ‘मलाई धम्क्याउने र थर्काउने काम भैरहेको छ, मेरो जीवनको सुरुक्षा प्रशासनले गर्नुपर्छ, म अध्यक्षको लागि मैदानमा छु, चार हजार प्रतिनिधिको आवाजको आधारमा मैले अध्यक्षको पदको लागि उम्मेद्वार घोषणा गरेको हुँ, हामी यूवाले नेपालको राजनीतिको नेतृत्वमा भाग लिन नपाउने हो, यदि हो भने कमल थापाले यसको जवाफ दिनुपर्छ।’