मस्को । विश्वकप फुटबल अन्तर्गत शुक्रबार बेलुका भएको समूह ‘डी’ अन्तर्गतको खेलमा नाइजेरियाले पहिलो पटक विश्वकप खेलिरहेको आइसल्याण्डलाई हराएको छ । पहिलो खेलमा बलियो टिम अर्जेन्टिनालाई १-१ को बराबरीमा रोकेको आइसल्याण्ड दोस्रो खेलमा नाइजेरियासँग पराजित भएको हो । यो खेलमा नाइजेरियालाई जिताउन दुवै गोल अहमद मुसाले गरे । पहिलो हाफमा गोलरहित भएको खेलमा दुवै गोल दोस्रो हाफमा भएको हो । मुसाले ४९ औँ मिनेटमा गोल गर्दै टिमलाई सुरुवाति अग्रता दिलाए । उनैले ७५ औँ मिनेटमा अर्को सुन्दर गोल गर्दै अग्रता दोब्बर पारे । आइसल्याण्डले त्यसपछि खेलमा फर्किने मौका पाएको थियो । ८२ औँ मिनेटमा पाएको पेनाल्टीमा आइसल्याण्डका गिल्फी सिगुर्डसनले गोल गर्न सकेनन् । उनले प्रहार गरेको पेनाल्टी बल बार भन्दा माथिबाट गयो । नाइजेरियाका टिरोन्नी इबुएहीले आइसल्याण्डका अल्फ्रेड फिन्बोगासनलाई फउल गरेपछि आइसल्याण्डले पेनाल्टी पाएको हो । यो पेनाल्टीको निर्णय गर्नका लागि रेफ्री म्याथ्यु कोग्नरले भिएआरको सहायता लिएका थिए । यो पेनाल्टी मिस गर्ने त्यहि टिम हो, जसले पहिलो खेलमा स्टार स्ट्राइकर अर्जेन्टिनाका लियोनल मेस्सीको पेनाल्टीमा गोल हुन दिएको थिएन ।पहिलो खेलमा बराबरी गरेको आइसल्याण्ड दोस्रो खेलमा पराजित भयो । तर पहिलो खेलमा कोस्टारिकासँग २-० ले हारेको नाइजेरिया यसमा २-० ले नै विजयी भयो । यसअघि कोस्टारिकाले अर्जेन्टिनालाई ३-० ले हराएको थियो । यो हारले अर्जेन्टिनाको अघिल्लो चरण पुग्ने सम्भावना लगभग सकिएको छ । तर आइसल्याण्डमाथि नाइजेरियाको जितले उसको सम्भावना केही बाँकी रहेको देखिएको छ । अब समूह चरणको अन्तिम खेलमा अर्जेन्टिनाले नाइजेरियाको सामना गर्नेछ । यो खेलमा जित निकालेमा र गोल अन्तर धेरै राख्न सकेमा अर्जेन्टिना अघिल्लो चरण जान सक्नेछ । यस्तै, आइसल्याण्डले अब क्रोएसियाको सामना गर्नेछ । यो समूहमा क्रोसियाको ६ तथा नाइजेरियाको ३ अंक भएको छ । आइसल्याण्ड र अर्जेन्टिनाको एक एक अंक मात्रै छ । -एजेन्सी

मस्को । रसियामा भइरहेको विश्वकप फुटबलमा समूह बी अन्तरगत दोश्रो चरणको खेलमा स्पेनले इरानलाई पराजित गरेको छ । जीतसँगै स्पेनको अघिल्लो चरणको संभावना बढेको छ । पहिलो खेल बराबरी खेलेका स्पेन र पोर्चुगलले दोश्रो खेलमा भने समान १-० को जीत निकालेका छन् । स्पेनको जीतमा डिएगो कोस्टाले ५४ औं मिनेटमा गोल गरे । पहिलो खेलमा पनि उनले नै स्पेनका लागि दुई गोल गरेका थिए । इरानले दोश्रो हाफमा गोल फर्काए पनि अफसाइड भएपछि उसको गोलले मान्यता पाएन । यो नतिजासँगै समूह बी बाट मोरक्को बाहिरिएको छ । एक खेल बाँकी हुँदा स्पेन, इरान र पोर्चुगलको भने अघिल्लाे चरणको संभावना बाँकी छ । यी मध्ये जुनसुकै दुई टोली अघिल्लो चरण प्रवेश गर्नेछन् । पोर्चुगल रस्पेनको समान ४ अंक र इरानको ३ अंक छ । समूहको अन्तिम खेल पोर्चुगल र इरान तथा स्पेन र मोरक्कोबीच हुनेछ । समूह ए बाट रुस र उरुग्वे दोश्रो चरणमा प्रवेश गरिसकेका छन् । बिहिबार समूह सी र डी खेल हुनेछन् । -एजेन्सी

काठमाडौँ । विश्वकपको पारो जति जति माथि चढ्दै छ, नयाँ नयाँ फुटबल चर्चाहरू हुन थालेका छन् ।  फुटबल खेल मात्र रहेको छैन फेसन ट्रेन्ड नै बनिसकेको छ ।  अरबौं डलरको विज्ञापन, पर्यटकहरूको भिडभाड र फ्यानहरूको पागलपन यस वैश्विक खेल-महाकुम्भका थुप्रो आकर्षण रहेका छन् । यति मात्र होइन विश्वका शीर्ष फेसन ब्राण्ड र स्पोर्ट किट निर्माण गर्ने कम्पनीहरू अहिले महत्वपूर्ण व्यापार हुने आशा राख्दछन् । यसको प्रमुख कारण फुटबलप्रेमीहरूको खेल प्रेम नै हो । तपाईं-हामी पनि यसबेला आ-आफ्नो मन परेको टीमको जर्सी लगाएर सो टीमप्रति आफ्नो समर्थन जनाइरहेका छौँ ।  तर के तपाईंलाई थाहा छ १४ जुन देखि १५ जुलाईसम्म हुने विश्वकपमा कुन टोलीले कुन ब्राण्डका ‘स्पोर्ट किट’ प्रयोग गर्दैछ भनेर । हामीले ३२ वटै टीमले कुन कुन ब्राण्डको सामान प्रयोग गरिराखेका छन् भन्ने महत्वपूर्ण जानकारी जम्मा गरेका छौँ । तीन वटा ठुला ब्राण्डहरूको प्रयोजनमा दबदबा: विश्वकपमा ३२ वटा टीमको सहभागिता रहेपनि तिनीहरूका जर्सी लगायत अन्य स्पोर्ट किट प्रायोजन गर्ने ब्राण्डहरूमा भने संयुक्त राज्य अमेरिका, जर्मनी, ब्रिटेन डेनमार्क र इटालीका कम्पनीहरूको मात्र उपस्थिति देखिएको छ । यसमा एउता एसियाली ब्राण्ड समेत देखा परेको छ । यति हुँदा-हुँदै पनि विश्वकप खेल्ने टीमहरूका जर्सीहरूमा भने मुख्यतः तीनवटा ब्राण्ड: एडिडास, नाइकी र पुमा देखा पर्ने भएका छन् । यसका अतिरिक्त न्यु ब्यालेन्स, अम्ब्रो आदिले पनि आफ्नो केही उपस्थिति एदेखाउने भएका छन्। हेरौं यस  खेल-महाकुम्भमा खेलाडीहरूका जर्सीहरूमा देखिने ब्राण्डहरूको उपस्थिति: एडिडास: एडिडास फिफाको अधिकारिक फुटबल सप्लायर हो । विश्वकप २०१८ को लागि उसले एडिडास टेलिस्टार-१८ नामको बल सार्वजनिक गरेको छ । एउटा विशेष चिप र सेन्सर प्रयोग गरिएको यस बलले रेफ्रीको धेरै जसो कामलाई सजिलो पारिदिएको छ र एडिडासको अफिसियल वेबसाइटमा बिक्रीका लागि राखिएको यस बलको नेपाली मूल्य लगभग १८ हजार ६ सय पर्दछ । एडिडास जर्मनीको बहुराष्ट्रिय कम्पनी हो । फिफाका लागि सामग्री उपलब्ध गराउनुका अतिरिक्त यसले यस विश्वकपमा भाग लिइरहेका १२ वटा टोलीहरूका ‘स्पोर्ट किट’ उपलब्ध गराएको छ । यस वर्षको विश्वकपमा इजिप्टका मोहम्मद सलाह, अर्जेन्टिनाका मेस्सी, जर्मनीका गोलरक्षक म्यानुअल न्युअर, स्पेनका सर्जियो रामोस लगायत उनका टिमका खेलाडीहरू एडिडासको जर्सीमा रहेका छन् । यसका अतिरिक्त रसिया, मोरक्को, इरान,मेक्सिको, स्वीडेन, बेल्जियम, कोलम्बिया र जापानका खेल पोशाक पनि एडिडास ब्राण्डका रहेका छन् । नाइकी:   अमेरिकी बहुराष्ट्रिय कम्पनी नाइकीले यस विश्वकपमा १० वटा टिमहरूलाई जर्सी लगायत अन्य किट उपलब्ध गराएको छ । फ्रान्सेली स्ट्राइकर एन्टोनी ग्रिजम्यान, ब्राजिलका नेइमार, पोर्चुगलका क्रिस्टियानो रोनाल्डो नाइकीको जर्सीमा छन् । साथै इंग्ल्याण्ड, पोल्याण्ड, साउदी अरेबिया, क्रोएसिया, नाइजेरिया, दक्षिण कोरिया र अस्ट्रेलियाका खेलाडीहरूले समेत नाइकीका जर्सी लगाएका छन् । पुमा: पुमा पनि जर्मन बहुराष्ट्रिय ब्राण्ड हो ।  यस पटक उसले २ वटा टोलीहरूलाई मात्र जर्सी लगायतका समान उपलब्ध गराएको छ ।  कुनै समय यस मामिलामा अग्रणी रहेको पुमाले सन् २००६ को विश्वकपमा १२ वटा टोलीहरूलाई समान उपलब्ध गराएको थियो । यस विश्वकपमा उसले उरुग्वे र  स्विट्जरल्याण्डलाई जर्सी उपलब्ध गराएको हो । यिनको पनि छ उपस्थिति: माथि उल्लिखित ठुला ब्राण्डका अतिरिक्त केही अन्य ब्राण्डहरूले समेत केही टोलीहरूका जर्सीमा सजिने अवसर प्राप्त गरेका छन्: न्यु ब्यालेन्स अमेरिकन ब्राण्ड न्यु ब्यालेन्सले कोस्टारिका र पानामाका जर्सी प्रयोजन गरेको छ । त्यस्तै गरेर ब्रिटिश ब्राण्ड ‘अम्ब्रो’ले पेरु र सर्बियाका जर्सी उपलब्ध गराएको छ भने डेनिस ब्राण्ड ‘ह्यामेल‘ले डेनमार्क, जर्मन ब्राण्ड ‘उलस्पोर्ट’ले ट्युनिसिया, इटालियन ब्राण्ड ‘इरिया’ले आइसल्याण्डलाई जर्सी लगायतका समान उपलब्ध गरएको छ । यस विश्वकपमा उपस्थित एकमात्र गैर-पश्चिमी एसियाली ब्राण्ड ‘रोमाइ’ हो । युएइको यस ब्राण्डले सेनेगललाई समान उपलब्ध गराएको छ । नाइकीले गुमाएको अनुबन्ध अमेरिकन मल्टिनेसनल ब्राण्ड नाइकीसँग फुटबल किट उपलब्ध गराउने बारे इरानको पनि अनुबन्ध भएको थियो । तर हालै इरानमाथि अमेरिकाले लगाएका प्रतिबन्धहरूको पालना गर्दै नाइकीले उक्त अनुबन्ध अस्वीकार गरेपछि उक्त ‘डील’ रद्द भएको थियो र पछि यो मौका एडिडासले हात पाऱ्यो । इरानी सामाजिक संजाल प्रयोगकर्ताहरूले यस विषयमा नाइकीलाई ट्रोल पनि गरेका छन् ।  आफ्नो पहिलो खेलमा मोरक्कोलाई हराएपछि इरानी फुटबलप्रेमीहरूले सामाजिक संजालमा “नाइकी तिमीबिना पनि हामीले गरेर देखायौं ।” लेखेर उसलाई ट्रोल गरेका थिए ।   

काठमाडौं, असार ६ । २ खर्बभन्दा बढीको बजेट ल्याएका प्रदेश सरकारहरूको आन्तरिक स्रोतबाट आम्दानी भने न्यून देखिएको छ । प्रदेश सरकारहरूले शुक्रबार सार्वजनिक गरेको आगामी आर्थिक वर्षको बजेटअनुसार सातवटै प्रदेशले २५ अर्ब ६३ करोड रुपैयाँमात्र आन्तरिक स्रोत परिचालन गर्नेछन् । ७ वटा प्रदेशको बजेटको आकार २ खर्ब ६ अर्ब ७७ करोड रुपैयाँ छ । सार्वजनिक गरिएको बजेटअनुसार सबैभन्दा बढी आन्तरिक राजस्व उठाउनेमा ३ नम्बर प्रदेश छ । राजस्व संकलन लक्ष्य ९ अर्ब ३३ करोड रुपैयाँ राखेको ३ नम्बर प्रदेशले ३५ अर्ब ६१ करोडको बजेट ल्याएको छ । यस्तै, सबैभन्दा कम राजस्व उठाउनेमा कर्णाली प्रदेश छ । आगामी आर्थिक वर्षमा ५० करोड रुपैयाँमात्र राजस्व परिचालनको लक्ष्य लिएको कर्णालीले प्रदेशले २८ अर्ब २८ करोड रुपैयाँको बजेट ल्याएको छ । यस्तै, १ नम्बर प्रदेशको राजस्व परिचालनको लक्ष्य २ अर्ब ६६ करोड छ । यो प्रदेशको बजेटको आकार सबैभन्दा बढी ३५ अर्ब ९३ करोड ६० लाख रुपैयाँ विनियोजन गरेको छ । यस्तै, २९ अर्ब ७८ करोड रुपैयाँ विनियोजन गरेको २ नम्बर प्रदेशकोे आन्तरिक स्रोत परिचालनको लक्ष्य १ अर्ब ४८ करोड रहेको छ । यता, आगामी आर्थिक बर्षकालागि सबैभन्दा कम बजेट विनियोजन गरेको प्रदेश नम्बर ४ ले १ अर्ब ६९ करोड आन्तरिक स्रोत परिचालन गर्ने लक्ष्य लिएको छ । यस्तै, ५ नम्बर प्रदेशले २ अर्ब ४० करोड रुपैयाँ राजस्व असुलीको लक्ष्य लिएको छ । यो प्रदेशले २९ अर्ब ७८ करोड ६९ लाख ३८ हजार रुपैयाको बजेट बिनियोजन गरेको छ । प्रदेश नं ७ को सरकारले २४ अर्ब ६ करोडको बजेट विनियोजन गरेको छ । यो समेत गरी केन्द्र र प्रदेशको ८ सरकारको गरी १५ खर्ब २१ अर्ब ९३ करोड रुपैयाँ पुगेको छ । ७ सय ५३ स्थानीय तहको बजेट भने आउदो १५ गते सार्वजनिक हुदैछ । आन्तरिक राजस्व उठाउने लक्ष्य हेर्दा प्रदेश सरकार अझै केन्द्रमा निर्भर रहनु पर्ने अवस्था आएको भन्दै विज्ञहरूले प्रदेश स्थानीय सरकारको स्रोत परिचालनमा बजेट केन्द्रित हुनुपर्ने बताउँदै आएका छन् । संघीय सरकारले संबैधानिक व्यवस्थाअनुसार गत जेठ १५ गते १३ खर्ब १५ अर्बको बजेट सार्वजनिक गरेको छ । कारोबार दैनिकमा खबर छ ।

मस्को । चर्चित फुटबल खेलाडी मोहमद सालाहको टिम इजिप्ट रसियामा जारी विश्वकप फुटबलको समूह चरणबाटै बाहिरिने भएको छ । समूह चरणको दोश्रो खेलमा आयोजक रुससँग ३-१ ले पराजित भएपछि इजिप्ट बाहिरिने लगभग पक्का भएको हो । रुस भने एक खेल अघि नै अघिल्लो चरण प्रवेश गरेको छ । यो समूहमा रुसको ६ अंक भएको छ । यो विश्वकपमै सबैभन्दा बढि गोल गरेको रुसले ८ गोल गरेको छ भने १ गोल खाएको छ । रुसविरुद्धको खेलबाट विश्वकपमा फर्किएका इजिप्टका स्ट्राइकर मोहमद सालाहले रुसविरुद्ध एक गोल गरे । उनले ७३ औं मिनेटमा पेनाल्टि मार्फत गोल गरे पनि जिताउन भने सकेनन् । सुरुमा रेफ्रिले फ्रिकिक दिएपनि भिडियो रिप्लेपछि पेनाल्टि दिने निर्णय लिएका थिए। खेलको पहिलो हाफ गोलरहित सकिए पनि दोश्रो हाफमा रुस हावी भयो । ४७ मिनेटमा इजिप्टका कप्तान मोहमद फाथीले बल नियन्त्रण गर्न खोज्दा आफ्नै पोष्टमा गोल गरेपछि अग्रता लिएको रुसका लागि डेनिस चेरसिभले ५९ औं मिनेटमा गोल गर्दै अग्रता दोब्बर पारे । त्यसको तीन मिनेटपछि आर्टिम डेइवाले गोल गर्दै रुसलाई ३-० को अग्रता दिलाएका थिए । तर पेनाल्टि पाए पछि इजिप्टले गोलअन्तर ३–१ मा ल्यायो । यसअघि रुसले साउदीलाई पराजित गरेको थियो भने, इजिप्ट उरुग्वेसँग पराजित भएको थियो । यहि समूहका उरुग्वे र साउदी बुुधबार राति खेल हुनेछ । समूूहको अन्तिम खेलमा रुसले उरुग्वे र इजिप्टले साउदीको सामना गर्ने छन् । –एजेन्सी

काठमाडौं, असार ५ । रसियामा जारी २१ औं संस्करणको विश्वकप फुटबलमा मंगलबार पनि तीवटा खेल हुँदैछन् । अहिले जापान र कोलम्बियाबीचको खेल जारी छ । खेलको पहिलो हाफमा दुबै देशले १-१ गोल गर्दै बराबरी गरेका छन् । खेलको ६ औं मिनेटमा पेनाल्टीमार्फत गोल गर्दै अग्रता लिएको जापानले पहिलो हाफको अन्त्यमा गोल खाएको हो । जापानका लागि सिन्जी कागवाले पेनाल्टीमार्फत गोल गरेका हुन । त्यस्तै कोलम्बियाका जुयान फर्नान्डोले खेलको ३९ औं मिनेटमा फ्रिकिक मार्फत सुन्दर गोल गरे । रसियाको मोर्डोभिया एरिनामा जारी खेल निकै प्रस्तिपर्धात्मक छ । रसिया विश्वकपमा समूह एचमा रहेका जापान र कोलम्बियाको यो पहिलो खेल हो । जापान ४ पटकको एसियन च्याम्पियन हो भने कोलम्बिया सन २०१४ मा विश्वकपमा क्वाटरफाइनलसम्म पुगेको टोली हो ।

वीरगञ्ज, असार ५ । उपप्रधान एवं स्वास्थ्यमन्त्री उपेन्द्र यादवले वीरगन्जस्थित नारायणी अञ्चल अस्पतालको निरीक्षण भ्रमण गरेका छन् । मंगलबार अस्पातल निरीक्षणपछि कार्यक्रमलाई सम्बोधन गर्दै स्वास्थ्यमन्त्री यादवले देशकै पुरानो अञ्चल अस्पताल भएपनि समयानुसार आवश्यक भौतिक संरचना र उपकरणहरुको व्यवस्था नहुँदा सेवाप्रवाह प्रभावकारी हुन नसकेको प्रति चिन्ता व्यक्त गरे । विरामीको बढ्दो चाप, पर्याप्त जनशक्ति नहुनु र भौतिक संरचना नहुँदा नारायणी अञ्चल अस्पतालले जुन समस्या व्यर्होदै आएको छ त्यसप्रति आफू गम्भीर रहेको पनि स्वास्थ्यमन्त्री यादवले बताए । मन्त्री यादवले चाँडै नै नारायणी अञ्चल अस्पतालको स्तरोन्नती गरिने पनि जानकारी दिए । स्वास्थ्य क्षेत्रमा नयाँ स्वास्थ्य नीति र नयाँ स्वास्थ्य कार्यक्रम तर्जुमा गर्ने तयारी भईरहेको जनाएका स्वास्थ्य मन्त्री यादवले नारायणी अञ्चल अस्पतालबाट थप सेवा सुविधा उपलब्ध गराउन भएकै संरचनालाई व्यवस्थित गर्ने र नयाँ संरचनाहरु खडा गर्नु अपरिहार्य भईसकेको पनि बताए । उनले नारायणी अञ्चल अस्पताल जनसंख्याको चाप अनुसार साँघुरो भईसकेको भन्दै अस्पतालको विकासका लागि वैकल्पिक ठाउँको आवश्यकता पनि औंल्याए । स्वास्थ्यमन्त्री यादवले अस्पतालमा भएका सिमित उपकरणहरु र ल्याबका बाबजुद पनि स्वास्थ्यकर्मीहरुले उच्चतम सेवा पु¥याईरहेको भन्दै प्रशंसा पनि गरेका थिए ।

काठमाडौं, असार ५ । नेपाल वायु सेवा निगमको ‘अन्नपूर्ण’ नाम राखिएको वाइड बढी विमान यही असार १४ गते काठमाडौं आइपुग्ने भएको छ । नेपाल आउने तयारीमा रहेको सो विमानको हाल फ्रान्समा परीक्षण उडान भइरहेको छ । निगमले जहाज हाल परीक्षणमा रहेको र असार १४ गते त्रिभुवन अन्तर्राष्ट्रिय विमानस्थलमा अवतरण गर्ने तयारी गरिएको जनाएको छ । निगमले अमेरिकी कम्पनी एएआरसँग खरिद गरेका दुई वाइडबडी विमानमध्ये पहिलो विमान आइपुग्न लागेको उल्लेख गरेको छ । निगमले आगामी साउनको पहिलो सातादेखि व्यावसायिक उडान शुरु गर्ने तयारी गरेको छ । नयाँ विमान आइपुगेको १५ दिनभित्र आवश्यक सबै प्रक्रिया पूरा गरी व्यावसायिक उडान गर्ने तयारी गरिएको छ । नेपाल नागरिक उड्डयन प्राधिकरणले निगमको अन्नपूर्ण जहाजका लागि नाइन एन एएलवाई कलसाइन दिएको छ । कूल २७४ सिट क्षमताको सो जहाजमा १६ वटा ‘विजनेस क्लास’ र बाँकी इकोनोमी सिट रहेको छ । निगमका महाप्रबन्धक सुगतरत्न कंसाकारले नेपालको पर्यटन प्रवद्र्धनमा सहयोग पु¥याउने लक्ष्यका साथ नयाँ जहाज खरिद गरिएको र त्यसले निगमको हिस्सा बढाउनसमेत सहयोग पुग्ने विश्वास व्यक्त गर्नुभयो । विमान अवतरण भएको दुईदेखि तीन हप्ताभित्र भन्सार प्रक्रिया तथा परीक्षण उडान गरी व्यावसायिक उडान शुरु गर्नेछ । निगमले २०७३ चैत २५ गते अमेरिकी लिजिङ कम्पनी एएआरसँग दुई वाइडबडी ‘ए ३३०–२००’ एयरबस विमान खरिद गर्ने सम्झौता गरेको थियो । अन्तर्राष्ट्रिय उडानका लागि खरिद गरिएको जहाज निगमले कर्मचारी सञ्चय कोष र नागरिक लगानी कोषबाट ऋण लिइएको हो । दुईवटा जहाजको लागत रु २१ अर्ब ९० करोड छ । सम्झौताअनुसार पहिलो विमान २०१८ को अप्रिलसम्म आउने भनिएपछि दुई महिनाभन्दा बढी समय लागेको हो । नयाँ जहाज दोहा र दुबईमा उडाउने तयारी गरिएको छ । यस्तै निकट भविष्यमा जापान र चीनका विभिन्न गन्तव्यमा उडान गर्ने तयारी गरिएको छ । दुई वर्ष पहिले अर्थात् सन् २०१६ मा अन्तर्राष्ट्रिय उडानतर्फ त्रिभुवन विमानस्थल हुँदै सबैभन्दा बढी यात्रु बोकेको निगमले सन् २०१८ को तीन महिनामा आइपुग्दा तेस्रो स्थानमा पुगेको छ । सन् २०१७ मा निगम दोस्रो स्थानमा थियो । निगमकोे एयरबसमा आएको समस्याका कारण यात्रु संख्या गुमाएको हो । तर महाप्रबन्धक कंसाकारले नयाँ जहाज आएपछि नयाँ गन्तव्य पनि थपिने र यात्रुसमेत बढ्ने बताउनुहुन्छ । निगमले सन् २०१८ को तीन महिनामा ८९ हजार २१४ यात्रु बोकेको छ । निगमका प्रवक्ता रवीन्द्र श्रेष्ठले नयाँ विमान आउनुअगावै आवश्यक कागजात र प्राविधिक तयारीको काम भइरहेको बताउनुभयो । उहाँले विमान अवतरण भएपछि गर्नुपर्ने कामबाहेक अरु सबै काम सकिइसकेको जानकारी दिनुभयो । सन् २०१७ मा निमगले रु सात करोड ५० लाख नाफा कमाएको जनाएको छ । जहाज थपेपछि व्यवस्थापन र सुरक्षामा केन्द्रित हुने तथा त्यसका लागि विज्ञ परामर्शदाता नियुक्त गरिसकिएको छ । नयाँ जनशक्ति व्यवस्थापन गर्ने र हवाई सुरक्षाका लागि संसारकै नयाँ प्रविधि जडान गर्ने रणनीति समेत निगमको छ । पहिलो जहाज अवतरण भएको दुई महिनापछि अर्को जहाजसमेत आइपुग्ने निगमले जनाएको छ । निगमले नयाँ वाइडबडी विमानबाट दक्षिण कोरिया, जापान, अस्ट्रेलिया, लण्डनजस्ता गन्तव्यमा उडान गर्ने योजना बनाएको प्रवक्ता श्रेष्ठले बताउनुभयो । प्राधिकरणका उपमहानिर्देशक राजन पोखरेलले निगमको जहाज अवतरण भइसकेपछि आवश्यक सबै प्रक्रिया पूरा गरिने जानकारी दिनुभयो । निगमले हाल अन्तर्राष्ट्रिय उडानका आठ गन्तव्य भारतको नयाँदिल्ली, बेङ्लोर र मुम्बई तथा हङ्कङ, मलेसिया, थाइल्याण्ड, दोहा र दुबईमा उडान भर्दै आएको छ । एक बोइङ नाइन एसिबी–५७५ र एयरबस ३२० सिरिजको दुईवटा जहाजबाट निगमले अन्तर्राष्ट्रिय उडान गरिरहेको हो । निगमले आन्तरिकतर्फ नौवटा विमानबाट सेवा दिइरहेको छ । यीमध्ये चीनबाट ल्याइएका वाई १२ चारवटा, एमए ६० दुईवटा तीनवटा ट्विनअटर विमान छन् । डेढ वर्षभित्र आठ विमान निगमले सेवा सुधारलगायतका कार्ययोजना तयार पारी आगामी डेढ वर्षभित्र थप आठ नयाँ विमान ल्याउने योजना बनाएको छ । निगमले थप दुईवटा ‘न्यारो बडी’ विमान ल्याउन अर्थमन्त्रालयसँग स्वीकृति मागेको छ । अन्तर्राष्ट्रिय र आन्तरिक सेवा विस्तारका लागि नयाँ जहाज खरिद गर्न लागिएको हो । नयाँ विमान थप्ने कार्यसँगै निगमसँग भएका सबै पुराना विमान आउँदो १८ महिनाभित्र प्रतिस्थापन गरी अन्तर्राष्ट्रियस्तरमा नै हवाई सुरक्षाको प्रत्याभूति गराउने निगमले जनाएको छ । सरकारले आर्थिक समृद्धिको आधारका रुपमा पर्यटन क्षेत्रलाई राखेको र सन् २०३० सम्म कूल गार्हस्थ्य उत्पादनमा सो क्षेत्रको हिस्सा २५ प्रतिशत पु¥याउने लक्ष्य राखेको छ । त्यसका लागि कम्तीमा पनि ५० लाख पर्यटक भित्र्याउनुपर्ने देखिएको छ । पर्यटन भित्र्याउनका लागि राष्ट्रिय ध्वजाबाहक निगमलाई सबल र सक्षम बनाउनु जरुरी छ । सरकारले आगामी आवका लागि हवाई क्षेत्रमा मात्रै रु १९ अर्ब बजेट विनियोजन गरेको छ । सो बजेट हवाई पूर्वाधारको विकास, विमानस्थलको सुदृढीकरण तथा निर्माणमा रहेका विमानस्थललाई शीघ्र सम्पन्न गर्न खर्च गरिनेछ । संस्कृति पर्यटन तथा नागरिक उड्डयन मन्त्री रवीन्द्र अधिकारीले राष्ट्रिय ध्वजाबाहकलाई साधन र स्रोत सम्पन्न बनाउन सरकारको तर्फबाट हदैसम्मको प्रयास गर्ने बताउँदै आउनुभएको छ । सरकारले सन् २०२० सम्म २० लाख पर्यटक भित्र्याउने लक्ष्य राखेको छ । त्यसका लागि पनि सुरक्षित र भरपर्दो हवाई सेवाको जरुरी रहेको सरोकारवाला निकायको भनाइ छ । रासस

काठमाडौँ, असार ५ । प्रधानमन्त्री केपी शर्मा ओलीले आफू छिमेकी मित्रराष्ट्र चीनको औपचारिक भ्रमणमा प्रस्थान गर्नुअघि कार्यवाहक प्रधानमन्त्रीको जिम्मेवारी उपप्रधानमन्त्री एवं रक्षामन्त्री ईश्वर पोखरेललाई दिनुभएको छ । प्रधानमन्त्री एवं नेपाल कम्युनिष्ट पार्टीका अध्यक्ष ओलीले पार्टीको कार्यवाहक अध्यक्षको जिम्मेवारी वरिष्ठ नेता माधवकुमार नेपाल र संसदीय दलका कार्यवाहक नेतामा उपनेता सुवासचन्द्र नेम्वाङलाई जिम्मेवारी दिनुभएको नेकपाका केन्द्रीय सदस्य विष्णु रिजालले जानकारी दिनुभयो । पार्टीका अर्का अध्यक्ष पुष्पकमल दाहाल ‘प्रचण्ड’ पनि विदेशमा रहनुभएकाले नेता नेपाललाई कार्यवाहक अध्यक्षको जिम्मेवारी दिइएको बताइएको छ । -रासस

विश्वकप फुटबल अन्तर्गत उरुग्वेसँगको खेलका लागि रुसको शहर रोस्तोभ-अन-Fडोन जाँदै गरेका साउदी अरेबियाका खेलाडी तथा खेल पदाधिकारी चढेको विमानमा आगो लागेको छ । विमानको इन्जिनमा आगलागी भएको हो । तर खेलाडी तथा खेल पदाधिकारी र विमानका अरु सदस्य सुरक्षित रुपमा रोस्तोभ पुगेका छन् । साउदी अरेबियाले बुधबार आफ्नो दोस्रो खेलमा उरुग्वेसँग खेल्नेछ । समूह ए मा रहेको साउदी अरेबिया उद्घाटन खेलमा आयोजक रुससँग पराजित भएको थियो । विमानको इन्जिनमा आगो लागे पनि आफ्ना सबै खेलाडी र खेल पदाधिकारी सुरक्षित रहेको साउदी अरेबियाले जनाएको छ । उसले भनेको छ, ‘साउदी राष्ट्रिय टिमका सबै खेलाडील सुरक्षित रुपमा आइपुगे र अहिले आ आफ्नो होटलमा बसेका छन् । विमानमा लागेको आगो सानो दुर्घटनामा मात्रै थियो ।’

काठमाडौं, असार ३ । प्रतिनिधिसभा बैठकमा विनियोजन विधेयक २०७५ का विभिन्न शीर्षकमाथिको छलफल जारी छ । आइतबार विनियोजन विधेयक, २०७५ अन्तर्गत महिला, बालबालिका तथा ज्येष्ठ नागरिक, संघीय मामिला तथा सामान्य प्रशासन, शहरी विकास र वन तथा वातावरण मन्त्रालयअन्तर्गतका विषयमा भएको छलफलमा भाग लिँदै सांसद दुर्गाबहादुर रावलले सरकार नीति, विधि र थितिअनुसार नचलेको आरोप लगाउनुभयो । सांसद राजकिशोर यादवले सरकार मधेशसँग अनुदार भएको, सिरहा जिल्लालाई सौतेनी आमाको व्यवहार गरेको तथा आफ्नै दलका सांसदलाई पनि धेरै नबोल्नू भनी दिएको निर्देशन अधिनायकवादको चरित्र भएको बताउनुभयो । सांसद विमलप्रसाद श्रीवास्तव, घनश्याम खतिवडा, विमला नेपाली, रेनुका गुरुङ र बिनादेवी बुढाथोकीले महिला हिंसाका घटना बढेको, सरकारसँग ग्रामीण विकासको ठोस नीति नभएको, वनविनाश नरोकिएको, नदीनाला प्रदूषित हुँदै गएको तथा चोरी शिकारी बढ्दै गएको बताउनुभयो । सांसद लीलानाथ श्रेष्ठ र तिलबहादुर महतले कर्णाली प्रदेशलाई केन्द्रीय सरकारले उपेक्षा गरेको बताउनुभयो ।

हेटौँडा । त्रिभुवन राजपथको महाभिर र सातघुम्तीमा गए राति परेको वर्षाले पहिरो जाँदा अवरुद्ध भएको सडक अहिले पहिरो हटाई हेटौँडा–काठमाडौँ तर्फको यातायात सञ्चालनमा ल्याइएको जिल्ला प्रहरी कार्यालय मकवानपुरले जनाएको छ । यसैगरी, मदन भण्डारी राजमार्गअन्तर्गत पर्ने हेटौँडा कुलेखानी सडकअन्तर्गत पर्ने धाखेलको मानेभञ्ज्याङ र सिस्नेरीको सुकौरा ड्याममा गए राति आएको वर्षाले काठमाडौँ–हेटौँडा तर्फको बाटो अवरुद्ध भएको छ । पालुङबाट डोजर र प्राविधिकहरु सडक खुलाउन बिहानै त्यसतर्फ पठाइसकिएको र आज अपराह्न सम्ममा यातायात सञ्चालनमा ल्याई सकिने मकवानपुर जिल्लाका प्रमुख जिल्ला अधिकारी चक्रबहादुर बुढाले जानकारी दिनुभयो । पहिरो गई त्यसको सूचना समयमा नै नपाउँदा काठमाडौँबाट हेटौँडातर्फ जाने त्रिभुवन राजपथ र भीमफेदी कुलेखानी सडकखण्डमा सयौँ सवारी आगमन अवरुद्ध रहेको र सडकहरुमा यात्रुहरु अलपत्र भई कठिनाइ भोग्नु परेको जिल्ला प्रहरी कार्यालयका प्रहरी नायब उपरीक्षक दिलीपराज झाले बताउनुभयो । रासस

गौशाला । चारैतिर खाल्डाखुल्डी र कच्ची बाटो रहेको महोत्तरी जिल्लाको सदरमुकाम जलेश्वर अहिले हिलाम्मे बनेको छ । जिल्लाको सदरमुकाम भए पनि यहाँको कुनै पनि स्थानमा पिच बाटो नरहेको अवस्थामा विगत दुई तीन दिनमा पटकपटक भीषण पानी परेको कारण जलेश्वरको प्रत्येक चौक चौराहा, हाट बजार र सार्वजनिक स्थलमा अहिले हिलैहिलो भएको हो । वर्षाको पानीले जलेश्वरको शंकरचोक, नगरपालिकाचोक, दुर्गाचोक, खैराचौक, बुद्धिजीवीचोक, अस्पतालचोक, जिल्ला प्रशासन, जिल्ला समन्वय समिति, जिल्ला प्रहरी, मालपोत, महिला विकास, जिल्ला शिक्षा कार्यालय, कृषि कार्यालय, पशु कार्यालय र जिल्ला अस्पताल जस्ता ठाउँमा हिलैहिलो भएको छ, भने नगरभरि बाटोमा रहेका खाल्डाखुल्डीमा पानी जमेर सर्वसाधारणलाई निक्कै सास्ती भएको छ । त्यसैगरी वर्षाको पानीले सबैतिर हिल्लामे बनाएपछि जिल्लाको सदरमुकामस्थित विभिन्न हाटबजार, कार्यालयसहित सेवा पाउने स्थानमा सेवाग्राहीको चहलपहलमा कमी देखिएको छ । महोत्तरी जिल्लाको सदरमुकाम जलेश्वरमा आधा किलोमिटर पनि पक्की बाटो छैन भने केही दिनअघि नाला बनाउने नाउँमा नगरभरिको प्रत्येक बाटोकोबीच भएरै गहिरो खाल्डो खनिएपछि झन यहाँको कुनै पनि बाटो सुरक्षित र भरपर्दो छैन् । अहिले वर्षायाममा आएर जलेश्वरका मूल र सहायक सबै बाटो खनिएपछि विभिन्न स्थानमा मालबाहक तथा सवारी साधन फसेको छ, भने सर्वसाधारणलाई आवतजावतमा समेत समस्या भएको छ । साथै बाटो खनेर जथाभावी छाडिएकाले प्रत्येक दिन मोटरसाइकल, ट्याम्पु र साइकल चढ्ने यात्रु दुर्घटनामा पर्ने गरेका छन् । यसैबीच रातिको बेला बाटो हिँड्ने बटुवा र चौपाया पनि नगरभित्रको खाल्डो खसेर दुर्घटनामा पर्ने गरेको नगरवासीले गुनासो गरेका छन् । स्थानीय तहको निर्वाचन पश्चात जनप्रतिनिधि आएर विकास गर्ने, जनतालाई सुख हुने विश्वास लिएका नगरवासीले स्थानीय तह सहित प्रदेश र संघको चुनाव भएको पनि यतिका दिन वितिसक्दा पनि विकासको अनुभूति गर्न नसकेको भन्दै निराशा व्यक्त गरेका छन् । साथै सम्बन्धित माथिल्लो निकायलाई सदरमुकामको अवस्थाप्रति ध्यानाकर्षणको माग गरेका छन् । रासस

काठमाडौ, असार १ । स्थानीय तहमा कर्मचारी अभाव भइरहेका बेला केही स्थानीय तहले केन्द्रबाट पठाइएका कर्मचारी धमाधम फिर्ता गर्न थालेका छन्। उपसचिव तहका कर्मचारी फिर्ता गरी ती स्थानीय तहले प्रशासकीय अधिकृतका रूपमा विद्यालय निरीक्षक र नायब सुब्बासरहका कर्मचारीलाई जिम्मेवारी दिन थालेका छन्। संघीय मामिला तथा सामान्य प्रशासन मन्त्रालयले अनियमितता ढाक्न स्थानीय तहले कर्मचारी फिर्ता पठाएको आशंका गर्दै यसलाई गम्भीर रुपमा लिएको छ। रौतहटको राजपुर नगरपालिकाका मेयर मा।सकिल अख्तरले केन्द्रबाट पठाइएका प्रशासकीय अधिकृत गोपालमान श्रेष्ठ नगरपालिकामा आवश्यक नरहेको भन्दै मन्त्रालयमा निवेदन पठाएका छन्। यस्तै, मुगुको छायानाथ रारा नगरपालिकाका मेयर हरिजंग शाहीले पनि मन्त्रालयबाट खटिएका उपसचिव पीताम्बर सारुलाई केन्द्रमै राख्न आग्रह गरेका छन्। उपचसचिव तहका कर्मचारी नगरपालिकामा आवश्यक नभएको उनले मन्त्रालयमा पठाएको निवेदनमा उल्लेख छ। उक्त नगरपालिकामा विद्यालय निरीक्षक (विनि) ललितजंग मल्लले निमित्त प्रशासकीय अधिकृतको जिम्मेवारी सम्हालिरहेका छन्। नगरपालिकामा कर्मचारी अभाव भएपछि मुगु जिल्ला प्रशासनले तत्काल काम चलाउन विनिलाई खटाएको हो। हुम्लाको तातोपानी गाउँपालिकाका अध्यक्ष नवराज न्यौपानेले पनि केन्द्रबाट खटिएका प्रशासकीय अधिकृत विष्णुकुमार भट्टराईको काज फिर्ता गरी सहयोग गर्न उल्टै मन्त्रालयलाई आग्रह गरेका छन्। उक्त गाउँपालिकामा नायबसुब्बा खडानन्द चौलागाईं निमित्त प्रशासकीय अधिकृतका रूपमा कार्यरत छन्। रौतहट यमुनामाई गाउँपालिकाका अध्यक्ष चन्द्रिका मुखियाले पनि शाखा अधिकृत पुष्करचन्द्र घिमिरेलाई मन्त्रालयमै फिर्ता पठाएका छन्। अधिकृत घिमिरे गाउँपालिकालाई आवश्यक नभएको अध्यक्ष मुखियाले मन्त्रालयलाई लेखेको चिठीमा उल्लेख छ। गाउँपालिकामा नायबसुब्बा शिवपूजनप्रसाद यादव निमित्त प्रशासकीय अधिकृतका रूपमा कार्यरत छन्। मन्त्रालयका प्रवक्ता सुरेश अधिकारीले स्थानीय तहले कर्मचारी फिर्ता गरेको विषयलाई मन्त्रालयले गम्भीर रूपमा लिएको बताए। उनले भने,‘यो गम्भीर विषय हो। उहाँहरूलाई मन्त्रालयले पठाएको कर्मचारी फिर्ता गर्ने अधिकार छैन।’ नागरिकमा खबर छ ।

बलिउड क्षेत्रकी चर्चित अभिनेत्री दीपिका पादुकोण तथा अभिनेता रणवीर सिंहको प्रेम–प्रसंगले बलिउड तरंगित भएको छ । यो जोडी आजभोलि सार्वजनिक कार्यक्रममा समेत खुल्लमखुल्ला पुग्ने गरेको छ । देश–विदेशमा समेत यो जोडी गोप्य डेटमा रमाउने कुरा भारतीय मिडियाहरूले लामो समयदेखि उल्लेख गर्दै आएका छन् । केही सुपरहिट चलचित्रमा समेत देखिएको यो जोडी गोप्यरूपमा विवाहको तयारीमा समेत जुटेको बताइन्छ भने बेला–बेलामा उनीहरूबीच ब्रेकअप भएको हल्लासमेत चल्छ । यद्यपि दीपिका–रणवीरले आजका दिनसम्म आफूहरू प्रेममा रहेको कुरा आधिकारिक रूपमा कतै भनेका छैनन् । आखिर दुनियाँको डर नमानी डेटमा पनि रमाउने, प्रेममा छौं भन्न पनि नसक्ने दीपिका–रणवीरको यो कस्तो नौटंकी हो कुन्नि ! एजेन्सीको सहयोगबाट