चितवन, जेठ ३ । नारायणगढ–मुग्लिन सडकखण्डअन्तर्गत इन्छाकामना गाउँपालिका–६, कालिखोलामा आज बिहान पहिरो खसेपछि सडक अवरुद्ध भएको छ । जिल्ला प्रहरी कार्यालय, चितवनले दिएको जानकारीअनुसार बिहान ५ः४५ बजे सडकमा पहिरो खसेको हो । तत्काल पहिरो पन्छाउने काम थालिएकाले केही समयपछि सडक खुल्ने प्रहरीले जनाएको छ । विस्तार गरिँदै गरेको सो सडक दिउँसोको समयमा बन्द हुने हुँदा साँझ बिहान सवारीको चाप बढी हुने गर्दछ ।

सुर्खेत । सुर्खेतबाट हुम्लाको सिमीकोटका लागि उडेपछि सम्पर्कविहिन भएको मकालु एयरको कार्गो विमान दुर्घटनाग्रस्त अवस्थामा फेला परेको छ । सुर्खेत विमानस्थलबाट हुम्लाको सिमीकोटका लागि आज बिहान ६ः१६ बजे उडेको मकालु एयरको ढल् ब्ग्व् कार्गो विमान हुम्लाको खार्बुनाथ गाउँपालिकाको बाहुनखर्कमा दुर्घटना भएको हो । विमान टुक्राटुक्रा भएको र विमानमा सवार चालक दलका दुई सदस्यको निधन भएको कर्णाली प्रदेशका प्रहरी प्रमुख प्रहरी नायब महानिरीक्षक सुरेशविक्रम शाहले जानकारी दिनुभयो । विमानमा चालक दलका दुई सदस्यमध्ये एकजना किरण भट्टराई रहेका र अर्का सदस्यको नाम नखुलेको उहाँले बताउनुभयो । रासस

काठमाडौं, जेठ २ । संसारभरीका महिलाले दशकौंदेखि उठाउँदै आएको मुद्दा हो– आफ्नो शरीर, आफ्नै हक । जुन यौन तथा प्रजनन् हकमा विद्यमान पितृसत्ताको नियन्त्रणविरुद्ध कडा चुनौती हो । पश्चिमका धेरै मुलुकमा यही मुद्दामा उभिएर चलेको आन्दोलनले महिलालाई विवाह नगरे पनि बच्चा जन्माउन पाउने हक दिलाइसकेको छ । विवाह गरेर पनि आफ्नो इच्छाविना यौनसम्पर्क राखे त्यसलाई बलात्कारै मान्ने कानुन त नेपालमा पनि बनिसकेको छ । अब भने पश्चिमा मुलुकमा झैं नेपालमा पनि बच्चा जन्माउन बिहे गर्नैपर्ने कानुनी व्यवस्था हट्ने भएको छ । संविधानको धारा ३८ मा व्यवस्था गरिएको महिलाको प्रजनन् सम्बन्धी हक प्रचलनमा ल्याउन बन्दै गरेको विधेयकको मस्यौदामा यस्तो व्यवस्था प्रस्ताव गरिएको हो । –कान्तिपुर दैनिकबाट

भीमदत्तनगर । सिँचाइ अभावका कारण कञ्चनपुरमा वर्षेनी चैतेधान खेतीतर्फ किसानको आकषण घट्दै गइरहेको छ । कुनै समय कञ्चनपुरका खेतीयोग्य जमिनमध्ये ३२५ हेक्टर क्षेत्रफलमा चैतधान लगाइँदै आएको भए पनि हाल ९० हेक्टरमा मात्र लगाउने गरिएको जिल्ला कृषि विकास कार्यालयका कार्यालय प्रमुख सागर ढकाल जानकारी दिनुभयो । “विसं २०६८ मा ५६ हजार ६०२ हेक्टर खेतीयोग्य जमिनमध्ये ३२५ हेक्टरमा चैतेधान लगाएको तथ्याङ्क छ,” उहाँले भन्नुभयो, “सिँचाइको अभावले किसानले चैतेधान लगाउन छाड्न थालेका छन् ।” कञ्चनपुर चैतेधान खेतीका लागी उपयुक्त क्षेत्र भए पनि सिँचाइको अभावका कारण जिल्लामा धानखेती घट्दै गएको ढकाल बताउनुहुन्छ । कैलालीको मालाखेतीसम्म गरी यहाँको ३३ हजार ५२० हेक्टर क्षेत्रफल सिञ्चित हुने योजनासहित महाकाली सिँचाइ आयोजनाको तेस्रो चरणअन्तर्गत मूल नहर निर्माणाधीन अवस्थामा छ । पहिलो र दोस्रो चरणबाट कञ्चनपुरमा ११ हजार ७०० हेक्टरका लागि सिँचाइ सुविधा पुगे पनि चैतेधानका बेला भने किसानलाई पानीको अभाव रहँदै आएको छ । आगामी तीन वर्षमा धानमा आत्मनिर्भर बनाउने लक्ष्यसहित सरकारले चैतेधान उत्पादनलाई महत्व दिएपनि सिँचाइ अभावका कारण किसान त्यसतर्फ अग्रसर हुन छाडिसकेको भीमदत्तनगरपालिका–१६ का हंसराज जोशीले बताउनुभयो । “अघिल्लो बर्षसम्म गाउँमा करिब २५ प्रतिशत किसानले चैतेधान लगाउँथे ।’ जोशीले भन्नुभयो– “समयमा पानी पाउन छाडेपछि किसानले धान लगाउन छाडे ।’ बेर्ना राख्ने र रोप्ने समयमा नहरमा पानी नै हुँदैन । महाकाली नदीबाट आउने पानी सिँचाइका लागि निरन्तर नआउँदा समस्या भएको हो । केही वर्षअघिसम्म चैतेधानले हरियाली देखिने फाँट अहिले गौचरनका लागि उपयोगी बनेका छन् । त्यसैगरी चैतेधान लगाउँदै आएकी वसन्तपुरकी कमला मल्लले पनि सिँचाइ समस्याकै कारण यस वर्ष चैतेधान लगाउन नपाएको दुखेसो पोख्नुभयो । “जसोतसो धानको बेर्ना जोगाइयो, समयमै कुलोमा पानी नआएपछि बेर्नाको खेतमा पशु चराउनुपर्ने अवस्था आयो”, उहाँले भन्नुभयो । चैतेधान लगाउन नपाएपछि आम्दानी घट्ने किसानलाई पिरलो छ । विगत छ वर्षदेखि पाँचदेखि आठ कट्ठा जमिनमा चैतेधान खेती गर्दै आउनुभएका बेतकोट नगरपालिका–९ सुन्दरपुरका देवसिंह भण्डारी आफ्नो गाउँका करीब २० प्रतिशत किसानले सिँचाइ अभावका कारण चैतेधान लगाउन छाडिसकेको बताउनुहुन्छ । रासस

काठमाडौं । प्रभु बैङ्कले आइतबारदेखि एक साथम ४ वटा शाखा सञ्चालनमा ल्याएको छ । बैंकले बाग्लुङ जिल्ला निसीखोला गाउँपालिका–४, बाग्लुङ जिल्ला तमानखोला गाउँपालिका– १, दैलेख जिल्ला भगवतीमाई गाउँपालिका– २ र दैलेख जिल्ला गुराँस गाउँपालिका–४ मा नयाँ शाखा सञ्चालनमा ल्याएको हो । बैङ्कका निसीखोला शाखा, तमानखोला शाखा, भगवतीमाई शाखा र गुराँस शाखाको उद्घाटन सम्बन्धित गाउँपालिकाका अध्यक्ष क्रमशः तारानाथ पौडेल, जोकलाल बुढा, दानबहादुर थापा र खेमराज ओलीले गरेका हुन् ।

सन्दीप लामिछाने आजको म्याचमा दिल्लीको तर्फबाट सबैभन्दा सफल बलर साबित भएका छन् । उनले आफ्नो स्पेलका ४ वटै ओभर सिध्याएका छन् र उनले आफ्ना कप्तानको निर्णयलाई गलत साबित हुन् दिएनन् । आइपिएलको एघारौं शृंखलाको ४५ औं म्याच जाल दिल्ली डेयर डेभिल्स र रोयल च्यालेंजर्स ब्यांगलोरबीच नयाँ दिल्लीस्थित फिरोज शाह कोटला मैदानमा खेलिंदै छ र दिल्लीले पहिले ब्याटिङ गर्दै ब्यांग्लोरसामु १८२ रनको लक्ष प्रस्तुत गरेको छ । भारतीय राष्ट्रिय टोलीका कप्तान विराट कोहलीको नेतृत्वमा रहेको रोयल च्यालेंजर्स ब्यांग्लोरले निर्धारित लक्ष पछ्याउने क्रममा 11 ओभरको खेल समाप्त हुँदासम्म २ विकेटको क्षतिमा १०३ रङ बनाइ सकेको छ । उसका लागि विराट कोहली ले ५७ र एबी डिभिलियर्सले ३४ रन बनाएर खेल्दै छन् । दिल्लीको तर्फबाट सन्दीपलाई एक र बोउल्टलाइ एक सफलता प्राप्त भएको छ । सन्दीपले तेस्रो ओभरको चौथो बलमा पार्थिव पटेललाई एलबीडबलयु आउट गरेका थिए । आज बलिङ गरेका दिल्लीका बलरहरू मध्ये सन्दीपको इकोनोमी रेट सबैभन्दा उत्कृष्ट रहेको छ । तीन ओभरसम्म रनमा साह्रै अंकुश लगाउन सफल सन्दीपलाई उनको चौथो ओभरमा एबी डिभिलियर्सले त्यसो गर्न दिएनन् । उनले सन्दीपको आखिरी ओभरमा एक छक्क सहित १० रन बनाए । यति हुँदा पनि सन्दीपले ४ ओभरमा २५ रन मात्र दिएका छन् । जबकि उनीभन्दा पछाडि ट्रेन्ट बोउल्ट, अमित मिश्रा र हर्षल पटेलको इकोनोमी रेट १०-१० छ भने जुनियर डाला साह्रै महँगा साबित भएका छन् । उनको इकोनोमी रेट १३ रहेको छ ।

नयाँ दिल्ली, नेपालका चर्चित युवा क्रिकेटर सन्दीप लामिछानेले आज आइपिएलमा पहिलो खेल खेल्दै छन् । रोयल च्यालेन्जर्स बैंग्लोरविरुद्ध सञ्जिबको डेब्यू खेल हुने छ । भर्खर शुरु भएको खेलमा दिल्लीले अहिले ब्याटिङ गरिरहेको छ । आइपिएल खेलमा पहिलो नेपाली खेलाडी बनेका सन्दीपले यसअघिका खेलमा भने खेल्न पाएका थिएनन । दिल्ली डेयरडेभिल्स टीममा आबद्ध सन्जीबको खेल आज नेपाली समय  आठ बजेबाट शुरु हुने छ । दिल्लीले उनलाई २० लाख भारुमा टिममा भित्र्याएको थियो । ११ मध्ये मात्र ३ खेल जितेको दिल्ली अंक तालिका तालिकाको पुछारमा छ र समूह चरणबाटै बाहिरिने सम्भावना बढी छ ।

मुम्बई, वैशाख २९ । चर्चित पोर्नस्टार सन्नी लियोनीको बलिउड आगामनको चर्चा सेलाउन नपाउदै अर्की पोर्नस्टार भारतीय फिल्म उद्योगमा भित्रिएकी छिन्। चर्चित निर्माता रामगोपाल बर्माले अमेरिकी मुलकी युरोपियन पोर्नस्टार मिया मालकोवालाई बलिउडमा भित्र्याउन लागेका हुन्। उनले मियासँग ‘गड, सेक्स एण्ड ट्रुथ’ नामको एक भिडियो समेत खिचेका छन्। मियाले केही समय अगाडि ट्वीटरमार्फत रामगोपालसँग काम गर्न पाएकोमा आफू उत्साहित भएको बताएकी छन्। ‘भारतीय फिल्म निर्माता रामगोपालले युरोपमा म सँग एक भिडियो ‘गड, सेक्स एण्ड ट्रुथ’ शुट गरेका छन्’, उनले भनेकी छन्– ‘म सन्नी लियोनीपछि भारतीय फिल्म निर्देशकसँग काम गर्ने दोस्रो अडल्ट स्टार हुँ।’ उनले रामगोपाल बर्मालाई धन्यवाद पनि भनेकी छिन्। रामगोपालले मियालाई ट्वीटरमै जवाफ दिँदै भनेका छन्– हे मिया ‘गड, सेक्स एण्ड ट्रुथ’मा फिल्मी दुनियाँको उच्चकोटीको विचारणीय अनुभव रह्यो। रामगोपालले आफूले कहिलेपनि सन्नी लियोनीसँग काम गर्ने अवसर नपाएको उल्लेख गर्दै भने– मैले सन्नी लियोनीसँग अहिलेसम्म काम गर्न पाएको छैन्। तर म ‘गड, सेक्स एण्ड ट्रुथ’को अनुभव कहिल्यै भुल्न सक्दिन।

काठमाडौं, वैशाख २९ । नेपालको दुई दिने राजकीय भ्रमण सकेर भारतीय प्रधानमन्त्री नरेन्द्र मोदी स्वदेश फर्किएका छन् । केही समयअधि उनी नेपाल भ्रमणको अन्तिम औपचारिक कार्यक्रमका रूपमा काठमाडौं महानगरपालिकाको अभिनन्दन ग्रहण गरेपछि भारतका प्रधानमन्त्री मोदी स्वदेश फर्केका हुन । शुक्रबार साढे १० बजे जनकपुर ओर्लिएका मोदीले जानकीको दर्शनसँगै नेपाल भ्रमण औपचारिक रुपमा शुरु गरेका थिए । तेस्रो नेपाल यात्राका क्रममा जनकपुरमा अभिनन्दन गरिएको थियो । त्यसपछि अपरान्ह काठमाडौं आइपुगेका मोदीले राजनीतिक भेटघाट र वान टु वान वार्ता हुदैं साँझ दुवै देशका प्रधानमन्त्रीहरूले संयुक्त पत्रकार सम्मेलन गरेर सहमतिका विषयहरू सार्वजनिक गरे । शनिवार विहान मुक्तिनाथको दर्शन गरेर फर्के मोदी त्रिभुवन विमानस्थलबाट सिधैपशुपतिनाथको दर्शन र पूजा गरे । औपचारिक भारतका प्रधानमन्त्रीका रूपमा पहिलोपटक उनी सन् २०१४ मा नेपाल आएका थिए । यसपाली पनि मोदीले एउटा अर्का चाहान प्रकट गरेर गएका छन् । उनले भने ‘अर्का पटक आउँदा बुद्ध भूमि लुम्बिनी जाने छु ।’ नेपाल भ्रमणका क्रममा मोदी र प्रधानमन्त्री केपी ओलीले संयुम्त रुपमा बहुचर्चित ९०० मेगावाटको अरुण तेस्रो र जनकपुर अयोध्या सिधा बस सेवाको शिलान्यास र शुभारम्भ गरे ।

काठमाडौं, वैशाख २८ । भारतीय प्रधानमन्त्री नरेन्द्र मोदीलाई नगरवासीका तर्फबाट अभिनन्दन गरिने स्थल राष्ट्रिय सभागृह चिटिक्क पारेर सिङ्गारिएको छ । सधैँ सार्वजनिक यातायातका साधन खचाखच रहने प्रदर्शनी मार्गमा अहिले अत्यन्तै कम संख्यामा सवारीसाधन चलेका छन् । सभागृहको प्रवेशद्वारमा नेपालका प्रधानमन्त्री केपी शर्मा ओली र भारतीय प्रधानमन्त्री नरेन्द्र मोदीको फोटो राखिएको छ । सभागृहमा पनि रंग लगाइएको छ भने फूलको साजसज्जा त्यत्तिकै आकर्षक छ । यी सबै दृश्य हेर्दा लाग्छ यो हिजोको सभागृह होइन । त्यसैगरी, स्वागतद्वारको दायाँबायाँ प्रशस्तै संख्यामा नेपाल र भारतका झण्डा टाँगिएको छ । सभागृह मात्र होइन मोदीको स्वागतका लागि उहाँ नेपाल रहँदाको समयमा आउने र जाने सबै स्थान सफा र व्यवस्थित नै रहेको छ । सडकको छेउछाउमा रंग लगाउने, झण्डा राख्ने, स्वागतद्वार निर्माण गर्ने काम पनि सँगै सकिएको छ । विमानस्थल, गौशाला, त्रिपुरेश्वर, जमल, नयाँ बानेश्वर, कोटेश्वर, हायात होटलको आसपासलगायत प्रधानमन्त्रीले आवत जावत गर्ने स्थानमा साजसज्जाको काम पनि सकिएको छ । दुईदिने राजकीय भ्रमणका लागि प्रधानमन्त्री आज नेपाल आउन लाग्नुभएको छ । प्रधानमन्त्री मोदीको स्वागतका लागि कामपाका तर्फबाट कुनै कसर बाँकी राखिएको छैन, कामपाका सूचना अधिकारी वसन्त आचार्यले जानकारी दिनुभयो । अभिनन्दनको सबै तयारी सकियो प्रधानमन्त्री नरेन्द्र मोदीका लागि नागरिक अभिनन्दन गर्नका लागि सबै तयारी पूरा भएको कामपाले जानकारी दिएको छ । भ्रमणका लागि आज नेपाल आउनुहुने प्रधानमन्त्री आज पहिलो दिन प्रदेश नं २ को जनकपुर र काठमाडौँ तथा दोस्रो दिन मुक्तिनाथको दर्शन तथा जोमसोमको भ्रमण गर्नुहुनेछ । त्यसपछि काठमाडौँ फर्केपछि उहाँ भारतीय राजदूतले आयोजना गर्ने दिवा भोजमा सहभागी भई अपराह्न कामपाले आयोजना गर्ने नागरिक अभिनन्दनमा सहभागी हुने कार्यतालिका रहेको छ । आचार्यले भन्नुभयो, “सबै तयारी पूरा भएको छ, प्रधानमन्त्रीको स्वागतका लागि हामी आतुर छौँ ।” प्रधानमन्त्री २ः४५ बजे सभागृहमा पुग्ने भएपनि कामपाले अन्य अतिथि तथा पाहुनालाई दुई बजेभित्रै हलमा राखिसक्ने समयतालिका रहेको छ । ५३२ सिट क्षमता भएको सभागृहको हलमा ५५० जनासम्म हुनसक्ने कामपाले जानकारी दिएको छ । प्रधानमन्त्री केपी शर्मा ओलीको निमन्त्रणामा भारतीय प्रधानमन्त्री दुईदिने राजकीय भ्रमणमा नेपाल आउनलाग्नुभएको हो । उक्त कार्यक्रममा प्रदेश ३ का मुख्यमन्त्री, सांसद्, कामपाका जनप्रतिनिधि, कामपाका उच्च पदका कर्मचारी र कूटनीतिक नियोगका प्रमुखको सहभागिता हुनेछ । कामपाका प्रमुख शाक्यले नागरिकका तर्फबाट नागरिक अभिनन्दन र महानगरका तर्फबाट कलात्मक साँचो हस्तान्तरणसँगै उपहार दिने तयारी रहेको छ । उपहार के दिने भन्ने बारे अहिलेसम्म टुङ्गो लागेको छैन । साँचो हस्तान्तरणको अर्थ ‘विशिष्ट अतिथिका लागि महानगर खुला छ’ भन्ने हो ।

मुम्बई । बलिउड क्षेत्रका चर्चित अभिनेत्री सोनम कपुर दिल्लीका व्यवसायी आनन्द आहुजासँग विवाह बन्धनमा बाँधिसकेका छन् । मे ८ का दिन उनको विवाहको रिसेप्शन पार्टी होटल लीलामा राखेका थिए । जहाँ बलिउडका सेलिब्रेटीहरु सहभागी भएका छन् । हालैमात्र उक्त रिसेप्शन पार्टीमा सहभागी भएका सेलिब्रेटीले अाफ्ना सुन्दर तस्वीरहरु सामाजिक सञ्जालमा तस्विरहरु शेयर गरेका छन् । जहाँ जान्ह्वी कपुरकी सौतेनी बहिनी अंशलाको साथ सान्दार पोजमा दिइरहेकी छन् । दुवैजना मिडिया सामुमात्र होइन, अाफू-अाफूमा पनि फोटो पोज दिइरहेका थिए । त्यही अंशुलाको साथ खुशीको पनि देखिएकी छन् । साथै, अर्की चर्चित अभिनेत्री करिना कपुर स्टनिंग लुक्समा देखिएकी छन् भने अमृता र बाँकी अरु सेलिब्रेटी क्वालिटी टाइप स्पेन्ड गरिरहेका थिए । बलिउड अभिनेत्री सोनम कपुर आनन्द आहुजाको विवाह रिसेप्शन पार्टीमा बधाई तथा शुभकामना दिनका निम्ति शिल्पा र ऐश्वर्या दुवैजनाको भेटमा फोटोशुट लिएका छन् । दुवैजना फोटोशुटमा निकै आकर्षण पोजमा देखिएका छन् । यसैको साथमा अर्की अभिनेत्री करिना कपुर र आलिया भट्ट एकसाथ सैफसँग ग्रुप फोटोमा सामेल भएका छन् । जहाँ सबैजना मस्ती गरिरहेका थिए । उक्त रिसेप्शन पार्टीमा बलिउडका सुपरस्टार सलमान खान, सनाया कपुर, अर्पिता खान, करिश्मा कपुर, संजय कपुर, करन जौहर, शाहरुख खान, मनिषा मल्होत्राका खास उपस्थिति रहेका छन् । हेर्नुहोस् फोटोफिचर-      

केन्या, वैशाख २८ । केन्यामा एउटा बाँध भत्किँदा मृत्यु हुनेको संख्या ४१ पुगेको छ भने थुप्रै मानिस बेपत्ता छन् । नाकुरु प्रदेशमा रहेको बाँध भत्किएपछि त्यस वरपरका बस्ने २५ सय मानिस विस्थापित बनेको जनाइएको छ । अधिकारीहरुले मृत्यु हुनेको संख्या अझै बढ्ने अनुमान गरेका छन् । बाँधको पानीले घर, विद्यालय भवन र व्यापारिक कार्यालयहरु क्षतिग्रस्त बनाएको छ । स्थानीय बासिन्दा, रेडक्रसका स्वयंसेवकलगायत उद्धार टोलीले उद्धार गरेका छन् । माटो र हिलोमा पुरिएका ४० भन्दा बढीलाई उद्धार गरिएको छ । बाढी पहिरोकै कारण केन्यामा दुई महिनाको अवधिमा १३० जनाको मृत्यु भएको र दुई लाख २० हजारभन्दा बढी मानिस विस्थापित बनेको बताइएको छ । (एजेन्सी)

काठमाडौं, वैशाख २८ । ‘रिड नेपाल’ नामक सामाजिक संस्थाले देशका ४२ जिल्लामा ६७ वटा पुस्तकालय स्थापना गरेको छ। सो संस्थाले समुदायमा पुस्तकालयको स्थापना गरी स्थानीयवासीलाई शैक्षिक ज्ञानको विकास गर्ने उद्देश्य राखेको छ। पछिल्लो पटक विकास गरेका केही पुस्तकालयमा महिला कक्ष, बाल कक्ष, युवा कक्ष, सूचना कक्ष तथा श्रव्यदृश्यको समेत व्यवस्था गरिएको संस्थाका अधिकृत चिनकाजी श्रेष्ठले जानकारी दिए। उक्त संस्थाले राष्ट्रिय तथा अन्तर्राष्ट्रिय विभिन्न दातृ संघसंस्थासँग समन्वय गरी पुस्तकालय विकास तथा पुस्तकालयमार्फत विभिन्न सीपमूलक कार्यक्रमसमेत सञ्चालन गरी स्थानीयवासीको सामाजिक रुपान्तरणमा समेत भूमिका निर्वाह गरेको छ। सन् १९९१ मा स्थापना भएको सो संस्थाले भूकम्पको समयमा पुस्तकालय क्षेत्र तथा त्यस वरपर क्षेत्रका नागरिकलाई राहत वितरण गरी सामाजिक सेवा सञ्चालन गरेको जनाइएको छ। देशका विभिन्न जिल्लामा रहेका भूकम्पले प्रभाव पारेका ६ वटा पुस्तकालय भने पूरै भत्काएर पुनःनिर्माणसमेत सम्पन्न गरेको छ। त्यसैगरी, समुदायमा आधारित समावेशी विपत जोखिम न्यूनीकरण परियोजनाअन्तर्गत नुवाकोट, दोलखा, स्याङ्जा, मुस्ताङ, महोत्तरी र सोलुखुम्बुमा उत्कृष्ट पुस्तकालय सञ्चालनमा ल्याइएको अधिकृत श्रेष्ठले जानकारी दिए।

काठमाडौं, वैशाख २७ । मलेसियाका पूर्वप्रधानमन्त्री महाथिर मोहम्मद नेतृत्वको विपक्षी गठबन्धनले आम निर्वाचनमा ऐतिहासिक जीत हासिल गरेको छ । ६० वर्षसम्म सत्तामा रहेको पार्टी बारिसन नेशनल (बीएन)लाई हराएकाले अब महाथिर पुनः प्रधानमन्त्री बन्नेछन् । निर्वाचन आयोगका अनुसार महाथिरको पार्टीले ११५ सिट जितेको छ । सरकार बनाउनका लागि ११२ सिट भए पुग्छ । निर्वाचन परिणाम सार्वजनिक भएलगत्तै महाथिरको पार्टीका समर्थकहरु सडकमा विजय उत्सव मनाइरहेका छन् । बीएन र यसको प्रमुख पार्टी संयुक्त मलेशिया राष्ट्रिय संगठन (यूएमएनओ) १९५७ मा ब्रिटेनबाट स्वतन्त्र भएदेखि नै सत्तामा थियो । तर, केही वर्षदेखि उसको लोकप्रियतामा कमी आएको थियो । त्यसैको परिणाम हुनसक्छ यस चुनावमा प्रधानमन्त्री नजिब रजाकको पार्टीले केबल ७९ सिट जितेको छ । शपथग्रहणमा सार्वजनिक विदा शपथग्रहण समारोह आउँदो बिहीबार हुने छ । शपथ ग्रहण गरेपछि ९२ वर्षीय महाथिर विश्वकै सबैभन्दा वृद्ध निर्वाचित नेता बन्नेछन् । शपथ ग्रहण समारोहको दिन मलेसियामा सार्वजनिक विदा दिइएको छ । जीतपछि पत्रकारहरुसँग कुरा गर्दै महाथिरले भनेका छन्, ‘हामीलाई कुनै प्रकारको बदला चाहिएको होइन, हामी त कानुनको शासन लागू गर्न चाहान्छौं ।’ बिगतमा महाथिर नजिब रजाक नेतृत्वकै पार्टीको सदस्य थिए । नजिबको राजनीतिक गुरु पनि थिए । तर, उनले पछि भ्रष्टाचारलाई साथ दिने पार्टीमा नरहने भन्दै अलग्गिएको घोषणा गरेका थिए ।

काठमाडौँ । एमाले र माओवादीबाट प्रधानमन्त्री भइसकेका तीन नेताले दुई पार्टीबीच चाँडै एकता हुने बताएका छन् । एकताको काम अन्तिम अवस्थामा पुगेकाले चाँडै त्यसले मूर्तरूप लिने उनीहरूको भनाइ छ । कार्ल मार्क्स जन्म द्वि–शतवार्षिकी समारोहलाई शुक्रबार राजधानीमा सम्बोधन गर्दै उनीहरूले एकता अनिवार्य भएकाले यसलाई छिटो टुंग्याइने दाबी गरे । माओवादी केन्द्रका अध्यक्ष पुष्पकमल दाहालले दुई पार्टीबीचको एकता नभए मुलुक पुन: अस्थिरताको राजनीतिक भुमरीमा फस्ने भएकाले छिटो एकता प्रक्रिया टुंग्याउन लागेको बताएका छन् । कपितय बुद्धिजीवी र विदेशीका अनुमानलाई गलत साबित गर्दै दुई दल छिट्टै एक बन्ने उनले दाबी गरे । दाहालले केही दिनभित्रै पार्टी एकताको विषयमा स्पष्ट धारणा बाहिर आउने बताए । एकतासम्बन्धी विवाद अन्त्य गर्न केही दिनयता प्रधानमन्त्री एवं एमाले अध्यक्ष ओली र दाहालबीच निरन्तर छलफल चलिरहेको छ । छलफल करिब सहमतिनिकट पुगेको छ । अध्यक्ष दाहालले एकतापछि कम्युनिस्ट पार्टी झन् शक्तिशाली हुने र समृद्धिको दिशामा सफलता हासिल गर्ने बताए । तर दुई पार्टी एक हुने भएकाले अब फरकफरक मनोविज्ञान बोकेर बस्न नहुने दाहालको भनाइ थियो । ‘अब पार्टी नै एकता हुने भएपछि पुरानो आग्रह पूर्वाग्रहमा बस्नु हँुदैन रूपान्तरण हुन आवश्यक छ,’ उनले भने । एमाले र माओवादीबीच एकता भएपछि अन्य स–साना कम्युनिस्ट घटक पनि मिल्न आउने दाहालको दाबी थियो । कार्यक्रममा एमाले वरिष्ठ नेता झलनाथ खनालले पनि पार्टी एकतालाई निष्कर्षमा पुर्‍याउनुपर्ने बताए । मुलुकमा समाजवादको आधारशिला खडा गर्न एकता अनिवार्य रहेको र त्यो कामले अब पूर्णता पाउन लागेको खनालको भनाइ थियो । एमालेका अर्का वरिष्ठ नेता माधव नेपालले पनि पार्टीहरूबीच एकतामा कुनै अन्तरविरोध नरहेकाले चाँडै त्यसले पूर्णता पाउने बताए । नेपाललाई शान्तिपूर्ण रूपमा रूपान्तरण र समृद्धिका लागि पनि एकता अनिवार्य रहेको उनले उल्लेख गरे । कार्यक्रममा एमाले उपाध्यक्ष वामदेव गौतम, उपमहासचिव घनश्याम भुसालले कम्युनिस्ट एकता अनिवार्य भएको धारणा राखे । नेता भुसालले माक्र्सवाद, समाजवाद, लोकतन्त्र र समृद्धि लगायतका विषयमा केन्द्रित रहेर कार्यपत्र प्रस्तुत गरेका थिए । कार्ल मार्क्स जन्मेको २ सयौं वर्ष पुगेको अवसरमा माक्र्सवादी दर्शनको प्रवर्द्धन गर्ने प्रयोजनका लागि नेता भुसालको संयोजकत्वमा गत वर्ष नै समिति बनेको थियो । उक्त समितिले शुक्रबार र शनिबार दुईदिने गोष्ठी आयोजना गरेको हो । गोष्ठीमा एमाले, माओवादीलगायत मार्क्सवादी विचाराधारामा विश्वास गर्ने दलका नेता, कार्यकर्ता र शुभेच्छुक सहभागी छन् । मे ५ मा मार्क्सजन्मेको २ सय वर्ष पुग्दै छ । यस अवसरमा एमाले केन्द्रीय समितिकै तर्फबाट राजधानीको गौशालामा अर्को छुट्टै कार्यक्रम गरिंदै छ । उक्त कार्यक्रममा प्रधानमन्त्री केपी ओलीलगायत एमालेका वरिष्ठ नेताहरूले सम्बोधन गर्नेछन् । कान्तिपुर