काठमाडौँ । पुष्प व्यवसायको विकास र विस्तारका लागि यही चैत ३० देखि आगामी वैशाख ३ सम्म यहाँ पुष्प प्रदर्शनी २०१८ हुने भएको छ । फ्लोरिकल्चर एशोसिएशन नेपालले मंगलबार यहाँ गरेको पत्रकार सम्मेलनमा ‘स्वच्छ वातावरण तथा आर्थिक समृद्धिका लागि पुष्प व्यवसाय’ भन्ने मूल नाराका साथ भृकुटीमण्डपमा मेला हुन लागेको जनाएको छ । मेलामा मौसमी फूल, आलङ्कारिक बोटबिरुवा, सभा सम्मेलनका लागि प्रयोग गरिने कट फ्लावर, फूलको गानो, बीउबिजन, हरितगृह, कृषि औजारजस्ता सामग्री रहने छन् । मेलामा फूलका ८२ कक्ष रहने छन् । घरआँगन तथा बगैँचा सजाउन चाहनेहरुका लागि ज्ञान हासिल गर्न मेला उपयोगी हुने एशोसिएशनका अध्यक्ष कुमार कसैंजु श्रेष्ठले बताउनुभयो । नेपालमा विसं २०११ देखि शुरु भएको पुष्प व्यवसाय शहरीकरणको विकास र विस्तारसँगै काठमाडौँ उपत्यकामा मात्रै नभएर मोफसलमा पनि फैलँदो स्थितिमा छ । हाल ४१ जिल्लामा करीब ६७८ पुष्प व्यवसाय विस्तार भइसकेको छ । करीब १५३ हेक्टर क्षेत्रफलमा यसको खेती हुँदै आएको जनाइएको छ । अहिले यस व्यवसायमा ४३ हजारभन्दा बढी व्यक्ति सहभागी हुँदै आएका छन् । रासस

रुपन्देही जिल्लाको सौ फर्साटिकरमा रहेको टाईगर्स, बु्रहरी इण्डष्ट्रिज प्रा लि ले आफ्नो उत्पादन दुवई निर्यात पश्चात अस्टलिया, भारत, श्रीलंका निर्यातको तयारीमा लागेको छ । टाईगर, टेन्सवर्ग र लण्डन आईस ब्राण्डको बियर वोत्तल र क्यानमा उत्पादन गर्दै आएको उद्योगले बिदेशी बजारको माग अनुसार पछिल्लोपटक टेन्सवर्ग बियरको बोत्तलमा पुल अप क्यापमा उत्पादन सुरु गरेर उपभोक्ता र बिक्रेतालाई सहज वनाएको छ । उद्योगका संचालक तेजेन्द्र खड्का सरकारले उद्योग संचालनको राम्रो वातावरण वनाईदिए ईनटरनेशनल स्तरको नेपाली बियर उत्पादन बिदेसी बजारमा निर्यात गरि ठूलो राजस्व बिदेसीनवाट जोगाउन सकिने बताउँछन् । यदी प्रसस्त उत्पादन बिदेश पठाउन सक्ने हो भनी डलरको समस्यामा समेत कमी आउने उनको भनाई छ । पढाईमा डिग्री नगरेपनि अनुभवले खारीएका मेहनती, हठी स्वभावका उद्योगी खड्काले सरकारले वातावरण वनाईदिए अन्तराष्ट्रियस्तरको टेन्सवर्गको उत्पादन अव दुवई ,अष्ट्रेलियाको अलावा श्रीलंका समेत निर्यात गर्ने तयारी गरीरहेको उनी बताउँछन् । भारतमा बेभरेज कम्पनीमा २० औं वर्ष अनुभव बटुलेर नेपालमा उद्योग संचालनमा लाग्नु भएका खड्का सरकारलाई यस्ता उद्योग संचालनले राम्रो राजस्व प्राप्त हुने भएकोले सरकार स्वदेसी उद्योग संचालनका लागि सहज वातावरण वनाई हौसला बढाउनु पर्ने हुन्छ । करिब दुई अर्ब लगानीमा संचालनमा आएको यो आधुनिक टाईगर बु्रअरी इण्डष्ट्रिज प्रा। लि। ले गएको २ वर्ष देखि नेपाल टाईगस, लण्डन आईस र टेन्सवर्ग वियर उत्पादन गर्दै आएको वताउदै संचालक खड्का भन्नुहुन्छ यहाँ केही गर्छु भन्ने उद्योगि व्यवसायीलाई बिदेशमा जस्तो हौसला र सुबिदा छैन । यो बर्ष ६ महिनामा मात्र हामीले सरकारलाई ७० करोड बढी राजस्व बुझायौ । उत्पादन बढाउछौ, मेसीन थप्छौ बिदेश निर्यात गछौं भन्दा धेरै प्रकृया र समस्या पार गर्नु पर्छ उनी भन्छन् । करिव ५ बिगा जग्ग्गामा फैलिएको यो जर्मन प्रबिधिको आधुनिक उद्योगले दैनिक २० हजार पेटी उत्पादन क्षमता राखेपनि हाल १० हजार पेटि सम्म उत्पादन गर्दै आएको छ । जहाँ हाल ६ सय जनाले प्रत्यक्ष र अप्रत्यक्ष करिव २ हजार बढि कामदारले रोजगार पाएका छन् । जस्मा स्थानिय र महिलाको संख्या पनि बढी नै छ । यसको कच्चा पदार्थ जौ, गहुं, कनिका आदि भारतवाट आयात हुदै आएको उद्योगले जनाएको छ । भारतीयको समेत लगानी रहेको यो जर्मन प्रबिधिको उद्योगवाट उत्पादित टेन्सबर्ग प्रिमियमले काठमाण्डौँ पोखरा, लगायत पूर्व मेचीदेखि पश्चिमका मुख्य बजारमा राम्रो बजार लिदै गएको उद्योगको भनाई छ ।

काठमाडौं, चैत २८ । महेन्द्र सिंह धोनीको कप्तानीमा रहेको चेन्नई सुपर किंग्सले इन्डियन प्रिमियर लिग (आईपीएल) क्रिकेटमा लगातार दोस्रो जित निकालेको छ । मंगलबार राति भएको दोस्रो खेलमा कोलकाता नाइट राइडर्सलाई ५ विकेटले पराजित गर्दै चेन्नईले लगातार दोस्रो जित निकालेको हो । घरेलु मैदानमा कोलकाताले दिएको २०३ रनको विशाल लक्ष्य चेन्नईले १ बल बाँकी रहदा मात्र ५ विकेटको क्षतिमा पुरा गर्यो । चेन्नईको जितमा साम बिलिङस ५६ रनको अर्धशतकीय पारी खेले । त्यस्तै शेन वाट्सनले ४२, अम्बाती रायडुले ३९ तथा कप्तान महेन्द्र सिंह धोनीले २५ रन जोडे । यस्तै रविन्द्र जडेजा र ड्याने ब्राभोले अविजित ११ – ११ रन जोडे । कोलकाताका टम कुरनले दुई विकेट लिए । यसअघि टस हारेर पहिले ब्याटिङ्ग गरेको कोलकताले पुरै २० ओभर खेल्दै ६ विकेट गुमाएर २०२ रनको विशाल योगफल तयार गरेको थियो । कोलकाताको लागि आन्द्रे रुसेलले अविजित ८८ रन बनाएका थिए । यस्तै रोबिन उथप्पाले २९, कप्तान दिनेश कार्तिकले २६ रन जोड्दा क्रिस लायनले २२ रन जोडे । चेन्नईका शेन वाट्सनले दुई विकेट लिए । जितसँगै चेन्नईले लिगमा ४ अंक जोडेको छ । र, चेन्नई समूहको शीर्ष स्थानमा उक्लिएको छ । चेन्नईले प्ले अफमा पुग्ने सम्भावना समेत बलियो बनाएको हो । चेन्नईले पहिलो खेलमा मुम्बई इन्डियन्सलाई १ विकेटले हराएको थियो । पराजित कोलकाता २ अंक जोडेर चौथो स्थानमा छ ।

चितवन । चितवनको नारायणगढ मुग्लिन सडकखण्ड चौडा पार्ने काम अन्तिमतिर पुगे पनि साँघुरा पुलका कारण यात्रुलाई सास्ती उस्तै छ । पुलमा दुईतर्फी गाडी हिँड्न नसक्दा सडक जाम अझै रोकिएको छैन । अपराह्न ४ बजेपछि यहाँ सवारी खुल्दा यात्रुलाई घण्टाँै जाममा बस्नुपर्ने बाध्यता छ । यसरी जाम पर्दा माथिबाट ढुंगा खसेर ज्यानै जाने खतरा रहेको एक यात्रु रमेश नेपालले बताउनुभयो। “सडक निर्माण भएको स्थानमा समस्या छैन, नेपालले भन्नुभयो, पुलको मुखमा दुई वटा गाडी नछिर्दा हिजोआज पनि घण्टाँै जामको पीडा छ ।” सडक र पुलसँगसँगै नबनाउँनाले समस्या परेको उहाँ बताउनुहुन्छ । नारायणगढ मुग्लिन सडकको करीब ३४ किलोमिटर क्षेत्रमा सडक चौडा पार्ने काम अहिले जारी छ । उक्त सडकमा १८ वटा पुल पर्छन् । त्यसमध्ये साना लगानीको खानीपुल, मौरीपुल, दासढुंगापुल र जलवीरे पुल नारायणगढ मुग्लिन सडक निर्माण आयोजनाले नै बनाउन थालेको छ । बाँकी १४ स्थानमा पुल निर्माण हुन सकेको छैन । नारायणगढ मुग्लिन सडक आयोजनाका इञ्जिनियर शिव खनाल अप्ठेरा पुल निर्माण हुन नसक्दा सडक जामको समस्या भने रहेको प्रतिक्रिया दिनुहुन्छ । “बाटो ११ मिटरको छ, पुल साढे पाँच मिटरको छ, खनालले भन्नुभयो, त्यस्ता पुलमा दुईवटा गाडी जानै मान्दैनन् ।” मुख्यगरी मुग्लिनदेखि जलविरेसम्मको सात किलोमिटर अझै सास्ती छ । सडक निर्माणको काम पनि सो क्षेत्रमा बाँकी नै छ । मुग्लिनबाट आउँदाको चार वटा पुल साँघुरा छन् । त्यसमध्य ३ नम्बर पुल भने अति जोखिमपूर्ण र साँघुरो छ । त्यही पुलमा बढी जाम हुँदा तीन÷चार किलोमिटर परसम्मै गाडी रोकिन्छन् । सबै पुल निर्माण नहुँदासम्म भने यात्रुले सास्ती पाउने पक्का छ । एक त साँघुरो पुलले जाम पर्नुपर्ने र अर्काे माथिबाट खस्ने पहिरोको उत्तिकै जोखिम हुँदा यात्रु दोहोरो जोखिममा परेको एकजना यात्रु सूर्य अधिकारी बताउनुहुन्छ । नारायणगढ मुग्लिन सडक आयोजनाका अनुसार सडक निर्माणको काम भने करीब ८८ प्रतिशत सम्पन्न भएको छ । करीब ३४ किलोमिटरमध्ये २८.२ किलोमिटर कालोपत्रे भइसकेको नारायणगढ मुग्लिन सडक आयोजनाका इञ्जिनियर खनाल बताउनुहुन्छ । उहाँले आगामी वैशाख १५ सम्ममा सबै सक्ने गरी काम भइरहेको बताउनुभयो । रासस

२१ चैत, सुर्खेत । मध्यपश्चिमाञ्चल विश्वविद्यालयका कार्यवाहक स्ववीयू सभापति पक्राउको विरोधमा प्रदर्शनमा उत्रिएका विद्यार्थीहरुले भौतिक पूर्वाधार विकास मन्त्री खड्क खत्रीको गाडीमा तोडफोड गरेका छन् । नेविसंघ सम्बद्ध विद्यार्थीहरुले बुधबार बिहान मन्त्री खत्रीको बा २ झ १५६६ नम्बरको गाडीमाथि तोडफोड गरेका हुन् । ताेडफोडबाट गाडीको अगाडि भागको सीसा फुटेको छ । गाडीमा मन्त्री खत्री नभएर सांसद् धर्म रेग्मी सवार थिए । प्रहरीका अनुसार उनी सकुशल छन् । विद्यार्थीहरुले विश्वविद्यालयको मूल गेटमा अहिले प्रदर्शन जारी राखेका छन् । विद्यार्थीहरुको प्रदर्शनमा तोडफोड हुन थालेपछि सतर्कता अपनाइएको प्रहरीले जनाएको छ । पछिल्लो समय मध्यपश्चिमाञ्चलका विद्यार्थीहरु इन्जिनियररिङ संकायसँग सम्बन्धित विभिन्न मागहरु राखेर आन्दोलित हुँदै आइरहेका छन् । स्ववीयू र नेविसंघले राखेको मागको विपक्षमा एमाले र माओवादीनिकट विद्यार्थी उत्रिएपछि केही दिनअघि यहाँ दुई पक्षबीच झडप नै भएको थियो ।

प्रधानमन्त्रीको भारत भ्रमण टोलीमा अभिनेता राजेश हमाल पनि सामेल हुने भएका छन् । प्रधानमन्त्रीको भारत भ्रमणका क्रममा नेपाली प्रतिनिधि मण्डलमा मन्त्री, सांसद, सरकारी कर्मचारीका अलावा केही कलाकारहरु पनि रहने भएका छन् । कलाकार मध्ये राजेश हमाल त्यो टोलीमा रहने बताइएको छ । नयाँ दिल्लीमा रहादा प्रधानमन्त्रीको बलिउडका प्रतिष्ठित कलाकारसँग भेटघाट र अन्तरक्रिया गर्ने कार्यक्रम तय भएको छ । सोही कार्यक्रमलाई मध्येनजर गर्दै अभिनेता हमाल र अन्य कलाकारलाई पनि भ्रमण टोलीमा समावेश गरिएको बताइएको छ । प्रधानमन्त्री कार्यालयका स्रोतका अनुसार प्रम ओलीले भेट गर्ने भारतीय कलाकारहरुको अन्तिम टुंगो भने आज सााझसम्म लाग्नेछ । गत साता राजधानीमा सम्पन्न फान अवार्ड उद्धघाटनका क्रममा प्रधानमन्त्री ओलीले आफ्नो भारत भ्रमणमा कलाकारलाई पनि समावेश गर्ने बताएका थिए ।

ललितपुर, चैत्र १९ । कानून, न्याय तथा संसदीय मामिला मन्त्री शेरबहादुर तामाङले आज बिहान मन्त्री निवासमा रहेको जग्गामा तरकारी लगाउन खनजोत गर्नुभएको छ । बिहान मन्त्री तामाङसँगै उहाँकी श्रीमती प्रदेश नं १ की संसद् उषाकला राईले पनि डोजर चलाउन सहयोग गर्नुभयो । कार्यकर्ता, सुरक्षाकर्मी, पत्रकारलगायत मन्त्रीले डोजर चलाएको हेर्न र फोटो खिच्नका उपस्थित थिए । उहाँले क्वाटरमा कार्यरत कर्मचारीलाई आफूलाई पुग्ने तरकारी यही फलाउन निर्देशनसमेत दिनुभयो । मन्त्री तामाङले जमिन बाँझो राखेर खाद्यान्न आयात गर्ने क्रम रोक्नका लागि आफूले यहाँको जमिन खनजोत गर्न थालेको बताउनुभयो । मन्त्री क्वाटरमा रहेको जमिनमा तरकारी लगाए यहाँ तरकारी किन्नु पर्दैन । उहाँले भन्नुभयो, “अब सबै मन्त्रीहरूमा कसले राम्रो तरकारी फलाउने भन्ने प्रतिष्पर्धा हुनुपर्छ ।” नेपालमा भित्रिने धेरै विप्रेषण खाद्यान्न खरिदकै लागि विदेशिने गरेको छ भन्दै उहाँले झण्डै रु एक खर्ब खाद्यान्नका लागि बाहिरिने गरेको तथ्याङ्क छ । अबको दुई वर्षमा नै नेपाललाई खाद्यान्न, फलफूल, दूधलगायतमा आत्मनिर्भर बनाउनुपर्ने आवश्यकता औँल्याउनुभयोे । जमिन बाँझो राख्न नहुने कानूनी व्यवस्थालाई कडाइका साथ लागू गराउन पहल गरिनेमा पनि मन्त्री तामाङले जोड दिनुभयो ।

काठमाडौं । त्रिभुवन अन्तराष्ट्रिय विमानस्थलबाट कम्मरमा बाँध्ने पेटीभित्र लुकाएर सुन तस्करी गर्न खोज्ने एक भारतीय नागरिक  पक्राउ परेका छन् । प्रहरी र भन्सार कार्यालयले दुबईबाट आएका भारतीय नागरिक मोहम्मद हरिफलाई सोमबार बिहान पक्राउ गरेको हो । हरिफले धुलो बनाएर पेटीभित्र करिब २ केजी सुन लुकाएका थिए । उनीमाथि अनुसन्धान भइरहेको विमानस्थल भन्सार कार्यालयका प्रमुख नारायण सापकोटाले बताए । पासपोर्ट नम्बर पी १२७९९३५ नम्बर भएका हरिफ भारतको केरलाका स्थायी नागरिक हुन्। केरला घर भएका भारतीयहरु नेपालको विमानस्थलमा पटक पटक सुनसहित पक्राउ पर्दै आएका छन्।

दाङ । विकासप्रेमी नेता खुमबहादुर खड्काको निधनले दाङ स्तब्ध भएको छ । दंगालीहरुले विकासप्रेमी नेतालाई गुमाएको अभिव्यक्ति दिएका छन् । खड्कालाई पार्टीमा जेसुकै भनिए पनि जिल्लाको विकास निर्माणमा उदार मनको नेता भएकाले सबैले उहाँको उच्च सम्मान गरेका छन् । “खुमबहादुर साँच्चै प्रजातन्त्रका योद्धा अनि जुधारु नेता पनि हुनुहुन्थ्यो, उहाँलाई गुमाउनुपर्दा धेरै दुःख लागेको छ”– बयोवृद्ध दलबहादुर वलीले भन्नुभयो । प्रजातन्त्रका सेनानी तिलक डांगीले स्व खड्का निःस्वार्थ विकासप्रेमी नेता भएको बताउनुभयो, “जिल्लाको विकास, निर्माण र समृद्धिको काम गरेर कुशल संगठकका रुपमा पनि प्रजातन्त्रको कुशल नेतृत्व गुमाएका छौँ, प्रजातन्त्रका लागि अहोरात्र खट्ने, कुशल संगठनकर्ता, विकासप्रेमी नेता खड्काको निधनले एउटा विकासको नक्षत्र हो । ” स्व खड्काको जन्मथलो घोराही उपमहानगरपालिका–५ गाविस वडा नं ६स्थित भैसाप्रथा गाउँ शोकमा छ । स्थानीयवासी आफूहरुले मात्र नभएर देशले नै अभिभावक गुमाएको बताए विगतमा उहाँको नाम सुन्दा खुशीले प्रफुल्ल हुने स्थानीयवासीमा मृत्युको खबर सुन्दा अप्रत्यासित लागि रहेको स्व। खड्काका अभिभावक समेत रहनुभएका स्थानीयवासी सुरवीरसिंह वली बताउनुभयो । “खुमबहादुरको उपचारको क्रममा मृत्यु भएको सबैले सुनाउँछन्, तर मलाई विश्वासै लाग्दैन”, खड्कासँगै बाल्यकाल बिताउनुभएका उहाँले भन्नुभयो । “पहिले गाउँमा सडक थिएन, खानेपानीका लागि एक घण्टा हिँडेर जानुपथ्र्यो, तर खुमबहादुर मन्त्री भएको बेलामा गाउँमा कुवा बनाइदिनुभयोे, बिजुली बत्ती ल्याइदिनुभयो, सडक र सिँचाइको व्यवस्थासमेत गरिदिनुभयो” स्थानीय केशरबहादुर केसीले भन्नुभयो । त्यस्तै खड्काको निधनसँगै उहाँको गृह गाउँ लमही नगरपालिका–८ सतवरिया शोकमा डुबेको छ । काँग्रेस समर्थकलाई मात्र होइन सबै पार्टीप्रति आस्था राख्ने सबै दुखी बनेका खड्काको निधनमा । खड्का काँग्रेसका नेता मात्र होइन जिल्लाको विकासको सारथी नै हुनुहुुन्थ्यो । “सबैको साझा नेता खड्कालाई हामीले गुमाएका छाैं, आफ्नो अभिभावक गुमाएको पीडा शब्दमा उतार्न सकिँदैन” लमही नगरपालिका–८ का वडा अध्यक्ष मेघनारायण चौधरीले भन्नुभयो । गाविस–६ मा जन्मेका खड्काको कर्मथलो सतवरिया हो । सतवरियामा रहेको उनको घरमा शनिबारदेखि सन्नाटा छाएको छ । रासस

दैलेख, चैत्र १८ । माओवादी सशस्त्र द्वन्द्वको समयमा हत्या गरेर गाडिएका व्यक्तिका आफन्तले शव खोज्न थालेका छन् । उनीहरू गाडिएको सम्भावित ठाउँमा आफैँ उत्खनन गर्न थालेका हुन् । शनिबार दैलेखको महाबु गाउँपालिका–६ का ऐनबहादुर शाहीका आफन्तले शव उत्खनन गरेका छन् । द्वन्द्वको समयमा संयुक्त सुरक्षा फौजले पक्राउ गरेको थियो । बेपत्ता पारिएका उनका विषयमा कुनै जानकारी दिइएको थिएन । सुरक्षा फौजले मारेर शवसमेत दिएको थिएन । त्यसको १४ वर्षपछि आफन्तजनले शनिबार शव उत्खनन गरेका हुन् । काजकिरिया गर्न उत्खनन वैदेशिक रोजगारीबाट फर्किएका दुई छोराले काजकिरिया गर्न शव उत्खनन गरेका हुन् । ऐनबहादुरकी आमा तुलसी शाहीले नातिलाई काजकिरिया गर्न बारम्बार आग्रह गर्न थालेपछि उत्खनन गरिएको हो । ‘बज्यैले जोड गर्नुभयो, त्यसैले उत्खनन गर्न बाध्य भयौँ,’ ऐनबहादुरका माइला छोरा बृखबहादुरले भने । शव उत्खननपछि शनिबार नै दाहसंस्कार पनि गरिएको छ । ऐनबहादुरको हत्यापछि परिवारको आर्थिक अवस्था नाजुक भएपछि विदेश जानुपरेको बृखबहादुरले बताए । यसअघि दैलेखकै नारायण नगरपालिका–३ का उदय रेग्मी र सुकुल सिंहको शव पनि आफन्तजनले उत्खनन गरेका थिए । दुवैलाई ०६२ मा सुरक्षा फौजले नियन्त्रणमा लिएर मारेको थियो । उनीहरूको शव आफन्तलाई नबुझाएर जंगलमा गाडिएको थियो । दैलेखमा राज्य र विद्रोही पक्षबाट हत्या गरेर शव नदिएकाहरूको संख्या तीन सयभन्दा बढी छ । यस्तो थियो घटना १७ साउन ०६० मा दैलेखको धरमपोखराबाट ऐनबहादुरसहित १२ जनालाई सेनाले पक्राउ गरेको थियो । ११ लाई छाडेको थियो भने उनलाई चरम यातना दिएर हत्या गरेको थियो । त्यसपछि उनको शव धरमपोखरा जंगलमा गाडेको थियो । उनको हत्यापछि परिवार विस्थापित भएको थियो । गाउँमा बस्ने अवस्था नभएपछि तीनै छोराले गाउँ छाडेका थिए । उनीहरूमध्ये एक नेपाली सेनामै कार्यरत छन् भने दुई वैदेशिक रोजगारीमा गएका थिए । नयाँपत्रिकाबाट

काठमाडौं, चैत ८ । परराष्ट्र मन्त्रालयले युरोपेली युनियनको निर्वाचन पर्यवेक्षण मिसनले प्रतिनिधिसभा र प्रदेशसभाको निर्वाचन पर्यवेक्षणबारे दिएको अन्तिम प्रतिवेदनमाथि गम्भीर आपत्ति जनाएको छ । प्रतिवेदनका केही सुझावले नेपालको संविधान कार्यान्वयनमा कोशेढुंगा सावित भएको शान्तिपूर्ण, स्वच्छ र धाँधलीरहितरुपमा सम्पन्न निर्वाचनलाई नजरअन्दाज गर्नाका साथै अन्तर्राष्ट्रिय निर्वाचन पर्यवेक्षणको कार्यक्षेत्र र मान्यताविपरीत देखिएको मन्त्रालयले जनाएको छ । युनियनले ती निर्वाचनका कानुनमा खस क्षेत्रीलाई आरक्षण कोटामा नराख्नलगायत सुझावसहितको प्रतिवेदन मंगलबार सार्वजनिक गरेको थियो । मन्त्रालयले बुधबार जारी गरेको विज्ञप्तिमा निर्वाचन आयोगकोे अन्तर्राष्ट्रिय निर्वाचन पर्यवेक्षणको आचारसंहिता तथा नेपाल सरकार र सो युनियनबीच भएको सम्झौताविपरीत सो प्रतिवेदन आएको उल्लेख गरिएको छ । नेपालको संविधानलाई प्रत्यक्ष चुनौती दिइएको त्यसप्रकारको सुझाव फिर्ता लिन पनि मन्त्रालयले युनियनसँग आग्रह गरेको छ । सार्वभौम मुलुकका नेपालीले आफ्नो सामाजिक संरचना र समावेशीताको मर्मअनुसार तय गरेको राजनीतिक मुद्दामा सो आयोगबाट सुझाव दिइनु दुःखद भएको पनि मन्त्रालयले जनाएको छ । अत्यधिक मतदान भएको निर्वाचन नेपालको लोेकतन्त्र, विकास र समृद्धिका लागि महत्वपूर्ण सावित भएको पनि विज्ञप्तिमा जनाइएको छ ।

पोखरा, चैत्र ७। युवा तथा खेलकुदमन्त्री जगत विश्वकर्माले सातवटै प्रदेशमा अन्तर्राष्ट्रियस्तरका रंशाला निर्माण गरिने बताएका छन् । पश्चिमाञ्चल क्षेत्रीय खेलकुद विकास समिति र जिल्ला खेलकुद विकास समितिद्वारा नवनियुक्त मन्त्री विश्वकर्माको सम्मानमा पोखरा रंगशालामा आयोजित कार्यक्रममा उनले सरकारले खेलको विकासलाई उच्च प्राथमिकतामा राख्ने बताए । आसन्न आठौँ राष्ट्रिय खेलकुद प्रतियोगिताका साथै १३औं दक्षिण एशियाली खेलकुद प्रतियोगितालाई सम्पन्न गर्नका लागि आवश्यक पूर्वाधार निर्माणमा जोड दिनुका साथै आगामी बजेटमा खेललाई प्राथमिकतामा राख्नुपर्ने मन्त्री विश्वकर्माले बताए । पोखरासहित प्रदेश नं ४ मा खेल पर्यटनका अत्याधिक सम्भावना रहेको उल्लेख गर्दै उनले यसको उजागरका लागि सरकार लागिपर्ने धारणा राखे । पश्चिमाञ्चल क्षेत्रीय खेलकुद विकास समितिका अध्यक्ष खगराज पौडेलले सरकारभन्दा पनि निजी क्षेत्रबाट खेल क्षेत्रका पूर्वाधारमा लगानी भइरहेको धारणा राख्दै यस क्षेत्रको विकासमा राज्यको लगानीले प्राथमिकता पाउनुपर्नेमा जोड दिए । प्रदेशसभा सदस्य दीपक कोइरालाले खेलाडीलाई खेलेर जीविकोपार्जन गर्ने अवस्था नआउँदासम्म यस क्षेत्रको अपेक्षित विकास हुननसक्ने बताए । कार्यक्रममा जिल्ला बास्केट बल संघ कास्कीका अध्यक्ष ध्वजकुमार गुरुङ, जिल्ला खेलकुद विकास समिति कास्कीका कार्यालय प्रमुख प्रकाश बराललगायतले मन्त्री विश्वकर्माको कार्यकालमा उत्साहजनक रुपमा खेल क्षेत्रको विकास हुने विश्वास व्यक्त गरे । रासस

काठमाडौँ । संस्कृति, पर्यटन तथा नागरिक उड्डयनमन्त्री रविन्द्र अधिकारले पर्यटकीय गन्तव्य चन्द्रागिरीलाई पर्यटनको महत्वपूर्ण उत्पादन ‘प्रोडक्ट’ को रुपमा विकास गरिने बताउनुभएको छ । चन्द्रागिरी हिल्सको बुधबार स्थलगत अवलोकनका क्रममा मन्त्री अधिकारीले सरकारको पर्यटक बढाउने लक्ष्यलाई सार्थक तुल्याउन पनि यस्ता पर्यटकीय गन्तब्यको प्रवद्र्धनलाई प्राथमिकता दिने बताउनुभयो । मन्त्री अधिकारी पर्यटन क्षेत्रमा राम्रो प्रोडक्ट बनेको र करिब ३० प्रतिशत विभिन्न तवरबाट राज्यले कर प्राप्त गरिरहेको भन्दै यसलाई थप व्यवस्थित र प्रभावकारी ढंगले सञ्चालन गरिनुपर्नेमा जोड दिनुभयो । ‘राज्यले पर्यटकीय पूर्वाधार विकास गरिदिने हो पर्यटकीय उत्पादन विस्तार र विविधिकरण गर्ने निजी क्षेत्र नै हो । पर्यटन उद्योगको विकासमा निजी क्षेत्रले अग्रसरता नदेखाए यसबाट राज्यले लाभ निल सक्दैन तयसैले पूर्वाधार निर्माण गरी पर्यटनमैत्री वातावरण सिर्जना गर्न सरकारको पूर्ण साथ रहने छ’,– उहाँले भन्नुभयो । ‘सरकार र निजी क्षेत्रले बनाएका जति पनि पर्यटकीय पूर्वाधार तथा चन्द्रागिरी केवलकार जस्ता नयाँ पर्यटकीय उत्पादन छन् यसको सम्पूर्ण सुरक्षाको जिम्मेवारी सरकारको हो तपाँइहरुलाई विश्वास दिलाउन चाहन्छु हामी अभिभावकीय भूमिका निर्वाह गछौँ ढुक्कसँग लगानी गर्नुस’,– उहाँले भन्नुभयो । पर्यटनमन्त्री अधिकारीले चन्द्रागिरिजस्ता पर्यटकीय प्रोडक्ट सातवटै प्रदेशका संभावना बोकेका क्षेत्रमा विस्तार गर्न आग्रह गर्नुभयो । उहाँले निजी क्षेत्रले आर्थिक लगानीको गतिविधि बढाउने वातावरण नभएसम्म सरकार र थोरै व्यक्तिले कुरा गरेरमात्र विकास नहुने तर्क गर्नुभयो । उहाँले भन्नुभयो– ‘अहिले हामीले जे भनेका छौ ल्यसाई आधिकारिक समयसिमा तोकेर पर्यटन मन्त्रालयले यो विमानस्थल यति दिनभित्र बनिसक्छ भनेर समयसिमा स्पष्ट गर्छौ, त्यसका प्रगति पनि देखाउछौँ ती पूर्वाधारसँगै पर्यटक कति बढ्ने छन् भनेर बाहिर ल्याउनेछौ ।’ पर्यटन व्यवसायीले राम्रो अभिभावक पाएको उल्लेख गर्दै मन्त्री अधिकारीले यो क्षेत्रको विकासका लागि निजी क्षेत्रको सहभागितालाई वृद्धि गरी प्रष्ट रोजगारी सिर्जना गरिनुपर्नेमा जोड दिनुभयो । पत्रकारको जवाफको उत्तर दिँदै मन्त्री अधिकारीले चन्द्रागिरि हिल्स सुरक्षित गन्तव्य भएको हुँदा अमेरिकी राजदुतावासले आफ्ना नागरिकहरूलाई असुरक्षित छ भने कुराको खण्ड गर्दै दुतावासमा छलफल गरिने वताउनु भयो । चन्द्रागिरी हिल्सका लिमिटेडका अध्यक्ष चन्द्र ढकालले पर्यटकको गन्तव्य बनेको चन्द्रागिरी राज्यको उच्च प्राथमिकतामा पर्नु सकारात्मक हो भन्दै यस्ता पर्यटकीय प्रोडक्टलाई प्रदेशस्तरमा पनि विस्तार गरिने बताउनुभयो । ग्लोबल आईएमईका म्यानेजर राजु पौडेलले देशको आर्थिक र दिगो विकासमा निजि क्षेत्रलाई लगानीमैत्री वातावरण तयार गर्न सके देशको पर्यटनको विकास हुने बताउनुभयो । चन्द्रागिरि हिल्संका प्रवन्ध निर्देशक अम्बिका प्रसाद पौडेलले सरकारले निजी क्षेत्रको दिगो विकासलाई सूक्ष्म तवरले अध्ययन गर्दै देशको पर्यटन पुर्वाधार विकासमा निजि क्षेत्रले अतुलनीय योगदान पुर्याउनेमा जोड दिनुभयो । उहांले सकारात्मक सोच र दिगो विकासमा चन्द्रागिरि हिल्संको राज्यलाई पुर्‍याको योगदानको राज्य वाट कदर भएको बताउदै उहांले अब देशको कुनाकुनामा यस्ता महत्त्वपूर्ण प्रोजेक्ट सञ्चालन गरिने जानकारी दिनुभयो ।

झापा । झापाको कनकाई नगरपालिकास्थित सुरुङ्गामा प्लाष्टिकबाट पेट्रोलियम पदार्थ उत्पादन गरिएको छ । नेपाल विज्ञान तथा प्रविधि प्रज्ञा–प्रतिष्ठान (नाष्ट)ले मङ्गलबार यहाँ प्लाष्टिकबाट पेट्रोलियम पदार्थ निकालेको छ । पाइरोलाइसिस नामक यन्त्रबाट प्लाष्टिकलाई पेट्रोलियम पदार्थमा रुपान्तरण गरिएको थियो । नाष्टका इन्जिनियर डा रवीन्द्रप्रसाद ढकालले एक किलोग्राम प्लाष्टिकबाट ६०० देखि ७०० मिलिलिटर पेट्रोलियम पदार्थ निकाल्न सकिने बताउनुभयो । “यसलाई वर्गीकरण गरेर ६० प्रतिशत डिजल तथा २०-२० पेट्रोल र मट्टीतेल छुट्याउन सकिन्छ”, डा ढकालले भन्नुभयो, “नत्र सबै डिजल मात्र पनि बनाउन सकिन्छ ।” उहाँले कार्यपत्र प्रस्तुत गर्दै प्लाष्टिकलाई नवीकरण गर्न सकिने र नसकिने वर्गीकरण गरेर पेट्रोलियम पदार्थ निकाल्न सकिने बताउनुभयो । नवीकरण हुने प्लाष्टिकलाई पुनःनवीकरण गर्ने र नवीकरण नहुने प्लाष्टिकलाई पेट्रोलियम पदार्थ उत्पादन गर्न सुझाव दिनुभयो । यसअघि नाष्टले ३५ नगरपालिकामा सो प्रविधि प्रयोग गरेर देखाइसकेको छ । ढकालले अहिले विश्वका ६५ मुलुकमा सो प्रविधि लागू भइसकेको जानकारी दिनुभयो । स्थानीय तहमा सो प्रविधि लागू गर्न रु ४० देखि ५० लाख पर्ने यन्त्र आवश्यक पर्ने बताइएको छ । झापामा फालिएको प्लाष्टिकजन्य फोहरबाट दैनिक २१ हजार लिटरभन्दा बढी उत्पादन गर्न सकिने नाष्टले जनाएको छ । नाष्टका उपकुलपति प्रा डा जीवराज पोखरेलले जापानी संस्थासँग हातेमालो गरेर नेपालमा सो प्रविधि भित्र्याइएको र यसबाट मुलुक समृद्ध बनाउन योगदान पुग्ने बताउनुभयो । कन्काई नगरपालिकाका प्रमुख राजेन्द्रकुमार पोखरेलले प्लाष्टिकजन्य फोहरलाई नगरपालिकाले अवसरका रुपमा लिने बताउनुभयो । कार्यक्रममा सांसद एलपी साँवा लिम्बू र प्रदेश नं १ का सामाजिक विकासमन्त्री जीवन घिमिरेले सो प्रविधि स्थानीय तहमा प्रयोग गर्न सके फोहर व्यवस्थापनमा ठूलो टेवा पुग्नाका साथै पेट्रोलियम पदार्थको आपूर्ति सहज हुने बताउनुभयो । रासस

काठमाडौं । श्रम तथा रोजगार मन्त्री गोकर्ण विष्टले स्वदेशमा नै रोजगारीको अवसर सिर्जना आफ्नो प्राथमिकतामा भएको बताउनुभएको छ । उहाँले यसका लागि सरकार, रोजगारदाता र ट्रेड युनियन मिलेर अगाडी बढ्नुपर्ने बताउनुभयो । उहाँले श्रम क्षेत्रमा गर्नुपर्ने सुधार र तत्काल गर्नुपर्ने कामका बारेमा आफूले सबैको सल्लाह लिएर उचित निर्णय गर्ने जानकारी गराउनुभयो । मन्त्री विष्टलाई बधाई तथा सफल कार्यकालको शुभकामना दिन तथा श्रम क्षेत्रमा गर्नुपर्ने कामका बारेमा सुझाव दिन गएको नेपाल ट्रेड युनियन महासंघ (जिफन्ट)का पदाधिकारी तथा प्रतिनिधिहरुको टोलीसँग उहाँले यस्तो बताउनुभयो । भेटघाटमा जिफन्टका तर्फबाट श्रम ऐन वमोजिम तत्काल गर्नु पर्ने कामहरु, सामाजिक सुरक्षा अन्तरगत तत्काल गर्नुपर्ने काम, अन्य कानूनी व्यवस्थामा गर्नुपर्ने सुधारहरु, संस्थागत विकास सम्बन्धमा थप सुझावहरु र रोजगारी सिर्जनाका सम्बन्धमा सुझावहरु दिइएको थियो । जिफन्टका सचिव रमेश बडालले श्रम ऐनबमोजिम केन्द्रिय श्रम सल्लाहकार समिति गठन गर्न तथा हाल कानून मन्त्रालयमा पुगेको श्रम नियमावली छिटो पारित गर्न आग्रह गर्नुभयो । यसैगरी स्थायी न्यूनतम पारिश्रमिक निर्धारण समिति गठन गर्न र वैशाख १ गतेदेखि काम सुरु गरी असार मसान्तभित्र घोषणा गर्न सुझाव दिनुभयो । नयाँ दर साउन १ बाट लागु हुने व्यवस्था मिलाउन पनि बडालले आग्रह गर्नुभयो । श्रम मध्यस्थता ट्राईव्युनल गठन गर्न, कार्यस्थलमा व्यवसायजन्य सुरक्षा र स्वास्थ्य नीति बनाउन पनि जिफन्टले श्रम तथा रोजगारमन्त्री विष्टलाई सुझाव दिएको छ । योगदान आधारित सामाजिक सुरक्षा ऐन आएपनि नियमावली तयार नभएको भन्दै जिफन्टले नियमावली तुरुन्त तयार गरी यस अन्तर्गतको सुरक्षा योजना अर्थात स्कीमहरु तयार गर्नुपर्ने मन्त्री विष्टलाई अवगत गराएको छ । सामाजिक सुरक्षा कोषलाई निजामती कर्मचारीबाट नभई विज्ञमार्फत नेतृत्व गर्न कार्यकारी निर्देशक, निर्देशकहरु र केही कर्मचारी तुरुन्त नियुक्ती गर्न आवश्यक रहेको भन्दै प्रत्येक प्रदेशमा सामाजिक सुरक्षा कार्यलय स्थापना र सञ्चालन तत्काल गर्न आवश्यक रहेको पनि सचिव बडालले जानकारी गराउनुभयो । श्रमिक दर्ता गरी राष्ट्रिय परिचयपत्रसँग जोडेर वा तत्काल आफ्नो सामाजिक सुरक्षामा रोजगारदाता र श्रमिक दर्ता हुने प्रणाली ऐन वमोजिम सुरु गर्नु आवश्यक रहेको उहाँको भनाई थियो ।