काठमाडौं, फागुन २० । आइसीसी एकदिवसीय विश्वकप छनोटको पहिलो खेलमा नेपाल र घरेलु टोली जिम्बावेबीच खेल जारी छ । पहिला टस जितेर व्याटिङ रोजेको जिम्बावेले १२ ओभरमा एक विकेटको क्षतिमा एक सय रन बनाएको छ । सुरुवातमै जिम्बावेका ब्याट्सम्यान नेपाली बलरमाथि हावी भएका छन् । ओपनर बलरका रुपमा सोमपाल कामीले बलिङ गरे । उनले पहिलो ओभरमा ५ बल डट फाले पनि एक बलमा भने जुवाओले छक्का प्रहार गरे । त्यस्तै दोस्रो ओभर कप्तान पारस खड्का आफै बलिङ गर्न आए तर यो ओभर नेपालका लागि निकै महंगो सावित भयो । पारसले एकै ओभरमा १६ रन दिए । त्यस्तै तेस्रो ओभर सोमपालले १८ रन खर्चिए । चार ओभरको समाप्तिमा जिम्बावेले ५१ रन बनाएको छ । समूह बीमा रहेको नेपालले अन्य खेलहरु फागुन २४ गते स्कटल्याण्डसँग, २६ गते अफगानिस्तानसँग र २८ गते हङकङसँग प्रतिस्पर्धा गर्नेछ ।

धनगढी । हाकाहाकी घूस लिने कैलाली मालपोत र नापी कार्यालयका केही कर्मचारीबीच रकम बाँडफाँडको विषयलाई लिएर कार्यालयभित्रै कुटाकुट भएको छ । कुटाकुट हुँदा एकजना सख्त घाइते भएका छन् । प्रहरीले कुटपिटमा संलग्न ६ जनालाई नियन्त्रणमा लिएर छाडेको छ । बिहीबार कार्यालय समयमै कर्मचारीबीच घूस रकम बाँडफाँटका विषयमा कुटपिट भएपछि प्रहरीले ६ कर्मचारीलाई पक्राउ गरेको थियो । ‘मालपोत कार्यालयकै एक कर्मचारीले खबर गरेपछि प्रहरीले पक्राउ गरेको हो,’ कैलालीका प्रहरी उपरीक्षक विनोद घिमिरेले भने, ‘पक्राउ परेका सबै कर्मचारीले मदिरा सेवन गरेका थिए ।’ प्रहरीका अनुसार पक्राउ परेका कर्मचारीमध्ये पूर्णानन्द भट्टको दायाँ हात भाँचिएको छ । सँगै जोडिएका मालपोत र नापी कार्यालयमा कुटाकुट हुन थालेको जानकारी पाएपछि वडा प्रहरी कार्यालयबाट गएको टोलीले कार्यालयभित्रै बियर र रक्सीका बोतलसहित ६ जनालाई नियन्त्रणमा लिएको थियो । प्रहरीका अनुसार पक्राउ पर्नेमा नवीन जोशी, पूर्णानन्द भट्ट, महादेव जोशी, वीरेन्द्र सिंह, सागर कुँवर र ज्ञानेन्द्र ओझा छन् । यीमध्ये नापी र मालपोतका कर्मचारी को(को हुन् भन्ने पूर्ण खुलेको छैन । ‘कुन कर्मचारी कुन कार्यालयको भन्ने जानकारी हुन सकेन,’ वडा प्रहरी कार्यालय प्रमुख रामबहादुर चन्दले भने, ‘कार्यालय कम्पाउन्ड भित्रैबाट मदिरा अत्यधिक सेवन गरेको अवस्थामा प्रहरीले पक्राउ गरेको हो ।’ पक्राउ परेकामध्ये कुटपिटबाट हात भाँचिएका भट्टलाई उपचारका लागि नेपालगन्ज रिफर गरिएको पनि चन्दले जनाए । पक्राउ परेका कर्मचारीसँग घूस रकम लिएको लाखौं रुपैयाँ रहेको मालपोत कार्यालयका एक कर्मचारीको दाबी छ । ती कर्मचारीले भने, ‘एक सातासम्म उठेको रकमका विषयमा कुरा नमिलेका कारण कुटाकुट भएको हो ।’ उनका अनुसार नापीका २ र मालपोतका ४ कर्मचारी हुन् । होलीका दिन मालपोतको एउटा कोठामा बियर र मदिरा सेवन गर्दै हिसाबकिताब गर्न थालेपछिनापीका कर्मचारीले उठाएको घूस रकमदिन नमानेपछि कुटाकुट भएको कर्मचारी स्रोतको भनाइ छ । ‘मदिरा सेवन गरेका कर्मचारी पक्राउ परेको जानकारी पाएको हुँ,’ प्रजिअ गोविन्द रिजालले भने, ‘कारबाहीका लागि प्रहरीमा पठाइएको हो, त्यसपछिको जानकारी हुन सकेको छैन ।’ पक्राउ परेका कर्मचारीका विषयमा प्रहरीले धेरै कुरा लुकाएको मालपोत कार्यालयका एक कर्मचारीको आरोप छ । ती कर्मचारी भन्छन्, ‘पक्राउ परेका कर्मचारीसँग रहेको घूस रकम हिसाबकिताब गरेको डायरीसमेत प्रहरीले लुकाएको छ ।’ कान्तिपुरबाट साभार

काठमाडौं । नेकपा माओवादी केन्द्रका नेता तथा लेखक दिनानाथ शर्माद्वारा लिखित तथा साझा प्रकाशनद्वारा प्रकाशित निबन्ध सङ्ग्रहको लोकार्पण समारोहमा नेकपा माओवादी केन्द्रका अध्यक्ष प्रचण्ड । आदिकवि भानुभक्त आचार्यको प्रतिमामा माल्यार्पण गर्दै प्रचण्ड । साझा प्रकाशनको नवनिर्मित भवन र छापाखाना अवलोकन गर्दै प्रचण्ड ।  

निकै लामो विवादपछि अन्ततः नेपाली चलचित्र गाजाबाजा प्रदर्शनमा आउने भएको छ । चलचित्र विकास बोर्डले गाँजाबाजा नाम राखेर चलचित्र बनाउन नपाउने भनेपछि निर्देशक गणेशदेव पाण्डे अदालतसम्म पुग्यो । एक वर्षसम्म अदालतमा रहेको उक्त मुद्दामा अन्ततः निर्देशक पाण्डेले जितेको हो। चलचित्र ‘गाजाबाजा’लाई सर्वोच्च अदातलले यो नाम राखेर निर्माण गर्न पाउने अधिकार दिएपछि अब दर्शकमाझ आउने भएको हो । हाल चलचित्रका समूह गाँजाबाजाको प्रचारका निम्ति देश दौडाहा छ। यसैक्रममा शनिबार पोखरा आइपुगेका निर्देशक गणेशदेव पाण्डेलगायतका चलचित्र समूहले फिल्मबारे पत्रकार सम्मेलन गरी विभिन्न जानकारी दिएका छन्। ट्रेलर हेर्दा फिल्ममा बढी मात्रामा अश्लिल शब्दहरुको प्रयोग भएको पाइएको छ । यद्यपि फिल्म लागूऔषधविरुद्धको रहेको निर्देशक पाण्डेले जानकारी दिएको छ। हेर्नुहोस् भिडियो–

काठमाडौं, फागुन १९ । स्पानिस क्लब रियल म्याड्रिडका मिडफिल्डर लुका मोड्रिचमाथि अदालतलाई गलत बयान दिएकोमा दोषी पाइएको छ । क्रोएसियाली फुटबल क्लब डायनामो जाग्रेबका पूर्व निर्देशक ड्राभ्को मामिचविरुद्ध चलेको कर छलीको मुद्दामा मोड्रिचले गलत बयान दिएको ठहर । सन् २०१७ को जुनमा सन् २००८ मा डायनामोबाट टोटनहममा भएको उनको स्थानान्तरणको विषयमा सोधपुछ गर्दा मोड्रिचले झुठो बयान दिएको बताइएको छ । मामिचसँगै अन्य तीन जनामाथि भ्रष्टाचारको मुद्दा दायर भएको थियो । उनीहरुले खेलाडीहरुको बिक्रीबाट पैसा खाएर डायनामो र राष्ट्रलाई हानी नोक्सानी पुर्याएको आरोप लगाइएको थियो । यदी उनी दोषी प्रमाणित भए उनले पाँच वर्ष जेल सजाय भोग्नुपर्नेछ ।

काठमाडौं, फागुन १९ । केही दिनअघि बसेको मन्त्रिपरिषद्को बैठकले नेपाल सरकारको कार्यसम्पादन नियमावली परिमार्जन गर्दै गुप्चरसँग सम्बन्धित राष्ट्रिय अनुसन्धान विभागसहित राजस्व अनुसन्धान विभाग र सम्पत्ति शुद्धीकरण विभागलाई प्रधानमन्त्री कार्यालय मातहत ल्याउने निर्णय गरेको छ । यस्ता निकायको काम प्रभावकारी बन्न नसकेको भनेर प्रधानमन्त्री केपी ओलीले यस्ता निकाय आफू मातहत ल्याउँदै गर्दा अहिलेसम्म प्रधानमन्त्री मातहत रहेका महत्त्पूर्ण सरकारी निकायको प्रगति स्थिति भने चिन्ताजनक रहेको भेटिएको छ । प्रधानमन्त्री कार्यालयका अनुसार अहिले चार दर्जनभन्दा बढी यस्ता सरकारी निकाय प्रधानमन्त्रीको प्रत्यक्ष रेखदेखमा सञ्चालन हुने गरी स्थापना भएका छन् । आजको राजधानी दैनिकमा खबर छ । कतिपय निकाय त यस्ता पनि भेटिएका छन्, जुन स्थापनाको आठ वर्षम्म प्रधानमन्त्रीले एक घण्टा पनि समय नदिँदा थप कार्यक्रम सञ्चालन गर्न नै समस्या सिर्जना भएरहेका छ । कर्णाली क्षेत्रको विकासका लागि भनेर खुलेको कर्णाली विकास परिषदको बैठक अहिलेसम्म बस्न नसक्दा आयोगका कर्मचारीले प्राथमिक स्रोतबाट संकलित तथ्य तथ्यांक सम्मिलित प्रतिवेदन बुझाउन नपाएको झन्डै दुई वर्ष हुने लाग्यो । दुई वर्षसम्म कुनै प्रधानमन्त्रीले परिषद्लाई एक घण्टा समय दि सकेका छैनन् ।

काठमाडौं, फागुन १९ । भन्सारका कर्माचारी र आयातित व्यापारमा संलग्न उद्योगी-व्यापारीबिचको मिलोमतोमा राज्यले दैनिक करोडौं राजस्व गुमाउँदै आएको खुलेको छ। नागरिक दैनिकका लागि बालकृष्ण ज्ञवालीले लेखेका छन्, ‘ चारदिन अघि अर्थमन्त्री बनेका युवराज खतिवडाले विभिन्न स्थानामा रहेका भन्सार कार्यालयका प्रमुखहरूलाई काठमाडौं बोलाएर कडा निर्देशन दिएकै दिन (शुक्रबार) मुलुकभरका भन्सार नाकाबाट करिब ३५ करोड रूपैयाँ राजश्व बढी उठेकाले मिलेमतोमा करोडौं राजश्व गुमिरहेको खुलेको हो।’ मेलापर्वबाहेक अन्य सामान्य दिनमा मुलुकभरका भन्सार कार्यालायबाट औषतमा ८५ करोड राजश्व उठाउने गरेका थिए। नयाँ अर्थमन्त्रीले कडा निर्देशन दिएकै दिन भने एक अर्व २० करोड रूपयाँ भन्दा बढि राजश्व उठ्यो। अन्य दिनको तुलनामा असुली कम्ती पनि ३५ करोड बढि हो। यो तथ्याङ्कले भन्सार कर्मचारी र व्यापारीको मिलोमतोमा राज्यको दैनिक ३०-३५ करोड रूपैयाँ राजश्वको हिनामिना हुने गरेको आशंका गरिएको छ।

काठमाडौं, फागुन १९ । प्रधानमन्त्री केपी ओलीले आफ्नो पहिलो उच्चस्तरीय पाहुनाका रूपमा सोमबार पाकिस्तानका प्रधानमन्त्री शहिद खकान अब्बासीलाई स्वागत गर्दै छन् । प्रतिनिधिसभाको पहिलो बैठक बस्ने दिन अब्बासी काठमाडौं उत्रिँदैछन् । उनी प्रधानमन्त्री ओलीलाई बधाई दिन र दक्षिण एसियाली सहयोग संगठन (सार्क) को शिखर सम्मेलन आयोजनाबारे अध्यक्ष मुलुकसँग छलफल गर्न आउन लागेको बताइएको छ । अाजको कान्तिपुरमा खबर छ-प्रधानमन्त्री ओलीका प्रमुख राजनीतिक सल्लाहकार विष्णु रिमालले प्रधानमन्त्री ओलीलाई बधाई दिनै पाकिस्तानी समकक्षी अब्बासी काठमाडौं आउन लागेको बताए । भेटमा दुई मुलुकका कार्यकारी प्रमुखबीच दुईपक्षीय सम्बन्धबारे समग्र विषयमा छलफल हुने पनि उनले जनाए । २०७१ मंसिरमा काठमाडौंमा आयोजना भएको १८ औं शिखर सम्मेलनपछि सार्कको बैठक हुन सकेको छैन । त्यही बैठकबाट प्रत्येक दुई वर्षमा शिखर बैठक आयोजना गर्ने तय गरिएको थियो । तर, त्यसपछि पाकिस्तानमा हुने तय भए पनि बैठक रोकिएको थियो । भारत प्रशासित उरीमा भएको हमलामा पाकिस्तानको संलग्नता रहेको भन्दै भारतले २०७३ मंसिरमा पाकिस्तानमा डाकिएको सार्क बैठकमा सहभागी हुन अस्वीकार गरेको थियो । त्यसलगत्तै अफगानिस्तान, भुटान र बंगलादेशले पनि बैठकमा भाग नलिने जनाएपछि बैठक स्थगन गरियो । अब्बासीको भ्रमणलाई एकथरी भने बधाई र सार्कभन्दा चीन सम्बन्धसँग जोडेर हेर्दैछन् । चीन पाकिस्तानको निकै विश्वासिलो छिमेकीका साथै व्यावसायिक साझेदार मानिन्छ । भारतसँग सम्बन्ध खराब रहे पनि सार्कको पर्यवेक्षक मुलुक चीनसँग पाकिस्तानको निकै राम्रो सम्बन्ध छ । नेपालमा हालै बनेको वाम गठबन्धन सरकारलाई चीन निकट भन्ने गरिएको छ । भारतीय प्रधानमन्त्री नरेन्द्र मोदीले टेलिफोन गरेर ओलीलाई भारत भ्रमणको निम्ता गरेका थिए । त्यही संवादमा ओलीले मोदीलाई जनकपुर र मुक्तिनाथको समेत भ्रमण गर्ने गरी आउन निम्तो दिएका थिए । त्यसपछि भारतीय विदेशमन्त्री सुष्मा स्वराजले काठमाडौं भ्रमण गरेकी थिइन् । ओली–मोदी भ्रमण आदानप्रदानको चर्चा चलिरहेकै बेला उनीभन्दा अघि अब्बासी आउन लागेका हुन् । नेपाल सार्कको अध्यक्ष राष्ट्र भए पनि यहाँको कर्मचारीतन्त्रले सार्कलाई उपेक्षा गरेको भन्दै राजनीतिक तवरबाटै संवाद थाल्न अब्बासी आउन लागेको एकथरी विज्ञहरूको विश्लेषण छ । अब्बासीको भ्रमणलाई आकस्मिक भनिए पनि त्यसको तयारी केहीअघिदेखि नै भएको एक परराष्ट्र अधिकारीले बताए । पाकिस्तानले यस्तो भ्रमण चाहिरहेको भए पनि नेपालले त्यसको चाँजो मिलाएको थिएन । पाकिस्तानस्थित नेपाली राजदूत सेवा लम्साल अधिकारीले यो भ्रमणबारे जानकारी दिन चाहिनन् । परराष्ट्र सचिव र दोस्रो वरीयताका सहसचिव जेनेभा भ्रमणमा छन् । परराष्ट्रमा तेस्रो वरीयतामा रहेका कृष्णप्रसाद ढकालले पनि भ्रमणबारे औपचारिक जानकारी दिन सकेनन् । ‘भ्रमण हुने सुनेको छु । शिष्टाचार महापालले काम गरिरहनुभएको होला,’ उनले भने । महापालले पनि भ्रमणको तयारी रहेको तर सबै जानकारी आफूलाई नभएको बताए । भ्रमणका क्रममा अब्बासीले सार्कका अलावा नेपाल–पाकिस्तान सिधा हवाई उडान, दुईपक्षीय व्यापार, जनस्तरको सम्बन्ध तथा गत चैत २५ मा नेपालबाट हराएका आफ्ना अवकाशप्राप्त कर्णेल मोहम्मद हबिब जाहिरको खोजीबारे कुराकानी गर्ने परराष्ट्र अधिकारीले जनाए । जाहिरलाई भारतीय खुफिया एजेन्सीले अपहरण गरेको हुन सक्ने पाकिस्तानको रक्षा मन्त्रालयले टिवटबाटै आशंका व्यक्त गरेको थियो । ‘गार्ड अफ अनर’ विमानस्थलमा नहुने अब्बासीको भ्रमण औपचारिक हुने हुनाले उनलाई ‘गार्ड अफ अनर’ र रात्रिभोज दिने तयारी छ । त्रिभुवन विमानस्थलमै ‘गार्ड अफ अनर’ दिने पुरानो प्रचलन भने परिवर्तन गरेर नयाँ थालनी गर्न प्रधानमन्त्री ओलीले सबै निकायलाई निर्देशन दिएका छन् । ‘गार्ड अफ अनर’ दिने स्थान नै त्रिभुवन विमानस्थलको अति विशिष्ट क्षेत्रमा राखिएकाले पाहुनाको स्वागत गर्न ठूला नेता गएजस्तो देखिने भएकाले यसलाई परिवर्तन गर्न लागिएको प्रधानमन्त्रीका प्रमुख राजनीतिक सल्लाहकार विष्णु रिमालले बताए । ‘हामीले प्रोटोकललाई ध्यान दिनेछौं,’ रिमालले भने ।

काठमाडौं, फागुन १८ । सामान्य प्रशासन मन्त्रालयले स्वेच्छिक अवकाशका लागि निवेदन दिएका कर्मचारीको विवरण संकलन गर्न थालेको छ । जिल्ला कार्यालय र आफू मातहतका निकायमा स्वेच्छिक अवकाशका लागि निवेदन दिएका कर्मचारीको विवरण संकलन गर्न थालिएको मन्त्रालयको स्वेच्छिक अवकाश एकाइका प्रमुख धर्मराज रोकायले जानकारी दिनुभयो । सरकारले निजामतीसहित संसद् र स्वास्थ्य सेवाका कर्मचारीलाई स्वेच्छिक अवकाशको योजना ल्याएको हो । संघ, प्रदेश र स्थानीय तहमा समायोजन हुन नचाहने कर्मचारीलाई स्वेच्छिक अवकाश रोज्नका लागि गत पुस २९ देखि फागुन १३ गतेसम्म निवेदन दिएका थिए । “हामीले स्वेच्छिक अवकाशमा जाने कर्मचारीले निवेदनलाई संकलन गरिरहेका छौँ”, उपसचिव रोकायाले भन्नुभयो, “अहिले मन्त्रालय, निकाय र जिल्ला तहका कार्यालयबाट विवरण संकलन गरिरहेका छौँ ।” उहाँका अनुसार आइतबारसम्म जिल्ला प्रशासन कार्यालयमा सम्बन्धित कार्यालयका अवकाशका निवेदनलाई पठाउन निर्देशन दिइएको छ । यस्तै जिल्ला प्रशासन कार्यालयमा जम्मा भएका निवेदनलाई यही फागुन २६ गतेसम्म स्वेच्छिक अवकाश एकाइ शाखामा पठाउन भनिएको छ । उहाँले दर्खास्त दिइएका निवेदनलाई आवश्यक छानविन गरी समायोजन गरिने बताउनुभयो । मन्त्रालयले ५० वर्ष उमेर पुगेका र बीसवर्षीय सेवावधि पूरा गरी निवृत्तिभरण पाउने अवस्थामा रहेका कर्मचारीले अवकाश लिन पाउने व्यवस्था गरेको थियो । तीन सचिवसहित करीव पाँच हजार जनाले स्वेच्छिक अवकाशका लागि निवेदन दिएका छन् । भूमिसुधार तथा व्यवस्था मन्त्रालयका सचिव शम्भु कोइराला तथा व्यवस्थापिका–संसद् सचिवालयका सचिवद्वय हिमनाथ सुवेदी र वीरेन्द्र कार्कीले स्वेच्छिक अवकाशका लागि निवेदन दिनुभएको छ । स्वेच्छिक अवकाशमा जाने कर्मचारीले एकमुष्ट सात वर्षको निवृत्तिभरण भत्ता पाउने व्यवस्था गरिएको छ । मुलुकभरी करीव ८३ हजार निजामती कर्मचारी छन् ।

काठमाडौं, फागुन १८ । राष्ट्रिय पुनःनिर्माण प्राधिकरणले छुट तथा पुनःजाँच सर्वेक्षणबाट प्राप्त एक लाख बढी गुनासोलाई यही फागुन मसान्तभित्र अन्तिम प्रमाणीकरणका लागि स्थानीय तहमा पठाउने तयारी गरेको छ । प्राधिकरणका कार्यकारी समिति सदस्य डा हरिराम पराजुलीको संयोजकत्वमा आज बसेको केन्द्रीय गुनासो व्यवस्थापन समितिको बैठकले छुट तथा पुनःजाँच सर्वेक्षण गरिएका विवरणको विश्लेषण गरी सम्भावित पुनःनिर्माण, प्रबलीकरण र लाभग्राहीमा नपर्ने गुनासोकर्ताको सूची तयार पारी स्थानीय तहमा प्रमाणीकरणका लागि पठाउने निर्णय गरेको हो । विगतमा विभिन्न कारणले छुटी लाभग्राही सूचीमा पर्न नसकेका भूकम्पपीडितलाई प्राधिकरणले केन्द्रबाटै इञ्जिनीयर परिचालन गरी प्रभावित जिल्लामा छुट तथा पुनःजाँच सर्वेक्षण गरेको थियो । सर्वेक्षण गरिएको नामावलीलाई स्थानीय तहले अन्तिम प्रमाणीकरण गरी सिफारिश गरेमा प्राधिकरणले लाभग्राही सूचीमा समावेश गर्ने सहसचिव नेत्र सुवेदीले जानकारी दिनुभयो । छुट तथा पुनःजाँच सर्वेक्षणका क्रममा भूकम्प अतिप्रभावित १४ जिल्लाबाट एक लाख ३० हजार बढीको गुनासो दर्ता भएको थियो । पीडितको घर पुनःनिर्माणमा पहल प्राधिकरणले चार वर्गका जोखिमयुक्त भूकम्पपीडितको घर पुनःनिर्माणको पहल अघि बढाएको छ । प्राधिकरणले ७० वर्षमाथिका वृद्धवृद्धा, ६५ वर्ष नाघेका अशक्त एकल महिला, दृष्टिविहीनलगायत रातो तथा नीलो कार्डधारी अपांगता भएका व्यक्ति तथा १६ वर्षमुनिका नावालिगको घरबासको व्यवस्था गर्न कार्यविधि तयार गरी लगत संकलन अघि बढाएको छ । प्राधिकरणको सूचना शाखाले भूकम्प अतिप्रभावित १४ जिल्लामा करीव १६ हजार २०५ जोखिमयुक्त वर्गका लाभग्राहीको प्रारम्भिक तथ्यांक निकालेको छ । प्राधिकरणले स्थानीय सरकारमार्फत पनि यी वर्गका लाभग्राहीको लगत माग गरेको छ । लाभग्राहीको संख्या निश्चित भएपछि प्राधिकरणले परोपकारी संस्थालाई घर पुनःनिर्माणका लागि आह्वान गर्ने छ । सो विषयमा प्राधिकरणका प्रमुख कार्यकारी अधिकृत युवराज भुसाललगायत अधिकारीले बेलायती विकास नियोग (डिफिड) का प्रतिनिधिसँग छलफल गर्नुभएको छ । प्राधिकरणमा आएको डिफिड नेपालका पुनःनिर्माण सल्लाहकार म्याग्नस मुरे तथा भूकम्पपछिको पुनःनिर्माण समूहका प्रमुख लियोनार्ड टेडसहितको टोलीले अशक्त वर्गका भूकम्पपीडितको घर निर्माण गर्ने ढाँचाबारे आफ्नो धारणा राखेको थियो । प्राधिकरणले यी वर्गका पीडितको घर निर्माण गर्न आफ्नो कार्यविधि र अन्तिम सूचीअनुसार राष्ट्रिय तथा अन्तर्राष्ट्रिय संस्थासँग छलफल गर्ने तयारी गरेको छ ।

काठमाडौं, फागुन १८ । रक्तदाता र रगत आवश्यक पर्ने बिरामीका आफन्तलाई सहज पहुँचको स्थान यहाँस्थित प्रदर्शनी मार्गमा नै केन्द्रीय रक्तसञ्चार केन्द्रको अत्याधुनिक भवन निर्माण हुने भएको छ । विसं २०२३ देखि सुरक्षित र स्वच्छ रक्तसञ्चार सेवा तथा रगतको अनुसन्धानसमेत गर्दै आएको सो केन्द्रको भवन विसं २०७२ वैशाख १२ को भूकम्पले पूर्णरुपमा क्षति पु¥याएको थियो । नेपाल रेडक्रस सोसाइटीद्वारा सञ्चालित सो केन्द्र हाल अस्थायी रुपमा ललितपुरको ग्वार्कोबाट सञ्चालित हुँदै आएको छ । विश्व स्वास्थ्य संगठनको भवन मापदण्ड एवं केन्द्रका लागि आवश्यक उपकरणका लागि नेपाल रेडक्रसलाई थाइल्याण्ड (थाई) रेडक्रसले करीव रु ४५ करोड आर्थिक सहयोग प्रदान गरेको छ । सोसाइटीका अध्यक्ष सञ्जीव थापा, काठमाडौँ महानगरपालिकाका प्रमुख विद्यासुन्दर शाक्य र नेपालका लागि थाई राजदूत भागवत तान्स्कुलले संयुक्त रुपमा भवनको आज शिलान्यास गर्नुभयो । सोसाइटीका प्रबन्ध निर्देशक एवं भूकम्प प्रतिकार्य कार्यक्रमका संयोजक उमेश ढकालका अनुसार पाँचतले अत्याधुनिक सो भवन १८ महिनाभित्र बन्नेछ । भवनमा रक्त सेवालगायत अनुसन्धान कक्षसमेत रहनेछ । भवन निर्माणको जिम्मा लामा कन्ट्रक्सन कम्पनीले पाएको छ । सर्वोच्च मानवीय संस्था नेपाल रेडक्रसका विभिन्न मानवीय कार्यक्रममध्ये रक्तसञ्चार सेवा उच्च प्राथमिकतामा छ । हाल यसले करीव सबै जिल्लामा रक्तसञ्चार सेवा पु¥याएको छ । केन्द्रीय रक्तसञ्चार केन्द्रमा दैनिक ४०० युनिटभन्दा बढीको रगत माग हुने गरेको र सोही अनुपातमा आपूर्तिसमेत हुने गरेको सोसाइटीका सञ्चार विभाग प्रमुख दिव्यराज पौडेलले जानकारी दिनुभयो । गत वर्ष मात्र केन्द्रले करीव तीन लाख ३७ हजार ३२१ युनिट रगतको सेवा दिएको थियो । कार्यक्रममा सांसद जीपछिरिङ शेर्पाले मापदण्डअनुसारको भवन समयभित्र गुणस्तरीय र सुरक्षित रुपमा बन्ने जानकारी दिनुभयो । कामपाका प्रमुख शाक्यले सामाजिक संघसंस्थाको भवन निर्माण गर्दा नक्शा पासमा करको छुटको व्यवस्था गरिएको जानकारी दिनुभयो । सोसाइटीका अध्यक्ष थापा र महामन्त्री देवरत्न धाख्वाले रगतको सुरक्षा र स्वच्छतामा कमी आउन नदिने प्रतिबद्धता व्यक्त गर्नुभयो । थाई राजदूत तान्स्कुलले आगामी दिनमा नेपाल रेडक्रसलाई थप सहयोग गरिने जानकारी दिनुभयो । रक्तसञ्चार केन्द्रका निर्देशक डा रेखा मानन्धर तथा थाई रेडक्रसका निर्देशक डा उबोनवोन चारुवाङग्रीटले रक्तसञ्चार सेवाको महत्वबारेमा बोल्नुभएको थियो । रासस

सुर्खेत, फागुन १८ । नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ले भोलिसम्म सरकारले पूर्णता पाउने बताउनुभएको छ । सुर्खेतको विमानस्थलमा आज पत्रकारसँग संक्षिप्त कुराकानी गर्दै उहाँले भन्नुभयो – “संघीय समाजवादी फोरमसहितको सरकार गठनका लागि छलफल चलिरहेकाले भोलिसम्म सरकारले पूर्णता पाउने छ ।” पूर्वप्रधानमन्त्रीसमेत रहनुभएका अध्यक्ष प्रचण्डले चैतको पहिलो हप्तामा एमाले र माओवादी केन्द्रबीच एकता हुने पनि बताउनुभयो ।

कञ्चनपुर । परम्परागत सोचमा परिवर्तन आउन नसक्दा कञ्चनपुरमा अझै छाउपडी प्रथाले प्रश्रय पाउँदै आएको छ । रजस्वला भएका महिलालाई अलग्गै गोठमा राख्ने चलनले निरन्तता पाउँदै आएको छ । समाजमा महिलालाई हेर्ने सकारात्मक सोचको विकास नहुनु नै परम्परादेखि चल्दै आएको ‘क’ु प्रथालाई महिलाले नै छाड्न सकेका छैनन् । महिनाबारी भएको समयमा घरपरिवारमा छोइहालेमा घरमा अनिष्ट हुने, देवीदेवता रिसाउँछन्, पाप लाग्छ भन्नेजस्ता रुढीबादी र अन्धविश्वासबाट महिला प्रताडनामा पर्ने गरेका छन् । महिनाबारी वा सुत्केरी भएको समयमा घरमा प्रवेश गर्न नहुने अन्धविश्वासका कारण घरभन्दा टाढा रहेको गोठमा बस्ने गर्दछन् । त्यहाँ महिला पूरैभित्र सुत्न नसक्ने, ढोका नभएको छाप्रो हुने शुक्लाफाँटा महिला तथा बालबालिका विषयगत शाखाका प्रमुख राधिका पन्तले बताउनुभयो । छाउपडी भएका बेला घरभित्र नपस्न नदिने, घरभित्रको काम गर्न नदिने, दूध दहीजस्ता पोषणयुक्त खानेकुरा खान नदिनेजस्ता अमानवीय व्यवहार गर्ने गरिन्छ उहाँले भन्नुभयो, “आराम गर्नुपर्ने बेला गह्रुंगो भारी बोक्न लगाउने तथा पोषणयुक्त खानेकुराबाट वञ्चित गरिन्छ ।” यहाँको समाजमा छाउपडी प्रथा ठूलो समस्याका रुपमा रहेकाले यसलाई जरैदेखि उन्मूलन गर्नका लागि सहकार्यको आवश्यकता रहेको उहाँले बताउनुभयो । युवतीहरु एक निश्चित उमेर पुगिसकेपछि महिनाबारी हुनु भनेको प्राकृतिक प्रक्रियाको स्वाभाविक नियम भएपनि महिनाबारी हुनुलाई धर्म र धार्मिक ग्रन्थसँग जोडी पाप तथा अभिशापका रुपमा परिभाषित गर्दा यसले समाजमा प्रश्रय पाउँदै आएको छ । महिलालाई धार्मिक स्थलमा जान र पूजापाठ गर्नबाट समेत यसबेला वञ्चित गरिँदै आएको छ । परम्परागत सामाजिक मूल्य र मान्यता, रुढीबादी सोच, धार्मिक अन्धविश्वास, जनचेतनाको कमी, लैंगिक विभेद्, अशिक्षा, उपयुक्त नीति नियमको अभावका कारण छाउपडी प्रथाले निरन्तरता पाउँदै आएको शुक्लाफाँटा नगरपालिकाका उपप्रमुख तुलसी हमालले बताउनु्भयो । छाउपडी प्रथा हाम्रै घरबाट शुरु भएको छ, उहाँले भन्नुभयो, “पहिले आफैँबाट यसलाई हटाऔं ।” पहिला घरका बुढापाकाले घरनजिकै आउँदा नाइनास्ती गर्थे, चार दिनसम्म त घरको दैलोमै छिर्न पाइँदैनथ्यो उहाँले भन्नुभयो, “हाल घरको कोठामा बस्दै आएका छौँ, बेडमा सुत्छौँ, घरमा सम्झाउँदा बुझाउँदा बुढापाकाले पनि यतिसम्म मानेका छन् ।” छाउपडी भएका महिलाले मोबाइल छँुदासमेत छोइछिटो हाल्नुपर्ने र आगनमा हिँड्नका लागिसमेत सिमाना निर्धारण गरिने अवस्था रहेको स्थानीयवासी मनकला सुनारले बताउनुभयो । “सिमानाभन्दा पर आँगनमै भुलेर गइहाले अनेकन प्रकारका गाली सुन्नुपर्ने हुन्छ, पानी धारा छुन नपाइने भएकाले कठ्याङ्ग्रिदो जाडोमा नदीमा नुहाउनुपर्ने त बाध्यता नै हो” उहाँले भन्नुभयो । टाढाको छाउगोठमा सुत्नुपर्ने हँुदा बाह्य जनावर र मानिसको आक्रमणमा पर्ने डर त हुन्छ नै, प्रयाप्त ओछ्याउने बिछ्याउने कपडाको अभावमा समेत जाग्राम बसेर रात काट्नुपर्ने अर्को बाध्यता रहेको जवादेवी कामीले बताउनुभयो । ससुरा, श्रीमान, जेठाजुभन्दा घरका सासु, जेठानीलगायतबाट बुहारीले छाउपडीको पीडा खेप्नुपरेको छ । स्कूल जाने बालिकाहरु स्कूल जानबाट वञ्चित पुरानो मान्यताअनुसार तीन दिनसम्म त नुहाउन, कपाल कोर्न र सिन्दुर टीकासमेत लगाउन नहुने धार्मिक कार्य, सामाजिक कार्य गर्न सरिक हुन नहुने, मन्दिर र सो वरपरको बाटोसमेत जान नहुने मानिसलाई छुन नहुने मान्यता छ । महिलाका आश्रित बालबालिकाहरुलाई जस्तोसुकै बिरामी वा चिसो भएपनि बिहान शुद्ध पार्ने नाममा नुहाउनुपर्ने र गहँुत तथा सुनपानी छर्नुपर्नेलगायतका कुरीति छाउपडीका नाममा चल्दै आएको शुक्लाफाँटाका नगरपालिका–११ का वडा अध्यक्ष दिलबहादुर बुढाले बताउनुभयो । गाउँमा सामाजिक क्षेत्रका अगुवा महिलाले छाउगोठ भत्काए पनि पुनः पुरानै तरिकाले निर्माण गरेर बुहारीमाथि प्रताडना दिने कार्य जारी रहेको उहाँले बताउनुभयो । छाउपडी प्रथा विस्तारै शहरी क्षेत्रमा कम हुँदै गए पनि ग्रामीण क्षेत्रमा यसले अझै जरा गाडेको अबस्था छ नगरपालिकाका प्रशासकीय अधिकृत शेरबहादुर बुढाले भन्नुभयो, “समाजमा सकारात्मक सोचको विकास गर्न सके यस प्रथालाई हटाउन बल पुग्नेछ ।” छाउपडी प्रथा हटाउनका लागि शिक्षा र स्वास्थ्यका कार्यक्रम सञ्चालन गर्नु आवश्यक भएको नगरपालिकाका नगर प्रमुख दिलबहादुर ऐरले बताउनुभयो । छाउपडीका कारण दोश्रो दर्जाका रुपमा बाच्न विवश महिलालाई न्याय दिनका लागि दबाबमूलक कार्यक्रम सञ्चालन गरिने उहाँले बताउनुभयो । जनचेतनासँगै छाउकुडी भत्काउने कार्यलाई सँगसँगै लैजाने कार्यक्रम तय गरिएको उहाँले बताउनुभयो । छाउपडी, मासिकश्राव र सुत्केरीका समयमा गरिने विभेदजन्य व्यवहारलाई छाउपडी प्रथा कानुनीरूपमा अपराधका रूपमा परिभाषित गरी कैद र जरिवाना हुने ऐन प्रस्ताव गरिए पनि जारी भने भएको छैन् । मुलुकी ऐन प्रतिस्थापनका लागि बनाइएको ऐनमा कसैले छाउपडी प्रथालाई मान्यता दिएमा तीन महिनासम्म कैद, तीन हजार रुपियाँ जरिवाना वा दुवै सजाय हुनसक्ने व्यवस्था गरेको छ । घरेलु हिंसा कसुर र सजाय ऐन २०६६ ले पनि कुनै पनि व्यक्तिलाई घरेलु सम्बन्ध भएका कुनै पनि व्यक्तिले शारीरिक, मानसिक, आर्थिक र यौनजन्य हिसा गर्न पाइने छैन भन्ने कानूनी व्यवस्था गरेपनि त्यसअन्र्तगत हालसम्म कारवाही भने कसैलाई पनि हुन सकेको छैन् । छाउपडी प्रथा उन्मूलन निर्देशिका २०६४ को उद्देश्यमै छाउपडी कुप्रथा उन्मुलन गरी समतामूलक समाज निर्माण स्थापना गर्नुपर्ने उल्लेख गरिएको छ । रासस

काठमाडौं, फागुन १५ । विश्वकप क्रिकेटको पहिलो अभ्यास खेलमा नेपालले युएईलाई पाँच विकेटले पराजित गरेको छ । टस जितर पहिला व्याटिङ गरेको युएईले नेपाललाई जितका लागि १७२ रनको लक्ष्य दिएको थियो । १७२ रनको लक्ष्य सहित जवाफी ब्याटिङमा उत्रेको नेपालको ओभरमा विकेट गुमाउँदै रन बनाएको हो । नेपालका लागि विष्फोटक ब्याटिङ गरेका दिपेन्द्रसिंह ऐरीले ४१ रन, पारस खडका २८, अनिलकुमार शाह ११, ज्ञानेन्द्र मल्लले १२, दिलिप नाथ ४ रन बनाए ।  नट अाउट रहेका शरद भेषावकरले ४१ र  अारिफ शेखले २३ रन बनाए । बलिङ तर्फ नेपालका ललित भण्डारीले सर्वाधिक चार विकेट लिए । त्यस्तै करण केसीले ३, ललित राजवंशीले २ र पारस खड्काले १ विकेट लिए । मैदान चीसो भएका कारण पूर्व निर्धारित समयमा भन्दा ढिलो गरी खेल शूरु भएको थियाे। मंगलबार जिम्बावेको क्वेक्वे मैदान ओसिलो भएका कारण २९ ओभरमा घटाइएको खेलमा टस जितेर पहिले ब्याटिङ गरेको युएई २८.५ ओभरमा १ सय ७१ रनमा अलआउट भयो। युएईका ओपनिङ ब्याट्सम्यान अस्फक अहमेदले ४२ रन जोडे। ललित राजवंशीको बलमा आरिफ शेखबाट क्याच हुनुअघि उनले ५१ बलमा ४ चौका र १ छक्का प्रहार गरे। त्यसअघि ओपनर तथा कप्तान रोहन मुस्ताफालाई ४ रनको झिनो स्कोरमा ललित भण्डारीले आउट गरे। यस्तै गुलाम सब्बेरले ३२ रनको योगदान दिए। उनलाई कप्तान पारस खड्काले बोल्ड गरेका थिए। रमिज शाहजादलाई राजवंशीले शून्य रनमा आउट गर्दा शैनमान अनवारले १६ रन जोडे। अनवारलाई भण्डारीले करण केसीबाट क्याच गराएका थिए। मोहमद उस्मानलाई पनि भण्डारीले २६ रन बनाएर खेलिरहदा आउट गरे। लगत्तै उनले मोहमद बोतालाई १ रनमा आउट गरे। दुई साता अघि नामिबियामा भएको विश्व क्रिकेट लिग डिभिजन टूमा विजेता बनेको युएई र दोश्रो भएको नेपाल विश्वकपको छनौट खेल्न जिम्बावे छन् । नामिवयामा भएको डिभिजन २ मा नेपालले समूह चरणमा युएईलाई ६ विकेटले हराए पनि फाइनलमा ७ रनले पराजित भएको थियो । जिम्बावेमा फागुन २० गतेदेखि हुने विश्वकप छनोट प्रतियोगितामा नेपालसहित १० देश सहभागी छन् । जसमा उत्कृष्ट हुने २ टिमले विश्वकप खेल्न पाउनेछन । नेपाल अफगानिस्तान, जिम्बाबे, हङकङ र स्कटल्याण्डसँगै समूह बीमा छ । नेपालले पहिलो खेल फागुन २० गते जिम्बावेसँग, दोस्रो खेल २४ गते स्कटल्याण्डसँग, तेस्रो खेल २६ गते अफगानिस्तानसँग र अन्तिम खेल २८ गते हङकङसँग खेल्नेछ ।

काठमाडौं, फागुन १५ ।सन २०१९ मा हुने एकदिवसिय विश्वकप क्रिकेटको छनोट खेल्नको वार्मअफ खेलमा अहिले नेपाल र युएई भिडिरहेका छन् । जाम्बाबेमा जारी खेलमा युएई टस जितेर ब्याटिङ राजेको छ । टस जितेर ब्याटिङमा उत्रिएको युएर्इको दोस्रो विकेट पतन भएको छ । युएर्इ ताजा अवस्थामा दुई विकेटको क्षतिमा १४ ओभरको समाप्तिमा ७१ रन बनाएर खेलिरहेको छ । नेपालका लागि पहिलो विकेट खेलको दोस्रो ओभरको पहिलो बलमा लतित भण्डारीले लिए । ललितको बलमा नेपालका ज्ञानेन्द्र मल्लले क्याच गरेका हुन् । युएईका रोहन मुस्ताफा ४ रन बनाएर आउट भए । युएईको दोस्रो विकेट कप्तान पारस खडकाले लिएका हुन् । युएईका गुलाम सहावरलाई खडकाले ३२ रनमा आउट गरेका हुन् । मैदान चीसो भएका कारण पूर्व निर्धारित समयमा भन्दा ढिलो गरी खेल शूरु भएको हो । दुई साता अघि नामिबियामा भएको विश्व क्रिकेट लिग डिभिजन टूमा विजेता बनेको युएई र दोश्रो भएको नेपाल विश्वकपको छनौट खेल्न जिम्बावे छन् । नामिवयामा भएको डिभिजन २ मा नेपालले समूह चरणमा युएईलाई ६ विकेटले हराए पनि फाइनलमा ७ रनले पराजित भएको थियो । जिम्बावेमा फागुन २० गतेदेखि हुने विश्वकप छनोट प्रतियोगितामा नेपालसहित १० देश सहभागी छन् । जसमा उत्कृष्ट हुने २ टिमले विश्वकप खेल्न पाउनेछन । नेपाल अफगानिस्तान, जिम्बाबे, हङकङ र स्कटल्याण्डसँगै समूह बीमा छ । नेपालले पहिलो खेल फागुन २० गते घरेलु टोली जिम्बावेसँग, दोस्रो खेल २४ गते स्कटल्याण्डसँग, तेस्रो खेल २६ गते अफगानिस्तानसँग र अन्तिम खेल २८ गते हङकङसँग खेल्नेछ ।