काठमाडौं, असार ३० ।  शान्तिपूर्ण प्रतिस्पर्धामा आएको माओवादीदेखि ‘अझै क्रान्ति आवश्यक’ रहेको भन्दै अघि बढेका माओवादी घटकसम्म अहिले गम्भीर’ समीक्षामा जुटेका छन् । स्थानीय तह निर्वाचनलाई आफूअनुकूल प्रयोग गर्न नसकेपछि माओवादी घटक यसरी समीक्षामा लागेका हुन् । माक्र्सवाद, लेनिनवाद र माओवादको पहिचान अब रहने कि नरहने भन्ने स्तरसम्मको बहसमा जुटेको नेताहरूले बताउन थालेका छन् । माओवादी केन्द्रमा संसद्वादी शक्तिभन्दा आफूहरू कुन अर्थमा फरक रह्यो भन्ने बहस उठ्न थालेको छ । नेकपामा निर्वाचनले ‘प्रतिक्रियावादी सत्ता’ झन् सुदृढ भएको भन्ने बहस सुरु भएको छ । माओवादी केन्द्र, क्रान्तिकारी माओवादी, नयाँ शक्ति निर्वाचनमा सहभागी भएका थिए । नेकपाले भने निर्वाचन बहिष्कारको नीति अवलम्बन गरेको थियो । प्रचण्ड-डा. बाबुराम भट्टराई नेतृत्वका पार्टीले संविधान कार्यान्वयनका लागि प्रतिस्पर्धा, मोहन वैद्यले मात्र उपयोग र नेत्रविक्रम चन्दले निर्वाचन खारेजीको रणनीतिका रूपमा यसलाई व्याख्या गरेका थिए । निर्वाचनमा न प्रचण्ड-भट्टराई नेतृत्वका पार्टीले अपेक्षित जित हासिल गर्न सके न त चन्दको पार्टीले भनेझैं निर्वाचन खारेज हुन सक्यो । कुनै पनि घटकको अपेक्षित रणनीति पूरा हुन नसकेपछि गम्भीर समीक्षामा जुटेको नेताहरू बताउँछन् । ‘अब समग्र विषयमै केन्द्रित रहेर गम्भीर समीक्षा गर्नुपर्छ’, माओवादी केन्द्रका नेता गिरिराजमणि पोखरेलले भने, ‘माओवादी आन्दोलनको दिशा, भविष्यलगायत विषयमा पार्टी सचिवालयको विस्तारित बैठकमा गम्भीर समीक्षा हुनेछ ।’ उक्त पार्टीले २ साउनदेखि पार्टी सचिवालयको विस्तारित बैठक बोलाएको छ । बैठकमा जिल्ला इन्चार्जसम्म बोलाइएको प्रवक्ता पम्फा भुसालले जानकारी दिइन् । वैद्य नेतृत्वको क्रान्तिकारी माओवादीले ‘शक्ति सञ्चय’का लागि निर्वाचनलाई उपयोगको नीति बनाएको थियो । उसले काभ्रेको रोशी नगरपालिका, बागलुङको ढोरपाटनमा वडाध्यक्षबाहेक अन्यमा जित्न सकेन । ‘हामी निर्वाचन जित्ने भनेर उठेकै होइनौं, संगठनको आधार निर्माणका लागि उपयोग मात्र गरेका हौं’, उक्त पार्टीका केन्द्रीय सदस्य हीरामणि दुःखीले भने, ‘अहिले हामी केन्द्रीय समिति बैठकमा यसको पनि समीक्षा गरिरहेका छौं ।’ क्रान्तिकारी माओवादीको केन्द्रीय समिति बैठक २५ असारदेखि जारी छ । बैठकमा अध्यक्ष वैद्यले प्रस्तुत गरेको राजनीतिक प्रतिवेदनमा नेताहरूले धारणा राख्ने काम चलिरहेको दुःखीले जानकारी दिए । भट्टराई नेतृत्वको नयाँ शक्तिले पनि निर्वाचन समीक्षा, पार्टीको एकवर्षे संगठनात्मक योजनालगायत विषयमा केन्द्रित रहेर छलफल गर्न बैठक बोलाएको छ । प्रवक्ता खिमलाल देवकोटाका अनुसार साउन ९ र १० गते केन्द्रीय कार्यालय र ११ र १२ गते केन्द्रीय परिषद् बैठक बोलाइएको छ । ‘निर्वाचन चिह्न पाउन सकेनौं, परिणाम अपेक्षित आएन’, प्रवक्ता देवकोटाले भने, ‘निर्वाचन समीक्षा, अबको योजनालगायत विषयमा बैठकमा हामी गम्भीर समीक्षा गर्दै छौं ।’ निर्वाचन खारेजीको रणनीति बनाएको चन्द नेतृत्वको नेकपा पनि छलफलमा छ । केही दिनअघि मात्रै उसले पाँच सदस्यीय स्थायी समिति बैठकमा निर्वाचन परिणामपछि पार्टीको अवस्थाका विषयमा समीक्षा गरेको स्रोतले बतायो । स्थायी समितिले पार्टी कार्यनीतिअनुसार कसरी अगाडि बढ्ने भन्ने विषयमा व्यापक छलफल आवश्यक रहेको निष्कर्ष निकालेको छ । साउन पहिलो सातातिर केन्द्रीय समिति बैठक बोलाउने तयारी देखिएको छ । ‘हामी पार्टी केन्द्रीय समिति बैठकको तयारीमा छौं, नेताहरूले छलफल गरी बैठक बोलाउने तयारी गर्नुभएको छ’, पोलिटब्युरो सदस्य अनिल शर्माले भने । स्थानीय तहमा आधारइलाका ठानेकै क्षेत्रका कार्यकर्ताले नै अटेर गरिदिएपछि उक्त पार्टी थप दबाबमा देखिएको छ । रोल्पाको थवाङमा आफ्नै पार्टी केन्द्रको निर्णय कार्यकर्ताले अस्वीकार गर्दै स्थानीय निर्वाचनमा भाग लिएपछि चन्द दबाबमा परेका हुन् ।,अन्नपूर्ण पोस्टमा खबर छ । कुन दल के गर्दै छ ? माओवादी केन्द्र २ साउनदेखि सचिवालयको विस्तारित बैठक आह्वान । क्रान्तिकारी माओवादी २५ असारदेखि पार्टी केन्द्र्रीय समिति बैठकमा । नयाँ शक्ति साउन ९ र १० गते केन्द्रीय कार्यालयको बैठक आह्वान । ११ र १२ गते गते केन्द्रीय परिषद् बैठक । नेकपा स्थायी समिति बैठक सम्पन्न । साउन पहिलो साता केन्द्रीय समिति बैठक बोलाउने तयारी ।

धनुषा,  असार ११  । विद्यालय जाँदै गरेका एक प्रधानाध्यापकमाथि आज गोली प्रहार भएको छ । धनुषाको लक्ष्मीनिया गाउँपालिकाको विलट साह सर्वोदय मावि, सिनुरजोडाका प्रअ ५० वर्षीय नरेन्द्रकुमार शर्मामाथि गोली प्रहार भएको हो । धनुषाका प्रमुख जिल्ला अधिकारी दिलीपकुमार चापागाईंले गोली चलेको पुष्टि गर्दै गोली प्रहार गर्नेहरुको खोजी भइरहेको जानकारी दिए । शर्माको गालामा गोली लागेको छ । उनको अवस्था अहिले गम्भीर छ । उपचारका लागि जनकपुर अञ्चल अस्पतामा भर्ना गरिएको छ । जनकपुर उपमहानगरपालिका–७ निवासी प्रअ बिहान ६ः३० बजे आफ्नो घरबाट विद्यालय जाँदै गरेका बेला लक्ष्मीनिया चोकदेखि पश्चिम बाटोमा मोटरसाइकलमा आएका दुई हतियारधारी समूहले गोली प्रहार गरी भागेको प्रहरीले जनाएको छ ।  

गोरखा, असार ६ । गत वर्षको भदौमा रु ५० हजारका दरले अनुदान रकम लिए पनि घर निर्माण सुरु नगरेका भूकम्पपीडितलाई छिटो घर बनाउन दबाब दिन राष्ट्रिय पुनःनिर्माण प्राधिकरण गोरखाको गाउँगाउँ पुगेको छ । प्राधिकरणका जिल्ला प्रमुख राजेन्द्र कार्कीले सुलिकोट गाउँपालिका पुगेर छ हजार ६०७ जना लाभग्राहीमध्ये पाँच हजार ८८३ जनालाई पहिलो किस्ता उपलब्ध गराएपनि उनीहरुले घर नबनाएका कारण दोस्रो र तेस्रो किस्ता वितरण प्रभावित भएको बताउनुभयो । सुलिकोटमा बारपाक, स्वाँरा, सौरपानी, ताकुमाझ लाकुरीबोट, ताकुकोट, पन्द्रुङ र पाँचखुवादेउराली गाउँ पर्छन् । यी गाउँका भूकम्पपीडितमध्ये ३१३ जनाले मात्रै दोस्रो किस्ताको रकम बुझेका छन् । पहिलो किस्ता बुझेर घरको जगसहित डिपिसी गरेपछि दोस्रो किस्ता माग गर्न पाइने प्रावधान रहेको छ । तर पहिलो किस्ता बुझेका अधिकांश भूकम्पपीडितले घर बनाउन सुरु नगर्दा दोस्रो किस्ता वितरण हुन सकेको छैन । सुलिकोटका ९०० भूकम्पपीडितले आफूहरु वास्तविक भूकम्पपीडित भए पनि लाभग्राहीको सूचीमा नपरेको भन्दै उजुरी दिएका थिए । तीमध्ये २२२ लाभग्राहीको सूचीमा परेको कार्की बताउनुहुन्छ । पुनःनिर्माणको वर्तमान अवस्था, गतिविधि, समस्या, चुनौती र समाधानका उपाय खोजी गर्ने उद्देश्यले आफूहरु गाउँ अभियानमा हिँडेको उहाँले बताउनुभयो । उहाँले भन्नुभयो – “आफ्नो गाउँ, टोल, गाउँपालिकामा किन घर बनेनन् भन्नेबारे जनप्रतिनिधिले चासो र चिन्ता लिनुपर्छ । प्राविधिक गाउँ–गाउँमा खटाएका छौँ । पहिलो किस्ता वितरण गरिसक्यौँ, दोस्रो किस्ता किन माग गर्नुहुन्न ? खुरुखुरु घर बनाउनुहोस् हामी अनुदान छिटोछिटो पठाउँछौँ ।” लालपुर्जा नभएका, सुकुम्बासीलगायतका समस्या पनि छिट्टै समाधान गरिने कार्की बताउनुहुन्छ । गाउँपालिका अध्यक्ष, उपाध्यक्ष, वडाध्यक्ष, कार्यकारी प्रमुख, वडा सचिव, निर्वाचित अन्य सदस्य, प्राविधिक राखेर प्राधिकरणले अन्तक्र्रिया कार्यक्रम गरी पुनःनिर्माणलाई तीव्रता दिन आग्रह गरेको छ । कार्कीले भन्नुभयो – “घर भत्केर पनि लाभग्राहीको सूचीमा पर्नुभएको छैन भने अब वडाध्यक्षसहितको टोलीले लाभग्राही पहिचान गर्नेछ । त्यसका लागि छिट्टै कार्यविधि आउँछ । स्थानीयस्तरबाटै लाभग्राहीको पहिचान गरी अनुदान रकम दिने व्यवस्था मिलाउँछौँ ।” सुलिकोट–६ का बाबुलाल गुरुङले चारपटकसम्म प्राविधिक तथा इञ्जिनियर बोलाएर घर देखाए पनि दोस्रो किस्ता नपाएको गुनासो गर्नुभयो । उहाँले भन्नुभयो – “चारपटकसम्म प्राविधिक बोलाएर घर देखाए, तर मापदण्ड पुगेको छैन भनेर दोस्रो किस्ताको फाइल अघि बढाइदिनुभएन । मापदण्डमात्रै हेरेर हुँदैन, भूकम्पप्रतिरोधी घर छ भने अनुदान रकम पाउनुपर्छ ।” यस्तै सुलिकोट–१ बारपाकका वडाध्यक्ष रोशन विकले प्राधिकरणले घरका मापदण्ड तथा प्राधिकरण नै गठन हुनुपूर्व त्यहाँ बनिसकेका घरले अनुदान रकम पाउँछन् या पाउँदैनन् भन्दै प्रश्न गर्नुभयो । उहाँले प्राधिकरणले जारी गरेका बाहेक अन्य नक्सामा आधारित रहेर बनाइएका घरलाई पनि दोस्रो किस्ता वितरणमा आलटाल गरिएकामा स्थानीयवासीले दुःख पाएका बताउनुभयो । उहाँले भन्नुभयो – “बारपाकको दलित बस्तीमा भूकम्प स्मृति उद्यान बनाउने भनिएको छ । घेराबारका लागि टेन्डर पनि भइसक्यो भन्ने सुनेँ । त्यहाँका ४० घरधुरीका दलितलाई कहाँ स्थानान्तरण गर्ने हो कसैले चासो र चिन्ता देखाएका छैनन् ।” सुलिकोट गाउँपालिकाका प्रमुख विष्णु भट्टले प्राविधिकबीच समन्वय गर्ने एकजना वरिष्ठ प्राविधिकको गाउँपालिकामा खाँचो रहेको बताउनुभयो । उहाँले भन्नुभयो – “गाउँमा जताततै घर बनाउनुपर्नेछ । निर्माण सामग्रीको मात्रै होइन प्राविधिकको पनि अभाव झेल्नुपर्दा पुनःनिर्माणले गति लिन सको छैन । बर्खा लाग्यो, पीडित टहरामा बसिरहेका छन् । धमाधम पीडितले घर बनाउन थाले र अनुदान रकम पनि वितरण गर्न सकियो भनेमात्रै पुनःनिर्माणले गति लिन्छ ।” प्रमुख जिल्ला अधिकारी जितेन्द्र बस्नेतले निजी आवास पुनःनिर्माणलाई रु दुई अर्ब बजेट आएको भन्दै अहिलेसम्म जम्मा रु ५० करोडमात्रै खर्च भएको बताउनुभयो । उहाँले भन्नुभयो – “रु दुई अर्ब बजेटमध्ये एक वर्षमा जम्मा रु ५० करोड खर्च भएको छ । दोस्रो र तेस्रो किस्ता माग नभए असारपछि बजेट फ्रिज भएर जान्छ ।” गत वर्ष भदौमा ५४ हजार लाभग्राहीलाई पहिलो किस्ता वितरण गरिएको थियो । जिल्लाका ५८ हजार ५०३ लाभग्राहीमध्ये ५४ हजारले गत वर्ष भदौमा रु ५० हजारका दरले अनुदान रकम बुझेका थिए । तीमध्ये चार हजारले मात्रै दोस्रो किस्ता बुझेका छन् । पहिलो किस्ता बुझ्ने र दोस्रो किस्ता रकम माग गर्नेको सङ्ख्याबीच धेरै अन्तर छ । यसबाट अधिकांशले घर बनाएका छैनन् भन्ने देखिन्छ ।

सिन्धुली, असार ३ ।   यातायात व्यवस्था विभागले बनेपा सिन्धुली बर्दिवास (बीपी राजमार्ग)मा राती सवारीसान सञ्चालनमा रोक लगाएको खबर आजको अन्नपूर्णमा खबर छ । बीपी राजमार्गमा सञ्चालन हुने यात्रुवाहक सार्वजनिक सवारीसाधनलाई रातको समयमा सञ्चालन गर्न इजाजत नदिइएको उल्लेख गर्दै रातको समयमा कुनै पनि सार्वजनिक सवारीसाधन सञ्चालन नगर्न भनिएको छ । १८ भन्दा बढी सिट भएका सार्वजनिक सवारी साधनलाई पनि उक्त राजमार्गमा दिउँसोको समयमा पनि सञ्चालन हुन नदिने भनिएको छ ।

डोल्पा, जेठ १ । डोल्पाको दुई छुटाछुटै गाउँपालिकामा माओवादी केन्द्रले विजयी प्राप्त गरेको छ । डोल्पाको जगदुल्ला गाउँपालिकाको अध्यक्ष र उपाध्यक्षमा नै माओवादीले जितेको छ । अध्यक्षमा ५५६ मत ल्याई नरसिंह रोकायले जित हासिल गरेका छन् भने उपाध्यक्षमा पनि माओवादी केन्द्रकै अमृता लामाले ५५३ मत ल्याएर विजयी हासिल गरेकी छिन् । त्यस्तै जिल्लाकै मुड्केचुला गाउँपालिकाको अध्यक्षमा माओवादी केन्द्रका दत्त बहादुर शाहीले ९३३ मत ल्याई जित हासिल गरेका छन् । उपाध्यक्षमा नेकपा एमालेबाट सविना कुमारी रोकायले ९५९ मत ल्याएर विजयी भएकी छिन् ।

रुकुम, जेठ १ । रुकुमको चौरजहारी नगरपालिका प्रमुखमा माओवादी केन्द्रका उम्मेदवार चन्द्रबहादुर भण्डारी विजयी भएका छन् । हालसम्म प्राप्त नतिजा अनुसार, मेयरमा माओवादी केन्द्रले मेयरमा जितेको यो पहिलो नगरपालिका हो । यसअघि रुकुमका ६ वटा वडाको घोषित परिणाम अनुसार ५ वटामा माओवादी केन्द्र र एकमा नेपाली कांग्रेसले विजय हासिल गरेका छन् ।

दोलखा, जेठ १ । चरिकोट,  दोलखा नगरपालिकाको वडा नम्बर २ मा माओवादी केन्द्रको प्यानल नै विजयी भएको छ । पछिल्लो अपडेट अनुसार, माओवादी केन्द्रका तर्फबाट वडाध्यक्षसहित सबै सदस्यहरुले विजय हासिल गरेका हुन । हालसम्मको अपडेट अनुसार माओवादी केन्द्र २९ स्थानमा अगाडि छ भने नेकपा एमाले ३३ र नेपाली कांग्रेस २८ स्थानमा अगाडि छ ।

चितवन, जेठ १ । भरतपुर महानगरपालिकाको मेयर पदकी उम्मेदवार रेणु दाहालले मतगणनाका बारेमा अनावश्यक विवाद सिर्जना गरिएको बताएकी छिन् । मतपेटिकाभित्र रहेका मत गणनासम्बन्धी विवादका कारण अहिलेसम्म भरतपुर महानगरपालिकाको मतगणना हुन सकेको छैन । “हुँदै नभएको विवाद सिर्जना गरिएको छ ।” एभरेष्टदैनिकडटकमसँग कुरा गर्दै दाहालले भनिन्, “दलहरुबीच पनि विवाद छैन तर किन ढिला गरिँदैछ, बुझ्न सकिएन । अनेक बहना गरेर मतगणना पछि सार्न खोजिएको छ, भरतपुर महानगरको चाँडो मतगणना गरियोस् । ” आज बिहान बसेको बैठकमा निर्वाचन अधिकृतले मतपेटिकाभित्र रहेको सबै मत गणना गरिनुपर्ने बताएपछि विवाद भएको थियो । दाहालका अनुसार, दलहरुले भने बैठकमा केही दुई चार मत तलमाथि भए त्यो स्वीकार गरिने तर अस्वभाविकरुपमा मतपेटिकाभित्र मतदान केन्द्रको मुचुल्काभन्दा बढी मत भए त्यो नमान्ने सहमति गरेका थिए । “निर्वाचन अधिकृतको लापरवाही भयो” दाहालले भनिन् । मतगणना कार्य ढिला भएपछि आफ्ना बारेमा समेत अनावश्यक टिप्पणी गरिएकोमा दाहालले आक्रोश व्यक्त गरिन, “मैले यो भने, त्यो भने भनेर समेत प्रचार गरिएको छ । मैले यो विषयमा केही भनेकी छैन । न त दलहरुबीच नै त्यस्तो गम्भीर विवाद छ । आफूले जनताले दिएको मतको कदर गर्ने हो । मलाई बदनाम गर्ने तत्वहरुले अनावश्यक हल्ला फैलाइरहेका छन् ।” बिहान १० बजे बैठकमा सहमति भएपनि निर्वाचन अधिकृतले फेरी मतपेटिकामा भएका सबै मत गणनायोग्य हुनुपर्ने बताएपछि विवाद थपिएको थियो । त्यसपछि १ बजे सर्वदलीय बैठक बस्ने भनिएपनि त्यो दुई बजेका लागि सारिएको थियो । अहिले सर्वदलीय बैठक बसिरहेको छ ।

काठमाडौं, जेठ १ । स्थानीय तहको निर्वाचनको पछिल्लो मत गणना परिणाम अनुसार माओवादी केन्द्रले २९स्थानमा अग्रता लिएको छ । माओवादीले अग्रता लिएका स्थानीय तह १. चौरजहारी नगरपालिका (रुकुम) २. गोलनचौर गाउँपालिका (सिन्धुली) ३. थाक्रे गाउँपालिका (धादिङ) ४. नेत्रावती गाउँपालिका (धादिङ) ५. रोशी गाउँपालिका (काभ्रे) ६. वागमती गाउँपालिका (मकवानपुर) ७. भेरीगंगा नगरपालिका (सुर्खेत) ८. शिवालय गाउँपालिका (जाजरकोट) ९. बारेकोट गाउँपालिका (जाजरकोट) १०. बाफीकोट गाउँपालिका (रुकुम) ११. कोञ्जोस्योङ गाउँपालिका (ललितपुर) १२. दार्मा गाउँपालिका (सल्यान) १३. कपुरकोट गाउँपालिका (सल्यान) १४. ढोरचौर गाउँपालिका (सल्यान) १५. रास्कोट नगरपालिका (कालिकोट) १६. कालिका गाउँपालिका (रसुवा) १७. ताराखोला गाउँपालिका (बाग्लुङ) १८. आँबु खैरहनी गाउँपालिका ( गोरखा) १९. गण्डकी गाउँपालिका (गोरखा) २०. जिरी नगरपालिका (दोलखा) २१. भिमफेदी नगरपालिका (मकवानपुर) २२. खैरहनी नगरपालिका (चितवन) २३. चौतारा साँगाचोकगढी नगरपालिका (सिन्धुपाल्चोक) २४ बागचौर नगरपालिका (सल्यान) २५. बेनिघाट रोराङ गाउँपालिका (धादिंग) २६. गण्डकी गाउँपालिका (गोरखा) २७. पाचखाल नगरपालिका (काभ्रे) २८.  पञ्चकन्या गाउँपालिका (नुवाकोट) २९.त्रिवेणी नलगाड (जाजरकोट)

मुसिकोट, जेठ १ । रुकुम जिल्लाका १ सय ४ वटा वडामध्ये ६ वटाको मत गणना सम्पन्न भएको छ । पछिल्लो जानकारी अनुसार, घोषणा भएका वडाहरुमध्ये ५ वटामा माओवादी केन्द्र र एकमा नेपाली कांग्रेसको प्यानल विजयी भएको हो । रुकुमको सानोभेरी गाउपालिकाको १ नम्बर वडामा टेकवहादुर पुन प्रमुखसहित माओबादि केन्द्रको पुरै प्यानल बिजयी भएको छ । यस्तै वाफीकोट गा।पा।१ मा।हर्कु मल्लको प्यानल बिजयी भएको छ । माओवादी केन्द्रले जितेका बाँफिकोट-१, सानीभेरी १-४ नेपाली कांग्रेसले जितेको मुसीकोट नगरपालिकाको वडा नं. २

काठमाडौं, जेठ १ । यक आर्यन सिग्देललाई झण्डै ७ वर्षपछि एकैसाथ चलचित्रमा देखिन पाउने भएका छन् । ‘कसले चोर्यो मेरो मन’ पछि एकअर्काको मुख समेत हेर्न नचाहने आर्यन र रेखा फेरी एकपटक सारा दुश्मनी भुलेर फिल्म ‘रुद्र प्रिया ’ मा देखिँदै छन्। फिल्म ‘किस्मत’ बाट नेपाली रजतपटमा भित्रिएका आर्यन अहिले आफ्नो स्टारडम बचाउने फिल्मको खोजीमा छन् भने नायिका रेखा पनि खस्कदै गएको आफ्नो स्टारडम जोगाउने धाउन्नमा छिन् । यसैले पनि यी दुईको मिलन भएको खबरले सिनेबजार यतिबेला राम्रै गर्माएको छ । केही दिनअगाडि अंकमाल गर्दै बर्षौसम्मको शीतयुद्ध अन्त्य गरेका रेखा र आर्यन एकसाथ पर्दामा देखिन लाग्नु दर्शकहरुलाई पक्कै पनि खुशीको खबर हो । यो जोडीलाई दर्शकहरुले ‘किस्मत‘ पछि ‘हिफाजत‘ र ‘कसले चोर्यो मेरो मन’ मा निकै रुचाएका थिए । एकसाथ अभिनय गरेका तीन फिल्म नै हिट सावित हुँदा रेखा र आर्यनको जोडीलाई दर्शकहरुले फेरी पर्दामा हेर्न नचाएका थिएनन् तर दुवैमा ‘नम्बर वान म हुँ ’ भन्ने घमण्डले गएको सात बर्षसम्म यो पूरा हुन पाएको थिएन । बजारमा भाइरल भएको खबरलाई आधार मान्ने हो भने रेखा र आर्यनले आगामी दिनमा एकसाथ कुनै पनि फिल्म नखेल्ने निर्णयमा समेत पुगेका थिए तर कमजोर बन्दै गएको स्टारडम जोगाउन सायद उनीहरुले मिल्नुको विकल्प भेटेनन् । जेठ ४ गतेबाट रेखा र आर्यन अभिनित फिल्म ‘रुद्र प्रिया’ को छायांकन सुरु हुँदैछ । फिल्ममा आर्यन फाइनल हुनुअगाडि रेखा स्वयले मिडियामा आधिकारीक जानकारी दिएकी थिइन् कि ‘रुद्र प्रिया ’ मा अर्पण थापा र सुदर्शन थापा मुख्य भूमिकामा रहने छन् । तर, फिल्ममा आर्यनको इन्ट्री भएपछि रेखाले अर्पण र सुदर्शनलाई आउट गरेकी छन् । सुदर्शन थापा आफ्नो निर्देशनमा बनेको फिल्म ‘म यस्तो गीत गाउँछु ’ को रिलिजको तयारीमा रहेका कारण ‘रुद्र प्रिया ’ लाई समय दिन नसक्ने भन्दै बाहिरिएका छन् भने अर्पण आफ्नो निर्देशन र अभिनयमा तयार भएको फिल्म ‘आधा लभु को रिलिज नजिकिँदै गएका कारण ‘रुद्र प्रिया ’ बाट हात झिकेको खबर छ । रेखाको कुरा सुन्ने हो भने फिल्म ‘रुद्र प्रिया ’ को कथा नायक आर्यन सिग्देललाई नै सोचेर तयार पारिएको थियो । करीब ६ महिनादेखि आर्यनसँग यो फिल्मको विषयमा कुरा पनि भैरहेको थियो तर आर्यन रेखासँग एकसाथ फिल्म गर्न तयार थिएनन् । यसैबीच रेखाले फिल्ममा अर्पण र सुदर्शनलाई लिड रोलमा फाइनल गरिन् । तर, फिल्मका निर्माता रमेश पौडेलले भने आर्यनलाई मनाउन छाडेनन् । अन्ततः आर्यन पनि रेखासँग फिल्म खेल्न राजी भए । आर्यनले फिल्म खेल्न तयार भएपछि सुदर्शनले आपसी सहमतिमै रेखासँग बिदा मागेका थिए भने अर्पण भने अझै पनि काम गर्न सक्ने संभावना रहेको स्रोत बताउँछ । ‘रुद्र प्रिया ’ लाई ‘माला ’ फिल्मका निर्देशक सुदीप भूपाल सिंहले निर्देशन गर्दैछन् । यो फिल्म रेखा थापाको ब्यानर रेखा फिल्मसबाट निर्माण हुन लागेको हो । ‘रुद्र प्रिया ‘ पछि दर्शकहरुले आर्यन र रेखाको जोडीलाई ‘कसले चोर्यो मेरो मन फेरी ‘ मा पनि देख्न सक्ने संभावना प्रवल छ किनकी रेखाले यो फिल्मको पनि घोषणा गरिसकेकी छिन् । रेखाको तयारी अनुसार, ‘रुद्र प्रिया ‘ हलमा लागेपछि ‘कसले चोर्यो मेरो मन फेरी ’ को छायांकन आरम्भ हुनेछ ।

काठमाडौं,वैशाख ३० । निर्वाचन अायाेगले मौन अवधिमा प्रचारप्रसार गर्ने उम्मेदवारलाई निरुत्साहित गरिदिन मतदातालाई आग्रह गरेकाे छ। बिहीबार रातिदेखि मौन अवधि सुरु भएकाे स्मरण गराउँदै  प्रमुख निर्वाचन आयुक्त अयोधीप्रसाद यादवले त्यसपछि पनि केही दल र तिनका कार्यकर्ताले प्रचारप्रसार जारी राखेको भन्दै आपत्ति जनाए । राजधानीमा सहन्यायाधिवक्ता खेमराज ज्ञवालीको किताब ‘लोकतान्त्रिक निर्वाचन व्यवस्थापन’ को विमोचन कार्यक्रममा यादवले भने, ‘कुनै गलत कामकारबाही भए हामी पनि कारबाही गर्न अग्रसर छौं । तपाईंहरूले पनि प्रचारप्रसारमा आउने उम्मेदवारलाई निरुत्साहित गरिदिनुहोस् ।’  

काठमाडौं, वैशाख २५ । चलचित्र क्षेत्र र गायन क्षेत्रका सेलिब्रेटी रेखा थापा र कोमल वली पनि यही वैशाख ३१ गते हुने स्थानीय तहको निर्वाचनका लागि प्रचारप्रसारमा व्यस्त देखिएको छ । रेखा र कोमल पनि राजनीतिमा करिअर हुर्काउनेतिर तीव्रताका साथ लागिपरेकी छन् । संगीत त जननी हुन्, छोड्ने कुरै भएन । कोमल वली राजनीतिमा लागेपछि जनताको मन बुझ्ने मौका पाएकी छु । कुनै समय फ्यानहरूको भीडबाट नायिका रेखा थापा जोगिएर हिँड्नुपर्ने अवस्था थियो । अचेल उनी विनम्र बोलीका साथ दर्शकहरूकै घरदैलो पुग्ने गरेकी छन् । फिल्मी सम्बन्धका कारण स्टारडम जोगाउन पनि रिजर्भ बस्नुपर्ने अवस्था थियो, राजनीतिमा लागेपछि यस्तो स्वभावमा परिवर्तन नल्याई सुखै भएन । ‘राजनीतिमा लागेपछि जनताको मन बुझ्ने मौका पाएकी छु,’ उनले भनिन् । यसैवर्ष राप्रपाको केन्द्रीय सदस्य भएकी रेखा स्थानीय चुनावको भरपूर सदुपयोग गर्दै घरदैलो पुगेकी छन् । उनी आफ्नो पार्टीको चुनावी प्रचारप्रसारमा खटिएको झन्डै दुई साता पुगिसकेको छ । उनले चितवन, मकवानपुर, हेटौंडालगायत स्थानमा जनतासँग प्रत्यक्ष भेटेरै ‘गाई’ चिह्नमा भोट हाल्न आग्रह गरिसकेकी छन् । ‘लामो पर्खाइपछि जनताले स्थानीय निर्वाचनबाट नेतृत्व छान्ने अवसर पाएका छन्, यस्तो महत्त्वपूर्ण समयमा असल नेतृत्व बुझेर मात्रै भोट खसाल्न अनुरोध पनि गर्दै हिँडेकी छु ।’ निर्वाचनमा यति बेला युवा सहभागिता लोभलाग्दो देखिँदै गएको छ । रेखाले पनि आफ्नो पार्टीमा युवा नेतृत्व रहेको दावी गरिन् । ‘मलाई विश्वास गरेर मेरो पार्टीमा भोट हाल्न चाहने शुभेच्छुकहरू थुप्रै देखेकी छु,’ उनले भनिन् । उनले निवार्चनपछि पार्टीले घोषणा गरे अनुरुप काम गरेन भने आफैले खबरदारी गर्ने समेत बताइन् । अबको समयमा युवालाई मौका दिनुपर्छ भन्ने उनको मान्यता छ । राप्रपाकै केन्द्रिय सदस्य रहेकी गायिका कोमल वली पनि स्थानिय निर्वाचनमा सक्रिय छिन् । नयाँ वर्षको उपलक्ष्यमा देशविदेशबाट सांगीतिक कार्यक्रम गर्न आएको निम्तो यत्तिकै थाती राखेर उनी चुनावी प्रचारप्रसारमा खटिएकी छन् । ‘नेताका लागि जनतासमक्ष प्रत्यक्ष भेटघाट गर्ने अवसर यति बेलै हो,’ उनले भनिन्, ‘यही महत्त्व बुझेर बाहिरका सांगीतिक कार्यक्रमहरू अहिलेलाई छाडेकी छु ।’ चुनाव प्रचारप्रसारको बेला राजनीतिक भाषण गरिरहँदा दर्शकश्रोताले ‘अब गीत नगाउने ?’ भन्दै गरेको चिन्ता सुन्दा उनलाई अचम्म लाग्छ रे । ‘संगीत मेरो जन्मआमा हो र राजनीति सन्तान भन्ने गरेकी छु,’ उनले भनिन्, ‘राजनीतिमा करिअर हुर्काउँदै छु, संगीत त जननी हुन्, छोड्ने कुरै भएन ।’ पार्टीको चुनाव प्रचारप्रसारमा उनी बर्दिया, टीकापुर, कञ्चनपुर, तुलसीपुर, सिन्धुपाल्चोकलगायत जिल्लामा पुगिसकेकी छन् । ललितपुर निवासी उनी आफ्नै क्षेत्रमा पनि उत्तिकै खटिरहेकी छन् ।

शनिबार काठमाडौँको थापाथलीमा बाग्मती सफाई गरिँदै । तस्बिर : रोशन सापकोटा, काठमाडाै

काठमाण्डौ, वैशाख १६ । सनराइज बैङ्क लिमिटेडले हकप्रद शेयर निष्कासन गर्नको लागि धितोपत्र बोर्डबाट स्वीकृति पाएको छ । बैङ्कले हकप्रद निष्कासन गर्नको लागि वैशाख १५ गते स्वीकृति पाएको हो । बैंकले १० बराबर ३ अर्थात् १०ः३ अनुपातमा रू. एक सय अङ्कित दरको १ करोड ६३ लाख ५९ हजार ६ सय ३६ कित्ता हकप्रद शेयर निष्कासन गर्नेछ । बैङ्कको विक्री प्रबन्धकको रूपमा प्रभु क्यापिटल लिमिटेडलाई नियुक्ति गरेको छ । अब बैंकले केही दिनमा नै हकप्रदका लागि सेयरधनी दर्ता पुस्तिका बन्दको सूचना निकाल्दै हकप्रद निष्काशनको मिति निर्धारण गर्नेछ । गत आर्थिक वर्षमा ३३ दशलमव ३३ प्रतिशत बोनस बितरण गरेको बैंकको अहिले चुक्ता पूँजी पाँच अर्ब ४५ करोड ३२ लाख रुपैंया रहेको छ । बोर्डबाट स्वीकृत भएको हकप्रद निष्काशन पश्चात बैंकको चुक्ता पूँजी सात अर्ब नौ करोड रुपैंया नाघ्नेछ । राष्ट्र बैंकले तोकेको चुक्ता पुँजी आठ अर्ब पूँजी पुर्याउन चालु आर्थिक वर्षको कमाईबाट ९० करोड बढी रकम बराबरको बोनस सेयर बितरण गर्नु पर्ने हुन्छ ।