काठमाडौं, चैत २ । जलविद्युतका माध्यमबाट आर्थिक विकासमा छलाङ मार्ने घोषणा गरेका उर्जामन्त्री जनार्दन शर्मा दक्षिण कोरिया जाने भएका छन् । नेपाली श्रमिकहरुको उल्लेख्य उपस्थिति रहेको कोरियामा उर्जा विकासका लागि आवश्यक लगानीको खोजी गर्ने उद्देश्यले उर्जामन्त्री कारिया जान लागेका हुन । उर्जामन्त्री दक्षिण कोरियामा आयोजना भइरहेको “नेपालको उर्जा बिकासमा कोरियाबाट लगानी“ बिषयक कार्यक्रममा सहभागी हुने छन् । आम नेपाली जनताको लगानीबाटै अधिकांश जलविद्युत परियोजना सम्पन्न गर्न सकिने नयाँ सोच अगाडि सारेका उर्जामन्त्रीले कोरियामा कार्यरत नेपालीहरुको बचतलाई जलविद्युतका क्षेत्रमा लगानी गर्ने विषयमा छलफल गर्नेछन । कोरियास्थित नेपाली राजदुतावास र गैर आवसिय संघ दक्षिण कोरियाको संयुक्त आयोजनामा यही चैत ६ गते (मार्च १९)का दिन दक्षिण कोरियाको जुङगु कुमिन ह्वेग्वानमा कार्यक्रम हुने छ ।

काठमाडौं, चैत २ । इंग्लिश फुटबल क्लव लेष्टर सिटी युरोपियन च्याम्पियन्स लिग फुटबल प्रतियोगिताको क्वाटरफाईनलमा प्रवेश गरेको छ । गएराति भएको प्रि–क्वाटरफाईनल दोस्रो लेगको खेलमा लेष्टरले स्पेनिस क्लव सेभियालाई २–० ले हरायो । लेष्टरको जितमा वेस मोर्गान र मार्क अल्ब्राईटनले एक–एक गोल गरे । दोस्रो लेगमा हात पारेको २–० को जितपछि लेष्टस सिटी समग्रमा ३–२ ले विजयी हुँदै क्वाटरफाईनलमा पुगेको हो । पहिलो लेगको खेलमा सेभिया २–१ ले विजयी भएको थियो । पहिलो पटक च्याम्पियन्स लिग खेलिरहेको लेष्टर सिटी पहिलो सहभगितामै अन्तिम आठमा पुगेको हो । च्याम्पियन्स लिगअन्तर्गत गएराति भएको अर्को खेलमा ईटालीको युभेन्टसले पोर्चुगलको एफसी पोर्टोलाई १–० ले हरायो । खेलमा युभेन्टसलाई विजयी गराउन पाउलो डिबालाले निर्णायक गोल गरे । पहिलो लेगमा २–० ले विजयी भएको युभेन्टस गएरातिको खेलपछि समग्रमा ३–० को परिणाम निकाल्दै अन्तिम आठमा पुगेको हो । च्याम्पियन्स लिग फुटबलमा आज राति दुई खेल हुनेछन् । आज स्पेनको एथ्लेटिको मड्रिड र जर्मनीको बायर लिभरकुजेन भिड्दा फ्रान्सको मोनाकोले इंग्ल्याण्डको म्यान्चेस्टर सिटीसँग खेल्नेछ ।

बसन्तले लिए केन्याको नवौ विकेट काठमाडौं, फागुन ३० । आइसीसी विश्व क्रिकेट लीग च्याम्पियनशीप अन्तर्गत नेपालसँगको खेलमा केन्याले १५६ रनको चुनाैति पेश गरेको छ । त्रिवि क्रिकेट मैदान किर्तीपुरमा टस हारेर व्याटिङ गरिरहेको केन्याले निर्धारित ५० अोभरको खेलमा ४६ अोभर एक बलमा अलअाउट हुँदै १५५ रन मात्रै बनायो । नेपालका लागि शरद भेषवाकरले सर्वाधिक ४ विकेट लिए । पार्टटइम बलर शरद भेषावकरले ४ विकेट लिएपछि केन्याको इनिङ ध्वस्त भएको हो । उनले ७ ओभर १ बल बलिङ गर्दै २८ रन दिएर ४ विकेट लिए । खेलको चौथो ओभरमै भेट्रान अलराउण्डर मेहवुव आलमले दुई विकेट लिएर केन्याको विकेट पतन सुरुवात गरेका थिए । तर केन्याका इरफान करिम र कोलिन्स ओवायेले तेस्रो विकेटका लागि ७९ रनको ठोष शाझेदारी गरेपछि केन्याले रनरेट बढाउन सफल भयो । २७।२ ओभरमा सन्दीप लामिछानेले ओवायेलाई आउट गराएसागै केन्याको इनिङ ध्वस्त हुन सुरु भयो । ओवाये ४८ रनको व्यक्तिगत स्कोरमा आउट भएका थिए । यस्तै बसन्त रेग्मी र मेहबुब अालमले समान दुई दुई विकेट लिए । सन्दीप लामिछाने, बसन्त रेग्मी र सागर पुनले एक एक विकेट लिएका छन् । संदीलेपले बिहिबार केन्यासँगकै खेलमा दुई विकेट लिएका थिए । नेपालका अर्का बलर मेहबुब आलमले ७ ओभर बलिङ गरेर केन्याको दुई विकेट लिएका छन् । उनले पाँच ओभरमा कुनै पनि रन दिएनन् । जम्मा सात ओभरमा उनले जम्मा ११ रन मात्रै दिए ।

काठमाडौ, फागुन २९ ।  कुल मागको ६५ प्रतिशत मात्रै ग्यास आपूर्ति हुँदा राजधानीसहित देशभर खाना पकाउने ग्यास अभाव सुरु भएको छ । नेपालमा मासिक ३५ हजार मेट्रिक टन ग्यासको माग भए पनि पछिल्लो समय करिब २१ हजार मेट्रिक टनको हाराहारीमा आयात भएको छ । मागअनुसार भारतबाट ग्यास आपूर्ति हुन नसक्दा उपभोक्ता बजारमा अहिले ग्यासको अभाव बेहोर्न बाध्य भएका छन् । खाली हुनेबित्तिकै सिलिन्डर साट्दै आएका उपभोक्ताले अहिले भरिएको सिलिन्डर लिन तीनदेखि पाँच दिनसम्म कुर्नुपर्ने भएको छ । भारतको बरौनीस्थित ग्यास रिफाइनरी केन्द्र इन्डियन आयल कर्पोरेसन (आईओसी) ले मेन्टिनेन्स गर्ने नाममा १० दिनदेखि पूर्ण रूपमा बन्द गरेको छ । उक्त केन्द्र बन्द हुँदा त्यहाँबाट आउने ग्यास बुलेट आउन बन्द भएको छ । कुल ग्यासको मागमध्ये करिब ३५ प्रतिशत बरौनी रिफाइनरीबाट र बाँकी हल्दिया, पारादिप, मथुरा र कर्णालस्थित रिफाइनरीबाट आपूर्ति हुन्छ । सामान्य समयमा बरौनीबाट मासिक १४ हजार मेट्रिक टन ग्यास आपूर्ति हुन्थ्यो । ‘मेन्टिनेन्स भनेर बरौनी रिफाइनरी डिपोले १० दिनदेखि पूर्ण रूपमा ग्यासको लोड दिन बन्द गरेको छ’, नेपाल एलपी ग्यास उद्योग संघका उपाध्यक्ष गोकुल भण्डारीले भने, ‘यही बीचमा तराई मधेसको बन्द र हडतालका कारण लोड भएका बुलेट पनि विभिन्न स्थानमा रोकिएका छन् । बरौनीबाट पूर्ण रूपमा आउन बन्द र लोड भएका बुलेट पनि विभिन्न स्थानमा अलपत्र परेका कारण खाना पकाउने ग्यास उत्पादनमा निकै कमी आएको छ । यसले गर्दा बजारमा ग्यासको अभाव सुरु भएको हो ।’ नेपाल ग्यास उद्योगका कार्यकारी निर्देशकसमेत रहेका भण्डारीका अनुसार तराई मधेसमा सुरु भएको आन्दोलनका कारण उपभोक्ताले सामान्य दिनभन्दा झन्डै दोब्बर संख्यामा सिलिन्डर सञ्चय गर्न थालेपछि बजारमा ग्यास अभाव भएको हो । संघका अर्का उपाध्यक्ष कुशप्रसाद मल्लीका अनुसार सामान्य समयमा मासिक नौ हजार मेट्रिक टन ग्यास लोड दिने हल्दिया रिफाइनरीले पछिल्लो एक महिनादेखि ५० प्रतिशतको हाराहारीमा मात्रै लोड दिन थालेको छ । उक्त स्थानबाट मासिक नौ हजार मेट्रिक टन कोटा छुट्ट्याए पनि हाल करिब चार हजार मेट्रिक टन ग्यासको लोड मात्रै दिँदै आएको छ । ‘पूर्ण क्षमतामा रिफाइनरी सञ्चालन गर्न प्राविधिक समस्या आएको भन्दै हल्दिया रिफाइनरीले एक महिनादेखि कुल मागको आधी परिमाणमा मात्रै लोड दिँदै आएको छ’, उपाध्यक्ष मल्लीले भने, ‘बरौनी पूर्ण रूपमा बन्द र हल्दियाबाट आधी मात्रै ग्यास आउँदा बजारमा खाना पकाउने ग्यासको अभाव भएको हो ।’ बन्द बरौनी र हल्दियाबाट आउने कोटाअनुसारको अपुग ग्यास पारादिप, मथुरा र कर्णाल रिफाइनरीबाट उपलब्ध गराइदिन नेपाल आयल निगमलाई ध्यानाकर्षण गराएको सात दिनभन्दा बढी समय बितिसक्दा पनि निगमले आईओसीसँग आवश्यक पहल नगरिदिएको आरोप उनले लगाए । ‘बरौनी र हल्दिया रिफाइनरीबाट प्राप्त हुन नसकेको अपुग कोटा अन्य स्थानबाट प्राप्त भए बजारमा ग्यास अभाव हुँदैनथ्यो’, राजधानी ग्यास उद्योग संघका सञ्चालकसमेत रहेका मल्लीले अन्नपूर्णसँग भने, ‘यही बेला मागअनुसार नियमित आपूर्ति हुन सकेन । अर्कोतर्फ आम उपभोक्ताले बढी संख्यामा सञ्चय पनि गर्न थालेकाले बजारमा चाहेकै समयमा सिलिन्डर पाउन समस्या आएको हो ।’  यो खबर आजको अन्नपूर्ण पोस्टमा छ ।

काठमाडौं, फागुन २९ ।  कांग्रेसभित्र मधेस मोर्चामा आबद्ध दललाई सत्तासमीकरणबाट बाहिरिन नदिन दबाब बढेको छ । मधेसीलाई अलग गर्दा घोषित स्थानीय तहको निर्वाचन सुनिश्चित नहुने कांग्रेसका पदाधिकारी, पूर्वपदाधिकारी, वरिष्ठ केन्द्रीय सदस्य र तराई–मधेसका सांसदहरूले बताएका छन् । सिंहदरबारस्थित संसदीय दलको कार्यालयमा शुक्रबार बसेको कांग्रेस बैठकमा अधिकांश नेताहरूले मधेसीलाई अलग गरेर जान नहुने बताएका थिए । संशोधन विधेयक पारित गराउन कांग्रेस सक्रिय भएमा मधेसीसहित सबै दलले निर्वाचनमा भाग लिने वातावरण बन्ने उनीहरूको धारणा थियो । ‘देशलाई निकास दिन कांग्रेस, माओवादी र मधेसी मोर्चाको समीकरणमा सरकार बने पनि समयमा संविधान संशोधन नहुँदा मोर्चा थप चिढिएको विषयमा अधिकांश नेताहरूले धारणा राख्नुभयो,’ बैठकमा सहभागी कांग्रेस केन्द्रीय सदस्य फर्मुल्लाह मन्सुरले भने, ‘संविधान संशोधन भए निर्वाचनको वातावरण बन्छ र सबै दल सहभागी हुने अवस्था आउँछ भन्ने भएपछि अब कांग्रेसले सकारात्मक पहल गर्ने भन्ने भएको छ ।’ मधेसी मोर्चाले सरकारलाई समर्थन फिर्ता लिने ‘अल्टिमेटम’ दिए पनि स्थिति सहज बनाएर निर्वाचनको वातावरण बनाउन कांग्रेस अग्रसर हुने केन्द्रीय सदस्य डा. रामशरण महतले जानकारी दिए । ‘मधेसीलाई अलग गर्न हुन्न, उनीहरूको पनि कुरा सुनौँ भन्ने हाम्रो निष्कर्ष हो,’ महतले नयाँ पत्रिकासित भने, ‘संशोधन नरोकौँ, अघि बढाउँ र निर्वाचनमा जाने आधार बनाउँ भन्नेमा हामी एकमत छौँ ।’ सप्तरी घटनापछि तत्काल संविधान संशोधन र घोषित स्थानीय तहको निर्वाचन फिर्ता लिनुपर्ने भन्दै मोर्चाले सरकाराई सातदिने अल्टिमेटम दिएको थियो । तर, कांग्रेसले मुद्दाप्रति सकारात्मक रहेको भन्दै समर्थन फिर्ता नलिन मधेसी मोर्चासँग संवाद गर्ने निर्णय गरेको छ । बैठकमा नेता रामचन्द्र पौडेलले मधेसी मोर्चालाई सत्तासमीकरणबाट बाहिर जान दिन नहुने भन्दै उनले धैर्यपूर्वक अघि बढ्नुपर्ने धारणा राखेका थिए । अर्का नेता कृष्णप्रसाद सिटौलाले पार्टीको बैठक डाकेर धारणा बनाउने र संविधान संशोधनलाई टुंग्याएर निर्वाचनमा जान ढिलाइ गर्न नहुने बताएका थिए । दलहरूबीच सहमतिको वातावरण बनाएर जानुको विकल्प नभएको उनको भनाइ थियो । गृहमन्त्री विमलेन्द्र निधिले पनि संविधान संशोधनका लागि लाग्नुपर्ने बताएका थिए । ‘संशोधनका लागि पहल गर्ने र निर्वाचनको मिति तोक्ने गरी सभापति र प्रचण्डजीबीच सहमति भएको हो । अब संसाधनका लागि प्रयत्न गर्नुपर्छ,’ निधिले भने, ‘अब राप्रपाजस्तै अरू दललाई सरकारमा ल्याएर संविधान संशोधन गर्ने चुनावी माहोल बनाउनुपर्छ ।’ संशोधन गराउनतिर लाग्नुपर्छ : देउवा नेताहरूले मधेसी दलको सहभागिताविना स्थानीय निर्वाचन कठिन हुने बताएपछि कांग्रेस सभापति शेरबहादुर देउवाले संविधान संशोधन गराउने पक्षमा आफूहरू रहेको बताएका छन् । ‘संविधान संशोधन गराउनतिर लाग्नुपर्छ,’ कांग्रेस बैठकमा देउवाले भने, ‘यसका लागि मैले पहल गरिरहेको छु ।’ देउवाले बैठकस्थलबाटै तमलोपाका अध्यक्ष महन्थ ठाकुरलाई टेलिफोन गरी संवादबाट सहमति खोजेर मिलेर अघि बढ्नुपर्ने बताएका थिए । देउवाले ठाकुरलाई आइतबार दिउँसो ३ बजे छलफलका लागि बोलाएका छन् । मधेसका केन्द्रीय सदस्यको एकस्वर मधेसबाट प्रतिनिधित्व गर्ने कांग्रेसका केन्द्रीय सदस्यहरूले एकस्वरले मधेसी दलविना घोषित स्थानीय तहको निर्वाचन कठिन भएको बताएका छन् । सत्तासमीकरण बन्दा संविधान संशोधनको सहमति भएकाले त्यसबाट कांग्रेस भाग्न नहुने उनीहरूको भनाइ थियो । ‘मोर्चाले संविधान संशोधन नभए सरकारलाई दिएको समर्थन फिर्ता लिने चेतावनी दिइरहेको छ । उनीहरूको चेतावनीका बीच निर्वाचनमा जान कठिन हुन्छ भन्ने कुरा हामीले राख्यौँ,’ केन्द्रीय सदस्य रामकृष्ण यादवले भने, ‘सत्तासमीकरणबाट मधेसीलाई बाहिर जान नदिउँ, सहमतिमा ल्याउँ र संशोधन गरेर निर्वाचनमा जाउँ भन्ने हाम्रो मत छ ।’ कोषाध्यक्ष सीतादेवी यादव, नेताहरू विमलेन्द्र निधि, फर्मुल्लाह मन्सुर, आनन्दप्रसाद ढुंगाना, रामकृष्ण यादवसहितका नेताले संशोधन भएपछि तराई मधेसमा निर्वाचनको वातावरण बन्ने बताएका थिए । बैठकमा महेश आचार्यले संविधान संशोधन नगरी निर्वाचनमा जाँदा कांग्रेसलाई प्रत्युत्पादक हुने बताएका थिए । पौडेलले भने पत्रको जवाफ खोइ ? सभापतिको पार्टी सञ्चालन शैलीप्रति नेता रामचन्द्र पौडेलले शुक्रबार पनि असन्तुष्टि राखेका छन् । ‘हामी पनि सरकारमा छौँ, तर माओवादी र अरू दलका मन्त्रीको एकलौटी देखिएको छ । हाम्रै पार्टी राम्रोसँग सञ्चालन भएन, विधि, प्रक्रिया, पद्धतिमा हिँडेन,’ पौडेलले भने, ‘नियमित बैठक नबस्ने, पार्टीका संरचनालाई पूर्णता नदिने अवस्थाले पार्टी निरंकुशतातिर जान्छ । मैले चिठी लेखेर बैठक डाक्न आह्वान गरो । तर, चिठीको वास्ता किन गरिएन ?’ आफूहरूले पार्टीमा भागबन्डा नखोजेको भन्दै पौडेलले नेताको मूल्यांकनलाई सम्मान गर्न सुझाब दिए । शशांक फर्किएपछि केन्द्रीय समिति बैठक नेताहरूले निरन्तर माग गरेपछि सभापति शेरबहादुर देउवाले ३ चैतमा महामन्त्री डा. शशांक कोइराला युरोपबाट फर्किएपछि केन्द्रीय समिति बैठक आह्वान गर्ने जानकारी दिएका छन् । पार्टी बैठकमा संविधान संशोेधन, स्थानीय तहको निर्वाचन, सप्तरी र कञ्चनपुर घटना, पार्टीका संरचनालाई पूर्णता दिने विषयमा छलफल गराउने तयारी देउवाको छ । कांग्रेस पदाधिकारी, पूर्वपदाधिकारी र वरिष्ठ नेताहरूको अर्को बैठक १ चैतमा पुनः बस्ने भएको छ । सप्तरी र कञ्चनपुर घटना दुःखदायी सप्तरीको राजविराज र कञ्चनपुर घटनाको विषय नेताहरूले उठाएपछि सभापति शेरबहादुर देउवाले दुवै घटना दुःखद भनेका छन् । ‘यस्तो घटना नघट्नुपथ्र्यो । हामी स्तब्ध भएका छौँ,’ देउवाले भने, ‘अब घटनालाई सहज अवस्थातिर फर्काउन लाग्नुपर्छ ।’ गृहमन्त्री विमलेन्द्र निधिले भारत सरकारसँग कूटनीतिक कुराकानी गर्दै विरोध जनाएकोे बताएका थिए । केन्द्रीय सदस्य डा. रामशरण महतले कञ्चनपुर घटनामा भारतले माफी माग्नुपर्ने माग गरेका थिए । यो खबर आजको नयाँ पत्रिकामा छ ।

काठमाडौँ, फागुन २८ । विश्व क्रिकेट लिग च्याम्पियनसीपको केन्यासँगको खेलमा नेपाल पाँच विकेटले पराजित भएको छ । डिएल मेथडअनुसार केन्याले ९३ रनको लक्ष्य २४.१ ओभरमा ५ विकेट गुमाएर भेट्टाएको हो । बर्षाका कारण खेल प्रभावित भएपछि डिएल मेथडअनुसार केन्याले २९ ओभरमा १०४ रनको लक्ष्य पाएको थियो । फेरि बीचमा वर्षा भएपछि अब केन्याले २६ ओभरमा ९३ रन बनाउनुपर्ने थियो । केन्याका लागि कप्तान रकिप पटेलले सर्वाधिक ३४ रन बनाए । इर्फान करिमले कोलिन्स ओबुयाले २४ रन बनाए । वर्षाका कारण खेल ३६ ओभरमा पुग्दा रोकिएको थियो । टस हारेर ब्याटिङको निम्तो पाएको नेपालले ३६ ओभरमा पुरा ८ विकेट गुमाएर ११२ रन बनाएको थियो । तर, वर्षाका कारण लक्ष्य नयाँ लक्ष्य दिइएको थियो । वर्षाका कारण ३८ ओभरमा खेलाइएको खेलको पहिलो पारीमा नेपाली ब्याट्सम्यानले फितलो प्रदर्शन गरे । केन्याका बलरहरुले ओसिलो मैदानमा घरेलु टोलीलाई खुलेर खेल्न दिएनन् । अस्वस्थताका कारण कप्तान पारस खड्का नखेलेपछि आज ज्ञानेन्द्र मल्लले नेपालको कप्तानी सम्हालेका थिए । खेलमा ज्ञानेन्द्रले सर्वाधिक २७ रन बनाए । आजबाट राष्ट्रिय टिममा डेब्यू गरेका दिपेन्द्रसिंह ऐरीले १९ रन बनाए । ओपनर सुनिल धमला ३ रन मात्र बनाएर पेभिलियन फर्किए । सागर पुन १० रनमा आउट भए । शरद भेषावकरले पनि ३ रन मात्रै बनाउन सके । विनोद भण्डारी ४ रन बनाएर फर्किँदा मेहेबुब आलमले २ रन मात्रै जोडे । बसन्त रेग्मी ६ रनमा समेटिए । शक्ति गौचन र सोमपाल कामीले नवौं विकेटका लागि अविजित ३० रनको साझेदारी गरेका छन् । यो नेपालको इनिङमा सबैभन्दा धेरै रनको साझेदारी हो । पहिलो विकेटका लागि ज्ञानेन्द्र मल्ल र सुनिल धमलाले २१ रनको साझेदारी गरेका थिए । केन्याका लागि सेम नोङ्चे नेपालको ३ विकेट झारे । नेल्शन ओडिएम्बोले २ विकेट लिए । नेहिएम ओडिएम्बो, एलिज एन्टेनिओ र रकेप पटेलले एक(एक विकेट लिए ।

काठमाडौं, फागुन २८ । आइसीसी वल्र्ड क्रिकेट लीग च्याम्पियनशीपमा केन्या र नेपाल बीच भइरकेको खेलमा फेरि पानी परेर खेल अवरुद्ध भएको छ । त्रिवि क्रिकेट मैदान कीर्तीपुरमा भइरहेको नेपाल र केन्याबीचको खेलको २१ ओभर जारी हुँदा पानी परेर रोकिएको हो । वर्षाकै कारण डकवर्थ लुइस नियममा २९ ओभरमा छोट्याइएको खेलमा १०४ रनको नयाँ लक्ष्य पछ्याएको केन्या २१ ओभर दुई बलमा पाँच विकेट गुमाएर ८० रन बनाएर खेलिरहेको छ । अब उसलाई जीतिका लागि ८ ओभर चार बलमा २४ रन आवश्यक छ ।

पर्वत, फागुन २८ । पर्वत कुर्घा–२ का त्रिलोचन शर्मा पौडेलको परिवारका चार सदस्यको मिर्गौला फेल भएको छ । प्रत्यारोपण गरेका तथा प्रत्यारोपणमा सहयोग गरेका कारण यो परिवारका सबै सदस्यसँग एउटा मात्रै मिर्गौला छ । मिर्गौला फेल भएर समयमा उपचार हुन नसक्दा जेठो छोरा प्रकाश पौडेलको ज्यान गइसकेको छ भने छोरी र छोराको मिर्गौला प्रत्यारोपण गरिएको छ । पछिल्लो समय श्रीमतीको पनि मिर्गौला फेल भएको छ । ‘रोगलाई मानिसको सबैभन्दा ठूलो शत्रु मानेर नै होला, शत्रु लागे पनि रोग नलागोस् भनेर कामना गरिन्छ, तर मेरो परिवारका लागि रोग नै सबैभन्दा ठूलो शत्रु बन्यो,’ शर्माले भने, ‘परिवारका सबै सदस्य मिर्गौला रोगबाट पीडित हुँदा घरबास उठ्यो,’ त्रिलोचनकी श्रीमती प्रेमकला पौडेलको अहिले डायलोसिस भइरहेको छ । ‘डायलोसिसबाट सधैँ बस्न सकिँदैन,’ त्रिलोचनले भने, ‘सहयोग पाएमा छिटै प्रत्यारोपण गर्ने योजनामा छु, आफूसँग प्रत्यारोपण गर्ने धन छैन ।’ माइली छोरी र कान्छो छोराको मिर्गौला प्रत्यारोपण गरे पनि संक्रमण हुने र नियमित रूपमा औषधि खानुपर्ने समस्या छ । जेठो छोरा प्रकाशको ०६३ मा २६ वर्षको उमेरमा मिर्गौला फेलकै कारण भारतको मुम्बईमा निधन भएको थियो । उनले मिर्गौला खराब भएको थाहा नपाएका कारण ज्यान गुमाउनुपरेको बाबु त्रिलोचनले बताए । कान्छो छोरा दीपकको २३ वर्षको उमेरमा मिर्गौला प्रत्यारोपण गरिएको छ । उनलाई ठूलो दिदी शारदा शर्माले मिर्गौला दिएपछि प्रत्यारोपण गरिएको उनले बताए । अहिले नियमित रूपमा औषधि खाँदा महिनामा २० हजारजति खर्च लाग्ने दीपकले बताए । ‘मिर्गौला फेरेर मात्रै भएन, नियमित औषधि सेवन गर्नसमेत कठिनाइ भएको छ,’ माहिली छोरी श्यामलाको पनि दुवै मिर्गौला फेल भएपछि बाबु त्रिलोचनले एउटा मिर्गौला दिएका छन् । ‘छोरीको पनि मिर्गौला फेल भएपछि मैले एउटा दिएर बचाएको छु,’ बाबु त्रिलोचनले भने । शारदा र श्यामलाको बिहे भइसकेको छ । गत फागुनदेखि श्रीमती प्रेमकुमारीको समेत दुवै मिर्गौलाले काम गर्न छाडेपछि परिवारमा पीडामाथि पीडा थपिएको उनले गुनासो गरे । कान्छी छोरी कमला मात्रै अहिलेसम्म मिर्गौलाको रोगबाट बचेको उनले बताए । कमला र दीपकको सामान्य जागिरका भरमा बिहान–बेलुकाको छाक टार्दै आएको यो परिवारले उपचारका लागि मात्रै अहिलेसम्म डेढ करोडभन्दा बढी खर्च गरिसकेको छ । अहिले दीपक र प्रेमकलाको डायलोसिसको खर्च मात्रै मासिक २० हजार खर्च हुन्छ । ‘मासिक रूपमा औषधि खुवाउनसमेत कठिन छ,’ उनले भने । भारतको मुम्बईमा काम गरी परिवारको खर्च टार्दै आएका उनी एकाएक परिवारमा मिर्गौला रोगको पीडा थपिएपछि निकै मर्माहत भएका छन् । ‘ऋणधन र जग्गा–जमिन बेचेर तत्कालीन खर्च टारे पनि अहिले आर्थिक संकटमा परेको छु,’ उनले भने, ‘मासिक रूपमा हुने उपचार खर्च कसरी ल्याउनु ?’ कान्छा छोरा दीपकको मिर्गौला प्रत्यारोपण गरे पनि समस्या देखिएपछि भारतबाट महँगो मूल्यमा औषधि मगाएर नियमित सेवन गरिरहेका छन् । कान्छी छोरी कमलाबाहेक सबैजना एकपछि अर्को गरी यही अंगको खराबीले थलिँदै गएको त्रिलोचनले बताए । ‘अब परिवारमा कान्छी छोरी कमला मात्रै स्वस्थ छिन्,’ उनले भने । यो खबर आजजको नयाँ पत्रिका दैनिकमा छ ।

काठमाडौं, फागुन २७ । नेपाल आयल निगमले खाना पकाउने एलपी ग्यासको मूल्य वृद्धी गरेको छ । गत माघ १९ गते मात्रै निगमले एलपी ग्यासको मूल्य वृद्धि गरेको थियो । पुनः आज राती १२ बजेबाट लागु हुनेगरी ग्यासको मूल्य प्रतिसिलिन्डर २५ रुपैयाँ बढाउने निर्णय गरेको निगमले जनाएको छ । नयाँ मूल्यअनुसार प्रतिसिलिन्डर ग्यासको मूल्य १३ सय ७५ रुपैयाँ पर्ने भएको छ । यसअघि, ग्यासको मूल्य प्रतिसिलिन्डर १३ सय ५० रुपैयाँ रहेको थियो । भारतीय आयल कर्पोरेसनले पठाएको मूल्यअनुसार निगमलाई ग्यासमा घाटा धेरै भएको भन्दै मूल्य बढाएको दाबी गरिएको छ ।

काठमाडौं, फागुन २३ । सशस्त्र प्रहरी बलमा विवादास्पद सशस्त्र प्रहरी नियमावली २०७२ लाई लिएर भएको विवादले अहिले चर्को रुप लिएको छ । पछिल्लो समय गृह मन्त्रालयले तीन अतिरिक्त महानिरिक्षक (एआर्ईजी) र ६ जना वरिष्ठ उपरीक्षक (एसएसपी) का लागि बढुवा प्रक्रिया थालेपछि सशस्त्र प्रहरी बलभित्रको विवाद सतहमा देखिएको छ । संगठनभित्र कुनै छलफलविनै तत्कालिन महानिरीक्षक (आईजीपी) कोषराज वन्तले आफुनिकटका केही अधिकृतलाई बुढवा प्रयोजनमा सहज हुने गरी ल्याएको सो नियमावलीमा प्रशस्त त्रुटि देखिएको भन्दै सशस्त्रका कैयोै अधिकारीहरु तत्काल नियमावली संशोधनको पक्षमा खुलेर लागेका छन् । नियमावली संशोधन नभए यसले संगठनलाई दुरगामी असर पार्ने र सशस्त्र द्वन्द्व चरम विन्दुमा पुगेका वेला नेपाली सेना र प्रहरीबाट सशस्त्र प्रहरीबलमा स्थानान्तरण भई आएका अधिकारीहरुको वृतिविकासमा गम्भीर असर पार्ने आंशकाले बढुवाका आकांक्षीहरु गृह मन्त्रालयलगायएतका शक्ति केन्द्र धाउन थालेका छन्। यो खबर आजको राजधानी दैनिकमा छ ।

डडेल्धुरा, फागुन २२ । डडेल्धुराका अधिकांश ग्रामीण सडक सडकको मापदण्ड विपरीत निर्माण भएका छन् । पहुँचका आधारमा निर्माण हुने गरेका कारण जिल्लाका अधिकांश ग्रामीण सडक मापदण्ड विपरीत निर्माण भएका हुन् । डुङग्री–देवल, वगरकोट–शिराड–रुपाल, वगरकोट–भद्रपुर, वगरकोट–चिपुरलगायत दुई दर्जन ग्रामीण सडक सडकको मापदण्ड विपरीत निर्माण भएका छन् । यातायात सञ्चालनका लागि जुन मापदण्डअनुसार सडक निर्माण हुनुपर्ने हो सो अनुसारका नभएको जिल्लामा सडक निर्माण गरिरहेको डिभिजन सडक कार्यालय कुलपाते डोटीका इन्जिनियर महानन्द जोशीले बताउनुभयो । उपभोक्ता समितिका पदाधिकारीले आफ्नो मनोमानीअनुसार डोजर प्रयोग गरेर सडक निर्माण गर्ने गरेका कारण यातायात सञ्चालनको मापदण्डअनुसार सडक निर्माण नभएका हुन्् । जिविसदेखि संसद् विकास कोषको रकमबाट निर्माण भएका बढी जसो सडक मापदण्ड अर्थात् ग्रेड नमिलाई निर्माण हुने गरेका छन् । प्राविधिकको परामर्शसमेत नलिई आफ्नो मनोमानीअनुसार डोजर प्रयोग गरेर सडक निर्माण गर्ने गरिएको छ । अधिकांश ग्रामीण सडकमा ज्यान जोखिममा राखेर यातायात सञ्चालन गर्नु परेको चालकको भनाइ छ । राजनीतिक दबाबले आफ्नो पायक पर्ने स्थानमा सडक निर्माण गर्ने प्रवृत्तिका कारण पनि ग्रामीण सडक मापदण्डअनुसार निर्माण हुन नसकिरहेका स्थानीयवासीको भनाइ छ । डडेल्धुरा जिल्लाका १८ गाविस र दुई नगरपालिकामा करिब तीन दर्जन ग्रामीण सडक रहेका छन् । रासस

ललितपुर, फागुन १८ । पुल्चोक इन्जिनियरिङ क्याम्पसमा भएको स्ववियु निर्वाचनमा अखिल क्रान्तिकारी विजयी भएको छ । निर्वाचनको सभापतिमा माओवादी केन्द्र निकट क्रान्तिकारीका रोशन थापामगर निर्वाचित भएका हुन् । सभापती थापामगरले अनेरास्ववियुका सुदीप चालिसेलाई ६२ मतले हराएका छन् । थापामगरको पक्षमा ६९७ र चालिसेको पक्षमा ४३५ मत परेको छ । सचिवमा अनेरास्ववियुका ओम अधिकारीले ६३४ मत ल्याएर अखिल क्रान्तिकारीका प्रशान्त दाहाललाई हराएका छन् । कोषाध्यक्षमा प्रतिक न्यौपानेले ५४४ मत ल्याएर निर्वाचित भएका छन् । त्यसैगरी कोषाध्यक्षमा अनेरास्ववियुका प्रतिक न्यौपाने ६४७ मत ल्याएर विजयी भएका छन् । सात सदस्यहरुमा अदिती गजुरेल (अखिल क्रान्तिकारी), नविन न्यौपाने (अखिल क्रान्तिकारी), अस्मिता महरा (अखिल क्रान्तिकारी), सिर्जना भुसाल (अनेरास्ववियु), अर्जुन खतिवडा (अनेरास्ववियु), रमेश जोशी (अनेरास्ववियु), दिपक सापकोटा (नेविसंघ) निर्वाचित भएका छन् ।

मेलम्ची, फागुन १८ गते । नेपाल पत्रकार महासङ्घ सिन्धुपाल्चोक शाखाको दशौँ अधिवेशन हिजो राति अबेर सम्पन्न भएको छ । अधिवेशनमा भएको निर्वाचनमा सभापति पदमा महेश श्रेष्ठ ६० मत प्राप्त गरी विजयी हुनुभएको छ । उहाँले सभापतिका प्रतिस्पर्धी युवराज पुरीलाई एक मत अन्तरले मात्र पराजित गर्नुभएको थियो । त्यसैगरी, खुला उपाध्यक्षमा ज्ञानेन्द्र तिमल्सिना ७१ मत, महिला उपाध्यक्षमा दुर्गा आचार्य ६५, सचिवमा दिनेश थापा ६५, खुला सहसचिवमा किशोर बुढाथोकी ७२, समावेशी सहसचिवमा केदार माझी ६८, खुला कोषाध्यक्षमा विदुर गिरी ६१ मतसहित निर्वाचित हुनु भएको छ । यस्तै, खुला सदस्यतर्फ आदित्य दाहाल ६०, सुरेश बुढाथोकी ६८, सुन्दर शिरिष ६१ तथा समावेशी सदस्यतर्फ सिर्जना बराल निर्विरोध, जनजातितर्फ नेत्र तामाङ ५७, महिला सदस्यतर्फ कमला तामाङ ५४ मतसहित निर्वाचित हुनु भएको जिल्ला निर्वाचन अधिकृत अमित घिमिरेले जानकारी दिनुभयो । रासस

काठमाडौं, फागुन १७ ।  पटक–पटक भएको वार्ता र छलफलमा पनि असन्तुष्ट विद्यार्थीले क्याम्पसहरुमा लगाएको ताला खुलाउन नसकेपछि त्रिभुवन विश्वविद्यालयले ६० वटा आंगिक क्याम्पसमध्ये २२ वटा आंगिक क्याम्पसमा मात्र स्ववियु चुनाव गर्ने भएको खबर आजको अन्नपूर्ण पोष्टमा छ । कुन कुन क्याम्पसमा हुँदैछ चुनाव ? उपत्यकामा १.भक्तपुर वहुमुखी क्याम्पस, भक्तपुर २.सानोठिमी क्याम्पस, भक्तपुर ३.पूल्चोक इन्जिनियरिङ क्याम्पस, पूल्चोक ४.थापाथली ईन्जिनिरिङ क्याम्पस, थापाथली ५.नर्सिङ क्याम्पस , महाराजगञ्ज ६.महाराजगञ्ज चिकित्शा क्याम्पस ७.आयुर्वेद क्याम्पस कीर्तिपुर ८.ललितकला क्याम्पस उपत्यकावाहिर १.मेची वहुमुखी क्याम्पस झापा २.तेह्रथुम क्याम्पस तेह्रथुम ३.महेन्द्र वहुमुखी क्याम्पस धरान ४.केन्द्रीय प्रविधि क्याम्पस धरान ५.पूर्वाञ्चल ईन्जिनियरिङ क्याम्पस धरान ६.नर्सिङ क्याम्पस विरगञ्ज ७.भोजपुर वहुमुखी क्याम्पस भोजपुर ८.पश्चिमाञ्चल ईन्जिनियरिङ क्याम्पस पोखरा ९.नर्सिङ क्याम्पस पोखरा १०.वन क्यामपस पोखरा ११.धौलागिरी क्यामपस वागलुण् १२.डोटी क्याम्पस डोटी १३.डडेल्धुरा शिक्षा क्याम्पस, डडेल्धुरा १४.सुर्खेत शिक्षा क्याम्पस, सुर्खेत

काठमाडौ, फागुन १७ ।  द्वन्द्वकालीन घटनाका उजुरीमा छानबिनका लागि गठित सत्य निरूपण तथा मेलमिलाप आयोगका अध्यक्ष सूर्यकिरण गुरुङसहित बहुमत पदाधिकारी संस्थाभित्रकै द्वन्द्वका कारण राजीनामा दिने मनस्थितिमा पुगेको दाबी संस्थाकै सदस्यले गरेका छन् । पदाधिकारीले राजीनामा दिए आयोगमा परेका झन्डै ६० हजार उजुरीको भविष्य संकटमा पर्ने देखिएको छ । अध्यक्ष गुरुङ राजीनामा दिने भन्दै फागुन १ गतेदेखि कार्यालय नै गएका छैनन् । आयोग बैठक, छानबिन शैली, कार्यविधिलगायत विषयमा आयोग सदस्य डा. माधवी भट्टसँग बारम्बार मतभेद उत्पन्न भएपछि गुरुङ दुई सातादेखि कार्यालय नगएका हुन् । उनी मोबाइल स्विचअफ गरेर बेखबर छन् । ‘अध्यक्ष एक साताअघि नै राजीनामा गर्ने मानसिकतामा पुग्नुभएको हो । छोड्छु भन्ने मनस्थितिमा हुनुहुन्छ । अवस्था अलि असहज छ’, सदस्य लीला उदासीले भने, ‘उहाँले छाडेपछि ज्येष्ठताका कारण मैले बैठक सञ्चालन गर्नुपर्ने हुन्छ । त्यसो गर्न मलाई गाह्रो हुन्छ । त्यसपछि मैले पनि रहने कि नरहने भनेर सोच्नुपर्ने हुन्छ ।’ द्वन्द्वकालीन घटना छानबिन गरी दोषीलाई कारबाही र पीडितलाई क्षतिपूर्ति सिफारिस गर्न सरकारले दुई वर्षअघि गुरुङको अध्यक्षतामा पाँच सदस्यीय आयोग गठन गरेको थियो । कुनै छानबिनबिनै दुई वर्ष सकिएपछि माघ २७ गते मात्रै मन्त्रिपरिषद्ले थप एक वर्ष म्याद बढाउने निर्णय गरेको थियो । उदासीले अध्यक्ष गुरुङले जति काम आफूले गर्न नसक्ने भएकाले अप्ठ्यारो अवस्था आउनसक्ने बताए । ‘६० हजार उजुरी छानबिन गर्न त यसै पनि समयले पुग्दैन । यो कुरा हामीले सरकारलाई म्याद थप गर्दै भनेका छौं’, उनले भने, ‘अब कि स्थिति सहज बनाउनुपर्‍यो कि त अर्को टिम ल्याउनुपर्‍यो । निकास सरल छैन ।’ उनले जटिल अवस्था आउनुपूर्व दलका नेता र सरकारले गम्भीर भएर सोच्नुपर्ने बताए । गुरुङसँगै सदस्यहरू उदासी र श्रीकृष्ण सुवेदी पदत्याग गर्ने मनस्थितिमा छन् । तीनजनाको राजीनामापछि आयोग अल्पमतमा पर्ने भएकाले वैधानिक हैसियत गुमाउनेछ । स्रोतका अनुसार अध्यक्ष गुरुङ र भट्ट सँगै रहेर काम गर्नसक्ने वातावरण नभएकाले भट्टलाई हटाएमा गुरुङले राजीनामाको मनस्थिति बदल्न सक्छन् । तर कांग्रेस कोटाबाट सदस्य बनेकी भट्टलाई हटाउने विषयमा पार्टी सभापति शेरबहादुर देउवा तयार नभएपछि अध्यक्षसहितका पदाधिकारी राजीनामाको मनस्थितिमा पुगेका हुन् । केही दिनअघि अध्यक्ष गुरुङले प्रधानमन्त्री पुष्पकमल दाहालसँग भेटेर भट्टलाई हटाउन आग्रह गर्दै ‘नत्र आफूले काम गर्नसक्ने अवस्था नरहेको’ जानकारी गराएका थिए । छानबिनबिना कुनै पनि सदस्यलाई हटाउन नमिल्ने कानुनी व्यवस्था छ । प्रधानमन्त्रीका प्रमुख कानुनी सल्लाहकार महान्यायाधिवक्ता रमनकुमार श्रेष्ठले राजीनामाको अवस्था आउन नदिन उच्चस्तरमा पहल भइरहेको बताए । ‘समाधान खोज्न गम्भीर पहल भइरहेको छ । जनशक्ति, बजेट र ऐन संशोधनको कुरो पनि मिल्छ’, श्रेष्ठले भने, ‘माथिल्लै तहमा कुरा भइरहेको छ ।’ आयोगमा पीडितका तर्फबाट ५८ हजार ५२ उजुरी दर्ता भएका छन् । म्याद समाप्त भएपछि पनि पीडितबाट झन्डै एक हजार थप उजुरी परेका छन् । यसैबीच म्याद थपेको लामो समय बित्दासमेत आयोगमा छानबिनका लागि कुनै प्रगति नभएको भन्दै अध्यक्ष गुरुङलाई हटाउन माग राखेर द्वन्द्वपीडितले सर्वोच्चमा रिट निवेदनसमेत पेस गरेका छन् । रामेछापका कल्याण बुढाथोकीले रिट दिएका हुन् । ‘यति महत्ववपूर्ण समयमा यतिका दिनसम्म मोबाइल स्विचअफ गरेर घर बस्ने कुरा राम्रो होइन । यस्तो जटिल विषय छ । कि छाड्नुपर्‍यो कि त अफिस फर्केर काम गर्नुपर्‍यो’, द्वन्द्वपीडित सुमन अधिकारीले भने, ‘उजुरीमा त जो आए पनि केही नहुने देखियो । सत्य पत्ता लगाउने कुरा र दोषीलाई कारबाही गर्ने कुरा नहुने भयो ।’ यता आयोग सदस्य भट्टले भने बैठक माग गर्दै अघिल्लो साता संसद्को सामाजिक न्याय तथा मावअधिकार समितिमा निवेदन दिएकी छन् । यो खबर आजको अन्नपूर्ण पोष्टमा छ ।