काठमाडौँ, १४ फागुन । घरेलु उद्योगको विकास, विस्तार र प्रवद्र्धनका लागि घरेलु तथा साना उद्योग विकास समितिले नेपाल हस्तकला महासङ्घ, व्यापार तथा निकासी प्रवद्र्धन केन्द्र र उद्यमीसँग संयुक्तरुपमा छलफल गरेको छ । समितिले २८ औँ राष्ट्रिय वस्तु तथा प्रविधि प्रदर्शनीको अवसरमा आज यहाँ आयोजना गरेको ‘हस्तकला उद्योगका समस्या, चुनौती र समाधानका उपाय’ विषयमा ती संस्था र उद्यमीसंग छलफल गरेको हो । कार्यक्रममा महासङ्घका अध्यक्ष धर्मराज शाक्यले घरेलु उद्योगको विकासका लागि महासङ्घ सदैव लागिरहेको बताउँदै । “घरेलु उद्योगबाट हातले उत्पादन गरेका वस्तुलाई विदेशसम्म पु¥याउन महासङ्घले महत्वपूर्ण भूमिका खेलेको छ भन्नुभयो ।” केन्द्रका कार्यकारी निर्देशक ईश्वरीप्रसाद घिमिरेले घरेलु क्षेत्रमा उत्पादित वस्तुलाई अन्तर्राष्ट्रियस्तरसम्म पु¥याउनका लागि केन्द्रले महत्वपूर्ण भूमिका खेल्दै आएको चर्चा गर्दै निर्यात प्रवद्र्धनमा सहयोग पुग्ने उद्देश्यले विभिन्न जिल्लामा मेला आयोजना गरेको स्पष्ट पार्नुभयो । समितिका निमित्त कार्यकारी निर्देशक रमेशचन्द्र उपाध्यायले उद्योग क्षेत्रलाई सरकारले प्राथमिकता दिनुपर्ने उल्लेख गर्दै “घरेलु उद्योगले स्वदेशमै रोजगारी दिने भएकाले विदेशिने जनशक्ति रोकिन सहयोग पुग्छ भन्नुभयो ।” उहाँले व्यवसायीले उठाएका कुरालाई समाधान गर्न समिति कटिवद्ध भएर लाग्ने विश्वास पनि व्यक्त गर्नुभयो । छलफलमा विभिन्न जिल्लाका ४२ उद्यमीको सहभागिता रहेको थियो । रासस

बनेपा, फागुन १४ । धुलिखेल क्याम्पस र पनौती इन्द्रेश्वर क्याम्पसमा आज मतदानका लागि स्ववियुको उम्मेदवारी दर्ता स्थगन भएको छ । विद्यार्थी भर्नाको विषयलाई लिएर विवाद भएपछि माओवादी केन्द्र निकट अखिल क्रान्तिकारी र कांग्रेस निकट नेपाल विद्यार्थी सङ्घले स्ववियु निर्वाचन कार्यालयमा तालाबन्दी गरेपछि उम्मेदवारी दर्ता स्थगित भएको धुलिखेल क्याम्पस स्ववियु निर्वाचन आयुक्त दीपक गौतमले जानकारी दिए । पनौतीस्थित इन्द्रेश्वर क्याम्पसमा पनि विद्यार्थी भर्नाको विषयलाई लिएर उम्मेदवारी दर्ता स्थगित भएको छ । यस्तै काभ्रेपलान्चोकका त्रिभुवन विश्व विद्यालयबाट सम्बन्धन प्राप्त अन्य चौधवटा विभिन्न क्याम्पसमा उम्मेदवारी दर्ता भएको जिल्ला प्रहरी कार्यालय धुलिखेलले जनाएको छ । हरेक दुई वर्षमा हुने स्ववियु निर्वाचन यसपटक आठ वर्षमा हुँदैछ । यसपटक स्ववियु निर्वाचनकै इतिहासमा २८ वर्षको उमेर हद र मिश्रीत चुनाव प्रणाली अवलम्बन गरिने बताइएको छ ।

पोखरा, फागुन १४ । पोखरामा फेरि पंक्षीमा लाग्ने बर्डफ्लु रोग देखा परेको छ। पोखरा उपमहानगरपालिका–१८, खाल्टेमसिनाकी मीना परियारले पालेका हाँस धमाधम मर्न थालेपछि परीक्षण गर्दा बर्डफ्लु देखिएको पशुसेवा कार्यालय कास्कीले बताएको छ भन्दै नागरिक न्युजले लेखेको छ । पशुसेवा कार्यालयका पशु चिकित्सक ठगेन्द्रप्रसाद अर्यालका अनुसार फागुन ६ गते परियारले पालेको हाँस मरेपछि बर्डफ्लुको आशंकामा परीक्षण गरिएको थियो। परियारले २० वटा हाँस र ११ वटा स्थानीय कुृखुरा पाल्न थालेकी थिइन्। हाँस मरेपछि बर्डफ्लुको आशंकामा परीक्षण गर्दा एचफाईभ एनवान नामक भाइरस भेटिएको अर्यालले बताए। ‘परीक्षणका क्रममा बर्डफ्लुको पुष्टि भएको हो। संक्रमित क्षेत्रमा धमाधम हाँस र कुखुरा मार्न थालिएको छ,’ उनले भने, ‘प्रभावित क्षेत्रमा चारकिल्ला तोकेर नियन्त्रण सुरु गरिएको छ।’ उनका अनुसार सुरुमा क्षेत्रीय पशुरोग अन्वेषण प्रयोगशाला र दोश्रोपटक केन्द्रीय प्रयोगशालामा नमुना परीक्षण गर्दा बर्डफ्लु पुष्टि भएको थियो। ‘संक्रमण थप फैलिन नदिनका लागि पुरै सचेत बनेका छौं। संक्रमित क्षेत्रमा पंक्षी तथा पंक्षीजन्य बस्तुको ओसारपसारमा रोक लगाइएको छ,’ उनले भने। उनका अनुसार रोग नियन्त्रणका लागि केन्द्रबाट डा. अवधेश झा नेतृत्वमा प्राविधिक टोली खटिएको छ। ‘केन्द्र र स्थानीय तहको र्‍यापिड रेस्क्यु टिम खटिएको छ। रोग नियन्त्रणमा पुरै लागिपरेका छौं,’ उनले भने। अर्यालले खाल्टेमसिना क्षेत्रका सबै घरका हाँसकुखुरा नष्ट गरिने बताए। ‘घरमा जे–जति पंक्षी र पंक्षीजन्य बस्तु भेटिन्छन्, ती सबैलाई नष्ट गर्छौ,’ अर्यालले भने, ‘टोललाई नै पुरै नियन्त्रणमा लिन नसके फेरि फैलने जोखिम हुन्छ।’ खाल्टेमसिना क्षेत्रका करिब ८० घरमा हाँसकुखुरा पालेको उनको अनुमान छ।

रत्ननगर (चितवन),  फागुन १४। चितवनको भरतपुरस्थित बाइपास रोडमा मोटरसाइकलको ठक्करबाट एकजना पैदल यात्रीको मृत्यु भएको छ । गएराति भरतपुरको आँपटारीबाट बाइपास रोड हुँदै केन्द्रीय बसपार्कतर्फ जाँदै गरेको ना २५ प ३८३९ नम्बरको मोटरसाइकलले भरतपुर–११ को बौद्धगुम्बा अगाडि पैदलयात्रीलाई ठक्कर दिँदा सो दुर्घटना भएको हो । राति करिब ९ः३० बजेको समयमा मोटरसाइकलको ठक्करबाट गम्भीर घाइते भएका भरतपुर–११ बसेनीका ५४ वर्षीय वीरबहादुर विकको भरतपुर मेडिकल कलेजमा उपचारका क्रममा राति नै मृत्यु भएको प्रहरीले जनाएको छ । दुर्घटनामा परी मोटरसाइकल चालक भरतपुर–१० का २० वर्षीय नरेन्द्र थापा र पछाडि बस्ने धादिङका १९ वर्षीय विक्रम तामाङ घाइते भएका छन् । उनीहरुको सोही मेडिकल कलेजमा उपचार भइरहेको छ । थापाको अवस्था भने गम्भीर रहेको प्रहरीले जनाएको छ । रासस

काठमाडौं, फागुन १४ । चिनियाँ राजदूत यु होङले सिन्धुपाल्चोकको तातोपानी नाका चाँडै सञ्चालनमा आउने बताएकी छन् । ‘म केही दिनअघि दूतावासका कर्मचारीसहित तातोपानी नाका भ्रमणमा गएकी थिएँ, भूकम्पका कारण बन्द भएको नाका चाँडै सुचारु हुनेछ भन्ने मलाई विश्वास छ,’ राजदूत होङले भनिन्, ‘यसमा दुवै पक्ष निरन्तर सक्रिय हुनुपर्छ ।’ उनले नेपाल र चीनबीच ३० परम्परागत व्यापारिक नाका रहेको र यसमार्फत दुवै देशले व्यापार प्रवद्र्धन गर्नुपर्ने बताइन् । ‘नेपालको सिमानानजिकै हामीले राजमार्ग र सुक्खा बन्दरगाहहरू बनाइरहेका छौँ,’ उनले भनिन् । यो खबर आजको नयाँ पत्रिकामा  छ ।

काठमाडौं, फागुन १४। प्रतीतपत्र घोटाला (विदेशी विनिमय कसुर) मा काठमाडौं जिल्ला अदालतले २०५९ सालमा सरस्वती रन्जितलाई एक वर्ष कैद र चार करोड १६ लाख ४२ हजार रुपैयाँ जरिबाना गर्‍यो । फैसलाको ११ वर्षपछि उनी काठमाडौंको टेकुबाट पक्राउ परिन् । कैद सजाय भोगिसकेपछि पनि उनी जेलमै छिन् । केन्द्रीय कारागार सुुन्धारामा रहेकी रन्जित जरिबानाबापतको कैद सजाय भोगिरहेकी छन् । अब बढीमा दुुई वर्षभित्र जेलमुुक्त हुुनेछिन् । काठमाडौंको जैसीदेवलकी रन्जित भक्तपुुरमा खोलिएको बैजन्ती इन्टरप्राइजेजकी सञ्चालक हुन् । विदेशी विनिमय कसुुरमै काठमाडौं जिल्ला अदालतले २०६७ सालमा फैसला गर्दै दोलखाका भीमबहादुर  तामाङलाई एक करोड ११ लाख ६ हजार पाँच सय रुपैयाँ जरिबाना गर्‍यो । काठमाडौंको कपनमा जैतुुन इम्पेक्स सञ्चालन गरेका तामाङ अदालतले फैसला गरेको तीन वर्षपछि कपनबाटै पक्राउ परे । उनले जरिबाना तिरेनन् । अहिले केन्द्रीय कारागार सुुन्धारामा छन्। अब बढीमा एक वर्षभित्र उनी जेलमुुक्त हुुनेछन् । उनले राष्ट्रिय वाणिज्य बैंकको बानेश्वर शाखामा कम्प्युुटर पाट्स आयात गर्न खोलेको प्रतीतपत्रमार्फत झूटो विवरण पेस गरी अमेरिकी डलर अपचलन गरेका थिए । यसैगरी विदेशी विनिमय, भ्रष्टाचार र सरकारी छाप दस्तखत किर्ते अभियोगमा एक वर्ष कैद र करिब ३१ करोड जरिबाना सजाय पाएका काठमाडौंका बलराम सापकोटा केन्द्रीय कारागारमा जरिबानाबापतको कैद काटिरहेका छन् । अदालतको फैसलापछि २०७१ सालमा पक्राउ परेका बलराम कोइली इम्पोरियमका सञ्चालक थिए । अपराधीलाई करोडौं रुपैयाँ जरिबाना सुनाइए पनि कमजोर कानुनी प्रावधानका कारण धेरैले जेलमै बसेर जरिबाना भुक्तान गर्ने गरेका छन् । कैद र जरिबाना दुवै सजाय भएको अवस्थामा जरिबानाबापत बढीमा चार वर्षमात्र कैद बस्नुपर्छ । ‘जरिबाना तिर्न नसके अपराधीले दिनको २५ रुपैयाँका दरले जेलमा बसेर जरिबाना मिनाहा गर्छ । तर बढीमा चार वर्षभन्दा बढी बस्नु पर्दैन । यसले गर्दा करोडौं जरिबाना गरिएका अभियुक्तले रकम तिर्नभन्दा पनि जेलमै बस्न रुचाउने गरेको देखिएको छ’, सर्वोच्च अदालतको फैसला कार्यान्वयन निर्देशनालयका शाखा अधिकृत कृष्णशरण लामिछाने भन्छन् । ‘३५ हजार रुपैयाँ तिर्न नसकेरै चार वर्ष जेल बस्न बाध्य अभियुक्त पनि छन् । उनीहरू वास्तवमै निम्न आयस्तरका हुन् तर करोडौं जरिबाना भएका अपराधी पनि चार वर्ष नै बसिरहेका छन् । आर्थिक अवस्था बलियो नभईकन यस्ता ठूला अपराध हुुन सक्दैनन् । कानुुनले दुुवैखालका अपराधीलाई समान सजाय तोकेको छ’, महानिर्देशक घिमिरे भन्छन् । जरिबाना असुल्ने सन्दर्भमा अदालतले अपराधीको सम्पत्ति नखोज्ने प्रचलनले गर्दा पनि करोडौं जरिबाना भएका अपराधी कैदमै रहेर भुक्तानी गर्ने गरेको उनको भनाइ छ । ‘अपराधीले म तिर्छु भन्यो भने तिर्‍यो, नत्र अदालतले उसको सम्पत्ति खोजेर असुल्ने व्यवस्था छैन । यसको फाइदा अपराधीले उठाइरहेका छन्’, लामिछाने भन्छन् । अपराध अनुसन्धान विभागका पूर्वप्रमुख विज्ञानराज शर्मा कमजोर कानुनकै कारण अपराधीले पटकपटक अपराध दोहोर्याउने गरेको बताउँछन् । ‘त्यति छोटो समय जेलमा बस्दा करोडौं रुपैयाँ तिर्नु नपर्ने भएपछि अपराधीको मनोबल बढ्छ । अर्कोतर्फ जेलमा बस्दा पनि पूरा समय बस्नु नपर्ने सम्भावना हुन्छ । यसमा राजनीतिक सम्बन्धहरूको पनि प्रभाव रहन्छ’, भर्खरै सेवाबाट अवकाश पाएका शर्मा भन्छन् । कारागार व्यवस्थापन विभागका महानिर्देशक कृष्णचन्द्र घिमिरे ३५ हजार रुपैयाँ तिर्न नसक्ने र करोडौं रुपैयाँ नतिर्नेले एउटै सजाय पाउनु अव्यावहारिक रहेको बताउँछन् । सर्वोच्च अदालतको फैसला कार्यान्वयन निर्देशनालयका अनुसार नेपाल प्रहरीले विशेष अभियान सञ्चालन गरेका २४ जिल्लाबाट गत आर्थिक वर्ष कुल दुई अर्ब ८३ करोड ७५ लाख ७१ हजार रुपैयाँ जरिबाना असुल भएको थियो । त्यसबाहेक दुई अर्ब ८० लाख ५९ हजार ७६ हजार रुपैयाँ जरिबाना भने कैदबाट असुल भएको थियो । निर्देशनालयका अनुसार हालसम्म ११ अर्ब ३६ करोड ५४ लाख रुपैयाँ जरिबाना असुल्नबाँकी छ । यसैगरी अपराधीबाट असुल गर्न बाँकी कैद करिब एक लाख नौ हजार तीन सय चार वर्ष छ । बैंकिङ कसुुुरमा ६ वर्ष कैद र १३ करोडभन्दा बढी जरिबाना भएका अरुणकुमार मराठा २०७२ सालयता जेलमा छन् । एक वर्षभन्दा बढी कैद र करोडभन्दा बढी जरिबाना भएका दर्जनौं अपराधी २०७० सालयता जेलमा छन् ।

काठमाडौं, फागुन १३ । बङ्गलादेशमा जारी दोस्रो शेख कमल अन्तर्राष्ट्रिय क्लब कप फुटबलमा नेपालका तर्फबाट मनाङ मर्स्याङ्दी क्लबले दुई गोलले अग्रता बनाइसकेको भएपनि अग्रता जोगाउन नसक्दा खेल बराबरी भएको हो । मनाङ मर्स्याङ्दी र बंगलादेशको चटगाउँ अवहानीबीच आज भएको खेल दुई दुई गोलको बराबरीमा सकिएको हो । मनाङ सेमिफाइनल पुग्ने नपुग्ने निर्णयका लागि भने शुक्रबार हुने बंगलादेशको मोहमोदेन स्पोटिङ क्लब र अफगानिस्तानको शाहिन आस्मयीबिच हुने खेलको नतिजा पर्खनुपर्ने हुन्छ । खेलमा मोहमोदेन विजयी भए मनाङ सेमिफाइनल पुग्ने छ । खेलको तेस्रो मिनेटमै ओलावालेको गोलले मनाङले अग्रता लिएको थियो । मनाङको दोस्रो गोल २२ औँ मिनेटमा ओलावालेले नै गरे । खेलको ३२ औँ मिनेटमा अवहानीले एक गोल फर्काएर अन्तर कम गर्यो । ६२ औँ मिनेटमा पाएको पेनाल्टीलाई सदुपयोग गर्दै अवहानीले खेल बराबरी गरेको हो ।

काठमाडौं, फागुन १३ ।  बिहीबार बिहान प्रधानमन्त्री प्रचण्ड र एमाले अध्यक्ष केपी ओलीबीच सभामुखको चेम्बर सिंहदरबारमा भेट भयो । एमालेले संसद्मा मौन बसेर संशोधन प्रक्रिया अगाडि बढाउन दिने सहमति जनायो । तर, मतदान भएमा असफल पार्न आफ्नो कोसिस रहने पनि ओलीले स्पष्ट पारे । सो सहमतिपछि दिउँसो ३ बजे संसद् बैठक बस्यो र एमाले उपनेता सुवास नेम्वाङले बोले, तर संसद् अवरुद्ध भएन । एमालेले मात्र होइन, विपक्षी गठबन्धनका नौ दलमध्ये नेमकिपाबाहेक अरूले विरोध गरेनन् । नेम्वाङले बोलेपछि संशोधन प्रस्तावमा सैद्धान्तिक छलफल हुँदा नेमकिपाका दुई सांसदले भने नाराबाजी जारी राखे । सैद्धान्तिक छलफल बिहीबार नै सकिएकाले संसद् बैठक अर्को सोमबारसम्मका लागि स्थगित भयो । संशोधन प्रस्तावका लागि ७२ घन्टा : सरकारको प्रस्तावमा बिहीबार सैद्धान्तिक छलफल सकिएकाले सो प्रस्तावमाथि संशोधन राख्न चाहने सांसदलाई ७२ घन्टा अर्थात् आइतबारसम्मको समय छ । सरकारको यो प्रस्तावलाई प्रमुख प्रतिपक्षी एमाले मात्र होइन, असन्तुष्ट मधेसी दलहरूले पनि समर्थन गरेका छैनन् । त्यसैले सरकारले पूरक प्रस्ताव ल्याउने तयारी गरेको छ । प्रधानमन्त्रीले मधेसी मोर्चाका नेताहरूसँगको पटकपटकको भेटमा पूरक प्रस्ताव ल्याउने प्रतिबद्धता व्यक्त गरेका छन् । त्यसैले मधेसी दलहरूले आफैँ संशोधन प्रस्ताव ल्याउनेभन्दा पनि सरकारले नै पूरक प्रस्ताव ल्याएर पाससमेत गराओस् भन्ने अपेक्षा गरेका छन् । १९ गते बैठक सुरु हुँदा के हुन्छ ? : संशोधनमाथि सांसदहरूले संशोधन प्रस्ताव राखेमा ती प्रस्तावमा दफाबार छलफल गरी बैठकमा प्रतिवेदनसहितको विधेयक प्रस्तुत गर्ने प्रयोजनका लागि सभामुखले बैठकको अनुमति लिई विशेष समिति गठन गर्न पाउने नियम छ । तर, विशेष समिति बनाएर दफाबार छलफल गर्दा अन्योल लम्बिने स्थिति छ । त्यसैले सभामुखले विशेष समिति बनाउने वा नबनाउने निर्णय गरेकी छैनन् । यो खबर आजको नयाँ पत्रिकामा छ ।

काठमाडौं , फागुन १३ । गाँजा भाङ, धतुरो नखाए के महाशिवरात्री ! शिवरात्रीको अवसरमा युवाको मुखमा झुन्डिने शब्द हो यो । गाँजा, भाङ धतुरोलाई शिवको प्रिय मान्ने धेरै छन् । प्रसादका नाममा लागूपदार्थ सेवन गर्नु राम्रो होइन । पाटन अस्पतालका जनरल फिजिसियन डा. भरतकुमार यादवले प्रसादका रुपमा लागूपदार्थ सेवन गर्दा स्वास्थ्यमा गम्भीर असर पर्ने बताए । ‘शिवका भक्त व्रत बस्छन् । त्यस्तो बेला लागूपदार्थ सेवन गर्दा स्वास्थ्यमा हानि गर्दछ ।’ यादवका अनुसार गाँजा सेवनले बान्ता हुने, रिंगटा लाग्ने, बेहोस हुने लगायतका समस्या देखिन्छन् । ‘भोको पेटमा गाँजा सेवन गर्दा बेहोस भएर सासै रोकिन सक्छ उनले भने शिवजीको प्रसादका रुपमा मिठाई र फलफूल पनि खान सकिन्छ ।’ यो खबर आजको नागरिकमा खबर छ ।

धनकुटा, फागुन १२ । स्वतन्त्र विद्यार्थी युनियनको निर्वाचन नजिकिँदै गर्दा धनकुटा बहुमुखी क्याम्पसमा भने निर्वाचनका लागि विद्यार्थी संगठन दर्ताको क्रममा भएको विवादले चरम रुप लिएको छ । विवादकै कारण निर्वाचन प्रमुखसहित तीनजनाले राजीनामा दिएका छन् । नेकपा माओवादी केन्द्रनिकट अखिल क्रान्तिकारी र नेकपा एमालेनिकट अखिलमध्ये पहिले कसलाई दर्ता गराउने भन्ने विषयमा विवादले चरम रुप लिएपछि अन्ततः स्ववियु निर्वाचन प्रमुखसहित तीनजनाले दिए राजिनामा दिएका छन् । प्रजातान्त्रिक प्राध्यापक संघको तर्फबाट निर्वाचन प्रमुख रहेका श्याम वाग्लेसहित तीनजनाले निर्वाचन समितिबाट विहीबार राजीनामा दिएका हुन् । निर्वाचन प्रमुखले राजीनामा दिएपछि १८ गते हुने निर्वाचनको अन्योल बढेको छ ।

काठमाडौं,फागुन १२ । गृह मन्त्रालयले विभिन्न १४ वटा जिल्लाका प्रमुख जिल्ला अधिकारी (सिडिओ) सहित ३५ जना उपसचिवको काज सरुवा गरेको छ । निर्वाचन घोषणा भइसकेपछि निर्वाचनलाई प्रत्यक्ष प्रभावित पार्ने गरी गृहले विभिन्न जिल्लाका प्रमुख जिल्ला अधिकारीको काज सरुवा गरेको हो । सामान्य प्रशासन मन्त्रालयले लामो समयदेखि काजमा कर्मचारी राख्ने निकायलाई तत्काल काज फिर्ता गर्न पत्राचार गरिरहेको अवस्थामा सामान्य प्रशासन मन्त्रालयको निर्देशनलाई लत्याउँदै गृहले १४ जिल्लाका सिडिओसहित ३५ उपसचिवको काज सरुवा गरेको हो । गृह मन्त्रालयले काज सरुवा भएका सिडिओसहितका कर्मचारीको विवरण बुधबार मात्रै सार्वजनिक गरेको हो । बुधबार सार्वजनिक गरिएको विवरणमा सरुवा गत ९ फागुनका दिन भएको उल्लेख गरिएको छ । सरकारले ९ फागुनमा स्थानीय तहको निर्वाचनको घोषणा गरेको थियो । फागुनमा गृह मन्त्रालयका प्रवक्ता वालकृष्ण पन्थी र मन्त्रालयका कर्मचारी प्रशासन महाशाखा प्रमुख सहसचिव राजकुमार श्रेष्ठ सँग सिडिओ सरुवाका वारमो जानकारी माग्दा कुनै पनि सिडिओको सरुवा नभएको वताएका थिए तर त्यसको दुई दिन पछि ११ फागुनमा गृह मन्त्रालयले सरुवा भएका सिडिओ सहितका उपसचिवको विवरण सार्वजनिक गरेको हो । यसरी सरुवा सार्वजनिक गर्दा ९ फागुनमा नै सरुवा भएको गृह मन्त्रालयले जनाएको छ । हामी सँग सहमति मागिएको छैन : सामान्य प्रवक्ता निजामती सेवा ऐन अनुसार हरेक मन्त्रलाय र निकायले मातहका कुनै पनि कर्मचारीको काज सरुवा गर्नुपुर्व अनिवार्य रुपमा सामान्य प्रशासन मन्त्रालय सँग सहमति लिनु पर्छ । तर गृह मन्त्रालयले ३५ जना उपसचिवको काज सरुवा गर्दा सामान्य प्रशासन मन्त्रालय सँग कुनै सहमति लिएको छैन् । सामान्य प्रशासन मन्त्रालयका प्रवक्ता सहसचिव शिवराम न्यौपानेले गृहले काज सरुवा गरेको भन्ने आफुले वुधवार मात्रै सुनेको र सामान्य सँग कुनै सहमति नलिएको जानकारी दिए । सरुवा गर्नुपुर्व नै सहमति मागेको भएपनि गृहको सरुवामा सामान्यले खासै अव्जेशन नगर्ने भएपनि सरुवा गर्नुपुर्व सहमति नलिने प्रवृत्ति भने गलत भएको प्रवक्ता न्यौपानले वताए । सरुवा हुने सिडिओ -गृह मन्त्रालयले उपसचिव आसमान तामाङलाई तेह्रथुमको प्रमुख जिल्ला अधिकारीमा र तेह्रथुमका मुनका न्यौपानेलाई सुनसरीको सहायक प्रमुख जिल्ला अधिकारीमा सरुवा गरेको छ । यसैगरी गृह मन्त्रालयकै शिवराज जोशीलाई संखुवासभाको प्रमुख जिल्ला अधिकारीमा र संखुवासभाका खुमकान्त आचार्यलाई क्षेत्रीय प्रशासन कार्यालय हेटौँडामा सरुवा गरिएको छ । -यसैगरी, गृह मन्त्रालयकै गोमादेवी चेम्जोङलाई भोजपुरको प्रजिअमा, भोजपुरका अर्जुनकुमार शर्मालाई धनुषाको प्रजिअमा तथा मन्त्रालयका सूर्यप्रसाद खत्रीलाई रामेछापको प्रजिअमा सरुवा गरिएको छ । रामेछापका प्रकाशचन्द्र अधिकारीलाई गृह मन्त्रालयमा र मन्त्रालयका कमलराज भण्डारीलाई मनाङको प्रजिअमा सरुवा गरिएको छ । -यसैगरी, मनाङका प्रजिअ गञ्जबहादुर एमसीलाई बर्दियाको सहायक प्रजिअमा, गृह मन्त्रालयका यदु पौडेललाई प्युठानको प्रजिअमा, प्युठानका जनकराज पन्तलाई बाँकेको सहायक प्रजिअमा, मन्त्रालयका विनोद खड्कालाई रुकुुमको प्रजिअमा, रुकुमका वंशीकुमार आचार्यलाई क्षेत्रीय प्रशासन कार्यालय सुर्खेतमा, राष्ट्रिय परिचयपत्रका निर्देशक शरद पोख्रेललाई मुगुको प्रजिअमा सरुवा गरिएको छ । -यसैगरी गोरखाका सहायक प्रजिअ नेत्रप्रसाद शर्मालाई डोल्पाको प्रजिअमा, डोल्पाका चेतराज बराललाई राष्ट्रिय परिचयपत्रको कार्यालयमा, मन्त्रालयका उपसचिव जनकराज भट्टलाई डडेल्धुराको प्रजिअमा र डडेल्धुराका उदयबहादुर ठकुरीलाई गृह मन्त्रालयमा सरुवा गरिएको छ । यस्तै, इलाका प्रशासन कार्यालय लहानका तुलसी पौडेललाई बैतडीको प्रजिअमा, बैतडीका किशोरकुमार चौधरीलाई धनुषाको सहायक प्रजिअमा, मन्त्रालयका केशवबहादुर थापालाई बझाङको प्रजिअमा, डोटीका सहायक प्रजिअ शंकरबहादुर विष्टलाई अछामको प्रजिअमा, अछामका कोशलराज शर्मालाई गुल्मीको सहायक प्रजिअमा सरुवा गरिएको गृह मन्त्रालयले जनाएको छ । -यसैगरी गृह मन्त्रालयले कैलालीका सहायक प्रजिअ हीरालाल चौधरीलाई अध्यागमन कार्यालयमा, बाँकेका सहायक प्रजिअ मोहनराज जोशीलाई कैलालीको सहायक प्रजिअमा, कालिकोटका प्रजिअ कृष्णबहादुर खड्कालाई बा“केको सहायक प्रजिअमा, उपसचिव गिरिधारी सुवेदीलाई कालिकोटको प्रजिअमा सरुवा गरिएको छ । -बर्दियाका सहायक प्रजिअ भोजराज श्रेष्ठलाई इलाका प्रशासन कार्यालय दमकमा, धनकुटाका उपक्षेत्रीय प्रशासक कमल विष्टलाई राष्ट्रिय परिचयपत्रको निर्देशकमा धनकुटाका सहायक प्रजिअ सोमप्रसाद भट्टराईलाई इलाका प्रशासन कार्यालय लहानमा, गृह मन्त्रालयका धनप्रसाद शर्मालाई हुम्लाको प्रजिअमा र हुम्लाका कृष्णबहादुर घिमिरेलाई धनकुटाको सहायक प्रजिअमा सरुवा गरिएको गृह मन्त्रालयले जनाएको छ । सरुवा हुने डिआइजी जनपदतर्फ : महानगरीय ट्राफिक प्रहरी महाशाखाका प्रकाश अर्याललाई प्रहरी प्रधान कार्यालय अपराध अनुसन्धान शाखामा, प्रहरी प्रधान कार्यालय विशेष ब्युरोका बमबहादुर भण्डारीलाई महानगरीय प्रहरी कार्यालय रानीपोखरीमा, क्षेत्रीय प्रहरी कार्यालय हेटौँडाका पशुपति उपाध्यायलाई प्रहरी प्रधान कार्यालय कार्य विभागमा, प्रहरी प्रधान कार्यालय अन्वेषण योजना निर्देशनालयका देवेन्द्र सुुवेदीलाई राष्ट्रिय प्रहरी प्रशिक्षण प्रतिष्ठान महाराजगन्जमा तथा प्रहरी प्रधान कार्यालय अपराध अनुसन्धान विभागका विजयलाल कायस्थलाई क्षेत्रीय प्रहरी कार्यालय सुर्खेतमा सरुवा गरिएको छ । यसैगरी प्रहरी प्रधान कार्यालय अपराध अनुसन्धान विद्यालयका मधुप्रसाद पुडासैनीलाई क्षेत्रीय प्रहरी कार्यालय पोखरामा, प्रहरी महानिरीक्षकको सचिवालयका माधवप्रसाद जोशीलाई प्रहरी प्रधान कार्यालय प्रबन्ध शाखामा, क्षेत्रीय प्रहरी कार्यालय विराटनगरका केशरीराज घिमिरेलाई प्रहरी प्रधान कार्यालय मानव स्रोत विकास विभागमा सरुवा गरिएको छ । क्षेत्रीय प्रहरी कार्यालय पोखराका कमलसिंह बमलाई अख्तियार दुरुपयोग अनुसन्धान आयोगमा, महानगरीय प्रहरी कार्यालय रानीपोखरीका मिङमार लामालाई महानगरीय ट्राफिक महाशाखामा, प्रहरी प्रधान कार्यालय ट्राफिक निर्देशनालयका पंकज श्रेष्ठलाई महानगरीय विमानस्थल सुरक्षा प्रहरी कार्यालय गौचर काठमाडौंमा, क्षेत्रीय प्रहरी कार्यालय सुर्खेतका माधवप्रसाद नेपाललाई प्रहरी प्रधान कार्यालय तालिम निर्देशनालयमा सरुवा गरिएको छ । प्रहरी प्रधान कार्यालय कार्य विभागका हेमन्तबहादुर पाललाई प्रहरी प्रधान कार्यालय विशेष ब्युरोमा, महानगरीय विमानस्थल सुरक्षा प्रहरी कार्यालयका गोविन्दप्रसाद निरौलालाई प्रहरी प्रधान कार्यालय अन्वेषण योजना निर्देशनालयमा, प्रहरी प्रधान कार्यालय प्रबन्ध शाखाका रोमेन्द्रसिंह देउजालाई सुदूरपश्चिम क्षेत्रीय प्रहरी कार्यालय दिपायलमा, राष्ट्रिय प्रहरी प्रशिक्षण प्रतिष्ठनाका सुदीप आचार्यलाई राष्ट्रिय सुरक्षा परिषद् सिंहदरबारमा खटाइएको छ । प्रहरी प्रधान कार्यालय तालिम निर्देशनालयका गणेश केसीलाई क्षेत्रीय प्रहरी कार्यालय हेटौँडामा, अख्तियारका केदारमानसिंह भण्डारीलाई प्रहरी प्रधान कार्यालय अपराध अनुसन्धान विद्यालयमा र प्रहरी प्रधान कार्यालय सुरक्षा सेवा निर्देशनालयका रमेशकुमार भट्टराईलाई क्षेत्रीय प्रहरी कार्यालय विराटनगरमा सरुवा गरिएको गृह मन्त्रालयले जानकारी दिएको छ । डिआइजी सरुवा गर्दा वरिष्ठ र क्षमतावानलाई पाखा लगाएर कनिष्टहरूलाई बढी महत्वपूर्ण र संवेदनशील क्षेत्रको जिम्मेवारी दिएको भन्दै संगठनभित्र असन्तुष्टि व्यक्त गरिएको छ । सशस्त्रतर्फ : मुक्तिनाथ बाहिनी पोखराका डिआइजी नरेन्द्रबहादुर सिंहलाई रुद्र बाहिनीमा सरुवा गरिएको छ । त्यस्तै, दिवाकर केसीलाई आइजिपीको सचिवालय, जानकीराज भट्टराईलाई बराह बाहिनी, निराकरविक्रम शाहलाई सशस्त्र प्रहरी विद्यालयमा सरुवा गरिएको छ । यस्तै, सुबोध अधिकारीलाई मुक्तिनाथ बाहिनी, खडानन्द चौधरीलाई मद्दती तथा सेवा निर्देशनालय, सुरज श्रेष्ठलाई कार्यविभाग, राजेश श्रेष्ठलाई अन्वेषण तथा विकास निर्देशनालय तथा बाबुराम पाण्डेलाई व्यवसायिकता तथा गुणस्तर निर्धारण निर्देशनालयमा सरुवा गरिएको छ । गत महिना बढुवा भएका तीन डिआइजीको पनि पदस्थापन भएको छ । बढुवा भएलगत्तै खड्ग राई वसन्त बानियाँले बाहिनीपति पाएका छन् । उनलाई महेश्वरी बाहिनीमा पदस्थापन गरिएको छ । एक वर्षदेखि उनी सोही बाहिनीमा निमित्त बाहिनीपतिका रूपमा काम गर्दै आएका थिए । त्यस्तै, राईलाई वैद्यनाथ बाहिनीमा पदस्थापन गरिएको छ । मन्दीप श्रेष्ठलाई प्रशिक्षा प्रतिष्ठानमा सरुवा गरिएको छ । केहीलाई लगातार इन्चार्ज दिएपछि डिआइजी रवि थापा क्षेत्रीलाई भने इन्चार्ज दिइएको छैन ।

काठमाडौं, फागुन १२ । २०७२ को महाभूकम्पबाट मुुलुुकभरका ७ हजार ९ सय २३ वटा विद्यालय भवन पूर्णरूपमा ध्वस्त भए पनि अहिलेसम्म एक हजार ४९ वटा विद्यालय भवन मात्रै बनेका छन्। शैक्षिक संस्था पुुनर्निर्माणका लागि कुुल १ खर्ब ८० अर्ब रुपैयाँ आवश्यकता पर्ने शिक्षा मन्त्रालयको अनुमान छ। भत्केका शैक्षिक संस्था तीन वर्षभित्र निर्माण सम्पन्न गरिसक्ने मन्त्रालयको लक्ष्य छ। यो हिसाबले हेर्दा हरेक वर्ष न्यूनतम ६० अर्ब रुपैयाँ पुनर्निर्माणमा खर्च गर्नुुपर्ने देखिन्छ। तर, यो वर्ष सरकारले विद्यालय निर्माणका लागि एक अर्ब रुपैयाँ मात्र छुुट्ट्याएको छ। कक्षा एकदेखि १२ सम्मको विद्यालय बनाउन मात्र कुुल एक खर्ब ६७ अर्ब रकम आवश्यक पर्ने बताइए पनि विभिन्न विकास साझेदार मुुलुुक तथा दातृ निकायले समेत गर्ने भनेको सहयोगको हिसाब गर्दा अहिलेसम्म ५१ अर्ब रुपैयाँको मात्र स्रोत पहिचान भएको छ। बाँकी रकम दातृ निकायले नै दिने बताए पनि पहिलो वर्षको प्रगति अवस्था हेर्दा समयमै स्रोत पहिचान गर्न र निर्माण कार्यलाई निर्धारित समयमै सम्पन्न गराउन मुुस्किल पर्ने सरकारी तथ्यांकले देखाएको छ। तीन वर्षभित्र सबै शैक्षिक संस्था पुुनर्निर्माण गरिसक्ने लक्ष्य सरकारको छ। तर, कुुल लाग्ने रकम, पुुनर्निर्माणमा देखिएको हालसम्मको प्रगति र स्रोत परिचालनको अवस्था हेर्दा अहिले अस्थायी टहरामुुनि बसेर पढिरहेका विद्यालयका विद्यार्थीले कहिलेसम्म कष्ट सहनुुपर्ने हो निश्चित छैन। विद्यालय पुुनर्निर्माण कार्यलाई मात्र हेर्नेगरी शिक्षा मन्त्रालयले गठन गरेको परियोजना कार्यान्वयन इकाइ (प्रोजेक्ट इम्प्लिमेन्टेसन युुनिट) का प्रमुुख सहसचिव इमनारायण श्रेष्ठ दाताले दिएको रकम सम्बन्धित विद्यालयसम्म पुर्‍याउने क्रममा हुुने प्रक्रियागत झन्झट र सम्बन्धित निकायबीच समन्वयन हुुन नसक्दा पुनर्निर्माण कार्यले गति लिन नसकेको बताउँछन्। सरकारी लगानीबाहेक जापान इन्टरनेसनल कोअपरेसन एजेन्सी (जाइका) ले पनि चालुु आर्थिक वर्षभित्र भूकम्प प्रभावित १४ जिल्लाका दुुई सय ८३ विद्यालय बनाउने प्रतिबद्धता जनाएको थियो। हालसम्म ८३ वटा विद्यालयको मात्र निर्माण प्रक्रिया अघि बढेको छ। यी सबै विद्यालयका लागि जाइकाले साढे ११ अर्ब रुपैयाँ बजेट छुुट्टयाएको छ तर निर्माणमा देखिएको सुुस्तता हेर्दा तोकिएको मितिमा यी विद्यालय बन्न सक्ने देखिँदैन। यो खबर आजको अन्नपूर्णमा छ ।

लहान,  फागुन ११ । सिरहाका छुट्टाछुटै स्थानमा गएराति भएका ट्याक्टर दुर्घटनामा चार जनाको मृत्यु भएको छ । सिरहाको पिप्रा प्र.पि.–५ स्थित भित्री सडकखण्डमा राति ८ बजे अनटेस्ट लेखिएको ट्याक्टर पल्टिँदा ट्याक्टरमा सवार पिप्रा प्र.पि.–५ निवासी रुपेश यादव, सोही ठाउँका हरेराम यादव र नितेश यादवको मृत्यु भएको छ । रुपेश र हरेरामको घटनास्थलमै तथा नितेशको उपचारका क्रममा सिरहा अस्पतालमा मृत्यु भएको जिल्ला प्रहरी कार्यालय सिरहाले जनाएको छ । यसैगरी, पूर्वपश्चिम राजमार्गअन्तर्गत सिरहाको गोलबजार नगरपालिका–८ स्थित सडकमा पश्चिमबाट पूर्वतर्फ आउँदै गरेको स १ त ३२४८ नम्वरको ट्याक्टर अनियन्त्रित भई दुर्घटना हुँदा सिरहाको धनगढीमाई नगरपालिका–१० निवासी मोहनती यादवको मृत्यु भएको छ । राजमार्गमा अनियन्त्रित भई दुर्घटना हुँदा गम्भीर घाइते भएका मोहनतीको लहानस्थित रामप्रसाद उमादेवी स्मारक अस्पतालमा उपचारका क्रममा मृत्यु भएको इलाका प्रहरी कार्यालय गोलबजारले जनाएको छ । रासस

काठमाडौं,  फागुन ९ । पृथकतावादी मधेस अभियानमा सक्रिय सीके राउतका कार्यकर्ताले स्कुले विद्यार्थी प्रयोग गरी रुपन्देहीको मर्चवार क्षेत्रको प्रहरीचौकीमा आक्रमण गरेका छन् । रुपन्देहीको सिलौटिया गाविस–८ स्थित वडवलिया चौकीमा विद्यार्थीकै सहभागितामा आइतबार आक्रमण भएको हो । राउतका कार्यकर्ताले प्रहरीबाट दुईवटा हतियारसमेत खोसेका थिए । खोसिएका हतियारमध्ये एसएलआर घटनास्थलनजिकैको घरबाट परालले ढाकेको अवस्थामा भेटिएको लुम्बिनी अञ्चल प्रहरी प्रमुख दीपक थापाले जानकारी दिए । ग्यास गन र केही ग्यास भने भेटिएको छैन । ‘थोरै जनशक्ति भएकाले प्रहरी व्याक हुँदै गर्दा हतियार खोसिएको थियो’, उनले भने । प्रहरीमाथि आक्रमण भएपछि अवस्थालाई नियन्त्रणमा लिन ५ राउन्ड हवाई फायर र ५ राउन्ड अ श्रुग्यास प्रहार गरिएको प्रमुख थापाले बताए । आक्रमणबाट ५ जना सुरक्षाकर्मी घाइते भएको र ५ आक्रमणकारीलाई अनुसन्धानका लागि नियन्त्रणमा लिएको उनले जानकारी दिए ।चौकीका इन्चार्ज प्रहरी सहायक निरीक्षक प्रेमकुमार श्रेष्ठका अनुसार १ सय ५० जनाको संख्यामा आएको समूहले चौकी घेरा हालेर ढुंगा हानेका थिए । ‘हामी पाँच जना मात्रै थियौं, एक्कासी आएका उनीहरू सिधै कम्पाउन्डभित्र पसे । हामी कोठामा ढोका थुनेर भित्र बस्यौं’, सहायक निरीक्षक श्रेष्ठले घटनाबारे सुनाए, ‘पाँच राउन्ड हवाईफायर गर्दा पनि भागेनन् ।’ प्रहरी निरीक्षकको टोली आएपछि आक्रमणकारी भागेको उनले बताए । शनिबार मझगवाको मर्चवार माध्यमिक विद्यालयमा तय गरेको आमसभा गर्न नदिएपछि आक्रमण भएको हुनसक्ने प्रहरीले जनाएको छ । घटनामा प्रहरी हबल्दार अर्जुन रोकाय, प्रहरी जवान रमेश पाल, रामबहादुर भण्डारी र अमर मल्ल घाइते भएका छन् । घाइते उपचारपछि फर्किएका छन् । एक जनाको युनिभर्सल मेडिकल कलेज भैरहवामा उपचार भइरहेको छ । मर्चवार क्षेत्रमा दिउँसोदेखि थप प्रहरी परिचालन भएपछि अवस्था नियन्त्रणमा आएको छ । जिल्ला प्रहरी कार्यालयका प्रहरी नायब उपरीक्षक बेलबहादुर पाण्डे नेतृत्वको टोली मर्चवार पुगेको छ । मर्चवार क्षेत्रका विद्यालयमा स्वतन्त्र मधेस गठबन्धनले कक्षा लिएरै विद्यार्थी प्रशिक्षण गराउने गरेको खुलेको रुपन्देहीका प्रहरी प्रवक्ता बेलबहादुर पाण्डेले बताए । ‘हामीले पढाइ हुने गरेको विषयमा माथि जानकारी गराएका थियौं’, उनले भने, ‘प्रहरीमाथि आक्रमण गर्नेहरू पनि अधिकांश विद्यार्थी नै छन् ।’ शनिबारको प्रहरी झडपमा केही विद्यार्थी पनि घाइते भएका थिए । त्यसको विरोधमा आइतबार सरकारी तथा निजी विद्यालयसमेत बन्द भए । घटनामा परी विद्यार्थी घाइते भएको मानवअधिकार उपक्षेत्रीय कार्यालय बुटवलका अधिकृत कल्पना नेपालले बताइन् । ६ जनालाई राज्यविप्लव मुद्दा राउतका ६ जना कार्यकर्तालाई राज्यविप्लव मुद्दा चलाइएको छ । शनिबार रुपन्देहीको मर्चबारबाट पक्राउ परेका उनीहरूलाई प्रहरीले आइतबार जिल्ला अदालतमा राज्यविरुद्ध संगठित अपराध गरेको अभियोगमा राज्यविप्लव मुद्दा दर्ता गरी अनुसन्धान सुरु गरेको हो । प्रहरी निरीक्षक धर्मराज भण्डारीका अनुसार रुपन्देही बोगडी–५ का उदीप यादव, बयरघाट–४ का मक्बुल अन्सारी, लुम्बिनी सांस्कृतिक नगरपालिका–१९ का विकासप्रसाद लोध, रोहिणीहवा–४ का परमेश्वर यादव, कम्हरिया–८ का मुकेश साहनी र कपिलवस्तु मोतीभारीका जितेन्द्र चौधरीविरुद्ध राज्यविप्लव मुद्दा चलाइएको छ । मुद्दा चलाइएकाले राउतको अभियानलाई साथ दिँदै राज्यविरुद्ध संगठित अपराध गरेको उनले बताए । शनिबार मर्चबारबाट राउतका २१ जना कार्यकर्ता पक्राउ परेका थिए । १५ जनालाई भने छानबिन गरी छाडिएको छ । यो खबर अाजको अन्नपूर्ण पोस्टमा  छ । फाइल तस्वीर

काठमाडौं, फागुन  ७ । लामो समयदेखि रिक्त एक दर्जनभन्दा बढी नेपाली कूटनीतिक नियोग कार्यबाहककै भरमा चल्दा दुईपक्षीय सम्बन्ध प्रभावित भएको छ । सरकारले राजदूत नियुक्तिका लागि गृहकार्य गरे पनि नाममा टुङ्गो लगाउन नसक्दा ढिलाइ हुँदै आएको परराष्ट्र स्रोतले जनाएको छ । विभिन्न देशका लागि राजदूत नियुक्तिको अन्तिम तयारी गरिरहेको बताए पनि हालसम्म १३ देशमा राजदूत नियुक्तिको प्रक्रियाले मूर्तता पाउन सकेको छैन । विगत तीन वर्षदेखि विदेशस्थित केही दूतावास राजदूतविहीन छन् । राजदूत नहुँदा खाडीका देशमा रहेका नेपाली कामदारलाई धेरै समस्या भएको भन्दै संसदीय समितिले राजदूत नियुक्तिका लागि सरकारलाई निर्देशन दिएको थियो । परराष्ट्र सचिव शङ्करदास वैरागीले भने राजदूत रिक्त १३ देशमा नियुक्ति प्रक्रिया छिट्टै हुने बताए । ‘परराष्ट्रमन्त्री बेल्जियम र लक्जम्बर्गमा हुने योगा–ध्यानसम्बन्धी अन्तर्राष्ट्रिय सम्मेलनमा सहभागिता जनाएर फागुन ७ गते फर्केपछि मात्र यस विषयमा पुनः छलफल हुने सम्भावना छ’, स्रोतले भन्यो । हालसम्म नेपालले २९ देशमा आवासीय दूतावास स्थापना गरेको छ । नेपाली राजदूत नभएका देशमा साउदी अरेबिया, दक्षिण कोरिया, इजरायल, बहराइन, कतार, ओमन, दुबई, जापान, बङ्गलादेश, श्रीलङ्का, डेनमार्क, अस्ट्रेलिया र म्यानमार छन् । तत्कालीन केपी ओली नेतृत्वको सरकारले २०७३ वैशाख ७ गते २२ देशका लागि राजदूत नियुक्ति सिफारिस गरेको थियो । प्रधानमन्त्रीका परराष्ट्र मामिला सल्लाहकार डा. ऋषिराज अधिकारीले नेकपा (माओवादी केन्द्र) का तर्फबाट यसअघि नै सिफारिस गरेका नामलाई निरन्तरता दिने जानकारी दिँदै काँग्रेसले राजदूत सिफारिसको नाम टुङ्ग्याउनेबित्तिकै छिट्टै राजदूत नियुक्ति हुने बताए । यसअघि माओवादी केन्द्रबाट युवनाथ लम्साललाई डेनमार्क, लकी शेर्पा अस्टे«लिया, महेन्द्र सिंह कतार र पदम सुन्दास बहराइनका लागि सिफारिस गरिएको थियो । छ राजदूत पाएको नेपाली काँग्रेसमा भने नामकै विषयमा किचलो रहेको नेपाली काँग्रेस स्रोतले जनाएको छ । नेपालको परराष्ट्र नीतिलाई अन्तर्राष्ट्रिय मञ्चमा प्रस्टसँग राख्न सक्ने योग्य र दक्ष व्यतिmलाई राजदूत बनाउनुपर्ने आवाज काँग्रेस वृत्तमा उठेको स्रोतले बतायो । सकभर पुरानोलाई निरन्तरता नदिने र नयाँलाई अवसर दिनुपर्ने पक्षमा परराष्ट्रमन्त्री महत छन् । तर, पटकपटक राजनीतिक नियुक्त लिइसकेको व्यक्तिले पनि राजदूतमा मोह देखाएपछि नाममा सहमति जुटाउन कठिन परेको काँग्रेस निकट स्रोतले जनाएको छ । प्रधानमन्त्री प्रचण्ड नेतृत्वको सरकारले भदौ १६ गते मन्त्रिपरिषद् बैठकबाट भारतका लागि दीपकुमार उपाध्याय र चीनका लागि लीलामणि पौडेल राजदूतमा नियुक्त गरिसकेको छ । यो खबर अाजको गाेरखापत्रमा  छ ।