काठमाडौं, कार्तिक १९ । साताको दोस्रो दिन सोमबार पनि नेपाली बजारमा सुनचाँदीको मूल्य यथावत रहेको छ । आइतबार बजारमा छापावाल सुन प्रतितोला ६० हजार रुपैयाँमा कारोबार भएको थियो भने आज पनि बजारमा सुन प्रतितोला ६० हजार रुपैयाँमै कारोबार भइरहेको नेपाल सुनचाँदी व्यवसायी महासंघले जानकारी दिएको छ । आइतबार तेजावी सुन प्रतितोला ५९ हजार ७ सय रुपैयाँमा कारोबार भएको थियो भने आज पनि बजारमा सुन प्रतितोला ५९ हजार ७ सय रुपैयाँमै कारोबार भइरहेको छ। त्यस्तै, आइतबार बजारमा चाँदी प्रतितोला मूल्य ७४५ रुपैयाँमा कारोबार भएको थियो भने आजपनि चाँदी प्रतितोला ७४५ रुपैयाँमै कारोबार भइरहेको जनाएको छ ।

फिदिम, असोज २३ । नेपाल कम्युनिस्ट पार्टी (नेकपा) को जिल्ला पार्टी कार्यालय तत्कालीन नेकपा (एमाले) जिल्ला कमिटीको कार्यालयमा स्थापना गरिएको छ । नेकपा पाँचथरको जिल्ला कार्यालय स्थापना भएपछि पार्टी एकीकरणको प्रक्रियाले पनि गति लिने समेत विश्वास गरिएको छ । मङ्गलबार यहाँ आयोजित कार्यक्रममा नेकपाका केन्द्रीय सदस्य डम्बरसिंह सम्बाहाम्फेले नेकपाको झण्डा उठाई पार्टी कार्यालयको उद्घाटन गरे । गत जेठ ३ गते एकीकरण भएका एमाले र नेकपा (माओवादी केन्द्र)को जिल्ला तहमा एकता प्रक्रिया पूरा हुन सकेको छैन । एकता प्रक्रिया पूरा नहुँदा पार्टी गतिविधि सञ्चालनमा समस्या सिर्जना भएकाले प्रदेश कमिटीको निर्देशनबमोजिम पार्टी कार्यालय स्थापना गरिएको नेकपाका जिल्ला नेता एवं तत्कालीन माओवादी केन्द्र पाँचथरका इञ्चार्ज हर्कबहादुर नेम्वाङले जानकारी दिएका छन् । पाँचथरमा जिल्ला कमिटी तथा मातहतका कमिटीको एकताका लागि प्रदेश कमिटीले बनाएको आठ सदस्यीय कार्यदलले एकताको खाका बनाइरहेको केन्द्रीय सदस्य सम्बाहाम्फेले जानकारी दिए । एकता कार्यदलले नेकपाका स्थानीय कमिटी, पेशागत, भ्रातृ तथा जनवर्गीय सङ्गठन, विभाग तथा मोर्चाको जिल्ला कमिटीको खाका तयार पारी प्रदेश कमिटीमा सिफारिश गरिने सम्बाहाम्फेले जानकारी दिए । आठ सदस्यीय कार्यदलमा केन्द्रीय सदस्य सम्बाहाम्फेसहित जिल्ला नेता हर्कबहादुर नेम्वाङ, राजकुमार भण्डारी, विशाल रसाइली, होमबहादुर जबेगू, भुवानीप्रसाद लिङ्देन, दिनेश लावती र तीवेन्द्रराज चापागार्इं रहेका छन् । कार्यदलले बुधबारसम्ममा एकताको खाका तयार पारी प्रदेश कमिटीमा सिफारिश गर्ने जिम्मेवारी पाएको केन्द्रीय सदस्य सम्बाहाम्फेले जानकारी दिए । रासस

युएई ,साउन ५। युएईमा ब्लडमनीको सजाय पाएका खैरेनी ९, चितवनका टोपबहादुर बिक नेपाल फर्किने भएका छन्। ब्लडमनी बापतको रकम १ लाख दिर्हाम्स नेपाली झन्डै ३० लाख रुपैयाँ बुझाउन नसक्दा ४ बर्ष देखि स्वदेश फर्कन नपाएका बिकलाई अदालतको फैसला अनुसारको ब्लड मनि रकम बुझाइ सम्पुर्ण कानुनी प्रक्रिया पूरा गरि नेपाल जाने बाटो खुल्ला गरिएको युएई स्थित नेपाली दूतावासले जानकारी दिएको छ। चार बर्ष अघि १४ जुन २०१४ मा काम गर्दै गर्दा क्रेन दुर्घटनामा परि दुई थाई नागरिकको ज्यान गएपछि युएईको अलऐनस्थित ‘सिभिल कोर्ट’ ले कम्पनी, क्रेन अपरेटर र हेल्पर टोपबहादुरलाई दोषी ठहर गर्दै पीडितका परिवारलाई ४ लाख दिराम ब्लडमनि दिनुपर्ने फैसला सुनाएको थियो । जसअनुसार कम्पनीका तर्फबाट २ लाख, पाकिस्तानी क्रेन अपरेटर र टोपबहादुरको भागमा एक–एक लाख दिराम परेको थियो । दुर्घटना पछी ४ महिना २० दिन जेलमा बसेका बिकलाई फैसला पछी अदालतले यात्रा प्रतिबन्ध गरि कम्पनीमा पठाए पनि उनी काम गर्ने कम्पनी बन्द भएपछी लामो समय सम्म चिनजानका साथिभाइ र केहि महिना एनआरएन युएईको संरक्षणमा बस्दै आएका थिए ।   अदालतको फैसला पछि ब्लडमनी जुटाउनका लागि युएई स्थित नेपाली दूतावासले परराष्ट्र मन्त्रालय र वैदेशिक रोजगार प्रबर्द्धन बोर्डलाई आर्थिक सहयोगका लागि पत्र लेखेको भए पनि वैदेशिक रोजगार प्रबर्द्धन बोर्डले कानुनत बिकलाई कुनै आर्थिक सहयोग गर्न नसकिने भन्दै पत्रको जबाफ पठाए पछी गैर आवासीय नेपाली संघ युएईको संयोजकत्वमा युएईमा क्रियाशील सबै संघसस्थाहरु सदस्य रहने गरि एक महिने आर्थिक सहयोग संकलन अभियान चलाइएको थियो । अभियान बाट संकलित रकम दूतावासलाई हस्तान्तरण गरेपछि दूतावासले सो रकम अदालतमा बुझाउदै कानुनी प्रक्रियामा लागेको थियो । लामो समयको कानुनी प्रक्रिया लाई पार गर्दै दूतावासले बिकको पासपोर्ट अदालत बाट निकालि उनलाइ स्वदेश फर्कन सक्ने बाटो खुल्ला गरिदिएको हो। अध्यागमनको जरिवाना मिनाहा ,यात्रा प्रतिबन्ध हट्यो यस्तै ब्लडमनिको सजाय पाएपछि भिसा सकिएर अबैधानिक बनेका बिकले युएईको अध्यागमन बिभाग लाई बुझाउनु पर्न जरिवाना बापतको रकम ७२ हजार ८ सय दिर्हाम्स दूतावासको पहलमा मिनाहा गर्न सफल भएको दूतावासका कार्यवाहक राजदूत सागर फुयालले जानकारी दिएका छन्। अदालतको प्रक्रिया पूरा गरेपनी अध्यागमनको जरिवानाका कारण केहि दिन रोकिएका बिकलाइ दूतावासको पहलमा सबै प्रक्रिया पूरा गरि उनिमाथी लागेको यात्रा प्रतिबन्ध (ब्यान्ड ) समेत हटाउन सफल भएको राजदूत फुयालको भनाइ छ। बिक अब कुनैपनी दिन स्वदेश फर्किन सक्ने छन भने, अभियान लाई सफल पार्न साथ सहयोग गर्न सबैलाई दूतावासले धन्यवाद समेत दिएको छ।

पदपूर्ति तथा बढुवा समिति, सानोठिमी, भक्तपुर (सीटीभीटी) ले खुला तथा समावेशी प्रतियोगितात्मक लिखित परीक्षामा उत्तीर्ण हुन सफल भएका उम्मेदवारहरुलार्इ अन्तर्वार्ताका लागि निम्न मिति, समय र स्थानमा उपस्थित हुनका लागि सूचना प्रकाशित गरिएको छ । बाँकी वितरण तलको सूचनामा हेर्नुहोस्-

दार्चुला, असार ११ । जिल्लाको मालिकार्जुन गाउँपालिका-३ मा हेपाटाइटिससँग मिल्दोजुल्दो रोग देखा परेको छ । एकैचोटी सो ठाउँका पाँच जनामा हेपाटाइटिस रोगको जस्तै लक्षण देखा परेको जिल्ला स्वास्थ्य कार्यालयका निमित्त प्रमुख डा. सुरेन्द्रप्रसाद भट्टले बताउनुभयो । उपचारका लागि स्वास्थ्यचौकीमा पुगेका बिरामीमा एकैखाले लक्षण देखा परेकाले रोग देखिएको हो । उनीहरुमा आँखा पहेँलो हुने, ज्वरो आउने, वाकवाकी लाग्नेलगायतका लक्षण देखिएका छन् । आज चिकित्सकको टोली रोग देखा परेको क्षेत्रमा स्थलगत निरीक्षणका लागि जाने तथा रोगको निदानलगायतका बारेमा अध्ययन अनुसन्धान गर्ने डा. भट्टले बताउनुभयो । हेपाटाइटिस भाइरसद्वारा हुने सरुवा रोग हो । यस रोगले मानिसको कलेजोमा असर गर्ने गर्दछ । अन्य मौसमभन्दा वर्षात्को समयमा यस्तो रोग बढी देखा पर्दछ । यसको बेलैमा उपचार भएन भने लिभर क्यान्सर तथा सिरोसिस अफ लिभर हुने सम्भावना हुन्छ । मानव शरीरमा महत्वपूर्ण अंगका रुपमा रहेको कलेजो सुन्निएको अवस्था नै हेपाटाइटिस हो । विभिन्न विषाणुको संक्रमण, औषधिको प्रयोग, क्यान्सर आदि यस रोगका कारक भएको डा. भट्टको भनाइ छ । -रासस

काठमाडौं, असार ७ । कानून, न्याय तथा संसदीय मामिला मन्त्रालयले द्वन्द्वकालका गम्भीर मानव अधिकार उल्लङ्घनका घटनालाई क्षमा नदिने गरी कानून बनाउने तयारी गरेको छ । मानवअधिकारको गम्भीर उल्लङ्घनका घटना, गैरकानूनी हत्या, व्यक्ति बेपत्ता पार्ने, यातना दिने र जबर्जस्ती करणी वा अन्य यौनजन्य हिंसामा पीडित र पीडकबीच सहमति भए पनि मेलमिलाप हुन नसक्ने गरी मन्त्रालयले कानून निर्माण गर्ने तयारी गरेको हो । संक्रमणकालीन न्यायका लागि गठित दुई आयोगको ऐन पहिलो संशोधनका बारेमा जानकारी दिँदै कानून, न्याय तथा संसदीय मामिलामन्त्री शेरबहादुर तामाङले भन्नुभयो, “मानवधिकारको गम्भीर उल्लङ्घनका घटनामा पीडक र पीडितबीच सहमति भए पनि मेलमिलाप हुँदैन, आयोगले पनि क्षमा दिन सक्दैन ।” बेपत्ता पारिएका व्यक्तिको छानविन र सत्य निरुपण तथा मेलमिलाप आयोग ऐन, २०७१ लाई संशोधन गरेर ‘संक्रमणकालीन न्यायको सम्बन्धमा व्यवस्था गर्न बनेको ऐन’ नाम राखिएको छ । बेपत्ता पारिएका व्यक्तिको छानविन, सत्य निरुपण तथा मेलमिलाप आयोग ऐनलाई संशोधन गर्न बनेको विधेयकमा क्षमा दिन सक्ने कुरामा पनि तोकिएको शर्तसहित आयोगले तोकेको अवधिमा निवेदन दिनुपर्नेछ । संशोधन विधेयकमा परिपूरण भन्नाले मनोसामाजिक विमर्श, अन्तरिम राहत, क्षतिपूर्ति, पुनःस्थापना, सुविधा, सहुलियत वा अन्य व्यवस्था सम्झनुपर्छ भनी उल्लेख छ । द्वन्द्वकालको समयमा भएका गम्भीर मानवअधिकार उल्लङ्घनका विषयमा छुट्टै विशेष अदालत गठन गरी सुनुवाइ हुनेछ । सो अदालत गठनपछि आयोगले मुद्दा चलाउन सक्नेछ । बलात्कार वा यौनजन्य हिंसामा अन्तरिम राहत दिने व्यवस्था र हद म्याद नलाग्ने व्यवस्था विधेयकमा गरिएको छ । जुन अघिल्लो ऐनमा व्यवस्था थिएन । द्वन्द्वकालमा बलात्कार तथा यौनजन्य हिंसामा परेका पीडितले अहिलेसम्म अन्तरिम राहत पनि पाएका छैनन् । आयोगले गरेको छानविन तथा अनुसन्धानबाट सशस्त्र द्वन्द्वका क्रममा भएका गम्भीर मानवअधिकार उल्लङ्घनको कार्यमा संलग्न देखिएका व्यक्ति उपर मुद्दा चलाउन सम्बन्धित घटनाको अनुसन्धान प्रतिवेदन र प्रमाणसहित महान्यायाधिवक्तासमक्ष सिफारिस गर्नुपर्ने छ । मुद्दा चलाउन सिफारिस गर्दा घटनाको सम्बन्धमा निजले आफूले थाहा भएसम्मको सत्यतथ्य विवरण आयोगसमक्ष पूर्णरुपमा प्रकट गरी सो विवरण आयोगमा अभिलेखन गराएको, घटनाको निजउपर लागेको सर्कुलरको आरोपको सम्बन्धमा निजले सत्यतथ्य व्यक्त गरी छानविन तथा अनुसन्धानमा सहयोग पु¥याउनुपर्नेलगायत व्यवस्था गरिएको छ । दुवै आयोगलाई दुई वर्षका लागि काम पूरा गर्न समय तोकिएको भए पनि तीन वर्ष बितेर आगामी माघ २६ सम्मका लागि एक वर्ष समय थप गरिएको छ । मन्त्री तामाङले द्वन्द्वका घाउहरु शारीरिक, मानसिक रुपमा निको पार्नुपर्ने र सरकारले यसलाई गम्भीरताका साथ लिएर नीतिगत रुपमा व्यवस्था गर्न लागेको बताउँदै यो प्रारम्भिक मस्यौदा भएको हुँदा सरोकारवाला पक्षको राय, सल्लाह र सुझाव लिएरमात्र अन्तिम रुप दिनेछ भन्नुभयो । विधेयकमा सर्वोच्च अदालतको आदेश, अन्तर्राष्ट्रिय कानूनलगायतलाई आधार बनाएर तयार गरिएको छ । राष्ट्रिय मानवअधिकार आयोगका अध्यक्ष अनुपराज शर्माले संक्रमणकालीन न्याय गर्न बनेको विधेयकका विषयमा सातै प्रदेशमा बृहत् छलफल गर्नुपर्ने उल्लेख गर्दै त्यसका लागि आयोग सहजीकरण गर्न तयार रहेको बताउनुभयो । उहाँले भन्नुभयो, “द्वन्द्वका समयमा राज्यपक्षबाट, विद्रोहीपक्षबाट भएका घटना छन्, त्यसमा पीडित को को हुन् ? बाल सैनिक पनि पीडित हुन् कि होइनन् ? त्यसतर्फ पनि ध्यान दिनुपर्छ ।” द्वन्द्वपीडित साझा चौतारीका संरक्षक सुमन अधिकारीले दुवै आयोगको कामप्रति पूर्णरुपमा आशावादी हुन सकेको हुँदा कानूनी रुपमा स्पष्ट व्यवस्था गरेर पीडितलाई न्याय दिनुपर्ने सुझाव दिनुभयो । प्रारम्भिक मस्यौदाका रुपमा मन्त्रालयले सो विधेयक सार्वजनिक गरेको हो । सरोकारवाला पक्षसँग बृहत् छलफल गरेरमात्र अन्तिम रुप दिने तयारी रहेको कानून, न्याय तथा संसदीय मामिला मन्त्रालयका प्रवक्ता रमेश ढकालले जानकारी दिनुभयो ।

नेपालगञ्ज, असार ५ । नेपालगञ्जको सिंग्नेट कृष्णा होटलमा गएराति पत्रकार अनुपासिंह राजवंशीको निधन भएको छ ।  होटलले आयोजना गरेको स्विमिङ पुल डान्स पार्टीमा साथीहरुसँग डान्स गर्ने क्रममा लड्नु भएकी पत्रकार राजवंशी स्थानीय नेपालगञ्ज शिक्षण अस्पतालमा उपचारका क्रममा मृत्यु भएको हो । प्रहरीले मृतक पत्रकार सिंहको शव आजै परीक्षण गर्न भेरी अञ्चल अस्पताल पठाएको छ भने घटनाबारे अनुसन्धान पनि शुरु गरेको छ । जिल्ला प्रहरी कार्यालयका प्रमुख प्रहरी उपरीक्षक टेकबहादुर तामाङले घटनाबारे अनुसन्धान भइरहेको र परीक्षणपछि पत्रकार राजवंशीको शव आफन्तलाई बुझाइने छ भन्नुभयो । स्थानीय खजुरा गाउँपालिका निवासी २४ वर्षीया पत्रकार राजवंशी नेपालगञ्जस्थित बागेश्वरी केबल टेलिभिजन र बागेश्वरी एफ एममा समाचार वाचन गर्नुहुन्थ्यो । केही महिनाअघि मात्र उहाँले सोही होटलमा कार्यरत सञ्जय श्रेष्ठसँग विवाह गर्नुभएको थियो ।

पर्वत, असार ५ । साथीहरुको कुटाइबाट मलेसियामा ज्यान गुमाएका पर्वतका युवा किशोर केसी (नसिब) को शव तीन हप्तापछि नेपाल ल्याइएको छ । पर्वतको मोदी गाउँपालिका-५, बाजुङ धमिलपानी गाउँका मृतक केसीको शव सोमबार बिहान घरमा आएको हो । गत जेठ १५ गते साथीहरुले कुटेरै केसीको हत्या गरेका थिए । मृतक केसीको सोमबार बिहान मोदीखोलामा दाहसंस्कार गरिएको छ । बाबु भीमबहादुर केसीले कान्छा छोरा नसिबको शवमा दागबत्ती दिनुभयो । रोजगारीका लागि विदेश गएका युवाको अल्पायुमै आफ्नै साथीले कुटेर हत्या गरेपछि सिंगो गाउँ शोकमा डुबेको छ । मृतकको शव गाउँमा आएपछि सयौँ गाउँले श्रद्धाञ्जलि दिन पुगेका थिए । “सिंगो गाउँ नै शोकमा डुबेको थियो”, स्थानीयवासी तथा नेपाल कम्युनिष्ट पार्टी ९नेकपा०, पर्वतका नेता भक्त कँुवरले भन्नुभयो “शव देखेपछि आँशु नझार्ने कोही भएन ।” रोजगारीकै लागि मलेसिया पुगेका पूर्वी नेपालका चारजनाले नसिवमाथि आक्रमण गरेका थिए । सँगै काम गर्ने नेपाली युवाले कुटपिट गर्दा गम्भीर घाइते भएका केसीको मलेसियाको पुत्रोदय अस्पतालमा उपचारका क्रममा मृत्यु भएको थियो । साथीहरुले रडले प्रहार गर्दा केसीको पेटमा गहिरो चोट लागेको थियो ।     मृतक किशोरको तस्वीर बीस महिनाअघि रोजगारीका लागि मलेसिया पुगेका केसी परिवारका कान्छा सन्तान हुन् । उनी अविवाहित थिए । उनका पिता भीमबहादुर केसी पनि वैदेशिक रोजगारीमा जाने आउने गरिरहनुभएको थियो । केसी कुटपिट गरी हत्या गर्ने साथीहरु चारैजना प्रहरी नियन्त्रणमा रहेपनि एकजनालाई दोषी देखाएर अन्य उम्केको पाइएको छ । चारैजना दोषी भएपनि एकजनालाई जिम्मेवारी स्वीकार गर्न लगाई अन्य रिहा भएको सूचना आएको नेता भक्त कँुवरले बताउनुभयो । उहाँले भन्नुभयो, “अपराधमा चारैजना संलग्न भएकाले उनीहरुका विरुद्ध कानूनी लडाइँ लड्नु पर्ने अवस्था आएको छ ।” रासस

काठमाडौं, असार १ । प्रस्तावित पूर्व पश्चिम-रेलमार्ग अन्तर्गत कैलाली जिल्लाका केही क्षेत्रमा रेलमार्ग बनाउन कठिन हुने भूभाग फेला परेको रेल विभागका अधिकारीहरूले बताएका छन्। बुटवलभन्दा पश्चिम खण्डको विस्तृत परियोजना प्रतिवेदन तयार पार्ने काम भइरहँदा कैलालीको शिवगंगा र चौमाला क्षेत्रको जमिन मुनि निकै पानी रहेकाले त्यसले ठूलो प्रविधिक चुनौती सृजना गर्न सक्ने बताइएको छ। पूर्व-पश्चिम रेलका लागि हाल २५ किलोमिटर क्षेत्रमा रेलको लाइन निर्माण गरिरहेको रेल विभागले बुटवलदेखि कन्चनपुरको गड्डाचौकीसम्मको झन्डै ४ सय किलोमिटरको विस्तृत परियोजना प्रतिवेदन बनाउने काम गरिरहेको छ। त्यसका लागि रेखाङ्कन सकेर हाल माटो परीक्षण भइरहेको रेल विभागका अधिकारीको भनाइ छ। यसरी माटो परीक्षण गर्दै जाँदा कैलालीमा रेलमार्ग बनाउन कठिन हुने जमिन फेला परेको बिहीवारमात्रै उक्त क्षेत्रबाट काठमान्डू फर्किएका विभागका वरिष्ठ डिभिजनल इञ्जिनियर प्रकाशभक्त उपाध्यायले बताए। प्राविधिकहरूका अनुसार उक्त क्षेत्रमा विगतमा पूर्व पश्चिम सडक अन्तर्गत पुल बनाउँदा पनि समस्या उत्पन्न भएको थियो। तर रेलमार्गको कुनै पनि एउटा क्षेत्रमा समस्या देखिँदा त्यसको असर सबैतिर पर्ने भएकाले विभागका प्राविधिकहरुले अब विकल्पको खोजी गर्नु पर्ने बताएका छन्। त्यसका लागि केन्द्रीयस्तरमा विभिन्न निकायसँग छलफल गरेर समाधान निकालिने उपाध्यायले बताए। -बीबीसी

सिन्धुपाल्चोक, जेठ ३१ ।  मेलम्ची खानेपानी आयोजनाको सुरुङ निर्माण कार्यमा अवरोध सिर्जना भएको छ । स्थानीयले आफूहरुसँग गरेको सहमति आयोजनाले लागू नगरेका कारण आफूहरु खानेपानीको समस्यामा परेको भन्दै सिन्धु अडिट मार्गमा सुरुङ निर्माण कार्य ठप्प पारेका हुन् । स्थानीयहरूले विगतमा भएका विभिन्न सहमति अनुसार आयोजनाले एउटा पनि काम नगरेको भन्दै बुधबारबाट माग पूरा नहुन्जेलसम्मका लागि सिन्धु साइटको काम ठप्प पारेका हुन् । बुधबारदेखि सुरु भएको विरोध आफूहरुको माग पूरा नभएसम्म स्थगित नहुने स्थानीयको भनाई छ । परियोजनाले पटक–पटक ताकेता गर्दा समेत आश्वासन मात्रै देखाउने र काम भने नगर्ने गरेको उनीहरूको आरोप छ । सुरुङ निमार्ण कार्यले खानेपानीको मुहान सुकेको छ । पहिला गाउँमा पर्याप्त मात्रामा पानी भएकोमा अहिले खानेपानी लिन समेत करिब आधाघण्टा टाढा हिँड्न पर्ने भन्दै स्थानीयले दुखेसो गरेका छन् । निर्माण कम्पनीलाई सम्झौता अनुसार काम गर्न पटक–पटक भने पनि हुन्छ र गछौँ भनेर मात्रै टार्ने गरेकोले यसपटक पनि फेरि आन्दोलनमा उत्रन परेको प्रभावित स्थानीयको भनाई छ  । यस्ता आन्दोलन र सम्झौता धेरै पटक गरेको र यो पटक भने सम्झौता अनुसार काम नभएसम्म आन्दोलन जारी राख्ने सिन्धु सरोकार समितिका अध्यक्ष कुमारी तामाङले  जानकारी दिए । योभन्दा अघि भएका सहमतिहरुमा स्थानीय युवालाई रोजगारीमा प्राथमिकता दिइने, काम गर्दा गर्दै मृत्यु हुनेहरुलाई उचित क्षतिपूर्ति दिनेलगायतको सहमति भए पनि अहिलेसम्म सहमति अनुसार कुनै काम नभएको थकनीका प्रभावित नेत्रबहादुर तामाङले गुनासो गरे । सुरुङ निमार्णले गर्दा हेलम्बुका विभिन्न स्थानका नागरिकरूमा पनि असर परेका छन् । खानेपानीको मुहान सुक्नुका साथै सुरुङ निमार्णमा प्रयोग हुने विभिन्न केमिकलहरुको कारणले गर्दा खोलामा रहेका जलचर प्राणीहरु समेत मर्ने गरेका छन् । सुरुङ निमार्ण कम्पनीले सम्झौता अनुसार काम नगरेको र यसले गर्दा करिब हेलम्बुका विभिन्न गाउँका ३५० भन्दा धेरै घरधूरीहरु प्रभावित भएको हेलम्बु गाँउपालिका ५ नम्बर वडाका वडा अध्यक्ष हर्कबहादुर तामाङले जानकारी दिएका छन् । यस अघि भूकम्प, नाकाबन्दीलगायत विविध कारणले समयमै काम गर्न नपाउँदा आफूलाई घाटा भएको भन्दै ठेकेदार कम्पनी इटालियन कोअपेरटिभ मुरातोरी एन्ड सिमेन्टिष्टि (सीएमसी) ले आयोजनासँग एक अर्ब ६५ करोड रुपैयाँ क्षतिपूर्ति दाबी गरेको थियो । त्यही दाबीअनुसार आयोजना र ठेकेदारबीचको विवाद टुंग्याउन गठित विवाद निरुपण समिति (डिस्प्यूट एड्जुडिकेसन बोर्ड–डिएबी) ले छलफल थालेको थियो । छलफलपछि समितिले मंगलबार ठेकेदारको म्याद थप र क्षतिपूर्ति भुक्तानी प्रक्रिया अगाडि बढाउने निर्णय गरेको आयोजनाले जनाएको छ । आयोजनाका अनुसार दुई सय १२ दिन अर्थात सात महिना म्याद थप गरिएको छ भने क्षतिपूर्तिस्वरुप एक अर्ब तीन करोड रुपैयाँ दिने निर्णय समितिबाट भएको छ । समयमा काम सम्पन्न नगर्ने ठेकेदारलाई कारबाही गर्नुको सट्टा आयोजनादेखि मन्त्रालयसम्मका कर्मचारीको मिलेमतोमा म्याद थप र क्षतिपूर्ति दिने निर्णय भएको स्रोतको दाबी छ । तर ठेकेदार कम्पनी भने अदालत जाने तयारीमा रहेको पनि बताइएको छ । आउँदो दशैँमा काठमाडौंमा मेलम्चीको खानेपानी पुऱ्याउने भने पनि यस आयोजनाको काम हेर्दा यो वर्ष पनि खानेपानी काठमाडौं पुग्न नसक्ने देखिन्छ । निर्माण कम्पनीले पुरानै काम गर्ने शैलीका कारण समयमा काम सम्पन्न हुने सम्भावना न्यून रहेको हो ।

भोपाल । सौतेला बाबुले नाबालिका छोरीमाथि १२ दिनसम्म लगातार बलात्कारको गरेको खुलासा भएको छ । बाग सेवनिया प्रहरीले छोरीमाथि बलात्कार गरेको आरोपमा पक्राउ गरेको छ । प्रहरीका अनुसार बलात्कृत भएकी १७ वर्षीया किशोरी हाल कक्षा १० मा अध्ययन गर्ने छात्रा रहेकी जनाएका छन् । उनी आफ्नो सौतेला बाबुुसँग रहँदै आएकी छिन् । उनकी आमाले ६ वर्षपहिले पहिलो श्रीमान छोडेर अर्काे विवाह गरेको जानकारी दिएका छन् । त्यस बेलादेखि नै बागसेवनियामा रहँदै आएको प्रदीप कुमारसँग बस्दै आएकी हुन् । प्रदीप मुलतः झाँसीमा बस्ने गर्दछन् । उनी मजदुरीको काम गर्ने गरेका छन् । पीडित गत मे १ मा आफ्नो आमालाई भेट्नका लागि इलाहावाददेखि भोपाल आएकी थिइन् । १२ दिनसम्म लगातार सौतेला बाबु प्रदीप कुमारले नाबालिका छोरीमाथि बलात्कार गर्दै आइरहेका थिए । शनिबार पीडित नाबालिकाले प्रहरी चौकीमा गर्इ आफूमाथि सौतले बाबुले बलात्कार गरेको भन्दै रिपोर्ट दर्ता गरेकी छिन् । प्रहरीले रिपोर्ट दर्ता गरेपछि विभिन्न धारा–उपधाराअन्तर्गत मुद्दा दर्ता दायर गरी बलात्कारी बाबुलाई पक्राउ गरेका छन् । मालिकले मजदुरकी श्रीमतीमाथि बलत्कार, छोरीलाई मार्ने र श्रीमानलाई कामबाट निकाल्ने धम्की सागर निवासी २५ वर्षीया युवक आफ्नो श्रीमती र बच्चाको साथ बैरागढ कलामा बस्दै आएका छन् । मालिक बब्लुको खेतमा बनेको घरमा बसीमा दिनरात मजदुरीको काम गर्ने गर्दथे । खजुरी सडक प्रहरीका अनुसार २ जुनको राति करीब ९ बजे मजदुरको श्रीमती एक्लै भएको मौकामा बलत्कार गरेकाे छ । त्यही बेला त्यो मालिक बब्लुले छोरीलाई मार्ने र श्रीमान्लाई कामबाट निकाल्ने धम्की दिएका हुन् । भोलिपल्ट महिलाले आफ्नो श्रीमान्लाई राति आफूमाथि भएको घटना सबै बताइन् । दुई दम्पत्ती भोलिपल्ट प्रहरी चौकी जान खोज्दा बब्लु खेतमा आएर बाटो छेकी उनीहरुलाई जान दिएनन् । घटनाको दुई दिनपछि साँझ बब्लू फेरि खेतमा गई काम गरिरहेको श्रीमान्लार्इ नशालु पदार्थ मिसाई अल्कोहल खान दिए । त्यसपछि ती नशालु पदार्थ मिसाइएको अल्कोहल पिएको लगत्तै श्रीमान् बेहोश भएपछि त्यही मौकामा फेरि श्रीमतीलाई बलात्कारको शिकार बनाए । यसरी बब्लुले ती मजदुर श्रीमान र श्रीमतीमाथि दिनप्रतिदित अन्याय गर्दै अाइरहेका थिए । एकदिन ती दुई दम्पत्तीले राति मौका छोपेर छोरी लिएर त्यहाँबाट निस्की भागेका छन् । गैरतगञ्ज प्रहरी चौकी पुगे ती दुई दम्पत्तीलाई आफ्नो मालिक बब्लुले श्रीमान्लाई नशालु पदार्थ खुवाई बेहोश बनाई श्रीमतीमाथि लगातार बलात्कार मुद्दा दर्ता गरेको छ । खजुरी प्रहरीले बलात्कार र एससीएसीटी समेत विभिन्न धारा–उपधाराअन्तर्गत घटना प्रकरण दर्ता गरेका छन् । बलात्कारीलाई खोज्ने क्रम जारी नै छ । दैनिकभाष्करबाट

काठमाडौं । साताको तेस्रो दिन मंगलबार सुनको मूल्य यथावत नै छ । आज छापावाला सुन प्रतितोला ५८ हजार ७ सय रुपैयाँमै कारोबार भइरहेको छ । सोमबार सुन प्रतितोला ५८ हजार ७ सय रुपैयाँमा कारोबार भएको थियो । तेजावी सुन ५८ हजार ६ सय रुपैयाँमा कारोबार भएको थियो भने आज पनि सुन प्रतितोला ५८ हजार ४ सय रुपैयाँमै कारोबार भइरहेको नेपाली सुनचाँदी व्यवसायी महासंघले जनाएको छ । त्यसैगरी, आज पनि चाँदीको मूल्य यथावत नै रहेको छ । सोमबार चाँदी प्रतितोला ७७० रुपैयाँमा कारोबार भएको थियो भने आज पनि प्रतितोला चाँदीको मूल्य ७७० रुपैयाँमै कारोबार भएको छ ।

काठमाडौं । साताको दोस्रो दिन सोमबार सुनको मूल्य दुई सय रुपैयाँले घटेको छ । आज छापावाला सुन प्रतितोला ५८ हजार ७ सय रुपैयाँमा कारोबार भइरहेको छ । आइतबार सुन प्रतितोला ५८ हजार ९ सय रुपैयाँमा कारोबार भएको थियो । तेजावी सुन ५८ हजार ६ सय रुपैयाँमा कारोबार भएको थियो भने आज सुन प्रतितोला ५८ हजार ४ सय रुपैयाँमा कारोबार भइरहेको नेपाली सुनचाँदी व्यवसायी महासंघले जनाएको छ । त्यसैगरी, सोमबार चाँदीको मूल्य भने यथावत नै रहेको छ । आइतबार चाँदी प्रतितोला ७७० रुपैयाँमा कारोबार भएको थियो भने आज पनि प्रतितोला चाँदीको मूल्य ७७० रुपैयाँै कारोबार भएको छ ।

काठमाडौं, वैशाख २३ । सञ्चार तथा सूचना प्रबिधि मन्त्रालयले यस वर्षको राष्ट्रिय पत्रकारिता र सम्मानका लागि पाँच जना पत्रकारको नाम छनौट गरेको छ । मन्त्रालयका सचिव महेन्द्रमान गुरुङको संयोजकत्वमा गठित समितिको सिफारिशअनुसार दुई जनालाई राष्ट्रिय पत्रकारिता पुरस्कार र तीन जनालाई बरिष्ठ पत्रकार सम्मान गर्ने निर्णय गरिएको हो । जसअनुसार यस बर्ष नेपाल पत्रकार महासंघका पूर्वसभापति डा. महेन्द्र बिष्ट र डा. राजेश अहिराजलाई राष्ट्रिय पत्रकारिता पुरस्कार प्रदान गर्ने निर्णय भएको छ । यसैगरी बबिता बस्नेत, कौशल चेम्जोङ र नीमबहादुर बुढाथोकीलाई बरिष्ठ पत्रकार सम्मान प्रदान गर्न लागिएको हो । उनीहरुलाई सोमवार राष्ट्रपति भवन शीतलनिवासमा बिशेष समारोहको आयोजना गरी राष्ट्रपति बिद्यादेवी भण्डारीले सो पुरस्कार तथा सम्मान प्रदान गर्ने कार्यक्रम रहेको छ । सञ्चार राज्यमन्त्री गोकुल बाँस्कोटाले पुरस्कार छनोटका लागि सचिव गुरुङको नेतृत्वमा बरिष्ठ पत्रकार तथा प्रेस चौतारी नेपालका पूर्वअध्यक्ष शम्भु श्रेष्ठ, सामुदायिक रेडयो प्रशारक संघ, एकोर्यावका पूर्वअध्यक्ष रघु मैनाली र सञ्चारिक समुहकी अध्यक्ष निर्मला शर्मा सदस्य रहेको समिति गठन गर्नुभएको थियो । प्रेस काउन्सिलका कार्यबहाक अध्यक्ष किशोर श्रेष्ठ र नेपाल पत्रकार महासंघका सभापति गोबिन्द आचार्य पदेन सदस्य रहनुभएको सो समितिमा सञ्चार मन्त्रालयका सहसचिव प्रेमकुमार श्रेष्ठ सदस्य सचिव हुनुहुन्थ्यो । समितिले सर्वसम्मत रुपमा पाँच जना पत्रकारको नाम सिफारिश गरेको हो । पुरस्कृत सवै पत्रकार नेपाली पत्रकारिता क्षेत्रमा स्थापित नाम हुन ।

मलेसिया, वैशाख २० । नेपाल आदिवासी जनजाती पत्रकार महासंघ (फोनिज) को शाखा मलेसियामा गठन हुने भएको छ। ६ मईका दिन मलेसियाको राजधानी क्वालालम्पुरस्थित द–फाइभ एलिमेन्ट होटेलमा आदिवासी जनजाती पत्रकार संघ मलेसिया गठन हुन लागेको हो । मलेसियामा रहेर पत्रकारिता गरि रहेका र पत्रकारिता गर्न इच्छुक नेपाली आदिवासी जनजाती युवा (युवतीहरु लाई एकजुट गरि आदिवासी जनजातिहरुको माग,मुद्दा र समाचारहरुलाई मुलधारका भनिएका संचारगृह र संचारकर्मीहरु द्वारा न्यायोचित स्थान नदिएको, स्थान दिई हाले पनि मुख्य मुद्दा र बिषयहरुलाई पाखा लगाइ अपुरो समाचार र सन्देशहरु मात्र प्रवाह भैरहेको हुदा आदिवासी जनजातिहरुको माग मुद्दा र गतिविधीहरुलाई प्रभावकारी रुपमा प्रवास बाटै सबै नेपालीहरु समक्ष पुर्‍याउन आदिवासी जनजातिहरुको छुट्टै संगठनको आवश्यकता महसुस गर्दै मलेसियामा पनि नेपाल आदिवासी जनजाति पत्रकार महासंघ मलेसिया (फोनिज) शाखा गठन गर्न लागेको सम्योजकको भनाइ छ । प्रथम अधिवेशनको उद्घाटनमा नेपालबाट आदिवासी जनजाती पत्रकार महासंघका सङ्गठन सचीव मिलन लिम्बु र लिम्बुवान पत्रकार संघका अध्यक्ष देवेन्द्र खापुङको विशेष उपस्थिति रहने भएको छ । अधिबेशनको तयारी पूरा भैसकेको र मलेसियामा रहेका सम्पुर्ण संघसंस्था,तथा विभिन्न पार्टीका भातृ संगठनहरुलाई समेत पत्राचार गरि सकिएको अधिबेशनका सम्योजक तथा पत्रकार सुनाखरि मगर ले एभरेस्ट दैनिक लाई जानकारी दिएका छन ।