म्याग्दी । म्याग्दीको मालिका गाउँपालिकामा बन्द अवस्थामा रहेको ओखरबोट तामाखानी पुनःसञ्चालनका लागि अन्वेषण सुरु भएको छ । तामाखानी अन्वेषण गर्न खानी तथा भूगर्भ विभागबाट अनुमति प्राप्त एमस दोङयी मिनरल्स प्रालिका भूगर्भविद् सम्मिलित टोलीले स्थलगत अध्ययन थालेका हुन् । मालिका गाउँपालिका– वडा नं ३ र ४ को सिमानामा ओखरबोट तामाखानी रहेको बताइएको छ । तामाखानीको खोजतलास तथा उत्खननका लागि पहिलो चरणमा खानीमा तामाको मात्रा पहिचान र उत्खननका क्रममा हुनसक्ने वातावरणीय प्रभाव तथा त्यसको असर न्यूनीकरणका उपायका विषयमा अध्ययन थालिएको भूगर्वविद् रोनित पौडेलले जानकारी दिए । “प्रारम्भिक वातावरणीय परीक्षण प्रतिवेदन पारित भएपछि खानीमा तामाको खोज र अनुसन्धान हुनेछ,” उनले भने, “खानीको खोजतलास र सम्भाव्यता अध्ययन गरेपछि अर्को चरणमा उत्खननको प्रक्रिया अघि बढ्छ ।” ओखरबोटको खानीबाट विसं २०२८ सम्म स्थानीय प्रविधिको प्रयोग गरेर तामा निकाल्ने गरिन्थ्यो । प्रविधिको अभाव र आम्दानी भन्दाबढी राज्यलाई कर तिर्नुपर्ने अवस्था आएपछि त्यसबेला तामाखानी बन्द भएको मालिका गाउँपालिका–३ का ७२ वर्षीय विसराम पटेलले बताए ।  यस तामाखानीमा दैनिक दुई सय भन्दा बढी कामदारले काम गर्नुका साथै प्रत्येक दिन सात/आठ धार्नीसम्म तामा निकाल्ने गरिएको पटेलले जानकारी दिए। तामाखानीमा दुईवटा मुहान रहेका छन् । ती मुहानको लम्वाइ दुई सय ५० देखि पाँच सय मिटरसम्म रहेको छ । त्यहाँ अझैसम्म पनि तामाका धाउ देख्न सकिन्छ । दुई सय मिटरभित्रसम्म जान सकिने तामाखानीको सुरुङ छन् । वातावरणीय प्रभाव मूल्याङ्कनका लागि कम्पनीले सार्वजनिक सुनुवाइका साथै लिखित रुपमा प्रभावित क्षेत्रका बासिन्दाबाट सुझाव सङ्कलन गरिसकेको मालिका–३ का वडाध्यक्ष मोतिप्रसाद बुढाले बताउनुभयोए । खानी उत्खननका लागि अध्ययन थालिएकोमा खुसी भएका प्रभावित क्षेत्र ओखरबोट र खटेनका बासिन्दाले वातावरणीय र विपद्जन्य घटना हुन नदिन सतर्कता अपनाउन तथा रोजगारीमा प्रभावितलाई प्राथमिकता दिन माग गरिएको स्थानीय दीपक पटेलले बताए । स्थानीय खनेलहरुले रैथाने प्रविधिबाट उत्खनन गरिएको मालिका गाउँपालिका– ४ (साविक ओखरबोट–८) खटेनडाँडास्थित तामाखानी मुख्य हो । धवलागिरि गाउँपालिका–१ गुर्जा, ५ मल्कवाङ, ७ मच्छिम, रघुगङ्गा गाउँपालिका–६ ठाडाखानी, ८ चौरसहित २१ ठाउँमा तामाखानी छन् । खानीहरु सञ्चालन हुन नसक्दा खानी उत्खननमा पोख्त स्थानीय ‘खनेल’हरुको सीप पुस्तान्तरण हुनसकेको छैन । म्याग्दीमा बसोबास गर्ने अल्पसङ्ख्यक छन्त्याल जातीको परम्परागत पेसा खानी खन्ने थियो ।

काठमाडौं । भ्रष्टाचार, अव्यवस्था र सामाजिक सञ्जाल बन्द गर्ने सरकारको निर्णयविरुद्ध नयाँ पुस्ता (जेन जी) का युवाहरूले प्रदर्शन सुरु गरेका छन्। उनीहरू स्वतःस्फूर्त रूपमा काठमाडौंको माइतीघर मण्डलामा भेला भई प्रदर्शनमा उत्रिएका हुन्। प्रदर्शनकारीले ‘जेन जी पुस्ता चिच्याउँछ, भ्रष्टहरूलाई गिज्याउँछ’, ‘कता हिँडेको ट्याक्स लुटेर?’, ‘स्वतन्त्र आवाज हाम्रो अधिकार’, ‘स्टप करप्सन’ जस्ता नारा लेखिएका प्लेकार्ड बोकेका छन्। कतिपय युवा स्कूल र कलेजको पोशाकमा समेत सहभागी छन्। पहिले सामाजिक सञ्जालमा सीमित रहेको सरकारप्रतिको आक्रोशलाई जेन जी पुस्ताले सडकमा उतारेको हो। यो प्रदर्शनलाई विभिन्न राजनीतिक दल, जनप्रतिनिधि, कलाकार, पेशाकर्मी र स्वतन्त्र युवाहरूले समर्थन गरेका छन्।

गोरखा । पालुङटार नगरपालिका उपाध्यक्ष तथा नेसपा नेतृ सुशिला श्रेष्ठ नेपाल कम्युनिष्ट पार्टी (माओवादी केन्द्र) मा प्रवेश गर्नुभएको छ । जनतासँग माओवादी मध्यपहाडी (पुष्पलाल लोकमार्ग) जनजागरण अभियानका क्रममा उहाँ माओवादी केन्द्र प्रवेश गर्नुभएको हो । अध्यक्ष पुष्पकमल दाहाल ‘प्रचण्ड’ ले उहाँलाई पार्टीमा स्वागत गर्नुभयो । पार्टी प्रवेशपछि नेतृ श्रेष्ठले विभिन्न अनुभवका आधारमा नेसपा बाट देश र जनताको लागि ठोस काम गर्न नसकिएको महसुस भएकाले माओवादी केन्द्रमै फर्किएको बताउनुभयो । उहाँले माओवादी केन्द्रलाई आफ्नो पुरानो घरको रुपमा लिएर अब जनताको हितमा समर्पित भएर काम गर्ने प्रतिवद्धता व्यक्त गर्नुभयो । अध्यक्ष प्रचण्डले श्रेष्ठको आफ्नै घर आगमनले पार्टी संगठन थप सबल हुने विश्वास व्यक्त गर्नु का साथै अन्य नेताकार्यकर्तालाई पुरानै घर फर्किन अपिल गर्नुभयो ।

हुम्ला । जिल्लाभित्रका धेरै प्रहरी चौकी नाम एक स्थानमा भए पनि वास्तविक कार्यालय भने अर्कै स्थानमा सञ्चालनमा रहेका छ ।  प्रहरी नायब उपरीक्षक शङ्कर पोखरेलका अनुसार पाँचवटा प्रहरी चौकीमा यस्ता समस्या देखिएका छन् । साबिक गाउँ विकास समितिका नाममा स्थापना भएका चौकीहरूको नाम र हाल सञ्चालन भइरहेको कार्यालयको स्थान मिलाउनतर्फ पहल नहुँदा यो अवस्था आएको हो । २०३३ सालमा स्थापना भएको मेल्छाम प्रहरी चौकी अहिले चङ्खेली गाउँपालिका–४ पिप्लाङमा सञ्चालनमा छ । त्यस्तै, २०४७ सालमा स्थापना भएको ठेहे प्रहरी चौकी हाल सिमकोट गाउँपालिका–१ कुम्लिक जिउला ग्याग्रुमा छ, जबकि यसको नाम ठेहेकै नाममा रहँदै आएको छ । यस्तै, २०४९ सालमा स्थापना भएको श्रीनगर प्रहरी चौकी गल्फागाडमा सञ्चालनमा छ, जुन श्रीनगरबाट करिब तीन घण्टा टाढा पर्छ । विपरीत रूपमा, २०७६ सालमा स्थापना गरिएको गल्फागाड प्रहरी चौकी भने श्रीनगरमा सञ्चालनमा रहेको छ । डीएसपी पोखरेलले प्रहरी चौकीहरूलाई वास्तविक कार्यालय रहेको स्थानअनुसार नामाकरण गर्नेतर्फ सम्बन्धित निकायले ध्यान दिनुपर्ने आवश्यकता औंल्याएका छन् ।

पालुङटार । नेकपा (माओवादी केन्द्र)ले  सुरु गरेको  'जनतासँग माओवादी: 'मध्यपहाडी पुष्पलाल लोकमार्ग जनजागरण अभियान" अन्तरगत आज बिहानैदेखि गोरखाको पालुङटार भेटघाट कार्यक्रम सुरु भएको छ ।  अध्यक्ष पुष्पकमल दाहाल 'प्रचण्ड', वरिष्ठ उपाध्यक्ष नारायणकाजी श्रेष्ठ 'प्रकाश'सहितका पदाधिकारी रहेको टोलीले बिहानैदेखि नागरिकसँग भेटवार्ता थालेको हो ।  अध्यक्ष प्रचण्डले बिहान पालुङटारमा मर्निङ वाक गरेर जनतासँग भेटवार्ता थाल्नु भएको थियो । अहिले पनि जनसंवादलगायतका कार्यक्रम चलिरहेको छ । आज दिनभर प्रचण्डसहितको टोली गोरखाका विभिन्न कार्यक्रममा ब्यस्त हुनेछ ।   

काठमाडौँ । हाल मनसुनको न्यून चापीय रेखा पूर्वमा सरदर स्थानमा र पश्चिममा सरदरभन्दा दक्षिणतिर अवस्थित छ। मौसम पूर्वानुमान महाशाखाका अनुसार देशभर आंशिकदेखि साधारणतया बदलीको अवस्था छ। बागमती, गण्डकी, लुम्बिनी र सुदूरपश्चिम प्रदेशका केही स्थानमा हल्कादेखि मध्यम वर्षा भइरहेको छ। सोमबार दिउँसोको मौसम देशको पहाडी भू-भागमा साधारणतया बदली र बाँकी भू-भागमा आंशिक बदली रहनेछ। पहाडी क्षेत्रका केही स्थान र तराईका थोरै स्थानमा मध्यम वर्षाको सम्भावना छ। कोशी र बागमती प्रदेशका पहाडी भू-भागका एक-दुई स्थानमा भारी वर्षा हुन सक्ने महाशाखाले जनाएको छ। सोमबार रातिको मौसम राति कोशी, मधेस र बागमती प्रदेशको पहाडी भू-भागमा साधारणतया बदली रहनेछ भने बाँकी भू-भागमा आंशिक बदलीको अवस्था रहनेछ। कोशी, मधेस र बागमती प्रदेशको पहाडी क्षेत्रका केही स्थान र अन्य पहाडी तथा तराई क्षेत्रका थोरै स्थानमा मध्यम वर्षाको सम्भावना छ। कोशी प्रदेशको पहाडी र तराई भू-भागका एक-दुई स्थानमा भारी वर्षा हुन सक्ने सम्भावना रहेको छ।

काठमाडौं । प्रत्येक वर्ष आश्विन कृष्ण प्रतिपदादेखि सुरु हुने सोह्रश्राद्ध अर्थात् पितृ पक्ष आजदेखि विधिवत् सुरु भएको छ। नेपाल पञ्चाङ्ग निर्णायक विकास समितिद्वारा स्वीकृत पात्रोअनुसार आज प्रतिपदा तिथिको श्राद्ध अपराह्नसम्म गरिसक्नुपर्ने धर्मशास्त्रविद् प्राडा देवमणि भट्टराईले बताए। आश्विन कृष्ण प्रतिपदादेखि आश्विन शुक्ल प्रतिपदासम्मका १६ तिथिमा दिवंगत पितृलाई तर्पण, सिदादान र पिण्डदान गरी सम्मान गरिन्छ। यो समयलाई अपर वा प्रेत पक्ष पनि भनिन्छ। वैदिक सनातन हिन्दू परम्पराअनुसार चाडपर्व, यज्ञयागादी वा ठूला कार्यअघि पितृलाई श्रद्धापूर्वक सम्झने गरिन्छ। शास्त्रीय मान्यताअनुसार यो अवधिमा पितृले आश गरेको विश्वास गरिन्छ। धर्मशास्त्रविद् प्रा तोयराज नेपालका अनुसार, सोह्रश्राद्धले पितृप्रतिको दायित्व पूरा गर्नुका साथै पितृऋणबाट मुक्ति प्राप्त हुन्छ। श्राद्ध नगर्दा अक्षम्य दोष लाग्ने शास्त्रीय मान्यता छ। अपराह्नकालमा श्राद्ध गर्नुपर्ने र जाताशौच, मृताशौच वा पत्नी रजस्वला अवस्थाबाहेक यो कर्म छोड्न नहुने उनले बताए। कारणवश श्राद्ध रोकिएमा शास्त्रमा विभिन्न विकल्प छन्। पिताको तिथिमा श्राद्ध गर्नुपर्ने भए पनि, आपत् धर्मअनुसार आश्विन कृष्ण औँसीदेखि आश्विन शुक्ल पञ्चमीसम्म गर्न सकिन्छ। यो अवधिमा पनि सम्भव नभए कार्तिककृष्ण औँसी (लक्ष्मीपूजा) वा मङ्सिरसम्म (वृश्चिक सङ्क्रान्ति) गर्न सकिने धर्मसिन्धु ग्रन्थमा उल्लेख छ। थप विकल्पमा, आश्विन शुक्ल पञ्चमीपछिका अष्टमी, द्वादशी, औँसी, भरणी नक्षत्र वा व्यतिपात योग परेका दिन श्राद्ध गर्न सकिन्छ। यदि यी विकल्पमा पनि श्राद्ध सम्भव नभए, दैनिक १०८ मन्त्र जप १० महिनासम्म गरेर पितृ तृप्ति गराउन सकिने प्राडा भट्टराईले बताए। तर, कतिपय पुरोहितले शास्त्रविपरीत बिहानै श्राद्ध गर्न सुझाएकोमा त्यो ठीक नभएको समितिका अध्यक्ष प्रा शम्भुप्रसाद ढकालले स्पष्ट पारे। पितृ पक्ष समाप्तिपछि दुर्गा पक्ष अर्थात् बडादसैँ सुरु हुन्छ। ठूला चाडपर्वअघि पितृ तृप्तिका लागि सोह्रश्राद्ध गर्ने वैदिक सनातनी परम्परा छ।

काठमाडौँ । नेपाल कम्युनिस्ट पार्टी (माओवादी केन्द्र) का अध्यक्ष तथा पूर्वप्रधानमन्त्री पुष्पकमल दाहाल ‘प्रचण्ड’ ले सामाजिक सञ्जालमाथि सरकारले लगाएको रोक गलत भएको बताउनुभयो । उहाँले युवाहरूले भ्रष्टाचार र सामाजिक सञ्जाल अवरोधविरुद्ध गर्न लागेको प्रदर्शन स्वाभाविक भएको उल्लेख गर्नुभयो ।   आइतबार सामाजिक सञ्जाल फेसबुकमा स्ट्याटस लेख्दै अध्यक्ष प्रचण्डले सामाजिक सञ्जालमाथिको अवरोधलाई जनताको अभिव्यक्ति स्वतन्त्रतामाथिको प्रहार भएको भन्दै कडा आपत्ति जनाउनुभयो । “सामाजिक सञ्जालमाथि रोक लगाउने सरकारको कदम गलत छ। युवाहरूले भ्रष्टाचार र सामाजिक सञ्जाल अवरोधविरुद्ध गर्न लागेको प्रदर्शन स्वाभाविक छ,” उहाँले भन्नुभयो । उहाँले सरकारले प्रदर्शनमाथि बल प्रयोग गर्ने धृष्टता नगरोस् भन्दै भ्रष्टाचारविरुद्ध आफ्नो पार्टीको आन्दोलन निरन्तर जारी रहने स्पष्ट पार्नुभयो । “सरकारले बल प्रयोग गर्ने धृष्टता नगरोस्। भ्रष्टाचारविरुद्ध हाम्रो आन्दोलन निरन्तर जारी छ,” उहाँले भन्नुभयो । साथै, अध्यक्ष प्रचण्डले भ्रष्टाचारविरुद्ध जनतासँग मिलेर अघि बढ्ने प्रतिबद्धता व्यक्त गर्नुभयो र आन्दोलनलाई अझ प्रभावकारी बनाइने उहाँले बताउनुभयो ।

गोरखा । नेकपा (माओवादी केन्द्र)ले सुरु गरेको 'जनतासँग माओवादी: 'मध्यपहाडी पुष्पलाल लोकमार्ग जनजागरण अभियान' आज गोरखाको पालुङटार पुगेको छ ।  लमजुङमा विदाईसँगैअध्यक्ष पुष्पकमल दाहाल 'प्रचण्ड', वरिष्ठ उपाध्यक्ष नारायणकाजी श्रेष्ठ 'प्रकाश'सहितका पदाधिकारी रहेको टोलीलाई पालुङटारमा स्थानीयले भब्य स्वागत गरेका छन् ।  भोलि दिनभर टोलीले गोरखाका विभिन्न ठाउँमा जनभेटघाट, अन्तरक्रियालगायतका कार्यक्रम गर्नेछ ।  

लमजुङ । नेपाल कम्युनिष्ट पार्टी (माओवादी केन्द्र)का अध्यक्ष तथा पूर्वप्रधानमन्त्री पुष्पकमल दाहाल ‘प्रचण्ड’ ले जनतासँग माओवादी मध्यपहाडी (पुष्पलाल लोकमार्ग) जनजागरण अभियानले मुलुकभर व्यापक उत्साह र आशा जगाइरहेको बताउनुभएको छ। माओवादी केन्द्रका उपाध्यक्षहरू, महासचिवलगायतको उच्चस्तरीय टोलीसहित प्रचण्ड शनिबार लम्जुङको राइनास नगरपालिका आइपुग्दा स्थानीयवासीले बाजागाजा र परम्परागत लाखे नाचसहित भव्य स्वागत गरेका थिए। अध्यक्ष प्रचण्डले सम्बोधन गर्दै अभियान वर्षाका कारण केही समय स्थगित भएको भए पनि अपेक्षाभन्दा बढी उत्साहप्रद जनसहभागिताले पार्टीप्रति मात्र नभई जनतामाझ पनि नयाँ उर्जा थपिएको बताउनुभयो। उहाँले विगतमा हुलाकी राजमार्ग तथा मध्यपहाडी लोकमार्ग अभियानका क्रममा समेत जनतासँग प्रत्यक्ष संवाद गर्दै सहिद परिवारको घरमै बसेर उनीहरूको पीडा र अनुभव सुन्ने अभ्यास कायम राखिएको उल्लेख गर्नुभयो। “हामी हाम्रो वर्ग, हाम्रो विचार र जनतासँग टुटेको कडीलाई पुनः जोड्न आएका हौं,” अध्यक्ष प्रचण्डले राइनासको तीनपिप्लेमा आयोजित कार्यक्रममा भन्नुभयो। उनका अनुसार, अभियानका क्रममा कांग्रेस वा एमालेका स्थानीय जनप्रतिनिधिहरूले समेत स्वागत र सहयोग गर्ने परम्परा देखिएको छ। “ठूला नेताप्रति मनपर्ने–नपर्ने जे भए पनि जनप्रतिनिधिहरूले माओवादी नेतृत्वलाई देशको समस्या समाधान गर्न सक्ने शक्ति भनेर स्वीकार गरेका छन्। यही कारण यो अभियान अब सिंगो राष्ट्रकै अभियान बनेको छ,” प्रचण्डले स्पष्ट पार्नुभयो। राइनासमा सम्पन्न कार्यक्रममा ठूलो संख्यामा स्थानीयवासीको उपस्थिति रहेको थियो भने अभियानका सहभागीहरूले यसलाई जनतासँग प्रत्यक्ष सम्पर्क, संवाद र सहानुभूतिको महाअभियानका रूपमा व्याख्या गरेका छन्। त्यस्तै अध्यक्ष तथा पूर्वप्रधानमन्त्री पुष्पकमल दाहाल ‘प्रचण्ड’ सहितको अभियान टिमलाई लम्जुङको राइनास नगरपालिकाले आफ्नो कार्यालयमा स्वागत गरेको छ ।

काठमाडौँ । नेपाल सरकारले सामाजिक सञ्जालमाथि लगाएको प्रतिबन्धको विरोधमा आज काठमाडौँको माइतीघर मण्डलामा पत्रकारहरूले वृहत प्रदर्शन गरेका छन्।  सरकारको उक्त कदमलाई प्रेस स्वतन्त्रता, अभिव्यक्ति स्वतन्त्रता, र नागरिक अधिकारमाथिको हस्तक्षेपको रूपमा लिँदै पत्रकारहरूले कडा विरोध जनाएका छन्। नेपाल पत्रकार महासंघका पूर्वअध्यक्ष तारानाथ दाहाल, पूर्व वरिष्ठ उपाध्यक्ष रमेश विष्ट, पूर्वमहासचिव रोसन पुरीको संयोजनमा भएको कार्यक्रममा नेपाल पत्रकार महासंघका पूर्वपदाधिकारीहरु, पूर्वकेन्द्रीय सदस्यहरुको सक्रिय सहभागिता थियो ।  विरोध प्रदर्शनमा नेपाल प्रेस युनियन, प्रेस सेन्टर नेपाललगायत विभिन्न सञ्चारमाध्यमका सम्पादकहरू, स्वतन्त्र पत्रकारहरू, नागरिक समाजका अगुवाहरू, र सरोकारवालाहरूको उल्लेख्य सहभागिता रहेको थियो। उनीहरूले सामाजिक सञ्जालमाथिको प्रतिबन्धले संविधानप्रदत्त अभिव्यक्ति स्वतन्त्रताको मौलिक हकमाथि गम्भीर आघात पुगेको बताएका छन्। प्रदर्शनकारीहरूले सरकारले सामाजिक सञ्जाललाई व्यवस्थित गर्ने बहानामा पूर्ण रूपमा बन्द गर्न खोजेको आरोप लगाएका छन्। कार्यक्रमलाई नेपाल पत्रकार महासंघका पूर्वअध्यक्ष तारानाथ दाहाल, पूर्ववरिष्ठ उपाध्यक्ष रमेश विष्ट, पूर्वमहासचिव रोसन पुरी, महासंघका कोषाध्यक्ष रामकृष्ण अधिकारी, नेपाली काँग्रेसका केन्द्रीय सदस्य अजयबाबु सिवाकोटी, पत्रकार रिषी धमला, प्रेस सेन्टर नेपालका अध्यक्ष कमल गिरी र प्रेस युनियनका महासचिव दीलिप पौडेललगायतले सम्बोधन गरेका थिए ।  विरोध प्रदर्शनका क्रममा सहभागीहरूले "प्रेस स्वतन्त्रता खोस्न पाइँदैन", "सामाजिक सञ्जालमाथिको प्रतिबन्ध फिर्ता गर", र "अभिव्यक्ति स्वतन्त्रताको रक्षा गरौँ" जस्ता नाराहरू लेखिएका प्लेकार्ड र ब्यानरहरू बोकेका थिए। प्रदर्शनमा सहभागी एक पत्रकारले भने, "सामाजिक सञ्जाल नागरिकको आवाज र सूचनाको पहुँचको महत्त्वपूर्ण माध्यम हो। यसलाई नियन्त्रण गर्नु भनेको लोकतन्त्रको आधारभूत सिद्धान्तमाथि प्रहार गर्नु हो।" पूर्वमहासचिव पुरीले  यो निर्णय तत्काल फिर्ता नलिए थप आन्दोलनका कार्यक्रमहरू घोषणा गरिने चेतावनी दिए। उनले भने, " यदि यो निर्णय नसच्याइए हामी सडकमै उभिएर नागरिक अधिकारको रक्षा गर्नेछौँ।" यसैबीच, सरकारले सामाजिक सञ्जालमाथिको प्रतिबन्धलाई "सामाजिक सद्भाव र राष्ट्रिय सुरक्षाका लागि आवश्यक" भएको दाबी गरेको छ। तर, प्रदर्शनकारीहरूले यो तर्कलाई अस्वीकार गर्दै सरकारको नियतमा प्रश्न उठाएका छन्। उनीहरूले सामाजिक सञ्जालको दुरुपयोग रोक्न नियमन गर्न सकिने भए पनि पूर्ण प्रतिबन्धले नागरिकको सूचना र अभिव्यक्तिको अधिकार हनन हुने जिकिर गरेका छन्।

बैतडी ।  बैतडीको सुर्नया गाउँपालिका-५ मडकी १८ वर्षीय झरना दमाई सुर्नया नदी किनारमा मृत फेला परेकी छन् । जिल्ला प्रहरी कार्यालय बैतडीका प्रवक्ता प्रहरी निरीक्षक बलराम पाण्डेयका अनुसार झरना शुक्रबार घरबाट ‘‘बजार जान्छु” भन्दै हिँडेकी थिइन् र त्यसयता बेपत्ता भएकी थिइन । उनको खोजीका लागि परिवारले प्रहरीलाई अनुरोध गरेका थिए ।  प्रहरी र स्थानीयको खोजी कार्यका क्रममा पाटन नगरपालिका–६ औजेउडास्थित सुर्नया नदी किनारमा उनको शव फेला परेको छ । घटनाबारे थप अनुसन्धान जारी रहेको जिल्ला प्रहरी कार्यालयले जनाएको छ ।

लम्जुङ। पुष्पलाल मध्यपहाडी लोकमार्ग अभियानअन्तर्गत नेपाल कम्युनिष्ट पार्टी (माओवादी केन्द्र)का अध्यक्ष तथा पूर्वप्रधानमन्त्री पुष्पकमल दाहाल ‘प्रचण्ड’ नेतृत्वको टोली शनिबार लम्जुङ कृषि क्याम्पसमा पुगेको छ। क्याम्पस प्रमुख रामकुमार श्रेष्ठले अध्यक्ष प्रचण्ड सहितको टोलीलाई क्याम्पसबारे जानकारी गराउँदै यस संस्थानलाई मध्यपहाडी क्षेत्रकै स्रोत केन्द्र र कृषि अनुसन्धानको प्रमुख आधारका रूपमा विकास गर्न सकिने बताउनुभयो। उहाँले भौतिक संरचना अभाव, जनशक्ति कमी र प्रयोगशालाको सीमितताजस्ता समस्या क्याम्पसले व्यहोर्दै आएको जानकारी गराउनुभयो । अध्यक्ष प्रचण्डले कृषि विद्यार्थीको हैसियतले पनि क्याम्पसप्रति आफ्नो विशेष चासो रहेको बताउँदै यहाँको सम्भावना निकै ठूलो भएको उल्लेख गर्नुभयो। उहाँले क्याम्पसलाई मध्यपहाडी क्षेत्रकै कृषि अनुसन्धान र कृषकहरूको सहयोगी केन्द्र बनाउन सकिने प्रस्ट पार्दै पार्टीतर्फबाट समस्या समाधानमा सहयोग रहने प्रतिबद्धता जनाउनुभयो। साथै, मध्यपहाडी लोकमार्ग र क्याम्पसका बीच रहेको समस्या समाधान गर्न सम्बन्धित निकायमा पहल गर्ने  पनि अध्यक्ष प्रचण्डले विश्वास दिलाउनुभएको छ।

काठमाडौं। नेपाल पत्रकार महासंघका पूर्वअध्यक्ष, पूर्वपदाधिकारी र पूर्वकेन्द्रीय सदस्यहरूले सरकारद्वारा फेसबुक, एक्स, युट्युबलगायत सामाजिक सञ्जालमाथि लगाइएको प्रतिबन्धको कडा विरोध गरेका छन्।  दर्ता नभएको बहानामा लगाइएको यो प्रतिबन्धले अभिव्यक्ति स्वतन्त्रता र नागरिक अधिकारमाथि गम्भीर आघात पुगेको भन्दै उनीहरूले तत्काल प्रतिबन्ध हटाउन माग गरेर आज दिउँसो २ बजे प्रदर्शनको तयारी गरेका छन् ।  पूर्वपदाधिकारी र पूर्वकेन्द्रीय सदस्यहरूले संयुक्त रूपमा जारी गरेको प्रेस विज्ञप्तिमा अभिव्यक्ति स्वतन्त्रतालाई लोकतन्त्रको प्राणवायुका रूपमा उल्लेख गर्दै नेपालको संविधानको धारा १७, १९ र २७ ले प्रेस स्वतन्त्रता, सञ्चारको हक र सूचनाको हकको प्रत्याभूति गरेको स्मरण गराएका छन्। “यी संवैधानिक अधिकारलाई कुण्ठित गर्ने र नागरिकको अभिव्यक्ति स्वतन्त्रतालाई निषेध गर्ने कार्य लोकतन्त्रका विश्वव्यापी मान्यताविपरीत र पूर्णरूपमा अस्वीकार्य छ,” विज्ञप्तिमा भनिएको छ। उनीहरूले सामाजिक सञ्जालमा देखिएका समस्याहरूलाई समाधान गर्न सार्वभौम संसदबाट कानुन बनाएर व्यवस्थित र पारदर्शी नियमनको बाटो खुला हुँदाहुँदै सञ्जालहरूलाई पूर्णरूपमा बन्द गर्ने सरकारको कठोर र अलोकतान्त्रिक कदमप्रति गम्भीर आपत्ति जनाएका छन्। यो निर्णयले विदेशमा रहेका लाखौं नेपाली र उनीहरूका परिवारबीचको सम्पर्क टुटेको, बालबालिकाको सिकाइमा दीर्घकालीन प्रभाव परेको र हजारौं व्यक्तिको रोजीरोटी खोसिएको उनीहरूको ठहर छ। “सामाजिक सञ्जालको नियमनका लागि सरोकारवाला निकाय र विज्ञहरूको सहभागितामा अध्ययन कार्यदल गठन गरी विधिसम्मत समाधान खोज्न सकिन्छ। तर, सञ्जाललाई पूर्णरूपमा बन्द गर्नु लोकतान्त्रिक मूल्यमान्यताविपरीत छ,” विज्ञप्तिमा उल्लेख छ। सरकारलाई दबाब दिन पूर्वपदाधिकारी र केन्द्रीय सदस्यहरूले दिउँसो २ बजे काठमाडौंको माइतीघर मण्डलामा विरोध प्रदर्शनको आह्वान गरेका छन्। नागरिक स्वतन्त्रताका पक्षधर सबैलाई उक्त प्रदर्शनमा सहभागी हुन आग्रह गरिएको छ। उनीहरूले बन्द गरिएका सामाजिक सञ्जालहरू तत्काल खुला गरी अभिव्यक्ति स्वतन्त्रता र नागरिक अधिकारको सम्मान गर्न सरकारसँग जोडदार माग गरेका छन्। साथै, सामाजिक सञ्जालको दीर्घकालीन र विधिसम्मत नियमनका लागि विज्ञसहितको कार्यदल गठन गर्न सरकारलाई आह्वान गरिएको छ।

सङ्खुवासभा । यहाँको चैनपुर नगरपालिका-४ स्थित सुपरहेवा हाइड्रोपावरमा कार्यरत मजदुरको करेन्ट लागेर मृत्यु भएको छ । काभ्रेपलाञ्चोकको पनौती नगरपालिका–१ का २९ वर्षीय क्रान्ति तामाङको आज करेन्ट लागेर मृत्यु भएको जिल्ला प्रहरी कार्यालयका प्रहरी निरीक्षक नरेश लिम्बूले जानकारी दिए ।  आज दिउँसो विद्युत् पोल आसपास रुखको हाँगा हटाउने क्रममा करेन्ट लागेर घाइते भएका उनको उपचारका क्रममा प्राथमिक स्वास्थ्य केन्द्र चैनपुरमा मृत्यु भएको हो ।