कञ्चनपुर, असोज ८ । शुक्लाफाँटा राष्ट्रिय निकुञ्ज क्षेत्रभित्र पर्ने जैविक विविधताले भरिपूर्ण तारा ताल (खैकन्द्रा) को अस्तित्व संकटमा परेको छ। तालको ७० प्रतिशत भाग पुरिई बेसरम नामको झारले ढाकेपछि तालको अस्तित्व खतरामा परेको हो । राजहंस कमलको फूलका लागि प्रख्यात ताल लोप हुने अवस्थामा पुगे पनि संरक्षणको प्रयास हुन सकेको छैन । ताल पुरिने क्रमसँगै मुख्य आकर्षणका रूपमा रहेको कमलसमेत लोप हुन लागेको ताल नजिकैको क्षेत्रमा बस्दै आएका नरिभान ढुंगेलले बताए। “ताल सुकेपछि कमलको जरा नै उखेलेर जंगली बँदेलले खाने गरेकाले कमल लोपोन्मुख अवस्थामा पुगेको छ”, उनले भने । भदौ, असोजका महिना तालमा ढकमक्क कमल फुलेको टाढैबाट देखिन्थ्यो तर आजभोलि ताल क्षेत्रमा बेसरम झारमात्रै देखिने गरेको छ । तालमा बस्दै आएका रैथाने प्रजातिका जलपक्षी, गोही र विभिन्न प्रजातिका माछासमेत लोप हुने संघारमा पुगेका छन् । गोही, विभिन्न प्रजातिका माछा, सेतो प्रजातिको बकुल्ला र कालो हाँसको प्रमुख वासस्थानका रूपमा रहेको तारा तालमाथि अतिक्रमण हुन थालेपछि ती जलचर र पक्षीसमेत देखिन छाडेका छन् । तालको पूर्वतर्फको पूरै भाग पुरिएको छ । तालको डिल भत्किँदा खोलामा परिणत भएको छ । निकुञ्जले संरक्षणका लागि कार्य अगाडि नबढाउँदा तालको अस्तित्व नै लोप हुने संघारमा पुगेको स्थानीय बासिन्दाको भनाइ रहेको छ । दश बिगाहा क्षेत्रफलमा फैलिएको तालमा हाल एक बिगाहा क्षेत्रमा मात्रै पानी रहेको छ ।

कपिलवस्तु, असोज ८ । कपिलवस्तुको कृष्णनगर नगरपालिका–७ बुटहनियामा कटुवा पेस्तोल र गोलीसहित एकजना आज पक्राउ परेका छन्। इलाका प्रहरी कार्यालय बहादुरगञ्जको गस्ती टोलीले बुटहनियामा दुई वटा कटुवा पेस्तोल त्यसमा लाग्ने दुई राउण्ड बुलेटसहित भरत चौधरीलाई पक्राउ गरेको हो । चौधरी आज बिहान ४ बजे बुटहनियामा आफ्नै मिलमा पक्राउ परेका छन् । गोप्य सुराकीका आधारमा प्रहरीको गस्ती टोलीले चौधरीलाई पक्राउ गर्न सफल भएकोे इप्रका बहादुरगञ्जका प्रहरी सहायक निरीक्षक दीपेन्द्र गिरीले बताए ।

रौतहट, असोज ८ । रौतहटको बृन्दाबन नगरपालिकामा मेयर र उपमेयर दुवै पदमा नेपाली काँग्रेसले जितेपछि निकालेको विजय जुलुशमा नेकपा एमाले कार्यकर्ताहरुले आक्रमण गरेका छन्। एमाले समर्थित कार्यकर्ताहरुको आक्रमणमा परी चारजना नेपाली काँग्रेसका स्थानीय कार्यकर्ता घाइते भएका छन्। वृन्दावन नगरपालिकाको मेयर पदमा राम स्नेही यादव र उप मेयरमा नुर जहा खातुन शुक्रवार साँझ विजय भएका थिए। विजय पश्चात शनिवार नव निर्वाचित मेयर रामस्नेहीको घर भएको विश्रामपुरटोलवाट विजय जुलुश निकालेर नगरभरी परिक्रमा गर्ने कार्यक्रम थियो। नेपाली कांग्रेसका हर्षहाका कार्यकर्ताहरु जुलुश लिएर विश्रामपुरतर्फ जानेक्रममा एमालेका निकटदम प्रतिद्धन्दी विनोद पटेलको वडा नम्वर ५ स्थित हर्षाहाटोलमा रहेको घर नजिक भोजपुरी गीत बजाएर नाचगान गर्न थालेपछि दुवैपक्षबीच झडप भएको थियो। बाँसको भाँटा सहित घरेलु हतियारबाट एमाले कार्यकर्ताहरुको आक्रमणमा परी स्थानीय शेख खैरुल्लाह, शेख मेराजुल, शेख जाहिर र मोहम्मद सैमुल्लाह घाईते भएका छन्। घाईतेहरुको टाउकोमा गम्भीर चोट लागेर घाईते भएकाहरुको चन्द्रनिगाहपुर अस्पतालमा उपचार भईरहेको नेपाली काँग्रेसका जिल्ला सभापति रामकृष्ण यादवले बताएका छन्। जनताले आफ्नो अमुल्य मत दिएर जिताएपछि निर्वाचित उमेदवारले खुशीयाली साटासाट गर्न बिजय जुलुस निकालेर आफना समर्थक माझ जाने क्रममा एमाले लगायतका अन्य हारेका दलहरुले विजय उत्सवको जुलुशमाथि आक्रमण गर्नु निन्दनीय कार्य रहेको बताउँदै सभापति यादवको विजय जुलुशमाथि आक्रमण गर्ने दोषि माथि कडा कारबाहीको माग गरेका छन्। यसैगरी गढीमाइ नगरपालिमा नेपाली काँग्रेसका मेयर श्याम यादव र उप मेयरमा सुभद्रा गुप्ता निर्वाचित भएपछि निकालिएको विजय जुलुशमा निकटदम प्रतिद्धन्दी राजपाका मेयरका पराजित उमेदवार अब्दुल कलाम अजादको कार्यकर्ताहरुले आक्रमण गरेका छन्। गढीमाइ नपाको वडा नम्बर ५ गम्हरीया टोलमा नेपाली काँग्रेसका पराजित वडा अध्यक्ष म रयाजुदीको घरमा सहानुभुति स्वरुप विजय जुलुश लिएर गएका कार्यकर्तामाथि राजपाका कार्यकर्ताहरुले आक्रमण गरेका थिए । राजपाका मेयर उम्मेदवार र काँग्रेसका पराजित वडा अध्यक्षका उम्मेदवाबारको घर संगै जोडिएकोले काँग्रेसको विजय जुलुश आफ्ना कार्यकर्ताको घरमा पुगेपछि राजपाका कार्यकर्ताहरुले भोजपुरी फिल्म किन बजाएको र जुलुश किन ल्याएको भन्दै जुलुशमा डिजे बाजा बजाइरहेका धुपलाल साह, प्रदीप साह तथा सहभागि कार्यकर्ता प्रमोद साह, शेख जमदार, शेख मोमताज र शेख रुस्तमालाई निर्घात कुटपिट गरेका छन्। राजपाको कुटाइवाट डिजे बाजा बजाउने प्रमोद र धुपलालको अवस्था गम्भिर रहेकाले उनिहरुको हेल्थ लैण्ड अस्पतालमा उपचार भैरहेको गढीमाइ नपाका मेयर श्याम यादवले बताए । राजपाका कार्यकर्ताहरुले जुलुश माथि आक्रमण गर्दै नेपाली काँग्रेसका पराजित उम्मेदवार रयाजुदिनको घरमा समेत तोडफोड गर्न थालेपछि नेपाली काँग्रेसका कार्यकर्ताहरुले राजपाका मेयर उमेदवार अब्दुल कलाम आजादको घरमा समेत तोडफोड गरेका छन् । घटना स्थलमा इलाका प्रहरी कार्यालय र सशस्त्र वेश क्याम्प समनपुरको टोलि परिचालन गरिएको छ। घटनाको विषयमा गहन रुपमा अनुसन्धान गर्न तथा आक्रमण गर्ने व्यक्तिहरुको खोजतलासको लागि प्रहरीलाई निर्देशन दिइएको प्रमुख जिल्ला अधिकारी उद्धव वहादुर थापाले बताए। -नागरिकन्युजबाट

बागलुङ, असाेज ८ । बरेङ गाउँपालिका–२ पेरिडाँडामा आज अपराह्न भएको जिप दुर्घटनामा परी दुई प्रहरीको घटनास्थलमै ज्यान गएको छ । सदरमुकाम बागलुङ बजारबाट बाटाकाचौरतर्फ जाँदै गरेको ग १ ज १३४ नम्बरको जिप दुर्घटना हुँदा गुल्मीको अग्लुङ–३ घर भएका प्रहरी हबल्दार खिमबहादुर विष्ट र सोही जिल्ला हाडहाडे–४ का प्रहरी जवान ढालबहादुर श्रीषको ज्यान गएको जिल्ला प्रहरी कार्यालयले जनाएको छ । पन्ध्र जना सवार उक्त जिप सडकबाट करिब २०० मिटर तल खसेको जिल्ला प्रहरी प्रमुख प्रहरी उपरीक्षक चन्द्रकुवेर खापुङले बताए । दुर्घटनामा परी घाइते भएका अन्य १३ जनालाई थप उपचारको लागि धवलागिरि अञ्चल अस्पतालमा ल्याइएको छ । दुर्घटनामा ज्यान गुमाएका प्रहरी हवल्दार विष्ट इप्रका बरेङ र प्रहरी जवान श्रीष इप्रका बाटाकाचौरमा कार्यरत थिए । दुवै प्रहरी प्रदेश नं २ मा सम्पन्न स्थानीय तह निर्वाचनमा खटिएर कार्यक्षेत्रमा फर्कने क्रममा दुर्घटनामा परेका हुन् । साँघुरो र हिलाम्य सडकका कारण जिप दुर्घटना परेको हुनसक्ने प्रहरीको अनुमान छ ।

काठमाडौं, असोज ८ । बडा दशैंको चौथो दिन आज शक्तिपीठ, देवीमन्दिर तथा घरघरका पूजाकोठाहरुमा देवीभवानी कुष्माण्डा माताको पूजा आराधना गरिंदै छ । कुष्माण्डा मातालाई शुभकर्म थालनी वा सृष्टिको प्रतीकको रुपमा पूजा गरिन्छ । आफ्नो उदरमा त्रिविध ताप धारण गरी संसारको सृष्टि गर्न कुष्माडा देवीको आविर्भाव भएको ग्रन्थहरुमा उल्लेख गरिएको छ । उष्णता तथा शीतलतालाई सम तुल्याई सिर्जना गर्ने शक्ति कुष्माण्डा देवीमा रहेको बताइएको छ । यी देवी उष्ण रक्तसमूह मानव, चराचरुङ्गी तथा शीतरक्त समूह माछा, सर्पलगायतका सारा प्राणीको सिर्जना शक्ति भएकी माता भनेर शास्त्रहरुमा उल्लेख गरेको पाइन्छ । यी देवीको वदनवर्ण वैजनी छ भने उनी सिंहमा चढेकी छन् । कुष्माण्डा माताले हातमा रक्तपूर्ण दुई वटा घडा लिएकी छन् । यी दुई घडा नै सृष्टिका आधार वस्तु बताइएको छ । देवी कुष्माण्डाले ब्रह्माण्डको सृष्टि गरी पृथ्वी रचनाका लागि सूर्य भगवानलाई आफ्नो तापशक्ति दिएर प्रज्वलित बनाएको र अन्य ग्रहको समेत रचना गरी पूरै सौरमण्डल सञ्चालन गरेको देवीभागवत्लगायतका ग्रन्थहरुमा उल्लेख छ । कुष्माण्डाको लौकिक अर्थ कुभिण्डो हो । उष्ण हावापानीको प्रकृतिमा हुर्किने तर भित्री गुण शीतप्रद हुने फल कुभिण्डोलाई कुष्माण्डा देवीको प्रतीक मानेर दशैंमा यसको पूजाआजा गर्ने चलन छ । शक्तिपीठ तथा देवी मन्दिरहरुमा कुभिण्डाको विधिपूर्वक पूजा गरी बलि समेत चढाउने गरिन्छ ।

पोखरा, असोज ४ । नेत्रविक्रम चन्द “विप्लव” नेतृत्वको नेपाल कम्युनिष्ट पार्टीका कार्यकर्ताहरुले मंगलबार दिउँसो एक सरकार गाडीमाथि तोडफोड गरेका छन् । पोखरा लेखनाथ महानगरपालिकाको वडा नं. ८ जनप्रियस्कूल नजिक रत्नचोकमा रोकी राखिएको बा१झ ९६२२ नं. को सरकारी गाडीलाई नेकपाका कार्यकर्ताहरुले तोडफोड गरेका हुन् । सो गाडी कुन सरकारी कार्यालयको हो भन्ने बारेमा खुल्न सकेको छैन । नेपाल कम्युनिष्ट पार्टी कास्कीले आफ्नो पार्टीका कास्की जिल्ला सेक्रेटरी नन्दप्रसाद तिवारी “जगन”, लगायत पाँच जना नेता तथा कार्यकर्ताहरुलाई पक्राउ गरेर विष्फोटक पदार्थ ओसारपसार सम्बन्धि ऐन मुद्दामा मुद्दा चलाएको थियो । प्रहरीले पोखराको पृथ्वीचोकस्थित सस्तोबजारमा सिलिन्डर बम राखेको अभियोग उनीहरुलाई लगाएको छ । नेकपाका जिल्ला सेक्रेटरी नन्दलाल तिवारी, सदस्य सोमनाथ अधिकारी, वालकृष्ण अधिकारी, गोवीन्द ओलि लेकेन्द्र राइ र काशी पौडेल लगायतका पाँच जना नेता तथा कार्यकर्तालाई प्रहरी पक्राउ गरी झुट्ठा मुद्दा लगाएको आरोप लगाएको भन्दै आक्रोशित बनेको नेकपा गण्डक ब्यूरोले गिरफ्तारीमा परेका आफ्ना नेता तथा कार्यकर्ताहरुलाई तुरुन्त रिहाईको माग राखेर पहिलो चरणको आन्दोलनको कार्यक्रमहरु घोषणा गरेको थियो । पहिलो चरणमा बुधबारसम्म पोखरामा सरकारी सवारी साधनहरु चल्न नदिइने जनाइएको थियो । बिहीबारदेखि भने प्रदेश नं. ल ४ अन्तरगतका जिल्लाहरुमा सरकारी सवारी साधनहरु चल्नमा रोक लगाइने नेकपा गण्डक ब्यूरोले जानकारी दिएको छ ।

काठमाडौं, ४ भदौ । लोकसेवा आयोगले आजको गोरखापत्र दैनिकमा प्रकाशित गरेको सूचनाहरु

काठमाडौं, ४ भदौ । त्रिभुवन विश्वविद्यालयले स्नातक तह पहिलो वर्षको लागि भर्ना आह्वान गरेको छ । विश्वविद्यालयले बुधबार एक सूचना जारी गर्दै मानविकी, व्यवस्थापन र शिक्षाशास्त्र संकायअन्तर्गतका क्याम्पसहरुमा २०७४—०७५ को लागि भर्ना आह्वान गरेको हो । सूचनाअनुसार आवेदन फाराम असोज २२ देखि कात्तिक ३० गतेसम्म वितरण हुनेछ । यस्तै कक्षा सञ्चालन मंसिर १ देखि हुनेछ ।

कञ्चनपुर, असोज ४ । जंगली बँदेलको आक्रमणमा परी कञ्चनपुरको शुक्लाफाँटा नगरपालिका–७ का पाँचजना मंगलबार घाइते भएका छन् । घर आँगनमा बिहान बसेका बेला एकाएक बँदेलले आक्रमण गरेको हो । नजिकैको सामुदायिक वनबाट बस्तीमा छिरेको बँदेलले आक्रमण गर्दा वर्ष २६ का सुरेन्द्र साउद, वर्ष ४५ की मनिता बोहरा, वर्ष २० का मानबहादुर साउद, वर्ष १८ का जानकी बोहरा र वर्ष ५८ का कल्याण बोहरा घाइते भएको इलाका प्रहरी कार्यालय झलारीका प्रहरी निरीक्षक टेकबहादुर जोराले बताए । घाइत पाँचैजनाको कैलालीको धनगढीमा रहेको सेती अञ्चल अस्पतालमा उपचार भइरहेको छ । बँदेलका लागि थापेको पासोमा चितुवा यसैबीच, डडेल्धुराको परशुराम नगरपालिका– ५ परिगाउँस्थित बहादुरे बजार नजिकै खेतबारीमा बँदेललगायत अन्य जंगली जनावरबाट धानबाली बचाउनका लागि जंगलमा थापेको पासोमा चितुवा फसेको छ । मंगलबार स्थानीयले इलाका वन कार्यालय, इलाका प्रहरी, इलाका प्रशासनलाई जानकारी गराएपछि जोगबुडाबाट गएको नेपाल प्रहरी, सशस्त्र प्रहरीको टोली र इलाका वन कार्यालय जोगबुढाबाट चितुवाको उद्धारमा खटिएको टोलीको सहयोगमा पासोमा फसेको चितुवालाई नियन्त्रणमा लिइएको इलाका प्रहरी कार्यालय जोगबुढाका प्रहरी निरीक्षक शैलेन्द्रकुमार भट्टले जानकारी गराए । चितुवालाई मंगलबार नै गाडीमा तारजालीभित्र सावधानीका साथ राखी बर्दिया राष्ट्रिय निकुञ्जमा छोड्नका लागि लगिएको इलाका वन कार्यालय, जोगबुडाका प्रमुख चिरिञ्जीवी थापामगरले बताए । थोरै संख्यामा रहेको लोपोन्मुख जनावर चितुवा हेर्नका लागि परिगाउँको बहादुरे बजार र जोगबुडाको लालढुंगा बजारमा निकै ठूलो संख्यामा सर्वसाधारणको भिड लागेको थियो । कृषकले जंगली जनावरबाट खेतबारी जोगाउनका लागि थापेको पासोमा सोमबार राति चितुवा परेको स्थानीयको भनाइ रहेको छ । मंगलबार बिहान स्थानीय बासिन्दाले पासोमा चितुवा परेको थाहा पाएपछि इलाका वन कार्यालय र प्रहरी कार्यालय तथा इलाका प्रशासन कार्यालय, जोगबुढालाई जानकारी गराएका हुन् ।

काठमाडौं, असोज ४ । डिजेल र पेट्रोलबाट चल्ने सवारीसाधनलाई १० वर्षभित्र उपत्यकाबाट पूर्ण रुपमा हटाएर विद्युतीय गाडी ल्याउन संसदमा संकल्न प्रस्ताव पेस भएको छ । यी सवारी साधननै वायु प्रदुषणको मुख्य कारक रहेको भन्दै तिनलाई हटाउन संसदमा संकल्प प्रस्ताव पेस भएको हो । वातावरणविदहरुका अनुसार काठमाडौंमा वायु प्रदुषणको करिब ६० प्रतिशत हिस्सा गाडीको धुँवाले ओगटेको छ । कांग्रेस सांसद तथा पूर्व स्वास्थ्यमन्त्री गगन थापाले संसदमा प्रस्ताव दर्ता गराएका हुन् । उनले काठमाडौं उपत्यकामा सन् २०२७ सम्ममा र नेपालबाटै सन् २०३१ सम्ममा पेट्रोलियम पदार्थबाट चल्ने सवारी साधन पूर्ण रुपमा विस्थापित गरी विद्युतीय गाडी प्रयोगमा ल्याउने संकल्प घोषणा माग गरेका छन् । पछिल्लो समयमा धेरै मुलुकले पेट्रोलियम पदार्थबाट चल्ने सवारीसाधन निषेध गरिसकेका छन् । छिमेकी मुलुक भारतले समेत सन् २०३० सम्ममा आफ्नो मुलुकमा बिक्री हुने सम्पूर्ण साना सवारी साधन विद्युतीय हुने भनेर घोषणा गरिसकेको छ । –कान्तिपुर दैनिकबाट

काठमाडौं, असोज ४ । नेकपा (माओवादी केन्द्र) पैंयु–काठमाडौं सम्पर्क समिति गठन भएको छ। बुधबार काठमाडौंमा भएको भेलाले सम्पर्क समिति गठन गरेको हो। नवगठित सम्पर्क समितिको अध्यक्षमा चन्द्र थापा र सचिवमा पर्शुराम भूर्तेललाई चयन गरेको छ। २१ सदस्यीय समितिले छिटै बृहत भेलाको आयोजना गरेर काठमाडौंमा बसोबास गर्ने पैंयु क्षेत्रका माओवादीहरुलाई संगठित गर्ने योजना रहेको अध्यक्ष थापाले जानकारी दिए। भेलामा नेपाल राष्ट्रिय बुद्धिजीवी संगठनका उपाध्यक्ष निलकण्ठ तिवारी, विद्यार्थी नेता यामनाथ गिरी, पर्वत–काठमाडौं गणतान्त्रिक मञ्चका अध्यक्ष नारायण काफ्ले, अशोक पौडेल लगायतका वक्ताहरुले भेलाको औचित्यमाथि प्रकाश पार्दै नवनिर्वाचित समितिलाई शुभकामना दिएका थिए।

काठमाडौं, असोज ४ । नेत्रविक्रम चन्द नेतृत्वको नेकपा माओवादीले रोल्पाको थवाङमा जनसत्ता पुनः लागू गरेको छ । राज्यसत्ता दलाल र पूँजीवादी भएको भन्दै माओवादीले जनसत्ता पुनः लागू गरेको हो । गाउँ परिषद नाम दिइएको जनसत्ताको संयोजक किताब घर्तीलाई तोकिएको छ । त्यसमा १७ जना सदस्य छन् । अहिले सत्ताबाट न्याय सम्बन्धी सेवा बढी भइरहेको नेकपा माओवादी रोल्पाका सेक्रेटरी दलबहादुर खत्रीले जानकारी दिए । रोल्पा जिल्लाभरी नै जनपरिषद गठन गरिएको छ । तत्कालिन गाविसमध्ये थवाङ माओवादीको विशेष ठाउँ भएकाले यहाँ पुनः जनसत्ता लागू गरिएको बताइएको छ । थवाङमा हुने सबैखालका काममा जनसत्ताका प्रमुखसँग सहकार्य गर्नुपर्ने नेकपा माओवादीले जनाएको छ । –नागरिक दैनिकबाट

पर्सा, असोज ३ । पर्सा–बारा औद्योगिक करिडोरमा श्रमिक अस्पताल स्थापना गरिने भएको छ । श्रम मन्त्रालयले यो अस्पताल स्थापनाको गृहकार्य थालेको छ । श्रम कार्यालय वीरगंजका प्रमुख राधेश्याम झाका अनुसार– ‘अस्पतालका लागि आवश्यक जग्गाको सर्भे गर्ने प्रारम्भिक चरणको काम सकिएको छ ।’ करिडोरको जीतपुर सिमरा उपमहानगरपालिका अन्तर्गत राजेश मेटल उद्योगको पछाडी रहेको ८ बिघा ४ कठ्ठा ऐलानी जग्गाको नाप नक्शा सहितको सर्भे गरी केन्द्रमा पठाएको उनले बताए । श्रमिक तथा तिनका परिवारको उपचार लक्षित गरी स्थापना गर्न लागिएको अस्पताल अत्याधुनिक तथा सुविधा सम्पन्न हुने छ । मन्त्रालय अन्तर्गतको राष्ट्रिय स्तरको कल्याणकारी कोषमा मजदुरका लागि अस्पताल, चमेना गृह लगायतका अन्य सुविधा उपलब्ध गराउने प्रयोजनले जम्मा गरिएको रकम १४ खर्ब पुगेको छ । तर कोषको रकम हाल सम्म उपयोगमा आउन नसकेको श्रम कार्यालय वीरगंजका प्रमुख झाको भनाई थियो ।

खजुरा (बाँके), असोज ३ । नेपालगञ्ज विमानस्थलमा दैनिक हवाई उडानको चाप बढेपछि एयर ट्राफिक जाम हुन थालेको छ । नेपालगञ्जबाट काठमाडौँका लागि दैनिक १० र कर्णाली अञ्चलका लागि २० वटा उडान हुन थालेपछि एयर ट्राफिक बढेको हो । हवाईजहाजको संख्या बढेपछि कर्णाली र राजधानी उडान भर्ने जहाजका लागि पार्किङ समस्यासमेत बढेको छ । उडान संख्या बढेसँगै एयर ट्राफिकले नेपालगञ्जको आकाशमै जहाज होल्ड गर्न थालेको छ । कर्णालीमा उडान भर्ने जहाजभन्दा नेपालगञ्ज–काठमाडौँ उडान भर्ने समयमा एयर ट्राफिक र पार्किङ समस्या बढ्ने गरेको विमानस्थल कार्यालयले जनाएको छ । नेपालगञ्ज विमानस्थल हुँदै काठमाडाँैका लागि बुद्ध एयरका तीन, यतिका तीन, सौर्य र श्री एयरका दुई÷दुई उडान दैनिक हुने गरेका छन् । कर्णालीका लागि तारा, सीता, यति, सिम्रिक, काष्ठमण्डपका सात जहाजले दैनिक उडान भर्दै आएका छन् । मानसरोवर यात्रीका कारण पनि हुम्लाको सिमीकोटका लागि उडान बढेका छन् । ठूला दुई जहाज अटाउने क्षमताको विमानस्थलको पार्किङस्थल छ । एकैपटक दैनिक उडान भर्ने वुद्ध, यति, सौर्य र श्रीएयर होल्डमा भएर पार्किङसमेत समस्या उत्पन्न भएको विमानस्थल कार्यालय प्रमुख प्रतापबाबु तिवारीले बताए । साना ट्वीन अटर सातवटासम्म जहाजको क्षमता विमानस्थलमा रहेको छ । एयर ट्राफिक जाम हुन नदिन विमानस्थलले काठमाडौँबाट उडान तालिका आधा घण्टाको फरकमा राखेको छ, तर मौसम प्रतिकूल र होल्ड हुनुपर्ने अवस्थामा समस्या हुने गरेको छ । पछिल्लो समयमा नयाँ जहाज थपिएको र पर्यटक बढेपछि उडानको संख्यामा वृद्धि भएको छ ।

पोखरा, असोज ३ । कास्की जिल्ला ट्राफिक प्रहरी कार्यालयले क्षमताभन्दा बढी यात्रु बोक्ने सवारी साधनलाई नियन्त्रणमा लिने कार्यलाई तीव्रता दिएको छ । क्षमताभन्दा बढी यात्रु बोक्ने गरेको सर्वसाधारणको गुनासो र नजिकिँदो चाडबाडमा सम्भाव्य दुर्घटना न्यूनीकरण गर्न सार्वजनिक सवारी साधनमा जाँचको कामलाई तीव्रता दिइएको प्रहरी सहायक निरीक्षक तीर्थराज पौडेलले जानकारी दिए । जाँचका क्रममा माइक्रोबसमा मुडालगायत सामान प्रयोग गरी सिट क्षमताभन्दा बढी यात्रु राख्ने गरेको पाइएको उनले बताए । केही दिनयता क्षमताभन्दा बढी सिट बनाएर यात्रु बोक्ने गरेका दैनिक १० भन्दा माथि सवारी साधनलाई प्रहरीले नियन्त्रणमा लिएर कारबाही गर्दै आएको छ ।