कोलोम्बोः श्रीलङ्काको राजधानीमा कोलोम्बोको बाहिरी इलाकामा रहेको एक कारागारमा भएको दङ्गामा परी आठ व्यक्तिको मृत्यु भएको छ । दङ्गामा मारिएका सवै व्यक्ति कैदी नै भएको सिन्हवा समाचार समितिद्वारा प्रकाशित समाचारमा जनाइएको छ । दङ्गामा परी अन्य ४५ जना घाइते भएका छन् । घाइते भएकाहरुमा सुरक्षाकर्मी पनि रहेका छन् । कारागारमा कोरोना भाइरसको प्रकोप बढ्न थालेपछि बन्दीहरूले धरौटीमा मुक्त हुन पाउनुपर्ने र थप सेवासुविधाको माग गर्दै प्रदर्शन गरेका थिए । राजधानी कोलोम्बोस्थित वेलिकाडा जेलका बन्दीहरूले छानामा चढेर आफूहरूलाई धरौटीमा छोडियोस् भन्दै प्रदर्शन गरेका हुन । बन्दी र कारागारमा खटिएका सुरक्षाकर्मीहरूबीच भएको भडपमा परी कम्तीमा ८ व्यक्तिको मृत्यु हुनुको साथै अन्य ४५ जना घाइते भएका बताइएको छ । श्रीलङ्काको जेलहरूमा अहिलेसम्म करिब १,००० जनामा कोरोना भाइरस संक्रमण पुष्टि भएको छ । कारागारमा रहेका बन्दीहरुले शुरु गरेको दङ्गा अनियन्त्रित भएपछि नियन्त्रणमा लिनको लागि बल प्रयोग गर्नु परेको प्रहरी प्रवक्ता अजित रोहना बताएका छन् । सो दङ्गामा घाइतेहरूलाई स्थानीय अस्पतालमा भर्ना गरिएको छ । कारागारमा सुरक्षा बढाउन विशेष तालिमप्राप्त कमान्डोहरूको टोली झिकाइएका छ । श्रीलङ्कामा कोरोना शुरु भएयता २३ हजार ४०० भन्दा बढीमा कोभिड–१९ को संक्रमण देखिएको र यस संक्रमणबाट ११६ जनाको मृत्यु भइसकेको छ ।

काठमाडौंः करिब एक वर्षको अन्तरालपछि राजधानीमा नेपाल र भारतका परराष्ट्रसचिवहरूको प्रतिनिधिमण्डलस्तरीय बैठक शुरु भएको छ । बैठकमा ११ सदस्यीय नेपाली प्रतिनिधिमण्डलको नेतृत्व परराष्ट्र सचिव भरतराज पौड्यालले तथा त्यति नै सदस्य रहेको भारतीय प्रमण्डलको नेतृत्व विदेश सचिव हर्षबर्धन श्रृङ्गलाले गरेका छन् । बैठकमा नेपाल–भारत सम्बन्धका सबै विषयमा विचारविमर्श हुने परराष्ट्र मन्त्रालयले जनाएको छ । सचिव पौड्याल नेतृत्वको प्रमण्डलमा परराष्ट्र मन्त्रालयका सहसचिवद्वय सेवा लम्साल र यज्ञबहादुर हमाललगायत तथा विदेश सचिव श्रृङ्गला नेतृत्वको टोलीमा भारतको बाह्य मामिला मन्त्रालय (उत्तर) विभागका सहसचिव अरिन्दम बाग्ची, नेपालका लागि भारतका राजदूत विनयमोहन क्वात्रालगायत यहाँस्थित भारतीय दूतावासका कर्मचारी रहेका छन् । त्यसअघि परराष्ट्रसचिवद्वयबीच सहसचिवद्वय हमाल र बाग्ची तथा राजदूत क्वात्राको उपस्थितिमा द्विपक्षीय हित र चासोका विविध विषयमा छलफल भएको थियो । सचिव पौड्यालको मैत्रीपूर्ण निमन्त्रणामा दुई–दिवसीय भ्रमणका लािग सचिव श्रृङ्गला आजै काठमाडौं आएका हुन् । भारतका विदेशसचिव हर्षवर्ध्दन काठमाडौंमा

वासिङ्टनः अमेरिकी राष्ट्रपति डोनाल्ड ट्रम्पले सत्ता हस्तान्तरणको प्रक्रिया शुरु गर्न निर्देशन दिएका छन् । सरकारी उच्च अधिकारीहरुलाई सोमबार उनले राष्ट्रपतिमा निर्वाचित जो बाइडेनलाई सत्ता हस्तान्तरण प्रक्रिया शुरु गर्न निर्देशन दिएका हुन् । उनले यसअघि सत्ता हस्तान्तरण गर्न अस्वीकार गर्ने आशंका गरिँदै आएकोमा अहिले सत्ता हस्तान्तरणको प्रक्रिया शुरु गर्न निर्देशन दिएपछि सकारात्मक सन्देश गएको छ । राष्ट्रपति ट्रम्पले निर्वाचनमा धाँधली भएको भन्दै आफू पराजित नभई पराजित गराइएको दाबी गर्दै आएका थिए । उनले बाइडेनको जित र आफ्नो पराजय अस्वीकार गर्दै आएका थिए । निर्वाचनमा धाँधली भएको भन्दै उनले विभिन्न अदालतमा मुद्दा दर्ता गरे पनि ट्रम्पको दावीका लागि पर्याप्त प्रमाण नभएकाले कतिपय न्यायाधीशहरुले मुद्दा नै खारेज गरिदिएका थिए । अदालतबाट समेत आफ्नो दाबी पुष्टि नहुँदा पनि उनले आफू अन्यायमा परेको र आफूलाई नियोजित रुपमा पराजित गरिएको भन्दै न्याय माग्ने क्रमलाई निरन्तरता दिने दाबी गरेका छन् । यही नोभेम्बर ३ तारिखका दिन भएको निर्वाचनबाट राष्ट्रपतिमा बाइडेन र उपराष्ट्रपतिमा कमला ह्यारिस निर्वाचित भएका थिए । उनीहरुले आगामी सन् २०२१ जनवरी २० मा सपथ ग्रहण गर्दै जिम्मेबारी सम्हाल्नेछन् । त्यसका लागि उनीहरुले पनि आआफ्नो तर्फबाट तयारी थालेका छन् । बाइडेनले आफूले सरकारमा प्रमुख भूमिका दिने चाहेका व्यक्तिहरूको नामावली तयार पर्न थालिसेका छन् । पूर्व विदेश मन्त्री जोन केरीले जलवायुसम्बन्धी विशेष दूतको भूमिका निर्वाह गर्ने भएका छन् भने यसअघि सशक्त रूपमा अन्तर्राष्ट्रियवादमा विश्वास गर्ने एन्टोनी ब्लिङ्केनको नाम विदेशमन्त्रीको रूपमा प्रस्तुत गरिसकिएको छ ।

लन्डन: बेलायती औषधि निर्माता अस्ट्राजेनिका र अक्सफोर्ड विश्वविद्यालयले आफूले विकास गरिरहेको कोभिड–१९ को खोपले औसतमा ७० प्रतिशत मात्र सफल भएको जनाएको छ । शुरुमा निकै उत्साहजनक नतिजा ल्याएको भन्दै प्रचारप्रसार गरिएको उक्त खोपको तेस्रो चरणको परीक्षणको तथ्याँक विश्लेषण गर्दा यस्तो भेटिएको हो । अस्ट्राजेनिकाका प्रमुख कार्यकारी पास्कल सोरिओटले एक वक्तव्य जारी गर्दैै कोभिड–१९ विरुद्धको यस खोप पनि निकै प्रभावकारी तथा सुरक्षित रहेको बताएका छन् । अस्ट्राजेनिकाका खोपको तथ्याँक विश्लेषण गर्दा यो ६२ देखि ९० प्रतिशत सफल रहेको पनि कम्पनीले जनाएको छ । अमेरिकी खोप निर्माता कम्पनीहरु फाइजर र मोडर्नाले तयार पारेका खोपहरु ९० प्रतिशतभन्दा बढी सफल रहेका थिए । फाइजर र मोडर्नाका तुलनामा अस्ट्राजेनिकाले तयार पारेको खोपको प्रभाव निकै कम रहेको छ । अस्ट्राजेनिकाले आफ्ना खोपहरु वितरणका लागि विभिन्न देशका नियामक निकायहरु समक्ष औपचारिक अनुरोध गर्ने जनाएको छ । साथै विश्व स्वास्थ्य संगठन समक्ष पनि न्यून आय भएका मुलुकमा वितरणका लागि आफ्नो खोपलाई सूचीकृत गर्ने तयारी अस्ट्राजेनिकाले गरेको छ । कम्पनीले सन् २०२१ भित्रमा करिब तीन अर्ब डोज उत्पादन गर्ने लक्ष्य राखेको छ । यो खोपलाई कम्तीमा छ महिनासम्म दुई देखि आठ डिग्री सेल्सियसको तापक्रममा भण्डारण गर्न, यताउता लैजान सकिने कम्पनीले जनाएको छ ।

काठमाडौंः विश्वमै कोरोना भाइरसका सबैभन्दा बढी संक्रमित र मृतकहरु रहेको अमेरिकामा दैनिक संक्रमण र मृत्युदर पनि सबैभन्दा उच्च रहेको छ । अमेरिकामा बितेको २४ घन्टामा मात्रै १ लाख ९१ हजारभन्दा बढी नयाँ संक्रमित थपिएका छन् । यसैगरी एकैदिन मृत्यु हुनेको संख्या पनि २ हजार नजिक पुगेको छ । यो सँगै अमेरिकामा कुल संक्रमितको संख्या १ करोड २२ लाख नाघेको छ भने संक्रमणकै कारण हालसम्म २ लाख ६० हजारभन्दा बढीको मृत्यु भइसकेको छ । पछिल्लो समय अमेरिकामा कोरोना भाइरसको संक्रमण र मृत्यु दुबैमा लगातार वृद्धि भइरहेको छ । संक्रमितको संख्याका आधारमा भारत दोस्रो बढी प्रभावित मुलुक रहेको छ । भारतमा पछिल्लो २४ घन्टामा ४६ हजारभन्दा बढी नयाँ संक्रमित थपिएका छन् । यो सँगै भारतमा कुल संक्रमितको संख्या ९० लाख ५० हजार नाघको छ भने १ लाख २३ हजारभन्दा बढीको संक्रमणकै कारण ज्यान गएको छ । भारतमा संक्रमण र मृत्युदर घट्दो क्रममा छ । तेस्रो बढी प्रभावित मुलुक ब्राजिलमा पनि संक्रमण घट्दो क्रममा छ । बेलायत, इटाली, फ्रान्स, स्पेन, जर्मनी र पोल्याण लगायतका युरोपेली मुलुकमा पछिल्लो समय संक्रमण व्यापक रुपमा वृद्धि भएको छ । विश्वभर कोरोना संक्रमितको संख्या ५ करोड ७८ लाख नाघेको छ भने कोरोना संक्रमणका कारण ज्यान गुमाउनेको संख्या १३ लाख ७६ हजारभन्दा बढी छ ।

वासिङटन : अमेरिकी राष्ट्रपतिको चुनावको तिथि जति नजिकिँदै गएको छ, चुनावी मतसर्वेक्षणले राष्ट्रपतिका दुई प्रतिस्पर्धीमध्ये डेमोक्रेटिक पार्टीका उम्मेदवार जो बाइडेनले अग्रता कायम राख्नु भएको देखाएका छन् । अमेरिकी राष्ट्रपतिको चुनाव यही नोभेम्बर ३ अर्थात् मंगलबार हुँदैछ । पछिल्ला अधिकांश मत सर्वेक्षणहरूले जो बाइडेनले वर्तमान राष्ट्रपति डोनाल्ड ट्रम्पभन्दा झण्डै १० प्रतिशत विन्दुले अग्रता बनाइरहेको देखाएका छन् । एनबिसी न्यूज र वालस्ट्रिट जर्नलले चुनाव हुनु दुई दिनअघि गरेको सर्वेक्षणमा बाइडेनले ५२ र ट्रम्पले ४२ प्रतिशत मत प्राप्त गर्ने जनाएको छ । एनबिसीका अनुसार चुनावी मत सर्वेक्षणमा सहभागी बिल म्याकइन्टर्फले राष्ट्रव्यापी मत सर्वेक्षणमा १० प्रतिशत अग्रता बनाएपनि चुनावी परिणामका बारेमा यसै भन्न नसकिने अवस्था रहेको बताएका छन् । चुनाव अघिको मत सर्वेक्षणमा बाइडेनले ट्रम्पभन्दा ६ प्रतिशत विन्दुले मात्र अग्रता बनाइराखेको देखाएका थिए । चुनावी नतिजालाई फेरबदल गर्न सक्ने मुख्य राज्यहरुमा एरिजोना, फ्लोरिडा, जर्जिया, आयोवा, मेन, मिसिगन, मिनेसोटा, नर्थ क्यारोलिना, न्यू ह्याम्पसायर, नेभाडा, पेन्सिलभेनिया र विस्कन्सिन रहेका छन् । गत अक्टोबर २९ देखि ३१ तारिखसम्मको मतसर्वेक्षणले ५७ प्रतिशत मतदाताले कोरोनाभाइरस संक्रमण नियन्त्रणका लागि राष्ट्रपति ट्रम्पको कार्यशैलीलाई नरुचाएको देखाएका छन् । तर अर्थतन्त्रका सन्दर्भमा राष्ट्रपति ट्रम्पलाई झण्डै ५५ प्रतिशतले समर्थन जनाएका छन् । चुनावी नतिजा उलटफेर गर्न सक्ने “ब्याटलग्राउन्ड” नाम दिइएका केही राज्यहरुमा मतदातालाई आफूतिर तान्न राष्ट्रपतिका दुबै आकाँक्षीले अन्तिम चुनावी सभाहरु गरिरहेका छन् । अमेरिकी चुनाव परियोजनाका अनुसार आइतबार दिउँसोसम्म ९ करोड ३० लाखभन्दा बढी अमेरिकीले मतदान गरिसकेका छन् । यो संख्या सन् २०१६ मा गणना गरिएको कूल मतको झण्डै ६८ प्रतिशत हो ।

नयाँदिल्ली : भारतमा कोरोना भाइरसबाट संक्रमितको संख्या सोमबारसम्ममा ८२ लाख २९ हजार नाघेको छ । भारतीय स्वास्थ्य मन्त्रालयका अनुसार पछिल्लो २४ घण्टामा ४५ हजार २३० जना नयाँ संक्रमित थपिएका छन् भने ४९६ जनाको मृत्यु भएको छ । कोभिड-१९ बाट संक्रमितमध्ये करिब ७५ लाख ४४ हजार ७९८ व्यक्ति संक्रमणमुक्त भएका छन् । कोभिड–१९ को संक्रमणबाट हालसम्म १ लाख २२ हजार ६०७ जनाको मृत्यु भएको छ । केही दिनदेखि नयाँ संक्रमित र मृत्यु दरमा निरन्तर कमी आएको छ । गत २४ घण्टामा भारतमा ५३ हजार २८५ जना कोरोना मुक्त भएका पनि समाचारमा जनाइएको छ । भारतभरी हाल पाँच लाख ६१ हजार ९०८ जना सक्रिय संक्रमित रहेका छन् । भारतको महाराष्ट्र राज्य सबभन्दा प्रभावित राज्यको रुपमा रहेको छ । यहाँ १ लाख २५ हजार ६७२ जना सक्रिय संक्रमित रहेका छन् । त्यसपछि दोस्रो स्थानमा केरला रहेको र यहाँ ८९ हजार ७८३ जना सक्रिय संक्रमित रहेका छन् ।

काठमाडौं  : विश्व स्वास्थ्य संगठन (डब्ल्यूएचओ) प्रमुख टेड्रोस अधनोम ग्रेब्रेसियस क्वारेन्टाइनमा बसेका छन् । सामाजिक सञ्जाल ट्वीटरमार्फत उनी सेल्फ क्वारेन्टाइनमा बसेको जनाकारी दिएका हुन् । कोरोना संक्रमितको सम्पर्कमा आएपछि उनी क्वारेन्टाइनमा बसेको ट्वीटरमार्फत जनाकारी दिएका हुन्। उनले आफूले कोरोना संक्रमितलाई भेटेको र अहिले क्वारेन्टीनमा बसेको जनाएका हुन्। आफू पूर्णरूपमा स्वस्थ रहेको र कुनै लक्षण नरहेको जनाएका छन् । डब्लूएचओको प्रोटोकल अनुसार आफू घरमै रहने ग्रेब्रेसियसले जनाएका छन् ।

लाहौर । पाकिस्तानमा पहिलोपटक मेट्रो रेल सेवा शुरु भएको छ । पञ्जाब सुबेको राजधानी लाहौरमा पाकिस्तानको पहिलो मेट्रो रेल सेवा शुरु भएको हो । यो रेल सेवा निर्माण गर्न चीनले सहयोग गरेको हो । चीनको बेल्ट एण्ड रोड इनिसिएटिभ अन्तर्गत यो महत्वपूर्ण परियोजना मानिएको छ । २७ किलोमिटर लामो यो रेलमा दुई दर्जन बढी स्टेशन रहेका छन् । निकै व्यस्त लाहौर सहरमा यो रेलबाट आम जीवन सहज हुने अपेक्षा गरिएको छ । अढाई घण्टा लाग्ने यात्रा अब २५ मिनेटमा नै पुरा हुने छ । पूर्णरुपमा रेल सुरु भएमा प्रतिदिन अढाई लाख मानिस यात्रा गर्ने अधिकारीहरुले बताएका छन् । यसअघि यो रेलबाट केही ऐतिहासिक संरचनामा क्षति पुग्ने भन्दै बिरोध समेत भएको थियो । यो परियोजनाको लागत ५ सय अरब रुपैयाँ रहेको बताइन्छ । आज एक समारोहबीच रेल सेवाको उदघाटन भएको छ । उदघाटन समारोहमा चिनियाँ महावाणिज्यदूत लाङ डिङ बिनले यो मेट्रो प्रणालीलाई पाकिस्तान र चीनको मित्रतामा कोशे ढुंगा भएको बताए ।

पेरिस, फ्रान्समा एकजना शिक्षकको घाँटी रेटी हत्या गरिएको घटनाको प्रतिक्रिया अझै रोकिएको छैन । गएराती मात्रै फेरी एकजना अर्थोडक्स पादरीमाथि गम्भीर हमला भएको छ । बिबिसीका अनुसार, फ्रान्सको लियोन शहरमा भएको घटनामा पादरी गम्भीर घाइते भएका छन् । प्रहरीले एकजना शंकाष्पद व्यक्तिलाई हिरासतमा लिएको छ । यसअघि दक्षिणी शहर निसमा एउटा चर्चमा भएको हमलाईमा तीनजनाको मृत्यु भएको थियो । त्यसअघि आइफेल टावरमुनि दुईजना मुस्लिम महिलामाथि आक्रमण भएको थियो । पैगम्बर मोहम्मदको कार्टुन बनाएको भन्दै एकजना शिक्षकको घाँटी रेटेर हत्या गरिएपछि राष्ट्रपति इम्यानुअल मेक्रोनले घटनाको निन्दा गरेका थिए । उनले शिक्षकको कार्टुनको मूल्य चुक्ता गर्ने प्रतिक्रिया दिएपछि विश्वभरीका मुस्लिम देशहरुमा बिरोध भएको थियो । दक्षिण एशियाका पाकिस्तान, बंगलादेश भारत लगायतका देशमा फ्रान्सेली सामान बहिस्कार गर्न माग गर्दै विशाल प्रदर्शन समेत भएका छन् । राष्ट्रपति मेक्रोनले घटनाको निन्दा गरेका छन् । प्रहरीका अनुसार, शटगन बोकेर आएका व्यक्तिले चर्च बन्द गर्दै गरेको बेला पादरीमाथि हमला गरेर फरार भएका थिए । पादरीको पेटमा गोली लागेको छ । यो घटनाको सम्बन्ध पूर्ववर्ती घटनासँग छ या छैन भन्ने विषयमा अनुसन्धान चलिरहेको छ ।

एजेन्सी : जम्मु कश्मिरका पूर्व मुख्यमन्त्री महबुबा मुफ्तीलाई रिहाई गर्ने निर्णय भएको छ । पीडीआईका अध्यक्षसमेत रहेकी मुफ्तीलाई रिहा गर्ने निर्णय भएको जम्मु कश्मिर प्रशासनका प्रवक्ता रोहित कंसलले जानकारी दिए । महबुबाकी छोरी इल्तिजाले ट्वीटमार्फत भनेकी छिन्, ‘अब मिस मुफ्तीको अवैधानिक हिरासतको अन्त्य भएको छ । यो कठिन समयमा सहयोग गर्ने मानिसहरुलाई धन्यवाद दिन चाहान्छु । म धेरै मानिसप्रति ऋणी छु ।’ मुफ्तीलाई सन् २०१९, अगष्ट ५ मा पक्राउ गरिएको थियो । भारतीय केन्द्र सरकारले त्यहाँको संविधानको धारा ३७० अनुसार जम्मु कश्मीर राज्यको विशेष दर्जा रद्द गर्ने निर्णय गरेसँगै मुफ्ती पक्राउ परेकी थिइन् । महबुबाकी छोरी इल्तिजाले आमालाई नजरबन्दमा राखिएको कदमको विरोध गर्दै सर्वोच्च अदालतमा रिट दायर गरेकी थिइन् । पूर्व मुख्यमन्त्री उमर अब्दुल्ला र उनका बुबा फारुख अब्दुल्ला पनि गत अगष्टदेखि नै नजरबन्दमा रहेका थिए । तर उनीहरू भने पहिले नै रिहा भइसकेका छन् ।

काठमाडौं : स्टार फुटबलर क्रिस्टियानो रोनाल्डोलाई कोरोना संक्रमण पुष्टि भएको छ । उनलाई कोरोना पोजिटिभ देखिएको पोर्चुगलको फुटबल संघले पुष्टि गरेको हो । संक्रमण पुष्टि भएपछि उनी राष्ट्रिय टिमबाट बाहिरिएका छन् । उनले बुधबार हुने स्वीडेनविरुद्धको खेल पनि गुमाउने भएका छन् । नेसन्स लिगमा फ्रान्स र पोर्चुगलबीचको खेल भएको केही दिनमा रोनाल्डोमा संक्रमण पुष्टि भएको हो ।

काठमाण्डौंः अमेरिकामा १ व्यक्तिलाई दोस्रो पटक कोरोना भाइरसको सङ्क्रमण देखिएको छ । पहिलो पटकको सङ्क्रमणबाट निको भएका व्यक्तिमा फेरि सङ्क्रमण देखिएको बीबीसीले जनाएको छ । दोस्रो पटकको सङ्क्रमण पहिलोभन्दा धेरै खतरनाक हुने डाक्टरहरुले बताएका छन् । २५ वर्षीय ती व्यक्तिको फोक्सोले शरीरलाई चाहिने जति अक्सिजन प्राप्त गर्न नसकेपछि अस्पताल भर्ना गरेर उपचार थालिएको थियो । उनी अहिले निको भइसकेका खबरमा उल्लेख छ । डाक्टरहरुका अनुसार कोरोना भाइरस फेरि दोहोरिने सम्भावना निकै कम हुने मानिन्छ । वैज्ञानिकहरुले ती व्यक्तिमा पुरानो सङ्क्रमण लुकेर पनि फेरि देखा परेको नभइ २ पटक नै सङ्क्रमण भएको बताएका छन् । ती व्यक्तिको फरक-फरक नमुनाको परीक्षण गर्दा भाइरसको आनुवांशिक संरचनामा भिन्नता आएको पाइएको वैज्ञानिकले बताएका छन् ।

काठमाण्डौंः इजरायलमा कार्यरत सिन्धुपाल्चोककी १ महिलाको कोरोनाको कारण ज्यान गएको छ । अक्टोबर ४ मा १ महिलाको कोरोनाको कारण ज्यान गएको र उनको परिवारको सहमतिमा इजरायलमै अन्तिम संस्कार गरिएको इजरायलमा रहेको नेपाली दूतावासले जनाएको छ । इजरायलमा पछिल्लो समय सङ्क्रमणको अवस्था तिब्र रुपमा बढ्दै गएकाले सावधानी अपनाउन दूतावासले अनुरोध गरेको छ । इजरायल सरकारले जारी गरेका स्वास्थ्यका मापदण्ड पालना गर्दै सङ्क्रमणबाट आफू पनि बच्न र अरुलाई पनि बचाउन इजरायलका लागि नेपाली राजदूत डा. अन्जना शाक्यले अनुरोध गर्नुभएको छ ।

एजेन्सीः विश्वभर महामारीको रुपमा फैलिएको कोरोना भाइरसबाट दक्षिण अमेरिकी मुलुक ब्राजिलमा स्थानीय समय अनुसार शनिबार रातिसम्ममा मृत्यु हुनेको संख्या १ लाख ५० हजार नाघेको छ । कोरोना संक्रमणको दरमा केही दिनदेखि कमी आए पनि कूल मृत्यु भएका व्यक्तिको संख्याका आधारमा ब्राजिल संयुक्तराज्य अमेरिकापछि विश्वमै दोस्रो स्थानमा रहेको छ । ब्राजिलका राष्ट्रपति जेयर बोल्सेनारोले कोरोना भाइरसले गर्न सक्ने क्षतिलाई बेवास्ता गरेको आरोप लागिरहेका बेला कोरोना संक्रमितको मृत्यु उच्च गतिमा बढेको थियो । राष्ट्रपति बोल्सेनारोले सामाजिक दूरीका नियमहरुलाई बेवास्ता गर्दै ठुल्ठूला सभाहरु गरेका थिए । उनले गभर्नर र मेयरहरुले लकडाउन गर्न र कडा नियमहरु अगाडि सारे पनि त्यसलाई अस्वीकार गरेका थिए । यहीबीच गत जुलाईमा उनी स्वयंलाई कोरोना संक्रमण भएको थियो । तर पछिल्ला केही दिनदेखि ब्राजिलमा कोरोना संक्रमण दरमा कमी आउन थालेको छ । विगत एक डेढ महिनाको अवधिमा भाइरसको वृद्धिदरमा कमी देखिएको छ । विगत सात दिनमा दैनिक ५९८ जनाको मृत्यु भइरहे पनि यो गत मे महिनाको तुलनामा निकै कम हो ।