काठमाडौं । प्रधानमन्त्री केपी शर्मा ओलीको सिफारिसमा राष्ट्रपति विद्यादेवी भण्डारीले असंवैधानिक रूपमा प्रतिनिधिसभा विघटन गरेको भन्दै सर्वोच्च अदालतमा २५ रिट पेस भएका छन् । सर्वोच्च अदालतका सञ्चार विज्ञ किशोर पौडेलका अनुसार प्रतिनिधिसभा विघटनविरुद्धमा आइतबार २५ रिट आएको हो । ‘प्रतिनिधिसभा विघटनसम्बन्धी विषयमा २५ रिट पेस भएका छन् । दर्ता हुने नहुने भन्ने निर्णय भोलि हुन्छ,’ उनले भने । प्रधानमन्त्री ओलीको सिफारिसमा राष्ट्रपति भण्डारीले गत शुक्रबार राति प्रतिनिधिसभा विघटन गरेकी थिइन् । उक्त विघटन दोस्रो पटक भएको हो । यसअघि पुस ५ गते प्रधानमन्त्री ओलीकै सिफारिसमा राष्ट्रपतिले पहिलोपटक प्रतिनिधिसभा विघटन गरेकी थिइन् । उक्त विघटन असंवैधानिक भन्दै सर्वोच्च अदालतले गत फागुन ११ गते निर्णय सुनाउँदै प्रतिनिधिसभा पुनःस्थापना गरेको थियो ।

महोत्तरी । म्याद थपका लागि ल्याइएका एक जना थुनुवा आज महोत्तरी जिल्ला अदालतबाटै फरार भएका छन् । ईलाका प्रहरी कार्यालय गौशालाका प्रहरी निरीक्षक विष्णु प्रदीप बस्यालका अनुसार लागु औषध मुद्दामा पक्राऊ परेका गौशाला नगरपालिका-४ बस्ने १५ वर्षीय कमलेश साहलाई प्रहरीले आज म्याद थपका लागि लगिएकोमा उनी महोत्तरी जिल्ला अदालतबाटै फरार भएका छन् । ईलाका प्रहरी कार्यालय गौशालाबाट म्याद थपका लागि गएका कमलेशले प्रहरीलाई शौचालय जाने भन्दै शौचालय पुगेपछि शौचालयको पर्खाल नाघेर भागेको जनाइएको छ । उनी गत शुक्रबार मात्रै औरही नगरपालिका–४ स्थित कठुधारचौकमा भारतबाट ल्याएको भारी मात्रामा लागू औषधसहित पक्राउ परेका थिए । उनको खोजतलाशमा अहिले ईलाका प्रहरी कार्यालय गौशालाका प्रहरी टोलीका साथै जिल्ला प्रहरी कार्यालयबाट पनि व्यापक रूपमा प्रहरी परिचालन गरी उनको खोजतलाश भइरहेको जनाइएको छ ।

काठमाडौं । राष्ट्रपति विद्यादेवी भण्डारीले नागरिकता (पहिलो संशोधन) अध्यादेश २०७८ जारी गरेकी छन् । मन्त्रिपरिषदको सिफारिसमा राष्ट्रपति भण्डारीले संविधानको धारा ११४ को उपधारा १ अनुसार नेपाल नागरिकता (पहिलो संशोधन) अध्यादेश २०७८ जारी गरेकी हुन् । अध्यादेशअनुसार जन्मसिद्ध नागरिकका सन्तानलाई आमाबावु दुवै नेपाली नागरिक भए वंशजका आधारमा नागरिकता दिन मिल्ने भएको छ । त्यस्तै बाबुको पहिचान नभएका सन्तानलाई आमाका नामबाट वंशजका आधारमा नागरिकता दिइने प्रावधान पनि अध्यादेशमा समेटिएको छ । जसपा (महन्त ठाकुर र उपेन्द्र महतो पक्ष)सँगको सम्बन्ध थप मजबुम बनाउन प्रधानमन्त्री केपी शर्मा ओलीले अध्यादेश ल्याएका हुन् ।

काठमाडौं । काठमाडौं उपत्यकामा थप २,८२१ जना कोरोना भाइरस संक्रमण पुष्टि भएको छ । स्वास्थ्य मन्त्रालयका अनुसार आइतबार काठमाडौंमा १,७६१ जना, ललितपुरमा ६९४ जना र भक्तपुरमा ३६६ गरी कुल २,८२१ जना कोरोना पुष्टि भएको हो । आज देशभर ७९१४ संक्रमित थपिएका छन् भने १९३ जनाको मृत्युको मृत्यु भएको छ ।

काठमाडौं । पछिल्लो २४ घण्टामा नेपालमा थप ७९१४ जनामा कोरोना भाइरस संक्रमण पुष्टि भएको छ । मन्त्रालयका अनुसार पछिल्लो २४ घण्टामा १८ हजार ९६५ नमुना पीसीआर विधिबाट परीक्षण भएको छ भने ९३१ नमुना एन्टिजिन विधिबाट भएको छ । जसमा ७ हजार ५९८ जनाको पीसीआर विधि र एन्टिजिन विधिबाट ३१६ जनामा संक्रमण पुष्टि भएको स्वास्थ्य मन्त्रालयले जनाएको छ । हाल देशभर १ लाख १५ हजार ५४७ जना संक्रमित रहेको मन्त्रालयले जनाएको छ । तीमध्ये १,०८,०० भन्दा केही बढी घरमै छन् भँने ७,३४९ जना संस्थागत आइसोलेशनमा भएको मन्त्रालयले जनाएको छ । पछिल्लो २४ घण्टामा १९३ जनाको मृत्यु भएको छ । आज देशभर ७ हजार ६६४ जना संक्रमित निको भएका छन् ।

काठमाडौं । विपक्षी दलले संसद् विघटनविरुद्ध दायर गर्ने रिटको मस्यौदा तयार गरेका छन् । रिटको मस्यौदा तयार भएको र रिट दर्ता गर्न विपक्षी दल भोलि सर्वोच्च अदालत जाने भएका छन् । संसद भवन नयाँ बानेश्वरबाट बाहिरिने क्रममा माओवादी केन्द्रका अध्यक्ष पुष्पकमल दाहाल प्रचण्डले तयारी नपुगेका कारण भोलि बिहान आफूहरू भौतिक रूपमै अदालतमा उपस्थित भएर रिट दायर गर्ने बताए । सिंहदरबारस्थित कांग्रेस संसदीय दलको कार्यालयमा रिटको मस्यौदा तयार गरेपछि संघीय संसद भवन नयाँ वानेश्वरमा आई रिटमा सांसदहरुले हस्ताक्षर गरेका थिए । रिटको मस्यौदा तयार गर्न कांग्रेस नेता लेखक, नेकपा माओवादी केन्द्रका नेता देव गुरुङ, कानुन व्यवसायीहरु सतीशकृष्ण खरेल, योगेन्द्र कार्की, गोविन्द बन्दी, मुक्ति प्रधान संलग्न भएका थिए । रिटमा के छ ? प्रधानमन्त्रीको सिफारिसमा राष्ट्रपति विद्यादेवी भण्डारीले गत शुक्रबार मध्यरातमा संसद विघटन गरेकी थिइन् । रिटमा धारा ७६ (५) अनुसार प्रधानमन्त्री नियुक्तिका लागि नेपाली कांग्रेसका सभापति शेरबहादुर देउवाले १४९ सांसदको हस्ताक्षरसहित गरेको दावी वैधानिक रहेकोले देउवालाई प्रधानमन्त्री नियुक्तिका लागि परमादेश माग गरिएको छ । त्यस्तै, रिटमा प्रतिनिधिसभा विघटन गर्ने सरकारको सिफारिस खारेज गरी संसद अधिवेशन बोलाउन अन्तरिम आदेश पनि माग गरिएको छ । यसपटक भीम रावल र रमेश लेखकले पनि सर्वोच्चमा बहस गर्ने

काठमाडौं । आइतबार एक पटकमा करिव १५० जना भन्दा बढी आरोहीले सगरमाथाको आरोहण गरेको छ । बिहान ५ः०० बजेबाट शुरु भएको आरोहणबाट क्रमस डेड सय बढीले आरोहण सम्पन्न गरेको आधार शिविरमा रहेका सम्पर्क अधिकृत ज्ञानेन्द्र श्रेष्ठले जानकारी दिए । शनिबार नै तयारी अवस्थामा चौथो क्याम्प पुगे पनि धेरै हावा चलेका कारण आरोहणमा ढिलाइ भएको थियो । यस वर्ष ४४ आरोहण दलबाट ४०८ जना आरोहीले सगरमाथा आरोहण अनुमति लिएर तयारी अवस्थामा आधार शिविरमा बसेका छन् । पर्यटन विभागका अनुसार सगरमाथा आरोहण गर्ने यो आरोहीको सङ्ख्या हालसम्मकै उच्च हो । आरोहीमध्ये ३१५ पुरुष, ९२ जना महिला र एक जना तेस्रो लिंगी आरोही छन् । सगरमाथाबाट मात्र यो सिजनमा ४९ करोड ६१ लाख ३१ हजार ७८७ रुपैयाँ राजस्व सङ्कलन भएको विभागको तथ्याङ्क छ । १० दिन अघि वहराइनका राजकुमार शेख मोहम्मद हमाल अलिफासहितको टोलीले आरोहण सम्पन्न गरेको थियो ।

प्यूठान । घर भत्किँदा एकै परिवारका तीन जनाको मृत्यु भएको छ । मृत्यु हुनेमा नौबहिनी गाउँपालिका–१ स्याउलिबाङ चौताराका ४० वर्षीय वोमबहादुर मल्ल, उनकी ३३ वर्षीया श्रीमती गमी मल्ल र तीन वर्षीय छोरा शिशिर मल्ल रहेका छन् । खरको छाना हटाएर जस्तापाता लगाउन तयार पारिएको घर शनिबार राति भत्किँदा उनीहरूको मृत्यु भएको प्यूठान प्रहरी प्रवक्ता प्रहरी निरीक्षक देवीप्रसाद गैरेले जानकारी दिए । चार छोरीहरु भने अर्को कोठामा रहेकाले सकुशल छन् ।

सङ्खुवासभा । सिलिचोङ गाउँपालिका–५ याफुमा जङ्गली च्याउ खाँदा एकै घरका नौजना बिरामी परेका छन् । गत शुक्रबार जङ्गलबाट ल्याएको च्याउ खाँदा सिलिचोङ–५ का दुई घरका नौजना गम्भीर बिरामी भएको सो वडाका वडाध्यक्ष ईश्वर कुलुङले जानकारी दिए । जङ्गली च्याउ खाँदा बिरामी परेका नौमध्ये आठजनाको अवस्था गम्भीर भएको वडाध्यक्ष कुलुङले बताए । जङ्गली च्याउ खाँदा बुद्धबहादुर राई र आमा बुद्धिमाया राईसहित परिवारका नौजना बिरामी परेको वडाध्यक्ष कुलुङले जनाए । त्यस्तै बिरामी पर्नेमा उहाँका छोरा महेन्द्र, वीरेन्द्र, शहदेव, कान्छी बुहारी, छोरी, नातिनी र नाति रहेका छन् । जङ्गली च्याउ खाएर शुक्रबार रातिदेखि बिरामी परेपछि शनिबार उपचारका लागि जिल्ला अस्पताल सङ्खुवासभा ल्याइएको थियो । जङ्गलबाट टिपेर ल्याएको च्याउ खाएर सुतेपछि मध्यरातबाट परिवारका सबैलाई बान्ता हुन थालेपछि शुक्रबार याफु आधारभूत स्वास्थ्य सेवा एकाइमा भर्ना गरिएको वडाध्यक्ष कुलुङले बताए । च्याउ खाने सबै जनाको किड्नी र कलेजोमा बढी समस्या देखिएपछि सुनसरीको धरानस्थित विपी कोइराला स्वास्थ्य विज्ञान प्रतिष्ठान धरान सिफारिस गरिएको जिल्ला अस्पतालका प्रमुख चिकित्सक सुन्दरश्याम जानकारी दिए ।

काठमाडौं । नेकपा एमालेका नेता योगेश भट्टराईले सबैले आफ्नो बिगतलाई हेर्दै संवाद गर्नुपर्ने बताए । एमाले फुटको संघारमा पुगेका बेला भट्टराईले कार्बाही, प्रतिशोध र बदलाको राजनीतिले कसैलाई सही गन्तब्यमा नपुर्‍याउने बताएका छन् । त्यसकारण सबैले आफ्नो विगतलाई हेरेर धैर्य गर्नुपर्ने र संवाद गर्नुपर्नेमा भट्टराईले जोड दिएका छन् । पछिलो पटक संसद् विटनपछि मन्त्रीबाट राजीनामा दिएर एमाले वरिष्ठ नेता माधव नेपाल पक्षमा लागेका भट्टराई पछिल्लो समय अध्यक्ष केपी ओली पक्षमा लागेको बताइएको छ । तर, उनले त्यसबारे स्पष्ट खुलाएका छैनन् । उता, नेपाल पक्षले नयाँ पार्टी खोल्ने तयारी गरिसकेको छ । सम्बन्धित समाचारः नेकपा एकीकृत पार्टी दर्ता, माधव नेपाल निकट राई अध्यक्ष माधव नेपाल समूहद्वारा अर्को पार्टी खोल्ने निर्णय

काठमाडौं । नेपाली कांग्रेसका वरिष्ठ नेता रामचन्द्र पौडेलले फेरि न्यायमुर्तिको काधमा जिम्मेवारी आएको बताएका छन् । प्रतिनिधि सभा विघटनविरुद्ध विपक्षी गठबन्धनले सर्वोच्च अदालतमा रिट दर्ता गर्ने तयारी गरेका बेला पौडेलले यस्तो बताएका हुन् । उनले सामाजिक सञ्जालमा भनेका छन्, ‘संविधान पनि वचोस्, जनता पनि वचुन्, न्यायमुर्तिको काधमा फेरि जिम्मेवारी आयो ।’ यसअघि प्रधानमन्त्री केपी शर्मा ओलीले पुस ५ गते गरेको संसद् विघटन अदालतले खारेज गरिदिएको थियो । त्यसतर्फ संकेत गर्दै पौडेलले फेरि न्यायमुर्तिको काधमा जिम्मेवारी आएको बताएका हुन् । प्रतिनिधि सभा विघटनविरुद्ध प्रतिपक्षी दलहरु आजै सर्वोच्च जाने, सबैलाई नागरिकता लिएर उपस्थित हुन निर्देशन

दाङ्ग । नेपालको कोभिड महामारीमा सघाउन मध्यपूर्वी मुलुक कतार, साउदी, युएईमा र साईपरस, अस्ट्रेलिया, हङकङमा रहेका दङ्गाली तथा गैर दङ्गाली श्रमिकहरुले दैनिक खर्च कटाएर संकलन गरेको रकम हस्तान्तरण गरिएको छ । उनीहरुले पठाएको दुई लाख २० हजार रुपियाँ नेपाल पत्रकार महासंघ दाङ्ग, राप्ती स्वास्थ्य बिज्ञान प्रतिष्ठान घोराही र बेलझुण्डी कोरोना हस्पिटल दाङ्ग, लमही कोरोना हस्पिटल, सिसहनिया कोरोना हस्पिटल देउखुरीलाई अक्सिजन भर्नको लागि हस्तान्तरण गरिएको हो । आईसोलेसनको लागि नेपाल पत्रकार महासंघ दाङ्ग, राप्ती स्वास्थ्य बिज्ञान प्रतिष्ठानको अक्सिजन पलान्ट निर्माणको लागि र बेलझुण्डी कोरोना हस्पिटल, लमही कोरोना हस्पिटल र सिसहनिया कोरोना हस्पिटलमा अक्सिजन भर्नलाई हस्तान्तरण गरिएको छ । सामाजिक अभियान्ता योगेश श्रेष्ठको सक्रियतामा साउदी, युएई, साईपरस, पर्चुगल, हङकङ र अस्ट्रेलियामा रहेका नेपालीहरु एवं कतारस्थित दाङ्ग देउखुरी सेवा समाजको सहयोग तथा सहकार्यमा एक कार्यक्रमका बीच हस्तान्तरण गरिएको दाङ्ग देउखुरी सेवा समाज संस्था दाङका अध्यक्ष लीलामणि लामिछानेले बताए । अक्सिजन सिलिण्डर रकम हस्तान्तरण गर्दै कतारका अध्यक्ष छबिलाल बुढाथोकीले कतारलगायत विभिन्न देशमा रहेका नेपालीहरुले आर्थिक संकलन गरिरहेको बाँकी रकम छिट्टै हस्तान्तरण गरिने जानकारी दिए । पुर्ब अध्यक्ष नुमाकान्त सुवेदीले कोभिड–१९ संक्रमणले हाल नेपालमा ज्यादै कठिन र दुखदायी अवस्था सिर्जना हुँदै गइरहेको र संक्रमणका कारण मानवीय क्षति पनि बढ्दो रहेको भन्दै विदेशमा रहेका नेपालीहरुले यस संकटको घडीमा मानवीय सहायताको लागि हात अघि बढाउने सबै आर्थिक दातालाई धन्यवाद दिए ।

काठमाडौं । नयाँ भेरियन्टसहितको दोस्रो लहरको कोरोना तीव्ररूपमा फैलिएकाले रुघा, खोकी, ज्वरो, जीउ दुख्नेलगायत स्वास्थ्य समस्या हुँदा जाँच गराउनुपर्नेमा जोड दिइएको छ । वाग्मती सफाइ महाअभियान र ‘हामी तपाइँको साथमा’ नामक परोपकारी अभियानले शनिबार बेलुका जुम प्रविधिबाट आयोजना गरेको ‘अहिलेको महामारीमा के गर्ने ? के नगर्ने ?’ विषयक छलफल कार्यक्रममा त्रिभुवन विश्वविद्यालय शिक्षण अस्पतालका डा. सन्तकुमार दासले कोरोनाको दोस्रो चरणमा रुघा, ज्वरोमात्र आएकालाई पनि कोरोना पुष्टि भएकाले सजग हुन आह्वान गरे । सामान्य स्वास्थ्य समस्या आउँदैमा कोभिड होइन किन जाँच गर्ने भनेर नबसी स्वास्थ्य जाँच गरी ढुक्क हुनुपर्ने उनले बताए । ढिला अस्पताल पुग्ने बिरामीलाई बचाउन अप्ठ्यारो भएकाले स्वास्थ्य सतर्कता अपनाउन दासले अनुरोध गरेका हुन् । सबै ज्वरोलाई कोभिड नै ठानेर परीक्षण गर्नुपर्ने सुझाव चिकित्सकको छ । छिटो परीक्षण गरे स्वास्थ्य सुरक्षाका विधि अपनाएर बिरामीलाई बचाउन सकिने चिकित्सकको अनुभव छ । पहिलो चरणमा कोरोनाले युवालाई फरक पर्दैन भनी बेवास्ता गरेकामा दोस्रो चरणमा धेरै युवालाई समातिरहेको छ । बालबालिका पनि प्रभावित हुन थालेका छन् । अझ तेस्रो चरणमा बालबालिकालाई धेरै असर गर्ने विज्ञको अनुमान सार्वजनिक भइरहेका बेला स्वास्थ्य सजगता अपनाउनुपर्ने स्वास्थ्यकर्मीको भनाइ छ । बिरामीले आफैँ औषधि किनेर खाने नगरी चिकित्सकको सल्लाहमा मात्र अघि बढ्नुपर्ने सुझाव दासले दिए । जनसङ्ख्याको ७० प्रतिशतभन्दा बढी नागरिकलाई खोप नलगाएसम्म स्वास्थ्य मापदण्ड पालना गर्नुपर्ने सुझाव उहाँको छ । प्रशस्तमात्रामा सुत्न, यथेष्ट मात्रामा पानी पिउन पनि उनले सल्लाह दिएका छन् । छ दिनभन्दा बढी ज्वरो आए घरमा नबसी तत्काल चिकित्सककहाँ जान चिकित्सकले सुझाव दिएका छन् । दोस्रो लहर अझै १० दिनसम्म रहनसक्ने दासको भनाइ छ । दोस्रो चरणमा धेरैलाई निमोनिया भइरहेको छ । कार्यक्रममा पूर्व मुख्यसचिव एवं सफाइ महाअभियानका मुख्य अभियानकर्मी लीलामणि पौडेल, अभियानकर्मी राजकुमार भट्टराईलगायतले आम मानिसमा चेतना जागृत गर्न जुम प्रविधिका माध्यमबाट साप्ताहिक रूपमा कार्यक्रम आयोजना गरिएको बताए । महाअभियानले प्रत्येक दिन बिहान साढे छ बजेदेखि एक घण्टासम्म कोरोनाबाट बच्न सहयोग पुग्ने प्राणायाम, योगासनलगायत साधनासमेत गराइरहेको छ ।

काठमाडौं । प्रतिपक्षी दलहरुले प्रतिनिधि सभा विघटनविरुद्ध सर्वोच्चमा रिट दर्ता गर्ने भएका छन् । आज अपरान्ह सांसदहरु भेला भएर आवश्यक तयारी पुरा गरेपछि सर्वोच्च जाने कार्यक्रम रहेको छ । कतिपय सांसदहरु काठमाडौं बाहिर रहेकोले उनीहरुलाई समेत बोलाउने कि उपलब्ध सांसदहरुसहित सर्वोच्च जाने भन्ने विषयमा अझै स्पष्ट भइसकेको छैन । प्राप्त जानकारी अनुसार, रिट निवेदनमाथि नेकपा एमालेका नेता भीम रावल र नेपाली कांग्रेसका नेता रमेश लेखकले समेत अधिवक्ताको रुपमा बहस गर्ने भएका छन् । राजनीतिक व्यक्तित्वको पहिचान भएपनि दुबै कानुन व्यवसायीको प्रमाणपत्र लिएका व्यक्ति समेत हुन । रावल र लेखकवाहेक कानुन व्यवसायीका तर्फबाट क–कसले बहस गर्छन् भन्ने कुरा निवेदन दर्ता भएपछि मात्रै थाहा हुनेछ । संविधानको धारा ७६ को उपधारा ५ बमोजिम वहुमत सांसदको हस्ताक्षर बुझाउँदा पनि राष्ट्रपतिले प्रतिनिधिसभा विघटन गरेका हुनाले विपक्षी गठबन्धनले राजनीति तथा कानुनी लडाइँ लड्ने निर्णय गरेसँग आज अदालत जान लागिएको नेपाली कांग्रेसका नेता लेखकले बताए । देउवासहित माओवादी अध्यक्ष पुष्पकमल दाहाल प्रचण्ड, एमाले नेता माधवकुमार नेपाल र जसपा अध्यक्ष उपेन्द्र यादवलगायतका नेता सांसदसहित अदालत पुग्नेछन् । विपक्षी गठबन्धनले रिटको मस्यौदा तयार पारिसकेका छन् । सिंहदरबार कांग्रेस संसदीय दलको कार्यालयमा विपक्षी सांसदहरूलाई अहिले विहान ११ बजे बोलाइएको छ । त्यहाँ रीटको ड्राफ्टमा हस्ताक्षर गरेर सर्वोच्च जाने तयारी विपक्षी गठबन्धनले गरेको छ ।

काठमाडौं । नेकपा एमालेभित्रको विवाद चर्किँदै जाँदा निर्वाचन आयोगमा नेकपा एकीकृत पार्टी दर्ता भएको छ । पार्टीको नाम ‘नेकपा एकीकृत’ र चुनाव चिन्ह ‘कलम’ प्रस्ताव गर्दै आयोगमा निवेदन परेको छ । उक्त पार्टी जीवन राईले दर्ता गरेका हुन् । राईं एमाले वरिष्ठ नेता माधव कुमार नेपाल पक्षधर विद्यार्थी  नेता मानिन्छन् । संखुवासभाका राई नेकपाको विद्यार्थी भातृ संगठन अनेरास्वियूका सचिवालय सदस्य थिए । तर, राईंले नेपालको सहमतिमा भने पार्टी दर्ता नगरेको बताएका छन् । पार्टीको उपाध्यक्षमा कल्पना गुरुङ, महासचिव विनोद खुला, सचिव ऐनविक्रम कुँवर र कोषाध्यक्ष सुशील खनाल रहेको छन् । राईले दल दर्ताका लागि निवेदन दिएको आयोगका प्रवक्ता राजकुमार श्रेष्ठले जानकारी दिए ।