काठमाडौं । उपप्रधान तथा गृहमन्त्री रवि लामिछानेमाथि सहकारी ठगीमा अनुसन्धान हुनुपर्ने मागसहित सर्वोच्च अदालतमा दायर रिटको आज अन्तिम बहस हुँदैछ । सपना मल्ल प्रधान र शारंगा सुवेदीको संयुक्त इजलासमा असार ७ गतेदेखि अन्तिम सुनुवाइ सुरू भएको थियो । त्यो दिन बहस नसकिएपछि आजका लागि हेर्दाहेर्दैमा राखिएको छ । सर्वोच्च अदालतका सूचना अधिकारी गोविन्द घिमिरेका अनुसार अब विपक्षी रविका तर्फबाट मात्र बहस बाँकी छ । रविलाई निलम्बन गरी अनुसन्धान हुनुपर्ने माग गर्दै अधिवक्ता अनुपम भट्टराईले दर्ता गराएको रिटमा महान्यायाधिवक्ता कार्यालयसमेतलाई विपक्षी बनाइएको छ । सहकारी ठगी मुद्दामा लामिछानेलाई उन्मुक्ति दिइएको दाबीसहित उक्त प्रकरणमा अनुसन्धान हुनुपर्ने र निलम्बन गरिनुपर्ने निवेदकको जिकिर छ ।

काठमाडौँ । संघीय संसद अन्तर्गत प्रतिनिधिसभाको बैठक आज बस्दैछ । बैठक बिहान ११ बजे संसद भवन नयाँबानेश्वरमा बस्नेछ ।आजको बैठकमा सभामुखले राष्ट्रपति र प्रधानमन्त्री तथा मन्त्रिपरिषदको कार्यालयबाट कार्यभार तोकिएको सम्बन्धी पत्रको व्यहोरा पढेर सुनाउने कार्यसूची रहेको छ । यस्तै, ऊर्जा, जलस्रोत तथा सिँचाइ मन्त्री शक्तिबहादुर बस्नेतले अन्तर्राष्ट्रिय सौर्य गठबन्धन ९आइएसए०को स्थापनासँग सम्बन्धित सम्झौतामाथि सामान्य छलफल गरियोस् भन्ने प्रस्ताव प्रस्तुत गर्ने कार्यक्रम रहेको छ । अर्थमन्त्री वर्षमान पुनले बैंक तथा वित्तीय संस्था सम्बन्धी (पहिलो संशोधन) विधेयक २०८० लाई प्रस्तुत गर्न अनुमति माग्ने प्रस्ताव प्रस्तुत गर्नुका साथै बैंक तथा वित्तीय संस्था सम्बन्धी (पहिलो संशोधन) विधेयक २०८० प्रस्तुत गर्ने कार्यसूची रहेको छ ।अर्थमन्त्रीले भन्सार विधेयक २०८० लाई दफावार छलफलका लागि सम्बन्धित समितिमा पठाइयोस् भन्ने प्रस्ताव प्रस्तुत गर्नेछन् । आजको बैठकमा संघीय मामिला तथा सामान्य प्रशासनमन्त्री भानुभक्त जोशीले निर्माणमुखि सामग्री (व्यवस्थापन तथा नियमन विधेयक २०८० लाई दफावार छलफलका लागि सम्बन्धित समितिमा पठाइयोस् भन्ने प्रस्ताव प्रस्तुत गर्ने कार्यसूची रहेको छ ।

बेइजिङ । चीन भ्रमणमा रहेका उपप्रधानमन्त्री तथा पराराष्ट्रमन्त्री नारायणकाजी श्रेष्ठले मंगलबार चिनियाँ विदेशीमन्त्री वाङ यीसँग भेटवार्ता हुने भएको छ।  विदेशमन्त्री वाङ यीको निम्तोमा एक साता लामो भ्रमणका सोमबार बिहान बेइजिङ पुगेका श्रेष्ठले आज चिनियाँ विदेशमन्त्री वाङ यीसँग भेटवार्ता गर्न लागेका हुन् ।  विदेशमन्त्री वाङ यीसँगको भेटमा यसअघि नेपालसँग भएका सम्झौता कार्यान्वयनको समीक्षा र चीनको विकास परियोजना बेल्ट एन्ड रोड इनिसियटिभ (बीआरआई)परियोजना कार्यान्वयनको विषयमा छलफल हुने बताइएको छ ।नेपालले सन् २०१७ मेमा बीआरआई परियोजनामा हस्ताक्षर गरेपछि नौ वटा परियोजनामा काम गर्ने प्रस्तावमा छलफल गरे पनि हालसम्म कुनै परियोजना अगाडि बढेको छैन ।  यसपटक चीनले नेपालसँग कुनै एक परियोजना सुरुवात गर्ने चाहना राखेको छ । त्यसका लागि परराष्ट्रमन्त्री श्रेष्ठ र चिनियाँ विदेशमन्त्री वाङ यीबिच हुने छलफल पछि प्रक्रिया अगाडि बढ्ने अपेक्षा गरिएको छ ।   वाङ यीसँगको भेटमा बीआरआई परियोजनाबारेमा बढी छलफल हुनेछ । बेइजिङस्थित नेपाल दूतावासका अनुसार छलफल यसअघि प्रधानमन्त्री पुष्पकमल दाहालको चीन भ्रमणका क्रममा भएका सम्झौताका बुँदाहरूमा समेत छलफल हुनेछ ।    यसअघि, सोमबार परराष्ट्रमन्त्री श्रेष्ठले चिनियाँ कम्युनिस्ट पार्टीका स्थायी समितिका सदस्य वाङ हुनिङसँग भेटवार्ता गरेका थिए । भेटमा गत ६ महिनाअघि प्रधानमन्त्री पुष्पकमल दाहालको चीन भ्रमणमा भएका सहमतिपछि भएका प्रगति र चीनको विकास परियोजना बेल्ट एन्ड रोड इनिसियटिभ९बीआरआई० परियोजना कार्यान्वयनको विषयमा छलफल गरिएको थियो ।  वाङ चिनियाँ कम्युनिस्ट पार्टीका सात सदस्यीय स्थायी समितिका पाँचौँ नम्बरका सदस्य हुन् । उनी चिनियाँ सरकारको सल्लाह दिने चिनियाँ पिपुल्स पोलिटिकल कन्सल्टेभिक कन्फरेन्स (सीपीपीसीसी)का अध्यक्ष समेत हुन् । चीन र नेपालबिच भएका सहमतिहरूलाई कार्यान्वयन पक्षमा अगाडि बढाउन र नेपालको विकास साझेदारीमा चीनको साथ सहयोग रहने उनले प्रतिबद्धता जनाएका छन् । 

काठमाडौं । जनता समाजवादी पार्टी (जसपा)क सांसद मन्जु शर्मा अन्सारीको निधन भएकामा राष्ट्रियसभाबाट शोक प्रस्ताव पारित गरिएको छ । सोमबार बसेको राष्ट्रियसभा बैठकबाट शोक प्रस्ताव पारित गरिएको हो । अन्सारीको परिवारजनमा समवेदना समेत व्यक्त गरिएको छ । उनीप्रति श्रद्धाञ्जलीस्वरूप सभाका सदस्यले एक मिनेट मौन धारण गरे । राष्ट्रियसभा अध्यक्ष नारायणप्रसाद दाहालले भने, “संघीय संसद् प्रतिनिधिसभा सदस्य मन्जु शर्मा अन्सारीको निधन भएकोमा शोक प्रस्ताव प्रस्तुत गर्दछु । वि।सं। २०२० साल माघ १९ गते जन्मनुभएकी प्रतिनिधिसभा सदस्य मन्जु शर्मा अन्सारीको मिति २०८० साल चैत्र ४ गते आइतबार उपचारको क्रममा असामयिक निधन भएकोमा राष्ट्रियसभाको यो बैठक उहाँको निधनप्रति शोक प्रकट गरी श्रद्धाञ्जली अर्पण गर्दै शोक सन्तप्त परिवारजनप्रति समवेदना प्रकट गर्दछ । स्व। अन्सारी जनता समाजवादी पार्टी, नेपालबाट विक्रम संवत् २०७९ सालको प्रतिनिधिसभामा समानुपातिक सदस्यको रूपमा निर्वाचित हुनुभएको थियो । यो बैठक स्व। अन्सारीप्रति भावपूर्ण श्रद्धाञ्जली अर्पण गर्दै शोक सन्तप्त परिवारजनप्रति समवेदना प्रकट गर्दछ ।” राष्ट्रियसभाको अर्को बैठक यही चैत ७ गते बिहान सवा ११ बजे बस्ने गरी बोलाइएको छ ।

स्पेन। भरतपुर महानगरपालिकाका प्रमुख रेनु दाहालले यही वर्ष भरतपुर घुम्न र आफन्तीलाई पनि घुम्न आग्रह गर्न आह्वान गरेकी छिन् । उनले नेपाली जनप्रगतिशील मञ्च (एनपीपीएफ)स्पेनको महाधिवेशनको उद्घाटन गर्दै उनले सो कुरा बताएकी हुन् । महाधिवेशनमा बोल्दै मेयर रेनु दाहालले अंकगणितीय नतिजा जेजस्तो रहेपनि देश माओवादीकै नीतिमा अगाडि बढिरहेको बताइन्। गणतन्त्र, संघियता, समावेशीता लगायतका उपलब्धि जनयुद्धबाटै आएका हुन्, उनले भनिन्, माओवादी, जनयुद्ध भन्न डराउनुपर्दैन,उनले भनिन्, ‘माओवादीकै नेतृत्वमा सरकार छ, जनताले शुशासनको अनुभूति गर्न थालेका छन्, थुप्रै हकअधिकार जनताले पाएका छन्।’ उनले भरतपुर महानगरमा भ्रमण गर्न प्रवासीहरुलाई आव्हान गरेकी छन्। यहि वर्ष भरतपुर घुमौँ, आफन्तीलाई पनि भनौँ, उनले भनिन्, ‘युरोपबाट समेत पर्यटक लैजाने गरि कार्यक्रम र प्रचार गरौँ। राजदूत ढकालले स्पेनबाट कम्तिमा १ लाख पर्यटक नेपाल जाने वातावरण बनाउन पहल भैरहेको बताइन्। वर्षमा कम्तिमा १ लाख पर्यटक स्पेनबाट गएर घुमुन्, भरतपुरमा सक्दो पर्यटक पठाउनेछौँ, उनले भनिन्, मेयर दाहालको नेतृत्वले उज्यालो नेपाल बन्ने महसुस भएको छ, उहाँको जस्तै मिहेनत हरेक पालिकाहरुमा होस्, विकासका एजेन्डामा सबै मिलुन्।’ नेपाली जनप्रगतिशील मञ्च (एनपीपीएफ)स्पेनको अध्यक्षमा पुनः विशाल ढुङ्गाना चयन भएका छन्। चौथो अधिवेशनले ढुङ्गानाको अध्यक्षतामा १५ सदस्यीय कार्यसमिति सर्वसम्मत चयन गरेको हो। उपाध्यक्षमा केशवराज कँडेल, राजेन्द्र सेढाई, महासचिवमा सूर्यप्रसाद सापकोटा धिरज चयन भएका छन्। यस्तै सचिवमा रामु गैरे, गोविन्द अधिकारी, कोषाध्यक्षमा ज्ञानबहादुर बस्नेत चयन भएका छन्।सदस्यहरुमा उदयराज पाठक, बालकुमार बुढा, विश्वास भट्टराई, विप्लव काफ्ले, कृष्ण पौडेल, नवीन दुलाल, खेमबहादुर भण्डारी, राममणी सिलवाल चयन भएका छन्। कार्यसमितिको पहिलो बैठकले महिला उपाध्यक्ष, महिला सचिव, प्रवक्ता, महिला सदस्यहरु मनोनित गर्नेछ। नयाँ कार्यसमितिलाई भरतपुर महानगरका मेयर रेनु दाहाल, स्पेनस्थित नेपाली राजदूत शर्मिला पराजुली ढकालले नवनिर्वाचित कार्यसमितिलाई प्रमाणपत्र वितरण गरेका थिए। यसैबीच बार्सिलोनामा जारी नेपाली जनप्रगतिशील मञ्च युरोपको ५ औँ महाधिवेशनले आज (सोमबार) नयाँ कार्यसमिति चयन गर्दैछ। आइतबार सुरु भएको महाधिवेशनको राति अबेर बन्द शत्र सोमबार गर्ने गरि रोकिएको थियो । बन्दशत्रमा राष्ट्रिय कमिटिका अध्यक्षहरुको संगठनको अवस्था, भावी कार्योजनाबारे प्रतिवेदन प्रस्तुत गर्दैछन्। विधान संशोधन, सांगठनिक र आर्थिक प्रतिवेदनमाथि समेत छलफल गर्ने कार्यतालिका रहेको छ।

सुर्खेत। नेपाल कम्युनिष्ट पार्टी (नेकपा) का महासचिव नेत्रविक्रम चन्द ‘विप्लव’ ले तीन वर्षमा आफ्नो पार्टीलाई चन्दामुक्त पार्टी बनाउने लक्ष्य रहेको रहेको बताएका छन् । उनले आन्तरिक जीवनमा आत्मनिर्भर मात्र नभई चन्दा मुक्त गर्ने पार्टीको लक्ष्य रहेको बताए शुक्रबार वीरेन्द्रनगरमा पत्रकारसँग अन्तरक्रिया कार्यक्रममा उनले सोही अनुसार पार्टीले अहिले कृषि अभियानहरु चलाईरहेको बताए । विप्लबले कम्युनिष्ट भनेको श्रमसँग जोडिने उत्पादक शक्ति भएको भन्दै कम्युनिष्टले‌ श्रमलाई बुझ्न सक्नुपर्ने धारणा राखे ।  जुम्ला र कालिकोटमा स्याउ खेती सुरु गरेर सुर्खेत फर्किएका उनले श्रमलाई मध्यनजर गरेर आफ्नो पार्टीले आर्थिक क्रान्तिको‌ सुरुवात गरेको दावी गरे । उनका अनुसार अहिले ८ वटा फर्महरु ठुलो स्केलमा चलेका छन् भने २८ बिघामा कृषिका कामहरु भइरहेका छन् । साथै स–साना बिघाहरुमा त जिल्ला जिल्लामा कृषि खेतीका कामहरु भइरहेको उनले बताए । जुम्ला र कालिकोट पुग्दा जनयुद्धको जस्तै जनताको साथ रहेको पनि उनले बताए।‌ साथै उनले नेपालको अर्थतन्त्र समाजवादी हुनुपर्ने धारणा राखे ‌। ‘एक जनाले माग्ने, अरुले हात थापेर खाने अर्थतन्त्रले कहीँ पुगिदैन,’ उनले भने, ‘त्यस कारण पैसालाई जनतातर्फ फर्काउनुपर्छ।’ राजनैतिक विषयमा कुरा राख्दै यो व्यवस्था एउटा गोलचक्करमा फसेको उनको भनाई छ ‌। ‘बर्षैपिच्छे सरकार फेरबदल भइरहने हो भने देशले निकास पाउँदैन,’ उनले भने, ‘नेपाललाई अहिलेको सत्ता प्रणालीबाट अगाडी नबढाएसम्म स्थिरता आउँदैन ।’ यो विषयमा समाजवादी मोर्चाहरुको धारणा पनि एक‌ रहेको विप्लवको भनाइ छ।

काठमाडौं । अबैध लागूऔषध सहित देशका विभिन्न स्थानबाट ११ जना पक्राउ परेका छन् । देशका विभिन्न ठाउँबाट चेकजाँचको क्रममा प्रहरीले उनीहरुलाई पक्राउ गरेको हो ।   मोरङको बिराटनगर महानगरपालिका १५ एक नम्बर ढाटबाट अवैध लागूऔषध खैरो हेरोइन जस्तो देखिने पदार्थ ९२ मिलिग्रामसहित २ जनालाई बुधबार दिउँसो प्रहरीले पक्राउ गरेको छ । पक्राउ पर्नेहरूमा सोही महानगरपालिका १२ बस्ने राजकुमार कामत र २४ वर्षीय आशिष पोदार रहेका छन् । लागूऔषध नियन्त्रण ब्यूरो बिराटनगरबाट खटिएको प्रहरीले भारतबाट नेपालतर्फ आउँदै गरेको को १० प ४४७० नम्बरको मोटरसाइकललाई जाँच गर्ने क्रममा मोटरसाइकलमा सवार उनीहरूलाई उक्त पदार्थसहित पक्राउ गरेको हो । यसैगरी मोरङ, सुन्दरहरैंचा नगरपालिका ३ बस्ने ३० वर्षीया सुनिता राईलाई अवैध लागूऔषध ब्राउनसुगर १० ग्राम, गाँजा ३ किलो ५ सय ग्राम, डिजिटल तराजु २ थान र नगद ५ लाख ३८ हजार २ सय ५० रूपैयाँसहित बुधबार दिउँसो प्रहरीले पक्राउ गरेको छ । इलाका प्रहरी कार्यालय बेलबारी र प्रहरी चौकी गछियाबाट खटिएको प्रहरीले उनको घर तलासी गर्दा उक्त लागूऔषध र नगद फेला पारी उनलाई पक्राउ गरको हो ।  भक्तपुर, मध्यपुर ठिमी नगरपालिका ४ नयाँ ठिमीबाट अवैध लागूऔषध गाँजा २ किलो १५ ग्रामसहित सोही ठाउँ बस्ने सिन्धुली लामाचौर गाउँपालिका(७ घर भएकी ३९ वर्षीया सुष्मा तामाङलाई बुधबार साँझ प्रहरीले पक्राउ गरेको छ । जिल्ला प्रहरी परिसर भक्तपुर र प्रहरी वृत्त जगातीबाट खटिएको प्रहरीले उनलाई उक्त गाँजासहित पक्राउ गरेको हो । साथै आवश्यक सोधपुछको लागि अन्य ३ जनालाई समेत प्रहरीले नियन्त्रणमा लिएको छ ।  काभ्रे, पनौती नगरपालिका ५ नैकिङटार बस्ने ४१ वर्षीय नकुल तिमल्सिनालाई अवैध लागूऔषध खैरो हेरोइन जस्तो देखिने पदार्थ करिब ३८ ग्रामसहित बुधबार राति प्रहरीले पक्राउ गरेको छ । लागूऔषध नियन्त्रण ब्यूरो काठमाडौं, जिल्ला प्रहरी कार्यालय काभ्रे र इलाका प्रहरी कार्यालय बनेपाबाट खटिएको प्रहरीले उनको घर तलासी गर्दा उक्त पदार्थ फेला पारी पक्राउ गरेको हो ।   झापा, दमक नगरपालिका(३ बस्ने ३० वर्षीय दावा तामाङलाई अवैध लागूऔषध ब्राउनसुगर जस्तो देखिने पदार्थ १ ग्रामसहित बुधबार राति प्रहरीले पक्राउ गरेको छ । प्रहरी चौकी बेलडागीबाट खटिएको प्रहरीले उनलाई उक्त पदार्थसहित पक्राउ गरेको हो । कैलाली, टीकापुर नगरपालिका ३ रामपुरबाट अवैध लागूऔषध खैरो हेरोइन जस्तो देखिने पदार्थ १ सय मिलिग्रामसहित जानकी गाउँपालिका(७ बस्ने २६ वर्षीय राज कुमार चौधरीलाई बुधबार बेलुकी प्रहरीले पक्राउ गरेको हो । इलाका प्रहरी कार्यालय टीकापुरबाट खटिएको प्रहरीले उनलाई उक्त पदार्थसहित पक्राउ गरको हो ।  यसैगरी कैलाली, गोदावरी नगरपालिका १ भरतपुरबाट अवैध लागूऔषध खैरो हेरोइन जस्तो देखिने पदार्थ २ सय ८० मिलिग्रामसहित सोही ठाउँ बस्ने २६ वर्षीय माधब बिष्टलाई बुधबार बेलुकी प्रहरीले पक्राउ गरेको छ । इलाका प्रहरी कार्यालय मालाखेतीबाट खटिएको प्रहरीले उनलाई उक्त पदार्थसहित पक्राउ गरेको हो ।  यस सम्बन्धमा आवश्यक अनुसन्धान गरिरहेको प्रहरीले जनाएको छ । 

काठमाडौं । नेपाल सुपर लिग (एनएसएल) फुटबलमा आज दुई खेल हुँदैछन् । आज स्पोर्टिङ इलाम र ललितपुर सिटी तथा बुटवल लुम्बिनी र पोखरा थन्डर्सबीच प्रतिस्पर्धा हुनेछ । आज हुने पहिलो खेलमा इलाम र ललितपुरले खेल्ने छन् । यो खेल त्रिपुरेश्वरस्थित दशरथ रङ्गशालामा दिउँसो १ बजे सुरु हुनेछ ।जारी लिगमा आज इलामले आठौँ तथा ललितपुरले सातौँ खेल खेल्दैछन् । आजको खेलमा इलाम दोस्रो जितको खोजीमा रहँदा ललितपुर तेस्रो जित सहित तालिकाको शीर्ष स्थानमा उक्लने योजनामा छ । यसअघिका खेलमा इलाम एकमा जित दुईमा बराबरी र चारमा हार बेहोर्दै ५ अंकका साथ तालिकाको पुछारमा छ । यस्तै, ललितपुर भने अपराजित छ । दुईमा जित, चारमा बराबरी गर्दै १० अंक जोडेको ललितपुर तेस्रो स्थानमा छ ।यस्तै, आजै साँझ ५ बजे हुने अर्को खेलमा बुटवल लुम्बिनी र पोखरा थन्डर्स भिड्ने छन् । दुवै टोलीले आज सातौँ खेल खेल्दै छन् । यसअघिका खेलमा बुटवल दुईमा जित, एकमा बराबरी र तीनमा हार बेहोर्दै ७ अंक जोडेर तालिकाको छैटौँ स्थानमा छ भने पोखरा तीनमा जित, दुईमा बराबरी र एकमा हारसहित ११ अंकका साथ दोस्रो स्थानमा छ । आजको खेलमा पोखरा चौथो जित निकाल्दै तालिकाको शीर्षस्थानमा उक्लने प्रयासमा हुनेछ भने ७ अंक भएको बुटवल तेस्रो स्थानको ललितपुरसँग १० अंकको बराबरी गर्ने लक्ष्यमा छ । मंसिर ८ गतेदेखि सुरु लिगमा ९ टोली सहभागी छन् ।  

काठमाडौं । देशभर भएको स्थानीय तह निर्वाचनमध्ये ५ सय ८३ स्थानको मत परिणाम सार्वजनिक भएको छ । वैशाख ३० गते भएको ७ सय ५१ स्थानीय तहको निर्वाचनमध्ये अब १ सय ६८ स्थानको मात्रै नतिजा आउन बाँकी रहेको छ । हालसम्म सार्वजनिक भएको मतपरिणाम अनुसार नेपाली काँग्रेसले सबैभन्दा बढी २ सय ५८ प्रमुख तथा अध्यक्ष र २ सय ४२ उप प्रमुख तथा उपाध्यक्ष पदमा जित हात पारेको छ । काँग्रेस अझै ६४ प्रमुख तथा अध्यक्ष अनि ६४ उपप्रमुख तथा उपाध्यक्ष पदमा अगाडी रहेको छ । यस्तै नेकपा एमालेले १ सय ६६ प्रमुख तथा अध्यक्ष अनि १ सय ७९ उपप्रमुख तथा उपाध्यक्ष पदमा जित हात पारेको छ भने ३२ प्रमुख तथा अध्यक्ष अनि ५४ उपप्रमुख तथा उपाध्यक्ष पदमा अग्रता बनाइराखेको छ । नेकपा माओवादी केन्द्रले हालसम्म १ सय ६ प्रमुख तथा अध्यक्ष अनि १ सय १४ उपप्रमुख तथा उपाध्यक्ष पदमा जित हात पारेको छ । जबकी १३ प्रमुख तथा अध्यक्ष अनि उपप्रमुख तथा उपाध्यक्षमा १२ स्थानमा अगाडी रहेको छ । जनता समाजवादी पार्टीले १६ प्रमुख तथा अध्यक्ष अनि १५ उपप्रमुख तथा उपाध्यक्ष पदमा जित हात पारेको छ । जसपाले हालसम्म १९ प्रमुख तथा अध्यक्ष अनि १५ उपप्रमुख तथा उपाध्यक्षमा अग्रता बनाएको छ । एकीकृत समाजवादीले १४ प्रमुख तथा अध्यक्ष अनि १५ उपप्रमुख तथा उपाध्यक्ष पदमा जित हात पारेको छ । एकीकृत समाजवादी ५ प्रमुख तथा अध्यक्ष अनि ४ उपप्रमुख तथा उपाध्यक्षमा अगाडी रहेको छ । लोकतान्त्रिक समाजवादीले ३ अध्यक्ष तथा प्रमुख अनि ४ उपप्रमुख तथा उपाध्यक्ष पदमा जित हात पारेको छ । लोसपा अझै ९ प्रमुख तथा अध्यक्ष अनि ६ उपप्रमुख तथा उपाध्यक्षमा अगाडी रहेको छ । अन्य तर्फका २० जनाले प्रमुख तथा अध्यक्षमा जित हात पारेका छन् भने १३ जनाले उपप्रमुख तथा उपाध्यक्षमा जित हात पारेका छन् । अन्य तर्फका अझै १३ जना प्रमुख तथा अध्यक्षका लागि अग्रता बनाएका छन् भने उपप्रमुख तथा उपाध्यक्ष तर्फ ४ जनाले अग्रता बनाएका छन् ।

काठमाण्डौं । ‘मिसेस नेपाल ग्लाम–२०२१’ बिजेता उर्मिला कार्कीले यसपटकको प्रणय दिवस तथा आफ्नो जन्मदिन अनाथ बालबालिकासँग मनाएकि छन् । काठमाडौंको मुलपानी फुयाँल गाउँमा रहेको ‘स्नेह बाल आश्रम’मा उनले प्रणय दिवस तथा जन्म दिन मनाएकी हुन् । हास्य कलाकार सुलेमान शँकर ‘इकु’ले सञ्चालन गरेको सो आश्रममा आश्रित १४ जना बालबालिकालाई उर्मिलाले खाना खुवाईन् । बिगतमा साथीहरुलाई पार्टी दिएर जन्मदिन मनाउने उर्मिलाले अबका दिनमा सामाजिक कार्य गर्दै जन्मदिन मनाउने बताईन् । आफ्नो जन्म दिनको अबसरमा उनले सो आश्रमका दुई जना बालबालिकाको १० कक्षा सम्मको खर्चका व्यहोर्ने भएकि छन् । यो उपाधि जित्दा आफुले सामाजिक कार्य गर्ने प्रतिबद्धता जनाएकाले सो कार्यलाई अघि बढाएको उर्मिलाले बताईन्,‘यहाँ आश्रित १४ जनाबालबालिकालाई सुलेमानले आफ्नै खर्चले पढाउनु भएको रहेछ । उहाँलाई केही सजिलो होस भनेर दुई जना बालबालिकालाई पढाउनको लागि आबस्यक खर्च मैले सहयोग गर्ने भएको छु ।’ उनले सो क्रममा भनिन्,‘अब मेरो साथीहरुलाई विभिन्न शुभकामको खुसी यहाँका बालबालिकासँग साट्नको र उनीहरुलाई सहयोग गर्न पनि आजैबाट अपिल गर्नेछु ।’

पोखरा । आहा राराको दुई दशकको इतिहासमा छ पटकको च्याम्पियन मनाङ मस्र्याङदी फुटबल क्लबलाई पराजित गर्दै सशस्त्र प्रहरीको एपिएफ फुटबल क्लबले पहिलोपटक गोल्डकपको उपाधि चुमेको छ। यही माघ ६ गतेदेखि सहारा क्लब पोखराको आयोजनामा पोखरा रङ्गशालामा सञ्चालन भएको २०औँ संस्करणको प्रतियोगिताको आज सम्पन्न फाइनल खेलमा एपिएफले मनाङलाई टाइब्रेकरमा ५–४ गोलअन्तरले हराउँदै इतिहास रच्न सफल भएको हो। आहा रारामा १४ वर्षपछि फाइनलमा स्थान बनाएको एपिएफले च्याम्पियन बन्दै रु १० लाख एक हजार पुरस्कार र ट्रफी हात पार्न सफल हुँदा मनाङले रु पाँच लाख एक हजारमा चित्त बुझाउन बाध्य बन्यो। हालसम्म उपाधि जित्न नसकेको विभागीय टोली एपिएफले उपाधि उचालेसँगै आहा राराले नयाँ च्याम्पियन पाएको छ। खेलको निर्धारित र अतिरिक्त ३० मिनेटको खेल दुई गोलको बराबरीमा सकिएपछि टाइब्रेकरबाट खेलको निर्णय गरिएकामा एपिएफ टाइब्रेकरमा भाग्यमानी भयो। एपीएफको जितमा गोलकिपर युया कोरियामा नायक बन्नुभयो। पेनाल्टी सुटआउटमा मनाङका ओलावाले अफिजको प्रहारलाई रोक्दै कोरियामाले एपिएफलाई पहिलोपटक च्याम्पियन बनाउँदै ऐतिहासिक सफलता दिलाउनुभयो। टाइब्रेकरमा एपिएफका नवीन लामा, सनिष श्रेष्ठ, रवि थिङ, मणि लामा र अर्मान्ड बिडोमले गोल गर्न सफल हुनुभयो। मनाङका फ्रेङलिन, दयानन्द सिंह, शिव गुरुङ र रुपेश केसीले मात्र गोल गर्नुभयो। खेलको २१औँ मिनेटमा एपिएफका युवराज खड्काले गोल गर्दै अग्रता बनाउनुभएको थियो। पहिलो हाफमा १–० ले पछि परेको मनाङले दोस्रो हाफमा खेलको ६७औँ मिनेटमा दयानन्द सिंहको गोलमार्फत खेल बराबरीमा ल्याउन सफल भयो। खेलको ८४औँ मिनेटमा फ्रेङलिनको गोलमार्फत् मनाङले अग्रता बनाएर विजय नजिक पुगेको अवस्थामा पाँच मिनेटको इन्ज्यूरी समयको पहिलो मिनेटमा एपिएफका रवि थिङले गोल गर्दै खेललाई अतिरिक्त समयमा लैजान सफल हुनुभएको थियो। अतिरिक्त समयमा दुवै टोलीबाट कुनै पनि गोल हुनसकेको थिएन। ‘क्याराभान गोल्डकप’ सहित १२औँ पटक फाइनल खेलेको मनाङलाई दुईपटक मात्र फाइनल पुगेको एपिएफले स्तब्ध बनाउँदै उपाधि जित्न सफल भएको हो। एपिएफ १४ वर्षपछि दोस्रोपटक फाइनल पुगेको हो। विसं २०६४ मा छैटौँ संस्करणमा पहिलोपटक फाइनल पुगेको एपिएफ नेपाल पुलिस क्लबसँग २–० ले पराजित भएको थियो। मनाङले भने विसं २०६० को दोस्रो, विसं २०६१ मा तेस्रो, २०६८ को दशौँ, विसं २०७२ मा चौधौँ, विसं २०७३ को पन्धौँ र विसं २०७६ को १८औँ संस्करणको उपाधि जितेको थियो। प्रतियोगिताको सर्वोत्कृष्ट खेलाडीको उपाधि एपिएफका डिफेण्डर राजन गुरुङले प्राप्त गर्नुभयो। उहाँले पुरस्कारवापत एक थान स्कुटर पाउनुभयो। यसैगरी उत्कृष्ट गोलकिपर एपिएफका युया कोरियाम, डिफेण्डर एपिएफका राजन गुरुङ, मिडफिल्डर एपिएफकै रवि थिङ, फरवार्ड मनाङका ओलावाले अफिज, उत्कृष्ट प्रशिक्षक एपिएफका कुमार थापा, सर्वाधिक गोलकर्ता एपिएफका रवि थिङ घोषित हुँदै जनही रु २५ हजारका दरले पुरस्कार पाउनुभयो। प्रतियोगितामा नेपालका ए डिभिजनका आठ क्लब, विदेशी एक र आयोजक सहाराको गरी १० टोलीले सहभागिता जनाएका थिए। रासस

काठमाडौं : काठमाडौं महानगरले त्रि. वि. शिक्षण अस्पताल महाराजगञ्जलाई १० थान भेन्टिलेटर प्रदान गरेको छ । कोरोना संक्रमणबाट बिरामीको संख्या बढ्दै गएपछि मानवीय जीवन रक्षाका लागि भेन्टिलेटर उपलब्ध गराइएको हो । आज अस्पताल पुगेर महानगरका प्रमुख विद्यासुन्दर शाक्यले अस्पतालका निर्देशक प्रा. डा. दिनेश काफ्लेलाई सामाग्री हस्तान्तरण गरेका थिए । त्यस अवसरमा उपप्रमुख हरिप्रभा खड्गी श्रेष्ठ, प्रमुख प्रशासकीय अधिकृत राजेश्वर ज्ञवाली, चिकित्सा शास्त्र अध्ययन संस्थानका डीन प्रा. डा. दिव्या सिंह शाह, वडा ३ का अध्यक्ष दिपक के. सी. लगायत अधिकारीहरुको सहभागी रहेको थियो।

काठमाडौं : श्रमजीवी पत्रकारलाई कोरोना महामारी र त्यसले निम्त्याएको आर्थिक संकटको कारण देखाउँदै विभिन्न सञ्चार गृहहरूले कामबाट निकाल्ने, बेतलबी बिदामा बस्न लगाउने, पारिश्रमिक नदिने, मानसिक तनाव बढाउने खालको अमान्य गतिविधि बढाएकोप्रति विरोध गर्दै पत्रकार आन्दोलित भएका छन । श्रमजीवी पत्रकार ऐन, न्यूनतम पारिश्रमिक कार्यान्वयन सम्बन्धी कानुन, अन्तर्राष्ट्रिय श्रम कानुन तथा पत्रकार हक, हित तथा अधिकार सम्बन्धी तमाम कानुनी व्यवस्थाको मर्मविरुद्ध मिडिया मालिकहरूले गरिरहेको गतिविधिको विरोधमा पत्रकार आन्दोलनमा उत्रिएका हुन् । कोरोना संकटले विश्व मानव समूदायलाई नै प्रभाव पारेको अवस्थामा मुलुकको नामि र आर्थिकरूपमा समेत सक्षम देखिने मिडिया हाउने नै श्रमजीवी कामदारलाई हटाउने हर्कत पत्रकारको काम गरेर बाँच्न पाउने अधिकारका विरुद्ध रहेको भन्दै पत्रकारले त्यस्ता मिडिया मालिकलाई आन्दोलनको माध्यमबाट तह लगाउने बताए । नेपाल पत्रकार महासंघ केन्द्रीय समितिको आयोजना तथा प्रेस संगठन नेपाल, नेपाल प्रेस युनियन, क्रान्तिकारी पत्रकार संगठन नेपाल, क्रान्तिकारी पत्रकार महासंघ, प्रेस सेन्टर नेपाल, प्रगतिशिल पत्रकार संघ, जनपत्रकार संगठन लगायतका विभिन्न संघ संगठनहरुको ऐेक्यबद्धतामा अघि बढेको आन्दोलन समस्याको हल नहुँदासम्म निरन्तर अघि बढ्ने महासंघले बताएको छ । गत शुक्रबार दिउँसो काठमाडौंको बबरमहलमा विरोध प्रदर्शन गर्दै मिडिया मालिकलाई श्रमजीवी पत्रकारलाई अपमानजनक ढंगले कामबाट निकाल्ने काम बन्द गर्न माग गर्दै त्यसप्रति राज्यलाई समेत सचेत गराइएकोमा मिडिया मालिकले मागको सुनुवाई नगरेकाले आजबाट पुनः आन्दोलन अघि बढाइएको हो । मिडिया हाउससँग श्रमजीवी पत्रकारको हक, हित र अधिकारको ग्यारेन्टी गर भन्दै महासंघको टिमले गरेको छलफलको पहिचो चरणको प्रयासबाट समाधानको संकेत नदेखिएको कारण आज पुर्न पत्रकार मिडियामा हाउसको गेटमै पुगेर कालो ब्यानर टासेर माग कार्यान्वयनको लागि चेतावनी दिएका छन । श्रमजीवी पत्रकारको पक्षमा लामो समयदेखि संघर्षको नेतृत्व गर्दै आएका पत्रकार महासंघका केन्द्रीय सदस्य जन्मदेव जैसीको नेतृत्वमा विभिन्न पत्रकार संघ संगठनको ऐक्यवद्धतासहित नागरिक दैनिक, एपि १ टेलिभिजन लगायतका मिडियाहरुको गेटमा मागपुरा नगरेमा कडा आन्दोलनमा उत्रिने चेतावनी सहित कालो ब्यान टाँसिएको छ । ‘श्रमजीवी पत्रकार ऐन पूर्ण रुपमा कार्यान्वयन गर । पेशागत सुरक्षाको ग्यारेण्टी गर ।’ लेखिएको कालो ब्यानरमा आयोजना गरिएको उक्त विरोध कार्यक्रममा बोल्दै नेपाल पत्रकार महासंघकाे श्रमजीवी हित प्रवर्द्धन समिति सह-संयाेजकसमेत रहेका जैसीले कुनै पनि हालतमा श्रमजीवी पत्रकारलाई काममा फकाउँने र स्वतन्त्रतापूर्वक काम गर्ने वातावरण गराउन राज्य र सम्बन्धीत पक्षलाई चेतावनी दिए । उनले कोरोनाको कारण देखाउँदै पत्रकार तथा सञ्चारमाध्यममा काम गर्ने कामदारलाई मनमर्जि निकाल्ने हर्कत महासंघलाई अमान्य हुने र त्यसका विरुद्ध चरणबद्ध आन्दोलनमा उत्रिने बताए । उनले समयमै पत्रकारहरुका जायज मागको सम्बोधन नभएमा महासंघ मिडिया हाउसले कल्पना नगेको ढंगको आन्दोलन अघि बढाउने भन्दै उनले कडा चेतावनी दिएका थिए । उक्त कार्यक्रममा बोल्दै क्रान्तिकारी पत्रकार महासंघका अध्यक्ष इन्द्र राउतले महासंघको विरोध कार्यक्रममा आफ्नो संगठनको एक्यवद्धता जाहेर गर्दै श्रमजीवी पत्रकारको पेशागत सुरक्षाको लागि राज्यले समेत जिम्मेवार बन्नुपर्ने धारणा राखे । अध्यक्ष राउतले महासंघको आन्दोलनमा पेशागत संघ, संगठनहरुलार्य पनि जोड्दै माग पूरा गराउन व्यापक दवावमूलक कार्यक्रम गर्नु पर्नेमा जोड दिएका थिए । उक्त कार्यक्रममा क्रान्तिकरी पत्रकार संगठनका नेता कमल बुढाले मिडिया हाउसले सृजना गरेको श्रमजीवी पत्रकारको समस्यालाई तत्काल हल गर्न स्वयम मिडिया मालिक तयार हुनुपर्ने र त्यसो नभएमा आन्दोलनको स्वरुप बदलिने भन्दै कडा चेतावनी दिएका थिए । उनले पत्रकार महासंघको विरोध कार्यक्रममा आफ्नो संगठनको तर्फबाट एक्यवद्धता जाहेर गर्दै पत्रकारहरुलाई बिनासर्त काममा फर्कने वातावरण नबन्दासम्म चरणबद्ध आन्दोलनको घोषणा गरेर अघि बढ्नुपर्ने विचारसमेत राखे । प्रेस सेन्टर नेपालका अध्यक्ष लाेकराज जैसीले मिडिया मालिकहरुले आफुलाई आवश्यक पर्दै विभिन्न सेवा, सुविधा सहितको नियुक्ति पत्र दिएर पत्रकारलाई भित्र्याउने र मन नलागेमा आफैले दिएको नियुक्तिपत्रको अपमान गरेर पत्रकारहरुलाई हटाउने काम गैह्र जिम्मेवार तथा अमान्य रहेको भन्दै त्यस्ता मिडिया मालिकलाई कारबाही गर्नुपर्ने तर्क गरे । अध्यक्ष जैसीले श्रमजीवी पत्रकार ऐन, न्यूनतम पारिश्रमिक समितिको निर्णय, अन्तराष्ट्रि श्रम संगठन, श्रम कानुन र राज्यका अन्य कानुनहरुको खिलाफमा मुलुककै ठूला भनिएका मिडिया हाउसहरु उभिनुले कानुनी राज्यको समेत अपमान गरेको छ । कार्यक्रममा पत्रकार महासंघ काठमाडौंका अध्यक्ष शान्तराम बिडारीले मिडिया मालिकको प्रेस कानुन विरुद्धको रबैया कुनै पनि हालतमा स्विकार्य नहुने भन्दै त्यसका विरुद्ध संगठित र कडा आन्दोलनमा जानुपर्ने धारणा राखेका थिए । त्यसैगरी महासंघको उपत्यका प्रदेश समितिका कोषाध्यक्ष टेनिस रोकाले श्रमजीवी पत्रकारको पेटमा लात हान्ने ढंगले मिडिया मालिकहरू जसरी आफ्नो नियत उजागर गर्दैछन् त्यसले श्रमजीवी पत्रकार ऐनको कार्यान्वयनमा उनीहरूको वास्तविक प्रतिवद्धता देखिएको बताए । कार्यक्रममा कान्तिपुर दैनिक मिडियामा कार्यरत पत्रकारद्धारा गठित संघर्ष समितिका सदस्य श्रीराम वाग्लेले समेत आफ्नो कुरा राख्दै पत्रकारमाथि गरिएको अपमानजनक व्यवहार तुरुन्त सच्याउन खबदारी गरे ।

संघीय संसद् भवन नयाँ बानेश्वरमा पूर्वसभामुख कृष्णबहादुर महराले शुुक्रबार कोरोना भाइरस (कोभिड–१९) कोे स्वाब परीक्षण गराउँदै । तस्बिरः प्रदीपराज वन्त/रासस

काठमाडौंः केही महिनादेखि अकाशिँदै आएको सुनको मूल्य बुधबार एकैदिन प्रतितोला २२ सय रुपैयाँ बढेको छ। नेपाल सुन चाँदी व्यवसायी महासंघका अनुसार मंगलबार प्रतितोला ७८ हजार ३०० रुपैयाँमा कारोबार भएको छापावालको मूल्य सुन बुधबार ८० हजार ५०० रुपैयाँ पुगेको हो। यो अहिलेसम्म कै उच्च मूल्य हो। यसअघि फागुन १२ मा प्रतितोला ८० हजार ३०० रुपैयाँमा कारोबार भएको थियो। त्यो रेकर्डलाई पनि तोड्दै बुधबार सुनको मूल्य थप उकालो लागेको हो। अन्तर्राष्ट्रिय बजारमै मूल्य बढेकाले नेपालमा पनि त्यसको असर देखिएको नेपाल सुनचाँदी व्यवसायी महासंघले जनाएको छ। बुधबार चाँदीको मूल्य पनि तोलामा २० रुपैयाँ बढेर तोलाको ८८० रुपैयाँमा कारोबार भइरहेको छ।