मेलेसिया, जेठ १८ । वैदेशिक रोजगारीका सिलसिलामा मलेसियामा रहेका एक युवाको नेपालीकै कुटाइबाट मृत्यु भएको छ । पर्वतको मोदीगाउँपालिका ५ का २२ वर्षीय युवा किशोर केसीको नेपालीकै कुटपिटबाट बुधबार मृत्यु भएको छ । गएको आइतबारसँगै काम गर्ने नेपाली युवाहरुले कुटपिट गर्दा गम्भीर घाइते भएका क्षेत्रीको मलेसियाको पुत्रोदया अस्पतालमा उपचारका क्रममा बुधबार मृत्यु भएको भएको मृतकका आफन्त अनमोल क्षेत्रीले जानकारी दिए । पूर्बी नेपालबाट रोजागरीका लागि मलेसिया पुगेका चार नेपाली युवाले रडले प्रहार गर्दा केसीको पेटमा गहिरो चोट लागेको कारण मृत्यु भएको बताइएको छ । मृतक केसीको बिहीबार स्थानीय अस्पतालमा पोष्टमार्टम भएको छ । भने शव नेपाल पठाउन एक हप्ता लाग्ने बताइएको छ । २० महिना अघि रोजागरीका लागि क्षेत्री मलेसिया पुगेका थिए । अविवाहित केसी परिवारका कान्छा सन्तान हुन । उनका पिता भिमबहादुर केसी पनि बैदेशिक रोजगारीमा जाने आउने गरिरहेका थिए । परिवारको कान्छो सन्तान गुमाउन पुगेपछि परिवार र सिंगो गाउँ नै शोकमा डुबेको छ । आमा देबी केसी अर्धचेत अवस्थामा छन भने गाउँलेहरुमा समेत रुवाबासी चलेको छ । केसीलाई कुटपिट गर्ने चारै चारै जना प्रहरी नियन्त्रणमा रहेको र उनीहरुम माथि अनुसन्धान भइरहेको बताइएको छ ।

काठमाडौं, चैत १८ । महान् भौतिक तथा खगोल बैज्ञानिक स्टेफन हकिंङको अन्तिम संस्कार लन्डनको क्याम्ब्रिज युनिभर्सिटी कलेजनजिकको चर्चमा हुने भएको छ । क्याम्ब्रिज युनिभर्सिटीमा ५० बर्षभन्दा बढी प्राध्यापकका रुपमा काम गरेका हकिङको अन्तिम संस्कार सोही युनिभर्सिटीनजिकको चर्चमा गर्न लागिएको हो । उहाँको अन्तिम संस्कार सामान्य रुपमा मात्रै गरिने पारिवारीक श्रोतले जनाएको छ । विश्वका चर्चित बैज्ञानिक हकिङले ब्रमाण्डको रहस्य खोज्नुका साथै गणितीय प्रमाणहरु तयार पारी बैज्ञानिक जगतमा तहल्का मच्चाएका थिए । उनको पछिल्लो सिद्धान्तले बहु ब्रमाण्डको उपस्थितिको प्रमाण खोज्न सकिने आंकलन गरिएको छ । हकिङको गत महिना ७६ बर्षमा निधन भएको थियो । (एजेन्सी)

सुर्खेत, चैत ११। विरेन्द्रनगर नगरपालिकाको दोस्रो नगरसभाले  मादक पदार्थ सेवन गरेर विद्यालयमा जाने शिक्षक तथा कर्मचारीको जागिर ‘चट’ हुने कानुन निर्माण गरेको छ । शनिबार सम्पन्न दोस्रो नगरसभाले  शिक्षा ऐन–२०७४ पारित गर्दै मा मादक पदार्थ सेवन गरेर विद्यालयमा आएको प्रमाणित भएमा विद्यालय व्यवस्थापन समितिको सिफारिसमा नगर शिक्षा समितिले त्यस्ता शिक्षक तथा कार्यरत कर्मचारीलाई जागिरबाट हटाउने व्यवस्था गरेको हो । विद्यालयमा पादक पदार्थ सेवन गरेर आएको प्रमाणित भएमा विद्यालय व्यवस्थापन समितिले कार्यरत पदबाट हटाएर वडा शिक्षा समितिमार्फत नगर शिक्षा समितिलाई जानकारी गराइने उल्लेख गरिएको पारित शिक्षा ऐनमा , ‘हटाउनु अघि एक पटक स्पष्टीकरणको मौका भने दिइने छ ।’ भन्ने वाक्यांश राखिएको छ। यस्तै वीरेन्द्रनगर नगरपालिकाभित्रका सामुदायिक तथा संस्थागत विद्यालयमा कार्यरत शिक्षक तथा कर्मचारीहरु कुनै पनि राजनीतिक दल र संघ–संस्थामा आवद्ध हुन नपाउने भएका छन् । ‘सामुदायिक तथा संस्थागत विद्यालयमा कार्यरत शिक्षक र कर्मचारी कुनै पनि संघ–संस्था वा राजनीतिक दलको कुनै पनि तहको कार्य समितिको सदस्य रहेको पाइएमा विद्यालय व्यवस्थापन समितिको सिफारिसमा नगर शिक्षा समितिले हटाउने छ’ उपमेयर मोहनमाया ढकालले भनिन्, ‘ऐनलाई नगरभित्र कडाईका साथ कार्यान्वयन गछौं ।’ बिना सूचना १५ दिन भन्दाबढी समय विद्यालयमा अनुपस्थित हुने शिक्षक र कर्मचारीको पनि जागिर जाने भएको छ। शिक्षा ऐनको परिच्छेद–३ को २० (ख) मा यो व्यवस्था गरिएको छ। यस्तै अध्यापन गरिरहेको विषयमा तीन वर्षभित्रको औसत शैक्षिक उपलब्धी राष्ट्रिय र प्रदेशको औसत स्तरभन्दा कम भएमा पनि शिक्षकलाई हटाउन सकिने ऐनमा उल्लेख छ। ‘शिक्षालाई गुणस्तरीय र प्रतिष्पर्धी बनाउनका लागि कार्यरत शिक्षक र कर्मचारीलाई जवाफदेही बनाउन आवश्यक छ’ उपमेयर ढकालले भनिन्, ‘पारित ऐनलाई अक्षरस कार्यान्वयन गरेर शिक्षामा आमूल सुधार गछौं।’ यस्तै नियमानुसार विदा स्वीकृत नगराएर अनुपस्थित भएका शिक्षक कर्मचारीलाई सो अवधिको तलव, भत्ता नपाउने व्यवस्था ऐनमा छ। यस्तै सो अवधिलाई सेवामा पनि गणना गरिने छैन्। यस्तै सामुदायिक विद्यालयमा अध्यापनरत शिक्षक र कर्मचारीले कुनै पनि देशको स्थायी आवासीय अनुमति लिन नपाउने भएका छन्। वीरेन्द्रनगर नगरपालिकाको शिक्षा ऐनमा वीरेन्द्रनगरका १६ वटै वडामा एक–एक प्राविधिक शिक्षालय सञ्चालन गर्ने उल्लेख छ। ‘दक्ष जनशक्ति उत्पादन गर्न र स्वरोजगार बनाउनका लागि हामीले एक वडा, एक प्राविधिक शिक्षालय स्थापना गरिने छ’ उपमेयर ढकालले भनिन्, ‘हाल रहेका सामुदायिक विद्यालयहरुलाई नै माध्यामिक तहमा प्राविधिक शिक्षा अध्ययन गराउने व्यवस्था मिलाउँछौं।’ शिक्षा ऐनमा माध्यमिक शिक्षालाई तीन तहमा वर्गिकरण गरिएको छ । साधारण माध्यमिक शिक्षा, संस्कृत माध्यमिक शिक्षा र प्राविधिक तथा व्यावसायिक माध्यमिक शिक्षामा वर्गिकरण गरिएको छ । अव आधारभूत तहमा मातृभाषामा पनि शिक्षा दिन सकिने भएको छ । यस्तै सामुदायिक, संस्थागत, गुठी र सहकारी गरेर चार तहमा विद्यालयलाई बर्गिकरण गरिएको छ। यस्तै विद्यालय खोल्ने अनुमति दिंदा विद्यालय सञ्चालनको सुरक्षणवापत सामुदायिक विद्यालयको आधारभूत तह निःशुल्क र माध्यमिक तह भए तीन लाख र संस्थागत विद्यालयको आधारभूत १–५ भए तीन लाख, एकदेखि आठ कक्षासम्म भए चार लाख र माध्यमिक भए पाँच लाख रुपियाँ धरौटी राख्नुपर्ने छ । यस्तै अनुमति दिएको पाँच वर्षभित्र संस्थागत विद्यालयहरुले आफ्नो घर जग्गा नबनाए अनुमति रद्घ गर्न सकिने ऐनमा उल्लेख छ । शिक्षा ऐनसँगै सहकारी ऐन, प्रशासनिक कार्यविधि ऐन, कृषि व्यवस्थापन ऐन र न्यायिक समिति ऐन पनि नगरसभाबाट पारित भएको छ।   नागरिकबाट साभार

काठमाडौं, चैत्र ११। सरकारले काठमाडौँ उपत्यकामा अन्तर्राष्ट्रियस्तरको रंगशाला निर्माण गर्ने भएको छ । शनिबार राजधानीमा आयोजित एक कार्यक्रममा युवा तथा खेलकूदमन्त्री जगतबहादुर विश्वकर्माले काठमाडौँमा अन्तर्राष्ट्रियस्तरको रंगशाला निर्माणका लागि डिपिआर तयार गर्ने काम शुरु भइसकेको बताए । उनले भने, “पाँच वर्षभित्र सातै प्रदेशमा प्रदेशस्तरीय आधुनिक सुविधासम्पन्न रंगशालाको निर्माण गरिनेछ ।” त्यस्तै, महानगर, नगरपालिका तथा वडा स्तरमा पनि स्थानीय तहसम्म खेलमैदान तयार पार्ने तथा त्यसका लागि चाहिने भौतिक पूर्वाधार तयारी गर्ने कामका लागि सरकार लाग्ने मन्त्री विश्वकर्माले बताए । सरकारले तेह्रौँ दक्षिण एशियाली खेलकूद प्रतियोगिता नेपालमा आयोजना गर्ने र उक्त प्रतियोगिता सम्पन्न गर्न ध्यान केन्द्रित गर्ने उनले बताए । त्यस्तै, आठौँ राष्ट्रिय खेलकूद प्रतियोगिता पनि समयमा सम्पन्न गर्ने उनको भनाइ थियो । उनले विगतका दिनमा प्रतिकूल वातावरणका बीचमा पनि उत्कृष्ट खेल प्रदर्शन गर्ने तथा क्षमता विकास गर्ने खेलाडीको योगदानको सरकारले कदर गर्ने चर्चा गरे ।

काठमाडौं, चैत्र ४ । चीनका प्रधानमन्त्री ली खछ्याङ दोस्रो कार्यकालका लागि निर्वाचित भएका छन् । चीनको नेशनल कांग्रेसले ली खछ्याङलाई दोस्रो कार्यकालका लागि आइतबार निर्वाचित गरेको हो । ली चिनियाँ कम्युनिष्ट पार्टीको दोस्रो बरियतामा रहेका नेता हुन । चीनमा प्रधानमन्त्री संवैधानिक पद हो । कार्यकारी पदमा राष्ट्रपति रहन्छन् र वर्तमान राष्ट्रपति सी जिनपिङ पनि शनिबार दोस्रो कार्यकालका लागि सर्वसम्मत निर्वाचित भएका थिए । नेशनल कांग्रेसमा ली प्रधानमन्त्रीमा दोस्रो कार्यकालका लागि २ हजार ९ सय ६४ मत पाएर विजयी भए । उनको विपक्षमा मात्रै २ मत खसेको चिनियाँ सञ्चारमाध्यमले जनाएका छन् । प्रधानमन्त्री चीनको प्रमुख वित्त अधिकारी हुने व्यवस्था छ ।  

काठमाडौँ । नेपाल प्रहरीको केन्द्रीय अनुसन्धान ब्यूरो (सिआइबी)ले नेपाल क्रेडिट एण्ड कमर्श बैंक लिमिटेड (एनसिसी) को केन्द्रीय कार्यालयका १३ जना कर्मचारीलाई नियन्त्रणमा लिएको छ । ब्यूरोले आज बैंकको केन्द्रीय कार्यालय कमलादीमा छापा मारी बैंकमा कार्यरत कर्मचारीलाई अनुसन्धानका लागि नियन्त्रणमा लिएको ब्यूरोका प्रवक्ता एवम् प्रहरी उपरीक्षक जीवनकुमार श्रेष्ठले जानकारी दिनुभयो । उहाँका अनुसार तत्कालीन एपेक्स डेभलपमेन्ट बैंक र एनसिसी बैंक मर्ज हुने क्रममा एपेक्सका उच्च कर्मचारीले कर्जा प्रवाह गर्दा अनियमितता गरेको राष्ट्र बैंकले दिएको सूचनाका आधारमा उनीहरुलाई नियन्त्रणमा लिइएको हो । रासस

धरान । नयाँवर्ष २०७५ सालको पहिलो दिन धरानमा सांगीतिक कन्सर्ट आयोजना हुने भएको छ । शुक्रबार पुतली लाईनमा पत्रकार सम्मेलनमा जानकारी दिंदै हाम्रो नेपाल साङ्गितिक कार्यक्रम २०७५ रहने छ । कन्सर्टमा दार्जिलिङको जुधा ब्यान्ड,स्याडोज नेपाल आउट साईडर ब्याण्ड रहने आयोजकले जनाए । नेपाली नयाँ वर्ष मान्ने प्रचलनभन्दा अङ्ग्रेजी नयाँ वर्षमा बढी रमाउने प्रचलन रहेकोले त्यस्लाई प्रश्रय दिनको लागि पनि यो सांगीतिक कन्सर्ट गर्न लागेको बताए। कन्सर्टमा रक पप ढाँचामा विशुद्ध नेपाली शब्द रहेको राष्ट्र भावनाले ओतप्रोत भएको हुने बताए । सरस्वती ज्वेलर्सको व्यवस्थापन र बराह ज्वेलरीको समन्वयमा हुने उक्त सांगीतिक कन्सर्टबाट संकलित मुनाफा छाता चोकमा रहेको असहाय तथा वृद्ध पुनर्स्थापना केन्द्रको सहयोगार्थ उपलब्ध गराउने कुरा बराहका मेनेजर गङ्गा कालिकोले बताए । युवा लक्षित कार्यक्रम भएकोले नेपाल चिनाउने मुख्य थिम हुने बताए ।  

आइसीसी प्लेअफ खेलमा नेदरल्याण्डले हंगकंगलाई पराजित गरेको फाइदा भने नेपाललाई पुग्ने भएको छ । विश्वकपका लागि छनौट हुन नसके पनि आजको खेलमा पपुवा  न्यु गिनीलाई फराकिलो अंतरले हराउँदै नेपालले अन्तर्राष्ट्रिय क्रिकेट परिषद आईसीसीको ४ बर्षको लागि अस्थायी एकदिवसीय राष्ट्रको मान्यता पाउने भने निश्चित भएको छ । यसको लागि नेपालको  जीत-हारको गणितीय सम्भावनामा आफ्नो जितमा मात्र भने निर्भर थिएन । बरु आज नै भएको अर्को खेलमा हंगकंगले नेदरल्याण्डसंग हार्नु पर्थ्यो र भयो पनि त्यस्तो नै । नेदरल्याण्डले हंगकंगलाई पराजित गरिदिँदा नेपालले पहिलो पटक एकदिवसीय अन्तर्राष्ट्रिय राष्ट्रको मान्यता पाउने निश्चित भयो । नेदरल्याण्डले पहिले ब्याटिंग गर्दै दिएको एक सय ७५ रनको लक्ष्य पछ्याउने क्रममा हंगकंगले एक सय ३० रनमै सम्पूर्ण विकेट गुमाएसँगै नेपाल एकदिवसीय मान्यता पाउने राष्ट्र हुने सम्भावना निश्चिततामा परिणत भएको हो । यस अघि सन् २०१४ को टि-२० विश्वकपमा राम्रो प्रदर्शन गरेपछि नेपाललाई आईसीसीले अस्थायी टि-२० अन्तर्राष्ट्रिय राष्ट्रको मान्यता प्रदान गरेको थियो। सन् १९९६ मा आईसीसी एसोसीएट राष्ट्रको मान्यता पाएको नेपालले एकदिवसीय मान्यता पाउन २२ वर्ष कुर्नु परेको हो । नेपाल २०१५ देखि १७ सम्म भएको विश्व क्रिकेट लिग च्याम्पियनसिपमा सातौँ स्थानमा रहेपछि डिभिजन-२ मा घटुवा भएको थियो । फेब्रुअरीमा नामिबियामा सम्पन्न डिभिजन-२ को उपविजेताको रुपमा नेपाल बिश्वकप छनौट खेल्न छानिएको थियो । यस अघि अन्तर्राष्ट्रिय क्रिकेट परिषद आईसीसीले विश्वकप छनौट प्रतियोगिताको उत्कृष्ट तीन  एसोसिएट राष्ट्रले एकदिवसीय मान्यता पाउने घोषणा गरेको थियो । जिम्बाब्वेमा जारी प्रतियोगिताको सुपर-सिक्स चरण प्रवेश गर्दै स्कटल्याण्ड र युएईले एकदिवसीय मान्यता पाउने निश्चित भैसकेको थियो । बाँकी एउटा राष्ट्रको लागि सुपर सिक्स पुग्न असफल नेपाल, पपुवा न्यु गिनी र हंगकंग बीच प्रतिस्पर्धा थियो । नेदरल्याण्डले यस अघि नै एकदिवसीय राष्ट्रको मान्यता प्रदान गरिसकेको छ । प्लेअफमा नेदरल्याण्डसंग हंगकंग पराजित भएपछि नेदरल्याण्ड र नेपालले अब सातौँ र आठौ स्थानको लागि प्रतिस्पर्धा गर्नेछन् । सातौँ स्थानको लागि मार्च १७ तारिकमा हुने खेल अगावै नेपाल एकदिवसीय राष्ट्र हुने पक्का भएको छ । हारसँगै हंगकंग र पपुवा न्यु गिनी डिभिजन-२ मा घटुवा हुने निश्चित भएको छ जो नवौं र दशौं स्थानको लागि खेल्नेछन् । विश्वकप छनौट प्रतियोगितामा नेपालले समुह चरणमा जिम्बाब्वे, स्कटल्याण्ड र अफगानिस्तानसँग पराजय बेहोरेपछि सुपर-सिक्स चरण पुग्न असफल भएको थियो तर अन्तिम खेलमा हंगकंगलाई पराजित गरेपछि समुह ‘बी’ को चौथो स्थान हाँसिल गरेको थियो। नेपाली क्रिकेटका लागि एकदिवसीय मान्यता पाउनु भनेको नेपालको लागि निकै ठुलो फड्को हो । यसले अन्तर्राष्ट्रिय क्रिकेट परिषदद्वारा टिमलाई छुट्याउने बजेट बढ्न जानेछ जसले स्तरीय प्रशिक्षक, अभ्यास भ्रमणहरु, खेलाडीको भत्ता, सुबिधा तथा नियमित प्रशिक्षणको लागि नेपाललाई आर्थिक सहजता हुनेछ । यसका साथै निकै कम प्रतियोगिताहरु खेल्न पाउने गरेको नेपालले नियमित रुपमा ठुला प्रतियोगिताहरू बिश्व क्रिकेट लिग च्याम्पियनसिप, इन्टर कन्टिनेन्टल कप जस्ता प्रतियोगिताहरू खेल्न पाउनेछ । साथै एसिया कप जस्तो ठुलो प्रतियोगितामा समेत नेपालको सहभागिता सहज हुन सक्छ जहाँ भारत, पाकिस्तान, श्रीलंका, बंगलादेश, अफगानिस्तान जस्ता टेस्ट रास्ट्रहरु खेल्छन् । यस्तै नेपालले खेलेको खेलले एकदिवसीय मान्यता पाएपछि आईसीसीले नेपाली टिमको पनि वरियता निर्धारण गर्नेछ । साथै नेपाली खेलाडीहरूको समेत आइसीसी वरियता निर्धारण हुनेछ । साथै विश्व क्रिकेटका ठुला राष्ट्रहरुले नेपाली क्रिकेटलाई फरक नजरले हेर्नेछन् । यसले आइपिएल जस्ता ठुला लिगहरुमा नेपाली खेलाडीहरुको माग बढ्ने सम्भावना समेत यसले बढाउनेछ । यति हुँदाहुँदै पनि एकदिवसीय मान्यता पाउँदैमा नेपाल अस्ट्रेलिया, भारत जस्ता देशहरूसँग खेलिहाल्छ  भन्ने चाहिं हैन । यसका लागि नेपाल क्रिकेट संघ बलियो हुनु जरुरी छ । सन् २०१४ को टि-२० बिश्वकप खेलेपछि टि-२० राष्ट्रको मान्यता पाएको भए पनि त्यस यता नेपालले मात्र ६ वटा टि-२० अन्तर्राष्ट्रिय खेल्न पायो र त्यो पनि हंगकंग र नेदरल्याण्डसँग । गत वर्ष नै टेस्ट मान्यता पाएका अफगानिस्तान र आयरल्याण्डले हासम्म एउटा पनि टेस्ट खेलेका छैनन् । त्यसैले यो एउटा खुड्किलो मात्र हो, अगाडिको बाटो अझै चुनौतिपूर्ण छ ।  

काठमाडौं । नेपाली बजारमा सोमबार सुनको मूल्य एक सय रुपैयाँले घटेको छ । आइतबार सुनको मूल्य ५७ हजार ७ सय रुपैयाँमा कारोबार भएकोमा सोमबार सुनको मूल्य घटेर ५७ हजार ६ सय रुपैयाँमा कारोबार भइरहेको नेपाल सुनचाँदी व्यवसायी महासंघले जनाएको छ । त्यस्तै, चाँदीको मूल्य पाँच रुपैयाँले घटेको छ । आइतबार बजारमा चाँदीको मूल्य ७ सय ५० रुपैयाँमा कारोबार भएको थियो भने सोमबार चाँदीको मूल्य घटेर ७ सय ४५ रुपैयामा कारोबार भइरहेको छ ।

काठमाडौं । कैलालीको घोडाघोडी नगरपालिकामा बोक्सी भन्दै कुटपिट गर्नेलाई छाडेको भन्दै ईलाका प्रहरी कार्यालय सुखडका निमित्त प्रमुख दिनेश विष्ट निलम्बनमा परेका छन् । ७ नम्बर प्रदेश प्रहरी कार्यालयले सई विष्टलाई निलम्बन गर्न सिफारिस गरेको हो । उनलाई कारवाही गरी हेडक्वार्टरलाई जानकारी गराइएको प्रदेश प्रहरी प्रमुख एआइजी माधवप्रसाद नेपालले बताए । आफूलाई बाबा बताउने रामबहादुर चौधरीले झारफुकका नाममा २० वर्षीया राधा चौधरीलाई कुटपिट गरेका थिए । सुखड प्रहरीले चौधरीलाई पक्राउ गरेपनि स्थानीय जनप्रतिनिधिको रोहबरमा छाडेको थियो । तर, अहिले चौधरी फेरि पक्राउ परेका छन्। कुटपिटबाट घाइते भएकी चौधरीको सेती अञ्चल अस्पतालमा उपचार भइरहेको छ । कुटपिटको घटना सामसुम पार्न खोजिएपनि कुटपिटको भिडियो सार्वजनिक भएपछि राष्ट्रिय चर्चाको विषय बनेको छ । कुटपिटबारे केन्द्र र प्रदेश सरकारले सक्रियता देखाएका छन् ।

धनगढी, फागुन २३ । प्रदेश नं ७ को मन्त्रिपरिषद्को आज बसेको बैठकले प्रदेशको मुख्य न्यायाधिवक्तामा कुलानन्द उपाध्यायलाई नियुक्त गर्ने निर्णय गरेको छ । अछामको तुर्माखात गाउँपालिका स्थायी ठेगाना भएका अधिवक्ता उपाध्याय विगत २३ वर्षदेखि धनगढीमा बसेर वकालत गर्दै आउनुभएको छ । नेपाल बार एशोसिएशनको केन्द्रीय उपाध्याक्षसमेत रहनुभएका ४६ वर्षीय उपाध्यायले संवैधानिक कानून, फौजदारी कानून र समाजशास्त्रमा स्नातकोत्तर गर्नुभएको छ । बैठकले चार सदस्यीय प्रदेश कानून मस्यौदा समिति गठन गर्ने निर्णय गरेको बैठकपछि प्रदेश सरकारका प्रवक्ता एवं आन्तरिक मामिला तथा कानूनमन्त्री प्रकाशबहादुर शाहले जानकारी दिनुभयो ।

काठमाडौं । अनेरास्ववियूका अध्यक्ष नवीना लामा प्रतिनिधिसभा सदस्यमा निर्वाचित भएपछि संगठनको पुनर्गठन गरिने भएको छ । लामा समानुपातिकतर्फबाट निर्वाचित हुनुभएको हो । एकै व्यक्ति दुई पदमा बस्ने नहुने पार्टीको नियमअनुसार उहाँ अनेरास्ववियूको नेतृत्व छाड्ने तयारीमा हुनुहुन्छ । नेकपा (माओवादी केन्द्र)सँग नेकपा (एमाले)को पार्टी एकता हुन लागेकाले आफ्ना भ्रातृ संगठनको महाधिवेशन एमालेले रोकेपछि लामाले केन्द्रीय कमिटी बैठकबाट नेतृत्व हस्तान्तरण गर्न थाल्नुभएको अनेरास्ववियूका उपाध्यक्ष महेश बर्तौलाले बताउनुभयो । ‘अध्यक्ष लामाको कार्यकाल सकिएको छ र प्रतिनिधिसभाको सदस्यमा समेत निर्वाचित हुनुभएको छ,’ उपाध्यक्ष बर्तौलाले भन्नुभयो, ‘केही दिनअघि अखिलको स्थायी कमिटी बैठकमा समेत उहाँले आफू प्रतिनिधिसभाको सदस्यको भइसकेको अवस्थामा नेतृत्व हस्तान्तरण गर्न कुरा बताउनुभएको थियो ।’ अनेरास्ववियू र अनेरास्ववियू (क्रान्तिकारी)बीच तत्काल एकता पनि सम्भव नहुने भएपछि संगठनलाई चलायमान बनाउन लामाले नेतृत्व छाड्न थाल्नुभएको हो । विसं २०७२ माघ २८ गते अनेरास्ववियूको २२ औं राष्ट्रिय महाधिवेशन भएको थियो । २ वर्ष कार्यकाल रहेको केन्द्रीय कमिटीको समयावधि सकिएको छ । लामाले नेतृत्व छाडेपछि संगठनका उपाध्यक्ष बर्तौला र रश्मि आचार्य, महासचिव ऐन महर र सचिव सुदेश पराजुली नयाँ नेतृत्वको दौडमा रहनुभएको छ । रासस

अर्घाखाँची, फागुन १९ । भूमिकास्थान नगरपालिका वडा नं ७ स्थायी बसोबास गर्ने सुनिल परियार सामाजिक सञ्जाल इमोमार्फत ठगिन पुगेका छन् । यही फागुन १० गते रोजगारीको सिलसिलामा युनाइटेड अरब दुबईमा रहेका प्रताप रानाले परियारलाई तपाईँलाई लट्री परेको छ भनी इमोमार्फत जानकारी गराएका थिए । रानाले परियारलाई “ २५ लाख लट्री परेको छ, नागरिकताको फोटोकपी पठाउनुस्”, भन्दै बैंकको खाता नं मागेका थिए । सबै कुराकानी भइसकेपछि सोे पैसा प्राप्त गर्न केही कर पठाइदिन भनेपछि परियारले विश्वास गरी आइएमइमार्फत ३६ हजार रुपन्देहीका शैलेन्द्रकुमार बहराईलाई पठाइदिए । गत बिहीबार अपराह्न ३ बजेतिर साथी बचत तथा ऋण सहकारी संस्थामार्फत आइएमइ गरेको एक घण्टापछि २५ लाख प्राप्त गर्नका लागि रु ७५ हजार पठाउन भनेपछि परियार दोधारमा परे । उनले दाजु रमेशलाई सो कुरा बताएपछि आफू ठगिएको थाहा पाए । उनका दाजुले पैसा नपठाउन आग्रह गरे । पहिला आफू ठगिएको थाहा पाएपछि अर्को दिन आफूले पठाएको ३६ हजार कसरी पाउन सकिन्छ भन्दै दुई भाइ रुपन्देही गए । इलाका प्रहरी कार्यालय लुम्बिनीमा शैलेन्द्रकुमारको नाममा ठगीको जाहेरी दर्ता गरेपछि प्रहरीले बहराईलाई पक्राउ गरी रकम असुली गरेको छ । जाहेरी दिएको २४ घण्टा नबित्दै इलाका प्रहरी कार्यालय लुम्बिनीका प्रहरी सहायक निरीक्षक विजय धवालले साधारण पोशाकमा प्रहरी पठाई ठगी गर्ने भनिएका बहराईलाई पक्राउ गरे । इलाका प्रहरी कार्यालयमा पक्रिएर ल्याइसकेपछि हिरासतमा राखेर ठगी गरेको ३६ हजार असुल भएकोे छ ।

बैतडी, फागुन ८ । जिल्लामा पृथ्वीनारायण शाहको अहिलेसम्मकै अग्लो शालिकको शिलान्यास गरिएको छ । दशरथचन्द नगरपालिकाका प्रमुख नरेन्द्र थापाले पृथ्वीनारायण शाहको २१ फिट अग्लो शालिकको शिलान्यास गर्नुभएको हो । शालिक निर्माणका लागि चार रोपनी जग्गा बैतडी उद्योग वाणिज्य संघका अध्यक्ष नरबहादुर चन्दले दान गर्नुभएको ‘राष्ट्रियता संरक्षण अभियान’का अध्यक्ष तथा शालिक निर्माणका परिकल्पनाकार हेमबाबु लेखकले जानकारी दिनुभयो । दशरथचन्द नगरपालिका–५ सुन्दरखालीमा पृथ्वीबाटिकासहितको २१ फिट अग्लो शालिक र विशाल नेपालको नक्सा बनाइने लेखकले बताउनुभयो । निर्माणका लागि करिब रु एक करोड खर्च लाग्ने उहाँको भनाइ छ ।

कैलाली, माघ २७ । कैलालीको धनगढी विमानस्थलमा भिओर/डिएमई उपकरण जडानका लागि अध्ययन सुरु भएको छ । नेपाल नागरिक उडड्यन प्राधिकरण र निर्माण कम्पनी नेपाल ईको चार्ली (एनईसी)ले अध्ययन सुरु गरेका हुन् । प्राधिकरणका उपनिर्देशक सञ्जिव सिंह कठायतसहित निर्माण कम्पनी एनईसीको प्राविधिक टोलीले धनगढीमा अध्ययन सुरु गरेका हुन् । प्राधिकरणसँग जापान अन्तर्राष्ट्रिय सहयोग नियोग जाईकाले दुई वर्षअघि नै धनगढी विमानस्थलमा भिओर/डिएमई र एप्रोच लाईट जडानको सम्झौता गरेको थियो । सम्झौता बमोजिम त्यसको अध्ययनपछि मेसिन जडान गर्ने उद्देश्यका साथ उक्त टोली आएको विमानस्थल प्रमुख छविसिंह ठकुल्लाले बताए । टोलीले विमानस्थल टावर र मेसिन कहाँ, कसरी र कुन ठाउँमा जडान गर्ने भन्नेबारे अध्ययन गर्ने छ । आगामी वर्षको हिउँददेखि धनगढी विमानस्थलमा जहाजको दिशा निर्देश गर्ने उपकरण भिओर, पाइलटलाई विमानस्थल र जहाजको दुरीको निर्देश गर्ने डिएमई र रात्रीकालीन उडानका लागि एप्रोच लाईट जडान कार्य सुरु हुनेछ ।